ߡߙߊ߬ߒ߬ߡߊ߬ߟߌ߬ ߜߘߍ߫ ߟߋ߬ ߝߣߊ߫ ߞߍߣߍ߲߫ ߡߙߎ߬ߓߊ ߟߊ߫ ߓߎ߬ߙߋ߬ ߓߎߞߊߙߌߦߊ߫ ߞߐ߬ߟߏ߲߫ ߕߊ߬ߡߌ߲߬ߣߍ߲ ߛߎ ߘߐ߫߸ ߂߀߂߆ ߞߏ߲ߓߌߕߌ߮ ߕߟߋ߬ ߁߃߸ ߞߵߊ߬ ߘߎ߰ߛߊ ߜߍ߫ ߞߎߣߎ߲ߟߏ߲ ߠߊ߫ ߞߏ߲ߓߌߕߌ߮ ߕߟߋ߬ ߁߄. ߡߙߊ߬ߒ߬ߡߊ߬ߟߌ ߟߋ߬ ߥߊߣߍ߲߫ ߞߍ߫ ߟߊ߫ ߓߎߞߊߙߌߦߊ߫߸ ߦߋ߲߬ ߦߋ߫ ߞߌ߲߬ߕߌ߬ߢߊ߲߫ ߡߙߊ߬ߓߊ߰ߘߊ߬ ߞߎߘߊ ߟߋ߬ ߘߐ߫߸ ߓߎ߬ߙߋ߬ ߖߡߊߣߊ ߞߊ߲߬، ߞߊ߬ߕߎ߲߯߸ ߗߍ߭ ߘߏ߫߸ ߞߏ߫ ߛߌߘߌ߬ ߝߏߝߣߊ߫߸ ߊ߬ ߛߊ߲߬ ߄߁ ߠߋ߬ ߕߋ߲߬߸ ߏ߬ ߟߋ ߡߊߘߌߡߌ߲߫ ߞߏߖߎ߯ߦߊ ߞߍߣߍ߲߫ ߊ߬ ߓߟߏߞߌߣߌ߲ ߠߊ߫ ߡߐ߱ ߘߏ߫ ߓߟߏ߫ ߡߙߎ߬ߓߊ ߟߊ߫߸ ߞߵߊ߬ ߛߐ߬ߘߐ߲߬ ߊ߬ ߟߐ߬ߣߴߊ߬ ߘߍ߬ߢߐ߲߮ ߘߏ߫ ߡߊߞߐ߬ߣߐ߲ ߠߊ߫ ߓߊ߯ߙߊ߫ ߦߙߐ߫ ߟߊ߫ ߕߊ߯ ߛߌߟߊ ߟߊ߫.
ߞߏ߲߬ߓߏ ߊߓߘߎߟߊߦߌ߫ ߓߊߛ߭ߌߙߎ߬ ߞߐ߲ߘߍ߫ ߟߊ߫ ߝߐߟߌ߫ ߘߐ߫߸ ߊ߬ߟߋ ߦߋ߫ ߣߊ߲߬ߕߌ߰ ߘߊ߲ߘߊߟߌߟߊ ߟߋ߬ ߘߌ߫߸ ߓߍ߯ ߦߴߊ߬ ߞߟߌ߫ ߟߊ߫ ߞߏ߫ ߊߓߋ߬ߛߋ. ߊ߬ ߞߊ߲߫ ߞߏ߫ ߡߙߊ߬ߒ߬ߡߊ߬ߟߌ ߢߌ߲߬ ߞߍ߫ ߘߊ߫ ߦߋߙߋ߲ߦߋߙߋ߲ ߣߌ߫ ߞߋߟߋ߲ߙߋ߲ ߕߍߟߊ ߟߋ߬ ߘߐ߫.
ߟߊ߬ߛߙߋ߬ߦߊ߬ߟߌ߬ ߓߟߏ ߏ߬ ߟߋ ߡߊ߬߸ ߡߐ߰ ߣߊ߯ߣߌ߲߫ ߥߟߊ߫ ߡߐ߰ ߟߏ߯ߟߎ߫ ߟߋ߬ ߣߌ߫ ߡߙߎ߬ߓߊ ߕߎ߲߬ ߘߌ߫ ߞߍ߫߸ ߊ߬ߟߎ߬ ߓߍ߯ ߢߊ ߡߊߕߎ߲߯ߣߍ߲߫، ߊ߬ߟߎ߫ ߞߵߊ߬ ߝߐ߫ ߛߌߘߌ߬ ߡߊ߬ ߏ߬ ߢߊ ߟߋ߬ ߞߏ߫ ߊ߬ ߦߋ߫ ߖߌ߰ ߊ߬ ߟߊ߫ ߔߏߔߏ ߞߊ߲߬ ߞߵߊ߬ ߘߴߊ߬ߟߎ߫ ߡߊ߬.
ߛߌߘߌ߬ ߡߊ߫ ߛߐ߲߬ ߏ߬ ߟߋ ߡߊ߬߸ ߊ߬ ߞߵߊ߬ ߝߐ߫ ߞߏ߫ ߊ߬ ߦߴߊ߬ ߖߘߍ߬ ߡߞߊߘߊ߲߫ ߠߊ߫، ߓߊߏ߬߸ ߞߋߟߋ߲ ߞߵߊ߬ ߝߐ߫ ߞߏ߫ ߊ߬ ߦߋ߫ ߡߙߎ߬ߓߊ ߞߍ߫ ߟߊ߫ ߞߵߊ߬ ߝߙߊ߫ ߛߌߘߌ߬ ߞߎ߲߭ ߘߐ߫߸ ߊ߬ ߞߵߊ߬ ߓߟߏ ߞߘߐߕߊ߬ ߞߊ߬ ߡߙߎ߬ߓߊ ߏ߬ ߟߋ ߟߊߓߍ߲߬، ߏ߬ ߞߵߊ߬ ߕߍ߰ ߊ߬ ߓߟߏ ߟߋ߫ ߝߟߌߟߌ߫߸ ߞߵߊ߬ ߡߊߘߌߡߌ߲߫ ߞߏߖߎ߯ߦߊ ߞߍ߫.
ߛߌߘߌ߬ ߝߏߝߣߊ߫ ߣߌ߲߬ ߦߋ߫ ߛߌ߱ ߘߐ߫ ߝߊ߬ߕߐ߬ߦߊ߫ ߟߋ߬߸ ߡߏ߬ߛߏ ߦߴߊ߬ ߞߎ߲߬߸ ߘߋ߲߫ ߛߓߊ߬ ߦߴߊ߬ ߓߟߏ߫، ߊ߬ ߡߊߘߌߡߌ߲ ߞߐ ߟߋ߬ ߘߐ߫߸ ߊ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫߸ ߏ߬ ߟߎ߫ ߞߊ߬ ߓߊ߯ߙߊ߫ ߞߎ߲߬ߝߟߐ ߟߎ߬ ߞߍ߫ ߊ߬ ߟߊ߫، ߊ߬ߟߎ߬ ߓߊ߲߫ ߘߊ߫ ߞߵߊ߬ ߕߊ߬ ߞߵߊ߬ ߟߥߊ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߛߊ߫ ߘߐ߰ߘߏ߲߬ ߘߌ߫ ߞߍ߫ ߊ߬ ߟߊ߫ ߦߋ߲߬ ߓߘߍߞߍ߬.
ߞߏ߲߬ߓߏ ߊߓߋ߬ߛߋ ߡߍ߲ ߞߊ߬ ߣߌ߲߬ ߞߏ ߓߍ߯ ߞߌ߬ߛߍ ߞߍ߫ ߊ߲ ߕߍ߯߸ ߏ߬ ߞߵߊ߬ ߞߊ߲ߠߊߘߌ߫ ߖߡߊ߬ߣߊ߬ߘߋ߲ ߠߎ߫ ߟߋ߬ ߡߊ߬߸ ߞߏ߫ ߓߍ߯ ߦߴߊ߬ ߖߊ߲߬ߕߏ߬߸ ߊ߬ ߕߌ߯ߕߌ߯ ߛߏ ߞߏߟߊߕߍ߮ ߟߎ߬.
ߊ߬ ߞߊ߲߫ ߞߏ߫ ߝߏ߫ ߣߊ߲߬ߕߌ߮ ߟߎ߬ ߣߌ߫ ߖߡߊ߬ߣߊ߬ߘߋ߲ ߠߎ߫ ߟߋ߬ ߦߋ߫ ߓߊ߯ߙߊ߫߸ ߞߊ߬ ߡߐ߰ ߞߏߙߏ߲ ߠߎ߬ ߞߏߝߐ߫.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߦߟߌߓߌߟߊߟߌ߫߫ ߓߟߏ ߡߊ߬߸ ߞߏ߫ <<ߕߐ߲ߓߟߏߡߊ߫ ߢߌߡߊ߫ ߕߴߦߋ߲߬߸ ߞߟߍ߬ߡߐ߰ ߢߌߡߊ߫ ߕߴߦߋ߲߬߸ ߣߌ߫ ߖߡߊ߬ߣߊ߬ߘߋ߲߬ ߢߌߡߊ ߕߍ߫.>> ߞߵߊ߬ ߦߌ߬ߘߊ߬ ߞߏ߫ ߣߌ߫ ߡߐ߰ ߖߎ߮ ߟߎ߬ ߛߋ߫ ߘߊ߫ ߞߏߝߐ߫ ߟߊ߫ ߖߏߣߊ߫߸ ߘߏ߫ ߘߌ߫ ߓߐ߫ ߕߌߢߍߟߌ ߟߊ߫.
ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߡߙߊ߬ߒ߬ߡߊ߬ߟߌ ߢߌ߲߬ ߠߎ߬ ߡߊ߲߫ ߞߊ߲߫ ߞߊ߬ ߡߌ߬ߣߊ߬ ߓߟߏߞߐ߫ ߟߊ߫ ߘߋ߬߸ ߝߏ߫ ߞߵߊ߬ ߡߌ߬ߣߊ߫ ߛߍ߬ߓߍ ߟߋ߬ ߟߊ߫߸ ߛߊ߫ ߞߊ߬ ߞߎ߲߬ߠߊ߬ߛߘߌ ߞߟߍ߬.
