ߝߘߊ߬ߝߌ߲߬ߠߊ߫ ߓߘߊ߫ ߞߍ߫ ߜߙߋ߫ ߝߌߟߊߣߊ߲ ߘߌ߫ ߘߎߢߊ߫ ߜߙߋ ߟߎ߬ ߕߍߡߊ߬߸ ߡߍ߲ ߕߎ߰ߡߏߙߌ ߞߊ߫ ߛߌߦߊ߫ ߜߙߋ ߕߐ߭ ߟߎ߬ ߕߊ ߘߌ߫߸ ߊ߬ߟߋ ߟߋ߬ ߕߎ߰ߣߍ߲߫ ߊߡߙߌߞߌ߬ ߟߊ߫ ߡߎ߬ߕߎ߲߬، ߕߎ߰ߡߏ߬ߙߌ߬ ߗߋߘߋ߲ ߠߎ߬ ߟߊ߫ ߞߌ߬ߓߊ߬ߙߏ߬ ߟߊ߬ߛߋ߬ ߕߐ߲ ߣߐ߬ ߖߊ߬ߕߋ߬ߛߎ߬ߓߐ ߘߏ߫ ߟߋ߬ ߞߊ߲߬ߞߎߡߊ ߟߊߖߍ߲ߛߍ߲߫ ߠߊ߫ ߓߌ߬ ߛߌ߬ߣߌ߲߬ߟߏ߲ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߆߸ ߞߊ߬ ߝߘߊ߫ ߝ߭ߊߕߌߞߊ߲߫ ߠߊ߫.
߂߀߂߄ ߥߊ߬ߛߌ߬ߥߙߊ ߟߊ߫߸ ߕߎ߰ߡߏߙߌ ߟߎ߬ ߟߊ߫ ߢߐ߲߬ߞߌ߲߬ߘߊ ߟߎ߫ ߞߊ߬ ߖߊ߬ߕߋߡߌߣߊ ߡߍ߲ ߞߍ߫߸ ߊ߬ ߦߋ߫ ߘߊ߫ ߞߏ߫ ߕߎ߰ߡߏߙߌ ߡߍ߲ ߦߋ߫ ߘߎߢߊ߫ ߘߐ߫ ߖߊ߬ߕߋ߬ߛߎ߬ߓߐ߬ ߓߟߏ ߡߊ߬߸ ߏ߬ ߟߋ ߘߍ߲߬ߞߣߍ߬ߦߊ߬ߓߊ߯ ߥߟߎ߬ߡߊ߬ ߁،߄߂߂ ߘߌ߫ ߘߎߢߊ߫ ߘߐ߫، ߡߐ߰ ߘߴߊ߬ ߝߐ߫ ߏ߬ ߘߐ߫߸ ߞߏ߫ ߛߊ߲߬ ߞߋߟߋ߲ ߣߌ߲߬ ߞߣߐ߫߸ ߡߐ߰ ߞߋ߲߬ߥߟߎ߬ ߁߆ ߆߉߀ ߀߀߀ ߟߋ߬ ߝߙߊ߬ ߘߊ߫ ߕߎ߰ߡߏߙߌ ߦߙߌߞߊ ߞߊ߲߬.
ߝߘߊ߬ߝߌ߲߬ߠߊ߫ ߓߌ߬ߟߊ߬ߡߊ ߘߐ߫߸ ߊ߬ ߓߘߊ߫ ߕߊ߬ߡߌ߲߬ ߋߙߐߔߎ߬ ߟߊ߫ ߣߍ߲ߞߍ߫، ߓߊߏ߬߸ ߝߘߊ߬ߝߌ߲߬ߠߊ߫ ߕߎ߰ߡߏߙߌ ߦߋ߫ ߘߍ߲߬ߞߣߍ߬ߦߊ߬ߓߊ߯ ߡߐ߰ ߞߋ߲߬ߥߟߎ߫ ߂߈߈،߃߁ ߠߋ߬ ߘߌ߫߸ ߋߙߐߔߎ߬ ߕߊ ߦߋ߫ ߞߋ߲߬ߥߟߎ߫ ߂߈߇،߂߄ ߘߐ߫، ߊߡߙߌߞߌ߬ ߟߋ߬ ߛߊ߲ߝߍ߬ ߕߋ߲߬߸ ߏ߬ ߕߎ߰ߡߏߙߌ ߦߙߌߞߊ ߦߋ߫ ߞߋ߲߬ߥߟߎ߫ ߆߇߈،߈߇ ߟߋ߬ ߘߐ߫߸ ߏ߬ ߕߊ߬ߡߌ߲߬ߣߍ߲߫ ߊߛߌ߫ ߟߊ߫߸ ߏ߬ ߟߎ߬ ߡߍ߲ ߠߎ߬ ߕߊ ߦߋ߫ ߞߋ߲߬ߥߟߎ߫ ߁߅߆،߁߇ ߘߐ߫.
ߡߎ߲߬ ߞߏߛߐ߲߬ ߝߘߊ߬ߝߌ߲߬ߠߊ߫ ߦߟߍ߬ߣߍ߲߫ ߋߙߐߔߎ߬ ߛߊ߲ߝߍ߬ ߕߎ߰ߡߏߙߌ ߦߙߌߞߊ ߟߊ߫ ߛߌߦߊߦߊ ߘߐ߫؟ ߛߊ߲߬ ߞߋߟߋ߲ ߣߌ߲߬ ߞߣߐ߫߸ ߝߘߊ߬ߝߌ߲߬ߠߊ߫ ߕߎ߰ߡߏߙߌ ߡߊߞߊ߬ߝߏ߬ ߘߊ߫ ߡߐ߰ ߞߋ߲߬ߥߟߎ߬ ߇،߅߈ ߠߋ߬ ߟߊ߫߸ ߞߵߊ߬ ߛߐ߬ߘߐ߲߬ ߋߙߐߔߎ߬ ߕߊ ߡߊߞߊ߬ߝߏ߬ ߘߊ߫ ߛߊ߲߬ ߞߋߟߋ߲ ߣߌ߲߬ ߞߣߐ߫ ߡߐ߰ ߉߁߁ ߀߀߀ ߠߋ߬ ߟߊ߫.
ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߊ߬ߟߎ߬ ߟߊ߫ ߣߊߡߎ߲ߞߏߕߌ߮ ߟߎ߬ ߦߋ߫ ߥߊ߬ߙߊ ߞߊ߲߬߸ ߏ߬ ߟߎ߫ ߕߘߍ߬ ߄߀߇ ߄߂߁ ߠߋ߬ ߘߌ߫ ߂߀߂߄ ߟߊߓߊ߲ ߠߊ߫߸ ߥߟߴߊ߬ߟߎ߬ ߡߊߞߊ߬ߝߏ߬ ߘߊ߫ ߄߂߅ ߘߐߙߐ߲߫ ߠߋ߬ ߟߊ߫، ߝߘߊ߬ߝߌ߲߬ߠߊ߫ ߕߊ ߟߋ߬ ߕߊ߬ߡߌ߲߬ߣߍ߲߫ ߥߙߊ߬ ߟߊ߫߸ ߝߏ߫ ߞߊ߬ ߛߋ߫ ߁ ߆߇߆ ߖߊ߬ߕߋ߬ ߘߐ߫߸ ߋߙߐߔߎ߬ ߣߊߡߎ߲ߞߏߕߌ߮ ߖߌ߰ ߘߊ߫ ߟߋ߬߸ ߞߊ߬ ߡߐ߰ ߂ ߄߈߃ ߓߐ߫ ߊ߬ ߟߊ߫.
ߏ߬ ߓߍ߯ ߞߐߝߍ߬߸ ߘߌ߯ߣߊ ߘߊ߯ߥߊߞߍߟߊ ߡߍ߲ ߠߎ߬ ߦߋ߫ ߦߋ߲߬߸ ߏ߬ ߛߎ߫ ߦߋ߫ ߖߌ߱ ߟߋ߬ ߞߊ߲߬ ߘߎߢߊ߫ ߘߐ߫، ߝߘߊ߬ߝߌ߲߬ߠߊ߫ ߕߊ ߟߋ߬ ߥߊ߬ߙߊ ߞߊ߲߬߸ ߓߊߏ߬߸ ߏ߬ ߟߎ߬ ߦߙߌߞߊ ߓߘߊ߫ ߛߋ߫ ߂ ߁߉߀ ߘߐ߫߸ ߇߈߆ ߟߋ߬ ߟߊߣߴߊ߬ ߞߊ߲߬.
ߟߞߊ߬ߙߊ߲߬ߠߌ߲߬ ߦߙߐ ߣߌ߫ ߘߊ߲ߘߊߟߌ߫ ߦߙߐ߫ ߛߌߦߊߡߊ߲߫ ߠߋ߬ ߕߎ߰ߡߏߙߌ ߟߎ߬ ߓߟߏ߫ ߘߎߢߊ߫ ߢߊߝߍ߬، ߞߊ߬ߕߎ߲߯߸ ߛߌ߲ߡߌ߲߫ ߞߊߙߊ߲ߕߊ߫ ߇߅ ߄߄߈ ߦߴߊ߬ߟߎ߬ ߓߟߏ߫߸ ߓߊߖߎ߫ ߞߊߙߊ߲ߕߊ߫ ߁߀߃ ߆߆߆ ߦߴߊ߬ߟߎ߬ ߓߟߏ߫. ߘߊ߲ߘߊߛߏ߫ ߅ ߃߉߇ ߦߴߊ߬ߟߎ߬ ߓߟߏ߫߸ ߊ߬ ߣߌ߫ ߘߊ߲ߘߊߟߌߟߊ߫ ߁߃ ߆߄߆ ߖߊ߬ߕߋ߬.
ߖߊ߬ߕߋ߬ߛߎ ߢߌ߲߬ ߠߋ߬ ߊ߬ ߦߌ߬ߘߊ߬ ߟߊ߫߸ ߞߏ߫ ߕߎ߰ߡߏ߬ߙߌ߬ߦߊ ߖߌߘߊ߲ ߓߘߊ߫ ߥߊ߬ߙߊ߫ ߝߘߊ߬ߝߌ߲߬ߠߊ߫ ߞߊ߬ ߕߊ߬ߡߌ߲߬ ߘߎߢߊ߫ ߦߙߐ߫ ߛߌߦߊߡߊ߲߫ ߞߊ߲߬߸ ߋߙߐߔߎ߬ ߦߋ߫ ߕߊ߬ߡߌ߲߬ ߠߴߊ߬ ߛߋ߲߬ߓߐ߬ ߟߊ߫ ߟߋ߬ ߝߊߦߌߘߊ߫߸ ߞߵߏ߬ ߞߎ߲߭ ߞߍ߫ ߦߙߌߞߊ ߟߊ߫ ߖߌ߱ ߘߌ߫.
