ߞߎ߲߬ߢߐ߲߯ ߛߊ߬ߓߊ߫ ߟߋ߬ ߕߏߣߍ߲߫ ߡߎ߬ߕߎ߲߬߸ ߥߛߊ߬ߘߋ߲߬ ߢߣߊߕߊߟߌ ߣߌ߫ ߞߊ߬ߝߏ߬ߙߋ߲߬ ߢߣߊߕߊߟߌ ߡߍ߲ ߟߐ߯ߟߊߣߍ߲߫ ߞߵߊ߬ ߕߏ߫ ߂߀߂߆ ߘߓߊ߬ߕߊ ߕߟߋ߬ ߃߁ ߠߊ߫߸ ߏ߬ ߘߌ߫ ߛߋ߫، ߒ߬ߓߊ߬ ߞߊ߲ߞߊ߲߫ ߞߣߐ߫ ߏ߬ ߘߐ߫߸ ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߬߸ ߞߕߌߛߓߍߟߊ ߟߎ߬߸ ߏ߬ ߟߎ߫ ߟߋ߬ ߓߐߣߍ߲߫ ߘߌ߲߬ߞߌ߬ߙߊ߬ ߛߌߦߊߡߊ߲߫ ߠߎ߫ ߘߐ߫ ߕߌ߲߬ߞߎߘߎ߲ ߞߣߐ߫ ߞߊ߬ ߣߊ߬ ߕߟߋ߬ ߛߓߊ߬ ߟߊߞߐ߯ߟߌ߫ ߞߊ߲ߡߊ߬ ߞߊ߲ ߞߊ߲ߞߊ߲߫ ߞߣߐ߫߸ ߡߍ߲ ߘߊߡߌ߬ߣߊ߬ ߘߊ߫ ߞߐ߬ߓߊ߬ߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߟߋ߬ ߁߃، ߟߊ߬ߞߐ߰ߟߌ ߣߌ߲߬ ߞߍ ߦߴߌߘߐ߫ ߟߍߙߊߓߏ߲߫ ߟߊ߲߱ߛߌ߬ߣߍ߬ ߥߟߌߦߊߡߛ ߟߊ߫߸ ߞߵߊ߬ ߟߊߥߟߌ߬ ߊ߬ߟߎ߬ ߛߋߞߏߦߊ ߡߊߞߊ߬ߝߏ ߡߊ߬ ߢߣߊߕߊߟߌ ߞߕߌ߫ ߞߏ ߟߎ߬ ߘߐ߫.
ߟߊ߬ߞߐ߰ߟߌ ߣߌ߲߬ ߞߎ߲߭ ߠߋ߬߸ ߛߊ߫ ߞߕߌ߫ ߓߊ߯ߙߟߊ ߢߌ߲߬ ߠߎ߬ ߘߌ߫ ߟߊߞߐ߯߸ ߞߵߊ߬ߟߎ߬ ߤߊ߲ߞߟߌ ߡߊߞߊ߬ߝߏ߫ ߞߊ߬ ߓߍ߲߬ ߢߣߊߕߊߟߌ߫ ߞߏ߫ ߥߦߐ ߟߎ߫ ߡߌ߬ߣߊ߬ ߢߊ ߡߊ߬، ߞߊ߬ߕߎ߲߯߸ ߡߊ߬ߛߐ߬ߛߐ߬ߟߌ ߘߏ߫ ߟߎ߫ ߦߋ߫ ߞߍ߫ ߟߊ߫ ߢߣߊߕߊߟߌ ߘߐ߫ ߛߐ߲߬߸ ߏ߬ ߞߊߟߌߡߊ߲߫ ߞߍ߫ ߟߊ߫ ߥߐ߬ߦߐ ߘߌ߫، ߏ߬ ߘߐ߫߸ ߝߏ߫ ߛߊ߬ߙߌ߬ߦߊ߬ ߡߐ߮ ߟߎ߬ ߦߋ߫ ߟߊߞߐ߯ ߟߋ߬ ߏ߬ ߟߎ߫ ߡߌ߬ߣߊ߬ ߢߊ ߟߊ߫ ߜߊߟߌߜߊߟߌ߫.
ߟߊ߬ߞߐ߰ߟߌ ߣߌ߲߬ ߘߊߡߌߣߊ ߘߐ߫ ߏ߬ ߘߐ߫߸ ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߞߊ߲ߘߊ߸ ߝߊ߬ߟߎ߫ ߘߎ߲߬ߓߎ߬ߦߊ߫ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߓߍ߲߬ ߢߣߊߕߊߟߌ ߞߕߌ߫ ߞߏ ߟߎ߫ ߕߐ߬ߣߐ ߡߊ߬، ߊ߬ ߞߊ߲߫ ߞߏ߫ <<ߢߣߊߕߊߟߌ߫ ߞߏ߫ ߥߦߐ ߦߋ߫ ߡߌ߬ߙߌ߲߬ߘߌ ߞߎ߲߬ߞߊ߲߬ߞߏ ߟߋ߬ ߘߌ߫.>> ߏ߬ ߞߘߐ ߟߋ߬߸ ߊ߬ߟߋ ߘߍ߲ߣߍ߲߫ ߠߋ߬ ߖߡߊ߬ߣߊ ߛߊߓߊ߯ߦߊ ߟߊ߫ ߌߞߘߐ߫، ߏ߬ ߘߐ߫߸ ߝߐߢߐ߲߯ߞߐ ߘߊ߲ߘߊ ߘߐߙߐ߲߫ ߕߍ߫ ߞߕߌߓߊ߯ߙߟߊ ߟߎ߫ ߡߊ߬ ߘߋ߬߸ ߓߊ߬ߙߌ߬ ߖߊ߬ߡߊ ߡߙߌߦߊ ߝߣߊ߫ ߡߊߓߏ߲߬ߧߊ ߞߊ߬ ߓߍ߲߬ ߢߣߊߕߊߟߌ ߛߙߊߕߌ ߟߎ߫ ߡߊ߬߸ ߏ߬ ߟߎ߬ ߦߋ߫ ߓߏ߲߬ߓߊ߬ ߘߌ߫، ߞߊ߬ߕߎ߲߯߸ ߞߕߌߓߊ߯ߙߟߊ ߟߊ߫ ߞߍߕߊ ߘߊ߲߬ ߕߍ߫ ߞߕߌ ߟߊ ߘߌ߫ ߡߊ߬ߡߌ߬ߣߊ߬ߟߌ߬ߟߊ߫ ߝߌ߬ߟߊ ߕߍ߫߸ ߒ߬ߞߊ߬ ߞߊ߬ ߛߋ߫ ߡߌ߬ߙߌ߲߬ߘߌ ߝߣߊ߫ ߟߊߡߍ߲߫ ߠߊ߫ ߞߵߏ߬ ߟߎ߬ ߝߣߊ߫ ߤߊߞߍ ߘߴߊ߬ߟߎ߫ ߡߊ߬.
ߊ߬ߟߋ ߟߊ߫ ߝߐߟߌ߫ ߘߐ߫߸ ߢߣߊߕߊߟߌ ߞߕߌߕߍ߯ߟߊ ߦߋ߫ ߡߊߘߍ߬ߡߍ߲߬ ߠߊ߫ ߝߘߏ߬ߓߊ߬ ߞߏߕߌ߯ߘߊ ߡߍ߲ ߓߟߏ߫߸ ߊ߬ ߣߌ߫ ߞߕߌߛߓߍߟߊ ߟߎ߬߸ ߏ߬ ߟߎ߬ ߞߊ߫ ߞߊ߲߫ ߞߵߊ߬ߟߎ߫ ߖߊ߬ ߡߍ߲ ߞߊ߲߬߸ ߏ߬ ߟߋ ߢߣߊߕߊߟߌ ߕߊ߬ߡߌ߲ ߘߌ߫ ߊ߬ ߢߌ߬ߡߊ ߟߊ߫߸ ߞߣߐߜߍߦߊ ߣߌ߫ ߕߋߟߋ߲ ߞߣߐ߫߸ ߞߊ߬ ߓߍ߲߬ ߖߡߊ߬ߣߊ ߛߊ߬ߙߌ߬ߦߊ ߟߎ߬ ߝߐ߫ ߞߊ߲ ߡߊ߬߸ ߊ߬ ߣߌ߫ ߓߍ߲߬ߞߊ߲߬ߡߊ ߡߍ߲ ߖߍ߬ߘߍ ߦߋ߫ ߖߌ߬ߣߍ߬ ߣߌ߫ ߘߎߢߊ߫ ߖߡߊ߬ߣߊ ߕߐ߭ ߟߎ߬ ߕߍ߫߸ ߓߘߍ߬ߓߘߍ߬ߟߌ ߣߌ߫ ߣߊ߲߬ߒ߬ߕߊ߲߬ߧߊ ߛߊ߬ߙߌ߬ߦߊ߬ ߞߎ߲ߘߊ߫.
ߞߕߌ߫ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߟߊ߬ߞߐ߰ߟߌ ߣߌ߲߬ ߘߌߣߊ߬ ߞߎߡߊ߫ ߞߏ߫ ߜߘߍ߫ ߝߣߊ߫ ߞߊ߲߬߸ ߡߍ߲ ߟߐ߬ߣߍ߲߫ ߞߕߌߘߊ ߟߊ߫ ߓߊ߯ߙߊ ߡߊ߬ ߡߊ߲߬ߞߊ߲ ߠߎ߬ ߢߍߓߍ߭ ߘߐ߫، ߏ߬ ߦߋ߫ ߡߊ߬ߡߙߊ߬ߟߌ߫ ߟߋ߬ ߘߌ߫߸ ߡߍ߲ ߦߋ߫ ߡߐ߱ ߟߎ߬ ߡߐߣߍ߫ ߞߏ ߟߎ߬ ߟߊߘߍ߬ ߟߊ߫߸ ߞߊ߬ ߛߋ߫ ߡߊ߲߬ߞߊ߲߫ ߥߟߌ߬ߕߐ߬ߟߊ ߟߎ߬ ߘߐߛߎߡߊ߫ ߟߊ߫߸ ߞߊ߬ ߞߐ߲߰ ߊ߬ ߞߏ ߟߊߥߊ߬ߙߊ ߢߍ߫.
ߝߊ߬ߟߎ߫ ߘߎ߲߬ߓߎ߬ߦߊ߫ ߞߊ߬ ߦߟߌߓߌߟߊߟߌ߫ ߞߍ߫ ߊ߬ ߟߊ߫ ߛߙߊ߬ߣߎ߲ ߘߐ߫߸ ߞߏ߫ <<ߝߘߏ߬ߓߊ߬ ߞߏߕߌ߯ߘߊ ߞߊ߫ ߞߊ߲߫ ߞߊ߬ ߖߡߊ߬ߣߊ߬ߘߋ߲ ߠߎ߬ ߟߊ߫ ߕߐ߬ߣߐ ߟߋ߬ ߡߞߊߘߊ߲߫߸ ߊ߬ ߣߌ߫ ߢߣߊߕߊߟߌ ߓߍ߲߬ߞߊ߲߬ߡߊ ߟߎ߬.>> ߞߊ߬ ߕߋߟߋ߲ ߣߌ߫ ߜߍߦߊ ߟߊߘߏ߲߬ ߢߣߊߕߊߟߌ ߞߐߝߟߌ ߟߎ߬ ߘߐ߫.
ߛߋߒߞߏߟߦߊ ߡߊ߬ߝߊ߲ ߝߍ߬߸ ߕߘߍ߬ߒ߬ߘߐ߬ߓߊ߮ ߟߎ߬ ߓߍߣߊ߬ ߟߊߞߐ߯ ߞߏ߫ ߛߌߦߊߡߊ߲߫ ߠߋ߬ ߟߊ߫߸ ߞߊ߬ ߓߍ߲߬ ߡߞߊ߬ߛߌ߬ߟߌ ߞߎ߲߬ߕߊ߮ ߟߎ߫ ߡߊ߬߸ ߏ߬ ߡߍ߲ ߦߋ߫ ߟߊߛߎ߬ߘߎ߲߬ߧߊ߬ ߟߊ߫ ߢߣߊߕߊߟߌ ߞߣߐ߫ ߛߐ߲߬، ߊ߬ ߣߌ߫ ߛߌ߰ߞߊ߲ ߞߊ߬ ߡߎ߲߬ ߝߐ߫ ߏ߬ ߞߏ ߟߎ߫ ߞߊ߲߬߸ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߕߊ߬ߣߍ߲ ߞߵߊ߬ ߟߊ߫ ߣߊ߲߬ߒ߬ߕߊ߲߬ߧߊ ߛߊ߬ߙߌ߬ߦߊ߬ ߜߙߋ ߟߎ߫ ߞߊ߲߬.
ߞߊ߲ߞߊ߲߫ ߕߌ߲߬ߞߎߘߎ߲ ߢߣߊߕߊߟߌ ߗߋߕߌ߮߸ ߞߊ߬ߓߊ߫ ߛߘߌ߬ߓߋ߫ ߞߊ߬ ߓߟߏߘߐߓߍ߲ ߣߌ߲߬ ߕߐ߬ߣߐ ߝߐ߫ ߞߊ߬ ߞߐ߲߰ ߢߣߊߕߊߟߌ ߢߍ߫، ߊ߬ߟߋ ߞߵߊ߬ ߦߌ߬ߘߊ߬ ߞߏ߫ <<ߣߴߌ ߞߴߊ߬ ߡߍ߲߫ ߞߏ߫ ߢߣߊߕߊߟߌ ߕߊ߬ߡߌ߲߬ ߘߴߊ߬ ߢߌ߬ߡߊ ߟߊ߫߸ ߞߕߌ߫ ߞߏ ߡߍ߲ ߠߎ߬ ߦߴߊ߬ ߘߐ߫߸ ߏ߬ ߟߎ߫ ߟߋ߬ ߕߍ߰ߣߴߊ߬ ߢߌ߬ߡߊ ߟߊ߫ ߞߍ߬.>> ߊ߬ ߞߵߏ߬ ߦߌ߬ߘߊ߬.
ߏ߬ ߢߊ߫ ߞߋߟߋ߲ ߠߋ߬ ߝߣߊ߫ ߡߊ߬߸ ߞߊ߲ߞߊ߲߫ ߝߊ߰ߡߊ ߟߎ߬ ߞߊ߬ ߘߏ߫ ߝߐ߫، ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߫ ߞߎߓߋߘߐ ߗߋߕߌ߮߸ ߊ߬ߟߌ߬ߡߊߡߌ߲߬ ߞߡߊ߬ߙߊ߫ ߞߊ߬ ߟߊ߬ߞߐ߰ߟߌ߬ ߞߏ ߣߌ߲߬ ߝߏ߬߸ ߞߵߊ߬ ߕߊ߲߬ߘߏ߬ ߞߏߛߓߍ߫، ߊ߬ߟߋ߫ ߝߍ߬߸ ߣߌ߫ ߢߊ߬ ߕߍߣߊ߬ ߞߍ߫ ߟߊ߫ ߡߊ߲߬ߞߊ߲ ߘߐߛߎߡߊ ߞߐ߫ ߢߣߊߕߊߟߌ ߘߐ߫߸ ߓߘߍ߬ߓߘߍ߬ߟߌ߬ߟߊ ߟߎ߬ ߣߌ߫ ߘߎ߰ߘߋ߲ ߠߎ߬ ߟߊ߫ ߞߎ߲߬ߠߊ߫߸ ߝߏ߫ ߞߊ߬ ߞߕߌߓߊ߯ߙߟߊ ߟߎ߬ ߟߊߞߐ߯ ߟߋ߬ ߜߊߟߌߜߊߟߌ߫.
ߞߊ߲ߞߊ߲߫ ߞߣߐ߫߸ ߞߕߌߓߊ߯ߙߟߊ ߟߎ߬ ߛߋߞߏߦߊ߫ ߡߞߊߝߏ߫ ߕߏ߲ߜߏ ߣߌ߲߬ ߦߋ߫ ߞߏߓߊ߫ ߟߋ߬ ߘߌ߫߸ ߡߍ߲ ߞߍߕߐ߫ ߕߙߎ߬ ߘߌ߫ ߞߊ߬ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߬ ߤߊ߲ߞߟߌ ߡߊߞߊ߬ߝߏ߫ ߞߊ߬ ߓߍ߲߬ ߘߓߊ߬ߕߊ ߕߟߋ߬ ߃߁ ߢߣߊߕߊߟߌ ߡߌ߬ߣߊ߬ ߢߊ ߡߊ߬، ߓߊߏ߬߸ ߣߌ߫ ߞߕߌߕߍ߯ߟߊ ߟߎ߬ ߛߋ߫ ߘߴߊ߬ߟߎ߬ ߟߊ߫ ߓߊ߯ߙߊ ߟߎ߬ ߞߍ߫ ߟߊ߫ ߢߊߟߐ߲ ߠߊ߫߸ ߓߍ߯ߦߊ ߘߌ߫ ߝߊ߲߬ߞߊ߫ ߛߐ߬ߘߐ߲߬߸ ߥߐ߬ߦߐ ߛߌߦߊߡߊ߲߫ ߘߌ߫ ߟߊߛߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
