ߊ߬ߟߋ ߦߋ߫ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߛߋ߲߬ߘߏ߲߬ߢߐ߲߰ ߞߘߐ ߟߋ߬ ߘߌ߫، ߛߋߞߎߓߊ߫ ߞߏ߬ߣߊ߬ߕߍ߫ ߞߊ߲߫ ߞߏ߫ ߊ߬ߟߋ ߓߘߊ߫ ߘߏ߲߬ ߘߎ߲߬ߓߎ߬ߦߊ߬ ߞߏ ߘߐ߫ ߣߌ߫ ߡߊ߲߬ߞߊ߲߬ߕߋ߫ ߕߍ߫، ߡߎ߲߬ ߞߵߊ߬ߟߋ ߢߊߞߘߐߛߋ߫ ߘߎ߲߬ߓߎ߬ߦߊ߬ ߞߏ ߘߐ߫؟ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߕߋ߬ߟߋ߫ ߁߀߀ ߡߍ߲ ߞߍ߫ ߛߋߓߊ߯ߦߊ ߟߊ߫ ߖߡߊ߬߬ߣߊ ߞߎ߲߬ߠߊ߫߸ ߏ߬ ߟߋ ߞߵߊ߬ߟߋ ߢߊߞߘߐߛߋ߫ ߞߊ߬ ߛߴߊ߬ ߘߊ߲߭ ߠߊ߫، ߊ߬ ߞߊ߬ ߕߏ߰ߝߏ ߘߏ߫ ߛߌ߰ ߛߋ߲߬ߠߊ߫ ߏ߬ ߟߋ ߘߐ߫߸ ߞߵߊ߬ ߦߌ߬ߘߊ߬ ߜߎ ߞߏ߫ ߊ߬ ߞߏ ߣߐ߬ ߊ߬ ߤߣߍ߫ ߟߊ߫ ߟߋ߬، ߕߏ߰ߝߏ ߏ߬ ߟߋ ߕߐ߯ ߞߏ <<ߞߊ߲ߓߍ߲ ߞߎ߲߬ߡߞߊ߬ ߕߏ߲ߕߌ߮ ߟߎ߬>> ߞߵߏ߬ ߞߍ߫ ߕߐ߰ߡߊ߬ߛߙߋ߬ ߖߐ߲ߖߐ߲߫ ߘߌ߫߸ ߡߍ߲ ߘߴߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߐߡߊߓߌ߲ߓߌ߲߫ ߠߊ߫ ߂߀߂߅ ߞߏߟߌ߲ߞߏߟߌ߲ ߢߣߊߕߊߟߌ ߝߍ߬.

ߛߋߞߎߓߊ߫ ߞߏ߬ߣߊ߬ߕߍ߬ ߦߋ߫ ߡߊ߬ߞߟߐ߫ ߟߋ߬ ߘߌ߫߸ ߡߍ߲ ߓߘߊ߫ ߓߊ߯ߙߊ߫ ߛߌߦߊߡߊ߲߫ ߞߍ߫، ߞߏ߬ߣߵߊ߬ ߕߴߊ߬ ߟߊ߫ ߓߊ߯ߙߊ ߟߎ߬ ߞߍ߫ ߟߊ߫ ߖߘߍ߬ߦߌߘߊ߫ ߟߊ߫߸ ߊ߬ ߘߏ߲߬ ߕߍ߫ ߟߊ߬ߤߘߌ߫ ߞߎ߲߬ߘߐ߬ߖߊ߲߫ ߕߊ߬ ߟߊ߫، ߣߴߊ߬ ߕߏߣߍ߲߫ ߞߏ߫ ߓߘߍ ߞߐߡߊߓߌ߲ߓߌ߲ ߠߋ߬ ߡߊ߬߸ ߊ߬ ߕߴߏ߬ ߣߌ߫ ߟߐ߯ߟߊߟߌ߫ ߟߊߘߍ߬ ߟߊ߫.

ߊ߬ ߦߋ߫ ߘߍ߬ߟߐ߲߬ߘߐ߬ߦߊ ߖߐ߲ߓߐ߲ߕߌ߮ ߟߋ߬ ߘߌ߫߸ ߊ߬ ߣߌ߫ ߡߊ߬ߡߙߊ߬ߟߌ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߸ ߡߍ߲ ߦߋ߫ ߞߎߡߊ߫ ߟߊ߫ ߊ߲߬ߜ߭ߌ߬ߟߋ߬ ߞߊ߲ ߣߌ߫ ߊߙߊߓߎ߫ ߞߊ߲ ߘߐ߫، ߌߞߏߡߌ߲߬ ߊ߬ ߛߋ߲߬ ߦߋ߫ ߓߘߍ߬ߓߘߍ߬ߟߌ߬ ߞߏ ߝߣߊ߫ ߘߐ߫߸ ߊ߬ ߞߍ߫ ߘߊ߫ ߟߋ߬ ߥߛߊ߬ߘߋ߲ ߘߌ߫ ߝߊ߬ߛߏ߬ ߜߙߊ ߟߊ߫߸ ߊߟߌߝߊ߫ ߕߟߋ ߘߐ߫، ߥߛߊ߬ߓߊ߰ߦߊ ߡߠߍ߲ ߠߊߘߊ߲߫ ߘߊ߫ ߛߊ߬ߙߌ߬ߦߊ߬ߦߊ߬ߟߌ߬ ߈߲ ߓߟߏ߫߸ ߣߴߊ߬ߟߎ߫ ߘߐ߱ߘߏ߲߬ߣߍ߲߫ ߕߍ߬ߘߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߣߊ߲߬ߝߟߏ߬ߦߊ߬ߟߌ ߣߌ߫ ߞߐߞߊ߲߫ ߓߌߟߊߢߐ߲߯ߡߊ ߟߎ߬ ߟߊ߫߸ ߊ߬ߟߋ ߟߋ߬ ߕߍ߬ߘߍ߫ ߏ߬ ߞߊ߲ߕߌ߯ ߛߙߍߞߍ ߘߌ߫.

ߊ߬ ߛߊ߲߬ ߕߊ߲߫ ߣߌ߫ ߞߐ ߟߋ߬ ߕߋ߲߬߸ ߛߋߞߎߓߊ߫ ߞߏ߬ߣߊ߬ ߕߍ߫ ߦߋ߫ ߘߍ߬ߞߙߎ߬ ߛߌߦߊߡߊ߲߫ ߣߌ߫ ߛߘߞ ߛߌߦߊߡߊ߲߫ ߡߊߡߙߊ߬ ߟߊ߫߸ ߞߵߊ߬ߟߎ߬ ߡߊߘߍ߬ߡߍ߲߬ ߞߏߛߓߍ߫، ߊ߬ ߦߋ߫ ߓߊ߯ߙߊ߫ ߟߊ߫ ߖߛߎ߬ߛߎߡߊ ߟߊߛߓߊ߬ߕߌ ߘߐ߫߸ ߛߣߍ߬ߞߍ ߘߊߞߎ߲ ߘߐ߫߸ ߡߐ߰ߦߊ ߤߊߞߍ߫ ߡߞߊߘߊ߲ ߘߐ߫߸ ߊ߬ ߣߌ߫ ߝߊ߬ ߓߘߊ ߟߐ߲ߠߌ߲ߦߊ ߟߎ߬ ߡߊߞߊ߲ߞߊ߲ ߘߐ߫، ߏ߬ ߟߊߒߡߊ ߦߋ߫ ߡߍ߲ ߘߌ߫߸ ߊ߬ߟߋ ߟߋ߬ ߞߊ߬ ߛߍ߬ߘߏ߲ ߞߍ߫ ߝߊ߬ߛߏ߬ ߜߙߊ ߟߊ߫߸ ߞߏ߫ ߝߏ߫ ߒߞߏ ߦߋ߫ ߕߊ߬ ߟߋ߬ ߞߵߊ߬ ߞߍ߫ ߝߊ߬ߗߍ ߟߎ߬ ߘߏ߫ ߘߌ߫ ߖߡߊ߬ߣߊ ߞߣߐ߫، ߊ߬ ߞߊ߬ ߖߋ߬ߟߌ߬ߦߊ߬ ߡߎߙߊ ߛߌߦߊߡߊ߲߫ ߘߌ߫ ߓߊߘߋ߲ߧߊ ߡߊ߬߸ ߖߋ߬ߟߌ߬ߕߐ߲߬ߓߊ ߡߊ߬߸ ߊ߬ ߣߋ߫ ߝ߭ߍ߲ߘߋ߳ߓߊ߲ߘ، ߞߊ߬ߕߎ߲߯߸ ߊ߬ ߞߊ߬ ߞߙߎ ߡߍ߲ ߠߎ߬ ߡߊߘߍ߬ߡߍ߲߫ ߏ߬ ߘߌ߫߸ ߏ߬ ߟߎ߬ ߦߋ߫ ߝߊ߬ ߓߘߊ ߞߏ߫ ߞߘߐ ߟߎ߬ ߟߊߞߎߣߎ߲ߓߊ߮ ߟߋ߬ ߘߌ߫߸ ߊ߬ ߣߌ߫ ߡߌ߬ߙߌ߲߬ߘߌ ߖߏ߯ߘߏ߲߬ߓߊ߮، ߓߐ߰ߝߍ ߟߊߞߊ߲ߘߊ ߝߣߊ߫ ߦߴߊ߬ ߟߊ߫ ߛߍ߬ߘߏ߲ ߠߎ߬ ߘߐ߫ ߞߟߏߡߊ ߟߋ߬ ߘߌ߫.

ߓߊ߯ߙߊ ߡߍ߲ ߠߎ߬ ߓߍ߯ ߝߐ߫ ߞߊ߲߫ ߣߌ߲߬߸ ߟߊ߬ߢߌ߬ߣߌ߲߬ ߛߌߦߊߡߊ߲߫ ߜߘߍ߫ ߟߎ߫ ߦߋ߫ ߛߋߞߎߓߊ߫ ߞߏ߬ߣߊ߬ߕߍ߬ ߟߊ߫ ߡߎߣߎ߲߬߸ ߊ߬ ߦߴߊ߬ ߝߍ߬ ߞߊ߬ ߡߍ߲ ߠߎ߬ ߞߍ߫، ߊ߬ ߘߏ߲߬߸ ߖߡߊ߬ߣߊ ߦߋ߫ ߓߊ߯ߙߊ߫ ߟߊߓߊ ߠߎ߬ ߟߋ߬ ߞߊ߲߬ ߣߌ߲߬߸ ߞߊ߬ ߘߏ߲߬ ߛߌ߰ߞߊ߲ ߞߎ߬ߙߎ߲߬ߘߎ ߞߣߐ߫، ߓߊߏ߬߸ ߞߊ߲߬ߜߍ߬ߦߊ ߢߣߊߕߊߟߌ ߣߌ߫ ߕߌ߲߬ߞߎߘߎ߲ ߕߊ ߡߍ߲ ߠߎ߬ ߞߍߕߐ߫ ߣߌ߲߬߸ ߏ߬ ߟߎ߫ ߟߋ߬ ߊ߬ ߟߊߓߊ߲ ߠߎ߬ ߘߌ߫.

ߏ߬ ߟߋ ߞߏߛߐ߲߬߸ ߊ߲ ߛߋ߫ ߘߊ߫ ߡߊ߬ߓߏ߲߬ߧߊ߬ߕߊ ߝߍ߬߸ ߊ߬ ߞߊ߬ ߢߣߊߕߊߟߌ߫ ߣߊ߬ߕߐ ߢߌ߲߬ ߠߎ߫ ߕߐ߬ߣߐ ߝߐ߫، ߕߌ߲߬ߞߎߘߎ߲ ߞߏߟߊߕ߮ ߟߎ߬ ߛߎߥߊ߲ߘߌ߫ ߢߣߊߕߊߟߌ ߞߍߕߐ߫ ߣߍߣߍߓߊ ߂߉ ߟߋ߬ ߡߊ߬߸ ߞߊ߲߬ߜߍ ߟߎ߬ ߛߎߥߊ߲ߘߟߌ ߘߌߣߊ߬ ߞߍ߫ ߞߏߟߌ߲ ߕߋ߬ߟߋ߫ ߂߀ ߡߊ߬.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߞߊ߬ߦߌ߯ ߝߟߐߝߟߐ߫߸ ߓߘߍ߬ߓߘߍ߬ߟߌ ߛߌ߲߬ߝߏ߲߬ߧߊ߬ߟߌ߬ ߝߙߋߞߋ ߡߍ߲ ߕߍ߬ߘߍ߫ ߖߡߊ߬ߣߊ ߞߣߐ߫ ߛߊ߲߬ ߕߊ߲߫ ߣߌ߫ ߞߐ߫ ߖߊ߲ ߣߌ߲߬ ߞߘߐ߫߸ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߛߌߣߌ߲ߦߋ ߣߊ߬ߣߍ߲߫ ߏ߬ ߟߋ ߞߣߐ߬ߘߐ߬ߝߟߌ ߓߊ߲߫ ߠߊ߫ ߣߌ߲߬߸ ߞߊ߬ ߣߊ߬ ߞߊ߲߬ߜߍ߬ߘߊ ߛߌ߰߸ ߏ߬ ߡߍ߲ ߦߋ߫ ߓߏ߲ߘߋ߲߫ ߕߣߐ߬ߡߊ߬ߓߊ߫ ߘߌ߫ ߞߎߡߊߞߍߓߏ߲ ߞߣߐ߫.>>

ߊ߬ߟߋ ߟߊ߫ ߝߐߟߌ߫ ߘߐ߫߸ ߞߊ߲߬ߜߍ߲߬ߘߊ ߟߊߘߊ߲ ߣߌ߫ ߕߌ߲߬ߞߎߘߎ߲ ߞߏߟߊߕߍ߯ ߞߏ ߡߍ߲ ߦߋ߫ ߣߌ߲߬߸ ߖߌ߬ߣߍ߫ ߛߋ߲߬ߢߊ߬ ߝߟߐ ߟߵߊ߬ ߘߐ߫ ߣߌ߲߬، ߦߊ߯ߟߊ߫߸ ߣߌ߫ ߞߊ߲߬ߜߍ߬ߘߊ߬ ߞߏ ߣߌ߫ ߕߌ߲߬ߞߎߘߎ߲ ߞߏߟߊߕߍ߯ߦߊ ߢߌ߲߬ ߠߎ߬ ߕߴߦߋ߲߬߸ ߏ߬ ߦߋ߫ ߖߎ߯ߡߊ߲߫ ߠߋ߬ ߘߌ߫ ߓߊ߬، ߥߛߊ߬ߘߋ߲߬ ߞߘߐ߫ ߛߋߞߎߓߊ߫ ߞߏ߬ߣߊ߬ߕߍ߫ ߞߵߊ߬ ߦߌ߬ߘߊ߫ ߖߋ߬ߓߌ߬ߟߌ ߘߐ߫߸ ߞߏ߫ ߕߣߐ߬ߓߊ߫ ߟߋ߬ ߦߴߊ߬ ߟߊ߫ ߘߊߞߎ߲߫ ߛߌߦߊߡߊ߲߫ ߘߐ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߞߊ߬ߦߌ߯ ߁߉߈߄ ߠߋ߬ ߟߊ߫߸ ߞߊ߲ߓߍ߲߫ ߝߌߟߊߣߊ߲ ߕߎ߬ߡߊ ߟߊ߫߸ ߖߌ߬ߣߍ߫ ߞߵߊ߬ ߣߕߊ߬ ߞߏ߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ ߟߎ߬ ߕߊ߲ߓߊ߲ߓߐ߫، ߞߏ߬ߣߌ߲߬߸ ߊ߬ ߞߏ ߡߊ߫ ߛߋ߫ ߞߍ߫ ߟߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬.>> ߞߊ߬ߕߎ߲߯߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߓߍ ߞߣߐ߫߸ ߊ߬ ߝߐ߫ ߘߊ߫ ߟߋ߬ ߓߍ߯ ߓߟߏ߫ ߞߏ߫ ߣߌ߫ ߖߌ߬ߣߍ߬ ߛߋ߫ ߘߴߊ߬ ߟߊ߫ ߞߏ ߟߎ߬ ߕߊ߲ߓߊ߲ߓߐ߫ ߟߊ߫ ߢߊ ߏ߬ ߡߊ߬߸ ߏ߬ ߦߋ߫ ߞߏ߫ ߓߘߍߓߊ߫ ߟߋ߬ ߘߌ߫، ߞߏ߬ߣߌ߲߬߸ ߊ߬ ߘߊ߲߬ ߘߊ߫ ߛߓߍߟߋ߬ ߞߣߐ߫߸ ߊ߬ ߡߊ߫ ߛߋ߫ ߞߍ߫ ߟߊ߫ ߜߍߘߐߞߏ߫ ߘߌ߫.

ߛߋߞߎߓߊ߫ ߞߏ߬ߣߊ߬ߕߍ߬ ߞߊ߲߫ ߠߋ߬ ߞߏ߫ ߣߴߌ ߞߵߊ߬ ߡߍ߲߫ ߞߏ߫ ߕߊ߲ߓߊ߲ߓߐߟߌ߸ ߏ߬ ߦߋ߫ ߛߋߓߊ߯ߦߊ ߘߏ߫ ߕߊ߭ ߟߋ߬ ߘߌ߫ ߞߵߊ߬ ߘߌ߫ ߕߌ߲߬ߞߎߘߎ߲ ߠߎ߬ ߣߌ߫ ߞߊ߬ߝߏ߬ߙߋ߲ ߠߎ߫ ߡߊ߬، ߞߏ߬ߣߌ߲߬ ߣߴߌ ߥ ߦߴߊ߬ ߝߍ߬ ߝߊ߲߬ߞߊ߬ ߘߌߣߍ߲ ߏ߬ ߝߣߊ߫ ߦߋ߫ ߥߊ߫ ߊ߬ ߥߊ߫ ߢߊ ߡߊ߬߸ ߝߏ߫ ߞߊ߬ ߥߊߘߌ ߘߌ߫ ߊ߬ߟߎ߫ ߡߊ߬ ߟߋ߬߸ ߊ߬ߟߎ߫ ߖߘߍ߬ߞߊ߬ߣߌ߲߬ ߞߏ߲ߘߏ ߦߋ߫ ߞߍ߫ ߦߋ߲߬، ߝߣߊ߫߸ ߞߊ߬ ߘߏ߫ ߓߐ߫ ߊ߬ߟߎ߬ ߟߊ߫ ߞߏ ߟߎ߫ ߖߌ߰ߣߌ߬ߦߟߍ߬ ߓߊ߲ߓߊߟߌ ߟߊ߫ ߛߓߍ߫ ߞߏ ߘߊߞߎ߲ ߘߐ߫، ߊ߬ ߞߵߊ߬ ߝߐ߫ ߞߵߊ߬ ߟߴߊ߬ ߞߊ߲߬߸ ߞߏ߫ ߌ ߘߴߊ߬ ߦߋ߫ ߛߌߛߍ߲߬߸ ߊ߬ ߘߌ߫ ߝߐ߫ ߞߏ߫ ߞߊ߬ߘߌ߬ߛߊ߬ ߓߘߊ߫ ߞߍ߫ ߞߊ߬ߝߏ߬ߙߋ߲߬ߕߌ߮ ߘߌ߫، ߞߏ߬ߣߵߊ߬ ߡߴߊ߬ ߟߐ߲߫߸ߊ߬ ߣߌ߫ ߡߍ߲ ߞߍߟߌ ߞߊ߫ ߞߊ߲߫ ߕߌ߯ߕߌ߯ߦߊ߫ ߓߟߏ ߡߊ߬߸ ߊ߬ ߣߴߊ߬ ߘߌ߫ ߛߋ߫ ߊ߬ ߟߊ߫ ߞߍߕߊ ߟߎ߬ ߞߍ߫ ߟߊ߫ ߝߍ߬ߙߍ ߡߍ߲ ߠߊ߫߸ ߏ߬ ߘߛߍߣߍ߲߫، ߛߋߞߎߓߊ߫ ߞߏ߬ߣߊ߬ߕߍ߬ ߞߊ߲߫ ߏ߬ ߟߋ ߘߐ߫߸ ߞߏ߫ ߣߴߊ߬ ߡߊ߫ ߢߊ߬ ߕߊ߲ߓߊ߲ߓߐߟߌ ߞߐ߫߸ ߝߏ߫ ߞߊ߬ ߞߊߘߊ߲߫ ߞߍ߫ ߟߋ߬߸ ߛߏߘߋ߲ ߠߎ߫ ߣߐ߬ ߡߍ߲ ߠߎ߬ ߛߎߥߊ߲ߘߌ߫ ߟߊ߫߸ ߏ߬ ߟߎ߬ ߦߋ߫ ߛߋ߫ ߊ߬ߟߎ߫ ߖߍ߬ߘߍ ߡߐ߬ߟߐ߲ ߟߐ߲߫ ߠߊ߫، ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߣߌ߫ ߞߎ߲߬ߠߊ߬ߛߌ߮ ߡߊ߫ ߛߋ߫ ߘߌ߲߬ߞߌߙߊ ߟߎ߬ ߟߊ߫ ߝߛߎߞߎ߫ ߞߏ ߢߊߓߐ߫ ߟߊ߫߸ ߕߊ߲ߓߊ߲ߓߐߟߌ ߕߣߐ߬ ߛߌ߫ ߕߴߊ߬ ߟߊ߫ ߏ߬ ߘߐ߫. ߣߴߏ߬ ߘߏ߲߬ ߞߍ߫ ߘߊ߫߸ ߖߡߊ߬ߣߊ ߡߎ߰ߡߍ ߟߋ߬ ߛߍ߰ ߟߊ߫.

ߊ߲ ߣߐ߬ ߟߌ߬ߤߟߊ߬ ߟߊ߬ߓߊ߲ ߡߍߠ߲ ߠߎ߬ ߛߐ߬ߘߐ߲߬ ߠߊ߫߸ ߊ߬ ߞߍߣߍ߲߫ ߦߏ߫ ߡߊ߬ߓߏ߲߬ߧߊ߬ߕߊ߫ ߛߋߞߎߓߊ߫ ߞߏ߬ߣߊ߬ߕߍ߬ ߓߍߣߊ߬ ߞߍ߫ ߞߊ߲߬ߜߍ߬ߘߊ ߡߊ߬ߡߌ߬ߣߊ߬ߟߌ߬ߟߊ ߘߌ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߕߏ߰ߝߏ ߖߌ߲߬ߓߊ߲ ߞߘߐ߫߸ ߖ߭ߋ.ߍߡ.ߘߋ، ߏ߬ ߟߌ߬ߤߟߊ ߡߊ߫ ߓߊ߲߫ ߟߊߕߍ߰ ߟߵߊ߲ ߓߟߏߞߘߐ߫ ߡߎߣߎ߲߬ ߛߊ߫، ߒ߬ߞߊ߬߸ ߣߴߌ ߞߊ߬ ߞߊ߲ߞߊ߲߫ ߡߊߝߟߍ߫߸ ߡߛߏ߬ ߛߌߦߊߡߊ߲߫ ߠߋ߬ ߦߋ߲߬߸ ߣߊߞߐߛߣߍ߫ ߘߊߞߎ߲ ߠߎ߬ ߘߐ߫߸ ߊ߬ ߣߌ߫ ߛߏ ߖߍ߬ߘߍ߸ ߡߍ߲ ߠߎ߬ ߟߊ߫ ߟߊ߬ߢߌߣߌ߲ ߦߋ߫߸ ߞߏ߫ ߛߋߞߎߓߊ ߦߋ߫ ߞߍ߫ ߡߊ߬ߡߌ߬ߣߊ߬ߟߌ߬ߟߊ ߘߌ߫، ߓߊߏ߬߸ ߞߏ߫ ߣߌ߫ ߡߊ߬ߓߏ߲߬ߧߙߊ߬ߕߊ ߞߵߊ߬ ߞߐߛߊ߬ߦߌ߲߬ ߞߏ ߘߊߞߎ ߘߐ߫߸ ߊ߬ ߞߍߕߐ߫ ߊ߬ߟߎ ߘߎ߰ߘߋ߲߬ ߛߋߒߕߊ߲ ߠߎ߬ ߡߊ߬ ߤߙߍ ߟߋ߬ ߘߌ߫. ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߐ߬ ߥߙߎߞߌ ߛߌߟߊ ߡߍ߲ ߕߊ߯ߡߊ߫ ߟߊ߫ ߞߊ߬ߦߌ߯ ߂߀߂߁ ߕߎߟߊߝߌ߲ ߠߊ߫߸ ߞߏ߫ ߊ߬ ߟߊ߫ ߣߊ߬ߟߌ ߞߍߕߐ߫ ߛߌߟߊ ߏ߬ ߟߋ ߛߊߣߌ߲ߧߊ߫ ߟߊ߫.