ߞߊ߬ߦߌ߯ ߞߎ߲߬ߠߊ߬ߛߌ߮ ߞߊ߬ ߖߌ߬ߣߍ߫ ߛߌ߰ߞߊ߲߬ ߞߎߘߊ ߓߌ߬ߟߊ߫ ߛߋ߲߬ߠߊ߫߸ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲߫ ߘߊ߫ ߞߵߊ߬ߟߎ߬ ߞߍ߫ ߞߎ߲߬ߠߊ߬ߛߌ߰߰ ߞߊ߲ ߘߌ߫ ߦߏ߫ ߝߊ߬ߙߊ߲߬ߛߌ߬ ߞߊ߲ ߦߋ߫ ߢߊ ߡߍ߲ ߡߊ߬߸ ߏ߬ ߡߍ߲ ߛߋ߲߬ߢߊ߬ ߝߟߐ ߦߋ߫ ߖߌ߬ߣߍ߬ ߞߣߐ߫ ߣߌ߲߬ ߞߊ߬ߣߌ߲߬، ߒ߬ߓߊ߬߸ ߢߣߊߕߊߟߌ ߞߐߝߍ߬ ߞߊ߬ ߛߌ߰ߞߊ߲ ߠߊߥߊ߲߬ߞߊ߲߬߸ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߓߊ߯ߙߊ ߓߘߊ߫ ߟߊߛߎߡߦߊ߫ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߕߊ߫ ߖߊ߬ߕߋ߬ ߘߐ߫، ߓߊߏ߬߸ ߞߎ߲߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߏ߬ ߟߋ ߦߋ߫ ߕߐ߲ߛߋ߲ ߅߲ ߟߊߓߊ߯ߙߊ߫ ߢߊ ߟߎ߬ ߢߊߝߐ߫ ߟߊ߫߸ ߓߊ߬ߙߌ߬ ߢߊ ߓߘߊ߫ ߡߍ߲߫ ߏ߬ ߛߌߟߊ߫ ߞߎ߲߫ ߘߐ߫.
ߣߝߊ߬ߖߌ߫ ߛߏ߬ߙߌ߬ ߞߐ߲ߘߍ߫߸ ߊ߬ߟߋ ߡߍ߲ ߦߋ߫ ߒߞߏ ߛߍ߬ߘߏ߲߬ߠߊ߫ ߘߌ߫ ߡߊ߬ߞߟߐ߬ ߞߎ߲ߘߊ߫ ߕߋ߲߬߸ ߣߴߊ߬ߟߎ߫ ߞߊ߬ ߘߐ߬ߖߊ߬ߓߊ߫ ߞߍ߫ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߘߐ߫ ߞߵߊ߬ߟߎ߬ ߟߊߞߎ߲߬ߠߊ߬ߛߌ߰ߦߊ߫߸ ߞߊߙߏ߫ ߘߊ߲ߘߐ߫ ߟߊ߬ߢߌ߬ߣߌ߲߬ߠߌ߲ ߞߐߝߍ߬ ߛߌߟߊߓߐߛߐ߯ߣߊ߫ ߓߟߏ߫߸ ߛߴߊ߬ ߘߌ߫ ߢߊߝߐߟߌ߫ ߞߍ߫ ߛߌ߰ߞߊ߲߬ ߞߏ ߣߌ߲߬ ߞߊ߲߬، ߓߊ߬ߙߌ߬߸ ߊ߬ߟߋ ߟߊ߫ ߓߟߏߞߘߐߜߊ ߡߊ߫ ߛߋ߫ ߕߎ߬ߡߊ߬ ߘߌ߫ ߟߴߊ߲ ߡߊ߬، ߏ߬ ߞߏߛߐ߲߬߸ ߊ߲ ߛߋ߫ ߘߊ߫ ߞߊ߲ߞߊ߲߫ ߒߞߏ ߛߍ߬ߘߏ߲߬ߠߊ߫ ߝߌ߬ߟߊ߫ ߝߍ߬߸ ߡߍ߲ ߠߎ߬ ߞߵߊ߬ߟߎ߬ ߡߙߌߦߊ ߘߌ߫.
ߊ߬ߟߎ ߕߊ߫ ߖߊ߬ߕߋ߬ ߘߐ߫߸ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߞߎ߲߬ߠߊ߬ߛߌ߰ ߞߊ߲ ߘߌ߫߸ ߏ߬ ߕߐ߬ߣߐ ߓߏ߲߬ߓߊ߬ ߞߏߛߓߍ߫، ߓߊ߬ߙߌ߬ ߛߎߘߊ߲ ߦߋ߫ ߘߝߊ߫ ߟߊ߫ ߡߌ߲߫߸ ߏ߬ ߟߋ ߖߡߊ߬ߣߊ ߞߍ ߘߌ߫ ߞߊ߬ ߝߐ߫ ߡߣߍߣߍ ߣߐ߬ߘߐߓߌ߬ߟߊ߬ ߞߍ߫ ߡߣߍߣߍ ߟߊ߫.
ߐ߲߬ߤߐ߲߫ ߦߊ߯ߟߊ߫߸ ߘߊ߲ߞߎ߲ߠߌ߲ ߏ߬ ߦߋ߫ ߛߎߘߊ߲ ߠߋ߬ ߘߌ߫ ߓߊ߬؟
ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߡߍ߲ ߦߋ߫ ߖߌ߬ߣߍ߫ ߞߊ߬ߣߎ߲߬ߕߋ߬ߦߊ ߕߏ߰ߝߏ ߞߊ߲ߕߌ߯ ߛߙߍߞߍ ߘߌ߫߸ ߞߵߏ߬ ߟߊ߫ ߞߏߕߍߓߊ߲߫ ߞߡߊ߬ߙߊ߬ ߛߎ߲ߞߎ߲ߟߐ߲ߘߐߦߟߊ ߞߊ߲߬߸ ߏ߬ ߟߎ߫ ߞߵߊ߬ߟߎ߬ ߡߙߌߦߊ ߘߌ߫،
<< ߊ߲ ߓߘߊ ߖߌ߬ߣߍ߬ ߞߣߐ߫ ߦߊ߲߬߸ ߞߊ߬ ߞߏ ߟߊߘߏ߲߬ ߛߓߍ ߞߣߐ߫߸ ߏ߬ ߘߐߙߐ߲߫ ߕߍ߫ ߥߛߊ߬ ߞߍ߫ ߟߊ߫، ߝߏ߫ ߣߴߊ߬ ߡߞߊߘߊ߲ߓߊ߮ ߟߎ߬ ߞߍ߫ ߘߊ߫ ߦߋ߲߬߸ ߡߍ߲ ߠߎ߬ ߦߴߊ߬ ߡߞߊߘߊ߲߫ ߠߊ߫߸ ߞߵߊ߬ ߡߞߊߣߌ߲߫߸ ߖߐ߲߰ߛߴߊ߬ ߘߌ߫ ߓߌ߬ߟߊ߬ ߞߍߟߌ ߘߐ߫.>> ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬
<<ߓߟߏߦߊߟߌ ߟߋ߬ ߦߋ߫ ߊ߲ ߠߊ߫ ߛߎߘߊ߲ ߘߌ߫߸ ߞߊ߬ߡߊߛߐ߬ߘߐ߲߬ ߣߴߊ߬ ߛߓߍ߫ ߘߊ߫ ߞߵߊ߬ ߟߊߖߍ߲ߛߍ߲߫ ߣߴߊ߬ ߡߊ߫ ߓߟߏߦߊ߫߸ ߏ߰ ߟߋ߬ ߦߏ߫ ߌ ߓߘߊ߫ ߛߎ߬ߡߊ߲ ߛߌ߰ ߕߊ ߞߊ߲߬߸ ߊ߬ ߓߘߊ߫ ߡߐ߬߸ ߓߊ߬ߙߵߊ߬ ߡߊ߫ ߘߴߊ߬ ߘߊߥߎ߲ߓߊ߮ ߟߎ߫ ߡߊ߬، ߏ߬ ߘߐ߫ ߣߴߊ߬ ߓߟߏߦߊ߫ ߘߊ߫ ߕߎ߬ߡߊ ߡߍ߲ ߠߊ߫߸ ߏ߬ ߟߋ ߦߋ߫ ߊ߲ ߠߊ߫ ߛߎߘߊ߲ ߘߌ߫߸ ߞߊ߬ ߕߊ߬ߡߌ߲߫ ߊ߬ ߢߊ ߘߐ ߣߌ߲߬ ߞߊ߲߬.>> ߞߏߕߍߓߊ߲߫ ߞߡߊ߬ߙߊ߬.
ߞߎ߲߬ߠߊ߬ߛߌ߮ ߓߊ߯ߙߊ ߟߊ߫ ߛߌߦߊߦߊ ߞߏߛߐ߲߬߸ ߖߡߊ߬ߣߊ߬ߘߋ߲ ߠߎ߬ ߣߌ߫ ߦߟߌߓߌߟߊߟߌ ߟߋ߬ ߦߊ߫ ߞߊ߲߫ ߛߐ߲߬، ߏ߬ ߟߋ ߞߏߛߐ߲߬߸ ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߢߌ߲߬ ߠߎ߬ ߡߊ߫ ߞߐߜߊߟߌ ߞߎߡߊ ߏ߬ ߟߎ߬ ߦߋ߫ ߞߎ߲߬ߠߊ߬ߛߌ߮ ߡߊߓߎ߬ߙߎ߲߬ߕߌ߬ ߘߌ߫߸ ߞߎߡߊߕߍ߫ ߞߵߊ߬ߟߎ߬ ߘߊ߲ߕߌߢߍ߫، <<ߞߵߌ ߣߌ߭ ߡߞߊߣߌ߲߫ ߖߡߊ߬ߣߊ ߞߣߐ߫߸ ߥߟߊ߫ ߞߵߌ ߤߊ߲ߞߟߌߣߊ߲ ߝߐ߫߸ ߌߟߋ ߡߙߌߦߊ ߟߊ߫߸ ߞߏ ߡߍ߲ ߦߋ߫ ߖߡߊ߬ߣߊ ߟߊ߫ ߥߙߎߞߌ ߛߋ߲߬ߠߊ߬ߞߊߟߌߦߊ߫ ߟߊ߫߸ ߞߊ߬ ߓߐ߫ ߞߵߏ߬ ߢߊߝߐ߫، ߡߍ߲ ߕߴߊ߬ ߞߊ߬ߟߊߡߊ߬߸ ߏ߬ ߦߋ߫ ߞߍ߫ ߊ߬ ߞߊ߬ߟߊߡߊ߬߸ ߡߍ߲ ߣߴߊ߬ ߞߊ߫ ߞߊ߲߫߸ ߏ߬ ߦߋ߫ ߛߴߊ߬ ߞߍ߫ ߟߊ߫߸ ߏ߬ ߦߋ߫ ߖߊߙߋ ߘߏ߫ ߟߋ߬ ߘߌ߫ ߖߡߊ߬ߣߊ߬ ߞߣߐ߬ ߘߋ߲ ߠߎ߬ ߡߊ߬߸ ߏ߬ ߖߍ߬ߘߍ ߛߓߍߣߍ߲߫ ߛߌ߰ߞߊ߲ ߞߣߐ߫، ߏ߬ ߣߌ߫ ߞߎ߲߬ߠߊ߬ߛߌ߮ ߡߊߓߎ߬ߙߎ߲߬ߕߌ ߕߍ߫ ߞߋߟߋ߲߫ ߘߌ߫ ߘߋ߬.>> ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߟߋ߬ ߞߊ߲߫ ߕߋ߲߬.
ߞߏߕߍߓߊ߲߫ ߝߣߊ߫ ߞߵߏ߬ ߞߎߡߊ߫ ߞߋߟߋ߲ ߠߋ߬ ߞߐߡߊߓߌ߲ߓߌ߲߫߸ ߞߵߊ߬ ߦߌ߬ߘߊ߬ ߞߏ߫: <<ߣߌ߫ ߞߎ߲߬ߠߊ߬ߛߌ߮ ߞߵߊ߬ ߞߙߊ ߓߌ߬ߟߊ߬ ߞߏ ߘߏ߫ ߘߐ߫߸ ߣߴߏ߬ ߞߏ ߡߊ߫ ߓߐ߫ ߊ߬ ߛߌߟߊ ߝߍ߬߸ ߣߌ߫ ߡߐ߱ ߟߎ߬ ߡߊ߫ ߓߐ߫ ߏ߬ ߘߐ߫ ߞߊ߬ ߘߏ߫ ߝߐ߫ ߏ߬ ߞߊ߲߬ ߞߊ߬ ߞߎ߲߬ߠߊ߬ߛߌ߮ ߓߌ߬ߟߵߊ߬ ߦߟߌ߫ ߞߊ߲߬، ߣߴߊ߬ ߢߌ߬ߣߊ߬ ߘߴߊ߬ ߞߐ߫߸ ߝߊߦߌߘߊ߫߸ ߊ߲ ߥߊߕߐ߫ ߟߵߊ߬ ߝߐ߫ ߟߊ߫ ߞߏ߫ ߞߎ߲߬ߠߊ߬ߛߌ߮ ߡߊ߫ ߡߐ߰ ߛߓߍ߬ߦߊ߬ ߞߍ߫، ߏ߬ ߘߐ߫߸ ߊ߲ ߓߐ ߓߟߐߟߐ ߞߊ߲߬ ߏ߬ ߘߐ߫ ߞߊ߬ ߞߎ߲߬ߠߊ߬ߛߌ߮ ߦߟߌߓߌ߬ߟߊ߬ ߛߓߍߟߌ ߣߌ߫ ߢߊ߬ߝߐ߬ߟߌ ߟߎ߬ ߘߐ߫߸ ߏ߬ ߞߊߣߊ߬ ߞߍ߫ ߡߐ߱ ߟߎ߬ ߢߣߊ߫ ߡߊ߬ߓߎ߬ߙߎ߲߬ߕߟߌ߬ ߘߌ߫ ߘߋ߬.>>
ߝߊ߬ߛߏ߬ ߞߊ߲ ߛߍ߬ߘߏ߲߬ߠߊ ߟߎ߬ ߞߊ߲߫ ߞߏ߫ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߏ߬ ߓߊ߯ߙߊ ߓߘߊ߫ ߛߎߡߦߊ߫، ߊ߬ ߖߍ߬ߘߍ߸ ߊ߬ߟߎ߬ ߦߴߏ߬ ߘߊ߲ߞߎ߲߫ ߠߊ߫ ߖߐ߭ ߟߋ߬ ߘߌ߫ ߝߊ߬ߛߏ߬ ߞߊ߲ ߠߎ߬ ߡߊ߬߸ ߊ߬ߟߎ߫ ߞߵߊ߬ߟߎ߬ ߟߊ߫ ߡߐߣߍ ߦߌ߬ߘߊ߫ ߏ߬ ߞߏ ߘߐ߫ ߞߏߛߓߍ߫߸ ߦߏ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߦߴߏ߬ ߦߌ߬ߘߊ߬ ߟߊ߫ ߢߊ ߡߍ߲ ߡߊ߬ <<ߊ߲ߠߎ߬ ߕߘߍ߬ ߡߍ߲ ߝߍ߬߸ ߦߊ߬ߣߌ߫ ߞߊ߲ߕߌ߯ ߢߣߊߕߊߟߌ ߦߋ߫ ߞߍ߫߸ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߓߍ߯ ߦߋ߫ ߛߋ߫ ߟߊߘߊ߲߫ ߠߊ߫߸ ߏ߬ ߟߋ ߜߘߌߛߌ߯ߟߌ ߘߌ߫، ߜߘߌߛߌ߯ߟߌ ߘߏ߲߬ ߕߍ߫ ߘߏ߫ ߜߘߍ߫ ߘߌ߫߸ ߞߏ ߡߍ߲ ߠߎ߬ ߞߊ߫ ߞߊ߲߫ ߞߊ߬ ߟߊߘߊ߲߫߸ ߞߏ ߟߎ߬ ߞߊ߫ ߞߊ߲߫ ߞߊ߬ ߓߎ߲ߓߎ߲߫ ߓߊߖߎ ߡߍ߲ ߠߎ߬ ߡߊ߬߸ ߞߊ߬ ߛߐ߰ ߏ߬ ߟߎ߬ ߝߟߐ߫ ߡߊ߬߸ ߞߊ߬ ߞߐ߲߰ ߞߏ ߟߎ߬ ߛߌ߱ ߢߍ߫ ߊ߬ ߞߊ߲߬ (….) ߊ߲ߠߎ߬ ߡߍ߲ ߠߎ߬ ߦߋ߫ ߝߊ߬ߛߏ߬ ߞߊ߲ ߞߐߡߊߓߌ߲ߓߌ߲ ߠߊ߫߸ ߊ߬ ߞߍ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߟߊߓߐ ߡߊ߫ ߘߊߡߌ߬ߣߊ߫ ߝߊ߬ߛߏ߬ ߞߊ߲ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߡߊ߬߸ ߏ߬ ߣߐ߬ ߊ߲ ߕߙߐ߫ ߟߊ߫ ߟߋ߬ ߞߏߛߓߍ߫.>>
ߡߙߌߦߊ ߘߏ߫ ߟߎ߫ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߛߌ߰ߞߊ߲ ߞߣߐ߫ ߞߎߡߊ ߟߎ߬ ߓߟߏߦߊ ߛߋ߲߬ߠߊ߬ߛߎߡߦߊ ߝߐ߫ ߢߊ ߘߏ ߟߎ߫ ߓߍ߫߸ ߏ߬ ߦߋ߫ ߒߞߏ ߛߍ߬ߘߏ߲߬ߠߊ ߘߏ߫ ߟߎ߫ ߟߊ߫ ߛߍ߱ ߞߍ ߟߋ߬ ߘߌ߫ ߖߌ ߘߐ߫߸ ߏ߬ ߟߎ߬ ߡߍ߲ ߠߎ߬ ߞߵߊ߬ߟߎ߫ ߝߊ߲߬ߞߊ߬ ߓߊ߲߫ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲߫ ߞߏ ߟߊ߫ ߛߌ߰ߞߊ߲ ߞߣߐ߫ ߞߊ߬ߣߌ߲߬، ߏ߬ ߟߋ ߘߐ߫߸ ߡߊ߬ߡߊ߬ߘߌ߬ ߖߐ߲ߖߐ߲ ߣߌ߫ ߞߏߕߍߓߊ߲߫ ߞߵߊ߬ ߦߌ߬ߘߊ߬ ߞߏ߫ <<ߡߐ߱ ߡߍ߲ ߠߎ߬ ߝߣߊ߫ ߓߘߊ߫ ߛߍ߬ߘߏ߲߬ߓߊ ߞߍ߫ ߞߎ߲߬ߠߊ߬ߛߌ߮ ߡߊ߬ߝߊ߲ ߝߍ߬߸ ߤߊ߲߯ ߊ߲ ߓߘߊ߫ ߛߋ߫ ߟߐ߬ߘߎ߮ ߣߌ߲߬ ߘߐ߫߸ ߏ߬ ߟߎ߬ ߝߣߊ߫ ߞߊ߫ ߞߊ߲߫ ߞߵߊ߬ ߟߐ߲߫߸ ߞߏ߫ ߊ߲ ߠߊ߫ ߢߊߝߐߟߌ ߘߍ߫߸ ߊ߬ ߟߐ߲ ߞߎ߲߬ߠߊ߬ߛߌ߮ ߓߟߏ߫ ߞߏ߫ ߡߐ߰ ߟߎ߬ ߦߋ߫ ߦߋ߲߬߸ ߊ߬ߟߎ ߦߋ߫ ߡߍ߲ ߛߍ߬ߘߏ߲ ߞߊ߲߬߸ ߏ߬ ߦߋ߫ ߡߍ߲ ߠߎ߬ ߢߍߛߌߟߊ߫ ߘߐ߫، ߞߏ߫ ߡߐ߰ ߟߎ߬ ߦߴߏ߬ ߡߊߞߐ߬ߣߐ߲ ߠߊ߫߸ ߡߍ߲ ߠߎ߬ ߖߍ߬ߘߍ ߘߊ߫ ߟߊߖߌ߯ ߘߊ߫ ߟߊߦߟߍ߫߸ ߞߏ߫ ߝߏ߫ ߺ ߏ߬ ߟߋ ߦߋ߫ ߞߍ߫، ߏ߬ ߞߊ߫ ߞߊ߲߫ ߞߊ߬ ߞߍ߫ ߛߍ߬ߘߏ߲߬ߠߊ ߏ߬ ߟߎ߫ ߝߊ߲߬ߞߊ߬ߘߏ߲߬ ߞߏ ߟߋ߬ ߘߌ߫߸ ߏ߬ ߞߊߣߊ߬ ߞߍ߫ ߊ߬ߟߎ߬ ߢߣߊ߫ ߊ߬ߟߎ߫ ߣߐ߬ߡߊ߬ߕߌ߬ߢߍ߬ ߞߏ߫ ߘߌ߫ ߘߋ߬߸ ߍ߲߬ߍ߲߫، ߊ߬ ߞߍ߸ ߊ߬ߟߎ ߦߋ߫ ߛߍ߬ߘߏ߲ ߡߍ߲ ߞߊ߲߬߸ ߡߌ߬ߙߌ߲߬ߘߌ ߝߣߊ߫ ߦߋ߫ ߊ߬ ߘߡߊߞߊ߬ߛߌ ߞߊ߲߬ ߏ߬ ߟߊ߫ ߛߎ ߣߌ߫ ߕߋ߬ߟߋ߸ ߊ߬ߟߎ߬ ߞߊ߫ ߞߊ߲߫ ߞߵߏ߬ ߦߟߍ߬ߡߊ߲߫ ߠߋ߬ ߞߵߏ߬ ߞߍ߫ ߊ߬ߟߎ߬ ߞߐߡߊߓߌ߲ߓߌ߲߫ ߝߋ߲ ߘߌ߫߸ ߊ߬ߟߎ߬ ߞߊߣߊ߬ ߏ߬ ߦߟߍ߬ߡߊ߲߫ ߞߵߏ߬ ߞߍ߫ ߊ߬ߟߎ߬ ߡߊߓߎ߬ߙߎ߲߬ߕߌ߬ ߝߋ߲߫ ߘߌ߫.>>
<<ߡߐ߰ ߡߊ߲߫ ߞߊ߲߫ ߞߊ߬ ߓߛߊ ߢߌߡߌ߲߫ ߞߊ߬ ߞߢߊ߬ ߊ߬ ߞߏ ߟߊ߫، ߣߌ߫ ߞߎ߲߬ߠߊ߬ߛߌ߮ ߞߏ߫ ߟߋ߬߸ ߞߏ߫ ߝߊ߬ߛߏ߬ ߞߊ߲ ߠߎ߬ ߘߌ߫ ߘߊ߲ߞߎ߲߫ ߢߊ ߓߍ߯ ߡߊ߬߸ ߣߴߊ߲ ߞߵߊ߬ ߦߋ߫ ߘߊ߲ߞߎ߲ߠߌ߲ ߏ߬ ߡߊ߫ ߞߍ߫߸ ߊ߬ ߘߏ߲߬ ߡߊ߫ ߕߊ߬߸ ߊ߲ ߧߋ߫ ߓߐ ߡߍ߲ ߞߍ߫ ߟߊ߫ ߏ߬ ߘߌ߫ ߞߵߊ߬ ߖߌߘߊߞߊ߬߸ ߞߏ߫ ߡߍ߲ ߝߐߣߍ߲߫ ߞߏ߫ ߊ߬ ߡߊ߫ ߞߍ߫߸ ߏ߬ ߞߊߣߊ߬ ߓߐ߫ ߡߐ߱ ߘߏ߫ ߟߎ߫ ߢߣߊ߫߸ ߞߏ߫ ߊ߲ ߓߘߴߊ߬ߟߎ߬ ߥߊߟߢߌߡߊߟߐ߲ߓߊߟߌߦߊ߫، ߤߊߡߊ߲߬ߣߍ߫ ߊ߲ ߓߘߴߊ߬ ߦߌ߬ߘߊ߬ ߞߏ߫ ߊ߬ߟߎ߬ ߡߊ߫ ߓߊ߯ߙߊ߫ ߞߍ߫، ߊ߬ߟߎ߫ ߞߊ߬ ߓߊ߯ߙߊ ߞߍ߫ ߞߍ߬߸ ߞߐ߬ߣߌ߲߬ ߢߌߣߊ ߟߋ߬ ߓߘߊ߫ ߢߌߡߌ߲߫ ߞߊ߬ ߞߢߵߊ߬ ߞߏ ߟߊ߫.>>
ߒߞߏ ߡߊ߬ߞߟߐ ߟߎ߬ ߟߊ߫ ߛߍ߬ߘߏ߲ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲ ߘߐ߫߸ ߛߍ߬ߘߏ߲߬ߠߊ ߢߌ߲߬ ߠߎ߫ ߞߵߊ߬ ߦߌ߬ߘߊ߬ ߞߏ߫ ߒߞߏ ߡߊ߬ߞߟߐ߬ ߘߎ߯ߟߊ ߟߎ߬ ߦߴߊ߬ ߟߐ߲߫߸ ߞߎ߲߬ߠߊ߬ߛߌ߮ ߖߊ߲߭ߓߌ߬ߟߊ ߕߴߊ߬ߟߎ߫ ߣߐ߬ߡߊ߬ߕߌߢߍ߫ ߘߌ߫߸ ߊ߬ ߦߴߊ߬ߟߎ߫ ߦߌ߬ߘߊ ߟߋ߬ ߘߌ߫ ߞߎ߲߬ߠߊ߬ߛߌ߮ ߟߊ߫ ߞߏ߫ ߊ߬ߟߎ߬ ߦߋ߫ ߞߏ߫ ߞߎ߲߬ߠߊ߬.
ߞߎߡߊ߫ ߟߊߓߊ߲߫ ߘߐ߫߸ ߞߏ߲߬ߓߏ ߞߏߕߍߓߊ߲߫ ߞߡߊ߬ߙߊ߬ ߣߌ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬߸ ߊ߬ߟߎ߫ ߞߊ߬ ߡߐ߱ ߟߎ߬ ߞߟߊߓߎߘߏ߲߬ ߓߊ߯ߙߊ߫ ߘߊߡߌ߬ߣߍ߲ ߠߎ߬ ߟߊߓߊ߲ ߠߋ߬ ߡߊ߬߸ ߛߊ߫ ߝߊ߬ߛߏ߬ ߞߊ߲ ߠߎ߬ ߟߊ߫ ߘߊ߲ߞߎ߲ߠߌ߲߫ ߞߏ ߘߌ߫ ߞߍߟߌ߫ ߕߎ߬ߢߊ߬ߡߊ ߘߌ߫، ߓߊߏ߬߸ ߝߐ߫ ߡߣߍߣߍ ߡߣߊ߬ ߕߍ߫߸ ߞߍ߫ ߡߣߍߣߍ ߟߋ߬ ߘߌ߫ ߞߏߢߊ߬، <<ߊߟߎ߫ ߦߋ߫ ߛߌߟߊ ߘߌ߫ ߟߴߊ߲ ߡߊ߬ ߢߊ ߡߍ߲ ߖߐ߫߸ ߊߟߎ߫ ߦߋ߫ ߢߎߡߍ ߘߌ߫ ߟߴߊ߲ ߡߊ߬ ߢߊ ߡߍ߲ ߖߐ߫߸ ߖߌ߫ ߞߏ ߞߎ߬ߘߎ ߦߴߊߟߎ߫ ߞߊ߲ߠߊ߫ ߢߊ ߡߍ߲ ߖߐ߫߸ ߊ߲ ߧߴߊ߬ ߝߍ߬ ߝߊ߬ߛߏ߬ ߞߊ߲߬ ߞߏ ߟߋ߬ ߦߋ߫ ߕߊ߬ߡߌ߲߫ ߏ߬ ߓߍ߯ ߟߊ߫߸ ߊ߲ ߧߋ߫ ߏ߬ ߟߋ ߡߞߊߣߌ߲߫ ߠߊ߫.>> ߖߐ߲ߖߐ߲.
<<ߓߊ߯ߙߊ ߡߍ߲ ߠߎ߬ ߓߘߊ߫ ߞߍ߫ ߞߘߐ߬ߡߊ߲߬߸ ߊ߲ ߡߊ߫ ߖߐ߬ ߏ߬ ߟߎ߫ ߡߊ߬، ߓߊ߬ߙߌ߬ ߊ߲ ߧߴߊ߲ ߘߐߖߊ߬߸ ߊ߲ ߠߊ߫ ߓߊ߯ߙߊ ߦߋ߫ ߛߋ߫ ߊ߬ ߛߋ߫ ߦߙߐ.>>
ߛߎ߯ߟߊ߲ߘߌ߫ ߛߊ߬ߞߐ߬ ߟߊ߫ ߟߊ߬ߘߍ߬ߟߌ ߟߋ߬߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
