ߘߊ߲ߘߊߟߌ ߡߊ߬ߝߟߍ߬ߟߌ ߣߌ߲߬ ߕߊ߬ߣߍ߲ ߞߵߊ߬ ߟߊ߫ ߓߙߊߡߊߖߊ߲ߓߊ߲ ߗߋߕߌ߯ߘߊ ߟߊߛߌ߱ ߞߊ߲߬߸ ߏ߬ ߟߎ߬ ߓߘߊ߫ ߣߊ߬ ߛߌߞߊ ߟߊߥߟߌ߬ ߛߍߣߍ߲߬ ߝߋߎ߫ ߞߵߊ߬ ߓߐ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߘߐ߫ ߛߍߣߍ߲߬ ߝߋߎ߫، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߊ߬ ߡߊ߫ ߞߎߡߊ߫ ߜߍ ߘߐ߫ ߊ߬ ߞߏߢߊ ߞߊ߲߬ ߡߎߣߎ߲߬.
ߝߌߘߊ ߡߍ߲ ߕߍ߬ߘߍ߫ ߜߎ߲߬ߘߎ ߘߏ߫ ߢߍߡߊ߬ ߖߌ߬ߣߍ߫ ߘߐ߬ߕߊߡߌ߲ ߘߐ߫߸ ߏ߬ ߓߘߊ߫ ߟߊߥߟߌ߬، ߓߊߏ߬߸ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߅ ߣߍߣߍߓߊ ߕߟߋ߬ ߈߸ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߊ߯ ߘߊ߫ ߘߊ߲ߘߊߟߌ ߡߊ߬ߝߟߍ߬ߟߌ ߞߍ߫߸ ߏ߬ ߡߍ߲ ߦߋ߫ ߞߍߕߊ߫ ߛߋ߲ߛߋߘߋ߲ ߘߏ߫ ߘߌ߫ ߞߵߊ߬ ߓߍ߲߬ ߢߣߊߕߊߟߌ ߛߊ߬ߙߌ߬ߦߊ߬ߛߎ߲ ߞߣߐߘߐ ߡߊ߬ ߞߊ߲ߕߌ߯ ߢߣߊߕߊߟߌ ߞߊ߲߬.
ߞߊ߬ߦߌ߯ ߣߍߣߍߓߊ ߕߋ߬ߟߋ߫ ߃ ߟߋ߬ ߡߊ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߊ߯ ߘߊ߫ ߞߕߌߖߌ߲ ߛߊ߲ߘߐߕߊ ߟߊ߫ ߞߌ߬ߦߊ߬ ߘߐ߫߸ ߞߊ߬ ߥߴߊ߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬ ߜߎ߲߬ߘߎ߬ ߓߟߏ ߡߊ߬߸ ߊ߬ ߡߊ߫ ߞߎߡߊ߫ ߝߏߦߌ߬ ߞߍ߫ ߜߍ ߘߐ߫ ߏ߬ ߡߍ߲ ߞߊ߲߬، ߊ߬ ߡߊ߫ ߓߋߟߋ߲ߠߊ߫ ߞߍ߫߸ ߊ߬ ߡߊ߫ ߟߊ߬ߛߋ߬ߟߌ߬ ߞߍ߫߸ ߖߌ߬ߦߊ߬ߓߍ߬ ߡߊ߫ ߦߋ߫߸ ߡߍ߲ ߘߴߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߡߊ߬ߡߌ߬ߘߊ߬ߟߌ ߟߊߘߏ߲߬، ߓߊ߬ߙߌ߬߸ ߞߟߍ߬ߕߌ߮ ߟߊ߫ ߡߊ߬ߞߎ߲ ߏ߬ ߟߎ߬ ߡߊ߫ ߡߐ߱ ߟߎ߫ ߞߊ߬ߢߴߊ߬ߟߎ߬ ߕߊ ߝߐ߫ ߟߊ߫ ߘߋ߬.
ߊ߬ ߕߎ߬ߡߊ߬ߙߋ߲߬ ߘߊ߲ߘߐ ߟߋ߬ ߕߋ߲߬߸ ߘߐ߬ߛߙߋ ߘߏ߫ ߕߘߍ߬ ߓߟߏߟߊ߫߸ ߡߍ߲ ߦߋ߫ ߢߣߊߕߊߟߌ ߓߙߊߡߊߖߊ߲ߓߊ߲ ߛߌ߲߬ߝߏ߲߬ߧߊ߬ ߢߊ ߓߍ߯ ߝߐ߫ ߟߊ߫ ߥߙߎߞߌ ߣߌ߫ ߞߊ߬ߞߎ߬ߘߦߊ߬ߟߌ ߓߐ߲ߛߐ߲ߘߊ ߟߎ߬ ߓߟߏ߫߸ ߏ߬ ߟߎ߬ ߡߍ߲ ߠߎ߬ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߦߋ߫ ߞߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫.
ߐ߲߬ߤߐ߲߫߸ ߏ߬ ߕߊ߬ߣߍ߲ ߞߵߊ߬ ߟߊ߫ ߡߊ߬ߝߟߍ߬ߟߌ ߞߊ߲߬ ߘߊ߲ߘߊߛߏ ߟߊ߫߸ ߏ߬ ߟߋ ߕߊ߬ߡߌ߲߬ ߘߊ߫ ߛߌߞߊ ߓߐ߫ ߟߊ߫ ߡߐ߱ ߟߎ߬ ߘߐ߫߸ ߞߊ߬ ߢߌ߬ߣߌ߲߬ߞߊ߬ߟߌ߬ ߛߌߦߊߡߊ߲ ߓߐ߫ ߊ߬ ߘߐ߫ ߝߋߎ߫، ߞߵߊ߬ ߦߌ߬ߘߊ߬ ߓߍ߯ ߟߊ߫ ߞߏ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߡߊ߬ߡߌ߬ߘߊ߬ߟߌ߬ߟߊ ߟߋ߬ ߘߌ߫ ߢߣߊߕߊߟߌ߫ ߣߊ߬ߕߐ ߘߐ߫ ߝߛߊߦߌ߫.
ߞߵߊ߬ ߛߐ߬ߘߐ߲߬߸ ߝߊ߲߬ߞߊߛߌ߬ߣߊ߸ ߡߊߡߊߘߎ߫ ߛߋߟߎ߫ ߘߊߟߍ߲߬ ߖߊߟߏ߫ ߝߣߊ߫ ߦߋ߫ ߛߊ߬ߥߏ߬ߣߊ߲߬ ߞߊ߲߬ ߝߐ ߟߎ߬ ߟߊ߫ ߡߊ߬ߓߎ߬ߙߎ߲߬ߕߌ߬ߟߌ ߘߌ߫߸ ߏ߬ ߡߍ߲ ߞߊ߲߫ ߞߏ߫ <<ߖߊ߲߬ߝߊ ߜߍߞߟߐ>> ߟߋ߬ ߞߍߣߍ߲߫ ߞߟߍ߬ߕߌ߮ ߓߟߏ߫ ߣߌ߲߬߸ ߊ߬ ߣߌ߫ <<ߞߊ߬ߝߏ߬ ߖߊߛߏ߲>> ߏ߬ ߝߣߊ߫ ߞߵߊ߬ ߝߐ߫ ߊ߬ ߟߊ߫ ߞߎߡߊ ߘߐ߫ ߟߋ߬߸ ߞߏ߫ ߞߟߍ߬ߕߌ߮ ߞߵߊ߬߬ ߟߊ߫ ߡߊ߬ߡߌ߬ߘߊ߬ߟߌ ߟߊߘߏ߲߬ ߣߍߣߍߓߊ ߕߋ߬ߟߋ߫ ߃.
ߒ߬ߓߊ߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߘߐ߬ߕߊߡߌ߲ ߞߊ߲ߕߌ߮ ߡߊ߫ ߝߋ߲߫ ߝߐ߫ ߡߎߣߎ߲߬ ߜߍ ߘߐ߫߸ ߊ߬ ߟߊ߫ ߞߏ߫ ߞߍߣߍ߲ ߠߎ߬ ߞߏ߬ߣߌ߲ ߓߘߊ߫ ߞߎߡߴߊ߬ ߣߐ߭ ߘߐ߫، ߖߌ߬ߣߍ߬ߞߊ ߓߍ߯ ߓߘߊ߫ ߘߍ߲߬ߞߣߍ߬ߦߊ߫ ߡߎ߬ߕߎ߲߬߸ ߞߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߕߍ߫ ߘߐ߬ߕߊߡߌ߲ ߞߋߟߋ߲߫ ߞߎ߲߬ߠߊ߫ ߏ߬ ߞߐ߫ ߘߋ߬߸ ߊ߬ ߓߘߊ߫ ߘߏ߲߬ ߞߊ߲ߕߌ߯ߦߊ߫ ߢߌߣߌ߲ ߝߣߊ߫ ߘߐ߲߭ ߘߐ߫.
ߞߕߌߖߌ߲ ߛߊ߲ߘߐߕߊ ߞߊ߫ ߞߊ߲߫ ߞߊ߬ ߡߙߌߘߐ ߘߏ߫ ߟߊߥߊ߲߬ߞߊ߲߬ ߛߎ ߣߌ߲߬ ߘߐ߫߸ ߡߍ߲ ߓߍߣߊ߬ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߕߐ߮ ߛߙߍߘߍ߫ ߘߍ߲߬ߞߍ߬ߕߎ߬ߣߍ߲ ߠߊߓߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
