ߦߜ߭ߋ߬ߙߋߛߏ߬ ߦߋ߫ ߓߐ߬ߓߐ߫ ߖߎ߬ߟߊ߬ߛߏ߫ ߘߎ߱ ߘߏ߫ ߟߋ߬ ߘߌ߫ ߞߎߘߍ߫ ߁߀ ߢߐ߲߰ ߠߊ߫߸ ߒߞߏ ߞߊߙߊ߲ߕߓߊ ߘߏ߫ ߦߋ߫ ߘߎ߱ ߏ߬ ߞߣߐ߫ ߦߋ߲߬߸ ߡߍ߲ ߕߐ߯ ߞߏ߫ ߛߊߟߌߦߊ߬ ߛߎ߬ߙߎ߫ ߛߊ߭ߣߎ߬، ߞߊ߬ߙߊ߲߬ߕߊ ߏ߬ ߗߋߕߌ߮ ߟߋ߬ ߞߊ߬ߙߊ߲߬ߝߊ ߘߎߡߎ߲߫ ߛߘߊߡߊ߫ ߘߊ߲߬ߓߟߍ߫ ߘߌ߫، ߒ߬ߓߊ߬߸ ߗߋߕߌ߮ ߣߴߊ߬ ߟߊ߫ ߡߐ߱ ߟߎ߫ ߞߊ߬ ߗߋߦߊߟߌ߫ ߓߟߋߓߟߋ߫ ߟߋ߬ ߟߊߛߣߍ߫ ߦߋ߲߬ ߓߌ߬ ߞߐ߬ߟߏ߲ ߣߌ߲߬ ߡߊ߬߸ ߂߀߂߅ ߞߏ߲ߓߌߕߌ߮ ߕߟߋ߬ ߁߄، ߞߏ߲߬ߓߏ ߥߋߘߊ߲߫ ߗ߭ߊ߲߭ ߣߏߍߟ ߕߢߊ߬ߓߎ߫ ߡߍ߲ ߦߋ߫ ߓߙߎߞߌߣߊ߫ (ߓߊߟߌߞߎ߫ ߞߊߙߊ߲) ߟߊ߬ߞߟߏ߬ߞߟߏ߬ߟߌ߬ ߖߙߎߡߎ߲ߒߕߊ߲ ߝߘߏ߬ߓߊ߬ ߗߋߕߌ߮ ߘߌ߫߸ ߏ߬ ߟߋ߬ ߕߊ߯ ߘߊ߫ ߓߐߒߡߊߟߌ ߟߊ߫ ߒߞߏ ߞߊߙߊ߲ߡߐ߮ ߢߌ߲߬ ߠߎ߫ ߝߍ߬ ߊ߬ߟߎ߬ ߟߊ߫ ߞߊ߬ߙߊ߲߬ߕߊ ߟߊ߫ ߦߋ߲߬߸ ߡߍ߲ ߘߊߘߐߖߊߥߏ ߓߏ߬ߙߌ߬ ߘߊ߫ ߞߊ߬ߙߊ߲ ߠߊߥߙߎߞߌ߫ ߞߏ ߟߎ߬ ߣߌ߫ ߝߊ߬ߛߏ ߛߓߍߟߌ ߣߴߊ߬ ߞߊ߲ ߠߎ߬ ߝߊ߲߬ߞߊߘߏ߲߭ ߞߊ߲߬߸ ߊ߬ ߣߌ߫ ߓߊߟߌߞߎ߫ ߞߊߙߊ߲.
ߝߘߏ߬ߓߊ߬ ߗߋߕߌ߮ ߞߵߊ߬ ߟߊ߫ ߛߍߥߊ ߦߌ߬ߘߊ߬ ߒߞߏ߫ ߞߏ ߘߐ߫ ߞߏߛߓߍ߫߸ ߞߊ߬ ߓߊ߲߫ ߞߵߊ߬ ߡߙߌߦߊ߫ ߛߊߣߌ߲ ߠߎ߬ ߝߣߊ߫ ߦߌ߬ߘߊ߬߸ ߒߞߏ ߟߊߥߙߎߞߌ߫ ߛߌߟߊ ߘߏ߫ ߟߎ߫ ߦߌ߬ߘߊ ߘߐ߫، ߝߘߏ߬ߓߊ߬ ߗߋߕߌ߮ ߞߵߊ߬ ߦߌ߬ߘߊ߬ ߞߏ߫ <<ߓߙߎߞߌߣߊ߫ ߒߞߏ ߞߊߙߊ߲ߘߋ߲ ߠߎ߬ ߝߣߊ߫ ߓߍߣߊ߬ ߛߐ߬ߘߐ߲߫ ߝߊ߬ߛߏ߬ ߞߊ߲ ߞߊ߬ߙߊ߲߬ߘߋ߲ ߠߎ߬ ߟߊ߫ ߞߘߐߓߐߟߌ ߟߎ߬ ߘߐ߫>> ߓߊߏ߬߸ ߊ߬ߟߎ߬ ߓߍ߯ ߦߋ߫ ߝߊ߬ߛߏ߬ ߘߋ߲ ߠߎ߬ ߟߋ߬ ߘߌ߫، ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ߟߎ߬ ߓߍߣߊ߬ ߝߙߍ߬ ߞߍ߫߸ ߛߊ߫ ߒߞߏ ߞߊߙߊ߲ߘߋ߲ ߠߎ߬ ߘߌ߫ ߛߋ߫ ߓߊ߯ߙߊ߫ ߡߞߊߙߊ߲ ߠߎ߬ ߞߍ߫ ߟߊ߫، ߏ߬ ߓߍ߯ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߝߘߏ߬ߓߊ߬ ߗߋߕߌ߮ ߞߎߡߊ߫ ߘߊ߫ <<ߒߞߏ ߞߊߙߊ߲ ߞߍߢߊ ߟߎ߫ ߜߋ߬ߟߎ߲߬>> ߞߏ ߞߊ߲߬ <<ߛߴߊ߬ ߘߌ߫ ߡߌ߬ߣߊ߫ ߛߓߍ߬ ߟߊ߫>>
ߏ߬ ߟߋ ߖߍ߬ߘߍ ߞߏߛߐ߲߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍߣߊ߬ ߗߋߦߊߟߌ ߘߏ߫ ߟߎ߫ ߞߙߍߞߙߍ߫߸ ߡߍ߲ ߠߎ߬ ߓߍߣߊ߬ ߘߏ߫ ߞߊ߬ߙߊ߲߬ ߒߞߏ ߘߐ߫߸ ߛߴߊ߬ߟߎ߬ ߟߊ߫ ߜߋ߬ߟߎ߲߬ߠߌ߲ ߓߊ߯ߙߊ ߘߌ߫ ߣߐ߰ߦߴߊ߬ߟߎ߬ ߓߟߏ߫، ߊ߬ߟߎ߫ ߘߏ߲߬ ߓߍߣߊ߬ ߡߐ߰ ߟߎ߬ ߝߣߊ߫ ߓߐ߫߸ ߡߍ߲ ߠߎ߬ ߘߴߊ߬ߟߎ߬ ߟߊ߫ ߓߊߟߌߞߎ߫ ߞߊߙߊ߲߫ ߞߝߊ ߟߎ߬ ߦߟߍ߬ߡߊ߲߬ ߒߞߏ ߛߓߍߟߌ ߘߐ߫، ߓߊߏ߬߸ ߞߏ߲߬ߓߏ ߥߋߘߊ߲߫ ߗ߭ߊ߲߭ ߣߏߍߟ ߕߢߊ߬ߓߎ߬ ߞߊ߲߫ ߞߏ߫ ߝߊ߬ߛߏ߬ ߞߊ߲ ߠߎ߬ ߛߓߍ ߟߊ߬ߕߍ߲߬ ߛߓߍߟߌ ߟߊ߫ ߢߊ ߏ߬ ߡߊ߬߸ ߣߴߊ߬ ߘߌ߫ ߝߐ߫ ߊ߬ ߡߊ߬ ߞߏ߫ <<ߓߊߟߌߞߎ߫ ߛߓߍߟߌ>>߸ ߏ߬ ߛߌߟߊ ߘߐ߫ ߣߐ߰ߡߊ߲ ߣߴߊ߬ ߘߐ߫ ߛߊߣߌ߲ߡߊ߲ ߦߴߊ߬ߟߎ߬ ߛߓߍ ߟߋ߬ ߘߌ߫ ߝߊ߬ߛߏ ߛߓߍߟߌ ߟߎ߬ ߟߊ߫، ߊ߬ ߟߊ߫ ߞߙߐ߬ߛߟߌ߬ ߘߐ߫߸ ߒߞߏ ߞߊߙߊ߲ߘߋ߲ ߛߌߦߊߡߊ߲ ߛߌ߭ ߘߊߡߌߣߊ ߦߋ߫ <<ߛߊ߲߭ ߉ ߟߋ߬ ߘߌߌ߫߸ ߞߵߊ߬ ߛߌ߰ ߛߊ߲߬ ߁߅ ߣߌ߫ ߁߆ ߟߊ߫.>> ߏ߬ ߟߋ ߞߏߛߐ߲߬߸ ߞߏ߫ ߓߊߟߌߞߎ߫ ߞߊߙߊ߲ ߢߍߥߟߊ ߟߎ߫ ߕߐ߬ߣߐ ߓߏ߲߬ߓߊ߬.
ߒߞߏ ߞߊߙߊ߲ߕߊ ߗߋߕߌ߮ ߘߎ߲ߡߎ߫ ߛߘߊߡߊ߫ ߘߊ߲߬ߓߟߍ߬ ߟߊ߫ ߝߐߟߌ߫ ߘߐ߫߸ ߞߏ߫ <<ߕߎ߬ߢߊ ߟߊ߫߸ ߗߍ߭ ߣߌ߲߬ ߦߋ߫ ߒߞߏߟߊ߲ߘߌߓߊ߫ ߟߋ߬ ߘߌ߫߸ ߊ߬ ߣߴߊ߬ ߦߋ߫ ߝߘߊ߬ߝߌ߲߬ߟߊ߲߬ߘߌ ߟߋ߬ ߝߣߊ߫ ߘߌ߫.>> ߓߊߏ߬߸ ߊ߬ ߡߙߌߦߊ ߦߋ߫ ߝߘߊ߬ߝߌ߲߬ ߞߊ߲ ߠߎ߬ ߛߓߍ ߟߋ߬ ߘߌ߫ ߝߊ߬ߛߏ ߛߓߍߟߌ ߟߊ߫߸ ߏ߬ ߡߍ߲ ߦߋ߫ ߛߋ߫ ߟߴߊ߬ߟߎ߬ ߝߊߙߊ߲ߝߊ߯ߛߌ߫ ߟߊ߫ ߓߘߍߞߍ߭، ߗߋߕߌ߮ ߞߊ߲߫ ߞߏ߫ ߞߏ߲߬ߓߏ߫ ߕߢߊ߬ߓߎ߬ ߡߊ߫ ߞߎߡߊ ߣߌ߲߬ ߝߐ߫ ߕߋ߲߬ ߜߊ߲ߛߊ߲߫ ߘߋ߬ <<ߊ߬ ߞߊ߬ ߕߌߙߌ߲ߠߌ߲ߓߊ߫ ߟߋ߬ ߞߍ߫ ߒߞߏ ߛߓߍߟߌ ߞߊ߲߬.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
