ߡߊ߬ߟߌ ߟߊ߫߸ ߓߌ߬ ߞߐ߬ߓߊ߬ߟߏ߲ ߂߀߂߅ ߕߎߟߊߝߌ߲ ߕߋ߬ߟߋ߫ ߂߂ ߢߌ߲߬ ߠߋ߬ ߦߋ߫ ߡߊ߬ߟߌ ߟߊ߫ ߖߘߍ߬ߡߊ߬ߛߐߘߐ߲ ߛߊ߲߬ ߆߅߲ ߘߌ߫، ߏ߬ ߓߟߏߡߊ߬߸ ߕߏߟߏ߲߫ ߓߟߋߓߟߋ ߟߋ߬ ߦߋ߫ ߛߋ߲߬ ߠߊ߫ ߓߌ߬ ߡߊ߬ߟߌ ߞߣߐ߫߸ ߣߊ߲߬ߕߌ߮ ߟߎ߬ ߣߌ߫ ߣߊ߲߬ߒߕߊ߲ ߠߎ߬ ߦߋ߫ ߓߙߊߡߊߖߊ߲ߓߊ߲ ߞߍ߫ ߞߋߟߋ߲ߘߌ߫߸ ߖߐ߲߰ߛߊ߫ ߞߊ߬ ߓߌ߬ ߞߐ߬ߓߊ߬ߟߏ߲ ߂߀߂߅ ߕߎߟߊߝߌ߲ ߕߋ߬ߟߋ߫ ߂߂ ߟߊߣߌߡߦߊ߫، ߓߊ߬ߙߌ߫.
ߞߊ߬ ߞߐ߲߰ ߏ߬ ߢߍ߫߸ ߦߏ߫ ߊ߬ ߘߋ߬ߙߌ߬ߣߍ߲߫ ߞߍ߫ ߟߊ߫ ߢߊ߫ ߡߍ߲ ߞߘߐ߬ߡߊ߲߫߸ ߘߐ߬ߕߊߡߌ߲ ߞߊ߲ߕߌ߮ ߞߊ߬ ߓߋߟߋ߲ߠߊ ߘߏ߫ ߞߍ߫ ߛߎ ߘߐ߫߸ ߊ߬ ߞߎߡߊ߫ ߘߊ߫ ߟߊ߬ߞߊ߲߬ߘߊ߬ߟߌ ߞߊ߲߬ ߏ߬ ߡߍ߲ ߞߣߐ߫߸ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߓߋ߬ߒ߬ߞߊ߲߬ߠߌ߲߬ ߟߊߓߊ߲ ߡߍ߲߬ ߠߎ߬ ߢߍߛߌ߲߫ ߘߊ߫ ߘߎ߰ߘߋ߲ ߠߎ߫ ߡߊ߬߸ ߏ߬ ߟߎ߬ ߓߍ߯ ߣߐ߬ ߊ߬ߟߎ߬ ߟߊ߫ ߖߛߎ߬ߞߊߛߌ ߦߌ߬ߘߊ߫ ߟߊ߫߸ ߞߊ߬ ߓߍ߲߬ ߟߊ߬ߞߊ߲߬ߘߊ߬ߟߌ ߟߎ߬ ߖߊߝߏ߫ ߟߋ߬ ߡߊ߬.
ߒ ߞߏ߬ߣߌ߲ ߦߴߊ߬ ߟߊߢߌߣߌ߲߫ ߠߊ߫ ߘߎ߰ߘߋ߲ ߠߎ߬ ߝߍ߬߸ ߊ߬ߟߎ߬ ߞߴߊ߬ߟߎ߫ ߕߊ߬ ߞߙߎ ߡߍ߲߬ ߠߎ߬ ߟߊ߫ ߞߎ߲߬ߠߊ߬ߝߎ߬ߟߋ߲߬ ߞߏߙߏ߲ ߠߎ߬ ߝߍ߬، ߊ߬ߟߎ ߡߍ߲ ߠߎ߫ ߡߊ߫ ߊߟߊ߫ ߟߐ߲߫߸ ߊ߬ߟߎ߫ ߘߏ߲߬ ߡߊ߫ ߛߊ߬ߙߌ߬ߦߊ ߟߐ߲߫، ߊ߲ ߞߊ߫ ߞߊ߲߫ ߠߋ߬ ߥߊ߯ߕߌ߫ ߢߌ߲߬ ߠߊ߫ ߞߊ߬ ߝߙߊ߬ ߢߐ߲߮ ߞߊ߲߬߸ ߞߊ߬ ߞߍ߫ ߞߋߟߋ߲߫ ߘߌ߫߸ ߏ߬ ߟߋ߬ ߘߌ߫ ߊ߲ ߠߊ߫ ߖߘߍ߬ߡߊ߬ߤߙߐ߬ߦߊ ߘߴߊ߲ ߡߊ߬߸ ߞߊ߬ߦߌ߯ ߂߀߂߀ ߠߋ߬ ߟߊ߫ ߞߣߊ߬ ߛߋ߫ ߓߌ߬ ߡߊ߬.
ߡߙߌߘߐ߫ ߛߌߦߊߡߊ߲߫ ߠߋ߬ ߕߊ߬ ߘߊ߫ ߞߏ߫ ߞߊ߬ ߞߟߍ߬ߓߟߏ ߝߊ߲߬ߞߊ߫ ߘߏ߲߬ ߘߎ߰ߞߟߏ߬ ߞߏ ߝߊ߲߬ߝߘߊ ߞߣߐ߫߸ ߏ߬ ߡߍ߲ ߠߊߘߊ߲߫ ߘߊ߫ ߂߀߂߄ ߠߊ߫߸ ߊ߲ ߠߊ߫ ߓߊ߯ߙߊߢߐ߲߯ߦߊ ߟߎ߬ ߛߊߓߎ߫ ߟߊ߫، ߊ߲ ߛߌ߰ߢߐ߲߰ ߖߡߊߣߊ ߟߎ߬ ߓߘߊ߫ ߝߊ߲߬ߝߘߊ߬ ߘߴߊ߲ ߡߊ߬ ߞߊ߬ ߓߍ߲߬ ߟߊ߬ߞߊ߲߬ߘߊ߬ߟߌ ߕߊ߯ ߛߌߟߊ ߟߎ߬ ߡߊ߬߸ ߣߴߏ߬ ߦߋ߫ ߊߋߛߌ߫ ߖߡߊߣߊ ߘߌ߫߸ ߦߊ߬ߣߌ߫ ߊ߲ ߧߋ߫ ߕߊ߯ ߞߟߍ߬ ߝߊ߲ߝߘߊ ߟߎ߬ ߝߊ߲߬ߞߊ߫ ߘߏ߲߭ ߡߊ߬߸ ߊ߲ ߧߴߊ߬ ߞߊ߲߬ ߞߊ߬ ߞߟߍ߬ ߖߐ߯ߙߊ߲ ߠߎ߬ ߛߊ߲߬ ߝߟߐ߫߸ ߏ߬ ߟߋ߬ ߞߍ߫ ߘߊ߫ ߘߐ߬ߕߊߡߌ߲ ߞߊ߲ߕߌ߮ ߟߊ߫ ߞߎߡߊ ߘߌ߫.
