ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߣߐ߬ ߞߕߌ߫ ߟߋ߬ ߕߍ߰ ߟߊ߫ ߞߊ߬ ߓߍ߲߬ ߞߊ߲ߛߏ߲ߠߌ߲߫ ߞߏ ߘߏ߫ ߡߊ߬ ߤߖߟߌ߫ ߟߊ߫ ߕߊ߯ ߞߏ ߘߐ߫ ߞߊ߬ ߥߊ߫ ߡߞߊ߫߸ ߤߖߌ߫ ߟߊ߫ ߕߊ߯ ߕߊ߬ߡߌ߲߬ߣߍ߲ ߢߌ߲߬ ߝߍ߬، ߒ߬ߓߊ߬߸ ߓߌ߬ߟߊ߬ ߞߍߣߍ߲߫ ߡߎߛߊ߫ ߖߎ߬ߓߊ߬ߕߍ߫ ߟߋ߬ ߞߐ߫ ߏ߬ ߞߏ ߘߐ߫߸ ߡߐ߰ ߁߈ ߠߊ߫ ߡߞߊ߬ߛߌ߬ߟߌ ߞߐߝߍ߬ ߊ߬ߟߋ߫ ߞߊ߲߬، ߌߞߘߐ߫߸ ߊ߬ ߟߊ߫ ߞߕߌ ߞߎ߲߬ߝߊ߮ ߘߐ߫߸ ߛߊ߬ߙߌ߬ߦߊ߫ ߞߵߊ߬ ߦߋ߫ ߛߐ߲߬ߡߊ߬ ߘߌ߫߸ ߞߵߊ߬ ߓߌ߬ߟߊ߫ ߛߊ߲߭ ߝߌ߬ߟߊ߬ ߥߛߎߖߌ߲߫ ߓߊߟߊ߲ߣߍ߲ ߠߊ߫߸ ߞߊ߲ߓߍ߲ ߞߕߌߞߊ߲ߘߊ߸ ߌߓߙߊߤߌߡߊ߬ ߝߟߐߡߊ߫ ߞߡߊ߬ߙߊ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.

ߞߕߌ ߣߌ߲߬ ߞߍ߫ ߟߏ߲߫ ߡߊ߫ ߝߐ߫ ߛߊ߫، ߓߊ߬ߙߌ߬߸ ߛߊ߬ߙߌ߬ߦߊ߬ߓߊ߰ߙߊ߬ߟߊ ߣߐ߬ ߊ߬ ߞߏ ߢߊߝߐ߫ ߟߊ߫ ߜߍ ߘߐ߫ ߓߌ߬ ߞߎߣߎ߲ߟߏ߲ ߢߌ߲߬ ߠߋ߬ ߡߊ߬߸ ߂߀߂߆ ߕߎߟߊߝߌ߲ ߕߟߋ߬ ߃߀߸ ߊ߬ ߣߌ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߢߐ߲߯ߦߋ ߓߍ߲߬ߒ߬ߛߋ߲߬ߡߊ ߝߍ߬߸ ߊ߬ ߖߍ߬ߘߍ ߟߊ߫ ߛߓߍߘߊ ߟߊ߫߸ ߣߴߊ߬ ߞߎߡߊ߫ ߘߊ߫ ߞߏ߫ ߛߌߦߊߡߊ߲߫ ߞߊ߲߬ ߛߊ߬ߙߌ߬ߦߊ߬ ߓߟߏߞߘߐ߫ ߦߋ߲߬.

ߊ߬ ߟߊ߫ ߢߊߝߐߟߌ ߟߎ߬ ߘߐ߫߸ ߡߍ߲ ߠߎ߬ ߣߐ߬ ߊ߬ߟߎ߬ ߡߊߞߊ߬ߛߌ߬ ߟߊ߫ ߡߎߛߊ߫ ߖߎ߬ߓߊ߬ߕߍ߫ ߞߊ߲߬ ߣߌ߲߬߸ ߏ߬ ߟߎ߫ ߞߊ߬ ߥߊߘߌ ߟߋ߬ ߘߴߊ߬ ߡߊ߬߸ ߞߏ߫ ߊ߬ ߦߴߊ߬ߟߎ߬ ߟߊߕߊ߯ ߡߞߊ߫ ߤߖߌ ߞߊ߲ߡߊ߬، ߓߊߏ߬߸ ߡߎߛߊ߫ ߞߵߊ߬ ߦߌ߬ߘߊ߫ ߟߋ߬ ߞߏ߫ ߦߙߐ߫ ߦߴߊ߬ ߓߟߏ߫߸ ߡߍ߲ ߦߋ߫ ߡߐ߱ ߟߎ߬ ߟߊ߫ ߤߖߌ߫ ߟߊ߫ ߕߊ߯ ߞߏ ߢߊߓߐ߫ ߟߊ߫، ߒ߬ߓߊ߬߸ ߏ߬ ߟߎ߫ ߞߊ߬ ߥߊߘߌ ߡߍ߲ ߘߌ߫߸ߏ߬ ߡߊ߫ ߛߐ߬ߘߐ߲߬߸ ߊ߬ߟߎ߫ ߘߏ߲߬ ߡߊ߫ ߥߊ߫ ߡߞߊ߫.

ߞߕߌߞߊ߲ߘߊ ߞߵߊ߬ ߝߐ߫ ߦߋ߲߬ ߠߋ߬ ߞߏ߫: <<ߡߐ߰ ߁߈ ߠߋ߬ ߣߐ߬ ߊ߬ ߡߊߞߊ߬ߛߌ߬ ߟߊ߫ ߛߟߊߕߌ߯ ߡߎߛߊ߫ ߖߎ߬ߓߊ߬ߕߍ߫ ߞߊ߲߬߸ ߞߊ߲ߛߏ߲ߠߌ߲߫ ߞߏ ߘߐ߫، ߓߊߏ߬߸ ߊ߬ ߣߐ߬ ߊ߬ߟߎ߬ ߟߊ߫ ߥߊߘߌ ߟߋ߬ ߟߊߡߌ߬ߣߊ߬ ߟߊ߫߸ ߊ߬ߟߎ߫ ߘߏ߲߬ ߡߊ߫ ߥߊ߫ ߡߞߊ߫.>> ߊ߬ ߞߵߏ߬ ߢߊߝߐ߫.

ߞߕߌ ߣߌ߲߬ ߕߍ߰ ߘߊ߫ ߞߐ߬ߓߊ߬ߟߏ߲ ߠߋ߬ ߡߊ߬߸ ߂߀߂߆ ߕߎߟߊߝߌ߲ ߕߋ߬ߟߋ߫ ߂߈.

ߌߓߙߊߤߌߡߊ߬ ߝߟߐߡߊ߫ ߞߡߊ߬ߙߊ߫ ߞߵߊ߬ ߝߐ߫ ߞߏ߫: <<ߛߟߊߕߌ߯ ߡߎߛߊ߫ ߖߎ߬ߓߊ߬ߕߍ߫ ߖߊ߲߬ߞߌ߬ߣߍ߲߫ ߛߊ߲߭ ߝߌ߬ߟߊ߬ ߥߛߎ߫ ߟߋ߬ ߟߊ߫߸ ߊ߬ ߣߌ߫ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߁߀ ߢߍ߬ߢߌ߲߬ߘߐ߬ߓߍ߲.>> ߞߕߌߞߊ߲ߘߊ ߟߋ߬ ߞߊ߲߫ ߕߋ߲߬.

ߡߞߊ߬ߛߌ߬ߓߊ߰ߕߐ ߟߎ߬ ߟߊ߫ ߞߎ߲߬ߠߊ߫߸ ߏ߬ ߟߎ߫ ߞߊ߬ ߥߊߘߌ ߡߍ߲ ߝߐ߫ ߞߏ߫ ߊ߬ߟߎ߫ ߞߵߏ߬ ߟߋ ߘߏ߲߬ ߡߎߛߊ߫ ߓߟߏ߫߸ ߛߊ߬ߙߌ߬ߦߊ߬ ߝߣߊ߫ ߞߵߏ߬ ߢߐ߲߰ ߠߋ߬ ߓߋ߬ ߊ߬ ߞߎ߲߬߸ ߞߏ߫ ߊ߬ ߦߴߏ߬ ߛߙߊ߬ ߓߟߏߢߐ߲߯ߠߛߊߦߌ߲ ߘߌ߫.

ߞߕߌߞߊ߲ߘߊ ߞߵߊ߬ ߝߐ߫ ߏ߬ ߟߋ ߘߐ߫ ߞߵߊ߬ ߟߊߕߍ߰߸ ߞߏ߫: <<ߊ߬ ߖߊ߲߬ߞߌ߲߬ ߘߊ߫ ߖߌ߬ߣߍ߬ ߕߊߡߊ߲ ߥߟߎ߬ߡߊ߬ ߞߋߟߋ߲߫ ߣߌ߫ ߞߋ߲߬ߥߟߎ߫ ߃߀߀ ߟߋ߬ ߛߊ߬ߙߊ ߟߊ߫ ߡߐ߰ ߁߈ ߏ߬ ߟߎ߬ ߓߟߏߢߐ߲߯ߠߛߊߦߌ߲ ߘߌ߫߸ ߊ߬ߟߎ߫ ߕߐ߬ߢߍ߮ ߞߏߛߐ߲߬.>>

ߞߎߡߊ߫ ߞߋߟߋ߲ ߢߌ߲߬ ߠߋ߬ ߖߌߟߊ߫߸ ߌߓߙߊߤߌߡߊ߬ ߝߟߐߡߊ߫ ߞߡߊ߬ߙߊ߫ ߞߵߊ߬ ߞߊ߲ߠߊߘߌ߫ ߘߎ߰ߘߋ߲ ߠߎ߫ ߡߊ߬߸ ߞߏ߫ ߣߴߊ߬ ߓߍ߲߬ ߘߊ߫ ߕߌߢߍߟߌ߫ ߡߊ߬߸ ߓߍ߯ ߦߴߊ߬ ߞߎ߲߬ߛߌ߲߫ ߛߊ߬ߙߌ߬ߦߊ߫ ߟߋ߬ ߟߊ߫߸ ߡߐ߰ ߞߊߣߊ߬ ߖߘߍ߬ ߡߊ߬ ߞߕߌ߫ ߕߍ߯ ߞߍ߫، ߓߍ߯ ߦߴߊ߬ ߤߊߞߍ ߡߞߊߣߌ߲߫ ߛߊ߬ߙߌ߬ߦߊ߬ ߞߣߐ߫.

<<ߡߐ߰ ߛߌ߫ ߞߊߣߵߊ߬ ߖߘߍ߬ߡߊ߬ ߞߕߌ߫ ߕߍ߰، ߣߴߌ ߕߐ߬ߢߍ߰ ߘߊ߫߸ ߥߟߊ߫ ߝߙߋߞߋ߫ ߞߵߌ ߛߐ߬ߘߐ߲߬߸ ߡߍ߲ ߡߊ߫ ߘߴߌ ߦߋ߫߸ ߣߴߌ ߕߐ߬ߢߍ߰ ߘߊ߫ ߞߊ߬ ߘߏ߲߬ ߌߞߊ߬ߛߌ ߘߐ߫߸ ߊߟߎ߫ ߦߋ߫ ߣߊ߬ ߞߊ߲ߓߍ߲ ߞߕߌߞߊ߲ߘߊ ߛߐ߬ߘߐ߲߬.>> ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߓߍ߯ ߛߊ߬ߥߏ߬ ߘߐ߫߸ ߞߏ߫ ߝߙߋߞߋ ߞߵߌ ߛߐ߬ߘߐ߲߬ ߦߙߐ߫ ߛߌ߫ ߘߐ߫߸ ߌ ߕߐ߬ߢߍ߰ ߘߊ߫ ߢߊ߫ ߛߌ߫ ߡߊ߬߸ ߞߏ߫ ߌ ߦߋ߫ ߣߵߊ߬ߟߋ ߡߊ߬.

ߞߊ߲ߞߊ߲߫ ߞߕߌߓߋߟߋ߲ ߠߊ߫ ߝߐߟߌ߫ ߘߐ߫߸ ߞߎߡߊ߫ ߛߎ߮ ߢߌ߲߬ ߠߎ߬ ߓߊ߯ ߡߍ߲߫ ߛߏ߫ ߞߣߐ߫ ߡߐ߮ ߡߍ߲ ߓߟߏ߫߸ ߏ߬ ߞߊ߫ ߞߊ߲߫ ߞߵߊ߬ ߟߐ߲߫ ߞߏ߫ <<ߛߊ߬ߙߌ߬ߦߊ߬ ߦߋ߫ ߦߋ߲߬ ߓߍ߯ ߟߊߘߍ߬ߣߍ߲ ߠߋ߬ ߦߋ߫.>>