ߞߕߌߖߌ߲ ߓߏ߲ߘߋ߲ ߠߎ߬
ߞߵߊ߬ߟߎ߬ ߟߊߘߍ߬ ߓߌ߬ ߛߌ߬ߣߌ߲߬ߟߏ߲ ߢߌ߲߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߆ ߡߊ߬߸ ߞߕߌߞߊ߲ߘߊ߫
ߞߘߐ߫ ߊߟߑߜ߭ߊߛߌߡߎ߬ ߖߊߟߏ߫ ߟߊ߫ ߞߕߌ ߞߊ߲ߡߊ߬ ߘߌ߬ߞߑߛߌߣ ߞߕߌߘߊ ߦߌߟߡߊ߫ ߝߟߐ ߟߊ߫߸ ߊ߬ߟߋ ߡߍ߲
ߡߊߟߐ߲߫ ߘߊ߫ ߓߊߞߍ߬ ߂߀߀߉ ߕߎߟߊߝߌ߲ ߕߋ߬ߟߋ߫ ߂߈ ߞߕߌ ߛߋ߲߭ߝߍ߬، ߒ߬ߞߊ߬߸ ߓߌ߬ ߞߕߌ ߣߌ߲߬ ߡߊ߫ ߞߎ߲߬ߘߐߖߊ߲߰ߧߊ߬
ߤߊߟߌ߬ ߞߋߟߋ߲߫.
ߛߌߞߊ߫ ߕߴߊ߬ ߘߐ߫߸
ߓߌ߬ ߞߕߌ ߢߌ߲߬ ߕߎ߲߬ ߕߴߛߋ߫ ߟߊߓߊ߲߫ ߠߊ߫ ߝߋߎ߫، ߓߊߏ߬߸ ߞߏ ߡߍ߲ ߕߊ߬ߡߌ߲߬ ߘߊ߫ ߞߏߣߎ߲߬ ߞߕߌ
ߘߐ߫߸ ߊ߬ ߛߌߦߊߡߊ߲ ߘߐ߫߸ ߓߌ߬ ߕߊ ߞߎ߲߭ߘߏ߲߬ ߞߏ ߕߎ߲߬ ߘߌ߫ ߓߊ߬ߙߊ߫ ߡߐ߱ ߟߎ߬ ߘߐ߫، ߞߊ߬ߕߎ߲߯߸ ߞߊ߬ߦߌ߯ ߞߎߣߎ߲߬ ߞߕߌ ߛߋ߲߭ߝߍ߬߸ ߟߊ߬ߝߛߊ߬ߟߌ߬ߟߊ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߊߟߑߜ߭ߊߛߌߡߎ߬ ߡߞߊߘߊ߲ ߠߊ߫ ߞߕߌ ߢߌ߲߬ ߘߐ߫߸ ߏ߬ ߟߎ߫ ߞߵߊ߬ߟߎ߬ ߟߊ߫ ߒߕߍߜߊߘߌ ߦߌ߬ߘߊ߬߸ ߞߏ߫ ߊ߬ߟߎ߬ ߕߍ߫ ߛߐ߬ߘߐ߲߬ ߠߊ߫ ߞߕߌ ߕߐ߭ ߘߐ߫߸ ߞߵߏ߬ ߞߎ߲߭ ߞߍ߫ ߛߙߊߕߌ ߘߏ߫ ߟߎ߫ ߡߝߊߓߊߟߌߦߊ ߘߌ߫، ߓߊߏ߬߸ ߊߟߑߜ߭ߊߛߌߡߎ߬ ߞߊ߬ ߞߕߌߕߍ߯ߟߊ߫ ߡߐ߰ ߛߊ߬ߓߊ߫ ߟߋ߬ ߞߏߝߐ߫߸ ߞߏ߫ ߞߵߏ߬ ߟߎ߫ ߛߋ߲߬ߓߐ߫߸ ߏ߬ ߘߏ߲߬ ߡߊ߫ ߞߍ߫.
ߒ߬ߓߊ߬߸ ߞߎߣߎ߲߬ ߞߎߡߊ߫ ߓߙߎߓߙߎ ߏ߬ ߟߋ ߓߍ߯ ߞߏߛߐ߲߬߸ ߡߐ߰ ߛߌߦߊߡߊ߲߫ ߦߟߌ߫ ߕߘߍ߬ ߞߏ߫ ߓߌ߬ ߞߕߌ ߕߍߣߊ߬ ߛߋ߫ ߟߊ߫ ߞߍ߫ ߟߊ߫.
ߞߕߌ ߘߊߡߌ߬ߣߊ ߡߍ߲ ߞߍ߫ ߘߊ߫ ߓߌ߬ ߛߌ߬ߣߌ߲߬ߟߏ߲ ߡߊ߬߸ ߞߕߌߘߊ ߞߊ߲ߕߌ߮ ߌߓߙߊߤߌߡߊ߫ ߛߏߙߌ߬ ߁߭ ߕߎ߲߬ߞߙߊ߫ ߞߊ߬ ߡߊ߬ߝߌ߲߬ߓߊ߰ߕߐ߫ ߊߟߑߜ߭ߊߛߌߡߎ߬ ߖߊߟߏ߫ ߢߌ߬ߣߌ߲߬ߞߊ߬߸ ߞߏ߫ ߊ߬ ߡߞߊߘߊ߲ߓߊ߯ ߞߏ ߦߋ߫ ߘߌ߬߸ ߥߟߊ߫ ߣߴߊ߬ ߘߌ߫ ߛߋ߫ ߞߎߡߊ߫ ߟߴߊ߬ ߞߋߟߋ߲߫ ߠߊ߫ ߢߊ ߏ߬ ߡߊ߬߸ ߞߵߊ߬ ߛߐ߬ߘߐ߲߬ ߟߊ߬ߝߛߊ߬ߟߌ߬ߟߊ߫ ߕߴߊ߬ ߝߍ߬.
ߊߟߑߜ߭ߊߛߌߡߎ߬ ߡߴߏ߬ ߣߌ߫ ߕߡߊ߬ߖߌ߬ ߟߊߘߍ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߛߊ߬ߙߌ߬ߦߊ ߟߋ߬ ߖߍ߬ߘߍ ߣߐ߬ ߏ߬ ߞߕߌ ߕߍ߰ ߟߊ߫߸ ߞߊ߬ ߞߎߡߊ߫ ߛߌߦߊߡߊ߲ ߓߐ߫ ߊ߬ ߘߐ߫.
<<ߒ ߟߊߣߴߊ߬ ߟߊ߫߸ ߒ ߣߐ߬ ߞߊ߲ ߡߍ߲ ߠߎ߬ ߡߍ߲߫ ߠߊ߫ ߞߕߌߛߓߍߟߊ ߟߊ߫߸ ߞߎ߲߬ߞߏ߬ߓߊ߬ߕߐ߬ߦߊ߬ ߞߕߌ ߟߋ߬، ߣߴߏ߬ ߟߋ ߘߏ߲߬ ߦߋ߫߸ ߛߊ߬ߙߌ߬ߦߊ߬ ߓߟߏ ߡߊ߬߸ ߟߊ߬ߝߛߊ߬ߟߌ߬ߟߊ ߞߍ ߦߊ߲߬߸ ߏ߬ ߦߋ߫ ߘߌߦߊߜߏߦߊ ߟߋ߬ ߘߌ߫ ߞߎ߲߬ߞߏ߬ߓߊ߬ ߞߕߌ ߘߐ߫، ߏ߬ ߟߋ ߞߏߛߐ߲߬߸ ߝߏ߫ ߟߊ߬ߟߌ߬ߟߌ߬ߟߊ߫ ߟߋ߬ ߞߍ߫ ߒ ߝߍ߬ ߒ ߠߊ߫ ߞߕߌ ߘߐ߫.>> ߊߟߑߜ߭ߊߛߌߡߎ߬ ߞߵߏ߬ ߟߋ ߝߐ߫ ߞߕߌ߫ ߦߙߌ ߟߊ߫.
ߊ߬ ߘߏ߲߬ ߡߊ߫ ߘߊ߲߬ ߏ߬ ߘߐߙߐ߲߫ ߝߐߟߌ ߡߊ߬ ߘߋ߬߸ ߊ߬ ߞߵߊ߬ ߝߐ߫ ߝߣߊ߫ ߞߏ߫ ߝߏ߫ ߞߊ߬ ߕߎ߬ߡߊ߫ ߟߋ߬ ߘߴߊ߬ ߡߊ߬߸ ߊ߬ ߣߴߊ߬ ߟߊߝߛߊ߬ߓߊ߮ ߟߎ߬ ߦߋ߫ ߛߋ߫ ߞߎߡߊ߫ ߟߊ߫ ߏ߬ ߞߣߐ߫߸ ߞߊ߬ ߓߍ߲߬ ߊ߬ ߡߊߞߊ߲ߞߊ߲߫ ߢߊ ߡߊ߬.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߞߎߣߎ߲߬ ߞߕߌ ߝߍ߬߸ ߒ ߠߊߝߛߊ߬ߓߊ߮ ߟߎ߫ ߞߵߊ߬ ߝߐ߫ ߟߋ߬ ߞߏ߫ ߊ߬ߟߎ߬ ߕߍ߫ ߛߐ߬ߘߐ߲߬ ߠߊ߫ ߞߕߌ ߣߌ߲߬ ߘߐ߫ ߡߎߣߎ߲߬، ߞߊ߬ߓߌ߯ ߏ߬ ߘߏ߲߬ ߞߍ߫ ߘߊ߫߸ ߒ ߣߴߊ߬ߟߎ߬ ߡߊ߫ ߞߎߡߊ߫ ߡߎߣߎ߲߬ ߤߊ߲߯ ߕߋ߲߬، ߏ߬ ߘߐ߫߸ ߊߟߎ߫ ߦߴߊ߬ ߕߏ߫߸ ߒ ߣߴߊ߬ߟߎ߬ ߦߋ߫ ߞߎߡߊ߫߸ ߛߴߊ߲ ߘߌ߫ ߘߏ߫ ߝߐ߫ ߊ߬ߟߎ߫ ߣߊ߬ ߢߊ ߛߙߊߕߌ ߟߎ߫ ߞߊ߲߬ ߞߕߌ߫ ߘߊߞߎ߲ ߘߐ߫.>> ߊߟߑߜ߭ߊߛߌߡߎ߬ ߖߊߟߏ߫ ߞߵߏ߬ ߟߋ ߢߌߣߌ߲߫ ߞߕߌߘߊ ߝߍ߬.
ߞߊ߲ ߡߍ߲ ߠߎ߬ ߝߐߣߍ߲߫ ߏ߬ ߘߌ߫߸ ߞߕߌߞߊ߲ߘߊ ߡߊ߫ ߛߴߏ߬ ߡߊߛߐ߬ߛߐ߬ ߟߊ߫ ߜߘߍߞߍ߫، ߓߊߏ߬߸ ߝߘߏ߬ߓߊ߬ ߞߕߌߞߊ߲ߘߊ ߦߋ߫ ߛߘߌ߫ ߛߎߟߋߡߊ߯ߣ ߒߖߊߦߌ߬ ߡߍ߲ ߘߌ߫߸ ߏ߬ ߛߐ߲߬ ߘߴߊ߬ ߡߊ߬ ߝߛߊߦߌ߫ ߞߏ߫ ߖߌ߬ߣߍ߫ ߛߊ߬ߙߌ߬ߦߊ ߞߣߐ߫߸ ߣߌ߫ ߓߌ߬ߟߊ߬ ߞߍ߫ ߘߊ߫ ߡߐ߱ ߞߍ߫ ߞߎ߲߬ߞߏ߬ߓߊ߬ߕߐ߬ߦߊ߬ ߞߏ ߘߐ߫߸ ߊ߬ ߟߊ߫ ߞߕߌ ߕߴߛߋ߫ ߞߍ߫ ߟߊ߫߸ ߝߏ߫ ߟߊ߬ߝߛߊ߬ߟߌ߬ߟߊ ߟߋ߬ ߞߍ߫ ߊ߬ ߘߊߝߍ߬.
ߏ߬ ߟߋ ߘߐ߫߸ ߌߞߏߡߌ߲߬ ߞߕߌߞߊ߲ߘߊ ߖߍ߬ߘߍ ߓߘߴߏ߬ ߦߋ߫ ߕߎ߬ߢߊ ߘߌ߫߸ ߊ߬ ߞߵߊ߬ ߟߊߢߌߣߌ߲߫ ߞߕߌߕߍ߯ߟߊ ߝߍ߬ ߏ߬ ߟߋ ߘߐ߫߸ ߏ߬ ߡߍ߲ ߦߋ߫ ߞߕߌߘߊ ߞߊ߲ߕߌ߮ ߘߌ߫߸ ߞߏ߫ ߊ߬ ߦߋ߫ ߕߎ߬ߡߊ߬ ߘߌ߫ ߡߊ߬ߝߌ߲߬ߓߊ߰ߕߐ߫ ߊߟߑߜ߭ߊߛߌߡߎ߬ ߡߊ߬، ߛߘߌ߫ ߛߎߟߋߡߊ߯ߣ ߒߖߊߦߌ߬ ߞߵߊ߬ ߦߌ߬ߘߊ߬߸ ߞߏ߫ ߊߟߑߜ߭ߊߛߌߡߎ߲߬ ߖߊߟߏ߫ ߦߋ߫ ߥߛߎ ߟߊ߫ ߦߙߐ ߡߍ߲ ߘߐ߫߸ ߊ߬ ߘߌ߫ ߛߐ߲߬ ߛߌߟߊ ߟߊߛߣߐ߬ߦߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߦߋ߫߸ ߊ߬ߟߎ߬ ߦߋ߫ ߥߴߊ߬ ߦߋ߫ ߦߋ߲߬߸ ߖߐ߲߰ߛߊ߫ ߞߕߌ ߘߌ߫ ߘߊߡߌ߬ߣߊ߬ ߢߊ ߡߍ߲ ߡߊ߬ ߖߏߣߊ߫.
ߓߍ߯ ߟߊߡߍ߲ ߞߐߝߍ߬߸ ߞߕߌߘߊ ߞߊ߲ߕߌ߮ ߌߓߙߊߤߌߡߊ߫ ߛߏߙߌ߬ ߁߭ ߕߎ߲߬ߞߙߊ ߞߊ߬ ߞߏ ߞߎ߲߭ߘߏ߲߬ ߞߊ߬ ߞߎߡߊ ߓߊ߲ߝߟߍ߬ߟߍ ߝߐ߫߸ ߞߏ߫ ߊ߬ ߓߘߊ߫ ߞߕߌ ߟߊߕߊ߯ ߟߏ߲߫ ߜߘߍ߫ ߘߐ߫، ߟߏ߲߫ ߞߋߟߋ߲ ߏ߬ ߞߏ߬ߣߌ߲ ߡߊ߫ ߟߊߕߍ߰، ߟߊ߬ߘߎ߲߬ߠߌ߲ ߞߎ߲߬ߕߊ߮ ߏ߬ ߟߋ ߞߍߕߐ߫ ߛߊߓߎ߫ ߘߌ߫߸ ߊߟߑߜ߭ߊߛߌߡߎ߬ ߖߊߟߏ߫ ߣߴߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߘߌ߫ ߢߐ߲߯ߦߋ߫߸ ߞߊ߬ ߓߍ߲߬ ߞߋߟߋ߲߫ ߘߐ߫، ߊ߬ ߘߌ߫ ߟߐ߲߫ ߏ߬ ߘߐ߫ ߛߊ߫߸ ߣߌ߫ ߞߕߌ ߘߌ߫ ߘߊߡߌ߬ߣߴߊ߬ߟߎ߬ ߓߟߏ߫ ߥߟߊ߫ ߏ߬ ߛߌ߬ߣߊ.
