߂߀߂߆ ߕߙߊߓߊ ߕߟߋ߬ ߁߂ ߡߊ߬߸ ߖߌ߬ߣߍ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߟߊ߬ߘߍ ߘߏ߫ ߞߎ߲߬ߠߊߛߌ߰߸ ߡߍ߲ ߞߍ߫ ߘߊ߫ ߝߊ߬ߛߏ ߡߊߞߊ߲ߞߊ߲ ߞߏߟߊߕߍ߯ ߛߊ߲ߘߐ ߟߎ߬ ߓߟߏ߫߸ ߞߊ߬ ߓߍ߲߬ ߖߡߊ߬ߣߊ ߟߊ߫ ߓߊߛߌ߯ߟߌ ߣߴߊ߬ ߟߊ߫ ߟߊ߬ߞߊ߲߬ߘߊ߬ߟߌ ߞߟߍ߬ߦߊ ߟߎ߬ ߡߊ߬، ߞߎߡߊ߫ ߞߍ߫ ߘߊ߫ ߏ߬ ߟߎ߫ ߟߋ߬ ߞߊ߲߬.
ߞߊ߲ߕߌ߮ ߟߊߡߌߣߌ߲ ߘߐ߫ ߓߌߟߏ߲ ߣߌ߲߬ ߡߊ߬߸ ߡߐ߰ߓߊ߬ ߛߌߦߊߡߊ߲߫ ߕߘߍ߬ ߜߍ ߘߐ߫߸ ߘߐ߬ߕߊߡߌ߲ ߞߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߞߊ߲ߕߌ߮ ߦߴߏ߬ ߟߋ ߘߐ߫߸ ߞߏ߲߬ߓߏ߫ ߘߊ߲߬ߛߊ߫ ߞߙߎ߬ߡߊ߬، ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮߸ ߊߡߊߘߎ߫ ߎ߯ߙߌ߬ ߓߊ߸ ߞߊ߲ߕߌ߯ߘߊ ߝߘߏ߬ߓߊ߬ ߞߟߊ߬ߕߌ߰ ߞߏߕߌ߮߸ ߞߟߍ߬ߕߌ߰ ߊߡߙߊ߫ ߞߡߊ߬ߙߊ߬߸ ߞߊ߲ߕߌ߯ߘߊ ߞߎߓߋߘߐ ߗߋߕߌ߯ ߞߏߕߌ߮߸ ߖߌ߯ߓߊ߫ ߖߊ߬ߞߌ߬ߕߋ߫߸ ߞߵߏ߬ ߟߊ߫ ߣߊ߲߬ߕߌ߰ ߞߎ߲߬ߕߌ߰ߓߊ ߟߎ߬ ߣߌ߫ ߣߊ߲߬ߕߌ߰ ߡߎߣߎ߲ ߠߎ߬ ߣߌ߫ ߞߎ߲߬ߠߊ߬ߛߌ߮ ߛߌ߲߬ߝߏ߲߬ ߛߌߦߊߡߊ߲߫ ߞߊ߲߬.
ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߖߡߊ߬ߙߌ߬ ߜߍߟߍ߲ ߠߎ߬ ߘߌ߫، ߓߊߏ߬߸ ߖߡߊ߬ߣߊ ߦߋ߫ ߦߙߐ ߡߍ߲ ߘߐ߫ ߕߋ߲߬߸ ߡߊ߬ߞߏ ߦߋ߫ ߖߊ߲߬ߕߏ߬ߒ߬ߘߐ ߟߊ߫߸ ߞߊ߬ ߛߋ߫ ߟߊ߬ߞߊ߲߬ߘߊ߬ߟߌ ߞߏ ߟߎ߬ ߡߊߡߙߊ߬ ߟߊ߫ ߞߵߊ߬ߟߎ߫ ߘߏ߲߬ߖߟߎ߬ߡߊ߫ ߞߊ߬ ߢߊ߬، ߏ߬ ߟߋ ߘߐ߫߸ ߊ߬ ߞߊ߬ ߖߊ߬ߡߊߙߌ ߘߌ߫ ߞߏߟߊߕߍ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߖߡߊ߬ߣߊ ߡߊ߬ߞߊ߲߬ߞߊ߲߬ߠߌ߲ ߣߴߊ߬ ߟߊ߬ߞߊ߲߬ߘߊ߬ߟߌ ߝߊ߲߬ߞߊߘߏ߲߬، ߞߊ߬ߕߎ߲߯߸ ߞߏ߫ ߝߏ߫ ߞߊ߬ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ߫ ߟߋ߬߸ ߞߊ߬ ߛߋ߫ ߖߡߊ߬ߣߊ ߓߊߛߌ߰ ߟߊ߫.
ߞߏߟߊߕߍ߮ ߡߍ߲ ߠߎ߬ ߢߊ ߕߘߍ߬ ߜߍ ߘߐ߫ ߦߋ߲߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ߟߎ߬ ߦߟߌߓߌ߬ߟߴߊ߬ߟߎ߬ ߟߊ߫ ߞߍߕߊ ߟߎ߬ ߘߐ߫߸ ߊ߬ ߣߴߊ߬ߟߎ߬ ߟߊ߫ ߗߋߦߊߟߌ ߟߎ߬߸ ߊ߬ߟߎ߬ ߣߌ߫ ߡߍ߲ ߞߍߟߌ ߞߊ߫ ߞߊ߲߫ ߖߌ߬ߣߍ߫ ߖߡߊ߬ߣߊ ߦߋ߫. ߊ߬ ߞߵߊ߬ ߖߊ߬ ߦߙߐ ߘߏ߫ ߞߊ߲߬߸ ߏ߬ ߟߋ ߖߏߏ߯ߘߏ߲ ߣߌ߫ ߡߊ߬ߝߊ ߘߌ߫߸ ߞߏ߫ ߖߡߊ߬ߣߊ ߗߍ߬ߘߋ߲ ߠߎ߬ ߦߴߊ߬ߟߎ߬ ߞߟߏ߫߸ ߊ߬ߟߎ߬ ߦߋ߫ ߓߌ߫߸ ߞߵߊ߬ߟߎ߫ ߛߌ߰ ߖߡߊ߬ߣߊ ߟߊߕߊ߲߬ߞߊ ߛߌ߰ߟߌ ߘߐ߫ ߥߊ߯ߕߌ ߓߍ߯ ߟߊߘߍ߬ߣߍ߲ ߠߊ߫.
ߢߐ߲߯ߓߍ߲ ߡߍ߲ ߦߋ߫ ߣߌ߲߬߸ ߊ߬ ߞߍ߫ ߘߊ߫ ߢߐ߲߯ߓߍ߲߫ ߓߟߋߓߟߋ߫ ߟߋ߬ ߘߌ߫߸ ߡߍ߲ ߡߊ߫ ߞߍ߫ ߟߊ߬ߘߍ߬ ߜߊ߲ߛߊ߲߫ ߘߌ߫ ߦߋ߲߬ ߕߋ߲߬، ߊ߬ ߞߍ߫ ߘߊ߫ ߕߐ߰ߡߊ߬ߛߙߋ ߘߏ߫ ߟߋ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ ߗߍ߬ߘߋ߲ ߠߎ߬ ߞߊ߫ ߞߊ߲߫ ߞߊ߬ ߝߊ߬ߛߏ ߟߋ߬ ߓߌ߬ߟߊ߬ ߢߍߝߍ߬، ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߞߊ߲ߕߌ߮ ߤߊߡߌ߲ ߠߎ߬ ߘߐ߫ ߓߏ߲߬ߓߊ ߟߋ߬ ߖߡߊ߬ߣߊ߬ߘߋ߲ ߠߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ ߘߌ߫ ߝߘߏ߬ߓߦߊ߬ ߓߟߏ ߡߊ߬.
ߟߊ߬ߘߍ ߣߌ߲߬ ߘߐ߫߸ ߞߊ߲ߓߍ߲ ߞߊ߲ߕߌ߮߸ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ ߓߌߣߍ߲߫ ߛߎ ߣߌ߫ ߕߋ߬ߟߋ߸ ߞߵߊ߬ ߖߊ߲߬ߕߏ߫ ߖߌ߬ߣߍ߬ߞߊ ߘߐ߫߸ ߞߵߊ߬ߟߎ߬ ߟߊ߫ ߛߌߣߌ߲ߢߍߛߌ߮ ߟߊߕߊ߲߬ߞߊ߬߸ ߞߊ߬ ߖߡߊ߬ߣߊ ߟߊߛߌ߰ ߖߛߎ߬ߛߎߡߊ ߘߐ߫߸ ߛߊ߫ ߥߙߎߞߌ߫ ߓߟߏߕߍ߰ߓߊߟߌ ߛߌߟߊ ߘߌ߫ ߟߊߞߊ߬ ߢߊ ߡߍ߲ ߡߊ߬߸ ߞߊ߬ ߟߊ߬ߣߐ߰ ߞߏ ߟߎ߬ ߘߊߝߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
