ߊ߲ ߣߌ߫ ߛߎ߲ߞߊߙߏ߫ ߛߊߟߌ ߕߍ ߡߊ߲߫ ߖߊ߲߬ ߡߎ߬ߕߎ߲߬߸ ߞߊ߲ߞߊ߲߫ ߛߌ߰ߓߊ߮ ߟߎ߬ ߦߋ߫ ߜߟߍ߬ߦߊ߫ ߝߌ߬ߟߊ߬ߣߍ߲ ߠߋ߬ ߕߍߡߊ߬ ߕߋ߲߬: ߥߊߘߌ߫ ߡߎ߯ ߞߏߖߊ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߥߊߘߌ߫ ߟߊߓߐ߫ ߞߏ ߜߟߍ߬ߦߊ߬ ߛߟߏߟߏߞߏ߲ߘߏ ߟߎ߬ ߟߊ߫߸ ߏ߬ ߕߊ߬ߣߍ߲ ߞߵߊ߬ ߟߊ߫ ߝߋ߲ ߠߎ߬ ߛߐ߲߬ߞߐ ߦߍ߬ߟߍ ߞߊ߲߬ ߟߐ߯ߝߍ ߞߣߐ߫.
ߘߋ߲ߓߦߊ ߓߍ߯ ߟߋ߬ ߟߐ߯ߝߍ ߟߊ߫ ߜߟߍ߬ߦߊ ߣߌ߲߬ ߞߊ߬ߟߊߡߊ߬ ߕߋ߲߬߸ ߓߍ߯ ߓߘߊ߫ ߞߣߐ߬ߘߐߝߟߌ߬، ߥߊߘߌ ߦߴߋ ߟߊ߫ ߖߊ߬ߕߋ߬ߘߊ ߟߊ߫ ߝߛߊߦߌ߫߸ ߓߊ߬ߙߵߊ߬ ߕߴߛߋ߫ ߞߍ߫ ߟߊ߫ ߥߊߘߌ߫ ߡߎ߮ ߟߋ߬ ߘߌ߫ ߞߵߊ߬ ߟߊ߫ ߌ ߕߍ߯، ߝߋ߲ ߠߎ߬ ߝߣߊ߫ ߛߐ߲߬ߞߐ ߕߍ߫ ߖߌ߰ ߟߊ߫ ߘߋ߬߸ ߊ߬ ߓߍ߯ ߦߋ߫ ߦߍ߬ߟߍ ߟߋ߬ ߞߊ߲߬.
ߒ߬ߓߊ߬ ߞߊ߲ߞߊ߲߫ ߞߣߐ߫ ߕߋ߲߬߸ ߏ߬ ߓߘߊ߫ ߞߍ߫ ߊ߬ ߕߊ߫ ߡߊ߲߬ߕߙߐ߬ ߘߌ߫ ߛߊߟߌ߫ ߢߊߞߘߐ ߣߌ߲߬ ߘߐ߫، ߤߊߟߌ߬ ߡߏ߬ߛߏ ߘߏ߫ ߟߎ߫ ߟߊ߫ ߖߐ߰ߣߍ ߟߊߓߐ߫ ߞߏ ߦߋ߫ ߓߊ߯ߙߊ ߟߋ߬ ߘߌ߫.
ߝߊߕߎߡߊߕߊ߬ ߖߊߟߏ߫ ߦߴߏ߬ ߜߟߍ߬ߦߊ ߕߍߡߊ߬ ߕߋ߲߬ ߞߏߛߓߍ߫، <<ߡߊ߲߬ߕߙߐ ߖߍ߬ߘߍߖߍ߬ߘߍ ߟߋ߬ ߦߴߊ߲ ߞߊ߲߬ ߛߟߏߟߏߞߏ߲ߘߏ ߕߊ߫ ߓߟߏ ߡߊ߬ ߕߋ߲߬، ߊ߲ ߠߊ߫ ߥߊߘߌ ߦߴߊ߲ ߠߊ߫ ߖߊ߬ߕߋ߬ߘߊ ߟߊ߫߸ ߓߊ߬ߙߵߊ߬ ߕߴߛߋ߫ ߟߊߓߐ߫ ߟߊ߫، ߕߎ߬ߡߊ ߘߏ߫ ߟߎ߫ ߟߊ߫߸ ߖߐ߰ߣߍ߬ ߓߐ߬ߟߊ ߦߋ߫ ߞߍ߫ ߟߊ߫ ߦߙߐ ߘߏ߫ ߘߐ߫߸ ߊ߬ ߘߌ߫ ߥߊߘߌ ߓߌ߬ߟߊ߬ ߛߟߏߟߏߞߏ߲ߘߏ ߟߊ߫߸ ߞߏ߬ߣߌ߲߬ ߏ߬ ߝߣߊ߫ ߕߴߛߋ߫ ߟߊ߫ ߛߐ߬ߘߐ߲߬ ߠߊ߫ ߓߏ߲߬، ߒߠߋ ߟߊ߫ ߛߊߟߌ ߖߐ߰ߣߍ ߓߌ߬ߟߊ߬ߣߍ߲߫ ߒ ߠߊ߫ ߛߟߏߟߏߞߏ߲ߘߏ ߟߋ߬ ߟߊ߫߸ ߞߏ߬ߣߌ߲߬ ߒ ߡߴߊ߬ ߟߐ߲߫ ߒ ߞߍߕߐ߫ ߒ ߠߊ߫ ߥߊߘߌ ߟߊߛߐ߬ߘߐ߲߬ ߠߊ߫ ߘߌ߬ ߞߊ߬ ߒ ߠߊ߫ ߝߋ߲ ߠߎ߬ ߛߊ߲߬.
ߊ߲ ߧߋ߫ ߜߟߍ߬ߦߊ߬ߓߊ߫ ߟߋ߬ ߕߍߡߊ߬ ߕߋ߲߬، ߒߠߋ ߖߍ߬ߘߍ ߓߘߊ߫ ߣߡߌߛߊ߫ ߟߋ߬ ߒ ߠߊ߫ ߛߟߏߟߏߞߏ߲ߘߏ ߖߊ߬ߕߋ߬ߘߊ ߟߊߞߊ߭ ߘߐ߫ ߕߋ߲߬، ߣߌ߫ ߒߠߋ ߕߍ߮ ߟߊ߫ ߘߊ߫ ߒ ߠߊ߫ ߥߊߘߌ ߘߐ߫ ߕߋ߲߬ ߞߵߊ߬ ߟߊߓߐ߫ ߦߋ߲߬߸ ߒ ߘߌ߫ ߒ ߠߊ߫ ߖߊ߬ߕߋ߬ߘߊ ߛߐ߰ ߘߏߦߌ߲߫ ߞߵߊ߬ ߞߏ ߓߟߏߞߊ߬.
ߊ߲ ߛߌߟߊ߲ߣߍ߲߫ ߕߋ߰ߙߋ߬ ߞߏ ߟߋ߬ ߢߍ߫߸ ߞߏ߬ߣߌ߲߬ ߓߌ߬ ߢߐ߲߰ ߟߏ߲߫߸ ߊ߬ߟߋ ߖߎ߯ߡߊ߲߫ ߏ߬ ߟߎ߬ ߕߊ ߘߌ߫، ߓߊߏ߬߸ ߌ ߟߊ߫ ߥߊߘߌ ߓߌ߬ߟߊ ߦߋ߲߬߸ ߏ߬ ߕߴߊ߬ ߟߊ߫ ߘߋ߬߸ ߝߏ߫ ߊ߬ ߡߊߛߐ߬ߘߐ߲߬ ߞߏ، ߥߊߘߌ ߦߴߊ߲ ߓߟߏ߫ ߊ߲ ߠߊ߫ ߖߊ߬ߕߋ߬ߘߊ ߟߊ߫߸ ߒ߬ߞߵߊ߬ ߕߍ߫ ߛߋ߫ ߟߊ߫ ߡߊߛߐ߬ߘߐ߲߬ ߠߊ߫.>> ߝߊߕߎߡߊߕߊ߬ ߖߊߟߏ߫ ߟߋ߬ ߞߊ߲߫ ߕߋ߲߬.
ߜߟߍ߬ߦߊ ߡߍ߲ ߘߏ߲߬ ߦߋ߫ ߡߏ߬ߛߏ ߣߌ߲߬ ߞߊ߲߬ ߕߋ߲߬߸ ߏ߬ ߢߐ߲߰ ߠߋ߬ ߡߐ߰ ߛߌߦߊߡߊ߲߫ ߝߣߊ߫ ߞߊ߲߬، ߥߊߘߌ߫ ߡߎ߯ ߞߏߖߊ ߣߌ߲߬ ߕߍ߫ ߥߊߘߌ߫ ߟߊߓߊ߯ߙߟߊ ߟߎ߬ ߞߋߟߋ߲߫ ߞߊ߲߬ ߕߋ߲߬߸ ߤߊߟߌ߬ ߥߊߘߌ ߦߋ߫ ߛߐ߬ߘߐ߲߬ ߠߊ߫ ߡߍ߲ ߠߎ߬ ߝߣߊ߫ ߟߊ߫߸ ߏ߬ ߟߎ߬ ߝߣߊ߫ ߓߊ߬ߟߌ߬ߣߍ߲߫ ߠߋ߬ ߣߌ߲߬ ߞߏ ߘߐ߫.
ߏ߬ ߟߊߒߡߊ ߘߏ߫ ߟߋ߬ ߛߊߟߌߝߎ߬ ߞߡߊ߬ߙߊ߬ ߘߌ߫߸ ߏ߬ ߦߋ߫ ߛߟߏߟߏߞߏ߲ߘߏ ߓߊ߯ߙߟߊ ߟߋ߬ ߘߌ߫߸ ߏ߬ ߞߊ߬ ߘߏ߫ ߝߐ߫ ߊ߬ߟߎ߬ ߟߊ߫ ߜߟߍ߬ߦߊ ߟߎ߬ ߞߊ߲߬:
<<ߊ߲ߠߎ߬ ߡߍ߲ ߠߎ߬ ߦߋ߫ ߥߊߘߌ ߟߊߘߏ߲߭ ߣߴߊ߬ ߟߊߓߐ ߞߍ߫ ߟߊ߫ ߡߐ߱ ߟߎ߫ ߞߎ߲߬ ߦߊ߲߬߸ ߝߍ߬ ߕߴߊ߲ߠߎ߬ ߓߘߊ ߦߊ߲߬، ߞߏ߫ ߘߍ߲ߣߍ߲߫ ߢߐ߲߰ ߠߊ ߟߎ߫ ߟߋ߬، ߊ߲ߠߎ߬ ߓߊ߯ ߞߊ߬ߙߌ߬ߝߊ߬ߟߌ ߞߍ߫ ߥߟߊ߫ ߟߊ߬ߓߐ߬ߟߌ߸ ߊ߲ ߧߋ߫ ߥߊߘߌ ߏ߬ ߢߎߡߍߙߋ߲ߡߊ ߟߋ߬ ߟߊߕߊ߯ ߟߴߊ߲ ߡߊߛߐߓߊ߮ ߟߎ߫ ߡߊ߬، ߏ߬ ߟߎ߫ ߟߋ߬ ߥߊߘߌ߫ ߡߎ߮ ߘߌ߫ ߟߴߊ߲ ߡߊ߬߸ ߛߴߊ߲ ߘߌ߫ ߛߋ߫ ߟߊ߬ߓߐ߬ߟߌ ߞߍ߫ ߟߊ߫.
ߓߊ߬ߙߌ߬߸ ߣߌ߫ ߥߊߘߌߜߍ߫ ߕߴߏ߬ ߟߎ߬ ߓߟߏ߫ ߦߋ߲߬߸ ߊ߲ߠߎ߬ ߝߣߊ߫ ߕߴߛߋ߫ ߥߊߘߌ߫ ߛߐ߬ߘߐ߲߬ ߠߊ߫ ߞߵߊ߬ ߘߌ߫ ߟߊ߬ߓߐ߬ߟߌ߬ߟߊ ߟߎ߫ ߡߊ߬ ߘߋ߬.>>
ߡߐ߱ ߟߎ߬ ߕߴߊ߬ ߢߊߦߋ߫ ߟߊ߫߸ ߞߎ߲߬ ߞߋߟߋ߲ ߡߍ߲ ߠߊ߫߸ ߟߊ߬ߓߐ߬ߟߌ ߦߋ߫ ߞߢߊ߬ ߟߊ߫ ߞߍ߫ ߟߊ߫، ߛߟߊߕߌ߯ ߞߊ߬ߡߊߙߊ߬ ߞߵߏ߬ ߝߣߊ߫ ߓߛߊߞߟߌߕߋ߫:
<<ߥߊߘߌߣߍ߲ ߡߍ߲ ߦߴߊ߲ ߓߟߏ߫ ߦߊ߲߬߸ ߣߴߊ߲ ߞߵߊ߬ ߝߐ߫ ߞߏ߫ ߊ߲ ߘߌ߫ ߟߊ߬ߓߐ߬ߟߌ ߞߍ߫ ߏ߬ ߟߊ߫߸ ߞߵߊ߬ ߛߐ߬ߘߐ߲߬ ߥߊߘߌߜߍ߫ ߕߴߊ߲ ߡߊߛߐߓߊ߮ ߟߎ߬ ߓߟߏ߫߸ ߊ߲ ߠߊ߫ ߥߊߘߌ ߘߌ߫ ߓߌ߬ߟߊ߫ ߞߎ߲߬ߓߊߟߊ߲ ߠߊ߫، ߏ߬ ߟߋ ߘߐ߫߸ ߊ߬ ߘߌ߫ ߞߍ߫ ߊ߲ ߞߊ߲߬ ߘߌߦߊߜߏߦߊ ߘߌ߫߸ ߞߊ߬ ߟߊ߬ߓߐ߬ߟߌ ߟߊߟߐ߬، ߣߴߏ߬ ߕߍ߫߸ ߊ߲ ߝߣߊ߫ ߘߌ߫ ߓߌ߬ߟߊ߫ ߖߊ߭ ߘߐ߫߸ ߞߊ߬ ߞߢߊ߬ ߞߏ߫ ߜߘߍ ߕߐ߭ ߟߎ߬ ߢߊߓߐ߫ ߟߊ߫ ߜߍߒߕߊ߲ߧߊ ߞߏߛߐ߲߬.
ߓߌ߬ ߢߐ߲߰ ߟߏ߲߫߸ ߣߴߌ ߞߵߊ߬ ߕߊ߬ ߟߊߒߡߊ߫ ߘߐ߫߸ ߒ ߕߴߛߋ߫ ߟߊ߬ߓߐ߬ߟߌ߬ ߞߍ߫ ߟߊ߫ ߓߌ߬ ߕߋ߲߬߸ ߓߊߏ߬ ߥߊߘߌߜߍ߫ ߕߍ߫ ߒ ߓߟߏߞߘߐ߫، ߤߊߟߌ߬ ߣߌ߫ ߘߏ߫ ߘߏ߲߬ ߦߋ߫ ߒ ߓߟߏ߫߸ ߒ ߛߋߕߐ߫ ߏ߬ ߣߐ߬ߘߐߓߌ߬ߟߊ߬ ߟߊ߫ ߘߌ߬؟>>
ߊ߬ߟߋ ߟߊ߫ ߝߐߟߌ߫ ߘߐ߫߸ ߝߙߋߞߋ ߣߌ߲߬ ߢߊ ߦߋ߫ ߜߍ ߟߋ߬ ߘߐ߫:
<<ߥߊߘߌ߫ ߡߎ߯ ߞߏ ߟߋ߬، ߣߌ߫ ߥߊߘߌ ߕߍ߫ ߕߊ߯ߡߊ߫ ߟߊ߫߸ ߓߍ߯ ߘߴߊ߬ ߜߟߍ߬ߦߊ ߟߊߞߏߟߐ߲߫.>>
ߝߙߋߞߋ߫ ߞߋߟߋ߲ ߢߌ߲߬ ߠߋ߬ ߞߏߛߐ߲߬߸ ߖߡߊ߬ߣߊ߬ߘߋ߲ ߘߏ߫ ߟߎ߫ ߞߵߊ߬ߟߎ߬ ߞߊ߲ߠߊߘߌ߫ ߞߎ߲߬ߠߊ߬ߛߌ߮ ߡߊ߬ ߌߞߘߐ߫، ߊߟߛߊߣ ߞߐ߲ߘߍ߫ ߞߎߡߊ߫ ߘߊ߫ ߥߊߘߌ߫ ߞߏ߫ ߝߙߋߞߋ ߞߊ߲߬:
<<ߒߠߋ ߝߍ߬߸ ߝߙߋߞߋ ߡߍ߲ ߺ ߍ ߺ ߡߍ߲߫ ߦߋ߫ ߦߋ߲߬ ߓߌ߬߸ ߞߎ߲߬ߠߊ߬ߛߌ߮ ߟߊ߫ ߝߙߋߞߋ ߟߋ߬، ߖߌ߬ߣߍ߫ ߖߘߍ߬ߞߊ߬ߣߌ߲߬ ߥߊߘߌ ߟߋ߬ ߦߴߊ߬ ߓߟߏ߫߸ ߜߍߓߟߎ߫ ߞߏ߫ ߜߟߍߦߊ߫ ߞߏ߫ ߞߎߡߊ ߦߴߊ߲ ߘߊ ߘߐ߫ ߏ߬ ߓߍ߯ ߞߐ߫، ߖߡߊ߬ߣߊ ߜߘߍ ߟߎ߫ ߞߊ߲߬߸ ߦߏ߫ ߜ߭ߊ߯ߣߊ߬߸ ߥߟߊ߫ ߖߋ߬ߟߌ߬ߓߊ߬ߟߊ߫߸ ߝߙߋߞߋ߫ ߛߎ߮ ߣߌ߲߬ ߕߴߦߋ߲߬.>>
ߊ߬ ߞߵߊ߬ ߦߌ߬ߘߊ߬ ߞߏ߫ ߥߊߘߌ߫ ߡߌߛߍ߲߫ ߞߏߖߊ ߦߋ߫ ߣߊ߬ ߟߊ߫ ߟߋ߬ ߜߟߍ߬ߦߊ ߘߌ߫:
<<ߊ߲ ߡߊ߬ߞߏ ߦߋ߫ ߥߊߘߌ߫ ߡߌߛߍ߲ ߠߊ߫، ߝߏ߫ ߁߀߀ ߣߌ߫ ߂߀߀ ߣߌ߫ ߅߀߀ ߟߎ߬ ߜߍߓߟߎ ߦߋ߫ ߞߍ߫ ߟߋ߬ ߦߋ߲߬، ߓߌ߬ ߘߏ߲߬߸ ߂߀ ߀߀߀ ߜߍߓߟߎ ߟߋ߬ ߓߊ߯ߙߊ߫ ߟߊ߫، ߥߊߘߌ߫ ߡߌߛߍ߲ ߠߊߛߊ߬ߦߌ߲߬ߕߐ߫ ߘߌ߬؟ ߏ߬ ߕߍ߫ ߞߏ߫ ߢߣߊߡߊ߫ ߘߌ߫.>>
ߦߊ߬ߣߴߊ߬ ߦߴߊ߬ ߟߊ߫ ߞߎߡߊ ߞߎ߲߭ߘߏ߲߬: <<ߖߡߊ߬ߣߊ߬ߘߋ߲ ߠߎ߬ ߓߘߊ߫ ߕߙߐ߫، ߊ߲ ߓߘߊ߫ ߛߍ߰، ߞߎ߲߬ߠߊ߬ߛߌ߮ ߞߊ߫ ߞߊ߲߫ ߞߵߊ߬ ߟߐ߬ ߊ߬ ߟߐ߬ ߦߌߟߊ.>>
ߣߴߌ ߛߋ߫ ߘߊ߫ ߟߐ߯ߝߍ ߟߎ߬ ߞߣߐ߫ ߓߌ߬ ߢߐ߲߰ ߟߏ߲߫߸ ߓߍ߯ ߟߋ߬ ߞߊ߬ߛߌ ߞߊ߲߬، ߛߏߜߍ ߟߐ߯ߝߍ ߘߐ߫߸ ߝߙߋ߬ߞߍ߬ߟߊ ߟߎ߬ ߣߌ߫ ߛߊ߲߬ߠߌ߲߬ߠߊ ߟߎ߬߸ ߓߍ߯ ߦߋ߫ ߜߟߍ߬ߦߊ ߣߌ߲߬ ߞߎߡߎߊ ߞߊ߲߬߸ ߝߋ߲ ߠߎ߬ ߛߐ߲߬ߞߐ ߟߊ߫ ߦߍ߬ߟߍ߸ ߞߵߏ߬ ߟߊ߫ ߝߋ߲ ߘߏ߫ ߟߎ߫ ߛߐ߬ߘߐ߲߬ߓߊߟߌߦߊ ߞߊ߲߬.
ߝߊߕߎߡߊߕߊ߬ ߖߊ߰ߣߍ ߞߵߏ߬ ߟߊߛߙߋߦߊ߫ ߒ߬ ߧߋ߫: <<ߒ ߥߊߣߍ߲߫ ߠߋ߬ ߥߊߘߌ߫ ߟߊߓߐ߫ ߦߌߟߊ ߘߐ߫߸ ߒ ߡߊ߫ ߛߋ߫ ߘߏ߫ ߜߘߍ߫ ߛߐ߬ߘߐ߲߬ ߠߊ߫ ߝߏ߫ ߁߀߀ ߀߀߀، ߒ ߓߊ߯ ߥߊ߫ ߝߊ߲߬ ߛߌ߫߸ ߊ߬ߟߎ߬ ߘߴߊ߬ ߝߐ߫ ߞߏ߫ ߟߊ߬ߓߐ߬ߟߌ߬ ߕߴߦߋ߲߬.
ߒ ߥߊߣߍ߲ ߛߓߏ߬ ߛߊ߲߬ ߦߌߟߊ߸ ߛߓߏ߬ ߕߴߦߋ߲߬، ߞߌߘߊ ߓߘߊ߫ ߞߍ߫ ߊ߬ߟߎ߬ ߓߟߏ߫ ߇߀ ߀߀߀ ߘߌ߫ ߘߓߌߘߊ ߟߊ߫ (ߏ߬ ߡߍ߲ ߕߘߍ߬ ߆߀ ߀߀߀ ߘߌ߫)، ߒ ߞߊ߬ ߛߌ߬ߛߍ ߛߊ߲߬ ߈߅ ߀߀߀، ߟߐ߯ߝߍ ߣߐ߰ߡߊ߲߬ ߕߍ߫ ߕߋ߲߬ ߝߋߝߋ߫.>>
ߘߎ߬ߛߎ߫ ߛߌ߬ߟߊ ߝߣߊ߫ ߞߊ߬ ߣߌ߲߬ ߢߐ߲߰ ߠߋ߬ ߝߐ߫߸ ߊ߬ߟߋ ߦߋ߫ ߖߍ߯ ߖߎߟߊ ߟߋ߬ ߘߌ߫ ߛߏߜߍ ߟߊ߫:
<<ߟߐ߯ߝߍ ߜߍ߬ߟߍ߲߬ߡߊ߲߫ ߠߋ߬ ߕߋ߲߬ ߝߋߝߋ߫، ߖߍ߮ ߘߊ ߓߘߊ߫ ߜߟߍ߬ߦߊ߬߸ ߛߏ߬ߓߏ ߖߍ߬ߘߍ ߕߍ߫ ߛߐ߬ߘߐ߲߬ ߠߊ߫، ߓߍ߯ ߓߘߊ߫ ߛߍ߰.
ߏ߬ ߓߍ߯ ߞߐ߫߸ ߊ߲ ߕߍ߫ ߛߋ߫ ߟߴߊ߲ ߠߊ߫ ߥߊߘߌ ߟߎ߬ ߡߊߛߐ߬ߘߐ߲߬ ߠߊ߫ ߛߟߏߟߏߞߏ߲ߘߏ ߟߊ߫ ߕߋ߲߬، ߊ߲ ߡߴߊ߬ ߟߐ߲߫ ߏ߬ ߞߎ߲߭ ߦߴߊ߬ ߛߎ߯ ߺ ߎ ߺ ߛߎ߯ ߘߌ߫.>>
ߛߊߟߌ߫ ߢߊߞߘߐߟߊ ߣߌ߲߬ ߘߐ߫߸ ߡߊ߬ߞߏ ߦߋ߫ ߝߋ߲߫ ߛߌߦߊߡߊ߲߫ ߠߋ߬ ߟߊ߫ ߛߎ߬ߡߊ߲߬ߠߊ߬ߞߊ ߟߎ߬ ߘߐ߫، ߏ߬ ߘߏ߫ ߟߎ߫ ߞߏߖߊ ߕߊ߬ߣߍ߲ ߞߵߊ߬ ߟߊ߫ ߜߍߓߟߎ߫ ߞߏߖߊ ߞߊ߲߬߸ ߊ߬ ߣߌ߫ ߝߋ߲ ߠߎ߫ ߛߐ߲߬ߞߐ ߦߍ߬ߟߍ߸ ߏ߬ ߓߘߊ߫ ߞߍ߫ ߜߊ߬ߘߏ߲߬ߠߊ ߟߎ߫ ߞߊ߲߬ ߡߊ߲߬ߕߙߐ߬ߓߊ߫ ߘߌ߫. ߥߊߘߌ ߦߋ߫ ߡߐ߱ ߟߎ߫ ߞߎ߲߬ ߊ߬ߟߎ߬ ߟߊ߫ ߞߏ߲߬ߘߏ ߟߎ߬ ߟߊ߫߸ ߊ߬ ߕߴߛߋ߫ ߟߊߓߐ߫ ߟߊ߫، ߝߋ߲ ߠߎ߬ ߛߐ߲߬ߞߐ ߦߋ߫ ߜߟߍ߬ߦߊ ߞߊ߲߬ ߕߎ߲߫.
ߞߊ߲ߞߊ߲߫ ߞߣߐ߫ ߕߋ߲߬߸ ߛߊߟߌ ߓߟߏߘߐߓߍ߲ ߦߴߌߘߐ߫ ߛߍ߱ ߟߋ߬ ߘߐ߫، ߥߊߘߌ߫ ߞߏ ߣߐ߰ߦߊ߬ ߢߊ߫ ߕߴߦߋ߲߬ ߡߎߣߎ߲߬، ߊ߬ߝߐ߫ ߜߟߍ߬ߦߊ ߏ߬ ߘߌ߫ ߘߊ߲߬ ߛߊߟߌ ߢߊߞߘߐߟߊ ߣߌ߲߬ ߘߐߙߐ߲߫ ߘߐ߫ ߓߊ߬؟
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
