ߓߌ߬ ߛߐ߱ ߣߌ߲߬ ߡߊ߬߸ ߂߀߂߆ ߞߏ߲ߞߏߜߍ ߕߟߋ߬ ߁߀ ߡߊ߬߸ ߝߌ߬ߙߌ߲߬ߕߊ߬ߥߏ߬ߟߌ ߟߋ߬ ߞߍߣߍ߲߫ ߞߐߣߊߞߙߌ߫߸ ߡߍ߲ ߞߊ߬ ߕߊ߬ߘߌ߬ߓߊ߬ߕߊߘߌߓߊ ߟߊߘߏ߲߬ ߞߐ߬ߙߐ߲߬ߕߌ߲߬ ߥߛߎ߫ ߞߣߐߟߊ ߘߐ߫ ߞߏߛߓߍ߫، ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߋ߬ ߕߊ߯ߣߍ߲߫ ߕߙߊ߬ߓߊ߬ߛߏ߬ ߟߊ߫ ߥߛߎߖߌ߲ ߞߊ߲߬߸ ߞߊ߬ ߖߌ߬ߣߍ߫ ߣߊ߲߬ߕߌ߰ ߞߎ߲߬ߕߌ߰ ߞߘߐ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߟߊߓߐ߫ ߝߊ߲߬ߞߊ ߟߊ߫߸ ߊ߬ߟߋ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫، ߏ߬ ߞߍ߫ ߘߊ߫ ߕߙߎ߬ ߘߌ߫߸ ߞߊ߬ ߟߊ߬ߡߊ߮ ߟߊߘߏ߲߬ ߥߛߎ ߞߣߐ߫߸ ߝߏ߫ ߞߊ߬ ߥߛߎߟߊߘߋ߲ ߛߌߦߊߡߊ߲߫ ߖߐߞߌ߫، ߏ߬ ߓߘߊ߫ ߞߍ߫ ߊ߬ ߕߊ߫ ߞߏ߫ ߘߌ߫߸ ߡߍ߲ ߓߘߊ߫ ߕߊ߬ߡߌ߲߫ ߖߌ߬ߣߍ߫ ߛߊ߬ߙߌ߬ߦߊ߬ ߞߏ ߣߴߊ߬ ߓߘߍ߬ߓߘߍ߬ߟߌ ߝߛߏ߬ߝߛߊ ߟߊ߲ߞߣߍߡߊ߫ ߟߊ߫ ߓߘߍߞߍ߭.
ߞߏ߲ߞߏߜߍ ߕߟߋ߬ ߁߀ ߣߌ߲߬ ߛߐ߱ߡߊ߬ ߸ ߞߊ߲ߕߌ߯ߘߊ ߦߋ߫ ߞߊߟߎߡ ߡߍ߲ ߞߣߐ߫ ߖߐ߫߸ ߞߵߏ߬ ߟߊ߫ ߖߌ߬ߣߍ߫ ߖߡߊ߬ߣߊ ߞߏߕߌ߯ߘߊ߫ ߛߌߦߊߡߊ߲߫ ߞߊ߲߬߸ ߦߋ߲߬ ߠߊߡߊ߰ ߘߊ߫ ߟߋ߬ ߞߏߛߓߍ߫.
ߡߎ߲߬ ߞߏߛߐ߲߬߸ ߡߊ߬ߙߌ߬ߝߊ߬ ߜߌߟߌ߲ ߠߎ߬ ߟߋ߬ ߡߊ߲߬ߞߊ߲ ߓߐߣߍ߲߫ ߞߐ߬ߙߐ߲߬ߕߌ߬ ߥߛߎߖߌ߲ߓߊ ߟߊ߫ ߞߐߣߊߞߙߌ߫߸ ߊ߬ߟߋ ߡߍ߲ ߦߋ߫ ߖߡߊ߬ߣߊ ߥߛߎ ߟߎ߬ ߘߐ߫ ߓߟߋ߬ߓߟߋ ߘߌ߫. ߥߛߎߟߊߘߋ߲߫ ߛߘߊߡߊ ߣߴߊ߬ ߡߐ߰ߓߊ߬ ߛߌߦߊߡߊ߲߫ ߠߋ߬ ߞߐ߬ߙߐ߲߬ߕߌ߲߬ ߥߛߎߖߌ߲ߓߊ ߢߌ߲߬ ߠߊ߫߸ ߤߊߟߌ߬ ߡߍ߲ ߠߎ߬ ߛߐ߲߭ ߦߋ߫ ߘߊ߫ ߂߀߀߉ ߕߎߟߊߝߌ߲ ߡߊ߲߬ߞߊ߲ ߘߐ߫ ߣߴߊ߬ߟߎ߫ ߖߊ߲߬ߞߌ߬ ߘߊ߫߸ ߏ߬ ߟߎ߬ ߓߍ߯ ߦߋ߫ ߦߋ߲߬ ߠߋ߬. ߒ߬ߓߊ߬߸ ߦߋ߲߬ ߡߐ߮ ߟߎ߬ ߞߊ߲߫ ߞߏ߫ ߊ߬ߟߎ߫ ߞߊ߬ ߡߊ߬ߙߌ߬ߝߊ߬ ߡߊ߲߬ߞߊ߲߬ ߛߌߦߊߡߊ߲߫ ߠߋ߬ ߡߍ߲߫ ߦߋ߲߬ ߓߌ߬.
ߊ߲ ߠߊ߫ ߟߌ߬ߤߟߊ߬ ߟߊߘߍ߬ߣߍ߲ ߠߎ߬ ߘߐ߫߸ ߝߊ߲߬ߞߊ߬ ߓߟߏߡߊߞߊ߬ߣߍ߲ ߡߐ߱ ߟߎ߬ ߟߋ߬ ߕߊ߯ ߘߊ߫ ߥߛߎߖߌ߲ߓߊ ߟߊ߫ ߦߙߍߞߍߟߌ ߣߌ߲߬ ߞߊ߲ߡߊ߬، ߝߊ߲߬ߞߊ߬ ߓߟߏߡߊߞߊ߬ߣߍ߲ ߢߌ߲߬ ߠߎ߬ ߦߋ߫ ߣߊ߲߬ߕߌ߰ ߓߏߟߏ߲߫ ߠߋ߬ ߘߌ߫߸ ߡߍ߲ ߠߎ߬ ߦߋ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߊ߬ߙߊ ߞߣߐ߫، ߝߊߦߌߘߊ߫߸ ߊ߬ߟߎ ߟߋ߬ ߝߣߊ߫ ߓߘߊ߫ ߞߍ߫ ߊ߬ ߝߊ߬ߘߌ߬ ߞߣߐ߬ߜߍ߲߬ߘߋ߲߬ ߜߐߞߎ ߘߌ߫ ߕߋ߲߬، ߒ߬ߓߊ߬߸ ߏ߬ ߟߎ߫ ߟߋ߬ ߕߊ߯ ߘߊ߫ ߡߊ߬ߙߌ߬ߝߊ߬ ߕߋ ߣߌ߲߬ ߞߍ߫ ߥߛߎ ߞߣߐ߫ ߓߌ߬، ߊ߬ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߡߎ߲߬ ߘߌ߫: ߞߊ߬ ߘߏ߲߬ ߥߛߎߖߌ߲ߓߊ ߞߣߐ߫߸ ߕߎ߲ߓߊ߬ ߖߊ߬ߞߌ߬ߕߋ߬ ߟߊߓߐ߫، ߕߎ߲ߓߊ߬ ߣߌ߲߬ ߦߋ߫ ߡߎߛߊ߫ ߘߊ߬ߘߌߛ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲ ߠߋ߬ ߘߌ߫߸ ߛߊ߲߬ ߕߊ߲߫ ߥߛߎ ߟߋ߬ ߝߣߊ߫ ߟߊߣߴߊ߬ ߞߎ߲߬ ߞߵߊ߬ ߓߍ߲߬ ߂߀߀߉ ߕߎߟߊߝߌ߲ ߂߈ ߞߕߌ ߞߐߝߟߌ ߟߎ߫ ߡߊ߬، ߒ߬ߓߊ߬߸ ߓߐߛߎ߲ ߘߏ߫ ߟߎ߫ ߞߵߊ߬ ߦߌ߬ߘߵߊ߲ ߠߊ߫߸ ߞߏ߫ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߟߊ߫ ߡߎ߯ ߝߏߘߏ߲ ߞߐ ߘߐ߫߸ ߊ߬ߟߎ߫ ߞߊ߬ ߕߎ߲ߓߊ߬ ߖߊ߬ߞߌ߬ߕߋ߫ ߕߊ߬ ߟߋ߬ ߞߊ߬ ߓߐ߫ ߊ߬ ߘߌ߫߸ ߞߊ߬ ߥߴߊ߬ ߘߌ߫ ߦߙߐ߫ ߘߐ߫߸ ߡߐ߰ ߡߊ߫ ߡߍ߲ ߟߐ߲߫.
ߥߛߎߟߊߘߋ߲ ߡߍ߲ ߠߎ߬ ߕߍ߬ߘߍ߫ ߦߋ߲߬ ߡߊ߲߬ߞߊ߲ ߕߎ߬ߡߊ ߟߊ߫߸ ߏ߬ ߘߏ߫ ߟߎ߫ ߞߵߊ߬ ߝߐ߫ ߟߋ߬ ߞߏ߫ ߕߎ߲ߓߊ߬ ߕߍ߫ ߓߐ߫ ߟߊ߫߸ ߞߏ߫ ߊ߬ߟߎ߬ ߡߊ߫ ߓߍ߲߬ ߏ߬ ߡߊ߬، ߓߊ߬ߙߌ߬߸ ߡߊ߬ߙߌ߬ߝߊ߬ ߞߊ߲ ߥߙߊ߬ ߘߴߊ߬ߟߎ߫ ߡߊ߬، ߊ߬ ߖߍ߬ߘߍ߸ ߥߛߎߟߊߘߋ߲߫ ߛߌߦߊߡߊ߲߫ ߖߐߞߌ߫ ߘߊ߫ ߟߋ߬ ߞߌ߬ߛߍ ߟߊ߫߸ ߊ߬ ߞߎߡߎߊ ߝߐ߫ ߘߊ߫ ߞߏ߫ ߞߊ߬ ߖߐߞߌߓߊ߯ߕߐ ߏ߬ ߘߏ߫ ߟߎ߫ ߟߊߕߊ߯ ߌߢߊߛ ߘߌߣ ߘߊ߲ߘߊߛߏ ߟߊ߫، ߓߊ߬ߙߌ߬߸ ߊ߲ ߧߋ߫ ߟߌ߬ߤߟߊ ߣߌ߲߬ ߛߐ߬ߘߐ߲߬ ߠߊ߫ ߕߎ߬ߡߊ ߡߍ߲߸ ߏ߬ ߕߎ߲߬ ߡߊ߫ ߟߊߕߍ߰ ߡߎߣߎ߲߬߸ ߣߴߊ߬ߟߎ߬ ߘߌ߫ ߥߊ߫߸ ߥߟߴߊ߬ߟߎ߬ ߕߍ߫ ߥߊ߫.
ߊ߲ ߞߏ߬ߣߌ߲ ߡߴߊ߬ ߟߐ߲߫ ߡߎߣߎ߲߬߸ ߕߎ߲ߓߊ߬ ߥߊߣߍ߲߫ ߟߊߓߐ߫ ߟߊ߫ ߝߊ߲߬ߞߊ ߢߊ߫ ߛߎ߮ ߣߌ߲߬ ߡߊ߬ ߞߎ߲߬ ߞߋߟߋ߲ ߡߍ߲ ߠߊ߫، ߊ߬ ߘߏ߲߬߸ ߞߏ߲ߞߏߜߍ ߕߟߋ߬ ߈ ߡߊ߬߸ ߣߊ߲߬ߕߌ߮ ߟߎ߬ ߕߊ߯ ߘߊ߫ ߟߋ߬ ߥߛߎߖߌ߲ߓߊ ߟߊ߫ ߌߞߐ߫߸ ߞߏ߫ ߊ߬ߟߎ߬ ߞߍߕߐ߫ ߕߎ߲ߓߊ߬ ߟߊߓߐ߫ ߟߊ߫، ߓߊ߬ߙߌ߬߸ ߏ߬ ߞߏ ߛߋ߲߭ ߡߊ߫ ߘߎ߰ ߛߐ߬ߘߐ߲߬߸ ߝߏ߫ ߓߌ߬ ߕߊ ߣߌ߲߬.
ߞߏ߲ߞߏߜߍ ߕߟߋ߬ ߁߀ ߣߌ߲߬ ߡߊ߬߸ ߝߊ߬ߟߎ߫ ߘߎ߲߬ߓߎ߬ߦߊ߬ ߡߍ߲ ߦߋ߫ ߞߐߣߊߞߙߌ߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߞߊ߲ߘߊ ߘߌ߫߸ ߏ߬ ߞߊ߬ ߟߊ߬ߛߋ߬ߟߌ ߘߏ߫ ߞߍ߫߸ ߞߵߊ߬ ߦߌ߬ߘߊ߬ ߞߏ߫ <<ߜߋ߬ߟߎ߲߬ߠߌ߲߬ ߦߙߍߞߍߟߌ ߣߌ߫ ߓߙߊ߬ߒ߬ߘߐ߬ ߘߐ߬ߖߎ߰ߖߎ߰ߟߌ ߟߋ߬ ߕߎ߲߬ ߦߋ߫ ߛߋ߲߬ߠߊ߫>> ߞߐߣߊߞߙߌ߫ ߥߛߎߖߌ߲ߓߊ ߟߊ߫ ߞߎߣߎ߲߬، <<ߛߟߊߕߌ߯ ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߞߊ߲߬ߕߐ߮ ߦߋ߫ ߕߎ߲ߓߊ߬ ߘߌ߫߸ ߏ߬ ߞߵߊ߬ ߟߊ߫ ߝߢߊ ߟߋ߬ ߦߌ߬ߘߊ߬߸ ߞߊ߬ ߟߊ߬ߞߊ߲߬ߘߊ߬ߟߌ ߥߛߊ߬ߘߊ߬ߕߌ߮ ߟߎ߬ ߘߐߛߌߟߊ߲߫.>> ߝߊ߬ߟߎߎ߫ ߘߎ߲߬ߓߎ߬ߦߊ߫ ߟߋ߬ ߞߊ߲߫ ߕߋ߲߬.
ߒ߬ߓߊ߬߸ ߞߵߊ߬ ߓߍ߲߬ ߕߎ߲ߓߊ߬ ߝߢߊ߫ ߢߊ ߏ߬ ߡߊ߬ ߛߊ߫߸ ߥߛߎ ߡߊߡߙߊ߬ߓߊ߮ ߟߎ߫ ߞߊ߬ ߖߊ߬ߡߊߙߌ ߕߊ߬ ߏ߬ ߟߋ ߘߐ߫߸ ߞߏ߫ ߞߵߊ߬ ߟߊߕߊ߯ <<ߞߐ߰ߦߊ߬ ߥߛߎߖߌ߲ߓߊ ߟߊ߫ ߞߏ߲ߞߏߜߍ ߕߟߋ߬ ߁߀ ߣߌ߲߬ ߡߊ߬.>>
ߒ߬ߓߊ߬߸ ߞߎ߲߬ ߞߋߟߋ߲ ߡߍ߲ ߟߐ߲ߣߍ߲߫ ߓߌ߬ ߦߙߍߞߍߟߌ ߟߊ߫ ߥߛߎߖߌ߲ߓߊ ߟߊ߫߸ ߏ߬ ߟߋ ߝߟߍ߫ ߣߌ߲߬.
ߊ߬ ߞߊߙߏ߫ ߘߊ߲ߘߐ ߟߋ߬ ߕߋ߲߬߸ ߕߎ߲ߓߊ߬ ߟߊ߫ ߥߛߎ߫ ߟߊߘߏ߲ ߣߴߊ߬ ߕߊ߫߸ ߊ߬ ߞߵߊ߬ ߡߊߝߟߍ߫ ߊ߬ ߛߋ߲߭ߓߌ߬ߟߊ߬ ߞߏ ߘߐ߫ ߓߘߍ߬ߓߘߍ߬ߟߌ߬ ߞߏ ߘߐ߫، ߊ߬ ߞߵߊ߬ ߟߊ߫ ߞߙߎߞߊ ߘߏ߫ ߛߌ߲ߘߌ߫ ߞߏ ߟߊߛߋ߫߸ ߏ߬ ߡߍ߲ ߕߐ߯ߟߊ߫ ߘߴߊ߬ ߓߟߏ߫ ߞߏ߫ ߞߏߘߐߦߟߍߡߊ߲ ߞߙߎߞߊ߫ ߓߍ߯ߦߊߟߞߊ (ߞߞߓ)߸ ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ ߦߴߊ߬ ߝߍ߬ ߞߊ߬ ߞߍ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߂߀߂߅ ߞߏߟߌ߲ߞߏߟߌ߲ ߂߈ ߞߊ߲ߕߌ߯ ߢߣߊߕߊߟߌ ߘߐ߫، ߓߊ߬ߙߌ߬߸ ߞߕߌߖߌ߲ ߡߊ߫ ߛߐ߲߬ ߊ߬ ߟߊ߫ ߡߊ߬ߡߌ߬ߘߊ߬ߟߌ ߏ߬ ߡߊ߬߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߛߊ߬ߙߌ߬ߦߊ߬ߛߎ߲߬ ߞߎߘߊ ߕߍ߫ ߛߐ߲߬ ߊ߬ ߟߊ߫ ߡߊ߬ߡߌ߬ߘߊ߬ߟߌ ߡߊ߬.
ߊ߬ ߞߏ߬ߣߌ߲߸ ߕߎ߲ߓߊ߬ ߟߊߓߐ߫ ߢߊ ߣߌ߲߬ ߓߘߊ߫ ߣߊ߬ ߢߌ߬ߣߌ߲߬ߞߊ߬ߟߌ ߘߌ߫ ߡߐ߰ ߛߌߦߊߡߊ߲߫ ߛߣߐ߬ߡߍ ߘߐ߫߸ ߞߵߊ߬ ߟߐ߲߫ ߊ߬ ߞߎ߲߭ ߦߋ߫ ߡߎ߲߬ ߘߌ߫؟ ߊ߬ ߕߴߛߋ߫ ߟߊߓߐ߫ ߟߊ߫ ߓߊ߬ ߣߌ߫ ߡߊ߬ߙߌ߬ߝߊ߬ ߕߋ߬ ߛߌߦߊߡߊ߲ ߏ߬ ߕߍ߫؟ ߡߎ߲߬ ߦߋ߫ ߣߌ߲߬ ߞߏ ߞߘߐ߫؟ ߏ߬ ߖߋ߬ߓߌ ߞߏ߬ߣߌ߲߬ ߟߐ߲ߣߍ߲߫ ߕߍ߫ ߡߎߣߎ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
