ߓߊ߬ߣߊ߲߬ߞߐ߬ߣߍ߲ ߦߋ߫ ߘߎ߰ߣߍ߲ ߘߏ߫ ߟߋ߬ ߘߌ߫ ߞߊ߲ߞߊ߲ ߘߊߝߍ߬߸ ߡߍ߲ ߦߋ߫ ߞߊ߬ߙߌ߬ߝߊ߬ߡߘߎ߬ߦߊ߫ ߣߐ߬ߘߎ߮ ߘߏ߫ ߘߌ߫، ߒ߬ߓߊ߬߸ ߛߏ ߏ߬ ߛߌ߰ߣߍ߲߫ ߟߊ߲߬ߓߋ ߡߞߊߘߊ߲ ߣߌ߫ ߞߍ߲ߘߍߦߊ ߟߊߛߓߊ߬ߕߌ ߟߋ߬ ߡߊ߬߸ ߊ߬ ߕߌ߯ߕߌ߯ ߡߍ߲ ߠߎ߬ ߦߋ߫ ߡߊ߲߬ߕߙߐ ߛߐ߬ߘߐ߲߬ ߠߊ߫ ߓߌ߬ߟߊ߬ߒ߬ߘߐ߬ߖߎ߮ ߟߎ߬ ߣߌ߫ ߞߏ߫ ߜߘߍ߫ ߟߎ߫ ߘߐ߫߸ ߣߴߊ߬ ߘߌ߫ ߞߍ߫ ߕߙߎ߬ ߘߌ߫ ߞߵߊ߬ߟߎ߫ ߝߊ߬ߘߌ ߝߊ߲߭ ߘߏ߫ ߟߎ߫ ߞߊߘߌ߫، ߒ߬ߓߊ߬߸ ߡߐ߰ ߟߎ߬ ߦߋ߫ ߓߊ߬ߣߊ߲߬ߞߐ߬ߣߍ߲ ߠߊ߫߸ ߏ߬ ߟߎ߬ ߓߟߏߡߊߞߊ߬ߣߍ߲߫ ߞߊߘߌߓߊ߯ߕߐ ߏ߬ ߟߎ߫ ߖߌ߰ߡߝߊ߬ ߞߊ߲ ߠߋ߬ ߡߊ߬߸ ߣߌ߫ ߛߙߊ߬ ߕߍ߫، ߛߌߦߊߞߊ߬ ߞߋߕߊ߬ ߡߍ߲ ߦߋ߫ ߞߟߏߕߎ߲߯ߠߊ߫ ߘߌ߫ ߦߋ߲߬߸ ߏ߬ ߞߊ߬ ߘߏߣߍ߲߫ ߢߊߝߐ߫ ߒ߬ ߧߋ߫ ߊ߬ ߟߊ߫ ߓߊ߯ߙߊ ߕߊ߯ ߓߟߏ ߞߊ߲߬:
<< ߞߟߏ߫ ߓߊ߯ߙߊ ߘߊߡߌ߬ߣߊ ߒߠߋ ߓߟߏ߫ ߊ߬ ߣߌ߫ ߓߌ߬ ߕߍ ߘߐ߫߸ ߏ߬ ߓߘߊ߫ ߛߊ߲߬ ߂߀ ߓߐ߫،ߊ߬ ߘߏ߲߬ ߤߊߟߌ߬ ߊ߲ ߓߊ߯ ߞߊߘߌߓߊ߯ߕߐ߫ ߟߋ߬ ߛߐ߬ߘߐ߲߬ ߡߍ߲ ߠߊ߫ ߞߏ ߘߌ߫ ߞߍ߫ ߞߣߐ߬ߘߐ߬ߝߟߌ߬ ߞߏ ߘߌ߫߸ ߡߊ߰ߙߌ ߦߋ߫ ߛߋ߫ ߟߴߊ߲ ߘߍ߬ߡߍ߲߬ ߠߊ߫ ߞߵߏ߬ ߓߊߛߌ߫>>.
ߢߌ߬ߣߌ߲߬ߞߊ߬ߟߌ ߞߍߣߍ߲ ߊ߬ ߞߎ߲߬ ߞߵߊ߬ ߓߍ߲߬ ߊ߬ߟߎ߬ ߟߊ߫ ߞߟߏ߫ ߞߊߘߌ ߛߎ߯ߦߊ߫ ߘߊ߲ߘߕߊ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ߟߎ߬ ߛߋߞߏ ߞߍ߫ ߟߊ߫ ߞߊߘߌ ߛߎ߯ߦߊ ߓߍ߯ ߟߋ߬ ߘߐ߫: << ߊ߲ߠߎ߬ ߦߋ߫ ߞߟߏ߫ ߞߘߐ ߣߌ߫ ߞߎߘߊ ߓߍ߯ ߟߋ߬ ߓߊ߯ߙߊ߫ ߟߊ߫ >>
ߞߵߊ߬ ߓߍ߲߬ ߞߟߏߕߎ߲߯ߠߊ ߢߌ߲߬ ߠߎ߬ ߡߊߘߍ߬ߡߍ߲ ߡߊ߬߸ ߞߋߕߊߗߍ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߛߋ߫ ߘߍ߬ߡߍ߲ ߛߐ߬ߘߐ߲߬ ߠߊ߫ ߞߊ߬ ߝߘߊ߫ ߓߐߒߖߘߍߘߐߡߐ߮ ߘߏ߫ ߟߎ߫ ߟߊ߫߸ ߞߊ߬ ߝߘߊ߫ ߡߐ߰ ߞߎ߲߬ߞߋߟߋ߲ ߘߏ߫ ߟߎ߫ ߟߊ߫߸ ߡߍ߲ ߠߎ߬ ߣߌ߫ ߞߎ߲߬ߠߊ߬ߛߌ߮ ߘߊ ߦߋ߫ ߝߎ߬ߟߋ߬ ߞߋߟߋ߲߫ ߠߊ߫:
<< ߊ߲ ߓߘߊ߫ ߘߍ߬ߡߍ߲ ߛߐ߬ߘߐ߲߬ ߞߊ߬ ߝߘߊ߫ ߞߊ߲ߕߌ߮ ߟߊ߫߸ ߓߊߏ߬߸ ߊߖߊ߬ ߡߊ߲ߖߎߟߊ߫ ߞߊ߬ ߓߏ߲߫ ߞߣߐ߫ ߁߀ ߟߐ߬ ߊ߲ ߧߋ߫ ߦߊ߲߬߸ ߊ߬ ߣߌ߫ ߞߏ߲߬ߓߏ ߖߊ߰ߣߍ ߞߊ߬ ߓߏ߲ ߘߏ߫ ߟߐ߬ ߒ ߧߋ߫ ߦߊ߲߬ >>.
ߊ߬ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߊ߬ ߞߵߊ߬ ߦߌ߬ߘߊ߫ ߊ߬ ߟߊ߫ ߞߎߡߊ߫ ߞߎ߲߬ߘߏ߲ ߘߐ߫ ߛߊ߫ ߞߏ߫ ߊ߬ߟߎ߫ ߡߊ߬ߞߏ ߦߋ߫ ߘߍ߬ߡߍ߲߬ߠߌ߲ ߠߊ߫ ߤߊ߲߯ ߕߋ߲߬ ،ߤߊߟߌ߬ ߣߴߊ߬ ߞߵߊ߬ ߕߘߍ߬ ߞߊ߬ߣߌ߲߬ ߞߏ߫ ߛߘߍߡߊ߲߫ ߓߘߊ߫ ߞߍ߫ ߞߘߐ߬ߡߊ߲߬ :
<< ߜߟߍ߬ߦߊ ߡߍ߲ ߦߴߊ߲ ߞߊ߲߬ ߦߊ߲߬ ߕߋ߲߬߸ ߏ߬ ߟߋ߬ ߦߋ߫ ߓߏ߲ ߞߏ ߘߌ߫ ߤߊߟߌ߬ ߛߊ߫߸ ߓߊߏ߬߸ ߓߏ߲߫ ߕߍ߫ ߦߊ߲߬ ߕߋ߲߬ ߡߐ߰ ߕߍ߫ ߡߍ߲ ߠߊ߫>>
ߊ߲ ߠߊ߫ ߢߊ߬ߢߌ߬ߣߌ߲߬ߠߌ߲ ߠߎ߬ ߘߐ߫߸ ߞߊߘߌߓߊ߯ߕߐ ߡߍ߲ ߦߴߊ߬ߟߎ߬ ߓߟߏ߫ ߦߋ߲߬߸ ߏ߬ ߘߌ߫ ߡߐ߰ ߁߂߅ ߓߐ߫߸ ߡߍ߲ ߠߎ߬ ߦߋ߫ ߛߌ߬ ߟߊ߫ ߓߏ߲߫ ߞߣߐ߫ ߁߀ ߢߐ߲߰ ߠߊ߫߸ ߘߐ߬ߕߟߊ߬ߟߌ߬ ߓߟߏ ߡߊ߬߸ ߡߐ߰ ߘߴߊ߬ ߝߐ߫ ߞߏ߫ ߡߐ߰ ߁߂ ߟߋ߬ ߓߏ߲߫ ߞߋߟߋ߲߫ ߞߣߐ߫، ߊ߬ ߘߏ߲߬߸ ߖߊ߬ߡߊ ߦߋ߫ ߕߊ߬ߡߌ߲߬ ߠߊ߫ ߟߋ߬ ߛߌߦߊߦߊ߫ ߟߊ߫.
ߟߊ߲߱ߛߌ߬ߣߍ߬ ߘߎ߲ߓߎߦߊ߫߸ ߊ߬ߟߋ ߦߋ߫ ߓߊ߬ߣߊ߲߬ߞߐ߬ߣߍ߲ ߘߎ߰ߕߌ߮ ߟߋ߬ ߘߌ߫߸ ߡߍ߲ ߦߴߊ߬ ߟߊߛߙߋߦߊ߫ ߟߊ߫߸ ߞߏ߫ ߞߊߘߌߓߊ߯ߕߐ ߟߎ߬ ߦߋ߫ ߓߊ߬ߣߊ߲߬ߞߐ߬ߣߍ߲ ߠߊ߫ ߝߛߊߦߌ߫߸ ߊ߬ߟߎ߫ ߘߏ߲߬ ߡߊ߬ߕߙߐ߬ ߝߏߦߌ߬ ߕߍ߫ ߛߋ߫ ߟߊ߫ ߛߏ߫ ߞߣߐ߫ ߡߐ߮ ߟߎ߫ ߡߊ߬.
<<ߒߠߋ ߟߐ߲ߞߏ ߡߍ߲ ߦߋ߫ ߞߊߘߌߓߊ߯ߕߐ ߟߎ߬ ߟߊ߫ ߞߏߢߊ ߘߐ߫ ߦߊ߲߬߸ ߏ߬ ߟߋ߬ ߦߴߊ߬ ߟߊߛߙߋߦߊ ߘߌ߫.
ߞߏ߫ ߞߊߘߌߓߊ߯ߕߐ ߟߎ߬ ߦߋ߫ ߣߊ߬ ߟߊ߫ ߝߛߊߦߌ߫߸ ߊ߬ ߘߏ߲߬ ߊ߬ߟߎ߬ ߟߊ߫ ߡߊ߲߬ߕߙߐ߬ ߝߣߊ߫ ߕߍ߫ ߛߋ߫ ߟߴߊ߲ ߡߊ߬، ߓߊ߬ߙߌ߫߸ ߛߍ߰ ߞߋߟߋ߲ ߡߍ߲ ߦߴߊ߲ ߞߊ߲߬ ߦߊ߲߬ ߞߵߊ߬ ߓߍ߲߬ ߞߊߘߌߓߊ߯ߕߐ ߟߎ߫ ߟߊ߫ ߞߏߢߊ ߡߊ߬߸ ߏ߬ ߟߋ߬ ߦߋ߫ ߘߊ߲ߘߊߛߏ߫ ߞߏ ߘߌ߫.
ߓߊߏ߬߸ ߞߊߘߌߓߊ߯ߕߐ ߘߏ߫ ߟߎ߫ ߦߋ߫ ߣߊ߬ ߟߊ߫߸ ߘߏ߫ ߟߎ߫ ߖߐߞߌߣߍ߲ߓߊ ߦߋ߫ ߞߍ߫ ߟߊ߫ ߛߐ߲߬ ߸ ߘߊ ߦߋ߫ ߓߐ߫ ߟߊ߫ ߘߏ߫ ߟߎ߫ ߡߊ߬߸ ߒ߬ߓߊ߬߸ ߘߊ ߦߋ߫ ߞߍ߫ ߟߊ߫ ߡߍ߲ ߠߎ߬ ߡߊ߬ ߏ߬ ߘߌ߫߸ ߝߏ߫ ߌ ߓߊ߯ ߏ߬ ߟߎ߫ ߕߊ߬ ߟߋ߬ ߞߊ߬ ߥߴߊ߬ߟߎ߬ ߘߌ߫ ߛߏ ߞߣߐ߫߸ ߞߵߊ߬ߟߎ߬ ߟߊ߫ ߘߊ ߏ߬ ߝߌߘߊߞߍ߫ ߝߟߐ߫߸ߏ߬ ߞߐ߫ ߸ߞߵߌ ߞߐߛߋ߬ߦߌ߲߫ ߊ߬ߟߎ߬ ߘߌ߫ ߞߣߊ߬ ߕߏ߫ ߞߊߘߌ ߝߣߊ߫ ߘߊ߲ߘߊ߫ ߟߊ߫ ߸ ߣߴߏ߬ ߘߏ߲߬ ߕߍ߫ ߞߊ߬ ߘߊ߲ߘߊߟߌߟߊ ߡߊߞߟߌ߫ ߏ߬ ߦߋ߫ ߣߊ߬ ߘߊ߫ ߏ߬ ߓߊߛߌ߫ ߞߊ߲ߡߊ߬، ߏ߬ ߛߍ߱ ߦߋ߫ ߊ߲ ߞߊ߲߬ ߞߏߛߓߍ߫>>
ߘߎ߰ߕߌ߮ ߟߊ߫ ߞߎߡߊ߫ ߘߊ߫߸ ߞߎ߲߬ߠߊ߬ߛߌ߮ ߡߴߊ߬ ߢߊ ߟߐ߬ ߊ߬ߟߎ߬ ߘߐ߫ ߘߊ߲ߘߊߛߏ߫ ߞߏ ߘߐ߫ ߡߎߣߎ߲߬ ߝߋߎ߫߸ ߏ߬ ߘߏ߲߬ ߦߋ߫ ߛߍ߰ߓߊ߫ ߟߋ߬ ߘߌ߫ ߓߊ߬ߣߊ߲߬ߞߐ߬ߣߍ߲ ߞߣߐ߫:
<< ߘߊ߲ߘߊߛߏ߫ ߞߏ߫ ߛߍ߱ ߦߴߊ߲ ߞߊ߲߬ ߞߏߛߓߍ߫ ߸ߊ߬ ߘߏ߲߬ ߞߎ߲߬ߠߊ߬ߛߌ߮ ߟߊ߫ ߘߍ߬ߡߍ߲߬ߠߌ߲߬ ߝߏߛߌ߬ ߟߋ߬ ߡߊ߫ ߛߴߊ߲ ߡߊ߬ ߝߟߐ߫ ߘߊ߲ߘߊߛߏ߫ ߞߏ ߡߊ߬ߘߎ߮ ߘߐ߫ >>
ߞߎߡߊ߫ ߟߊߓߊ߲߫ ߘߐ߫߸ ߞߊߘߌߓߊ߯ߕߐ ߘߏ߫ ߛߋ߫ ߘߴߊ߬ ߞߣߐߘߐߘߌߦߊ߫ ߟߊ߫ ߒ߬ ߧߋ߫߸ ߞߵߊ߬ ߡߙߌߦߊ ߦߌ߬ߘߊ߬، ߎߡߊߙߎ߬ ߓߊߙߌ߫ ߸ ߏ߬ ߡߍ߲ ߦߋ߫ ߞߊߘߌߓߊ߯ߕߐ ߟߎ߬ ߘߏ߫ ߘߌ߫ ߓߊ߬ߣߊ߲߬ߞߐ߬ߣߍ߲ ߠߊ߫ ߸ ߊ߬ ߛߋߣߍ߲߫ ߢߊ ߡߍ߲ ߡߊ߬ ߓߊ߬ߣߊ߲߬ߞߐ߬ߣߍ߲ ߠߊ߫ ߸ߊ߬ ߞߵߏ߬ ߢߊߝߐ߫ :
<< ߣߴߌ ߞߊ߬ ߒߠߋ ߛߋߣߍ߲߫ ߦߋ߫ ߓߊ߬ߣߊ߲߬ߞߐ߬ߣߍ߲ ߠߊ߫ ߦߊ߲߬߸ ߊ߬ ߛߊߓߎ߫ ߞߍ߫ ߘߊ߫ ߒ ߘߋ߲ߡߛߏ ߟߋ߬ ߘߌ߫߸ ߣߴߏ߬ ߕߍ߫ ߒߠߋ ߦߋ߫ ߛߌ߯ߙߌ߲ߞߊ ߟߋ߬ ߘߌ߫.
ߒ ߘߋ߲ߡߛߏ ߟߋ߬ ߦߋ߫ ߡߊ߬ߖߌ߮ ߘߐ߫ ߦߊ߲߬߸ ߏ߬ ߟߋ߬ ߞߵߊ߬ ߞߊ߲ߕߏ߫ ߞߏ߫ ߒ ߧߋ߫ ߣߊ߬ ߓߊ߬ߣߊ߲߬ߞߐ߬ߣߍ߲ ߠߊ߫߸ ߡߐ߱ ߘߏ߫ ߦߋ߫ ߦߊ߲߬߸ ߊ߬ ߘߌ߫ ߒ ߠߊ߫ ߥߊ߫ ߏ߬ ߡߊ߬߸ ߒ ߛߋ߫ ߗߍ߭ ߡߵߊ߬ ߞߵߊ߬ ߡߊߝߟߍ߫߸ ߞߏ߫ ߣߌ߫ ߒ ߞߙߐߕߐߣߍ߲߫ ߕߍ߫߸ ߊ߬ ߘߌ߫ ߒ ߓߊߛߌ߫>>.
ߊ߬ ߟߊ߫ ߞߎߡߊ ߘߏ߫ ߘߴߊ߬ ߦߌ߬ߘߊ߬ ߞߏ߫ ߸ߞߟߏߕߎ߲߯ߠߊ ߞߵߊ߬ ߟߊ߫ ߓߊ߯ߙߊ߫ ߢߊߟߐ߲߫ ߝߋߎ߫ :
<< ߊ߬ ߘߏ߲߬ ߒ ߕߘߍ߬ ߦߋ߫ ߣߊ߬ ߟߊ߬ ߟߊ߫ ߕߎ߬ߡߊ ߡߍ߲ ߠߊ߫߸ ߒ ߕߘߍ߬ ߦߋ߫ ߟߊߟߊ߫ ߟߊ߫ ߟߋ߬ ߞߊ߬ ߒ ߠߊߥߟߌ߬߸ ߓߊ߬ߙߌ߫߸ ߊߟߊ߫ ߕߊ߲ߘߏ߫߹ ߒ ߛߋ ߞߐ߫ ߦߊ߲߬ ،ߒ ߧߋ߫ ߛߋ߫ ߟߊ߫ ߒ ߡߊߕߊ߯ߡߊ߫ ߟߊ߫ ߒ ߖߘߍ߬ ߦߋ߫ ߛߌߣߍ߲߬، ߓߊߏ߬߸ ߒ ߧߋ߫ ߛߋ߫ ߟߊ߫ ߜߟߊ߬ߜߟߊ߫ ߃߀߀ ߕߊ߯ߡߊ߫ ߟߊ߫ ߛߌߣߍ߲߬ ߝߋߎ߫>>
ߞߵߊ߬ ߓߍ߲߬ ߞߟߏߞߊߘߌߓߊ߯ߕߐ߫ ߣߌ߫ ߞߟߏߕߎ߲߯ߠߊ ߟߎ߬ ߕߍ߫ ߡߊ߬ ߸ߊ߬ ߞߵߊ߬ ߦߌ߬ߘߊ߬ ߞߏ߫ ߘߊ߲ߘߊߟߌߟߊ ߣߴߊ߬ ߟߊ߫ ߛߋߞߏߦߊ ߸ߊ߬ ߦߴߊ߬ ߟߊ߫ ߞߟߏߕߎ߲ ߓߍ߯ ߞߍ߫ ߟߊ߫ ߝߌߛߙߌ ߟߋ߬ ߟߊ߫ :
<< ߊ߬ߟߋ ߕߍ߫ ߥߊߘߌ߫ ߡߌ߬ߣߊ߬ ߟߊ߫ ߡߐ߰ ߛߌ߫ ߟߊ߫߸ ߣߴߌ ߞߵߊ߬ ߡߊߜߍ߲߫ ߡߍ߲ ߠߊ߫ ߒ ߡߴߏ߬ ߝߐ߫߸ ߣߴߏ߬ ߕߍ߫ ߊ߬ ߕߍ߫ ߓߋ߭ ߕߋ߬ ߟߊ߫ ߡߐ߰ ߛߌ߫ ߟߋ߬ ߞߘߐ߫߸ ߌ ߦߋ߫ ߛߌ߬ߛߍ߬ ߞߋߟߋ߲߫ ߣߌ߫ ߥߙߏ߬ ߁߀ ߠߋ߬ ߘߌ߫ ߟߴߊ߬ ߡߊ߬߸ ߊ߬ ߘߴߌ ߘߊ߲ߘߊ߫ ߘߊߡߌ߬ߣߊ߬>>
ߝߣߊ߫ ߸ ߊ߬ ߛߋ߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߘߍ߬ߡߍ߲߬ ߠߊ߫ :
<< ߡߍ߲ ߓߍ߲߬ߕߐ߫ ߘߍ߬ߡߍ߲߬ߠߌ߲ ߛߌߟߊ ߡߊ߬߸ ߡߊ߬ߜߍ߲߬ߠߌ߲ ߦߋ߫ ߞߍ߫ ߟߴߊ߲ ߧߋ߫߸ ߓߊߏ߬߸ ߕߎ߬ߡߊ ߘߏ߫ ߟߎ߫ ߦߋ߫ ߞߍ߫ ߟߴߊ߬ ߘߐ߫߸ ߓߊߟߏ ߦߋ߫ ߣߊ߬ ߟߴߊ߲ ߡߊ߬߸ ߊ߬ ߣߴߊ߬ ߡߊ߲߬ߝߋ߲ ߠߎ߬ ߓߍ߯߸ ߒߠߋ ߟߊ߫ ߣߊ߬ߟߌ ߦߊ߲߬ ߏ߬ ߓߘߊ߫ ߞߊߙߏ߫ ߣߊ߯ߣߌ߲߫ ߓߐ߫>>
ߏ߬ ߦߴߊ߬ ߕߊ߫ ߡߊ߬ߜߍ߲ ߘߏ߫ ߟߋ߬ ߘߌ߫ ߞߊ߬ ߝߣߊ߫ ߡߐ߰ ߢߌߡߊ߫ ߘߏ߫ ߟߎ߫ ߟߊ߫ ߸ߓߊ߬ߙߌ߬ ߏ߬ ߓߍ߯ ߣߴߊ߬ ߕߊ߫ ߡߊ߲߬ߕߙߐ ߘߏ߫ ߦߴߊ߬ߟߎ߫ ߞߊ߲߬ :
<< ߡߊ߲߬ߕߙߐ ߡߍ߲ ߦߴߊ߲ ߞߊ߲߬ ߦߊ߲߬ ߸ߏ߬ ߟߋ߬ ߦߋ߫ ߓߏ߲ ߞߏ ߣߌ߫ ߖߌ ߞߏ ߘߌ߫߸ ߞߵߊ߬ ߝߐ߫ ߞߎ߲߬ߠߊ߬ߛߌ߮ ߟߎ߬ ߦߋ߫ ߞߵߊ߲ ߡߊߘߍ߬ߡߍ߲߬ ߓߏ߲ ߞߏ ߣߌ ߖߌ ߞߏ ߟߊ߫ ߞߏߛߓߍ߫>>
ߡߐ߰ߦߊ ߕߴߛߋ߫ ߥߊ߫ ߟߊ߫ ߢߍߝߍ߬ ߣߌ߫ ߖߌ ߣߌ߫ ߛߌ߬ ߦߟߊ ߣߌ߫ ߖߌ ߞߏ߫ ߡߊ߫ ߜߍ߫ ߕߍ߫ ߸ ߏ߬ ߟߋ߬ ߞߏߛߐ߲߬ ߸ ߝߊ߰ߡߊ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߦߟߌߓߌ߬ߟߊ߬ ߘߎ߰ߣߍ߲ ߞߐ߫ ߸ߊ߬ ߜߋ߲ߜߋ߲߫ ߓߊ߬ߣߊ߲߬ߞߐ߬ߣߍ߲.
ߞߏߕߐ߫ ߝߊ߲ߕߊ߬ ߖߊߥߙߊ߫ ߸ߏ߬ ߡߍ߲ ߥߊߣߍ߲߫ ߊ߬ ߘߋ߫ ߖߊ߲߬ߞߊ߬ߙߏ߬ߕߐ ߘߌ߫ ߓߊ߬ߣߊ߲߬ߞߐ߬ߣߍ߲ ߠߊ߫ ߘߊ߲ߘߊߟߌ߫ ߞߊ߲ߡߊ߬ ߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߞߐ߬ߣߌ߲߫ ߓߘߊ߫ ߖߌ߰ߡߊ߬ߝߊ ߘߏ߫ ߛߐ߬ߘߐ߲߬ :
<<ߣߴߌ ߞߊ߬ ߒߠߋ ߣߐ߬ ߦߋ߫ ߘߊ߲ߘߊߛߏ ߟߎ߬ ߕߏ߫ ߟߊ߫ ߦߋ߲߬ ߞߣߊ߬ ߒ ߘߋ߲ ߘߌ߫ ߓߊ߬ߣߐ߲߬ߞߐ߬ߣߍ߲ ߠߊ߫ ߦߊ߲߬߸ ߒ ߞߊ߬ ߝߊ߰ߡߎ߲߬ߧߊ߬ߟߌ ߟߋ߬ ߛߐ߬ߘߐ߲߬ ߞߏ߫ ߣߌ߫ ߒ ߣߊ߬ ߘߊ߫ ߒ ߘߋ߲ ߘߌ߫ ߦߊ߲߬ ߏ߬ ߟߋ߬ ߞߊ߫ ߝߌ߬ߛߊ߬߸ߓߊ ،ߘߊ߬ߡߊ߲ ߠߋ߬ ߓߋߣߍ߲߫ ߊ߬ ߞߐ ߘߐ߫ ߞߊ߬ ߝߙߋߞߋ ߛߐ߬ߘߐ߲߬߸ߒ ߣߊ߭ ߦߊ߲߬ ߏ߬ ߛߊ߲߬ ߞߋߟߋ߲߫ ߠߋ߬ ߦߋ߫ ߕߋ߲߬߸ ߊ߬ ߘߏ߲߬ ߒ ߛߋ ߦߊ߲߬ ߊ߬ ߣߌ߫ ߓߌ߬ ߕߍ ߘߐ߫߸ ߒ ߓߘߊ߫ ߖߌ߰ߡߊ߬ߝߊ ߛߐ߬ߘߐ߲߬߸ ߓߊߏ߬߸ ߒ ߠߊ߫ ߖߊ߲߬ߞߊ߬ߙߏ߬ߕߐ ߓߘߴߊ߬ ߡߊߕߊ߯ߡߊ߫ ߘߊߡߌ߬ߣߊ߬>>
ߡߍ߲ ߥߊߕߐ߫ ߓߍ߲߬ ߠߴߊ߬ߟߎ߬ ߟߊ߫ ߡߊ߲߬ߕߙߐ ߡߊ߬ ߛߊ߫ ߏ߬ ߝߟߍ߫ ߣߌ߲߬ :
<< ߡߍ߲ ߓߍ߲߬ߕߐ߫ ߛߙߊ߬ ߞߏ ߡߊ߬ ߘߊ߲ߘߊߟߌ߫ ߡߊ߬ߘߎ߮ ߘߐ߫߸ ߌ ߓߊ߯ ߣߊ߬ ߘߊ߲ߘߊߟߌ߫ ߞߊ߲ߡߊ߬ ߗߍ߭ ߣߌ߲߬ ߕߍ߫ ߓߋ߬ ߛߌ߫ ߕߋ߬ ߟߊ߫ ߡߐ߰ ߞߘߐ߫߸ ߜߟߍ߬ߦߊ ߡߍ߲ ߦߴߊ߲ ߞߊ߲߬ ߦߊ߲߬߸ߏ߬ ߟߋ߬ ߦߋ߫ ߓߏ߲߫ ߞߏ ߣߌ߫ ߖߌ ߞߏ ߘߌ߫߸ ߓߏ߲ ߞߏ ߦߴߊ߲ ߠߊ߫ ߞߏߛߓߍ߫߸ ߕߎ߬ߢߊ ߟߊ߫ ߘߊ߲ߘߊߟߌߟߊ ߓߘߴߊ߬ ߛߋ ߞߍ߫߸ ߓߊ߬ߙߌ߫߸ ߊ߬ ߕߍ߫ ߛߋ߫ ߖߊ߬ߡߊ ߓߍ߯ ߟߊ߫ ߓߏ߲ ߛߐ߬ߘߐ߲߬ ߠߊ߫، ߖߌ ߞߏ ߝߣߊ߫ ߓߘߴߊ߲ ߛߍ߰ ߞߏߛߓߍ߫، ߞߎ߲߬ߠߊ߬ߛߌ߮ ߞߏ߬ߣߌ߲ ߓߘߊ߫ ߘߏ߫ ߞߍ߫ ߊ߲ ߧߋ߫ ߓߏ߲߫ ߞߏ ߣߌ߫ ߓߊߟߏ߫ ߞߏ ߡߊ߬ߘߎ߮ ߘߐ߫߸ߓߊߏ߬߸ ߓߊߟߏ ߦߋ߫ ߣߊ߬ ߟߊ߫ ߕߎ߬ߡߊ ߘߏ߫ ߟߎ߫ ߟߊ߫ ߞߵߊ߬ ߘߐߕߟߊ߫ ߊ߲ ߕߍ߫ ߊ߬ ߣߌ߫ ߡߊ߲߬ߝߋ߲ ߘߏ߫ ߟߎ߫، ߊ߬ ߣߌ߫ ߊ߬ ߓߘߊ߫ ߓߏ߲ ߘߏ߫ ߝߣߊ߫ ߟߐ߬ ߊ߲ ߧߋ߫߸ ߓߊ߬ߙߌ߫߸ ߤߊߟߌ߬ ߛߊ߫߸ ߊ߬ ߦߋ߫ ߘߏ߫ ߟߴߊ߬ ߟߐ߬ߛߋ߲ ߞߊ߲߬߸ ߓߊߏ߬߸ ߖߊ߬ߡߊ ߞߊ߫ ߛߌߦߊ߫ ߓߏ߲ ߏ߬ ߟߎ߫ ߡߊ߬، ߛߏ߫ ߢߌ߲߬ ߝߊ߲߬ ߕߍ߫ ߦߋ߲߬ ߕߋ߲߬ ߖߊ߬ߡߊ ߕߍ߫ ߦߙߐ ߡߍ߲ ߘߐ߫>>
ߏ߬ ߘߊ߲ߘߊߟߌߟߊ߫ ߞߊ߫ ߘߐ߫ ߕߋ߲߬߸ ߡߍ߲ ߦߴߊ߬ ߟߊ߫ ߓߊ߯ߙߊ߫ ߞߍ߫ ߟߊ߫ ߝߌߛߙߌ ߟߊ߫ ߛߊ߲߬ ߂߀ ߞߣߐ߫ ߸ ߏ߬ ߓߟߏߡߊ߬ ߸ߝߏ߫ ߝߊ߰ߡߊ ߟߎ߬ ߦߋ߫ ߛߋ߫ ߡߐ߰ ߛߎ߮ ߏ߬ ߟߎ߬ ߣߴߊ߬ ߢߐ߲߰ ߜߘߍ߫ ߟߎ߫ ߘߍ߬ߡߍ߲߬ ߠߊ߫ ߘߊߞߎ߲߫ ߛߌߦߊߡߊ߲߫ ߘߐ߫.
ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎߓߊ߫ ߣߌ߫ ߛߎ߯ߟߊ߲ߘߌ߫ ߛߊ߰ߞߐ߬ ߓߟߏ߫
