߂߀߂߆ ߞߏ߲ߞߏߘߓߌ ߕߟߋ߬ ߁߄ ߞߵߊ߬ ߛߌ߰ ߁߇ ߟߊ߫߸ ߞߊ߲ߞߊ߲߫ ߘߌ߫ ߞߍ߫ ߟߐ߲ߠߌ߲ ߓߍ߲߬ߕߍ ߘߌ߫ ߕߟߋ߬ ߣߊ߯ߣߌ߲ ߏ߬ ߞߣߐ߫߸ ߞߵߏ߬ ߞߎ߲߭ ߞߍ߫ ߞߙߎߝߓߊ ߟߊ߫ ߟߊ߬ߞߐ߰ߟߌ ߁߆߲ ߘߌ߫߸ ߡߍ߲ ߞߍߕߐ߫ ߒߞߏ ߞߊ߬ߙߊ߲߬ߕߊ߬ߓߊ ߟߊ߫߸ ߡߎߙߊߓߡߊ߬ ߞߋߕߊ߬، ߖߊ߲߬ߖߏ߲ ߣߌ߲߬ ߘߐ߫߸ ߡߐ߱ ߟߎ߬ ߓߕߐ߫ ߝߊ߲߬ ߛߌߦߊߡߊ߲߫ ߠߋ߬ ߘߐ߫ ߞߊ߬ ߣߊ߬߸ ߖߌ߬ߣߍ߬ ߜߍߞߊ߲ߠߊ ߛߏ߫ ߞߎ߲ߓߊ ߣߴߊ߬ ߛߏ߫ ߡߌߛߍ߲ ߠߎ߬߸ ߞߵߊ߬ ߕߊ߬ ߞߊ߲ߞߊ߲߫ ߡߊ߬߸ ߞߊ߬ ߛߋ߫ ߞߙߎ߬ߛߊ߫ ߡߊ߬߸ ߊ߬ ߣߌ߫ ߛߌ߯ߙߌ߲߫ ߣߌ߫ ߡߊ߲߬ߖߊ߲߬ߠߊ߫، ߟߊ߬ߡߌ߬ߣߌ߲߬ ߖߡߊߣߊ ߡߍ߲ ߠߎ߬ ߝߣߊ߫ ߕߐ߯ ߞߏ߫ ߡߊ߬ߟߌ߸ ߊ߬ ߣߌ߫ ߜߋ߲ߞߐ߰ߖߌ߬ߘߊ߸ ߡߐ߱ ߘߌ߫ ߓߐ߫ ߢߌ߲߬ ߠߎ߬ ߓߍ߯ ߘߐ߫ ߞߊ߬ ߣߊ߬ ߞߐߘߍ߫.
ߟߊ߬ߞߐ߰ߟߌ߬ ߓߟߋߓߟߋ ߣߌ߲߬ ߦߋ߫ ߛߊ߲߬ߠߊ߬ߞߊ ߟߋ߬ ߘߌ߫߸ ߢߌ߬ߣߊ߲߬ ߕߊ ߓߍߣߊ߬ ߞߍ߫ ߟߐ߲ߠߌ߲ ߛߌߓߟߏߡߊ߫ ߛߌߦߊߡߊ߲߫ ߠߋ߬ ߞߊ߲߬߸ ߞߊ߬ ߓߍ߲߬ ߛߎ߲ߞߎ߲ ߟߐ߲ߠߌ߲ ߠߎ߬ ߡߊ߬، ߏ߬ ߟߋ ߘߐ߫߸ ߘߊߞߎ߲߫ ߛߓߊ߬ ߓߍ߫߸ ߏ߬ ߟߎ߬ ߘߌ߫ ߢߊߝߐ߫ ߊ߬ ߢߊߝߐ߫ ߢߊ ߡߊ߬: ߓߊߛߌߦߊ ߘߊߞߎ߲߸ ߞߵߌ ߓߋ߭ ߣߴߌ ߥߌ߬ߟߌ ߟߐ߲߫، ߥߊߟߌߝߦߊ ߘߊߞߎ߲߸ ߞߊ߬ ߛߴߌ ߟߊ߫ ߓߊ߯ߙߊ ߟߊߛߓߊ߬ߕߌ߬ ߟߴߌ ߓߟߏ߫ ߊ߬ ߢߊ ߡߊ߬، ߊ߬ ߣߌ߫ ߟߊ߬ߕߙߎ ߜߎ߲߬ߘߎ߸ ߣߴߏ߬ ߦߋ߫ ߞߌ߬ߢߍ߬ߟߊ ߜߎ߲߬ߘߎ߫ ߘߏ߲߰ߣߍ߲ ߠߎ߬ ߘߌ߫، ߢߌ߲߬ ߠߎ߬ ߓߍ߯ ߟߋ߬ ߓߍߣߊ߬ ߓߌ߬ߟߊ߫ ߖߊ߬ߡߊ ߛߊ߬ߥߏ߬ ߘߐ߫ ߣߌ߲߬ ߕߟߋ߬ ߣߊ߯ߣߌ߲ ߞߣߐ߫، ߓߊߏ߬߸ ߞߙߎߝߓߊ ߞߘߐ ߟߋ߬ ߟߐ߲ߠߌ߲߫ ߞߙߎ߫ ߟߊߘߍ߬ߣߍ߲ ߠߎ߬ ߘߌ߫.
ߒ߬ߓߊ߬߸ ߞߏ߲߬ߓߏ ߖߊ߲߬ߕߎ߬ ߡߘߎ ߞߐ߲ߘߍ߫ ߡߍ߲ ߦߋ߫ ߒߞߏ ߞߙߎߝߓߊ ߣߌ߲߬ ߞߊ߲ߕߌ߮ ߘߌ߫߸ ߟߊ߬ߛߋ߬ߟߌ ߣߌ߲߬ ߞߍߣߍ߲߫ ߏ߬ ߟߋ ߟߊ߫ ߖߊ߬ߡߊߙߌ ߞߣߐ߫߸ ߞߊ߬ ߓߍ߯ ߡߊߞߟߌ߫ ߟߊ߬ߞߐ߰ߟߌ ߣߌ߲߬ ߘߊߦߟߍߟߌ ߖߊ߲߬ߖߏ߲ ߢߣߊߓߊ߯ߦߊ ߡߊ߬ ߞߏ߲ߞߏߘߓߌ ߕߟߋ߬ ߁߄߸ ߏ߬ ߡߍ߲ ߞߍߕߐ߫ ߞߊ߬ߞߎߘߊ ߣߌ߫ ߞߊ߬ߞߘߐ ߟߐ߲ߠߌ߲ ߠߎ߬ ߘߐߛߊߙߌ߫ ߟߏ߲ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
