ߛߌ߬ߣߌ߲߬ߟߏ߲ ߠߋ߬ ߡߊ߬ ߂߀߂߆ ߞߏ߲ߞߏߘߓߌ ߕߋ߬ߟߋ߫ ߃߸ ߟߊ߱ߖߌ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߞߊ߬ߓߊ ߞߊ߬ ߡߊ߲߬ߛߊ߬ߓߊ ߟߊ߫ ߞߟߌߟߌ ߟߊߡߌ߬ߣߊ߬߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߢߍߓߊ߯ ߝߟߐߝߟߐ ߘߌ߫، ߒ߬ߓߊ߬߸ ߊ߬ ߞߵߊ߬ ߖߌ߰ߦߘߊ߬ ߟߊ߬ߓߊ߲ ߡߊߛߐ߬ߘߐ߲߬ ߞߊ߯ߙߌ ߟߋ߬ ߡߊ߬߸ ߂߀߂߆ ߞߏ߲ߞߏߘߓߌ ߕߟߋ߬ ߅߸ ߒߓߋ߲ߓߊߞߙߐ߫ ߛߊ߬ߙߌ߬ߟߏ ߘߐ߫߸ ߓߊߕߍ߫ ߞߊ߲ߞߊ߲߫ ߣߊ߬ߓߊ߰ߦߊ߫ ߡߐ߰ߓߊ߬ ߝߎߙߋ ߟߎ߫ ߕߍ߰ߟߊ ߘߐ߫ ߓߊ߬ߣߊ߲߬ߞߘߐ߬ߘߊ ߞߌ߲߬ߘߊ ߟߊ߫߸ ߞߊ߲ߞߊ߲߫ ߛߏ ߞߣߐ߫.
ߓߊߘߌ ߞߍ߫ ߘߊ߫ ߡߌ߬ߛߙߌ߬ߓߊ ߟߋ߬ ߟߊ߫߸ ߞߎ߲߬ߠߊ߬ߛߌ߮ ߞߵߊ߬ ߓߟߏߝߘߊ߫ ߗߋߘߋ߲߫ ߞߙߍߞߙߍߣߍ߲ ߥߙߍߓߊߓߊ ߟߋ߬ ߟߊ߫߸ ߡߍ߲ ߠߎ߬ ߛߐ߬ߘߐ߲߬ ߘߊ߫ ߡߐ߰ߓߊ ߛߎ߬ ߞߏ ߘߐ߫، ߣߊ߬ߓߊ߰ߕߐ ߟߎ߬ ߘߐ߫߸ ߖߡߊ߬ߣߊ ߞߎ߲߬ߠߊ߬ߛߌ߮ ߞߎ߲߬ߕߌ߮ ߕߍ߬ߘߍ߫ ߊ߬ ߘߐ߫߸ ߊߡߊߘߎ߫ ߎ߯ߙߌ߬ ߓߊ، ߘߌ߯ߣߊ߫ ߞߏߢߊ ߟߎ߬ ߝߘߏ߬ߓߊ߬ ߞߟߊ߬ߕߌ߮ ߝߣߊ߫ ߕߍ߬ߘߍ߫ ߊ߬ ߘߐ߫߸ ߟߊ߱ߖߌ߬ ߞߊ߬ߙߊ߲߬ߡߐ߮ ߖߊߥߙߊ߫، ߞߏߕߌ߯ ߡߏߙߌ߫ ߞߐ߲ߘߍ߫ ߕߊ߬ߣߍ߲ ߞߵߊ߬ ߟߊ߫ ߓߌߟߌ߬ ߞߐ߲ߘߍ߫ ߞߊ߲߬߸ ߎߛߑߡߊߣߌ߲߬ ߞߊ߬ߓߊ ߕߊ߬ߣߍ߲ ߞߵߊ߬ ߟߊ߫ ߒߞߏ ߗߍ߬ߞߘߐ߬ߓߊ ߟߊ߲߱ߛߌ߬ߣߍ߫ ߥߘߎ߬ߡߊ߬ߞߊ ߞߊ߬ߞߙߐ ߡߊߞߛߊ߫ ߞߊ߲߬߸ ߞߎߡߊߕߍ߫ ߞߊ߲ߞߊ߲߫ ߡߙߊ߬ߦߊ߬ߞߊ߲ߞߋ ߟߎ߫ ߡߊ߬߸ ߏ߬ ߟߎ߬ ߓߍ߯ ߟߋ߬ ߕߘߍ߬ ߞߣߍ ߣߌ߲߬ ߞߊ߲߬.
߁߃ߙߋ߲ ߠߋ߬ ߡߊ߬߸ ߗߋߘߋ߲ ߠߎ߬ ߘߏ߲߬ ߘߊ߫ ߓߊߘߍ߫ ߘߊߞߎ߲ ߘߐ߫߸ ߏ߬ ߟߎ߬ ߡߍ߲ ߠߎ߬ ߢߍߡߌ߬ߣߊ߬ߣߍ߲߫ ߕߘߍ߬ ߞߏߕߌ߯ ߝߟߐ ߓߟߏ߫߸ ߞߊ߬ ߣߵߊ߬ߟߎ߬ ߟߊ߫ ߛߊ߲߬ߞߊ߬ߝߏ ߟߎ߬ ߞߍ߫߸ ߖߡߊ߬ߣߊ ߞߊ߲ߕߌ߮ ߕߐ߯ ߘߐ߫، ߞߊ߬ ߛߊ߬ߓߊ߰ߕߐ ߟߊ߫ ߘߋ߲ߓߦߊ ߡߊ߬ߤߌ߬ߣߊ߬ ߟߊߡߌ߬ߣߊ߬߸ ߞߊ߬ ߞߊ߲ߞߊ߲߫ ߡߊ߬ߤߌ߬ߣߊ߬ ߟߊߡߌ߬ߣߊ߬߸ ߞߎߡߊߕߍ߫ ߖߌ߬ߣߍ߫ ߡߎ߰ߡߍ ߡߊ߬߸ ߡߐ߰ߓߊ߬ ߛߊߣߌ߲ ߢߌ߲߬ ߠߊ߫ ߛߊ߬ߦߊ ߘߐ߫.
ߟߊ߱ߖߌ߬ ߞߊ߬ߙߊ߲߬ߡߐ߮ ߖߊߥߙߊ߫ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߞߎߡߊ߫ ߞߎ߲߬ߠߊ߬ߛߌ߮ ߕߐ߯ ߘߐ߫߸ ߊ߬ߟߋ ߡߍ߲ ߦߋ߫ ߘߌ߯ߣߊ߫ ߞߏߢߊ ߟߎ߫ ߝߘߏ߬ߓߊ߬ ߞߟߊ߬ߕߌ߮ ߘߌ߫، ߊ߬ ߞߵߊ߬ ߟߊ߫ ߛߎ߬ߣߎ߲ ߣߴߊ߬ ߟߊ߫ ߛߊ߲߬ߞߊ߬ߝߏߟߌ ߞߍ߫: <<ߓߌ߬ ߢߐ߲߰ ߟߏ߲߫߸ ߊ߲ ߛߎ߬ߣߎ߲߬ߣߍ߲߬ߓߊ ߟߋ߬ ߕߋ߲߬، ߛߟߊߕߌ߮߸ ߞߊ߲ߓߍ߲ ߞߊ߲ߕߌ߮ ߞߊ߬ ߗߋߘߋ߲߫ ߜߌߟߌ߲ ߠߎ߬ ߟߋ߬ ߓߌ߬ߟߊ߬߸ ߡߍ߲ ߠߎ߬ ߢߍߡߌ߬ߣߊ߬ߣߍ߲߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߓߟߏ߫߸ ߊߡߊߘߎ߫ ߎ߯ߙߌ߬ ߓߊ߸ ߞߏ߫ ߞߊ߬ ߣߊ߬ ߛߊ߬ߓߊ߰ߕߐ ߟߊ߫ ߘߋ߲ߓߦߊ ߢߊߖߌߟߊߕߍ߬ߙߍ߲߬ߘߍ߫.
ߊ߲ ߝߏߣߍ߲߫ ߡߐ߰ߓߊ߫ ߟߋ߬ ߟߊ߫ ߣߌ߲߬߸ ߊ߬ ߕߎ߲߬ ߕߍ߫ ߞߊ߲ߞߊ߲߫ ߢߌߓߊ߯ ߝߟߐߦߊ ߘߐߙߐ߲߫ ߠߊ߫ ߘߋ߬߸ ߊ߬ ߕߘߍ߬ ߒ ߞߐߦߌߘߊߓߊ߮ ߟߋ߬ ߘߌ߫ ߦߊ߲߬߸ ߣߴߊ߬ ߡߊ߫ ߢߊ߬ ߞߏ߫ ߊ߬ߟߋ ߟߋ߬ ߕߘߍ߬ ߖߌ߬ߣߍ߬ ߜߍߞߊ߲ߠߊ ߛߌ߬ߟߡߊ߬ߦߊ ߞߏߘߐߛߘߌߘߊ ߕߌ߲߬ߞߎߘߎ߲ ߜߋ߬ߟߎ߲߬ߠߌ߲߬ߠߊ ߘߌ߫.
ߟߊ߱ߖߌ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߖߛߎ߬ߛߎߡߊ ߟߊߛߓߊ߬ߕߌ ߘߌߦߊ߫ ߘߊ߫ ߡߍ߲ ߦߋ߫߸ ߡߍ߲ ߞߵߊ߬ ߛߋߞߏ ߞߍ߫ ߡߐ߱ ߕߍ ߘߐߞߙߊ ߘߐ߫߸ ߞߊ߬ ߞߍߞߋߟߋ߲ߘߌ ߟߊߛߓߊ߬ߕߌ߬، ߊ߬ ߓߘߊ߫ ߥߊ߫ ߓߌ߬߸ ߓߊ߬ߙߵߊ߬ ߟߊ߫ ߞߏ ߕߍ߫ ߓߐ߫ ߊ߲ ߤߊ߲ߞߟߌ߫ ߟߊ߫ ߡߎ߰ߡߍ߫.>>
ߞߏ߲߬ߓߏ ߎߛߑߡߊߣߌ߲߬ ߞߊ߬ߓߊ ߡߍ߲ ߦߋ߫ ߓߘߍ߬ߓߘߍ߬ߟߌ߬ߟߊ߫ ߘߌ߫߸ ߏ߬ ߞߊ߬ ߡߐ߰ߓߊ ߣߌ߲߬ ߕߊ߲߬ߘߏ߬߸ ߞߵߊ߬ ߟߊ߫ ߘߌ߯ߣߊ߫ ߢߍߓߊ߯ߦߊ ߟߊߞߊ߬ߟߌ߬: <<ߊߟߊ߫ ߣߐ߬ ߊ߬ ߟߊ߫ ߡߐ߰ ߛߊߣߌ߲ߡߊ߲ ߘߏ߫ ߟߋ߬ ߕߊ߬ ߟߊ߫ ߣߌ߲߬
ߓߌ߬ ߦߋ߫ ߟߏ߲ߓߊ߫ ߟߋ߬ ߘߌ߫߸ ߊߟߊ߫ ߟߊ߫ ߡߐ߰ ߢߌߡߊ ߘߏ߫ ߟߋ߬ ߥߊߣߍ߲߫ ߣߌ߲߬߸ ߟߊ߱ߖߌ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߞߊ߬ߓߊ، ߊ߬ ߛߊ߲߭ ߡߎ߬ߥߊ߲ ߠߋ߬ ߞߊ߲ߞߊ߲߫ ߡߌ߬ߛߙߌ߬ߓߊ ߢߍߓߊ߯ߦߊ ߟߊ߫ ߣߌ߲߬، ߊ߬ ߞߊ߬ ߓߊ߯ߙߊ ߟߋ߬ ߞߍ߫ ߛߌ߬ߟߡߊ߬ߦߊ߬ ߢߍ߫߸ ߊ߬ ߞߊ߬ ߛߌ߲ߖߌ ߕߎ߰߸ ߞߊ߬ ߓߊߘߋ߲ߧߊ߫ ߘߐߓߍ߲߬߸ ߞߵߊߘߡߊߘߋ߲ ߠߎ߬ ߓߟߏ ߘߌ߫ ߢߐ߲߮ ߡߊ߬، ߒ ߕߌ߰ ߊߟߊ߫߸ ߊ߲ ߧߴߊߟߊ߫ ߕߙߊ߫ ߟߊ߫߸ ߊ߬ ߣߐ߬ ߞߏ߫ ߢߌߡߊ ߡߍ߲ ߠߎ߬ ߞߍ߫ ߟߊ߫߸ ߞߵߏ߬ ߟߎ߬ ߞߍ߫ ߊ߬ ߢߍ߫ ߊ߬ߙߌ߬ߖߣߍ߫ ߛߐ߲߬ߞߐ߬ ߘߌ߫߸ ߊߟߊߡߵߏ߬ ߞߍ߫ ߘߊ߫.
ߊ߲ ߧߋ߫ ߘߎ߬ߥߊ߬ߥߎ ߞߍ߫ ߟߊ߫߸ ߊߟߊߡߵߊ߬ ߞߐ ߘߐߓߍ߲߬ ߘߊ߫߸ ߘߋ߲ ߡߍ߲ ߠߎ߬ ߕߏߣߍ߲߫߸ ߞߵߏ߬ ߟߎ߬ ߞߍ߫ ߊ߬ ߞߐ ߘߌ߫ ߊߟߊߡߵߏ߬ ߞߍ߫ ߘߊ߫.>>
ߞߐߣߊߞߙߌ߫ ߕߌ߲ߓߌߘߌ߲ߘߓߊ ߝߊߦߌߛߊߟ ߢߍߓߊ߮߸ ߡߏ߬ߤߊ߬ߡߍ߬ߘ ߛߊߟߌߥߎ߬ ߞߡߊ߬ߙߊ߫ ߛߎ߬ߣߎ߲߬ߣߍ߲ ߞߎߡߊ߫ ߘߊ߫߸ ߞߊ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߟߊ߫ ߟߊ߬ߛߙߋ߬ߦߊ߬ߟߌ ߘߏ߫ ߟߎ߫ ߞߍ߫߸ ߡߐ߰ߦߊ ߣߌ߫ ߘߌ߯ߣߊ ߞߊߡߊ߲ ߞߣߐ߫: <<ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߕߎ߲߬ ߦߋ߫ ߖߛߎ߬ߛߎߡߊ ߡߐ߱ ߟߋ߬ ߘߌ߫߸ ߤߊ߲ߞߟߌߡߊ ߟߋ߬ ߕߘߍ߬߸ ߊ߬ ߡߎ߬ߢߎ߲߬ߣߍ߲߫ ߕߘߍ߬߸ ߊ߬ ߕߎ߲߬ ߞߊ߬ ߞߎ߬ߙߊ߬ߣߊ ߟߐ߲߫ ߞߏߛߓߍ߫، ߒ ߘߌߡߊ߲߫ ߊ߬ ߦߋ߫، ߞߏ߬ߣߌ߲߬߸ ߥߊ߯ߕߌ ߟߋ߬ ߛߋߣߍ߲߫߸ ߊ߲ ߕߴߛߋ߫ ߝߐߦߌ߬ ߞߍ߫ ߟߴߏ߬ ߘߐ߫، ߊ߲ ߧߋ߫ ߘߎ߬ߥߊ߬ߥߎ ߟߋ߬ ߞߍ߫ ߟߊ߫߸ ߊߟߊߡߵߊߟߊ߫ ߤߌߣߊ߫ ߘߴߊ߬ ߟߊ߫߸ ߞߊ߬ ߓߊߘߋ߲ߧߊ ߛߓߊ߬ߕߌ߫ ߖߌ߬ߣߍ߬ߞߊ ߟߎ߬ ߣߌ߫ ߢߐ߲߯ ߕߍ߫، ߒ ߞߊ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߡߍ߲ ߟߐ߲߫߸ ߊߟߊߡߵߊ߬ ߢߐ߲߱ ߘߌ߫ ߘߊ߫ ߞߊ߲ߞߊ߲߫ ߡߊ߬߸ ߖߌ߬ߣߍ߫ ߡߊ߬߸ ߛߌ߬ߟߊ߬ߡߊ ߟߎ߫ ߡߊ߬، ߓߊߏ߬߸ ߗߍ߬ ߛߓߊߙߌߣߍ߲ ߠߋ߬ ߕߘߍ߬߸ ߡߍ߲ ߝߊ߲ߡߊߖߌ߰ߣߍ߲߫߸ ߊ߬ ߟߊ߫ ߞߎߡߊ ߡߊ߲߫ ߛߌߦߊ߫.>>
ߛߘߍ ߘߊ߲߬ߘߌߦߊ߫ ߛߘߍ߫ ߞߎ߲ߕߌ߮ ߕߘߍ߬ ߞߣߍ ߞߊ߲߬߸ ߡߊ߬ߡߊ߬ߘߌ߫ ߞߓߊ߬߸ ߏ߬ ߞߊ߬ ߛߙߊ߬ߣߎ߲߬ ߞߍ߲ߘߍ߫ ߦߌ߬ߘߊ߬: <<ߊ߲ ߣߊ߬ߣߍ߲߫ ߞߊ߲ߞߊ߲߫ ߌ߬ߡߊ߰ߡߎ߲߬ߓߊ ߟߊ߫ ߛߎ߬ߞߏ ߟߋ߬ ߘߐ߫، ߊ߬ ߞߍ߫ ߘߴߊ߲ߠߎ߬ ߞߊ߬ߙߊ߲߬ߡߐ߯ ߟߋ߬ ߘߌ߫߸ ߊ߲ ߓߍ߯ ߕߍ߬ߘߍ߫ ߊ߬ ߟߊ߫ ߞߊ߬ߙߊ߲߬ߕߊ ߟߊ߫، ߊߟߊ߫ ߡߐ߮ ߟߋ߬ ߦߴߊ߬ ߘߌ߫، ߒߠߋ ߓߊߘߋ߲ ߠߋ߬߸ ߒ ߞߐ߬ߘߐ߫ ߟߋ߬، ߓߊ߬ߙߌ߬߸ ߊ߬ ߞߵߊ߬ ߖߘߍ߬ ߞߍ߫ ߛߘߍ ߘߊ߲߬ߘߌߦߊ߫ ߟߊ߬ߟߌ߬ߟߌ߬ߟߊ ߘߌ߫، ߊ߲ ߧߴߊߟߊ߫ ߟߋ߬ ߡߊߘߌߦߊ߫ ߟߊ߫߸ ߞߵߊߟߊ߫ ߦߊ߬ߝߴߊ߬ ߡߊ߬ ߊߟߊߡߵߏ߬ ߞߍ߫ ߘߊ߫، ߊߟߊ߬ ߊ߬ߙߌ߬ߖߣߍ߫ ߘߴߊ߬ ߡߊ߬.>>
ߟߊ߱ߖߌ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߞߊ߬ߓߊ ߟߊ߫ ߛߊ߬ߦߊ ߣߌ߲߬ ߞߍߣߍ߲߫ ߓߊ߲߬ߘߊ߲߬ߓߊ ߘߏ߫ ߟߋ߬ ߓߋ߬ߣߍ߲ ߘߌ߫ ߓߊߕߍ߫ ߞߣߐ߫߸ ߞߎߡߊߕߍ߫ ߞߊ߲ߞߊ߲߫ ߡߊ߬߸ ߊ߬ ߣߌ߫ ߖߌ߬ߣߍ߫ ߛߌ߬ߟߡߊ߬ߦߊ ߖߍ߬ߘߍ ߞߣߐ߫، ߓߊߏ߬߸ ߊ߬ ߞߍ߫ ߘߊ߫ ߖߛߎ߬ߛߎߡߊ ߟߊߛߓߊ߬ߕߌ߬ߓߊ߮ ߟߋ߬ ߘߌ߫߸ ߊ߬ ߞߍ߫ ߘߊ߫ ߞߍߞߋߟߋ߲ߘߌ ߛߌߟߊ ߕߊ߯ߡߊߓߊ߮ ߟߋ߬ ߘߌ߫.
ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
