ߝߊ߬ߙߊ߲߬ߛߌ߬ ߞߊ߲ߕߌ߮ ߋߡߊߣߎ߳ߍߟ ߡߊߞߐߙߐ߲߫ ߣߐ߬ ߗߋߟߊߘߋ߲߫ ߞߙߍߞߙߍߣߍ߲߫ ߠߋ߬ ߟߊߣߊ߬ ߟߊ߫ ߖߌ߬ߣߍ߬ ߞߣߐ߫߸ ߣߊߟߌ߬ߡߎ߲߫ ߊ߬ߟߎ߬ ߟߊ߫ ߞߐߞߊ߲߫ ߖߊߥߏ ߣߌ߫ ߡߛߊ߬ߡߊ߲߬ߠߌ߲ ߞߏߕߌ߮߸ ߣߌߞߏߟߊ ߝߏߙߛߌߦߋ߫ ، ߞߎߡߊ߫ ߞߍ߲ߘߍ߫ ߟߋ߬ ߘߏ߲߬ ߘߴߊ߬ߟߋ߬ ߘߊ߫ ߞߊ߬ ߝߘߊ߫ ߡߊߞߐߙߐ߲߫ ߠߊ߫߸ ߞߊ߬ ߣߵߊ߬ ߝߐ߫ ߞߊ߲ߓߍ߲ ߞߊ߲ߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫، ߒ߬ߓߊ߬߸ ߊ߬ߟߎ߫ ߞߊ߬ ߢߐ߲߯ߦߋ߫ ߞߎߣߎ߲ߟߏ߲ ߂߀߂߆ ߞߏ߲ߞߏߘߓߌ ߕߟߋ߬ ߈ ߡߊ߬߸ ߞߎߓߋ߫ ߡߏ߬ߤߊ߬ߡߍ߬ߘ ߅߲ ߞߣߐ߫، ߓߐߒߡߊߟߌ ߣߌ߲߬ ߞߎ߲߭ ߦߋ߫ ߖߡߊ߬ߣߊ߫ ߝߌ߬ߟߊ ߟߊ߫ ߕߍߓߊ߯ߦߊ ߖߎ߬ߟߎ ߓߊ߲ߓߊ߲ ߠߋ߬ ߘߌ߫߸ ߛߴߊ߬ߟߎ߬ ߘߌ߫ ߛߋ߫ ߓߊ߯ߙߊߢߐ߲߯ߦߊ߫ ߕߣߐ߬ ߝߊ߲߬ߝߌ߬ߟߊ߬ߡߊ ߞߍ߫ ߟߊ߫ ߢߊ ߡߍ߲ ߡߊ߬.
ߓߐߒߡߊߟߌ ߣߌ߲߬ ߛߋ߲߭ߝߍ߬߸ ߡߊߞߐߙߐ߲߫ ߠߊ߫ ߗߋߟߊߘߋ߲ ߞߵߊ߬ ߕߏ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߊߝߍ߬߸ ߞߵߊ߬ ߛߐ߬ߘߐ߲߬ ߞߏ߲߬ߓߏ߫ ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߦ߫ߋ ߞߣߍ ߞߊ߲߬߸ ߏ߬ ߡߍ߲ ߦߋ߫ ߖߌ߬ߣߍ߬ ߞߐߞߊ߲ߞߏ ߟߎ߬ ߞߏߕߌ߮ ߘߌ߫، ߢߊߥߎߟߋ߲߫ ߗߍ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ ߛߍߥߊߣߍ߲߫ ߡߍ߲ ߝߟߐ߫ ߟߊ߫ ߡߎߣߎ߲߬߸ ߏ߬ ߟߋ ߞߍ߫ ߘߴߊ߬ ߟߊߛߣߍ߫ ߞߏߢߌߡߊ ߘߌ߫ ߞߐߣߊߞߙߌ߫ ߣߊߟߌ ߣߌ߲߬ ߘߐ߫، ߊ߬ ߝߌߟߊߣߊ߲ ߦߋ߫ ߡߍ߲ ߘߌ߫߸ ߞߏ߫ ߊ߬ ߛߍߥߊߣߌ߲ ߦߴߊ߬ ߝߐ߫ ߟߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫߸ ߞߏ߫ ߡߊߞߐߙߐ߲߫ ߓߘߴߊ߬ ߡߊߞߟߌ߫ ߓߐߒߡߊߟߌ߫ ߞߟߊߒߞߋ߫ ߞߊ߲ߡߊ߬ ߝߊ߬ߙߊ߲߬ߛߌ߬߸ ߊ߬ ߦߋ߫ ߥߴߊ߬ ߢߊ ߟߴߊ߬ ߞߊ߲߬ ߦߋ߲߬، ߖߐ߲߰ߛߊ߫ ߝߊ߬ߙߊ߲߬ߛߌ߫ ߖߡߊ߬ߣߊ ߣߌ߫ ߖߌ߬ߣߍ߫ ߖߡߊ߬ߣߊ ߟߊ߫ ߕߍߓߊ߯ߦߊ ߖߎ߬ߟߎ ߘߌ߫ ߘߐߖߊ߬ ߓߘߍߞߍ߭.
ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߏ߲߬ ߝߣߊ߫ ߞߊ߬ ߝߏ߬ߟߌ ߟߊߛߋ߫ ߗߍ߭ ߡߊ߬߸ ߊ߬ ߟߊ߫ ߓߐߒߡߊߟߌ ߞߏߛߐ߲߬، ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߢߊߥߎߟߋ߲ ߠߊ߫߸ ߞߏ߫ ߓߌ߬ߡߊ߫ ߖߌ߬ߣߍ߬ ߣߌ߫ ߝߊ߬ߙߊ߲߬ߛߌ߫ ߓߌ߬ߟߊ߬ ߢߐ߲߯ ߓߟߏ߫߸ ߓߊ߯ߙߊߢߐ߲߯ߦߊ߫ ߞߘߐ߬ߡߊ߲ ߦߴߊ߬ߟߎ߬ ߕߍ߫، ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߌߞߐ߫߸ ߞߏ߫ ߖߌ߬ߣߍ߫ ߣߊ߬ߕߊ ߦߋ߫ ߢߝߍߕߊ߯ߟߌ ߟߋ߬ ߘߌ߫ ߟߋ߬ߟߋ ߓߍ߯ ߘߏ߫ ߘߐ߫߸ ߞߊ߬ ߛߋ߫ ߓߊ߯ߙߊߢߐ߲߮ ߠߎ߬ ߢߌߣߌ߲߫ ߠߊ߫ ߝߊ߲߭ ߓߍ߯ ߘߐ߫߸ ߘߏ߫ ߕߊ߫ ߕߍ߫ ߕߏ߫ ߘߏ߫ ߝߍ߬ ߓߊ߯ߙߊߢߐ߲߯ߦߊ ߡߍ߲ ߘߐ߫߸ ߊ߬ ߣߌ߫ ߢߐ߲߯ ߓߏ߲ߧߊ ߣߌ߫ ߢߐ߲߮ ߠߊ߫ ߕߣߐ߬ ߡߊ߬ߞߊߘߊ߲ ߦߋ߫ ߓߊ߯ߙߊߢߐ߲߯ߦߊ ߡߍ߲ ߘߐ߫.
ߊ߬ߟߎ߬ ߟߊ߫ ߞߎߡߊ ߞߎ߲߬ߕߊ߮ ߞߣߐ߫߸ ߊ߬ߟߎ߫ ߞߊ߬ ߓߊ߯ߙߊ߫ ߘߊߞߎ߲߫ ߛߌߦߊߡߊ߲߫ ߞߎߡߊ ߝߐ߫، ߊ߬ ߕߌ߯ߕߌ߯ ߡߍ߲ ߠߎ߬ ߕߐ߬ߣߐ ߓߏ߲߬ߓߊ߬߸ ߦߏ߫ ߞߍ߲ߘߍߦߊ߫ ߞߏ߸ ߜߟߐߡߌ߲߫ ߞߏ߸ ߊ߬ ߣߌ߫ ߘߍ߲߰ߘߊ߬ ߞߏ ߕߊ߬ߣߍ߲ ߞߵߊ߬ ߟߊ߫ ߘߊ߬ߡߊ߲ ߕߣߐ߬ߓߐ߬ ߞߏ ߟߎ߬ ߞߊ߲߬، ߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ߫ ߞߏ߫ ߞߎߡߊ ߣߌ߲߬ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߞߊ߬ ߓߊ߯ߙߊߢߐ߲߯ߦߊ ߝߊ߲߬ߞߊߘߏ߲߬ ߝߊ߬ߙߊ߲߬ߛߌ߬ ߣߌ߫ ߖߌ߬ߣߍ߫ ߘߎ߲߬ߘߎ߬ߡߊ߬ ߞߏߟߊߘߍ ߟߎ߬ ߕߍ߫߸ ߞߊ߬ ߘߋ߲ߡߌߛߍ߲ ߠߎ߬ ߟߊ߫ ߞߏ ߞߍ߫ ߢߝߍ߫ ߞߏ ߘߌ߫߸ ߞߊ߬ ߞߏ߲ߞߏ߫ ߞߣߐߟߊ ߟߎ߬ ߟߊ߫ ߥߙߎߞߌ ߞߎ߬ߘߎߛߌ߰ ߊ߬ߟߎ߬ ߞߊ߲ߠߊ߫߸ ߛߊ߫ ߘߏ߫ ߘߌ߫ ߓߐ߫ ߘߋ߲ߡߌߛߍ߲ ߠߎ߬ ߟߊ߫ ߞߎ߲߬ߝߍ߬ߕߊ߮ ߟߊ߫߸ ߦߏ߫ ߛߌߡߊ߲ߘߎ߯ ߂߀߄߀ ߖߊ߬ߕߋ߬ߘߐ߬ߛߌ߮ ߞߵߏ߬ ߝߐ߫ ߢߊ ߡߍ߲ ߡߊ߬.
ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߟߊ߫ ߝߐߟߌ߫ ߘߐ߫߸ ߞߏ߫ ߓߐߒߡߊߟߌ ߣߌ߲߬ ߓߘߊ߫ ߕߊ߬ߡߌ߲߬ ߟߊߒߠߦߊ ߓߊ߲ߓߊ߲߫ ߠߊ߫ ߖߡߊ߬ߣߊ߫ ߝߌ߬ߟߊ ߢߌ߲߬ ߠߎ߬ ߕߍ߫، ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍ߯ ߣߕߊ߬ߣߍ߲߫ ߡߍ߲ ߡߊ߬߸ ߏ߬ ߟߋ ߓߊ߯ߙߊ ߟߎ߫ ߥߓߊ߬ߞߏ߬ ߞߍ ߘߌ߫߸ ߞߊ߬ ߖߌ߬ߣߍ߫ ߖߡߊ߬ߣߊ ߟߊߥߙߎߞߌ߫߸ ߏ߬ ߘߏ߲߬ ߞߍߕߐ߫ ߛߌߟߊ ߡߍ߲ ߝߍ߬߸ ߏ߬ ߟߋ ߛߌߡߊ߲ߘߎ߯ ߂߀߄߀ ߢߍߥߟߊ ߘߌ߫.
ߓߐߒߡߊߟߌ ߣߌ߲߬ ߞߏ߬ߣߌ߲ ߓߘߊ߫ ߞߍ߫ ߕߙߎ߬ ߘߌ߫ ߞߵߊ߬ ߦߌ߬ߘߊ߬߸ ߞߏ߫ ߝߊ߬ߙߊ߲߬ߛߌ߬ ߣߌ߫ ߖߌ߬ߣߍ߬ ߦߴߊ߬ ߝߍ߬ ߞߵߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬ ߓߊ߯ߙߊ߫ ߛߌߦߊߡߊ߲߫ ߘߊߞߎ߲ ߘߐ߫߸ ߛߐ߬ߘߐ߲ ߛߌߟߊ ߝߍ߬߸ ߟߐ߲ߠߌ߲ߦߊ ߛߌߟߊ ߝߍ߬߸ ߞߊ߬ ߘߋ߲ߡߌߛߍ߲ ߠߎ߬ ߣߌ߫ ߡߏ߬ߛߏ ߟߎ߬ ߟߊ߫ ߞߏ ߞߍ߫ ߢߝߍ߫ ߞߏ ߘߌ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
