ߞߊ߲ߓߋ߲ߘߏ߫ ߟߋ߬ ߓߕߐߟߊ ߕߍ߬ߘߍ߫ ߣߐ߲߬ߜ߭ߐ߬ߥߊ߬ ߓߘߊ ߟߊ߫߸ ߦߋ߲߬ ߦߋ߫ ߡߙߊ߬ߘߊ߬ߙߋ߲ ߠߋ߬ ߘߌ߫ ߞߎߘߍ߫ ߂߇ ߟߵߊ߬ ߣߌ߫ ߜߞߋߘߎ߯ ߛߏ ߞߣߐߟߊ ߕߍ߫ ߒ߬ߓߊ߬߸ ߕߟߎߥߎߟߋ߫ ߣߍ߯ߘߎ߲߫ ߅߆ ߟߋ߬ ߕߘߍ߬ ߞߊ߲ߓߋ߲ ߣߌ߲߬ ߞߎ߲߬߸ ߏ߬ ߟߋ ߝߘߌ߫ ߘߊ߫ ߞߊ߯ߙߌߟߏ߲ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߂߅ ߡߊ߬߸ ߞߊ߬ ߞߎߘߍ߫ ߈ ߕߏ߫ ߊ߬ ߣߌ߫ ߜߞߋߘߎ߯ ߕߍ߫.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߞߍ߫ ߘߊ߫ ߞߵߊ߬ ߛߊߓߎ ߞߍ߫ ߛߌߟߊ ߟߊ߫ ߖߎ߯ߦߊ ߟߋ߬ ߘߌ߫߸ ߝߊߦߌߘߊ߫߸ ߊ߬ ߓߏ߬ߙߌ ߓߘߊ߫ ߜߟߍ߬ߦߊ߫ ߟߋ߬ ߕߋ߲߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.
ߊ߲ ߠߊ߫ ߞߐߦߌߘߊߓߊ߮ ߟߊ߫ ߟߊ߬ߞߙߐ߬ߛߟߌ߬ ߘߐ߫ ߞߣߍ ߞߊ߲߬ ߦߋ߲߬߸ ߞߊ߲ߓߋ߲ ߣߴߊ߬ ߞߣߐ߫ ߝߋ߲ ߠߎ߬ ߦߋ߫ ߘߎ߱ ߡߊ߬ ߦߋ߲߬ ߤߊ߲߯ ߕߋ߲߬߸ߞߵߏ߬ ߞߎ߲ ߞߍ߫ ߘߏ߫ ߜߘߍ߫ ߛߐ߬ߘߐ߲߬ߓߊߟߌߦߊ ߘߌ߫ ߞߵߊ߬ ߞߣߐ߫ ߕߟߎ߫ ߣߍ߯ߘߎ߲ ߠߎ߬ ߡߊߘߏ߬ߣߌ߲߬ ߞߊ߬ ߥߴߊ ߘߌ߫ ߜߞߋߘߎ߯ ߟߐ߯ߝߍߓߊ ߘߐ߫.
ߞߊ߬ ߓߍ߲߬ ߣߌ߲߬ ߞߏ ߡߊ߬ ߏ߬ ߘߐ߫߸ ߞߊ߲ߓߋ߲߫ ߕߌ߮ ߞߵߊ߬ ߦߌ߬ߘߊ߬ ߞߏ߫ ߊ߬ ߦߴߊ߬ ߞߊ߲ߠߊߘߌ߫ ߟߊ߫ ߝߊ߰ߡߊ ߟߎ߫ ߡߊ߬߸ ߊ߬ ߕߌ߯ߕߌ߯ ߡߍ߲ ߠߎ߬ ߘߐ߱ߘߏ߲߬ߣߍ߲߫ ߛߌߟߊ߫ ߞߏ ߟߊ߫߸ ߊ߬ߟߎ߬ ߦߋ߫ ߝߙߍ߬ ߢߌߣߌ߲߫ ߞߊ߬ ߛߌߟߊ ߣߌ߲߬ ߓߐ߫ ߕߋ߲߬߸ ߞߵߊ߬ ߘߐߓߍ߲߬.
ߊ߬ ߞߵߊ߬ ߦߌ߬ߘߊ߬ ߞߏ߫ ߛߌߟߊ߫ ߘߋ߲ߣߍ߲߫ ߕߍ߫ ߛߌߟߊ ߢߌ߲߬ ߘߌ߫߸ ߞߏ߫ ߜߞߋߘߎ߯ ߛߌ߰ߣߍ߲߫ ߖߎ߬ߟߊ߬ߦߊ ߡߍ߲ ߡߊ߬߸ ߏ߬ ߖߎ߬ߟߦߊ߬ ߛߌߟߊ ߟߎ߬ ߘߐ߫ ߓߟߋ߬ߓߟߋ ߘߏ߫ ߟߋ߬ ߣߐ߲߬ߜ߭ߐ߬ߥߊ߬ ߛߌߟߊ ߘߌ߫.
ߖߎ߬ߟߊ ߡߍ߲ ߠߎ߬ ߞߏ߬ߣߌ߲ ߦߋ߫ ߕߊ߯ߡߊ߫ ߟߊ߫ ߛߌߟߊ߫ ߖߟߎ ߣߌ߲߬ ߞߊ߲߬߸ ߏ߬ ߟߎ߬ ߦߋ߫ ߖߊ߬ߤߣߊߡߊ ߟߋ߬ ߘߐ߫ ߕߋ߲߬߸ ߞߵߏ߬ ߞߎ߲߭ ߞߍ߫ ߛߌߟߊ ߟߊ߫ ߕߌߢߍ ߘߌ߫ ߊ߬ ߖߐ߬ߘߐ ߘߏ߲߬ ߝߣߊ߫ ߓߏ߲߬ߓߊ߫߸ ߖߎ߬ߟߦߊ߬ ߝߋ߲ ߠߎ߬ ߕߌߢߍ߫ ߞߏ ߘߐ߫߸ ߣߴߊ߬ ߓߍ߲߬ ߘߊ߫ ߞߏ߫ ߡߊ߬.
