ߜߋߟߋ߲ߜߋߟߋ߲ ߕߊ߭ ߓߌ߬ ߞߵߊ߬ ߓߌ߬ߟߊ߫ ߞߊ߬ߙߊ߲߬ߘߋ߲ ߠߎ߬ ߖߎߝߊ ߘߐ߫߸ ߏ߬ ߞߏ ߓߘߊ߫ ߞߍ߫ ߓߍ߯ ߤߊߡߌߣߊ߲ߞߏ ߘߌ߫ ߖߌ߬ߣߍ߬ ߞߣߐ߫ ߓߌ߬ ߢߐ߲߰ ߟߏ߲߫߸ ߞߎߡߊߕߍ߫ ߞߊ߲ߞߊ߲߫ ߡߊ߬، ߏ߬ ߟߋ ߘߐ߫߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߞߊ߬ ߛߙߊ߬ߣߎ߲ ߕߊ߬ ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫߸ ߊ߬ߟߋ ߡߍ߲ ߦߋ߫ ߢߎߡߍߙߋ߲ߠߞߊ ߟߎ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߯ ߕߌ߲߬ߞߎ߬ߘߎ߲߬ߠߊ߬ߞߊ ߘߌ߫ ߞߊ߲ߞߊ߲߫ ߞߣߐ߫߸ ߊ߬ ߞߵߊ߬ ߟߊߛߋ߫ ߞߏ߫ ߊ߬ߟߎ߬ ߞߍߕߐ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߓߙߊߡߊߖߊ߲ߓߊ߲ ߠߋ߬ ߟߊߥߟߌ߬ ߟߊ߫߸ ߞߊ߬ ߛߋ߫ ߘߍ߬ߞߙߏߝߏ ߟߊߓߊ߯ߙߊ߫ ߢߊ߫ ߓߘߍ ߟߎ߬ ߢߊߝߐ߫ ߟߊ߫ ߞߊ߬ߙߊ߲߬ߘߋ߲ ߠߎ߬ ߦߋ߫، ߏ߬ ߛߌߟߊ ߝߍ߬߸ ߞߏ߫ ߊ߬ߟߎ߬ ߓߍߣߊ߬ ߘߏ߲߬ ߞߊ߲ߞߊ߲߫ ߣߌ߫ ߛߌ߯ߙߌ߲߫ ߞߊ߬ߙߊ߲߬ ߦߙߐ ߟߎ߬ ߘߐ߫߸ ߊ߬ ߞߎ߲߬ߠߊ߬ߛߌ߮ ߕߊ ߣߴߊ߬ ߘߎ߲߬ߘߎ߬ߡߊ߬ ߕߊ ߟߎ߬ ߓߍ߯.
ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߡߍ߲ ߦߋ߫ ߕߋ߲߬߸ ߊ߬ ߕߊߟߊ߲ ߜߊ߬ߛߌ߬ߕߐ߫ ߞߍ߲ߘߍߟߏ߲ ߠߋ߬ ߂߀߂߆ ߣߍߣߍߓߊ ߕߟߋ߬ ߇߸ ߞߊ߲ߞߊ߲߫ ߞߊ߬ߙߊ߲߬ߘߊ߬ߓߊ߫ ߛߊ߭ߡߏ߬ߙߌ߬ ߟߊ߫، ߊ߬ߟߎ߬ ߟߊ߫ ߟߊ߬ߢߌߣߌ߲ ߠߋ߬߸ ߞߊ߬ ߛߋ߫ ߞߊ߬ߙߊ߲߬ߘߋ߲߬ ߁߀ ߀߀߀ ߖߊ߬ߕߋ߫ ߛߏ߬ߓߌ߬ߟߊ߬ߞߎߣߎ߲߫ ߠߊ߫.
ߣߌ߲߬ ߞߏ ߡߊ߫ ߓߐ߫ ߛߊ߲ ߡߊ߬ ߞߊ߬ ߖߌ߰ ߘߋ߬، ߞߊ߬ߦߌ߯ ߞߊ߬ߙߊ߲ ߕߊ߬ ߘߊ߫ ߞߏ߲ߓߌߕߌ߱ ߕߟߋ߬ ߅ ߡߊ߬ ߤߊ߲߯ ߕߋ߲߬، ߞߏ߫ ߛߌߦߊߡߊ߲߫ ߠߋ߬ ߞߍ ߦߴߌߘߐ߫ ߞߊ߬ߙߊ߲߬ ߦߙߐ ߟߎ߬ ߘߐ߬߸ ߡߍ߲ ߠߎ߬ ߣߌ߫ ߞߍߟߌ ߡߊ߲߫ ߞߊ߲߫߸ ߞߊ߬ߙߊ߲߬ߘߋ߲ ߘߏ߫ ߟߎ߫ ߖߍ߬ߘߍ ߝߣߊ߫ ߦߋ߫ ߞߏ߫ ߟߎ߫ ߞߍ߫ ߟߊ߫ ߘߍ߬ߞߙߏߝߏ ߟߎ߫ ߞߊ߲߬߸ ߡߍ߲ ߠߎ߬ ߣߌ߫ ߞߍߟߌ ߡߊ߲߫ ߞߊ߲߫.
ߡߊ߬ߡߊ߬ߘߌ߬ ߞߊ߲ߛߊ߲߫ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߓߌ߬ ߢߐ߲߰ ߟߏ߲߸ ߓߟߐߟߐ ߦߋ߫ ߟߊߓߊ߯ߙߊ߫ ߟߊ߫ ߓߍ߯ ߟߊߘߍ߬ߣߍ߲ ߠߋ߬ ߓߟߏ߫ ߝߊߦߌߘߊ߫، ߊ߬ ߦߋ߫ ߛߏ߫ ߡߌߛߍ߲ ߠߎ߬ ߞߣߐ߫߸ ߊ߬ ߦߋ߫ ߞߊ߬ߙߊ߲߬ߓߏ߲ ߠߎ߬ ߞߣߐ߫، ߏ߬ ߘߐ߫߸ ߊ߬ ߟߊߓߊ߯ߙߊ߸ ߊ߬ ߟߊߓߊ߯ߙߊ߫ ߓߘߍ ߡߊ߬߸ ߏ߬ ߟߋ ߘߐߙߐ߲߫ ߦߋ߫ ߛߌߟߊ߫ ߘߌ߫߸ ߡߍ߲ ߘߌ߫ ߡߐ߰ ߕߊ߲߬ߞߊ߬ ߣߊߡߙߊ ߡߊ߬.>> ߞߊ߲ߛߊ߲߫ ߞߵߏ߬ ߝߐ߫.
ߊ߬ ߞߵߊ߬ ߦߌ߬ߘߊ߬ ߘߏ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߢߌ߲߬ ߞߍߕߐ߫ ߊ߬ ߓߟߏ߫ ߞߊ߬ߙߊ߲߬ߕߊ ߟߎ߬ ߟߊ߫ ߟߋ߬߸ ߦߏ߫ ߜߙߊ߬ ߘߊߘߐߖߊߥߏߡߊ߸ <<ߞߊ߬ ߘߍ߬ߞߙߏ߬ߝߏ߬ ߞߏ ߕߐ߬ߣߐ ߣߴߊ߬ ߡߊ߲߬ߕߙߐ ߟߎ߬ ߝߐ߫ ߞߊ߬ߙߊ߲߬ߘߋ߲ ߠߎ߬ ߦߋ߫߸ ߊ߬ ߕߌ߯ߕߌ߯ ߓߟߐߟߐ ߟߊߓߊ߯ ߞߙߊ ߞߊ߬ߙߊ߲߬ ߦߙߐ ߟߎ߬ ߘߐ߫.>> ߊ߬ ߞߵߏ߬ ߝߐ߫ ߞߵߊ߬ ߟߊߕߍ߰.
ߡߊ߬ߡߊ߬ߘߌ߬ ߞߊ߲ߛߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߕߡߊ߬ߖߌ ߓߐ߫ ߓߍ߯ ߘߐ߫߸ ߡߐ߰ ߡߴߊ߬ߟߋ ߕߎ߲߬ߕߎ߲߫ ߞߵߊ߬ ߟߐ߬ ߣߌ߲߬ ߞߍ߫ ߟߊ߫ ߘߋ߬، <<ߣߌ߲߬ ߦߋ߫ ߒߠߋ ߖߘߍ߬ߓߊ߬ߞߎ߲ ߠߊ߫ ߞߏ߫ ߟߊߥߟߌ߬ߣߍ߲ ߠߋ߬ ߘߌ߫߸ ߣߴߊ߬ ߡߊ߫ ߢߊ߬ ߞߏ߫ ߒߠߋ ߟߋ߬ ߕߌ߲߬ߞߎߘߎ߲ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߮ ߘߌ߫.>> ߊ߬ ߞߵߏ߬ ߟߋ ߝߐ߫ ߞߣߊ߬ߕߏ߫ ߊ߬ ߝߐ߫ ߟߊ߫ ߞߏ߫ ߣߌ߫ ߞߊ߲ߞߊ߲߫ ߣߌ߫ ߛߌ߯ߙߌ߲߫ ߕߊ ߓߊ߲߫ ߘߊ߫߸ ߊ߬ ߓߍߣߊ߬ ߡߙߊ߬ߓߊ߰ߘߊ߬ ߜߘߍ߫ ߟߎ߫ ߝߣߊ߫ ߛߌ߰ ߛߋ߲߬ߠߊ߫.
ߝߐ߰ߓߍ߬ߦߊ߬ߟߊ ߟߎ߬ ߢߊߞߘߐ߫ ߦߋ߲߬߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߞߊ߬ ߢߌ߬ߣߌ߲߬ߞߊ߬ߟߌ߫ ߕߣߐ߬ߡߊ߬ߓߊ߫ ߞߍ߫߸ ߡߍ߲ ߟߐ߬ߣߍ߲߫ ߘߋ߲ߡߌߛߍ߲ߧߊ߫ ߡߊ߬: <<ߦߊ߯ߟߊ߫ ߕߎ߬ߢߊ߬ ߝߐ߬ ߓߟߏ ߡߊ߬߸ ߊ߲ߠߎ߬ ߟߋ߬ ߦߴߊ߲ ߠߊ߫ ߜߋߟߋ߲ߜߋߟߋ߲ ߠߎ߬ ߕߌ߱ ߘߌ߫ ߓߊ߰ ߥߟߴߊ߲ ߧߋ߫ ߥߛߎ ߟߋ߬ ߟߴߊ߲ ߠߊ߫ ߜߋߟߋ߲ߜߋߟߋ߲ ߠߎ߬ ߓߟߏ߫؟>>
ߊ߬ߟߋ ߟߊ߫ ߦߋߟߌ߫ ߘߐ߫߸ ߞߏ߫ ߣߌ߲߬ ߞߏ ߓߘߊ߫ ߕߊ߬ߡߌ߲߬ ߝߐߟߌ ߡߊ߬ ߡߎ߬ߕߎ߲߬، ߏ߬ ߟߋ ߞߏߛߐ߲߬߸ ߊ߬ ߞߵߊ߬ ߝߐ߫ ߘߋ߲ߡߌߛߍ߲ ߠߎ߬ ߦߋ߫߸ ߞߏ߫ <<ߌ ߘߴߊ߬ ߦߋ߫߸ ߊ߲ ߧߋ߫ ߥߊ߯ߕߌ ߡߍ߲ ߞߍ߫ ߟߊ߫ ߡߐ߰ ߜߘߍ ߟߎ߬ ߟߊ߫ ߞߏ ߡߊߝߟߍ ߞߊ߲߬ ߊ߬ߟߎ߬ ߟߊ߫ ߘߎߢߊ߫ ߘߐߕߍ߰ ߢߊ ߘߐ߫߸ ߊ߲ ߕߴߏ߬ ߢߐ߲߰ ߟߊ߫ ߟߴߊ߲ ߖߍ߬ߘߍ ߕߊ ߞߊ߲߬.>> ߊ߬ ߣߡߌߛߊߣߍ߲ ߞߵߏ߬ ߝߐ߫.
ߏ߬ ߘߐ߫߸ ߞߊ߲ߛߊ߲߫ ߠߊ߫ ߛߌߟߊ ߣߌ߲߬߸ ߛߌߟߊ߫ ߜߍߣߍ߲ߓߊ߫ ߞߋߟߋ߲߫ ߠߋ߬ ߕߊ߬ߣߴߊ߬ ߓߟߏ߫߸ ߢߊߝߐߟߌ ߞߍߕߐ߫ ߡߍ߲ ߠߎ߬ ߞߊ߲߬ ߖߊ߬ߡߊ ߦߋ߫: <<ߞߊ߬ ߛߐ߰ ߟߌ߬ߤߟߊ ߟߎ߬ ߡߊߝߟߍ ߡߊ߬ ߡߎߣߎ߲߬߸ ߦߊ߬ߣߴߌ ߦߴߊ߬ ߟߊߖߍ߲ߛߍ߲߫، ߞߊ߬ ߡߐ߰ ߜߘߍ ߡߙߌߦߊ ߓߏ߲߬ߧߊ߬߸ ߤߊߟߌ߬ ߣߴߌߟߋ ߡߙߌߦߊ߫ ߕߴߏ߬ ߘߌ߫، ߞߊ߬ ߡߐ߱ ߟߎ߫ ߘߎ߲߬ߘߎ߬ߡߊ߬ ߝߋ߲ ߠߎ߬ ߟߊߕߊ߲߬ߞߊ߬، ߞߊ߬ ߞߊߘߊ߲߫ ߞߍ߫߸ ߓߟߐߟߐ ߦߋ߫ ߞߍ߫ ߟߊ߬ߞߐ߰ߟߌ߬ ߦߙߐ ߟߋ߬ ߘߌ߫߸ ߞߏ߫ ߞߎߘߊ߫ ߞߎ߲߬ߠߊߞߊ߬ ߦߙߐ ߟߋ߬ ߘߌ߫߸ ߊ߬ ߣߌ߫ ߥߙߎߞߌ ߘߌ߲߬ߞߌߙߊ.>>
ߊ߬ ߞߎߡߊ ߞߊ߲߬ ߕߍ߫ ߦߙߐ ߏ߬ ߘߐߙߐ߲߫ ߘߌ߫ ߞߊ߬ߙߊ߲߬ߘߊ߲ ߠߎ߬ ߦߋ߫ ߘߋ߫߸ ߞߊ߲ߛߊ߲߫ ߞߵߊ߬ ߝߐ߫ ߝߣߊ߫߸ ߞߏ߫ <<ߊߟߎ߫ ߞߊߣߊ߬ ߞߍ߫ ߞߏߘߐߜߍߟߊ߫ ߜߊ߲ߛߊ߲߫ ߘߌ߫ ߦߋ߲߬ ߕߋ߲߬ ߘߋ߬߸ ߊߟߎ߫ ߝߣߊ߫ ߦߋ߫ ߞߍ߫ ߞߏ ߘߏ߫ ߞߍߟߊ ߟߋ߬ ߘߌ߫ ߟߊ߲߬ߓߋ ߞߣߐ߫، ߊߟߎ߫ ߞߊߣߊ߬ ߦߋߟߌ߫ ߞߏ ߞߋߟߋ߲߫ ߟߴߊߟߎ߫ ߞߎ߲߭ ߘߐ߫ ߘߋ߬߸ ߞߏ߬ߣߌ߲߬ ߞߊ߬ ߓߊ߯ߙߊ ߟߋ߬ ߞߍ߫߸ ߞߊ߬ ߞߍ߫ ߤߊߞߟߌߡߊ ߘߝߊߣߍ߲ ߘߌ߫.>> ߊ߬ ߞߵߏ߬ ߝߐ߫.
ߗߋߕߌ߮ ߞߵߊ߬ ߝߐ߫ ߊ߬ ߟߊ߫ ߞߎߡߊ ߘߐ߫߸ ߞߏ߫ ߞߎߡߊ߫ ߘߐߕߌߢߍ ߓߊ߯ ߓߐ߫ ߊ߬ ߘߐ߫߸ ߞߊ߬ ߞߏ߫ ߘߐߜߊߛߌ ߓߐ߫ ߊ߬ ߘߐ߫ ߝߋߎ߫߸ ߞߊ߬ ߞߏ ߝߐ߫ ߊ߬ ߛߌ ߟߊ߫ <<ߊ߬ ߕߴߛߋ߫ ߝߐ߫ ߟߊ߫ ߞߏ߫ ߘߍ߬ߞߙߏߝߏ ߝߊ߲߭ ߓߍ߯ ߟߋ߬ ߞߊ߫ ߢߌ߲߬߸ ߊ߬ ߘߏ߲߬ ߕߴߛߋ߫ ߝߐ߫ ߟߊ߫ ߞߏ߫ ߊ߬ ߡߎ߰ߡߍ ߟߋ߬ ߡߊ߫ ߢߌ߲߬.>>
ߊ߬ ߞߵߊ߬ ߟߊ߫ ߞߎߡߊ ߟߊߓߊ߲߫ ߡߍ߲ ߡߊ߬߸ ߏ߬ ߟߋ ߊ߬ ߝߐ ߘߌ߫߸ ߞߏ߫ ߘߍ߬ߞߙߏߝߏ ߘߌ߫ ߛߋ߫ ߤߙߍ ߘߊ ߟߊߞߊ߬ ߟߊ߫ ߡߐ߰ ߦߋ߫߸ ߡߍ߲ ߓߴߊ߬ ߟߊߓߊ߯ߙߴߊ߬ ߢߌ߬ߡߊ ߟߊ߫߸ ߟߐ߲ߠߌ߲ ߠߊ߫.
ߏ߬ ߘߐ߫߸ ߛߌ߰ ߞߍߣߍ߲߫ ߞߊ߬ ߣߌ߲߬ ߟߏ߲ ߠߋ߬ ߡߊߞߐ߬ߣߐ߲߬ ߛߍ߬ߣߍ߲߬߸ ߣߍߣߍߓߊ ߕߟߋ߬ ߇߸ ߞߊ߲ߞߊ߲߫ ߞߊ߬ߙߊ߲߬ߘߊ߬ߓߊ߫ ߛߊ߭ߡߏ߬ߙߌ߫ ߕߎ߬ߙߋ߬.
