ߘߊ߬ߡߊ߲߬ ߓߊ߯ߙߊ ߟߊߕߐ߲߫ ߞߏ ߞߎߡߊ ߟߋ߬ ߜߊ߬ߣߍ߲߬ ߛߌ߯ߙߌ߲߫ ߕߋ߲߬߸ ߘߊ߬ߡߊ߲߬ ߞߎ߬ߘߎ߲߬ߣߍ߲ ߟߊߣߍ߲ ߕߙߍ߬ߛߍ߬ ߘߊߡߊ߲ ߠߎ߬ ߞߊ߲߬߸ ߊ߬ ߣߌ߫ ߕߙߏ߬ߞߏ ߦߋ߫ ߡߍ߲ ߠߎ߬ ߓߟߏ߫ ߘߊ߬ߡߊ߲ ߞߣߐ߫߸ ߊ߬ ߓߍ߯ ߟߋ߬ ߞߏ߫ ߦߋ߫، ߌߞߏߡߌ߲߬ ߛߌ߯ߙߌ߲߫ ߝߊ߰ߡߊ߬ ߛߌߦߊߡߊ߲߫ ߠߊߘߎ߲ߣߍ߲߫ ߠߋ߬ ߕߋ߲߬߸ ߏ߬ ߞߍ ߡߊ߫ ߡߍ߲߫ ߡߎߣߎ߲߬، ߒ߬ߓߊ߬߸ ߞߊ߬ߝߏ߬ߙߋ߲߬ߕߌ߮ ߣߴߊ߬ ߞߐ ߝߣߊ߫ ߓߘߴߊ߬ ߟߊߛߋ߫߸ ߞߏ߫ ߊ߬ߟߎ߬ ߞߍߕߐ߫ ߟߋ߬ ߜߋ߬ߟߎ߲߬ߠߌ߲߬ ߕߍߕߍߕߍ ߛߌ߰ ߟߊ߫ ߛߋ߲߬ߠߊ߫ ߣߌ߲߬߸ ߖߐ߲߰ߛߊ߫ ߘߊ߬ߡߊ߲ ߘߌ߫ ߟߊߟߐ߬ ߓߍ߯ ߓߟߏ߫߸ ߦߏ߫ ߞߎ߲߬ߠߊ߬ߛߌ߮ ߣߐ߬ ߊ߬ ߝߐ߫ ߟߊ߫ ߢߊ ߡߍ߲ ߡߊ߬.
ߏ߬ ߛߌߟߊ ߟߋ߬ ߝߍ߬߸ ߛߌ߯ߙߌ߲߫ ߛߏߞߣߐߟߊ ߞߊ߬ߝߏ߬ߙߋ߲ ߞߏߟߊߕߍ߮ ߞߊ߬ ߛߏ ߞߌ߲߬ߕߌ߮ ߓߍ߯ ߟߊߘߍ߬߸ ߊ߬ ߣߌ߫ ߞߎ߲߬ߘߊ߬ ߞߎ߲ߕߌ߮ ߟߎ߬ ߣߌ߫ ߘߋ߲ߡߌߛߍ߲߫ ߞߎ߲ߕߌ߮ ߟߎ߬، ߞߏ߫ ߊ߬ߟߎ߬ ߦߋ߫ ߣߊ߬ ߟߊ߬ߤߘߌ ߕߊ߬߸ ߞߊ߬ ߓߍ߲߬ ߘߊ߬ߡߊ߲߬ ߓߊ߯ߙߊ ߟߊߕߐ߲߫ ߞߏ ߓߐ ߡߵߊ߬ ߛߌߟߊ ߝߍ߬.
ߡߟߊ߬ߡߌߣ ߕߙߊߥߟߋ߫ ߡߍ߲ ߦߋ߫ ߞߊ߬ߝߏ߬ߙߋ߲߬ߕߌ߰ ߛߙߍߞߍ ߛߓߊߣߊ߲ ߘߌ߫߸ ߏ߬ ߟߋ ߞߎߡߊ߫ ߘߊ߫ ߞߏ߲߬ߓߏ߫ ߊ߬ߓߎ ߓߌߟߌ߬ ߞߋߕߊ߬ ߣߐ߭ ߘߐ߫، ߏ߬ ߡߊ߫ ߓߎ߬ ߕߏ߫ ߞߟߏ߫ ߡߊ߬߸ ߊ߬ ߘߏ߲߬ ߡߊ߫ ߞߎߡߊ߫ ߡߊߟߍ߬ߟߍ߬߸ ߞߏ߫ ߊ߬ߟߎ߬ ߓߌߣߍ߲߫ ߠߋ߬ ߊ߬ ߢߊ ߖߍ߬ߘߍߖߍ߬ߘߍ ߡߊ߬.
ߊ߬ߟߋ ߟߊ߫ ߝߐߟߌ߫ ߘߐ߫߸ ߘߌ߲߬ߞߌߙߊ ߓߍ߯ ߞߎ߲߬ߕߌ߯ ߟߋ߬ ߞߊ߫ ߞߊ߲߫ ߞߵߊ߬ ߟߐ߬ ߊ߬ ߟߐ߬ ߦߌߟߊ߸ ߦߙߐ߫ ߛߌ߫ ߦߴߊ߬ ߟߊ߫ ߡߊ߬ߙߊ ߞߣߐ߫߸ ߡߐ߰ ߞߊߣߊ߬ ߘߊ߬ߡߊ߲߬ ߓߊ߯ߙߊ߫ ߦߋ߲߬.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ <<ߞߊ߬ߝߏ߬ߙߋ߲ ߕߍߣߊ߬ ߕߏ߫ ߟߊ߫ ߞߎ߲߬ߠߊ߬ߛߌ߮ ߟߊ߫ ߡߙߌߘߐ߫ ߕߊ߬ߣߍ߲ ߞߍ߬ߙߍߝߍ߬ ߝߋߎ߫، ߡߙߌߘߐ߫ ߝߏߦߌ߬ ߕߊ߬ ߘߊ߫ ߞߎ߲߬ߠߊ߬ߛߌ߮ ߓߟߏ߫߸ ߖߊ ߓߍ߯ ߓߕߐ߫ ߟߵߊ߬ ߛߌߟߊ ߝߍ߬ ߘߎ߰ߞߟߏ ߞߊ߲߬.>>
ߞߊ߬ ߞߏ ߓߐ߫ ߝߐ ߘߐ߫ ߞߵߊ߬ ߓߌ߬ߟߊ߬ ߞߍߟߌ ߘߐ߫߸ ߞߊ߬ߝߏ߬ߙߋ߲߬ߕߌ߮ ߦߴߊ߬ ߝߍ߬ ߟߋ߬߸ ߞߊ߬ ߟߊ߬ߤߘߌ߫ ߕߊ߬ߣߍ߲ ߠߎ߬ ߞߍ߫ ߛߓߍ߫ ߞߣߐ߫ ߝߋ߲ ߘߌ߫، ߊ߬ߟߎ߬ ߘߌ߫ ߛߓߍ߫ ߛߓߊ߬ ߟߊߓߐ߫߸ ߞߋߟߋ߲ ߘߌ߫ ߘߌ߫ ߘߌ߲߬ߞߌߙߊ ߟߎ߬ ߞߏߟߊߕߍ߮ ߟߎ߬ ߡߊ߬߸ ߞߊ߬ ߞߋߟߋ߲ ߕߏ߫ ߞߊ߬ߝߏ߬ߙߋ߲ ߞߣߐ߫߸ ߞߵߊ߬ ߕߐ߬ ߞߋߟߋ߲ ߕߏ߫ ߊ߬ߟߎ߬ ߝߣߊ߫ ߞߎ߲߬ߠߊߛߌ߰ߓߊ߮ ߟߎ߬ ߓߟߏ߫. ߝߣߊ߫߸ ߊ߬ߟߎ߬ ߘߌ߫ ߕߏ߫ ߗߋߦߊߟߌ ߟߊߥߟߌ߬ ߟߊ߫ ߛߐ߲߬߸ ߞߊ߬ ߥߊ߫ ߘߏ߲߬ ߞߌ߲߬ߘߊ ߟߎ߬ ߞߣߐ߫߸ ߞߎ߲߬ߘߊ ߟߎ߬ ߟߊ߫߸ ߊ߬ ߣߌ߫ ߣߐ߬ߘߎ߮ ߟߎ߬ ߘߐ߫߸ ߞߵߊ߬ ߡߊߝߟߍ߫ ߣߴߊ߬ ߞߏ ߦߋ߫ ߓߐ߫ ߟߴߊ߬ ߛߌߟߊ ߝߍ߬.
ߞߊ߬ߝߏ߬ߙߋ߲߬ߕߌ߰ ߛߓߊߣߊ߲ ߞߵߊ߬ ߖߊ߬ߛߙߋ߫߸ ߞߏ߫ ߣߌ߫ ߖߋ߬ߓߌ߬ߦߊ߬ߟߊ ߡߍ߲ ߡߴߊ߬ߟߎ߬ ߞߎߡߊ߫ ߞߊ߲ ߡߊߓߏ߲߬ߧߊ߬߸ ߓߌ߬ߟߊ߬ ߘߌ߫ ߞߍ߫ ߏ߬ ߕߌ߰ ߞߐ߫ ߛߊ߬ߙߌ߬ߦߊ߬ ߛߌߟߊ ߝߍ߬.
ߎߡߊߙߎ߫ ߞߋߕߊ߬ ߦߋ߫ ߘߎ߰ߕߌ߮ ߘߏ߫ ߟߋ߬ ߘߌ߫߸ ߊ߬ ߣߌ߫ ߣߐ߬ߘߎ߰ ߁߆ ߓߍ߯ ߘߎ߰ߕߌ߮ ߟߎ߬ ߟߊ߫ ߓߋߟߋ߲ߕߌ߮߸ ߊ߬ߟߋ߫ ߞߵߊ߬ ߞߊ߲ߠߊߘߌ߫ ߘߎ߰ߘߋ߲ ߠߎ߫ ߡߊ߬߸ ߞߏ߫ ߊ߬ߟߎ߬ ߦߋ߫ ߘߊ߬ߡߊ߲߬ ߠߊ߬ߟߐ߬ ߞߏ ߣߌ߲߬ ߡߌ߬ߣߊ߫ ߛߍ߬ߓߍ ߟߊ߫، ߊ߬ ߞߵߊ߬ ߝߐ߫ ߞߏ߫ ߞߎ߲߬ߢߐ߲߯ ߝߌ߬ߟߊ ߞߣߐ߫߸ ߊ߬ߟߎ߬ ߟߊ߫ ߢߐ߲߯ ߠߊߘߍ ߛߋ߲߬ߢߊ߬ ߛߓߊߣߊ߲ ߠߋ߬ ߕߋ߲߬߸ ߞߎߡߊ߫ ߞߋߟߋ߲ ߢߌ߲߬ ߞߊ߲߬.
ߊ߬ ߞߵߊ߬ ߦߌ߬ߘߊ߬ ߞߏ߫߸ ߡߙߌߘߐ ߡߍ߲ ߕߊ߬ߣߍ߲߫ ߞߎ߲߬ߠߊ߬ߛߌ߮ ߓߟߏ߫߸ ߊ߬ ߟߐ߬ߣߍ߲߬ ߕߍ߫ ߛߌߦߊ߫ ߞߋߟߋ߲߫ ߡߊ߬߸ ߊ߬ ߘߏ߲߬ ߟߐ߬ߣߍ߲߬ ߕߍ߫ ߖߡߊ߬ߣߊ߬ ߞߋߟߋ߲߫ ߡߐ߰ ߡߊ߬߸ ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߡߙߌߘߐ ߏ߬ ߟߐ߬ߣߍ߲߫ ߘߊ߬ߡߊ߲ ߓߊ߯ߙߟߊ ߓߍ߯ ߟߋ߬ ߡߊ߬ ߛߌ߯ߙߌ߲߫ ߖߡߊߣߊ ߞߊ߲߬.
ߘߎ߰ߕߌ߮ ߟߎ߬ ߟߊ߫ ߓߋߟߋ߲ߕߌ߮ ߞߵߊ߬ ߞߙߊ ߟߊߛߋ߫ ߖߡߊ߬ߣߊ߬ ߜߘߍ ߡߐ߱ ߟߎ߬ ߟߊ߫ ߞߏ ߡߊ߬߸ ߡߍ߲ ߠߎ߬ ߦߋ߫ ߘߊ߬ߡߊ߲߬ߛߋ߲ ߞߊ߲߬ ߊ߬ߟߎ߫ ߝߍ߬ ߦߋ߲߬߸ ߣߴߊ߬ߟߎ߬ ߓߐߣߍ߲߫ ߖߡߊ߬ߣߊ߬ ߜߘߍ߫ ߞߣߐ߫߸ ߦߏ߫ ߛߣߍ߬ߜ߭ߊߟߌ߫ ߣߌ߫ ߓߙߎߞߌߣߊ߫ ߝߊ߬ߛߏ߬߸ ߞߏ߫ ߓߍ߯ ߦߴߊ߬ ߞߊߘߊ߲߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߡߙߌߘߐ ߡߊߓߏ߲߬ߧߊ߫ ߞߵߊ߬ ߓߐ߫ ߊ߬ ߛߌߟߊ ߝߍ߬.
ߞߊ߬ߝߏ߬ߙߋ߲ ߘߏ߲߬ߞߏ ߟߎ߬ ߟߊ߫ ߢߐ߲߯ߦߋ ߣߌ߲߬ ߞߍߣߍ߲߫ ߠߋ߬ ߕߋ߲߬߸ ߞߵߊ߬ ߛߐ߬ߘߐ߲߬ ߊ߬ ߡߊ߫ ߡߍ߲߫ ߡߎߣߎ߲߬߸ ߛߌ߯ߙߌ߲߫ ߡߊ߬ߡߙߊ߬ߟߌ ߞߏߟߊߕߍ߮ ߡߐ߰ ߂߃ ߟߊߘߎ߲߫ ߘߊ߫߸ ߞߎ߲߬ߠߊ߬ߛߌ߰ߟߊ߫ ߘߍ߲߬ߞߍ߲߬ߕߎ߲߬ߣߍ߲ ߦߴߏ߬ ߟߋ ߘߐ߫߸ ߡߙߊ߬ߓߊ߯ ߘߍ߲߬ߞߍ߲߬ߕߎ߲߬ߣߍ߲ ߠߎ߬߸ ߊ߬ ߣߌ߫ ߡߙߊ߬ߓߊ߰ߘߎ߰ߟߊ߬ ߛߌߦߊߡߊ߲߫.
ߞߊ߬ߝߏ߬ߙߋ߲ ߓߘߊ߫ ߓߍ߯ ߟߊߛߏ߬ߓߌ߬߸ ߞߊ߬ ߓߍ߯ ߟߐ߬ ߟߊ߬ߤߘߌ ߕߊ߬ ߟߊ߫ ߞߵߏ߬ ߞߍ߫ ߓߍ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߜߋ߬ߟߎ߲߬ߠߌ߲ ߛߌ߰ߕߐ߫ ߟߋ߬ ߛߋ߲߬ߠߊ߫ ߝߣߊ߫، ߏ߬ ߟߵߊ߬ ߦߌ߬ߘߊ߬ ߟߊ߫߸ ߞߏ߫ ߛߌ߯ߙߌ߲߫ ߞߊ߬ߝߏ߬ߙߋ߲ ߕߴߊ߬ ߝߍ߬ ߞߵߊ߬ ߕߏߟߏ߲߫ ߞߎ߲߬ߠߊ߬ߛߌ߮ ߟߊ߫ ߡߙߌߘߐ߫ ߕߊ߬ߣߍ߲ ߢߌ߲߬ ߠߊ߫߸ ߞߊ߬ ߓߍ߲߬ ߘߊ߬ߡߊ߲ ߠߎ߬ ߟߊߟߐ߬ ߞߏ ߡߊ߬߸ ߊ߬ ߣߌ߫ ߟߊ߬ߡߌߣߌ߲ ߟߊߞߊ߲ߘߊ߫ ߞߏ ߡߊ߬.
