ߡߊ߬ߟߏ߬ ߓߘߐ߫ ߃߀߀ ߣߌ߫ ߝߊ߰ߣߌ߲߫ ߞߊ߲߬ߓߍ߲߫ ߃߀߀߸ ߏ߬ ߟߋ ߘߐߝߘߊߣߍ߲߫ ߡߐ߰ߦߊ ߡߊߘߍ߬ߡߍ߲ ߛߌ߲ߘߌߘߊ߫ ߡߊ߲߬ߕߏ߲߬ߕߍ߬ߟߊ߬ߞߊ߫ ߛߎ߬ߟߋ߬ߡߊ߯ߣ ߛߊ߬ߞߐ ߓߟߏ߫߸ ߞߵߊ߬ ߞߍ߫ ߟߐ߬ߦߙߌ߬ߕߐ ߟߎ߬ ߡߊߘߍ߬ߡߍ߲ ߘߌ߫، ߣߌ߲߬ ߞߏ ߞߍ߫ ߘߊ߫ ߞߊ߲ߞߊ߲߫ ߛߌ߬ߟߡߊ߬ߦߊ ߕߊ߲ߓߊ߲ ߠߋ߬ ߟߊ߫߸ ߞߊ߯ߙߌߟߏ߲ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߂߅ ߡߊ߬.
ߝߊߙߌߕߊߣߍ߲ ߠߎ߬߸ ߡߛߏ߬ ߜߐ߯ (ߡߏ߬ߛߏ߫ ߗߍ߬ ߛߊ߬ߓߊ߰ߕߐ) ߟߎ߬߸ ߊ߬ ߣߌ߫ ߘߋ߲ߡߌߛߍ߲߫ ߞߎ߬ߙߣߊ߬ ߘߙߎ߬ߛߌ߬ߟߊ ߟߎ߬߸ ߏ߬ ߟߎ߫ ߣߐ߬ ߓߐߒߝߘߎߘߐ߫ ߟߋ߬ ߛߐ߬ߘߐ߲߬ ߠߊ߫߸ ߡߍ߲ ߘߌ߫ ߘߴߊ߬ߟߎ߫ ߡߊ߬ ߛߌ߲ߘߌߘߊ ߕߐ߯ ߘߐ߫، ߊ߬ ߟߊߕߊ߬ߡߌ߲߬ ߘߴߊ߬ߟߎ߫ ߡߊ߬ ߖߌ߯ߓߊ ߛߘߌ߬ߓߋ߫ ߟߋ߬ ߓߟߏ߫ ߛߌ߲ߘߌߘߊ߫ ߛߎ߬ߟߋ߬ߡߊ߯ߣ ߛߊ߬ߞߐ ߕߐ߯ ߘߐ߫߸ ߖߌ߯ߓߊ ߏ߬ ߟߋ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߛߌ߬ߟߡߊ߬ ߘߍߞߙߍ ߟߎ߬ ߟߊ߫ ߘߏ߲߬ߖߟߎ߬ߡߊ߬ߘߊ ߘߏ߲߬ߖߟߎ߬ߡߊ߬ߟߌ߬ߟߊ ߘߌ߫.
ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫: <<ߓߌ߬߸ ߊ߲ ߓߊߘߋ߲ߡߊߗߍ߫ ߟߊ߱ߖߌ߬ ߛߎ߬ߟߋ߬ߡߊ߯ߣ ߛߊ߬ߞߐ߫߸ ߊ߬ ߡߙߌߦߊ ߛߋߣߍ߲߫ ߓߌ߬ ߢߐ߲߰ ߟߏ߲߫߸ ߘߛߍߓߊ߯ߕߐ ߟߎ߫ ߟߋ߬ ߡߊ߬߸ ߊ߬ ߣߴߊ߲ ߠߊ߫ ߞߎ߬ߙߣߊ߬ ߘߙߎ߬ߛߌ߬ߟߊ ߟߎ߬߸ ߊ߬ ߣߴߊ߲ ߠߊ߫ ߗߍ߬ ߛߊ߬ ߡߛߏ ߟߎ߬߸ ߊ߬ ߣߌ߫ ߝߊߙߌߕߊߣߍ߲ ߠߎ߬߸ ߞߊ߬ ߏ߬ ߟߎ߬ ߥߟߋ߫ ߓߌ߬ ߢߐ߲߰ ߟߏ߲߫ ߞߊ߬ ߞߊ߲߬ߓߍ߲߫ ߗߍ߬ߡߍ߫ ߛߓߊ߬ ߘߞߐߝߘߊ߫߸ ߞߊ߬ ߓߊ߲߫ ߝߣߊ߫ ߞߊ߬ ߡߊ߬ߟߏ߬ ߓߘߐ߫ ߗߍ߬ߡߍ߫ ߛߓߊ߬ ߘߐߝߘߊ߫ ߊ߬ߟߎ߬ ߣߌ߫ ߢߐ߲߯ ߕߍ߫.>> ߎ߬ߛߑߕߊ߯ߖ߭ ߖߌ߯ߓߊ߫ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߝߣߊ߫߸ ߢߌ߲߬ ߠߊߥߟߌ߬ߣߍ߲߫ ߘߎ߬ߥߊ߬ߥߎ ߟߋ߬ ߡߊ߬ ߖߡߊ߬ߣߊ ߞߊ߲ߕߌ߮ ߦߋ߫: <<ߞߏ߫ ߞߊ߬ ߣߊ߬ ߓߌ߬ ߢߐ߲߰ ߟߏ߲߫߸ ߞߊ߬ ߘߎ߬ߥߊ߬ߥߎ ߞߍ߫ ߖߡߊ߬ߣߊ ߡߊ߲߬ߛߊ߬ߗߍ ߢߍ߫߸ ߊ߬ ߦߋ߫ ߓߊ߯ߙߊ߫ ߛߓߍ ߡߍ߲ ߠߎ߬ ߞߊ߲߬߸ ߞߏ߫ ߛߴߊߟߊ߫ ߘߴߏ߬ ߛߓߊ߬ߕߌ߫ ߊ߬ ߓߟߏ߫.>>
ߞߊ߲ߞߊ߲߫ ߕߊ ߣߌ߲߬ ߞߍߣߍ߲߫ ߓߊ߯ߙߊ ߣߌ߲߬ ߛߋ߲߬ߢߊ߬ ߟߏ߯ߟߎߣߊ߲ ߠߋ߬ ߘߌ߫߸ ߓߊߏ߬ ߊ߬ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߞߏ߲ߞߏߘߓߌ ߕߋ߬ߟߋ߫ ߂߀ ߠߋ߬ ߡߊ߬߸ ߦߙߐ߫ ߛߌߦߊߡߊ߲߫ ߓߘߊ߫ ߞߍ߫߸ ߦߏ߫ ߞߐߣߊߞߙߌ߫߸ ߘߎ߬ߓߙߋߞߊ߬߸ ߞߛߌ߬ߘߎ߯߸ ߝߙߊߣߊ߫߸ ߊ߬ ߣߌ߫ ߒߛߙߍߜߘߍ߬. ߞߊ߬ߕߎ߲߯߸ ߛߌ߲ߘߌߘߊ ߞߊ߲߫ ߞߏ߫ ߊ߬ߟߎ߬ ߟߊ߫ ߛߐߟߌ ߓߘߊ߫ ߛߋ߫ ߡߐ߰ ߖߊ߬ߕߋ ߡߍ߲ ߡߊ߬߸ ߏ߬ ߟߋ ߡߐ߰ ߄ ߈߀߀ ߘߌ߫߸ ߡߙߊ߬ߘߓߊ߬ ߟߏ߯ߟߎ߫ ߖߊ߬ߕߋ߬ ߞߣߐ߫.
ߞߐߦߌߘߊߓߊ߮ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߝߐ߫ ߞߎ߲ ߠߋ߬ ߞߏ߫ ߛߌ߲ߘߌߘߊ߫ ߡߊ߲߬ߕߏ߲߬ߕߍ߬ߟߊ߬ߞߊ߸ ߓߊߏ߬߸ ߖߡߊ߬ߣߊ ߞߣߐߟߊ ߣߴߊ߬ ߞߐߞߊ߲ߠߊ ߓߍ߯ ߟߋ߬ ߟߊ߫ ߞߏ ߦߋ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߊ߬ ߞߊ߬ ߡߍ߲߬ ߢߐ߲߰ ߠߋ߬ ߝߣߊ߫ ߞߍ߫ ߡߊ߬ߟߌ ߟߊ߫ ߛߊߙߏ߲߬، ߣߴߊ߲ ߞߵߊ߬ ߡߊߝߟߍ߫߸ ߞߟߍ߬ ߓߊ߲ߓߊߟߌ ߕߍ߬ߘߍ߫ ߡߊ߬ߟߌ ߟߊ߫ ߛߊߙߏ߲߬߸ ߞߐ߲ߞߐ ߘߏ߲߬ ߘߊ߫߸ ߛߍ߱ ߘߏ߲߬ ߘߊ߫߸ ߕߙߐߦߊ ߘߏ߲߬ ߘߊ߫، ߓߊߘߋ߲ߡߊ ߥߊ߫ ߘߊ߫ ߘߍ߬ߡߍ߲ ߡߍ߲߬ ߠߊߛߋ߫ ߡߊ߬ߟߌ߬ߞߊ ߟߎ߫ ߡߊ߬، ߞߵߊ߬ ߦߌߘߊߞߊ߬ ߞߏ߫ ߖߌ߬ߣߍ߬ ߣߌ߫ ߡߊ߬ߟߌ ߦߋ߫ ߝߍ߫ ߞߋߟߋ߲ ߞߣߐ߫ ߞߌߛߍ ߟߋ߬ ߘߌ߫.>> ߊ߬ ߞߵߏ߬ ߝߐ߫.
ߌߞߏߡߌ߲߬ ߘߌ߯ߣߊ ߡߊߘߞߍ߬ߡߍ߲ ߣߌ߫ ߡߐ߰ߦߊ ߡߊߘߍ߬ߡߍ߲ ߠߋ߬߸ ߛߌ߬ߟߡߊ߬ߦߊ ߞߎߡߊ߫ ߘߊ߫ ߟߋ߬ ߣߌ߲߬ ߞߏ߫ ߛߎ߮ ߞߊ߲߬، ߏ߬ ߟߋ ߘߐ߫߸ ߖߌ߯ߓߊ ߛߘߌ߬ߓߋ߫ ߞߵߊ߬ ߦߌ߬ߘߊ߬ ߞߏ߫ ߣߌ߲߬ ߦߋ߫ ߓߏ߲߬ߓߊ߫ ߟߋ߬ ߘߌ߫: <<ߛߌ߬ߟߡߊ߬ߦߊ ߞߊ ߓߊ߯ߙߊ߫ ߛߍߎ߮ ߣߌ߲߬ ߞߐߞߘߐߛߊ߫ ߟߋ߬، ߓߊߏ߬߸ ߣߴߌ ߞߵߊ߬ ߡߍ߲߫ ߞߏ߫ ߤߊߛߘߌߦߊ ߦߋ߫ ߓߊ߲߫ ߠߊ߫ ߖߡߊ߬ߣߊ ߞߣߐ߫߸ ߊ߬ ߛߓߊߓߎ ߘߏ߫ ߟߋ߬ ߡߍ߲߬ ߠߎ߬ ߘߌ߫، ߣߌ߫ ߣߊ߲߬ߝߟߏ߬ ߕߌ߮ ߟߎ߫ ߢߊ߬ ߘߊ߫߸ ߖߡߊ߬ߣߊ ߡߊ߲߬ߛߊ ߟߎ߫ ߞߎ߲߬ߘߏߣߌ߲ ߘߌ߫ ߝߍߦߊ߫߸ ߡߐ߰ ߞߏ߬ߙߏ߲߬ ߞߏ ߘߌ߫ ߡߊߘߐ߯ߦߊ߫.>>
ߊ߬ ߞߵߊ߬ ߟߊ߫ ߞߎߡߊ ߞߎ߲߬ߘߏ߲ ߞߍ߫ ߊ߬ ߝߐ ߟߋ߬ ߘߌ߫߸ ߞߏ߫ ߝߊ߰ߡߊ ߟߎ߬ ߦߴߊ߬ߟߎ߬ ߢߊ ߕߏ߫ ߛߊ߬ߞߍ߬ߗߍ ߝߍ߬، <<ߊ߲ ߧߴߊ߬ ߢߌߣߌ߲߫ ߠߴߊ߲ ߠߊ߫ ߡߊ߲߬ߛߊ߬ߗߍ ߝߍ߬߸ ߊ߬ ߝߣߊ߫ ߞߊ߫ ߞߊ߲߫ ߞߵߊ߬ ߖߊ߲߬ߕߏ߫ ߡߐ߰ ߛߎ߮ ߡߍ߲ ߠߎ߬ ߘߐ߫߸ ߡߍ߲ ߠߎ߬ ߦߋ߫ ߘߍ߬ߡߍ߲ ߞߍ߫ ߟߴߊ߬ ߞߊ߲ߞߕߐߡߊ߬߸ ߞߵߊ߬ ߛߐ߬ߘߐ߲߬ ߊ߬ ߕߴߊ߬ ߞߊ߬ߟߊߡߊ߬.>>
ߡߍ߲ ߠߎ߬ ߞߊ߬ ߘߏ߫ ߛߐ߬ߘߐ߲߫ ߡߊ߬ߟߏ߬ ߓߘߍ ߣߌ߫ ߝߊ߰ߣߌ߲ ߘߐ߫߸ ߏ߬ ߘߏ߫ ߟߋ߬ ߤߊߖߊ߬ ߊߦߌߛ߭ߊ߬ ߎ߬ߟߊ߬ߙߋ ߘߌ߫߸ ߊ߬ߟߋ ߟߋ߬ ߦߋ߫ ߘߋ߲ߣߍ߲ ߠߎ߫ ߖߌ߱ ߝߟߊߕߐߛߏ ߜߙߋ߬ߡߊߕߍ߰ߓߊ߮ ߘߌ߫، ߊ߬ߟߋ ߝߣߊ߫ ߞߊ߬ ߡߊ߬ߟߏ߬ ߓߘߐ߫ ߂߀ ߣߌ߫ ߞߊ߲߬ߓߍ߲߫ ߂߀ ߠߋ߬ ߛߐ߬ߘߐ߲߬، ߊ߬ߟߋ ߟߊ߫ ߡߊ߬ߟߏ߬ ߞߏ ߣߌ߲߬ ߞߍ߫ ߘߊ߫ ߕߏ߭ ߟߋ߬ ߓߋ߬ߣߍ߲ ߘߌ߫ ߊ߬ ߛߎ߫ ߣߊ ߘߐ߫، ߓߊߏ߬߸ ߞߊ߬ ߞߐ߲߰ ߡߊ߬ߟߏ߬ ߘߐ߬ߝߘߊ ߣߌ߲߬ ߢߍ߫߸ ߝߊߙߌߕߊߣߍ߲ ߘߏ߫ ߟߎ߫ ߕߎ߲߬ ߓߘߊ߫ ߓߐ߫ ߘߎ߰ߣߍ߲ ߘߏ߫ ߟߊ߫ ߞߊ߬ ߣߵߊ߬ ߘߴߊ߬ ߡߊ߬߸ ߊ߬ ߞߣߐ߬ߘߐߝߟߌ߬ߣߍ߲߫ ߕߘߍ߬ ߡߍ߲ ߠߎ߬ ߘߌ߫ ߞߏߛߓߍ߫.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫: <<ߒ ߓߊ߲߫ ߛߊ߲ ߦߋ߫ ߝߊߙߌߕߊߣߍ߲߫ ߡߐ߰ ߕߊ߲߫ ߠߋ߬ ߟߊߛߐ߬ߘߐ߲߬ ߠߊ߫ ߕߋ߲߬߸ ߞߊ߬ ߓߐ߫ ߛߏ ߘߏ߫ ߟߊ߫، ߊ߬ߟߎ߫ ߣߊ߬ ߘߴߏ߬ ߘߌ߫ ߒ ߡߊ߬ ߞߎߣߎ߲߬، ߒ ߕߎ߲߬ ߡߴߊ߬ ߟߐ߲߫ ߒ ߘߴߊ߬ ߞߍ߫ ߢߊ߫ ߛߌ߫ ߡߊ߬߸ ߒ ߘߏ߲߬ ߕߴߛߋ߫ ߓߟߏ߫ ߓߐ߫ ߟߴߊ߬ߟߎ߬ ߞߘߐ߫.>> ߡߏ߬ߛߏ ߛߍߥߊߣߍ߲ ߞߵߏ߬ ߝߐ߫.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߣߌ߫ ߒߠߋ ߓߘߊ߫ ߣߊ߬ ߡߊ߬ߟߏ߬ ߓߘߐ߫ ߂߀ ߣߌ߫ ߝߊ߰ߣߌ߲߫ ߞߊ߲߬ߓߍ߲߫ ߂߀ ߛߐ߬ߘߐ߲߫ ߏ߬ ߘߐ߫߸ ߞߵߊ߬ ߘߌ߫ ߘߋ߲ߣߍ߲ ߠߎ߬ ߡߊ߬، ߒ ߕߴߛߋ߫ ߘߏ߫ ߜߘߍ߫ ߝߐ߫ ߟߊ߫ ߓߊߙߌߞߊ ߞߐ߫߸ ߊ߬ߟߎ߬ ߣߌ߫ ߗߋ߫߸ ߘߊ߲߬ ߕߍ߫ ߌ ߣߌ߫ ߗߋ ߡߍ߲ ߠߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.
