ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߅ ߘߓߊ߬ߓߌߟߊ ߕߋ߬ߟߋ߫ ߉߸ ߜߋ߲ߞߐ߰ߖߌ߬ߘߊ ߓߍ߯ߦߊ ߞߙߎߞߊ ߣߌ߫ ߝߘߊ߬ߝߌ߲߬ߠߊ߫ ߡߌ߬ߙߌ߲߬ߘߌ߬ ߞߙߎߞߊ ߟߎ߬ ߛߍ߬ߘߏ߲߬ߠߊ ߟߎ߬ ߓߣߍ߲߫ ߠߋ߬ ߝߏ߲߬ߘߏ ߞߊ߲߬߸ ߊ߬ߟߎ߬ ߟߊ߫ ߞߎ߲߬ߕߌ߮ ߟߎ߬ ߟߊ߫ ߞߟߌߟߌ ߟߊߡߌ߬ߘߊ ߘߌ߫ ߖߐ ߕߊ߯ߡߊ ߘߐ߫، ߢߌߣߌ߲ߞߏ ߡߍ߲ ߦߴߊ߬ߟߎ߬ ߟߊ߫: ߞߵߊ߬ߟߎ߬ ߡߊߝߐߦߌ߲ߝߐߦߌ߲߫ ߖߡߊ߬ߣߊ ߜߟߍ߬ߦߊ ߞߘߐ߫߸ ߞߏ߫ ߊ߬ߟߎ߬ ߡߊ߫ ߛߐ߲߬ ߞߊ߲ߕߌ߯ ߊߟߛߊߣ ߥߊߕߙߊ߫ ߟߊ߫ ߟߐ߬ߒ߬ߞߋ߬ߟߊ߬ ߣߊ߯ߣߌ߲ߣߊ߲ ߡߊ߬߸ ߊ߬ ߞߏ߫ ߝߏ߫ ߊ߬ߟߎ߬ ߟߊ߫ ߥߊ߬ߣߊ ߟߎ߬ ߕߐ߮ ߦߋ߫ ߟߊߘߏ߲߬ ߠߋ߬ ߛߓߍ ߘߐ߫ ߌߞߐ߫߸ ߣߊߟߌ߬ߡߎ߲߬ ߟߏߙߊ߲߫ ߜߊ߬ߜߏ߬ ߣߌ߫ ߕߌ߬ߖߊߣ ߗߊߡ ߘߌ߫߸ ߞߵߏ߬ ߟߎ߬ ߕߐ߮ ߟߊߛߊ߬ߦߌ߲߬ ߢߣߊߕߊߟߌ߫ ߛߙߍߘߍ ߘߐ߫.
ߊ߬ߟߎ߬ ߟߊ߫ ߓߐߟߌ߫ ߞߏ ߣߌ߲߬ ߕߎ߲߬ ߟߐ߯ߟߊ߫ ߘߊ߫ ߞߵߊ߬ ߕߏ߫ ߘߓߊ߬ߓߌߟߊ ߣߌ߲߬ ߕߋ߬ߟߋ߫ ߂ ߟߋ߬ ߟߊ߫߸ ߏ߬ ߓߐ߫ ߘߴߊ߬ ߡߊ߬، ߓߊߏ߬߸ ߝߊ߰ߡߊ ߟߎ߫ ߕߎ߲߬ ߡߊ߫ ߘߌ߬ߢߍ߫ ߏ߬ ߞߍ߫ ߞߏ ߡߊ߬߸ ߞߵߏ߬ ߞߎ߲߭ ߞߍ߫ ߊ߬ ߣߌ߫ ߖߡߊ߬ߣߊ ߟߊ߫ ߖߘߍ߬ߕߌ߰ߦߊ߬ ߛߊߟߌ ߛߎ߬ߘߎ߲߬ߧߊ ߘߌ߫ ߢߐ߲߮ ߠߊ߫ ߜߐߞߎ߫، ߕߎ߬ߡߘߊ߬ ߞߎߘߊ ߡߍ߲ ߝߐ߫ ߘߊ߫ ߏ߬ ߘߐ߫ ߛߊ߫߸ ߏ߬ ߟߋ ߓߌ߬ ߞߍ߲ߘߍߟߏ߲ ߣߌ߲߬ ߘߌ߫߸ ߏ߬ ߘߏ߲߬ ߡߊ߫ ߓߐ߫ ߊ߬ ߡߊ߬ ߜߘߍߞߍ߫ ߏ߬ ߞߐ߫߸ ߊ߬ߟߎ߬ ߝߣߊ߫ ߖߌ߰ ߘߊ߫ ߛߌߟߊ߫ ߞߊ߲߬߸ ߡߍ߲ ߓߌ߬ߟߊ߬ ߘߴߊ߬ߟߎ߬ ߞߘߐ߫߸ ߣߴߏ߬ ߦߋ߫ ߛߊߖߘߌߓߊ߫ ߝߊ߲߬ߝߍ߬ߟߊ ߘߌ߫߸ ߞߊ߬ ߕߊ߯ ߝߌߞߑߜ߭ߊߦߏ߫ ߜߍߓߊ ߡߊ߬.
ߓߌ߬ ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߖߊ߬ߡߊ߫ ߞߐ߬ߙߐ߲ߜߐ߲߬ߜߐ߲ ߓߐ߫ ߘߊ߫ ߞߊ߬ ߓߎߟߋߝ߭ߊߙ ߘߋ߫ ߟߊ߫ ߛߏߟߌߘߊߙߌߕߋ ߡߌ߬ߘߊ߬߸ ߏ߬ ߡߍ߲ ߓߟߏߕߍ߰ ߘߊ߫ ߓߏ߬ߙߌ߬ߝߋ߲߬ߕߌ߮ ߟߎ߬ ߦߋ߫߸ ߞߵߊ߬ ߕߊ߬ ߕߊߥߎߟߋ߲ ߠߊ߫ ߕߍߙߑߡߌߣߎ߳ߛ ߞߊ߯ߙߊ߲ߕ ߡߊ߬߸ ߞߵߊ߬ ߛߌ߰ ߝߌߞߑߜ߭ߊߦߏ߫ ߟߊ߫، ߊ߬ ߝߐ߫ ߘߊ߫ ߓߏ߬ߙߌ߬ߝߋ߲߬ߕߌ߮ ߟߎ߬ ߦߋ߫߸ ߞߏ߫ ߓߎߟߋߝ߭ߊߙ ߟߊ߲ߖ߭ߏߣߌ߫ ߞߎ߬ߟߌߓߊ߬ߟߌ߫ ߡߌ߬ߘߊ߬߸ ߊ߬ ߣߌ߫ ߛߊߓߟ ߜ߭ߊ߲ߘߌ߫߸ ߞߵߊ߬ ߛߌ߰ ߊߝ߭ߋߣߎ߳ ߋ߬ߡߌߟ ߓߙߎ߫ ߟߊ߫߸ ߥߟߊ߫ ߓߍߟ ߍߙ ߛߊߔߍߙ ߔߐ߲ߔߌߦߋ، ߕߐ߲߫ ߓߟߏߡߊ ߟߎ߬ ߞߍ߫ ߘߊ߫ ߟߋ߬ ߞߊ߬ ߦߋ߲߬ ߠߎ߬ ߡߌ߬ߘߊ߬ ߞߏߛߓߍ߫߸ ߞߊ߬ ߡߊ߬ߕߊ߰ߡߊ߬ߟߌ ߣߌ߲߬ ߞߍ߫ ߖߐ ߞߣߐ߫߸ ߛߊ߫ ߓߌ߬ߟߊ߬ߒ߬ߘߐ߬ ߜߘߍ߫ ߞߊߣߊ߬ ߓߌ߬ߟߴߊ߬ߟߎ߫ ߛߋ߲߬ߘߐ߫.
ߘߎ߲ߕߊ ߟߎ߬ ߦߴߊ߬ߟߎ߬ ߕߍ߯ ߞߘߐ߫߸ ߖߐ߬ߟߋ߲ ߠߎ߬ ߦߴߊ߬ߟߎ߬ ߞߊ߲ߠߊ߫߸ ߊ߬ ߣߴߊ߬ߟߎ߬ ߟߊ߫ ߞߙߎߞߊ߫ ߝߊ߯ߣߌ߲ ߠߎ߬߸ ߊ߬ߟߎ߬ ߦߋ߫ ߞߎߡߊ ߞߊ߲߬ ߓߍ߲߬ߞߊ߲߬ߡߊ ߟߎ߬ ߘߌ߫߸ ߞߏ߫ ߝߋ߲ ߠߎ߬ ߛߐ߲߬ߞߐ ߓߘߊ߫ ߦߟߍ߬߸ ߛߣߍ߬ߞߍ߬ߟߊ ߟߎ߫ ߛߊ߬ߙߊ ߓߘߊ߫ ߟߊߛߎߡߦߊ߫߸ ߊ߬ߟߎ߬ ߟߊ߫ ߥߊ߬ߣߊ ߟߎ߬ ߓߘߊ߫ ߛߋ߲߬ߓߐ߫ ߂߀߂߅ ߞߊ߲ߕߌ߯ ߢߣߊߕߊߟߌ ߘߐ߫.
߂߀߂߅ ߞߏ߲ߞߏߘߓߌ ߕߋ߬ߟߋ߫ ߂߂ ߡߊ߬߸ ߊߓߌߖߊ߲߬ ߞߕߌߘߊ ߦߌߟߡߊ߫ ߝߟߐ ߞߊ߬ ߕߌ߬ߖߊߣ ߗߊߡ ߛߋ߲߬ߓߐ߫ ߢߣߊߕߊߟߌ߫ ߞߐߕߐ߮ ߘߐ߫߸ ߊ߬ߟߋ ߡߍ߲ ߦߋ߫ ߜߋ߲ߞߐ߰ߖߌ߬ߘߊ ߞߙߎߞߊ ߞߊ߲ߕߌ߮ ߘߌ߫، ߓߊߏ߬߸ ߞߏ߫ ߊ߬ ߓߘߊ߫ ߝߐ߫ ߜߋ߲ߞߐ߰ߖߌ߬ߘߊ ߝߊ߬ߛߏ߬ߦߊ߬ ߛߓߍ ߟߊ߫߸ ߏ߬ ߡߍ߲ ߞߎߡߊ ߟߊߕߍ߰ߣߍ߲߫ ߝߊ߬ߛߏ߬ߦߊ ߛߊ߬ߙߌ߬ߦߊ߬ߛߎ߲ ߕߐ߲ߛߋ߲ ߂߈߲ ߞߣߐ߫، ߟߏߜߊ߲߫ ߜߊ߬ߜߏ߬ ߡߍ߲ ߝߣߊ߫ ߦߋ߫ ߜߋ߲ߞߐ߰ߖߌ߬ߘߊ ߟߊ߫ ߊߝߙߌߞߌ߬ ߡߌ߬ߙߌ߲߬ߘߌ߬ ߞߙߎߞߊ ߜߙߋ߬ߡߊ߬ߕߍ߰ߓߊ߮ ߘߌ߫߸ ߊ߬ߟߋ߬ ߞߏ߫ ߞߋߟߋ߲ ߠߋ߬ ߞߵߏ߬ ߝߣߊ߫ ߛߐ߬ߘߐ߲߬߸ ߞߵߊ߬ߟߎ߫ ߝߌ߬ߟߊ ߓߍ߯ ߛߋ߲߬ߓߐ߫ ߞߊ߲ߕߌ߯ ߢߣߊߕߊߟߌ ߘߐ߫ ߘߏߦߌ߲߫.
ߘߎ߲ߕߊ ߟߎ߬ ߡߊߛߓߍߣߍ߲߫ ߞߏ߫ ߞߏ߫ ߓߊ߯ ߡߐ߰ ߓߐ߫߸ ߊ߬ ߝߐ߫ ߊ߬ ߓߘߴߌ ߓߐ߫߹
ߕߌ߬ߖߊߣ ߗߊߡ ߠߊ߫ ߞߙߎߞߊ ߥߛߊ߬ߘߋ߲ ߡߍ߲ ߕߐ߯ ߞߏ߫ ߦߊ߬ߖߌ߫ ߗ߭ߊ߲߭ ߟߌߞߊߣ߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߊ߯ߡߊ ߣߌ߲߬ ߞߎ߲߭ ߠߋ߬ <<ߊ߬ ߦߌ߬ߘߊ ߘߌ߫ ߞߎ߲߬ߠߊ߬ߛߌ߮ ߟߎ߬ ߟߊ߫߸ ߞߏ߫ ߖߡߊ߬ߣߊ߬ߘߋ߲ ߠߎ߬ ߦߋ߫ ߓߘߍ߬ߓߘߍ߬ߟߌ ߘߊߘߐߖߊߥߏ߫ ߕߎ߬ߢߊ߬ߡߊ ߟߋ߬ ߝߍ߬ ߛߍߣߍ߲߬.>> ߊ߬ ߞߊ߬ ߦߟߌߓߌߟߊߟߌ ߞߍ߫ ߝߣߊ߫߸ ߞߏ߫ <<ߓߍ߯ߦߊ ߕߴߛߋ߫ ߝߐ߫ ߟߊ߫ ߓߘߍ߬ߓߘߍ߬ߟߌ߬ߟߊ߫ ߛߌ߫ ߞߐ߫ ߖߡߊ߬ߣߊ ߞߣߐ߫߸ ߝߏ߫ ߓߍ߯ ߟߋ߬ ߛߐ߬ߘߐ߲߫ ߊ߬ ߘߐ߫ ߕߘߋ߫߸ ߞߊ߬ ߞߍ߫ ߝߊ߲߬ߞߊ߬ ߞߋߟߋ߲߫ ߘߌ߫.>>
ߖߡߊ߬ ߟߊ߬ߓߐ ߣߌ߲߬ ߦߋ߫ ߓߊ߯ߙߊ߫ ߟߋ߬ ߘߌ߫߸ ߡߍ߲ ߞߐߡߊߓߌ߲ߓߌ߲ߣߍ߲߫ ߝߊ߲߬ߞߊߛߌ߬ߣߊ ߟߎ߬ ߓߟߏ߫߸ ߦߏ߫ ߛߌ߬ߡߐߣ ߋߤߌߝ߭ߍߕ ߜߊ߬ߜߏ߬߸ ߏ߬ ߝߣߊ߫ ߦߋ߫ ߞߏ߫ ߞߋߟߋ߲ ߢߌ߲߬ ߠߋ߬ ߛߍ߬ߘߏ߲ ߠߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
