ߕߊ ߟߋ߬ ߓߐ߫ ߘߊ߫ ߥߊߟߌߝߊ߫ ߓߙߋߡߊ߬ ߞߡߊ߬ߙߊ߬ ߟߊ ߟߎ ߡߊ߬ ߓߎ߬ߙߋ߬ ߓߎߞߊߙߌߦߊ߫ ߞߏߟߌ߲ߞߏߟߌ߲ ߕߟߋ߬ ߁߁ ߡߊ߬߸ ߞߵߊ߬ ߓߟߏߝߋ߲ ߡߎ߰ߡߍ ߞߍ߫ ߛߌ߬ߛߌ ߘߌ߫، ߡߊ߬ߛߎ߬ߓߊ ߏ߬ ߟߋ ߞߏߛߐ߲߬߸ ߞߊ߲ߞߊ߲߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߵߊ߬ ߥߟߌ߬߸ ߞߊ߬ ߓߟߏ߫ ߘߌ߫ ߢߐ߲߰ ߡߊ ߞߍߞߌߦߊ ߘߏ߫ ߛߌ߰ ߛߋ߲߬ߠߊ߫߸ ߣߴߏ߬ ߦߋ߫ ߓߊߘߋ߲ߧߊ ߣߌ߫ ߞߋ߬ߟߋ߲߬ߧߊ ߟߊߥߙߎߞߌ ߛߌߟߊ ߘߌ߫ ߒߞߏ ߕߏ߰ߝߏ ߟߎ߬ ߣߌ߫ ߢߐ߲߯ ߕߍ߫߸ ߞߊ߬ ߘߏߣߍ߲߫ ߓߐ ߢߌߣߌ߲߫ ߓߍ߯ ߝߍ߬ ߞߵߊ߬ ߞߍ߫ ߓߊߘߋ߲ߡߊ ߡߊߜߍ߲ ߘߌ߫.
ߞߏߟߌ߲ߞߏߟߌ߲ ߕߟߋ߬ ߁߁ ߠߋ߬ ߡߊ߬߸ ߕߊ ߥߟߌ߬ ߘߊ߫ ߓߙߋߡߊ߬ ߞߡߊ߬ߙߊ߬ ߟߊ߫ ߟߎ ߡߊ߬߸ ߊ߬ߟߋ ߡߍ߲ ߦߋ߫ ߒߞߏ ߣߌ߫ ߝߊ߬ߙߊ߲߬ߛߌ ߓߊߖߎ߫ ߞߊߙߊ߲ߕߊ ߒߝߊ߲߬ߘߋ߲߬ߡߏߙߌ߫ ߜߙߋ߬ߡߊߕߍ߰ߓߊ߮ ߘߌ߫ ߞߊ߬ߣߌ߲߬، ߕߊߓߐ ߏ߬ ߞߊ߬ ߡߊ߲߬ߕߙߐ߬ ߛߌߦߊߡߊ߲߫ ߠߋ߬ ߟߊߛߴߊ߬ ߡߊ߬߸ ߞߵߊ߬ ߟߊ߫ ߓߏ߲ ߞߣߐ߫ ߝߋ߲ ߓߍ߯ ߞߍ߫ ߞߎ߲߫، ߊ߬ ߓߟߏߝߋ߲߫ ߛߌ߫ ߡߊ߫ ߓߐ߫߸ ߞߵߊ߬ ߓߌ߬ߟߊ߫ ߞߣߐ߬ߘߐ߬ߝߟߌ ߘߐ߫ ߡߎ߬ߕߎ߲߬ ߛߊ߫، ߒ߬ߓߊ߬߸ ߒߞߏ ߛߍ߬ߘߏ߲߬ߠߊ ߟߎ߬ ߝߣߊ߫ ߞߵߏ߬ ߟߋ ߦߋ߫ ߡߊ߬ߘߍ߬ߡߍ߲߬ߠߌ߲߬ ߞߏ߫ ߘߌ߫߸ ߊ߬ ߣߌ߫ ߢߐ߲߯ ߞߊߣߌ߲ ߦߌ߬ߘߊ߬ߟߊ߲ ߘߌ߫.
ߏ߬ ߟߋ ߘߐ߫߸ ߞߊ߲ߞߊ߲߫ ߒߞߏ ߘߍߞߙߎ ߓߍ߯ ߟߊߘߍ߬ߣߍ߲߫ ߘߏ߲߬ߖߟߎ߬ߡߊ߬ߘߊ ߡߍ߲ ߘߐ߫߸ ߞߏ߫ ߛߍ߲ߓߊ߫߸ ߏ߬ ߞߊ߬ ߢߊ߫ ߢߌߣߌ߲ ߘߊߡߌ߬ߣߊ߬ ߞߏ ߟߎ߬ ߡߊ߬، ߘߏ߲߬ߖߟߎ߬ߡߊ߬ߟߌ߬ߟߊ ߓߊߛߓߊ߬ߕߌ߫ ߛߘߌ߬ߓߋ߬ ߟߊ߫ ߟߊ߬ߢߌߣߌ߲ ߞߣߐߡߊ߬߸ ߊ߬ ߞߊ߬ ߞߏ߲߬ߘߏ߬ߕߌ߯ ߛߊ߬ߙߌ߬ߓߎ߬ ߞߋߕߊ߬ ߖߡߊ߬ߙߌ߫ ߡߊ߬ߜߍ߲߬ߠߌ߲߬ ߞߏ ߛߌ߰ ߟߊ߫ ߛߋ߲߬ߠߊ߫߸ ߓߊߏ߬ ߞߏ߫ ߣߐ߬ ߊ߬ߟߎ߬ ߛߍ߬ߘߏ߲߬ߢߐ߲߮ ߠߋ߬ ߛߐ߬ߘߐ߲߬ ߠߊ߫ ߞߎ߲߬ߝߌ߲߬ߧߊ ߞߍ߬ߟߍ ߘߐ߫߸ ߝߊ߬ߛߏ߬ ߞߊ߲ ߠߎ߬ ߟߊߥߙߎߞߌ ߓߊ߯ߙߊ ߘߐ߫߸ ߒߞߏߞߏ ߛߍ߬ߘߏ߲ ߘߐ߫.
ߒ߬ߓߊ߬߸ ߓߟߏߟߊߘߍ ߏ߬ ߟߋ ߞߊ߬ ߘߏߣߍ߲߫ ߛߐ߬ߘߐ߲߬ ߓߐߒߖߘߍߘߐ߫ ߡߐ߮ ߟߎ߬ ߛߊߓߎ߫ ߟߊ߫ ߘߎߢߊ߫ ߝߊ߲߬ ߛߌߦߊߡߊ߲߫ ߘߐ߫، ߞߍ߲ߘߍߟߏ߲ ߡߊ߬ ߏ߬ ߘߐ߫ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߃߸ ߡߐ߰ ߓߌߣߊ߯ߣߌ߲߫ ߢߐ߲߰ ߠߊ߫ ߡߊ߬ߜߍ߲ ߞߣߐߡߊ߬߸ ߊ߬ ߣߌ߫ ߛߌ߲߬ߝߏ߲߬ߘߊ߫ ߝߌ߬ߟߊ߬߸ ߥߊߘߌ߫ ߛߐ߬ߘߐ߲߬ߣߍ߲ ߕߊ߯ ߘߊ߫ ߘߊ߲߭ߕߍ߰، ߞߵߊ߬ ߓߍ߲߬ ߛߍ߲ߓߊ߫ ߟߊ߫ ߛߌ߲߬ߝߏ߲߬ߧߊ߬ߟߌ ߛߙߊߕߌ ߟߎ߫ ߡߊ߬߸ ߜߍ߫ ߛߐ߬ߘߐ߲߬ߣߍ߲ ߘߊ߲߭ ߡߊ߫ ߞߍ߫ ߝߘߏ߬ߓߊ߬ ߞߏ߫ ߘߌ߫، ߒ߬ߓߊ߬߸ ߛߍ߲ߓߊ߫ ߛߌ߲ߝߏ߲߫ ߝߌ߬ߟߊ߬ ߟߊߥߟߌ߬ ߢߊ ߟߋ߬ ߞߍߣߴߏ߬ ߘߌ߫߸ ߓߍ߯ߓߊߖߘߍ߬ߦߋ߫ ߞߡߊ߬ߙߊ߬ ߣߌ߫ ߊߡߊ߬ߘߎ߫ ߛߎ߲߬ߕߎ߫ ߖߊ߰ߓߌ، ߞߋߟߊ ߘߏ߲߬ ߘߴߏ߬ ߟߎ߬ ߘߊ߫ ߞߏ߫ ߕߊ߯ ߘߏ߲߬ߖߟߎ߬ߡߊ߬ߘߊ ߟߊ߫ ߥߊߘߌ߫ ߟߊߘߍ߬ߣߍ߲ ߠߎ߬ ߟߊߕߊ߬ߡߌ߲߬߸ ߞߵߏ߬ ߟߊ߫ ߓߐߟߌߟߊ ߟߎ߬ ߛߙߍߘߍ ߞߊ߲߬، ߊ߬ߟߎ߫ ߓߌ߬ߟߊ߬ߛߌ߬ߟߊ߬ ߘߊ߫ ߛߌ߯ߙߌ߲߫ ߟߞߝ ߞߊ߲ߕߌ߮ ߟߋ߬ ߓߟߏ߫߸ ߡߊ߲߬ߛߊ߫ ߛߟߏ߬ߡߣߊ߫ ߡߊ߰ߛߎߓߊ߫.
ߓߎߞߊߙߌߦߊ߫ ߛߏ ߞߣߐ߫ ߦߋ߲߬߸ ߗߋߘߋ߲ ߠߎ߬ ߞߊ߬ ߘߊ߲߬ߕߍ߰ߟߌ ߞߍ߫߸ ߡߍ߲ ߞߍ߫ ߘߊ߫ ߞߎߡߊ߫ ߞߟߏߡߊ ߟߎ߬ ߘߌ߫߸ ߖߌ߰ߡߝߊ߬ ߞߊ߲ ߠߎ߬ ߘߌ߫، ߊߡߊ߬ߘߎ߫ ߛߎ߲߬ߕߎ߫ ߖߊ߰ߓߌ ߞߊ߬ ߓߟߏߟߊߘߍ ߣߌ߲߬ ߞߎ߲߭ ߢߊߝߐ߫ ߏ߬ ߢߊ ߟߋ߬ ߡߊ߬: <<ߥߊߘߌ ߣߌ߲߬ ߕߎ߲߬ ߘߌ߫ ߛߋ߫ ߟߊߣߊ߬ ߟߊ߫، ߓߊ߬ߙߌ߬ ߘߏ߲߬ߖߟߎ߬ߡߊ߬ߟߌ߬ߟߊ ߞߵߊ߬ ߦߋ߫ ߟߋ߬߸ ߞߏ߫ ߡߐ߱ ߟߊߥߌ߬ߟߌ ߞߊ߬ ߣߵߊ߬ ߡߊߟߐ߬߸ ߏ߬ ߟߋ ߡߐ߰ߦߊ ߘߌ߫، ߞߊ߬ߕߎ߲߯߸ ߡߐ߰ߦߊ ߟߋ߬ ߡߐ߬ߟߐ߲ ߓߏ߲߬ߓߊ߫ ߞߏ ߓߍ߯ ߘߌ߫، ߒ߬ߓߊ߬߸ ߊ߲ ߣߊ߬ߣߍ߲߫ ߏ߬ ߟߋ ߕߊ߯ߡߊ ߟߊ߫.>>
ߣߴߌ ߘߏ߲߬ ߞߊ߬ ߓߍ߯ߓߊߖߘߍ߬ߦߋ߫ ߞߡߊ߬ߙߊ߫ ߕߊ߬߸ ߏ߬ ߞߊ߬ ߓߙߋߡߊ߬ ߞߡߊ߬ߙߊ߫ ߟߐ߬ߘߎ߮ ߝߐ߫ ߡߐ߰ߦߊ ߟߊߥߙߎߞߌ ߘߐ߫߸ ߞߵߊ߬ ߟߐ߬ߘߎ߮ ߝߐ߫ ߡߊ߲߬ߘߋ߲߬ ߤߊ߲ߞߟߌ ߟߊߞߊ߭ ߘߐ߫، ߊ߬ ߞߊ߬ ߓߙߋߡߊ߬ ߞߡߊ߬ߙߊ߬ ߡߛߊߓߊߙߌ߫߸ ߓߊߏ߬ ߕߊߓߐ ߕߎ߲߬ ߓߘߊ߫ ߓߏ߬ߙߌ߫ ߊ߬ߟߋ߫ ߖߍ߬ߘߍ ߞߊ߲߬ ߞߘߐ߬ߡߊ߲߬، ߊ߬ ߞߎߡߊ߫ ߘߊ߫ ߓߟߏߝߋ߲߫ ߖߋߣߌ߲ ߞߊ߲߬߸ ߞߏ߫ ߕߊ ߘߌ߫ ߛߋ߫ ߡߐ߱ ߓߟߏߝߋ߲ ߓߍ߯ ߖߋ߬ߣߌ߲߬ ߠߊ߫، ߡߎ߲߬ ߦߋ߫ ߕߏ߫ ߟߊ߫߸ <<ߏ߬ ߟߋ ߞߎ߲߭ ߘߌ߫>> ߏ߬ ߟߋ ߘߎߢߊ߫ ߣߌ߲߬ ߟߐ߬ ߟߊ߫߸ ߞߊ߬ ߘߎߢߊ߫ ߕߋ߬، ߊ߬ ߞߊ߬ ߓߙߋߡߊ߬ ߟߊ߫ ߘߐ߬ߖߊ߬ ߞߍߣߍ߲ ߠߎ߬ ߝߐ߫߸ ߊ߬ߟߋ ߡߍ߲ ߞߵߊ߬ ߞߎ߲߬ ߣߊ߲ߝߟߏ ߓߐ߫߸ ߞߊ߬ ߒߞߏ ߞߊߙߊ߲ߕߊ ߟߐ߬، <<ߓߙߋߡߊ߬ ߞߡߊ߬ߙߊ߬ ߓߘߊ߫ ߖߎ߬ߟߎ ߘߏ߲߬ ߡߊ߲߬ߘߋ߲߬ ߠߊ߫߸ ߖߎ߬ߟߎ ߏ߬ ߘߏ߲߬ ߡߊ߫ ߛߙߊ߬ ߡߎߣߎ߲߬.>>
ߊ߬ߟߎ ߞߐߛߊ߬ߦߌ߲ ߞߐߝߍ߬ ߞߊ߬ ߓߐ߫ ߕߊ߯ߡߊ ߘߐ߫߸ ߓߙߋߡߊ߬ ߞߡߊ߬ߙߊ߫ ߖߍ߬ߘߍ ߞߊ߬ ߛߌߟߊߓߐߛߐ߯ߣߊ߫ ߛߍߝߍ߲ߘߊ ߞߟߌ߫߸ ߞߵߊ߬ ߟߊ߫ ߛߍߥߊ ߦߌ߬ߘߊ߬߸ ߞߵߊ߬ ߟߊ߫ ߖߌ߰ߡߊ߬ߝߊ ߦߌ߬ߘߊ߬، ߊ߬ ߞߎߡߊ߫ ߘߊ߫ ߛߎ߬ߣߎ߲ ߣߌ߫ ߡߎ߯ߙߌ ߕߍߟߊ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߞߊ߬ ߒߞߏ ߘߏ߲߬ߞߏ ߟߎ߫ ߝߏ߬ ߖߌ߬ߣߍ߬ ߞߣߐ߫߸ ߝߘߊ߬ߝߌ߲߬ߠߊ߬ ߞߣߐ߫߸ ߊ߬ ߣߌ߫ ߘߎߢߊ߫ ߞߣߐ߫، ߊ߬ ߞߊ߲߫ ߞߏ߫ ߞߏ ߡߍ߲ ߠߎ߬ ߞߍߣߍ߲߫ ߕߊߓߐ ߣߌ߫ ߛߌߛߍ߲߬ ߕߍ ߘߐ߫ ߒߞߏ ߡߐ߮ ߟߎ߬ ߓߟߏ߫߸ ߊ߬ ߓߊߘߋ߲ ߠߎ߬ ߓߟߏ߫߸ ߏ߬ ߟߎ߫ ߝߏ߬ ߘߊ߫ ߕߴߊ߬ߟߋ߫ ߞߎ߲߬ ߡߎ߬ߕߎ߲߬، ߞߏ߫ ߊ߬ ߞߏ ߥߙߊ߬ߣߴߊ߬ ߡߊ߬ ߟߋ߬، ߓߊߏ߬߸ ߊ߬ ߝߣߊ߫ ߡߊ߫ ߘߋ߬ߙߌ߬ ߢߐ߲߯ ߞߊߣߌ߲ ߛߎ߯ߦߊ ߣߌ߲߬ ߦߋ߫ ߟߊ߫ ߡߎߣߎ߲߬، ߞߏ ߒߞߏߡߐ߮ ߟߎ߫ ߞߊ߬ ߓߊߘߋ߲ߧߊ ߡߍ߲ ߦߌ߬ߘߴߊ߬ ߟߊ߫߸ ߏ߬ ߕߍ߫ ߓߐ߫ ߊ߬ ߦߟߌ߫ ߟߊ߫ ߡߎ߰ߡߍ߫.
ߡߊ߬ߜߍ߲߬ߠߌ߲߬ ߞߏ ߣߌ߲߬ ߞߏ߬ߣߌ߲ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߣߌ߲߬ ߓߘߊ߫ ߕߊ߬ߡߌ߲߬ ߒߞߏ ߛߍ߲ߓߊ߫ ߟߊ߫ ߞߍߞߌߦߊ ߟߎ߬ ߟߊ߲ߞߣߍߡߊ߫ ߟߊ߫، ߣߴߏ߬ ߦߋ߫ ߢߐ߲߯ ߞߊߣߌ߲ ߣߌ߫ ߞߍߢߐ߲߯ߝߍ ߓߊ߲ߓߊ߲ ߘߌ߫߸ ߞߊ߬ ߛߌߟߊ ߟߊߞߊ߬ ߒߞߏ ߘߏ߲߬ߞߏ ߟߎ߬ ߕߍ߫߸ ߞߊ߬ ߓߊ߬ߟߊ߲ ߓߍ߯ ߞߊߘߌ߫، ߛߍ߲ߓߊ߫ ߞߊ߲߫ ߞߏ߫ ߊ߬ߟߎ߬ ߡߙߌߦߊ ߦߋ߫ ߟߋ߬߸ ߞߏ߫ ߓߊ߯ ߒߞߏ ߘߏ߲߬ߞߏ߬ ߞߋߟߋ߲߫ ߛߐ߬ߘߐ߲߫ ߡߊ߲߬ߕߙߐ߬ ߘߐ߫߸ ߊ߬ ߣߐ߬ ߓߍ߯ ߟߋ߬ ߛߐ߬ߘߐ߲߬ ߠߊ߫، ߣߌ߫ ߤߙߊ߫ ߘߏ߲߬ ߞߊ߬ ߡߍ߲ ߝߣߊ߫ ߛߐ߬ߘߐ߲߬ ߒߞߏ ߡߐ߯ ߘߐ߫߸ ߓߍ߯ ߟߋ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
