ߛߊ߲ߡߊߞߎߟߎ߲ ߘߏ߫ ߟߋ߬ ߥߎ߬ߦߊ߬ ߘߊ߫ ߞߎߣߎ߲߬ ߞߐ߬ߟߏ߲ ߡߊ߬ ߖ߭ߐߙߑߗ߭ߌ߫߸ ߂߀߂߅ ߣߍߣߍߓߊ ߕߟߋ߬ ߁߁ ߞߵߊ߬ ߛߐ߬ߘߐ߲߬ ߣߊ߲߬ߕߌ߯ ߜߊ߲߰ߛߊ߲ ߦߴߊ߬ ߞߣߐ߫߸ ߞߊ߬ ߡߐ߰ ߂߀ ߝߊ߰، ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߞߍ߫ ߘߊ߫ ߞߊ߬ ߛߊ߲ߡߊߞߎߟߎ߲ ߕߏ߫ ߛߊ߲ߖߊ߲ߓߊ ߟߋ߬ ߡߊ߬ ߊߖ߭ߍߙߑߓߊߦߌߖߊ߲߫ ߣߌ߫ ߕߙߎߞߌ߫ ߕߍߟߊ ߘߐ߫߸ ߏ߬ ߓߘߊ߫ ߣߊ߬ ߞߎߡߊ߫ ߡߌߛߍ߲ ߘߌ߫ ߖߡߊ߬ߣߊ ߞߣߐ߫ ߞߵߊ߬ ߓߍ߲߬ ߞߍߟߊ߲߫ ߞߘߐ ߟߎ߬ ߟߊߓߊ߯ߙߊ ߡߊ߬ ߕߙߎߞߌ߫ ߣߊ߲߬ߕߌ߮ ߟߎ߬ ߓߟߏ߫߸ ߓߊߏ߬ ߛߌߞߊ߫ ߞߍߣߍ߲߫ ߞߏ߫ ߛߊ߲ߡߊߞߎߟߎ߲߫ ߞߘߐ ߟߋ߬.
ߡߊ߬ߛߎ߬ߓߊ߬ ߞߏ߬ߓߊ߫ ߟߋ߬ ߣߐ߬ ߕߙߎߞߌ߫ ߣߊ߲߬ߕߌ߮ ߟߎ߫ ߛߐ߬ߘߐ߲߬ ߠߊ߫، ߞߊ߬ߕߎ߲߯߸ ߛߊ߲ߡߊߞߎߟߎ߲ ߡߍ߲ ߥߎ߬ߦߊ߬ ߞߏ߬ ߞߏߡߊ ߦߴߌߘߐ߫ ߣߌ߲߬߸ ߊ߬ ߕߐ߯ ߟߋ߬ ߞߏ߫ ߛߋ-߁߃߀ ߤߍߙߑߞߎ߳ߟ (C-130 Hercules)߸ ߊ߬ ߦߋ߫ ߊߡߙߌߞߌ߬ ߣߊ߲߬ߕߌ߰ ߡߊ߬ߘߏ߬ߣߌ߲߬ ߛߊ߲ߡߊߞߎߟߎ߲ ߘߏ߫ ߟߋ߬ ߘߌ߫߸ ߡߍ߲ ߓߘߊ߫ ߝߊ߯ߘߐߞߍ߫ ߕߟߊ߫ ߞߍ߫ ߓߏ߬ߙߌ ߟߊ߫، ߒ߬ߓߊ߬߸ ߏ߬ ߟߋ ߖߍ߲ߛߍ߲ߣߍ߲߫ ߛߌ߲ߜ߭ߑߣߊߖߌ߫ ߕߌ߲߬ߞߎߘߎ߲ ߘߐ߫߸ ߖ߭ߐߙߑߗ߭ߌ߫ ߞߣߐ߫، ߊ߬ ߓߐ ߞߐߝߍ߬ ߜ߭ߊ߲ߖߊ߫ ߘߎ߱ ߞߣߐ߫߸ ߏ߬ ߦߋ߫ ߊߖ߭ߍߙߑߓߊߦߌߖߊ߲߫ ߠߋ߬ ߘߐ߫، ߦߋ߲߬ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߟߊ߬ߛߏ߬ߓߟߌ߬ ߝߏߦߌ߬ ߡߊ߫ ߞߍ߫ ߞߊ߬ ߞߐ߲߰ ߥߎ߬ߦߊ߬ߟߌ ߢߍ߫.
ߛߙߋ ߟߎ߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߫ ߞߊ߬ ߛߊ߲ߡߊߞߎߟߎ߲ ߦߋ߫ ߟߋ߬߸ ߊ߬ ߦߴߊ߬ ߕߙߎߕߙߎ ߞߊ߲߬ ߊ߬ ߖߍ߬ߘߍ߫ ߡߊ߬߸ ߞߵߊ߬ ߛߐ߬ߘߐ߲߬ ߛߌ߬ߛߌ ߘߎ߲߬ߘߎ߬ߣߴߊ߬ ߞߐ߫ ߘߍ߲߫߸ ߏ߬ ߕߎ߬ߡߊ ߟߋ߬ ߟߊ߫߸ ߕߊ ߥߟߌ߬ ߘߴߊ߬ ߟߊ߫ ߓߟߌߥߎ߫ ߞߵߏ߬ ߞߍ߫ ߊ߬ ߓߎ߬ߘߎ߲߬ߣߍ߲ ߘߌ߫.
ߕߙߎߞߌ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ߘߊ ߞߊ߬ ߣߊ߲߬ߕߌ߯ ߡߐ߰ ߂߀ ߝߊ߰ ߞߏ ߟߤߊߕߍߦߊ߫߸ ߡߍ߲ ߠߎ߬ ߕߍ߬ߘߍ߫ ߊ߬ ߞߣߐ߫، ߊ߬ߟߎ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߍߣߊ߬ ߢߊߢߌߣߌ߲ߠߌ߲߫ ߖߐ߲ߖߐ߲߫ ߛߌ߰ ߛߋ߲߬ߠߊ߫߸ ߞߵߊ߬ ߞߍߢߊ ߣߴߊ߬ ߞߎ߲߭ ߟߐ߲߫.
ߕߙߎߞߌ߫ ߞߊ߲ߕߌ߮ ߙߋߛߍߔ ߕߊߦߔ ߍߙߑߘߏߜ߭ߊ߲߫ ߞߵߊ߬ ߦߌ߬ߘߊ߬ ߞߏ߫ <<ߊ߬ ߞߣߐ߫ ߡߐ߮ ߓߍ߯ ߝߊ߰ߣߍ߲߫ ߠߋ߬ ߞߐߘߍ߫߸ ߊ߬ ߘߏ߲߬ ߓߍ߯ ߕߘߍ߬ ߓߊ߯ߙߊ߫ ߟߊ߫ ߡߎߣߎ߲߬، ߊ߬ߟߎ߬ ߦߋ߫ ߖߡߊ߬ߣߊ ߛߋ߰ߘߎ߬ ߝߎߙߋ ߟߎ߫ ߟߋ߬ ߘߌ߫.>> ߊ߬ ߓߊ߲߫ ߘߊ߫ ߞߵߊ߬ ߟߴߊ߬ ߞߊ߲߬ ߝߣߊ߫ ߞߏ߫ ߊ߬ <<ߛߎ߬ߣߎ߲߬ߣߍ߲߬ߓߊ߫ ߘߍ߬ߜߍ>> ߟߋ߬߸ ߞߊ߬ ߓߊ߲߫ ߞߊ߬ ߛߊ߲߬ߞߊ߬ ߝߏߟߌ ߟߐ߬ ߞߐߙߍ ߓߍ߯ ߟߊߘߍ߬ߡߍ߲ ߡߊ߬ ߝߘߏ߬ߓߦߊ߬ ߓߟߏ ߡߊ߬.
ߟߌ߲ߓߊ߲߫ ߡߊ߲ߞߊ߲ ߞߐ߰ߘߎ߰ ߓߍ߲ߓߍ߲ (ߏߕߊ߲) ߓߊ߬߸ ߞߊ߬ߝߏ߫ ߘߍ߬ߣߍ߲ ߝߘߏ߬ߓߊ߬ ߞߟߊ߬ߕߌ߮ ߡߊߙߞ ߙߎߕ ߓߊ߬߸ ߊ߬ ߣߌ߫ ߊߡߙߌߞߌ߬ ߟߊ߬ߛߌ߰ߘߋ߲ ߡߍ߲ ߦߋ߫ ߊ߲ߞߊߙߊ߫߸ ߞߏ߫ ߕߐߡ ߓߊ߬ߙߊߞ߸ ߏ߬ ߟߎ߬ ߓߍ߯ ߞߊ߬ ߕߌ߲߭ ߣߌ߫ ߡߐ߰ߟߊ߲߬ߘߌ߬ߦߊ߬ ߝߏߟߌ ߞߍ߫ ߟߋ߬ ߕߙߎߞߌ߫ ߡߊ߬.
ߛߊ߲ߡߊߞߎߟߎ߲ ߡߍ߲ ߣߐ߬ ߓߌ߬ߟߊ߬ߒ߬ߘߐ߬ߖߎ߮ ߞߍ߫ ߟߊ߫ ߣߌ߲߬߸ ߊ߬ ߟߊߘߊ߲ ߛߊ߲߬ ߅߇ ߟߋ߬ ߕߋ߲߬߸ ߡߍ߲ ߛߐ߰ ߘߊ߫ ߓߊ߯ߙߊ ߡߊ߬ ߛߎ߰ߘߎ߬ߟߊ߫ ߡߊ߲߬ߛߊ߬ߟߊ ߍߙ ߝߐߙߛ ߓߟߏ߫ ߡߎߣߎ߲߬߸ ߞߣߊ߬ ߕߏ߫ ߟߊߕߊ߬ߡߌ߲߬ ߠߊ߫ ߕߙߎߞߌ߫ ߡߊ߬، ߊ߬ ߦߋ߫ ߛߊ߲ߡߊߞߎߟߎ߲߫ ߢߣߊߡߊ ߟߋ߬ ߘߌ߫ ߝߋߎ߫߸ ߓߊ߬ߙߌ߬ ߖߐ߲ߖߐ߲߫ ߕߎ߲߬ ߕߍ߫ ߡߎ߬ߕߎ߲߬߸ ߞߵߏ߬ ߞߎ߲߭ ߞߍ߫ ߊ߬ ߟߊ߫ ߞߘߐ߬ߦߊ ߘߌ߫، ߊ߬ ߕߘߍ߬ ߕߙߎߞߌ߫ ߓߟߏ߫ ߞߟߍ߬ߡߎ߬ߙߊ߲߬ ߡߊ߬ߘߏ߬ߣߌ߲߬ ߞߊ߲ ߠߋ߬ ߡߊ߬ ߡߎ߬ߕߎ߲߬ ߞߘߊߎ߫߸ ߊ߬ ߣߴߊ߬ ߟߊߡߌߣߌ߲߫ ߖߡߊߣߊ ߏ߬ ߟߎ߬ ߕߍ߫.
ߞߵߊ߬ ߕߊ߬ ߂߀߂߀ ߡߊ߬ ߤߊ߲߯ ߕߋ߲߬߸ ߣߌ߲߬ ߢߐ߲߰ ߡߐ߰ ߝߊ߰ ߛߊ߲ߡߊߞߎߟߎ߲߫ ߓߋ߫ ߕߎ߲߬ ߡߊ߫ ߞߍ߫ ߕߙߎߞߌ߫ ߡߎߣߎ߲߬.
ߊ߬ ߦߟߍ߬ߘߐ߬ߞߍ߬ ߞߋߟߋ߲ ߠߋ߬ ߕߋ߲߬߸ ߕߙߎߞߌ߫ ߞߵߊ߬ ߟߊ߫ ߞߟߍ߬ߡߎߙߊ߲ ߠߎ߬ ߟߊߞߎߘߦߊ ߓߊ߯ߙߊ ߘߊߡߌ߬ߣߊ߬߸ ߞߵߊ߬ ߖߘߍ߬ߞߊ߬ߣߌ߲߬ ߕߊ ߘߏ߫ ߟߎ߫ ߟߊߘߊ߲ ߛߌ߰ ߛߋ߲߬ߠߊ߫߸ ߦߏ߫: ߓߊߦߌߙߊߞߑߕߊߙ ߞߎߟߎ߲ߞߎߟߎ߲߸ ߊߛߍߟߑߛߊ߲ ߥߊߜߏߡߊ߸ ߙߏߞߍߕߑߛߊ߲ ߓߌ߬ߢߍ߬ߞߎߟߎ߲، ߟߊ߬ߞߎ߬ߘߦߊ߬ߟߌ ߏ߬ ߟߎ߬ ߞߍ߫ ߘߊ߫ ߛߊߓߎ߫ ߘߊ߫ ߞߊ߬ ߕߙߎߞߌ߫ ߖߡߊ߬ߣߊ ߞߍ߫ ߞߟߍ߬ߡߎ߬ߙߊ߲߬ ߖߎߟߊ ߖߍ߬ߘߍߖߍ߬ߘߍ ߘߌ߫߸ ߝߏ߫ ߊ߬ߟߎ߬ ߦߋ߫ ߝߘߊ߬ߝߌ߲߬ ߖߡߊߣߊ ߛߌߦߊߡߊ߲߫ ߡߊߛߐ߫ ߟߊ߫ ߕߋ߲߬߸ ߊ߬ ߣߌ߫ ߕߟߋ߬ߓߐ ߞߐߞߘߐߟߊ ߖߡߊ߬ߣߊ ߘߏ߫ ߟߎ߫.
ߒ߬ߓߊ߬߸ ߕߙߎߞߌ߫ ߟߊ߫ ߞߘߐߕߊ ߏ߬ ߣߴߊ߬ ߕߊ߫߸ ߤߊߟߌ߬ߛߊ߫߸ ߊ߬ߟߎ߬ ߟߊ߫ ߖߊ߬ߥߏ ߞߐߞߟߏ ߦߋ߫ ߛߊ߲ߡߊߞߎߟߎ߲߫ ߞߘߐ ߟߎ߬ ߟߋ߬ ߘߌ߫ ߡߎߣߎ߲߬߸ ߡߍ߲ ߠߎ߬ ߛߐ߬ߘߐ߲߬ ߘߴߊ߬ߟߎ߬ ߣߌ߫ ߊߡߙߌߞߌ߬ ߟߊ߫ ߞߍߢߐ߲߯ߝߍ ߘߐ߫ ߥߊ߯ߕߌ߫ ߕߊ߬ߡߌ߲߬ߣߍ߲ ߠߎ߬ ߘߐ߫، ߒ߬ߓߊ߬߸ ߛߊ߲ߡߊߞߎߟߎ߲߫ ߓߋ ߢߌ߲߬ ߠߋ߬ ߓߘߊ߫ ߣߵߊ߬ߟߎ߬ ߟߊߞߎߣߎ߲߫ ߛߍߣߍ߲߬߸ ߞߏ߫ ߊ߬ߟߎ߬ ߞߊ߫ ߞߊ߲߫ ߞߊ߬ ߦߟߍ߬ߡߊ߲ ߘߏ߲߬ ߞߏ ߘߏ߫ ߟߎ߫ ߘߐ߫ ߡߎ߬ߕߎ߲߬، ߛߴߊ߬ߟߎ߬ ߘߌ߫ ߞߛߌ߫ ߊ߬ ߢߐ߲߰ ߜߘߍ߫ ߟߎ߫ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
