ߕߟߋ߬ ߘߊ߲ߘߐ߫ ߟߋ߬ ߕߏߣߍ߲߫ ߞߊ߲ߕߌ߮ ߟߊ߫ ߥߊ߰ߣߍ߲߬ ߘߐ߬ ߛߌ߯ߟߌ ߖߊ߲߬ߖߏ߲ ߠߊ߫ ߡߎ߬ߕߎ߲߬، ߣߴߌ ߛߋ߫ ߘߊ߫ ߞߐߣߊߞߙߌ߫ ߕߋ߲߬߸ ߓߟߏߘߐߓߍ߲ ߠߎ߬ ߦߋ߫ ߛߋ߲߬ߠߊ߫߸ ߛߴߊ߬ ߞߏ ߘߌ߫ ߞߍ߫ ߖߌ߲ߘߊ߲ߓߊ ߘߐ߫߸ ߊ߬ ߣߌ߫ ߟߊ߬ߞߊ߲߬ߘߊ߬ߟߌ ߞߣߐ߫، ߞߊ߲ߕߌ߮ ߖߍ߬ߘߍ ߛߌ߰ߣߍ߲߬ ߕߴߊ߬ ߞߏ ߘߊ ߝߍ߬߸ ߊ߬ ߦߴߊ߬ ߝߍ߬ ߊ߬ ߦߋ߫ ߞߍ߫ ߖߊ߲߬ߖߏ߲߫ ߠߋ߬ ߘߌ߫߸ ߡߍ߲ ߘߌ߫ ߞߍ߫ ߖߡߊ߬ߣߊ ߞߎ߲߬ߠߊ߬ߦߋߙߋ߲ ߘߌ߫، ߓߊߏ߬߸ ߖߊ߲߬ߖߏ߲߫ ߘߝߐ߬ߡߊ ߟߋ߬߸ ߡߍ߲ ߕߍ߫ ߞߏߣߍ߲߫ ߘߌ߫.
ߖߌ߬ߣߍ߬ ߦߋ߫ ߟߏ߲ߓߊ ߘߏ߫ ߟߋ߬ ߡߊߜߍ߲ ߞߊ߲߬ ߕߋ߲߬߸ ߣߴߏ߬ ߦߋ߫ ߖߡߊ߬ߣߊ ߡߊ߬ߡߙߊ߬ߟߌ ߞߍߢߊ ߡߊߦߟߍ߬ߡߊ߲߬ ߟߏ߲ߓߊ ߘߌ߫߸ ߞߊ߬ ߞߊ߲ߕߌ߯ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊߛߌ߰ ߊ߬ ߟߊ߫ ߞߊ߲ߕߌ߯ߦߊ ߥߊ߰ߣߍ߲ ߘߐ߫߸ ߏ߬ ߡߍ߲ ߟߐ߯ߟߊߣߍ߲߫ ߞߵߊ߬ ߕߏ߫ ߓߌ߲ߠߊߥߎߟߋ߲ ߣߌ߲߬ ߕߟߋ߬ ߁߇ ߣߊ߬ߕߐ ߟߊ߫߸ ߣߐ߲ߜ߭ߐ߫ ߕߏ߬ߟߊ߲߬ߕߊ߲߬ ߓߙߊ߫ ߟߊ߲߬ߛߣߊ߬ ߞߐ߲ߕߍ߬ ߟߊ߫ ߞߐߣߊߞߙߌ߫߸ ߙߊ߬ߕߏߡߊ߬ ߞߊ߬ߝߏ߬ߙߋ߲ ߞߣߐ߫، ߖߊ߲߬ߖߏ߲ ߣߌ߲߬ ߖߌ߲ߘߊ߲ ߠߋ߬ ߞߍߕߐ߫ ߖߡߊ߬ߣߊ ߟߊߡߊ߰ ߟߊ߫ ߞߵߊ߬ ߟߊߘߏ߲߬ ߞߊ߲ߓߍ߲߫ ߟߏ߯ߟߎߣߊ߲ ߞߣߐ߫.
ߞߵߊ߬ ߓߍ߲߬ ߏ߬ ߞߏ ߓߟߏߘߐߓߍ߲ ߡߊ߬ ߏ߬ ߘߐ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫߸ ߞߊ߬ߝߏ߬ ߞߎ߲ߕߌ߮ ߞߊ߬ ߓߙߊ߬ߒ߬ߘߐ߬ ߓߐߒߡߊߟߌ ߘߏ߫ ߞߍ߫ ߞߣߐߟߊ ߟߊ߬ߞߊ߲߬ߘߊ߬ߟߌ ߦߙߍߞߍߟߌ ߡߊ߬ߡߙߊ߬ߟߌ߬ ߓߏ߲ߘߋ߲ ߞߣߐ߫ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߂، ߊ߬ ߟߊ߫ ߓߐߒߡߊߟߌ ߏ߬ ߟߊߥߟߌ߬ ߘߊ߫ ߞߏ ߟߎ߬ ߥߊ߫ ߢߊ ߟߐ߲ ߠߋ߬ ߡߊ߬߸ ߞߵߊ߬ ߟߐ߲߫ ߛߌ߲߬ߝߏ߲߬ߧߊ߬ߟߌ ߦߋ߫ ߘߊߞߎ߲߫ ߢߌ߬ߡߊ߲߬ ߘߐ߫߸ ߟߊ߬ߞߊ߲߬ߘߊ߬ߟߌ ߞߊߓߋ ߦߋ߫ ߘߌ߬߸ ߖߊ߲߬ߖߏ߲ ߡߊߛߎ߬ߘߎ߲߬ߧߊ ߣߌ߲߬ ߘߐ߫.
ߊ߬ ߟߊ߫ ߓߐߒߡߊߟߌ ߣߌ߲߬ ߘߐ߫߸ ߡߊ߬ߡߙߊ߬ߟߌ ߦߋ߫ ߡߍ߲ ߠߎ߬ ߓߟߏ߫ ߞߣߐߟߊ ߟߊ߬ߞߊ߲߬ߘߊ߬ߟߌ ߡߊ߬ߘߎ߮ ߘߐ߫߸ ߏ߬ ߟߎ߫ ߞߊ߬ ߓߟߏߘߐߓߍ߲߫ ߞߍߣߍ߲ ߠߎ߬ ߢߊߝߐ߫ ߞߊ߲ߕߌ߮ ߦߋ߫ ߝߘߏ߬ߓߊ߬ ߓߟߏ ߡߊ߬߸ ߖߊ߲߬ߖߏ߲ ߘߌ߫ ߛߋ߫ ߞߍ߫ ߟߊ߫ ߖߛߎ߬ߛߎߡߊ ߘߐ߫ ߢߊ ߡߍ߲ ߡߊ߬، ߢߊ ߟߐ߬ ߘߊ߫ ߟߊ߬ߞߊ߲߬ߘߊ߬ߟߌ ߘߊߞߎ߲ ߘߐ߫߸ ߛߊ߫ ߟߊ߬ߛߌ߰ߟߌ ߢߍ ߣߴߊ߬ ߕߎ߬ߡߊ ߣߴߊ߬ ߞߐ ߘߌ߫ ߞߍ߫ ߢߊ ߡߍ߲ ߞߊ߬ ߢߊ߬، ߓߊߏ߬߸ ߊ߬ ߦߌ߬ߘߊ߬ߣߍ߲߬ ߞߏ߫ ߞߊ߬ߝߏ߬ ߞߎ߲߬ߕߌ߰ ߛߌߦߊߡߊ߲߫ ߣߌ߫ ߞߎ߲߬ߠߊ߬ߛߌ߰ ߛߌ߲߬ߝߏ߲߬ ߛߌߦߊߡߊ߲߫ ߠߋ߬ ߣߊ߬ߕߐ߫ ߞߊ߬ ߓߐ߫ ߖߡߊ߬ߣߊ߬ ߜߘߍ߫ ߟߎ߫ ߘߐ߫߸ ߞߊ߬ ߣߊ߬ ߛߐ߬ߘߐ߲߬ ߟߊ߬ߛߌ߰ߟߌ ߖߊ߲߬ߖߏ߲ ߘߐ߫.
ߟߊ߬ߞߊ߲߬ߘߊ߬ߟߌ ߣߌ߲߬ ߘߊߘߐߓߍ߲߬ߠߴߊ߬ߟߎ߬ ߓߟߏ߫ ߞߵߊ߬ ߞߍ߫ ߡߊ߬ߡߙߊ߬ߟߌ߬ߘߊ߬ ߞߋߟߋ߲߫ ߠߋ߬ ߘߌ߫߸ ߡߍ߲ ߘߏ߲߬ߖߟߎ߬ߡߊ߬ߟߌ ߝߊ߲߬ߞߊߘߏ߲߬ߣߍ߲߫ ߟߊ߬ߞߊ߲߬ߘߊ߬ߟߌ ߣߌ߫ ߡߊ߬ߞߊ߲߬ߞߊ߲߬ߠߌ߲߬ ߝߊ߲ߞߊ ߛߌ߰ߦߙߐ߬ߡߊ߬ ߛߌߦߊߡߊ߲߫ ߓߟߏ߫߸ ߞߵߏ߬ ߟߊ߫ ߢߊ ߡߊߖߌ߱ ߞߊ߲߬ ߟߊ߬ߞߊ߲߬ߘߊ߬ߟߌ ߥߏ߬ߣߍ߲ ߣߴߊ߬ ߥߏ߬ߓߊ ߟߎ߬ ߝߍ߬، ߟߊ߬ߢߌߣߌ߲߫ ߢߌ߬ߡߊ߲߬ ߦߴߊ߬ߟߎ߬ ߟߊ߫߸ ߏ߬ ߟߋ ߖߊ߲߬ߖߏ߲ ߞߍ ߘߌ߫߸ ߣߌ߫ ߡߊ߲߬ߞߊ߲߬ ߕߍ߫߸ ߓߌ߬ߟߊ߬ߒ߬ߘߐ߬ ߕߍ߫، ߓߊߏ߬߸ ߖߡߊ߬ߣߊ ߟߊ߫ ߛߌ߲߬ߝߏ߲߬ߧߊ߬ߟߌ߬ߓߊ߬ ߛߎ߮ ߣߌ߲߬ ߞߊ߫ ߞߊ߲߫ ߞߊ߬ ߞߍ߫ ߢߊ߫ ߟߋ߬ ߡߊ߬߸ ߞߎ߲߬ߠߊ߬ߦߋߙߋ߲ ߘߌ߫ ߛߐ߬ߘߐ߲߬ ߡߍ߲ ߘߐ߫.
ߓߍ߲߬ߒ߬ߛߋ߬ߡߊ ߣߌ߲߬ ߝߍ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߖߡߊ߬ߙߌ߬ ߜߍߟߍ߲ ߠߎ߬ ߘߌ߫߸ ߡߍ߲ ߠߎ߬ ߛߊߣߌ߲ߡߊ߲߫، ߊ߬ ߕߌ߯ߕߌ߯߸ ߟߊ߬ߞߊ߲߬ߘߊ߬ߟߌ߬ ߞߏ߸ ߊ߬ ߞߵߏ߬ ߡߊߜߟߍ߬ߦߊ߬߸ ߞߵߏ߬ ߟߊ߫ ߓߐߒߣߘߐ ߟߎ߫ ߞߊ߲߬، ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߢߌ߬ߣߊ߬ ߡߊ߲߫ ߞߊ߲߫ ߞߊ߬ ߞߍ߫ ߞߏ߫ ߞߋߟߋ߲߫ ߞߐ߫߸ ߟߊߒߠߦߊ ߡߍ߲ ߦߋ߫ ߖߡߊ߬ߣߊ ߘߐ߫߸ ߊ߬ ߟߐ߲ߣߍ߲߫ ߡߊ߬ߝߊ ߡߍ߲ ߡߊ߬߸ ߏ߬ ߦߋ߫ ߕߏ߫ ߊ߬ ߢߊ ߟߋ߬ ߡߊ߬، ߛߊ߫ ߞߟߌߣߍ߲ ߡߍ߲ ߠߎ߬ ߣߊ߬ߕߐ߫ ߞߊ߬ ߓߐ߫ ߖߡߊ߬ߣߊ߬ ߜߘߍ߫ ߟߎ߫ ߘߐ߫߸ ߏ߬ ߟߎ߬ ߦߋ߫ ߛߴߊ߬ߟߎ߬ ߟߊ߫ ߕߘߍ߬ߒ߬ߘߐ߬ߟߌ ߞߍ߫ ߟߴߊ߬ ߢߌ߬ߡߊ ߟߊ߫߸ ߖߡߊ߬ߣߊ߬ߘߋ߲ ߠߎ߬ ߝߣߊ߫ ߦߋ߫ ߛߋ߫ ߛߐ߬ߘߐ߲߬ ߠߴߊ߬ ߘߐ߫ ߣߌ߫ ߕߙߐ߫ ߕߍ߫، ߓߊߏ߬߸ ߖߊ߲߬ߖߏ߲߫ ߘߝߐ߬ߡߊ ߟߋ߬.
ߊ߬ ߞߍ ߞߊ߬ ߟߊ߬ߛߌ߲߬ߠߌ߲ ߏ߬ ߞߍ߫߸ ߏ߬ ߞߏ ߕߊ߬ ߘߊ߫ ߓߊ߫ ߘߐ߫ ߡߊ߬ߡߙߊ߬ߟߌ߬ߘߊ ߓߟߏ߫ ߌߞߘߐ߫߸ ߊ߬ߟߎ߬ ߡߴߏ߬ ߣߌ߫ ߓߌ߬ߟߊ߬ ߞߊ߬ ߛߎߡߊ߫ ߟߊߘߍ߬.
ߊߟߎ߫ ߦߴߊ߬ ߟߐ߲߫߸ ߂߀߂߆ ߓߌ߲ߠߊߥߎߟߋ߲ ߕߟߋ߬ ߁߇ ߣߊ߬ߕߐ ߣߌ߲߬ ߦߋ߫ ߟߏ߲ߓߊ߫ ߟߋ߬ ߘߌ߫ ߖߌ߬ߣߍ߫ ߘߐ߬ߝߐ ߞߣߐ߫، ߞߊ߲ߕߌ߮ ߡߍ߲ ߛߎߥߊ߲ߘߌߣߍ߲߫ ߡߌ߬ߙߌ߲߬ߘߌ ߓߟߏ߫ ߢߣߊߕߊߟߌ ߘߐ߫߸ ߞߏ߫ ߞߵߊ߬ ߟߊߛߌ߰ ߓߍ߯ߦߊ ߟߊ߫߸ ߏ߬ ߟߊߛߌ߰ߕߐ߫ ߥߊ߰ߣߍ߲ ߘߐ߫ ߣߌ߲߬ ߟߏ߲ ߠߋ߬، ߟߊ߬ߛߌ߰ߟߌ ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߏ߬ ߟߏ߲ ߠߋ߬ ߝߣߊ߫ ߞߍߕߐ߫ ߖߌ߬ߣߍ߫ ߖߡߊ߬ߣߊ ߘߏ߲߬ ߟߏ߲ ߘߌ߫ ߞߊ߲ߓߍ߲߫ ߟߏ߯ߟߎߣߊ߲ ߞߣߐ߫߸ ߖߌ߰ߡߝߊ߬ ߞߏ ߛߌߦߊߡߊ߲߫ ߞߎ߲߬ߠߊ߬ߓߐ ߓߘߊ߫ ߦߋ߫ ߏ߬ ߡߍ߲ ߘߐ߫ ߕߋ߲߬ ߞߊ߬ߣߌ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
