ߞߊ߬ߦߌ߯ ߓߌ߲ߠߊߥߎߟߋ߲ ߕߟߋ߬ ߁߭ ߡߊ߬߸ ߛߋ߲߬ߓߊ߫ ߞߋ߬ߟߋ߲߬ߠߊ߬ߓߌߟߊ ߘߏ߫ ߞߊ߬ ߡߙߊ߬ߒ߬ߡߊ߬ߟߌ ߘߊߡߌ߬ߣߊ߬ ߖߊߙߑߞߊ߲ߘ ߞߊ߬ߝߏ ߞߣߐ߫߸ ߤߌ߲ߘߌ߬، ߊ߬ ߓߘߊ߫ ߕߊ߬ߘߌ߬ߓߊ߬ߕߊߘߌߓߊ ߣߌ߫ ߞߣߐ߬ߜߊ ߟߊߘߏ߲߬ ߦߋ߲߬ ߡߐ߮ ߟߎ߬ ߘߐ߫ ߕߋ߲߬ ߞߏߛߓߍ߫، ߓߊߏ߬߸ ߊ߬ ߓߘߊ߫ ߞߍ߫ ߡߐ߰ ߛߌߦߊߡߊ߲߫ ߠߋ߬ ߛߕߊ ߘߌ߫ ߞߎ߲߬ߢߐ߲߰ ߘߊ߲ߘߐ ߣߌ߲߬ ߞߣߐ߫.
ߣߴߌ ߞߊ߬ ߖߊߙߑߞߊ߲ߘ ߞߊ߬ߝߏ ߕߊ߬ ߤߌ߲ߘߌ߬ ߕߟߋ߬ߓߐ ߘߐ߫߸ ߛߋ߲߬ߓߊ߫ ߞߋ߬ߟߋ߲߬ߠߊ߬ߓߌߟߊ ߘߏ߫ ߟߋ߬ ߢߌߣߌ߲ ߦߴߌߘߐ߫ ߦߋ߲߬ ߕߋ߲߬߸ ߊ߬ߟߋ ߡߍ߲ ߣߐ߬ ߡߐ߰ ߂߂ ߓߣߐ߬ ߟߴߊ߬ ߣߌ ߘߐ߫ ߞߊߙߏ ߣߌ߲߬ ߕߟߋ߬ ߝߟߐ ߣߌ߫ ߛߌߛߍ߲߬ ߕߍ ߘߐ߫߸ ߘߌ߲߬ߞߌߙߊ ߏ߬ ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬، ߞߏߕߐ ߟߎ߬ ߘߐ߫߸ ߝߌ߬ߟߊ߬ߓߊ ߘߏ߫ ߦߴߊ߬ ߘߐ߫߸ ߏ߬ ߟߎ߬ ߣߴߊ߬ߟߎ߬ ߘߋ߲߫ ߡߐ߰ ߝߌ߬ߟߊ߬߸ ߞߵߏ߬ ߟߊ߫ ߕߎ ߟߊߞߊ߲ߘߊߓߊ߯ ߞߋߟߋ߲߫ ߞߊ߲߬߸ ߏ߬ ߟߋ ߓߍ߯ ߦߋ߫ ߕߊ߬ߡߌ߲߬ ߠߴߊ߬ ߞߏ ߟߊ߫ ߜߟߍ߬ߦߊ ߦߌ߬ߘߊ߬ ߟߊ߫.
ߊ߬ߟߋ߬ ߛߋ߲߬ߓߊ ߡߊ߫ ߦߋ߫ ߦߋߟߌ ߡߍ߲ ߞߐߝߍ߬ ߡߎߣߎ߲߬߸ ߏ߬ ߞߍ߫ ߘߊ߫ ߛ߭ߊߦߌߓߛߊ߫ ߣߐ߬ߘߎ߮ ߟߋ߬ ߘߐ߫߸ ߊ߬ ߢߌߣߌ߲߫ ߞߏ߫ ߞߎߡߊ ߓߘߊ߫ ߟߊߕߋ߬ ߝߊ߲߭ ߓߍ߯ ߟߊ߫߸ ߞߏ߫ ߞߵߊ߬ ߡߌ߬ߣߊ߬، ߝߊ߰ߡߊ ߟߎ߬ ߓߘߴߊ߬ ߢߌߣߌ߲߫ ߛߏ߫ ߞߣߐ߫ ߡߐ߮ ߓߍ߯ ߝߍ߬߸ ߞߏ߫ ߓߍ߯ ߦߴߊ߬ ߝߊ߲ߕߊ߲߬ߞߊ߫ ߛߋ߲߬ߓߊ ߣߌ߲߬ ߡߊ߬߸ ߞߵߊ߬ߟߎ߬ ߡߊߕߊ߯ ߊ߬ ߟߊ߫ ߝߋߎ߫، ߊ߬ ߕߌ߯ߕߌ߯߸ ߞߏ߫ ߓߍ߯ ߦߴߊ߬ ߡߊߕߊ߯ ߕߎߘߊ ߟߎ߬ ߟߊ߫߸ ߓߍ߯ ߦߴߊ߬ ߡߝߊ߫ ߊ߬ ߓߘߊ߫߸ ߞߊ߬ ߛߎ߫ ߘߐ߫ ߕߊ߯ߡߊ ߟߎ߬ ߕߏ߫ ߦߋ߲߬߸ ߝߊ߬ߣߌ߫ ߕߍ߮ ߡߊ߫ ߟߴߊ߬ߟߋ߬ ߛߋ߲߬ߓߊ ߘߐ߫.
ߕߎ ߟߊߞߊ߲ߘߊߓߊ߮ ߟߎ߬ ߕߊ߬ߣߍ߲ ߞߵߊ߬ ߟߊ߫ ߓߌߦߊ߲ߘߊ߲ߘߟߊ ߟߎ߫ ߞߊ߲߬߸ ߏ߬ ߕߟߋ߬ ߘߊ߲ߘߐ ߟߋ߬ ߢߌߣߌ߲ߠߌ߲߫ ߥߊ ߟߊ߫ ߕߋ߲߬߸ ߛߊ߫ ߛߋ߲߬ߓߊ ߣߌ߲߬ ߘߌ߫ ߡߌ߬ߣߊ߫ ߞߵߊ߬ ߡߊ߬ߛߎߓߊ ߓߊ߲߫، ߊ߬ߟߎ߬ ߓߘߴߊ߬ ߡߊߝߏ߬ߘߏ߫ ߛߋ߲߬ߢߊ߫ ߛߓߊ߬߸ ߏ߬ ߛߌ߫ ߡߊ߫ ߓߍ߲߬، ߝߊ߰ߡߊ ߟߎ߬ ߞߊ߲߫߸ ߞߏ߫ ߛߡߊ߬ߗߍ ߣߋ߬ ߣߌ߲߬ ߘߌ߫߸ ߜߋ߲߫ ߞߋߟߋ߲߫ ߠߋ߬ ߦߴߊ߬ ߡߊ߬، ߊ߬ߟߎ߬ ߟߊ߫ ߖߊ߬ߕߋ߬ ߘߐ߫߸ ߊ߬ ߝߢߊ ߡߍ߲ ߞߍ߫ ߘߊ߫߸ ߊ߬ ߛߋ߲߬ߓߊ߬ ߢߐ߲߮ ߕߐ߭ ߟߎ߫ ߞߵߊ߬ ߡߊ߲߬ߜߏߦߊ߫ ߏ߬ ߟߋ ߘߐ߫ ߞߵߊ߬ ߡߊߕߊ߯ ߊ߬ߟߎ߬ ߟߊ߫߸ ߊ߬ ߞߍ߫ ߘߊ߫ ߞߋ߬ߟߋ߲߬ߠߊ߬ߓߌߟߊ ߘߌ߫، ߒ߬ߓߊ߬߸ ߏ߬ ߟߋ ߓߘߊ߫ ߣߊ߬ ߞߍ߫ ߡߊ߲߬ߕߙߐ ߘߌ߫ ߦߋ߲߬ ߡߐ߮ ߟߎ߬ ߞߊ߲ߞߊ߲߬ ߛߊ߫.
ߊ߬ ߕߴߊ߬ ߡߊߛߌ߬ ߟߊ߫ ߦߙߐ߫ ߞߋߟߋ߲߫߸ ߛߋ߲߬ߓߊ ߘߏ߲߬ ߦߋ߫ ߞߎߘߍ߫ ߃߀ ߟߋ߬ ߕߊ߯ߡߊ߫ ߟߊ߫ ߕߋ߬ߟߋ ߞߘߐ߫، ߥߊ߫ ߦߙߐ߫ ߞߋߟߋ߲߫ ߕߴߊ߬ ߟߊ߫߸ ߊ߬ ߟߐ߲ߣߍ߲߫ ߕߍ߫ ߊ߬ ߥߊߣߍ߲߫ ߞߎ߲߬ߕߋ߬ߟߋ߲߬ ߞߋߟߋ߲ ߡߍ߲ ߘߐ߫، ߏ߬ ߟߋ ߓߘߴߊ߬ ߢߌߣߌ߲߫ ߞߏ ߜߟߍ߬ߦߊ߬ ߛߊ߫، ߊ߬ ߞߏ߬ߣߌ߲߸ ߡߐ߰ ߟߎ߬ ߓߘߊ߫ ߞߙߍߞߍ߫ ߊ߬ ߞߊ߲ߡߊ߬ ߓߌߦߊ߲ߘߊ߲ߘߟߊ ߟߎ߬ ߣߌ߫ ߕߎ ߟߊߞߊ߲ߘߊߓߊ߮ ߟߎ߬ ߘߐ߫߸ ߊ߬ ߢߌߣߌ߲߫ ߞߊ߲ߡߊ߬ ߞߵߊ߬ ߦߋ߫ ߞߵߊ߬ ߡߌ߬ߣߊ߬، ߊ߬ ߞߏ߬ߣߌ߲ ߠߊ߫ ߞߏ ߓߘߊ߫ ߞߍ߫ ߖߐ߬ߘߐ ߘߌ߫ ߡߐ߰ ߟߎ߬ ߞߊ߲ߞߊ߲߬߸ ߡߍ߲ ߠߎ߬ ߛߎ߬ߘߎ߲߬ߡߊ߲߬ ߕߎ ߟߊ߫.
ߤߌ߲ߘߌ߬ ߞߣߐ߫߸ ߊ߬ ߦߌ߬ߘߊ߬ߣߍ߲߫ ߝߊ߰ߡߊ ߟߎ߬ ߓߟߏ߫ ߞߏ߫ ߛߊ߲߬ ߟߏ߯ߟߎ߫ ߕߊ߬ߡߌ߲߬ߣߍ߲ ߣߌ߲߬ ߞߣߐ߫߸ ߛߋ߲߬ߓߊ ߟߎ߬ ߞߍߣߍ߲߫ ߓߌ߬ߟߊ߬ߒ߬ߘߐ߬ߖߎ߮ ߡߍ߲ ߠߎ߬ ߛߊߓߎ ߘߌ߫߸ ߊ߬ ߣߴߊ߬ߟߎ߬ ߟߊ߫ ߝߢߊ߸ ߏ߬ ߓߘߊ߫ ߞߍ߫ ߡߐ߱ ߡߍ߲ ߛߕߊ ߘߌ߫ ߛߊ߲߬ ߟߏ߯ߟߎ ߣߌ߲߬ ߞߣߐ߫߸ ߏ߬ ߘߌ߫ ߡߐ߰ ߂ ߈߀߀ ߢߐ߲߰ ߓߐ߫، ߏ߬ ߝߘߊߣߍ߲߫ ߞߎ߲߬ߠߊ߬ߛߌ߮ ߖߍ߬ߘߍ ߟߋ߬ ߟߊ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߡߐ߱ ߟߎ߬ ߣߌ߫ ߘߊ߲ߕߊ߲ ߠߎ߬ ߟߊ߫ ߛߌ߱ ߞߛߊߣߍ߲߫ ߝߊ߲߬ߞߣߐ ߏ߬ ߘߐ߫ ߦߋ߲߬ ߞߏߛߓߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
