ߡߊ߬ߛߎ߬ߓߊ߬ ߞߏ ߘߏ߫ ߟߋ߬ ߞߍߣߍ߲߫ ߞߊ߲ߞߊ߲߫ ߞߣߐ߫ ߓߌ߬ ߞߍ߲ߘߍߟߏ߲ ߣߌ߲߬ ߛߐ߱ߡߊ߬߸ ߛߍ߲߬ߞߍ߬ߝߙߊ߬ ߃߲ ߞߌ߲߬ߘߊ ߟߊ߫، ߞߊ߬ߕߎ߲߯߸ ߘߋ߲߫ ߢߊߘߊ߲߫ ߛߐ߬ߘߐ߲߬ ߛߊ߲߬ ߞߎߘߊ ߘߏ߫ ߟߋ߬ ߟߊߦߟߍ߬ߣߍ߲߫ ߞߊ߬ߓߌߣߍ ߞߣߐ߫߸ ߞߵߊ߬ ߛߐ߬ߘߐ߲߬ ߊ߬ ߖߐߞߌߣߍ߲ߓߊ ߦߋ߫߸ ߞߵߊ߬ ߕߊ߬ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫، ߓߊ߬ߙߌ߬߸ ߘߊ߲ߘߊߟߌߟߊ ߟߎ߬ ߟߊ߫ ߘߐ߬ߖߊ ߣߴߊ߬ ߕߊ߫߸ ߘߋ߲ ߡߊ߫ ߛߋ߫ ߓߐ߫ ߟߴߊ߬ ߘߐ߫߸ ߕߎ߬ߡߊ߬ߙߋ߲߬ ߘߊ߲ߘߐ߫ ߞߐߝߍ߬߸ ߊ߬ ߞߵߊ߬ ߞߐߛߊ߬ߦߌ߲߬.
ߣߌ߲߬ ߞߍ߫ ߘߊ߫ ߖߊ߲߬ߖߏ߲߫ ߠߋ߬ ߘߌ߫ ߓߌ߬߸ ߡߍ߲ ߞߊ߬ ߛߍ߲߬ߞߍ߬ߝߙߊ߬ ߃߲ ߘߏ߲߬ߞߏ ߟߎ߫ ߓߌ߬ߟߊ߫ ߛߎ߬ߣߎ߲ ߘߐ߫ ߞߏߛߓߍ߫߸ ߊ߬ ߞߍ߫ ߘߊ߫ ߞߍ߲ߘߍߟߏ߲ ߢߌ߲߬ ߠߋ߬ ߛߐ߱ߡߊ߬ ߞߊ߲ߞߊ߲߫ ߞߊ߬ߝߏ߬ߙߋ߲ ߞߣߐ߫، ߘߋ߲߫ ߢߊߘߊ߲ ߘߏ߫ ߟߋ߬ ߟߊߝߟߌ߬ߣߍ߲ ߦߋ߫ ߘߊ߫ ߢߍ߲ ߘߏ߫ ߞߣߐ߫߸ ߊߡߙߊ߫ ߞߓߊ߬ ߟߊ߫ ߟߎ ߡߊ߬، ߊ߬ ߦߋ ߏ߬ ߟߎ߬ ߓߟߏ߫߸ ߞߵߊ߬ ߦߋ߫ ߊ߬ ߕߍ߫ ߝߊ߬ߘߌ߬ ߢߌߡߊ߫ ߘߐ߫߸ ߊ߬ߟߎ߫ ߞߵߊ߬ ߡߛߊߣߌ߲ߧߊ߫ ߞߎ߲߬ߝߟߐ ߟߎ߬ ߞߍ߫ ߡߎߣߎ߲߬߸ ߞߣߊ߬ߕߏ߫ ߊ߬ ߕߊ߬ ߟߊ߫ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߟߊ߫.
ߊ߲ ߠߊ߫ ߟߌ߬ߤߟߊ߬ ߟߊߘߍ߬ߣߍ߲ ߠߎ߬ ߘߐ߫߸ ߘߋ߲ ߣߌ߲߬ ߕߎ߲߬ ߦߋ߫ ߡߏ߬ߛߏ ߟߋ߬ ߘߌ߫، ߊߡߙߊ߫ ߞߓߊ߬ ߦߋ߫ ߟߊ߬ߓߏ߬ߟߌ߬ߟߊ ߟߋ߬ ߘߌ߫ ߞߊ߲ߞߊ߲߫ ߖߌ߬ߣߍ߫ ߡߊ߬ߘߏ߬ߣߌ߲߬ߠߌ߲ ߕߐ߰ߕߐ߰ߟߌ߬ߘߊ ߟߊ߫ ߞߊ߲ߞߊ߲߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ ߣߌ߲߬ ߦߋ߫ ߘߊ߫ ߛߐ߰ߡߊ߬ߘߊ ߇ߙߋ߲ ߠߋ߬ ߡߊ߬.
<<ߘߏ߫ ߟߋ߬ ߣߊ߬ߣߍ߲߫ ߘߋ߲ ߠߊߝߟߌ߬ ߟߊ߫ ߢߍ߲߮ ߞߣߐ߫ ߦߊ߲߬، ߒ ߡߏ߬ߛߏ ߟߋ߬ ߥߟߌ߬ߣߍ߲߫ ߛߐ߱ߡߊ߬ ߞߏ߫ ߊ߬ ߕߊ߯ߕߐ߫ ߢߍ߲߮ ߠߊ߫߸ ߊ߬ ߞߊ߬ ߞߊ߬ߛߌ߬ ߞߊ߲ ߡߍ߲߫، ߊ߬ ߣߊ߬ ߘߴߊ߬ ߝߐ߫ ߞߏ߫ ߞߊ߬ ߕߊߡߍߣߍ߲ ߘߴߊ߬ ߡߊ߬߸ ߛߴߊ߬ ߘߌ߫ ߥߴߊ߬ ߡߊߝߟߍ߫ ߡߍ߲ ߦߋ߫، ߒ ߞߵߊ߬ ߢߌ߬ߣߌ߲߬ߞߊ߬ ߒ ߞߏ߫ ߡߊ߲߬ߞߊ߲ ߛߎ߯ ߢߌ߬ߡߊ߲߬ ߦߋ߫߸ ߊ߬ ߣߊ߬ ߘߊ߫ ߞߏ߫ ߒ ߖߍ߬ߘߍ ߦߋ߫ ߥߊ߫ ߒ ߢߊ ߟߴߊ߬ ߞߊ߲߬، ߒ ߥߊ߫ ߘߴߊ߬ ߛߐ߬ߘߐ߲߫ ߡߎ߬ߕߎ߲߬߸ ߖߊ߰ ߘߋ߲ ߠߋ߬ ߟߊߝߟߌ߬ߣߍ߲߫ ߞߊ߬ߓߌߣߍ ߞߣߐ߫.>> ߗߍ߭ ߟߋ߬ ߞߊ߲߫ ߕߋ߲߬.
ߛߌ߰ߢߐ߲߮ ߠߎ߬ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߏ߬ ߟߎ߫ ߣߊ߬ ߘߊ߫ ߌߞߘߐ߫ ߞߵߊ߬ ߡߊ߬ߘߍ߬ߡߍ߲߬ߠߌ߲ ߠߎ߬ ߞߍ߫߸ ߛߊ߫ ߘߋ߲ ߘߌ߫ ߛߋ߫ ߟߊߓߐ߫ ߟߊ߫ ߢߊ ߡߍ߲ ߡߊ߬.
<<ߊ߲ ߞߊ߬ ߢߍ߲߮ ߘߟߊߟߊ ߟߊߥߟߌ߬߸ ߞߊ߬ ߘߋ߲ߣߍ߲ ߘߏ߫ ߟߊߖߌ߰ ߘߋ߲ ߕߊ߬ ߞߊ߲ߡߊ߬ ߞߵߊ߬ ߟߊߦߟߍ߬، ߏ߬ ߟߋ ߞߐ߫߸ ߞߌ߲߬ߕߌ߮ ߞߐߦߌߘߊ ߣߊ߬ ߘߊ߫߸ ߞߊ߬ ߘߋ߲ ߕߊ߬ ߢߊ ߏ߬ ߡߊ߬ ߞߊ߬ ߕߊ߯ ߊ߬ ߘߌ߫ ߜߋߙߋ߲ߜߋߙߋ߲ߧߊ ߕߊ߲ߓߊ߲ ߠߊ߫، ߣߌ߲߬ ߞߏ߫ ߛߎ߮ ߛߋ߲߬ߢߊ߬ ߝߟߐ ߟߋ߬ ߒ߬ ߠߊ߫ ߞߌ߲߬ߘߊ ߞߣߐ߫ ߕߋ߲߬.>> ߊߡߙߊ߫ ߞߊ߬ߓߊ߫ ߞߵߏ߬ ߟߋ ߟߴߊ߬ ߟߊ߫ ߛߙߊ߬ߣߎ߲ ߞߊ߲߬.
ߌߞߘߐ߫߸ ߞߏߢߊ ߛߋ߫ ߘߊ߫ ߛߍ߲߬ߞߍ߬ߝߙߊ߬ ߃߲ ߞߌ߲߬ߕߌ߮ ߕߍ߯ ߞߘߐ߫߸ ߊߓߘߎߙߊߤߑߡߊߣߌ߲߬ ߞߋߕߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊߟߐ߲ߠߌ߲ ߡߍ߲ ߞߍ߫ ߘߊ߫߸ ߊ߬ ߞߊ߬ ߞߏ ߟߎ߬ ߛߌ߰ ߛߋ߲߬ߠߊ߫ ߞߵߊ߬ ߓߍ߲߬ ߓߊ߯ߙߊ ߥߊ߫ ߢߊ ߡߊ߬.
<<ߒߠߋ ߕߘߍ߬ ߓߊ߯ߙߊ߫ ߦߌߟߊ ߟߋ߬ ߘߐ߫߸ ߞߎ߲߬ߘߊ ߞߎ߲߬ߕߌ߮ ߞߊ߬ ߒ ߞߟߌ߫ ߞߊ߬ ߘߋ߲ ߘߏ߫ ߦߋ߫ ߞߏ ߝߐ߫ ߒ ߧߋ߫ ߢߍ߲߮ ߞߣߐ߫، ߞߏ߫ ߊ߬ߟߎ߬ ߓߘߊ߫ ߘߋ߲ ߠߊߦߟߍ߬ ߞߵߊ߬ ߞߏ߬، ߌߞߘߐ߫߸ ߒ ߝߣߊ߫ ߞߊ߬ ߞߊ߬ߝߏ߬ߙߋ߲߬ߕߌ߮ ߞߟߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߲ ߧߋ߫ ߞߍߕߊ ߟߎ߬ ߞߍ߫߸ ߦߏ߫ ߊ߬ߟߎ߬ ߞߊ߫ ߞߊ߲߫ ߞߊ߬ ߞߍ߫ ߢߊ ߡߍ߲ ߡߊ߬، ߘߋ߲ ߕߊ߬ ߢߊ ߟߋ߬ ߞߍߣߴߏ߬ ߘߌ߫ ߞߊ߬ ߥߴߊ߬ ߘߌ߫ ߜߋߙߋ߲ߜߋߙߋ߲ߧߊ ߕߊ߲ߓߊ߲ ߠߊ߫߸ ߏ߬ ߟߎ߫ ߞߵߊ߬ ߟߊߕߊ߬ߡߌ߲߬ ߕߌ߲߬ߞߎߘߎ߲ ߘߊ߲ߘߊߛߏ ߟߊ߫.>> ߞߌ߲߬ߕߌ߮ ߟߋ߬ ߞߊ߲߫ ߕߋ߲߬.
ߛߋ߫ ߞߍ ߘߊ߲ߘߊߛߏ ߟߊ߫߸ ߊ߬ ߦߋ߫ ߘߊ߫ ߞߏ߫ ߘߋ߲ ߠߊ߫ ߞߏ ߡߊ߲߫ ߣߐ߲߰.
ߞߌ߲߬ߕߌ߮ ߞߵߊ߬ ߦߌ߬ߘߊ߬ ߝߣߊ߫߸ <<ߘߋ߲ ߠߊߘߏ߲߬ ߘߊ߫ ߖߎ߯ߓߍߟߌ߫ ߓߏ߲ ߠߊ߫، ߘߊ߲ߘߊߟߌߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߕߏ߫ ߊ߬ ߞߎ߲߬ߠߊ߫ ߞߵߊ߬ ߟߊ߫ ߞߣߐߜߍ߲߬߸ ߓߊߏ߬ ߊ߬ ߕߍ߫ ߝߊ߬ߘߌ߬ ߢߌߡߊ߫ ߘߐ߫، ߖߋ߬ߟߌ ߕߘߍ߬ ߓߐ߫ ߟߴߊ߬ ߣߎ߲ ߘߐ߫.>> ߞߌ߲߬ߕߌ߮ ߟߋ߬ ߞߊ߲߫ ߕߋ߲߬.
ߝߊ߲ߕߊ߬ ߞߙߎ߬ߡߊ߬ ߦߋ߫ ߖߎ߬ߟߊ ߟߋ߬ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߟߋ߬ ߞߊ߬ ߘߋ߲ ߣߌ߲߬ ߛߊߣߌ߲ߧߊ߫߸ ߊ߬ ߡߞߊߘߊ߲ ߞߐ ߘߐ߫ ߞߵߊ߬ ߟߊߦߟߍ߬߸ ߏ߬ ߞߊ߬ ߞߏ ߕߊ߬ߡߌ߲߬ ߢߊ ߝߐ߫߸ ߞߌ߬ߣߌ߲߬ߞߌ߬ߣߌ߲߬ ߞߏ߬ߓߊ߫.
<<ߒ ߘߐ߯ߡߛߏ߫ ߓߏ߬ߙߌ߬ߡߊ߲߬ߕߐ ߟߋ߬ ߣߊ߬ ߘߴߊ߬ ߝߐ߫ ߒ ߧߋ߫߸ ߞߏ߫ ߘߋ߲ ߘߏ߫ ߦߋ߫ ߞߊ߬ߛߌ ߞߊ߲߬ ߢߍ߲߮ ߞߣߐ߫، ߒ ߘߐ߯ߡߛߏ߫ ߗߍ߬ ߞߊ߬ ߢߍ߲߮ ߘߊߕߎ߲߯ ߜߊߟߏ߲߫ ߊ߬ ߟߊ߫ ߏ߬ ߢߊ ߟߋ߬߸ ߞߊ߬ ߘߋ߲ߣߍ߲ ߘߏ߫ ߟߊߖߌ߰ ߞߊ߬ ߘߋ߲ ߠߊߦߟߍ߬، ߊ߬ߟߎ߫ ߞߵߊ߬ ߘߌ߫ ߒ ߡߊ߬ ߞߏ߫ ߒ ߧߴߊ߬ ߞߏ߬، ߒ ߞߵߊ߬ ߦߋ߫ ߊ߬ ߝߊ߬ߘߌ ߝߊ߲߭ ߘߏ߫ ߟߎ߫ ߡߊߘߌߡߌ߲ߣߍ߲߫߸ ߘߊ ߦߴߊ߬ ߞߣߐ ߡߊ߬߸ ߖߋ߬ߟߌ ߦߋ߫ ߓߐ߫ ߟߴߊ߬ ߣߎ߲ ߝߍ߬.>> ߓߐ߬ߟߐ߲߬ߞߊ ߏ߬ ߟߋ ߞߊ߲߫ ߕߋ߲߬.
ߛߌߦߊߞߊ߬ ߞߡߊ߬ߙߊ߬ ߡߍ߲ ߦߋ߫ ߞߎ߲߬ߘߊ ߏ߬ ߞߎ߲߬ߕߌ߰ߦߊ ߟߊ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߴߊ߬ߟߎ߬ ߛߋߞߏ ߞߍ߫ ߣߌ߲߬ ߞߏ ߘߐ߫.
<<ߒ ߘߍ߬ߢߐ߲߮ ߘߏ߫ ߟߋ߬ ߞߊ߬ ߒ ߠߊߟߐ߲ߠߌ߲߫، ߒ ߝߣߊ߫ ߞߊ߬ ߞߌ߲߬ߕߌ߮ ߟߊߟߐ߲ߠߌ߲߫ ߒߞߘߐ߫، ߒ ߞߏ߬ߣߌ߲ ߦߋ߫ ߝߊ߰ߡߊ ߟߎ߫ ߛߊ߬ߥߏ߬ ߘߐ߫߸ ߊ߬ ߣߴߊ߲ ߘߌ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߛߌ߰ ߛߋ߲߬ߠߊ߫߸ ߛߊ߫ ߣߌ߲߬ ߞߏ߫ ߛߎ߮ ߟߎ߬ ߘߌ߫ ߡߊߕߊ߲߬ߞߊ߬ ߢߊ ߡߍ߲ ߡߊ߬، ߕߋ߲߭ߕߋ߲߭ ߣߌ߲߬ ߞߏ߬ߣߌ߲ ߘߐ߫߸ ߘߋ߲ ߞߐߡߐ߯ ߛߌ߫ ߡߊ߫ ߛߋ߫ ߟߐ߲߫ ߠߊ߫ ߡߎߣߎ߲߬.>> ߛߌߦߊߞߊ߬ ߟߋ߬ ߞߊ߲߫ ߕߋ߲߬.
ߓߐ߬ߟߐ߲߬ߞߊ߬ ߞߎߙߊߣߌ߫ ߞߏ߬ߣߊ߬ߕߍ߬ ߝߣߊ߫ ߕߘߍ߬ ߘߊ߲ߘߊߛߏ ߟߊ߫ ߦߋ߲߬߸ ߊ߬ߟߋ ߡߍ߲ ߦߋ߫ ߓߊ߯ߙߊ߫ ߟߊ߫ ߊߘߡߊߦߊ ߞߏߢߊ ߟߎ߬ ߗߋߕߌ߯ߘߊ߫ ߡߙߊ߬ߓߊ߰ߘߟߊ߬ߞߊ ߟߎ߬ ߞߊ߲ߞߊ߲߫ ߞߣߐ߫߸ ߣߴߊ߬ߟߎ߫ ߘߐ߱ߘߏ߲߬ߣߍ߲߫ ߘߋ߲ߣߍ߲ߧߊ ߣߌ߫ ߟߐ߬ߦߙߌ߬ߕߐ ߟߎ߬ ߟߊ߫ ߞߏߢߊ ߟߊ߫߸ ߏ߬ ߝߣߊ߫ ߞߵߊ߬ ߖߎ߬ߛߎ ߜߏߦߊߣߊ߲߫ ߞߊ߲ ߠߎ߬ ߦߌ߬ߘߊ߫ ߣߌ߲߬ ߞߏ ߘߐ߫.
<<ߒ ߛߎ߬ߣߎ߲߬ߣߍ߲߬ߓߊ ߟߋ߬ ߕߋ߲߬، ߞߵߏ߬ ߞߎ߲߭ ߞߍ߫ ߡߎ߲߬ ߘߌ߫߸ ߡߍ߲ ߦߋ߫ ߕߊ߬ߡߌ߲ ߞߊ߲߬ ߞߊ߲ߞߊ߲߫ ߕߋ߲߬߸ ߊ߬ ߛߎ߬ߣߎߎ߲ ߓߏ߲߬ߓߊ߫ ߤߊ߲߫، ߊ߬ ߛߋ߲߬ߢߊ߬ ߣߊ߯ߣߌ߲ߣߊ߲ ߠߋ߬ ߕߋ߲߬߸ ߊ߲ ߧߋ߫ ߣߌ߲߬ ߞߏ߫ ߛߎ߮ ߡߍ߲ ߞߊ߬ߟߊߡߊ߬، ߞߏ߬ߣߌ߲߬ ߞߊ߬ ߘߋ߲ ߓߌ߬ߟߊ߫ ߞߊ߬ߓߌߣߍ ߞߣߐ߫߸ ߏ߬ ߝߣߊ߫ ߦߴߊ߬ ߕߊ߫ ߞߓߊߞߏ߫ ߘߌ߫، ߏ߬ ߟߋ ߘߐ߫߸ ߊ߲ ߧߋ߫ ߡߏ߬ߛߏ ߟߎ߬ ߞߟߌ߫ ߟߊ߫ ߡߍ߲ ߡߊ߬߸ ߊ߬ߟߎ߬ ߦߴߊ߬ߟߎ߬ ߘߋ߲ ߠߎ߬ ߘߌ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߘߌ߫ ߛߋ߫ ߘߋ߲ ߠߊߘߊ߬ߙߏ߬ ߟߊ߫߸ ߥߟߊ߫ ߞߊ߬ ߥߴߊ߬ߟߎ߬ ߘߌ߫ ߦߙߐ߫ ߘߐ߫߸ ߡߍ߲ ߠߎ߬ ߟߊߘ߲ߊߣߍ߲߫ ߏ߬ ߛߎ߮ ߟߎ߬ ߞߊ߲ߡߊ߬، ߏ߬ ߞߊ߫ ߝߌ߬ߛߊ߫ ߣߌ߲߬ ߛߎ߮ ߘߌ߫ ߘߋ߬.>> ߊ߬ ߞߵߏ߬ ߟߋ ߦߌ߬ߘߊ߬.
ߊ߬ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߊ߬ߟߎ߬ ߓߍߣߊ߬ ߣߌ߲߬ ߞߏ ߢߊߢߌߣߌ߲߫ ߛߊ߬ߙߌ߬ߦߊ߬ ߞߎ߲ߘߊ߫߸ ߣߌ߫ ߘߋ߲ ߛߐ߬ߘߐ߲߬ߓߊ߮ ߟߐ߲߫ ߘߊ߫ ߞߊ߬ߣߌ߲߬.
<<ߣߌ߫ ߡߏ߬ߛߏ ߦߋ߫ ߘߊ߫߸ ߡߍ߲ ߞߊ߬ ߘߋ߲ ߢߌ߲߬ ߠߊߝߌ߬ߟߌ߫ ߣߌ߲߬ ߢߊ߸ ߏ߬ ߘߌ߫ ߟߊߕߊ߬ߡߌ߲߫ ߛߊ߬ߙߌ߬ߦߊ߬ ߢߊߞߘߐ߫ ߝߋߎ߫، ߣߌ߫ ߘߋ߲ ߞߏ߬ߣߌ߲ ߓߊ߲߫ ߘߊ߫ ߡߊߝߟߍ߫ ߟߊ߫ ߘߊ߲ߘߊߟߌߟߊ ߟߎ߬ ߓߟߏ߫ ߛߌߛߍ߲߬߸ ߡߍ߲ ߠߎ߬ ߞߵߊ߬ ߦߋ߫߸ ߊ߬ ߘߌ߫ ߘߌ߫ ߏ߬ ߟߎ߫ ߡߊ߬ ߡߎߣߎ߲߬߸ ߦߊ߬ߣߌ߫ ߞߎ߲߬ߠߊ߬ߛߌ߮ ߞߍߕߐ߫ ߊ߬ ߟߐ߬ ߟߴߊ߬ ߟߊ߫ ߞߏ ߟߊ߫ ߞߐ߬ߓߊ߬ߟߏ߲߫ ߣߊ߬ߕߐ.>> ߓߐ߬ߟߐ߲߬ߞߊ߫ ߞߏ߬ߣߊ߬ߕߍ߫ ߞߵߏ߬ ߟߋ ߖߌ߰ߡߝߊ߬ ߞߊ߲ ߝߐ߫.
ߓߊ߬ߙߌ߬߸ ߊ߲ ߕߏ߫ ߘߊ߫ ߟߌ߬ߤߟߊ ߣߌ߲߬ ߠߊߘߍ߭ ߟߋ߬ ߞߊ߲߬ ߞߵߊ߬ ߛߓߍ߫߸ ߘߋ߲ߣߍ߲ ߠߎ߬ ߣߌ߫ ߟߐ߬ߦߙߌ߬ߕߐ ߟߎ߬ ߟߊ߫ ߞߏ ߦߋ߫ ߗߋߢߘߊ ߡߍ߲ ߓߟߏ߫߸ ߏ߬ ߟߎ߫ ߞߵߊ߲ ߥߟߋ߫ ߞߏ߫ ߘߋ߲ ߡߊ߫ ߛߋ߫ ߓߐ߫ ߟߴߊ߬ ߘߐ߫߸ ߞߏ߫ ߊ߬ ߓߘߴߊ߬ ߞߐߛߊ߬ߦߌ߲߬߸ ߘߊ߲ߘߊߟߌߟߊ ߟߎ߬ ߟߊ߫ ߘߐ߬ߖߊ ߓߍ߯ ߣߴߊ߬ ߕߊ߫، ߊ߲ ߞߏ߬ߣߌ߲ ߡߴߊ߬ ߟߐ߲߫ ߡߎߣߎ߲߬ ߣߌ߫ ߢߊߢߌߣߌ߲ߠߌ߲߫ ߘߌ߫ ߛߌ߰ ߛߋ߲߬ߠߊ߫ ߞߊ߬ ߣߌ߲߬ ߞߏ ߢߊߢߌߣߌ߲߫ ߓߊ߬ ߞߵߊ߬ ߢߊߘߐߜߍ ߟߐ߲߫، ߊ߬߬ ߞߏ߬ߣߌ߲ ߞߍߣߍ߲߫ ߦߙߐ ߡߍ߲ ߘߐ߫߸ ߦߋ߲߬ ߡߐ߮ ߓߍ߯ ߟߋ߬ ߞߓߊߞߏߦߊߣߍ߲߫ ߊ߬ ߞߏ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬߸ ߞߊ߬ߙߌߝߊ߬ ߘߎ߲߬ߓߎ߬ߦߊ߬߸ ߏ߬ ߟߎ߫ ߟߋ߬ ߕߘߍ߬ ߞߣߍ ߞߊ߲߬
