ߞߎߡߊ߫ ߛߊߡߊ߲߫ ߢߐ߲߯ ߣߌ߫ ߛߐ߬ߛߐ߬ߟߌ߬ ߡߌߛߍ߲ ߠߎ߬ ߓߍ߯ ߟߊߘߍ߬ߣߍ߲ ߞߐߝߍ߬߸ ߞߊ߲ߞߊ߲߫ ߛߏߞߣߐߟߊ ߞߊ߬ߝߏ߬ߙߋ߲ ߞߵߊ߬ ߟߊ߫ ߂߀߂߆ ߝߛߎߞߎ߫ ߞߎ߲߬ߝߟߐ ߟߊߘߌ߬ߢߍ߫ ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߂߀߂߆ ߞߏ߲ߞߏߜߍ ߕߋ߬ߟߋ߫ ߉߸ ߓߍ߲߬ ߞߍ߫ ߘߊ߫ ߖߕ ߥߟߎ߬ߡߊ߬ ߆،߁߇߄ ߣߌ߫ ߞߐ߫ ߟߋ߬ ߡߊ߬߸ ߏ߬ ߟߊߘߌ߬ߢߍ߬ ߘߊ߫ ߓߌ߬ߟߊ߬ߒ߬ߘߐ߬ ߟߊߘߍ ߣߌ߫ ߝߛߎߞߎ߫ ߟߊߘߍ ߟߊߞߊ߬ߝߏ߬ߣߍ߲ ߠߋ߬ ߘߐ߫ ߞߊ߬ߝߏ߬ߙߋ߲ ߘߐ߬ߞߘߌ߬ߟߌ߬ ߝߏ߮ ߞߣߐ߫.
ߟߊ߬ߘߍ ߣߌ߲߬ ߞߎ߲߬ߠߊߛߌ߰ ߘߊ߫ ߞߊ߲ߞߊ߲߫ ߡߙߊ߬ߓߊ߮ ߟߋ߬ ߓߟߏ߫߸ ߡߏ߬ߤߊ߬ߡߍ߬ߘ ߢߊ߲ߜ߭߸ ߏ߬ ߡߍ߲ ߛߋ߲߬ߢߊ߬ ߝߟߐ ߦߋ߫ ߕߋ߲߬ ߞߊ߬ߣߌ߲߬، ߢߐ߲߯ߦߋ ߣߌ߲߬ ߞߊ߬ ߗߋߘߋ߲߫ ߓߟߏߡߊߞߊ߬ߣߍ߲ ߛߌ߲߬ߝߏ߲ ߓߍ߯ ߟߋ߬ ߟߊߘߐ߬ ߦߙߐ߫ ߞߋߟߋ߲߫߸ ߊ߬ ߣߌ߫ ߣߊ߲߬ߒ߬ߕߊ߲߬ ߘߍ ߣߌ߫ ߞߌ߲߬ߕߌ߮ ߟߎ߬ ߣߌ߫ ߝߐ߰ߓߍ߬ߦߊ߬ߟߊ ߟߎ߬، ߞߎߡߘߊ ߕߎ߲߬ ߕߍ߫ ߘߏ߫ ߜߘߍ߫ ߘߌ߫: ߞߊ߬ ߓߌ߬ߟߊ߬ߒ߬ߘߐ߬ ߟߊߘߍ߫ ߟߊߘߎ߲ߣߍ߲ ߞߎ߲߭ߝߊ߰߸ ߞߊ߬ ߂߀߂߅ ߡߊ߬ߡߙߊ߬ߟߌ ߖߊ߬ߕߋ߬ߘߊ ߘߐߢߌߡߌ߲߫߸ ߊ߬ ߣߌ߫ ߞߊ߬ ߂߀߂߆ ߝߛߎߞߎ ߟߊߘߌ߬ߢߍ߬.
ߟߊ߬ߘߍ ߣߌ߲߬ ߘߐ߫߸ ߞߊ߬ߝߏ߬ߙߋ߲ ߞߏ ߟߎ߬ ߡߊߡߙߊ߬ ߢߊ ߡߊߞߕߌ߫ ߘߊ߫߸ ߦߏ߫ ߟߌ߬ߤߟߊ߬ ߛߐ߬ߘߐ߲߬ߓߊߟߌߦߊ (ߢߐ߲߯ ߠߊߟ߲ߠߌ߲ߓߊߟߌߦߊ)߸ ߊ߬ ߣߌ߫ ߓߊ߯ߙߊ ߟߎ߬ ߞߍߓߊߟߌߦߊ ߢߐ߲߮ ߝߍ߬، ߛߌ߲߬ߝߏ߲ ߠߎ߬ ߣߌ߫ ߣߊ߲߬ߒ߬ߕߊ߲߬ ߘߍ߸ ߏ߬ ߟߎ߫ ߞߊ߬ ߜߍߦߊ ߛߋ߲ߛߋߘߋ߲ߧߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ ߦߋ߫ ߘߎ߰ߘߋ߲ ߠߎ߬ ߟߊ߫ ߗߋߟߊ ߟߋ߬ ߟߊ߫߸ ߏ߬ ߞߏ ߟߎ߬ ߞߊ߫ ߞߊ߲߫ ߞߊ߬ ߥߊ߫ ߢߊ ߡߍ߲ ߡߊ߬߸ ߏ߬ ߡߊ߫ ߛߋ߫ ߡߊߓߏ߲߬ߧߊ߬ ߟߊ߫ ߓߊ߯ߙߊ ߞߎ߲߬ߕߊ߮ ߞߣߐ߫ ߦߏ߫ ߊ߬ߟߎ߬ ߦߴߊ߬ ߝߍ߬ ߢߊ ߡߍ߲ ߡߊ߬.
ߝߐߢߐ߲߯ߞߐ ߏ߬ ߟߎ߬ ߓߍ߯ ߣߴߊ߬ ߕߊ߫߸ ߝߛߎߞߎ ߣߊ߬ ߘߊ߫ ߟߊߘߌ߬ߢߍ߬ ߓߍ߯ ߟߊ߫ ߓߍ߲߬ߡߊ ߟߊ߫߸ ߞߊ߬ ߛߌߟߊ ߟߊߞߊ߬ ߡߊ߬ߡߙߊ߬ߟߌ߬ ߞߎߘߊ߫ ߦߋ߫.
ߟߊ߱ߖߌ߬ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߫ ߞߵߊ߬ ߦߌ߬ߘߊ߬߸ ߞߏ߫ ߊ߬ߟߋ ߛߍߥߊߣߍ߲߫ ߣߌ߲߬ ߞߏ ߘߐ߫ ߞߏߛߓߍ߫، ߓߊߏ߬߸ ߖߡߊ߬ߣߊ߬ߘߋ߲ ߠߎ߬ ߓߘߴߊ߬ ߟߐ߲߫ ߡߎ߬ߕߎ߲߬ ߡߍ߲ ߦߋ߫ ߕߊ߬ߡߌ߲߬ ߠߊ߫߸ ߊ߬ߟߎ ߖߍ߬ߘߍ ߝߣߊ߫ ߓߘߴߊ߬ߟߎ߫ ߓߙߍ߬ ߟߐ߲߫، <<ߊ߬ ߞߎߡߊ ߜߊ߬ ߘߊ߫ ߝߛߊߦߌ߫߸ ߓߊ߬ߙߌ߬ ߕߐ߬ߣߐ ߞߍ߫ ߘߴߊ߬ ߟߊ߫، ߓߍ߯ ߓߘߊ߫ ߥߟߊ߬ߘߊ߫ ߛߐ߬ߘߐ߲߬ ߊ߬ ߞߣߐ߫.>> ߞߊ߬ߝߏ߬ߙߋ߲߬ߕߌ߮ ߟߋ߬ ߞߊ߲߫ ߕߋ߲߬.
ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߲ߕߌ߮ ߞߊ߬ ߘߎ߰ߘߋ߲ߧߊ ߝߛߎߞߎ߫ ߣߊ߬ߕߐ ߦߌߘߊߞߊ߬ ߞߏ ߝߐ߫߸ ߏ߬ ߡߍ߲ ߞߎ߲߭ ߞߍߕߐ߫ ߞߊ߬ߝߏ߬ߙߋ߲ ߠߊ߫ ߕߣߐ߬ ߟߊߘߏ߲߬ߣߍ߲ ߠߎ߬ ߣߌ߫ ߟߊ߲ߞߎ߲ ߠߎ߬ ߢߊߝߐ ߘߌ߫ ߘߎ߬ߘߋ߲ ߠߎ߬ ߦߋ߫.
<<ߊ߲ ߘߌߣߊ߬ ߢߊߝߐߟߌ߫ ߘߐߞߣߍߣߍ߲߫ ߞߍ߫ ߖߊ߬ߡߊ ߦߋ߫ ߦߋ߲߬߸ ߞߵߊ߬ ߦߌ߬ߘߊ߬ ߓߍ߯ ߟߊ߫߸ ߞߊ߬ߝߏ߬ߙߋ߲ ߦߋ߫ ߥߊߘߌ ߡߍ߲ ߠߊߘߍ߬ ߟߊ߫߸ ߏ߬ ߦߋ߫ ߞߍ߫ ߟߊ߫ ߘߌ߬߸ ߊ߬ ߣߴߊ߬ߟߎ߬ ߦߋ߫ ߛߐ߬ߘߐ߲߬ ߠߊ߫ ߘߌ߬߸ ߏ߬ ߡߍ߲ ߦߋ߫ ߘߏ߲߬ ߠߊ߫ ߞߊ߲ߞߊ߲߫ ߠߊߥߙߎߞߌ ߘߊ ߟߊ߫ ߞߊ߬ߣߌ߲߬.>> ߊ߬ ߞߵߏ߬ ߟߋ ߦߌ߬ߘߊ߬߸ ߞߏ߫ ߓߍ߯ ߡߊߞߟߌߣߍ߲߫ ߓߊ߬ߕߏ߲߬ߓߊ ߟߊ߫ ߏ߬ ߞߏߢߊ ߞߊ߲ߡߊ߬.
ߣߴߌ ߘߏ߲߬ ߞߊ߬ ߣߊߞߊ߬ߣߌ߲߫ ߞߏ߬ߣߊ߬ߕߍ߫ ߕߊ߬߸ ߏ߬ ߡߍ߲ ߦߋ߫ ߞߊ߬ߝߏ߬ߙߋ߲ ߣߊ߲߬ߝߟߏ߬ߦߊ߬ߟߌ ߥߛߊ߬ߓߊ߰ߦߊ ߞߊ߲ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߟߊ߬ߘߍ ߣߌ߲߬ ߞߍ߫ ߘߊ߫ ߛߋ߲߬ߕߊ߬ߓߊ߫ ߟߋ߬ ߘߌ߫ ߞߊ߬ߝߏ߬ߙߋ߲ ߠߊ߫ ߞߏ ߘߐ߫.
<<ߛߊ߲߬ ߞߋߟߋ߲߫ ߞߊߙߏ߫ ߛߋߦߌ߲߫ ߛߍ߬ߘߏ߲ ߞߐߝߍ߬߸ ߛߊ߫ ߟߌ߬ߤߟߊ ߟߋ߬ ߘߌ߫ ߛߐ߬ߘߐ߲߫ ߞߊ߬ ߘߎ߰ߘߋ߲ ߠߎ߬ ߟߊߞߍ߫ ߞߏ ߟߎ߬ ߞߊ߬ߟߊߡߊ߬߸ ߊ߲ ߕߍ߮ ߓߘߊ߫ ߟߊ߫ ߏ߬ ߘߐ߫ ߓߌ߬ ߞߊ߬ ߞߊ߬ߝߏ߬ߙߋ߲ ߠߊ߫ ߣߊ߲߬ߝߟߏ߬ ߞߏ ߟߊߕߊ߯ߡߊ߫ ߢߊ ߟߐ߲߫߸ ߞߊ߬ ߓߊ߲߫ ߞߊ߬ ߞߊ߬ߝߏ߬ߙߋ߲ ߞߣߐߟߊ ߖߍ߬ߘߍ ߝߣߊ߫ ߥߊ߫ ߢߊ ߟߐ߲߫، ߏ߬ ߞߍߣߍ߲߫ ߥߛߊ߬ ߞߏ߬ߓߊ߫ ߟߋ߬ ߘߌ߫߸ ߊ߲ߠߎ߬ ߣߌ߫ ߘߎ߰ߘߋ߲ ߠߎ߬ ߓߍ߯ ߡߊ߬.>> ߊ߬ ߞߵߏ߬ ߟߋ ߦߌ߬ߘߊ߬.
ߞߊ߲ߞߊ߲߫ ߡߙߊ߬ߓߊ߮ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߍ߲ ߜߏߦߊ߫ ߘߴߊ߬ߟߋ ߦߋ߫ ߣߌ߲߬ ߞߏ ߘߐ߫߸ ߏ߬ ߟߋ ߞߍ߫ ߘߊ߫ ߞߊ߬ߝߏ߬ߙߋ߲ ߞߏߟߊߕߍ߮ ߟߎ߬ ߟߊ߫ ߓߊ߯ߙߓߊߟߌߦߊ ߘߌ߫ ߢߐ߲߯ ߝߍ߬ ߂߀߂߅ ߟߊ߫، ߏ߬ ߟߋ ߘߐ߫߸ ߊ߬ ߞߵߊ߬ ߞߊ߲ߠߊߘߌ߫ ߊ߬ߟߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬.
<<ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߫ ߞߊ߲߫ ߞߵߊ߬ߟߎ߬ ߣߙߊ߫ ߢߐ߲߮ ߠߊ߫ ߟߋ߬߸ ߞߵߊ߬ߟߎ߬ ߞߣߐ ߜߍ߫߸ ߞߵߊ߬ߟߎ߬ ߢߊ ߓߍ߲߬ ߥߙߎߞߌ ߡߊ߬߸ ߞߵߊ߬ߟߎ߬ ߣߌ ߟߊ߫ ߛߊ߲߭ ߣߊ߲߬ߝߟߏ߬ ߞߏ ߢߍߥߟߊ߫ ߕߋ߬ߣߍ߲ ߠߎ߬ ߓߐߢߟߊ ߞߊ߲߬.>> ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭ ߞߵߏ߬ ߟߋ ߦߌ߬ߘߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߓߍߣߵߊ߬ ߢߊ ߕߏ߫ ߞߊ߬ߝߏ߬ߙߋ߲ ߣߴߊ߬ ߟߊ߫ ߣߊ߲߬ߝߟߏ߬ ߞߏ ߟߎ߬ ߝߍ߬ ߟߋ߬ ߡߎ߬ߕߎ߲߬ ߖߋߞߎߖߋߞߎ߫.
ߢߐ߲߯ ߢߊߦߋߓߊߟߌߦߊ ߟߎ߬ ߣߴߊ߬ ߕߊ߫߸ ߂߀߂߆ ߝߛߎߞߎ ߛߋ߫ ߘߊ߫ ߟߊߘߌ߬ߢߍ߬ ߟߊ߫߸ ߏ߬ ߞߍ߫ ߘߊ߫ ߞߏߓߊ߫ ߟߋ߬ ߘߌ߫ ߞߊ߬ߝߏ߬ߙߋ߲ ߡߊ߬ߙߊ ߘߐ߫، ߓߍ߯ ߢߊ ߦߴߏ߬ ߟߋ ߝߍ߬ ߡߎ߬ߕߎ߲߬߸ ߓߍ߯ ߕߟߏ ߦߴߏ߬ ߟߋ ߝߍ߬ ߡߎ߬ߕߎ߲߬߸ ߞߵߊ߬ ߟߐ߲߫ ߊ߬ߟߎ߬ ߞߍߕߐ߫ ߊ߬ ߞߏ ߟߊߕߊ߯ߡߊ߫ ߟߊ߫ ߢߊ ߡߍ߲ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
