ߖߊ߲߬ߞߊߙߏ ߓߍ߯ ߣߴߊ߬ ߓߊߛߌ߫ ߟߋ߬، ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߓߌ߫ ߥߊߘߌ߫ ߞߏ߫ ߜߟߍߦߊ ߘߊ߲ߘߊ ߡߊ߬ ߡߎ߬ߕߎ߲߬ ߛߍߣߍ߲߬ ߝߋߎ߫߸ ߏ߬ ߡߍ߲ ߓߘߊ߫ ߘߌ߯ ߓߍ߯ ߟߊߘߍ߬ߣߍ߲ ߠߊ߫ ߖߡߊ߬ߣߊ ߞߣߐ߫ ߕߋ߲߬߸ ߊ߬ ߕߌ߯ߕߌ߯ ߜߍߓߏ߲߫ ߠߊ߫ ߡߐ߮ ߟߎ߬ ߣߌ߫ ߣߊ߲߬ߝߟߏ߬ ߟߊ߬ߓߊ߰ߙߊ߬ߟߊ ߟߎ߬.
ߞߐ߬ߟߏ߲ ߣߌ߲߬ ߡߊ߬ ߂߀߂߆ ߕߙߊߓߊ ߕߟߋ߬ ߁߇߸ ߞߊ߲ߕߌ߮ ߕߊ߯ ߘߊ߫ ߓߙߊ߬ߒ߬ߘߐ߬ ߓߐߒߡߊߟߌ ߟߋ߬ ߟߊ߫ ߞߏߕߌ߯ ߝߟߐߘߊ ߟߊ߫، ߊ߬ ߟߊ߫ ߕߊ߯ߟߌ ߏ߬ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߊ߬ ߞߊ߬ ߖߡߊ߬ߙߌ߬ ߜߍߟߍ߲ ߠߎ߬ ߘߌ߫߸ ߡߍ߲ ߠߎ߬ ߟߐ߬ߣߍ߲߫ ߖߡߊ߬ߣߊ ߟߊߕߊ߯ߡߊ߫ ߢߊ߫ ߛߌߦߊߡߊ߲߫ ߠߎ߫ ߡߊ߬.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ߫ ߦߙߐ߫ ߛߌ߫ ߡߴߊ߬ ߟߊ߫ ߗߋߘߊߕߌ߮ ߟߎ߫ ߛߙߊ߬ ߞߏ ߢߊߓߐ ߘߍ߲߫ ߜߍߓߏ߲ ߠߊ߫ ߡߎߣߎ߲߬߸ ߏ߬ ߓߍ߯ ߦߴߊ߬ ߞߊߘߊ߲߫ ߞߵߏ߬ ߞߍ߫ ߞߊߟߌߦߊ߫ ߘߐ߫ ߌߞߘߐ߫، ߡߍ߲ ߠߎ߬ ߡߴߏ߬ ߛߌߟߊ ߕߊ߯ߡߊ ߘߊߡߌ߬ߣߊ߬ ߡߎߣߎ߲߬߸ ߞߊߙߏ߫ ߛߊ߬ߓߊ߫ ߟߋ߬ ߘߌ߫ ߘߴߏ߬ ߟߎ߫ ߡߊ߬߸ ߊ߬ߟߎ߬ ߦߋ߫ ߞߏ ߟߎ߬ ߓߐ߫ ߊ߬ ߛߌߟߊ ߝߍ߬.
ߡߙߌߘߐ߫ ߕߣߐ߬ߡߊ߬ ߜߘߍ߫ ߝߣߊ߫ ߕߊ߬ ߘߊ߫߸ ߡߍ߲ ߠߎ߬ ߦߋ߫ ߣߊ߬ ߟߊ߫ ߞߙߊ߬ߖߊߥߏ ߟߎ߬ ߘߌ߫ ߞߊ߬ ߓߐ߫ ߊ߬ ߘߌ߫ ߞߐߞߊߊ߲߬ ߟߊ߬ߛߣߍ ߕߊ߫ ߓߟߏ ߡߊ߬߸ ߏ߬ ߓߍ߯ ߦߴߊ߬ ߟߊ߫ ߥߊߘߌ ߟߎ߫ ߛߙߊ߬ ߟߊ߫ ߜߍߓߏߏ߲ ߠߋ߬ ߟߊ߫ ߡߎ߬ߕߎ߲߬، ߞߊ߬ ߓߐ߫ ߜߍߓߏ߲ ߞߐ߫߸ ߥߊߘߌ߫ ߛߊ߬ߙߊ ߟߊߕߐ߲ߣߍ߲߫ ߠߋ߬ ߛߌߟߊ߫ ߜߘߍ ߓߍ߯ ߝߍ߬. ߞߵߊ߬ ߟߊߥߟߌ߬ ߡߙߌߦߊ ߏ߬ ߡߊߓߏ߲߬ߧߊ ߡߊ߬߸ ߊ߬ ߦߋ߫ ߘߌߦߊߜߏߦߊ ߟߋ߬ ߘߌ߫ ߞߊ߬ ߥߊߘߌ߫ ߛߙߊ߬ߣߍ߲ ߘߊ߬ߟߎ ߦߌ߬ߘߊ߬߸ ߞߊ߬ ߝߘߊ߫ ߜߍߓߏ߲ ߠߊ߫߸ ߏ߬ ߦߌ߬ߘߊ߬ߕߐ߫ ߕߊ߬ߡߌ߲߬ߘߊ߬ߕߌ߮ ߟߎ߫ ߟߋ߬ ߟߊ߫.
ߡߙߌߘߐ߫ ߕߊ߬ߣߍ߲ ߠߎ߬ ߘߐ߫ ߝߣߊ߫߸ ߜߍ߬ߟߍ߲߬ߡߊ߬ߓߊ ߘߏ߫ ߦߴߊ߬ ߘߐ߫، ߏ߬ ߦߋ߫ ߡߎ߲߬ ߘߌ߫߸ ߖߌ߬ߣߍ߬ ߕߊ߲ߓߊ߲ ߜߍߓߏ߲ ߞߊ߫ ߞߊ߲߫ ߞߊ߬ ߥߊߘߌ߫ ߞߎߘߊ߫ ߓߌ߬ߟߊ߫ ߖߌ߬ߣߍ߬ ߕߊߡߊ߲ ߘߐ߫߸ ߣߊߟߌ߬ߡߎ߲߬ ߅߀ ߀߀߀ ߜߍߓߟߎ ߘߌ߫، ߏ߬ ߓߊ߯ ߟߊߓߐ߫߸ ߞߊߙߏ߫ ߝߌ߬ߟߊ߫ ߟߋ߬ ߘߌߕߐ߫ ߅ ߀߀߀ ߣߌ߫ ߁߀ ߀߀߀ ߜߍߓߟߎ߫ ߕߌ߮ ߟߎ߫ ߡߊ߬߸ ߊ߬ߟߎ߬ ߦߴߊ߬ߟߎ߬ ߟߊ߫ ߥߊߘߌ ߟߎ߬ ߟߊߘߏ߲߬ ߜߍߓߏ߲ ߠߊ߫ ߞߵߊ߬ߟߎ߫ ߝߊ߬ߟߋ߲߬.
ߞߏߢߊ ߣߌ߲߬ ߦߋ߫ ߢߍ߬ߣߍ߲߬ߡߊ߬ߞߏ߬ߓߊ߫ ߟߋ߬ ߘߌ߫߸ ߡߍ߲ ߦߋ߫ ߖߡߊ߬ߣߊ ߞߎ߲߬ߞߊ߲߬ߞߏ ߘߌ߫ ߕߋ߲߬، ߏ߬ ߟߋ ߘߐ߫߸ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߘߊ߲߭ߛߌ߰ ߟߋ߬ ߘߊ߲߬ߠߊ߬ߕߊߡߌ߲ ߠߊ߫ ߖߌ߬ߣߍ߫ ߞߎ߲߬ߠߊ߬ߛߌ߮ ߓߊ߯ߙߟߊ ߟߎ߫ ߝߊ߲߭ ߝߍ߬߸ ߖߐ߲߰ߛߊ߫ ߥߊߘߌ߫ ߟߊߓߊ߯ߙߟߊ ߟߎ߬ ߘߌ߫ ߟߊ߲߬ߝߌߦߊ߫ ߛߐ߬ߘߐ߲߬ ߞߏ ߟߎ߬ ߘߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
