ߤߊߓߌ߫ ߛߋߞߎ߫ ߛߊ߬ߞߐ߬ ߡߍ߲ ߕߐ߮ ߕߎ߲߬ ߓߘߊ߫ ߞߍ߫ ߒߞߏ ߛߍ߬ߘߏ߲߬ߠߊ ߟߎ߬ ߘߊߘߐ߫ ߘߐ߲ߞߟߌ ߘߌ߫ ߓߟߐߟߐ ߞߊ߲߬ ߕߋ߬ߟߋߝߌ߬ߟߊ ߣߌ߲߬ ߘߐ߫߸ ߣߴߊ߬ ߦߋ߫ ߒߞߏ ߘߋ߬ߙߌ߬ߘߊ߫ ߡߊ߲߬ߘߋ߲߬ ߗߋߕߌ߯ ߞߘߐ߫ ߘߌ߫߸ ߏ߬ ߓߘߊ߫ ߖߌ߬ߦߊ߬ߖߟߎ ߘߏ߫ ߞߍ߫ ߂߀߂߆ ߕߙߊߓߊ ߕߋ߬ߟߋ߫ ߂߀ ߣߌ߲߬ ߡߊ߬߸ ߞߊ߬ ߦߊ߬ߝߊ ߕߙߊ߫ ߒߞߏ ߛߍ߬ߘߏ߲߬ߠߊ ߟߎ߫ ߝߍ߬.
ߞߊ߬ߕߎ߲߯߸ ߊ߬ ߞߊ߬ ߖߌ߬ߦߊ߬ߖߟߎ ߘߏ߫ ߟߋ߬ ߟߊߖߍ߲ߛߍ߲߫߸ ߡߍ߲ ߡߊ߫ ߘߌߦߊ߫ ߡߐ߰ ߛߌߦߊߡߊ߲߫ ߦߋ߫، ߞߵߏ߬ ߞߎ߲߭ ߞߍ߫ ߊ߬ ߟߊ߫ ߛߏ߬ߛߏ߬ ߞߊ߲ ߞߐߡߊߓߌ߲ߓߌ߲ ߘߌ߫ ߢߊ ߘߏ߫ ߡߊ߬߸ ߓߍ߯ ߡߊ߫ ߡߍ߲ ߞߎ߲߬ߕߋߟߋ߲ ߢߊߦߋ߫߸ ߊ߬ ߘߏ߲߬ ߝߘߏ߬ߣߍ߲߬ ߒߞߏ ߛߍ߬ߘߏ߲ ߕߊ߯ߛߌߟߊ ߡߊ߬ ߝߊ߯ߙߌ߫.
<<ߊߟߎ߫ ߓߊߘߋ߲ߞߍ߫ ߤߊߓߌ߫ ߛߋߞߎ߫ ߛߊ߬ߞߐ߫ ߟߋ߬ ߖߌ߬ߦߊ߬ߖߟߎ ߣߌ߲߬ ߞߍ߫ ߟߊ߫، ߞߵߊ߬ ߦߌ߬ߘߊ߬ ߒߞߏ ߞߊߊߙߊ߲ߘߋ߲߫ ߢߐ߲߮ ߠߎ߬ ߟߊ߫߸ ߞߏ߫ ߒ ߓߘߴߊ߬ߟߎ߬ ߟߊ߫ ߘߡߊߞߊߛߟߌ߫ ߞߊ߲ ߡߍ߲߫߸ ߞߵߊ߬ ߓߍ߲߬ ߒ ߠߊ߫ ߖߌ߬ߦߊ߬ߖߟߎ߬ ߞߍߣߍ߲ ߘߏ߫ ߡߊ߬ ߕߌߞߑߕߐߞ ߞߊ߲߬߸ ߡߍ߲ ߞߣߐ߫ ߞߎߡߊ ߣߐ߬ ߡߐ߰ ߛߌߦߊߡߊ߲߫ ߕߙߐ߫ ߟߊ߫، (…) ߖߌ߬ߦߊ߬ߖߟߎ ߏ߬ ߞߣߐ߫ ߞߎߡߊ ߞߊ߬ ߡߐ߰ ߛߌ߫ ߕߙߐ߫߸ ߓߍ߯ ߦߋ߫ ߦߝߊ߬ ߒ ߡߊ߬ ߡߊ߰ߙߌ ߞߏߛߐ߲߬߸ ߒߠߋ ߟߋ߬ ߝߟߌ߬ߣߍ߲߫.>> ߊ߬ ߞߵߏ߬ ߟߋ ߝߐ߫.
ߊ߬ ߞߵߊ߬ ߦߌ߬ߘߴߊ߬ ߟߊ߫ ߞߎߡߊ ߘߐ߫߸ ߞߏ߫ ߡߊ߲߬ߘߋ߲߬ߞߊ߬ߦߊ ߦߴߊ߬ ߖߋ߬ߟߌ ߟߋ߬ ߘߐ߫߸ ߊ߬ ߘߏ߲߬ ߞߵߊ߬ ߟߐ߲߫ ߏ߬ ߦߋ߫ ߥߊ߫ ߟߊ߫ ߛߌߟߊ߫ ߖߟߎ ߡߍ߲ ߠߎ߬ ߝߍ߬، ߏ߬ ߘߐ߫߸ ߊ߬ ߦߋ߫ ߒߞߏ ߛߍ߬ߘߏߏ߲߬ߠߊ ߟߋ߬ ߘߌ߫߸ ߞߊ߬ߦߌ߯ ߛߊ߲߬ ߦߙߌߞߊ߫ ߖߊ߲߫، ߡߐ߰ ߘߏ߲߬ ߠߊ߫ ߛߍ߬ߘߏ߲ ߞߍ ߖߌ ߟߊ߫߸ ߏ߬ ߕߴߛߋ߫ ߓߐ߫ ߟߴߊ߬ ߖߍ߬ߘߍ ߘߐ߫ ߢߊ߫ ߛߌ߫ ߡߊ߬، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<<ߒ ߧߋ߫ ߡߊ߲߬ߘߋ߲߬ߞߊ ߟߋ߬ ߘߌ߫߸ ߒ ߠߊ߫ ߛߍ߬ߘߏ߲ ߦߋ߫ ߞߍ߫ ߟߊ߫ ߡߊ߲߬ߘߋ߲߫ ߠߋ߬ ߦߋ߫߸ ߊ߬ ߕߍ߫ ߞߍ߫ ߟߊ߫ ߡߊ߲߬ߘߋ߲߬ ߠߊ߫، ߒ ߕߍߣߊ߬ ߞߍ߫ ߟߊ߫ ߞߙߍ ߘߌ߫߸ ߞߊ߬ ߒ ߖߘߍ߬ ߞߣߐ ߝߙߊ߫، ߒ ߕߍߣߊ߬ ߒ ߠߊ߫ ߛߊ߲߬ ߦߙߌߞߊ ߛߍ߬ߘߏ߲߬ ߣߐ ߝߣߊ߫ ߞߍ߫ ߟߊ߫ ߖߌ ߘߐ߫.>> ߊ߬ ߞߵߏ߬ ߦߌ߬ߘߊ߬.
ߊ߬ ߟߊ߫ ߞߎߡߊ ߘߐ߫߸ ߖߌ߬ߣߍ߫ ߝߘߏ߬ߓߊ߬ ߗߋߘߊߕߌ߮ ߣߌ߲߬ ߞߵߊ߬ ߓߊ߯ߙߊߢߐ߲߮ ߠߎ߬ ߣߴߊ߬ ߞߏߟߊߘߍߢߐ߲߮ ߠߎ߬ ߞߟߌ߫߸ ߊ߬ ߣߌ߫ ߡߍ߲ ߠߎ߬ ߦߋ߫ ߒߞߏߞߏ ߛߍ߬ߘߏ߲ ߞߊ߲߬߸ ߞߵߊ߬ ߞߊ߲ߠߊߘߌ߫ ߊ߬ ߞߊ߬ߙߊ߲߬ߘߋ߲߬ ߢߐ߲߮ ߠߎ߫ ߡߊ߬ ߏ߬ ߟߎ߬ ߕߍߡߊ߬߸ ߛߴߊ߬ߟߎ߬ ߘߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߞߊ߬ ߛߋ߫ ߓߍ߯ ߟߊߝߊ߰ߡߎ߲߬ ߠߊ߫.
<<ߒ ߞߊ߬ߙߊ߲߬ߘߋ߲߬ߢߐ߲߮ ߠߎ߬߸ ߒ ߓߘߴߊߟߎ߫ ߓߍ߯ ߞߟߌ߫߸ ߞߊ߬ ߟߊ߫ ߒ ߞߊ߲߬، ߊ߲ ߓߍ߯ ߦߋ߫ ߞߍ߫ ߦߝߊ߬ ߕߙߊ߬ߓߊ߮ ߘߌ߫ ߊ߲ ߞߊ߬ߙߊ߲߬ߡߐ߰ ߟߎ߫ ߝߍ߬߸ ߊ߲ ߓߌ߬ߟߊ߬ߣߍ߲߫ ߏ߬ ߟߎ߬ ߡߍ߲ ߠߎ߬ ߟߊ߫ ߞߏߛߓߍ߫.>> ߊ߬ ߞߊ߬ ߞߊ߲ߠߊߘߟߌ ߏ߬ ߝߣߊ߫ ߞߍ߫.
ߊ߬ ߛߐ߲߬ ߘߴߊ߬ ߡߊ߬ ߛߙߊ߬ߣߎ߲߬ ߞߋߟߋ߲ ߣߌ߲߬ ߘߐ߫ ߝߣߊ߫߸ ߞߏ߫ ߡߐ߰ ߛߌ߫ ߘߝߊߣߍ߲߫ ߕߍ߫߸ ߓߍ߯ ߘߌ߫ ߛߋ߫ ߝߎ߬ߕߎ߲߬ߕߌ ߣߌ߫ ߝߍ߭ ߞߍ߫ ߟߊ߫، ߏ߬ ߘߐ߫߸ ߞߏ߫ ߓߍ߯ ߦߴߊ߬ ߡߌ߬ߣߵߊ߬ ߤߊ߲ߞߟߌ ߟߊ߫߸ ߡߐ߰ ߞߊߣߵߊ߬ ߡߌ߬ߣߵߊ߬ ߤߊ߲ߞߟߌ ߓߍ߬ߙߍ ߛߊ߲ߘߐ ߟߊ߫.
<<ߡߐ߱ ߤߊ߲ߞߟߌ ߓߊ߯ ߥߙߊ߬ ߢߊ߫ ߛߌ߫ ߡߊ߬߸ ߞߎߡߊ ߘߏ߫ ߘߌ߫ ߓߐ߫ ߌ ߤߊ߲ߞߟߌ ߞߕߐߡߊ߬، ߓߊ߬ߙߌ߬ ߒ ߞߵߊ߬ ߟߐ߲߫߸ ߒ ߞߏ߫ ߊߟߎ߫ ߕߍ߫ ߞߊ߬ߙߊ߲߬ߘߋ߲߫ ߝߟߌ߬ߣߍ߲ ߞߟߍ߬ ߟߊ߫߸ ߞߊ߬ ߕߊ߬ߡߌ߲߫ ߊ߬ ߤߊ߲ߞߟߌ ߘߊ߲߭ ߠߊ߫.>> ߊ߬ ߞߵߏ߬ ߦߌ߬ߘߊ߫ ߞߣߊ߬ߕߏ߫ ߕߌ߲ߞߌ߫ ߟߊ߫߸ ߞߏ߫ <<ߡߊ߰ߙߌ ߦߋ߫ ߤߌߣߊ߫ ߒߞߏ ߛߌ߲ߘߌߓߊ߮ ߛߟߐߡߌ߲ ߠߊ߫ (ߞߊ߲ߕߍ߫ ߛߟߏ߬ߡߣߊ߬)߸ ߊ߬ ߣߌ߫ ߒߞߏ ߞߊߙߊ߲ߘߋ߲߫ ߝߎߙߋ ߓߍ߯.>> ߞߊ߬ ߘߎ߬ߥߊ߬ߥߎ߬ ߞߋߟߋ߲ ߏ߬ ߢߐ߲߰ ߞߍ߫ ߒߞߏ ߣߌ߫ ߒߞߏ ߞߊߙߊ߲ߘߋ߲ ߠߎ߬ ߦߋ߫.
ߞߎߡߊ ߓߌ߬ߟߊ߬ ߘߴߊ߬ ߟߊ߫ ߖߌ߬ߦߊ߬ߖߟߎ ߡߍ߲ ߘߐ߫ ߣߌ߲߬߸ ߊ߬ ߞߊ߬ ߛߏ߬ߛߏ߬ ߞߊ߲ ߠߋ߬ ߖߊ߬ߕߋ߫ ߖߌ߬ߣߍ߬ ߞߊ߲߫ ߡߊ߲߬ߕߏ߲߬ߕߍ߬ߟߊ߬ߞߊ ߘߌ߫ ߦߋ߲߬߸ ߞߵߊ߬ ߦߌ߬ߘߊ߬ ߞߏ߫ ߛߏ߬ߛߏ߬ ߞߊ߲ ߠߋ߬ ߓߊ߯ ߝߐ߫ ߌߞߘߐ߫߸ ߌ ߘߌ߫ ߖߌ߬ߣߍ߫ ߖߡߊ߬ߣߊ ߕߐ߰ߡߊ߬ߛߙߋ ߦߴߊ߬ ߘߐ߫.
ߌߞߏߡߌ߲߬ ߡߐ߰ ߛߌߦߊߡߊ߲߫ ߦߴߊ߬ ߡߊ߲߬ߞߕߎ߬ ߟߊ߫ ߒߞߏ ߘߋ߬ߙߌ߬ߘߊ߫ ߡߊ߲߬ߘߋ߲߬ ߗߋߕߌ߮ ߘߌ߫߸ ߢߊߢߌߣߌ߲ߠߌ߲ ߞߐߝߟߌ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ ߞߍ߫ ߘߊ߫ ߗߋߕߌ߯ ߘߍ߲߬ߞߍ߬ߕߎ߬ߣߍ߲ ߠߋ߬ ߘߌ߫ ߦߋ߲߬ ߥߊ߯ߕߌ߫ ߞߎߘߎ߲ߣߍ߲߫ ߞߘߐ߫، ߟߐ߬ߘߎ߮ ߏ߬ ߓߘߊ߫ ߓߐ߫ ߊ߬ ߓߟߏ߫ ߕߋ߲߬߸ ߡߍ߲ ߣߴߊ߬ ߟߊ߫ ߖߌ߬ߦߊ߬ߖߟߎ߫ ߡߊ߲߬ߞߊ߲߬ߡߊ ߣߌ߲߬ ߘߍ߲ߣߍ߲߫ ߕߍ߫ ߢߐ߲߮ ߠߊ߫ ߝߋߎ߫.
ߊ߲ ߠߊ߫ ߟߊ߬ߞߙߐ߬ߛߌ߬ߟߌ ߟߎ߬ ߘߐ߫ ߓߟߐߟߐ߫ ߞߊ߲ߠߊ ߟߎ߬ ߘߐ߫߸ ߡߐ߰ ߛߌߦߊߡߊ߲߫ ߓߘߊ߫ ߛߐ߲߬ ߊ߬ ߟߊ߫ ߦߝߊ߬ ߕߙߊ ߣߌ߲߬ ߘߐ߫߸ ߞߵߊ߬ ߖߊ߬ߕߋ߫ ߤߊ߲ߞߟߌߡߊ߫ ߘߌ߫ ߞߏ ߞߍߢߊ ߞߏߛߐ߲߬، ߡߍ߲ ߠߎ߬ ߕߍ߬ߘߍ߫ ߊ߬ ߡߊߓߎ߬ߙߎ߲߬ߕߌ ߞߊ߲߬ ߊ߬ ߟߊ߫ ߖߌ߬ߦߊ߬ߖߟߎ߬ ߝߟߐ ߣߴߊ߬ ߟߊ߫ ߖߘߍ߬ߟߊ߬ߜߍ ߞߐ ߘߐ߫ ߞߊ߬ߣߌ߲߬، ߓߊߏ߬߸ ߖߘߍ߬ߟߊ߬ߜߍ߬ ߞߎߡߊ ߡߍ߲ ߠߊߛߋ߫ ߘߊ߫ ߝߐ߰ߓߍ߬ߘߊ ߟߎ߬ ߟߊ߫߸ ߏ߬ ߡߴߊ߬ ߡߊߞߕߌߓߊ߮ ߟߎ߬ ߕߊ߫ ߡߌ߬ߣߊ߬ ߓߐ߫.
ߣߌ߲߬ ߓߘߴߊ߬ ߦߌ߬ߘߊ߬ ߞߏ߫ ߒߞߏ ߘߏ߲߬ߞߏ ߟߎ߬ ߦߋ߫ ߡߊ߲߬ߘߋ߲߫ ߛߊ߲߬ߘߊ ߘߏ߫ ߓߟߏߦߊ߫ ߟߊ߫߸ ߊ߰ ߝߐ߫ ߟߊ߫ ߡߍ߲ ߘߐ߫ ߞߏ߫ <<ߜߍ߫ ߡߊ߲߫ ߖߎ߯ ߝߌ߲߬ ߡߊ߲߫ ߖߎ߯߸ ߥߏߟߏ߲ߕߏ߲ߥߊ߬ߟߊ߲߬ߕߊ߲ ߠߋ߬ ߦߊ߫ ߖߎ߯.>>
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
