ߖߌ߬ߣߍ߬ ߜߍߞߊ߲ߠߊ ߦߋ߫ ߛߊߣߌ߲߫ ߓߐ߫ ߦߙߐߓߊ߫ ߟߋ߬ ߘߌ߫߸ ߡߍ߲ ߝߊ߲߭ ߘߏ߫ ߦߋ߫ ߡߊ߲߬ߖߊ߲߬ߠߊ߬ ߘߌ߫، ߞߊ߬ ߓߍ߲߬ ߟߊ߬ߡߌߣߌ߲ ߟߊߞߊ߲ߘߊ߫ ߞߏ ߡߊ߬߸ ߊ߬ ߣߌ߫ ߓߊ߯ߙߊ ߟߎ߬ ߞߍ ߛߊ߬ߙߌ߬ߦߊ߬ ߞߣߐ߫߸ ߝߊ߰ߡߊ ߟߎ߬ ߓߘߊ߫ ߗߏ ߟߊߥߌ߬ߟߌ߫ ߡߐ߰ ߟߎ߬ ߞߐ߫ ߏ߬ ߟߋ ߘߐ߫߸ ߡߍ߲ ߠߎ߬ ߦߋ߫ ߘߊ߬ߡߊ߲ ߓߊ߯ߙߊ߫ ߢߊ߫ ߖߎ߮ ߟߎ߬ ߞߍ߫ ߟߊ߫ ߛߐ߲߬߸ ߞߊ߬ ߟߊ߬ߡߌߣߌ߲ ߘߐߖߊߛߌ߫ ߊ߬ߟߎ߫ ߝߍ߬ ߘߏ߲߰ ߓߟߏ ߡߊ߬ (ߣߌ߫ ߖߡߊ߬ߙߌ߬ ߛߓߍ߫ ߕߍ߫)، ߒ߬ߓߊ߬߸ ߟߐ߯ߕߍ ߣߌ߲߬ ߞߣߐ߫߸ ߞߟߍ߬ߡߐ߰ߘߊ ߞߊ߬ ߦߟߍߞߍߟߌ߫ ߟߋ߬ ߛߌ߰ ߛߋ߲߬ߠߊ߫߸ ߡߊ߲߬ߖߊ߲߬ߠߊ߫ ߞߕߌߘߊ ߦߌߟߡߊߙ߫ ߝߟߐ ߞߊ߲ߓߍ߲ ߞߕߌߞߊ߲ߘߊ ߟߊ߫ ߖߊ߬ߡߊߙߌ ߞߣߐߡߊ߬߸ ߝߏ߫ ߊ߬ߟߎ߫ ߞߵߊ߬ߟߎ߬ ߕߍ߯ ߞߍ߫ ߓߙߎߞߌߣߞߊ ߘߏ߫ ߟߎ߫ ߘߐ߫ ߛߊߣߌ߲߫ ߘߊߡߊ߲ߘߊ ߟߊ߫ ߖߏ߬ߡߊ߬ ߓߊߟߊ߲ߘߎ߯ߓߊ߫߸ ߞߏ߲߬ߖߊ߲߬ߠߊ߬ߞߘߐ߫ ߡߙߊ߬ߘߊ߬ߙߋ߲ ߘߐ߫.
ߊ߬ߟߎ߬ ߟߊ߫ ߦߙߍߞߍߟߌ ߣߌ߲߬ ߘߐ߫߸ ߊ߬ߟߎ߫ ߞߵߊ߬ߟߎ߬ ߕߍ߯ ߞߍ߫ ߛߊߣߌ߲߫ ߓߊ߯ߙߊ߫ ߡߎߙߊ߲ ߛߌߦߊߡߊ߲߫ ߘߐ߫߸ ߖߌ߫ ߛߊߡߊ߲߫ ߣߌߘߐ ߡߍ߲ ߠߎ߬ ߕߍ߬ߘߍ߫ ߦߋ߲߬ ߓߊ߬߸ ߊ߬ߟߎ߬ ߦߋ߫ ߡߍ߲ ߠߎ߬ ߟߊߓߊ߯ߙߊ߫ ߟߊ߫ ߛߊߣߌ߲߫ ߓߊ߯ߙߊ ߣߌ߲߬ ߘߐ߫߸ ߞߵߏ߬ ߟߊ߫ ߖߎ߲߯ߛߊ߫ ߥߟߏߒߘߐ߫ ߓߊ߰ߡߊ ߘߏ߫ ߟߎ߫ ߞߊ߲߬߸ ߡߍ߲ ߕߐ߯ ߞߏ߫ ߞߐ߰ߖߎ߮ (ߛߌߦߊߣߎ߳ߙ)، ߏ߬ ߦߋ߫ ߟߊߓߊ߯ߙߊ߫ ߟߴߊ߬ߟߎ߬ ߓߟߏ߫ ߛߊߣߌ߲߫ ߢߌߣߌ߲ ߘߐ߫ ߛߊ߬ߙߌ߬ߦߊ߬ ߛߐߛߐ ߟߋ߬ ߞߊ߲߬ ߦߋ߲߬.
ߒ߬ߓߊ߬߸ ߊ߲ ߠߊ߫ ߛߍߝߍ߲ߘߊ ߛߋ߫ ߘߊ߫ ߞߊ߲ߓߍ߲ ߞߕߌߞߊ߲ߘߊ ߊߓߘߎߟߊߦߌ߬ ߛߎߡߊ߬ ߢߌ߬ߣߌ߲߬ߞߊ߬ ߟߊ߫ ߞߊ߯ߙߌ ߣߌ߲߬ ߡߊ߬߸ ߊ߬ ߞߊ߬ ߓߊ߯ߙߊ ߣߌ߲߬ ߕߊ߬ߡߌ߲߬ ߢߊ ߢߊߝߐ߫߸ ߊ߬ߟߎ߬ ߛߋ߫ ߘߴߊ߬ߟߎ߬ ߕߍ߯ ߞߍ߫ ߡߐ߱ ߢߌ߲߬ ߠߎ߬ ߘߐ߫ ߢߊ ߢߊ ߡߍ߲ ߡߊ߬ ߓߊߟߊ߲ߘߎ߯ߓߊ߫ ߞߣߐ߫.
<<ߊ߬ߟߎ߬ ߦߋ߫ ߛߊߣߌ߲߫ ߓߊ߯ߙߊ ߟߋ߬ ߟߊ߫ ߦߋ߲߬߸ ߞߋߟߋ߲߫߸ ߏ߬ ߖߡߊ߬ߙߌ߬ ߡߊ߫ ߘߴߊ߬ߟߎ߫ ߡߊ߬߸ ߞߎߡߊߕߍ߫ ߏ߬ ߘߐ߫ ߞߏ߫ ߊ߬ߟߎ߬ ߦߋ߫ ߕߌߢߍߟߌ ߝߣߊ߫ ߞߍ߫ ߟߴߏ߬ ߛߋ߲߭ߝߍ߬، ߞߊ߬ߕߎ߲߯߸ ߛߊߣߌ߲߫ ߛߋ߲ ߡߍ߲ ߣߌ߲߬ ߓߟߏ ߟߊ߫߸ ߏ߬ ߝߣߊ߫ ߕߍ߫ ߞߍ߫ ߟߊ߫ ߦߋ߲߬ ߕߋ߲߬ ߘߋ߬߸ ߛߊ߬ߙߌ߬ߦߊ߫ ߟߋ߬ ߏ߬ ߞߎ߲߬ߠߊߛߌ߰ ߟߊ߫، ߏ߬ ߕߍ߫ ߘߏ߫ ߜߘߍ߫ ߘߌ߫߸ ߝߏ߫ ߌ ߦߋ߫ ߛߊߣߌ߲߫ ߛߋ߲ ߖߊ߬ߡߊߙߌ ߟߋ߬ ߛߐ߬ߘߐ߲߬، ߊ߬ ߘߏ߲߬߸ ߡߐ߰ ߡߌ߬ߣߊ߬ߣߍ߲ ߡߍ߲ ߠߎ߬ ߦߋ߫ ߕߋ߲߬߸ ߖߡߊ߬ߙߌ߬ ߛߓߍ߫ ߕߴߊ߬ߟߎ߬ ߓߟߏ߫߸ ߊ߬ߟߎ߬ ߦߋ߫ ߓߊ߲߫ ߠߊ߫ ߝߣߊ߫ ߞߊ߬ ߕߏ߫ ߖߎ߲߯ߛߊ߫ ߥߟߏߒߘߐ߫ ߓߊ߰ߡߊ ߟߎ߬ ߟߊߓߊ߯ߙߊ߫ ߟߊ߫߸ ߦߏ߫ ߞߐ߰ߖߎ߮߸ ߏ߬ ߞߐߝߟߌ߫ ߖߎ߯ߓߊ߫ ߟߋ߬ ߘߏ߲߬ ߦߋ߫ ߛߋ߫ ߟߊ߫ ߒ߬ ߠߊ߫ ߞߐ߭ ߟߎ߬ ߣߌ߫ ߘߎ߰ߞߟߏ ߖߍ߬ߘߍ ߡߊ߬.>> ߞߕߌߞߊ߲ߘߊ ߟߋ߬ ߞߊ߲߫ ߕߋ߲߬.
ߛߊ߬ߙߌ߬ߦߊ߬ߓߊ߰ߙߊ߬ߟߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߕߍ߮ ߞߍ߫ ߘߊ߫ ߓߙߎߞߌߣߞߊ߫ ߡߐ߰ ߟߏ߯ߟߎ߫ ߟߋ߬ ߘߐ߫߸ ߊ߬ ߣߌ߫ ߖߌ߫ ߛߊߡߊ߲߫ ߣߌߘߐ ߛߌߦߊߡߊ߲߫، ߝߣߊ߫߸ ߞߐ߰ߖߎ߮ ߘߏ߫ ߟߎ߫ ߦߋ߫ ߘߊ߫ ߟߋ߬ ߜߍ ߘߐ߫ ߦߋ߲߬.
<<ߊ߲ ߞߊ߬ ߡߐ߰ ߟߎ߯ߟߎ߫ ߟߋ߬ ߡߌ߬ߣߊ߬߸ ߡߍ߲ ߓߍ߯ ߦߋ߫ ߓߙߎߞߌߣߞߊ ߘߌ߫، ߊ߲ ߞߊ߬ ߖߌ߫ ߛߊߡߊ߲߫ ߣߌߘߐ߫ ߕߊ߲ߣߌߝߌ߬ߟߊ߫ ߡߌ߬ߣߊ߬߸ ߊ߬ߟߎ߬ ߦߴߏ߬ ߡߍ߲ ߠߊߓߊ߯ߙߊ߫ ߟߊ߫ ߦߋ߲߬߸ ߞߵߏ߬ ߟߊ߫ ߖߎ߲߯ߛߊ߫ ߥߟߏߒߘߐ߫ ߓߊ߰ߡߊ ߘߏ߫ ߞߊ߲߬߸ ߞߏ߫ ߞߐ߰ߖߎ߮، ߊ߬ߟߎ߬ ߦߴߏ߬ ߝߣߊ߫ ߟߊߓߊ߯ߙߊ߫ ߟߊ߫ ߛߊߣߌ߲߫ ߢߌߣߌ߲ ߣߌ߲߬ ߘߐ߫ ߦߋ߲߬.>>
ߊ߬ߟߋ߬ ߛߊ߬ߙߌ߬ߦߊ߬ ߟߊ߬ߕߊ߰ߡߊ߬ ߛߌߟߊ߫ ߞߋߟߋ߲ ߠߋ߬ ߝߍ߬߸ ߞߟߌߟߌ ߛߋ߫ ߘߊ߫ ߓߊߟߊ߲ߘߎ߯ ߘߎ߰ߕߌ߮ ߡߊ߬߸ ߞߏ߫ ߊ߬ ߦߋ߫ ߣߊ߬ ߕߐ߲ߓߟߏߡߟߊ߫߸ ߞߊ߬ ߣߊ߬ ߢߊߝߐߟߌ߫ ߞߍ߫ ߓߙߎߞߌߣߞߊ ߢߌ߲߬ ߠߎ߬ ߣߌ߫ ߟߏ߲ߟߊ߲ ߠߎ߬ ߟߊ߫ ߓߊ߯ߙߊ ߞߍߢߊ ߟߎ߫ ߞߊ߲߬߸ ߏ߬ ߟߎ߫ ߣߐ߬ ߓߊ߯ ߞߍ߫ ߛߌ߰ ߦߙߐ ߛߐ߬ߘߐ߲߬ ߠߊ߫ ߢߊ ߡߍ߲ ߞߊ߬ ߛߊߣߌ߲߫ ߓߊ߯ߙߊ ߘߊߡߌ߬ߣߊ߬.
ߞߕߌߞߊ߲ߘߊ ߞߵߊ߬ ߦߌ߬ߘߊ߬߸ ߞߏ߫ ߛߊߣߌ߲߫ ߢߌߣߌ߲߫ ߢߊ ߡߍ߲ ߦߋ߫ ߕߋ߲߬߸ ߞߵߊ߬ ߢߌߣߌ߲߫ ߓߟߏ ߟߊ߫ ߦߏ߫ ߘߋ߬ߙߌ߬ ߞߍߣߍ߲߫ ߘߊ߬ߡߊ߲߬ߛߋ߲ ߠߊ߫ ߢߊ ߡߍ߲߸ ߏ߬ ߟߊߘߌ߬ߢߍ߬ߣߍ߲߫ ߖߌ߬ߣߍ߬ߞߊ ߟߎ߫ ߟߋ߬ ߘߐߙߐ߲߫ ߦߋ߫، ߞߊ߬ߕߎ߲߯߸ ߞߏ߫ ߛߊ߬ߙߌ߬ߦߊ ߏ߬ ߘߏ߲߬ ߢߊ ߢߋ߫ ߜߍ ߟߋ߬ ߘߐ߫، ߓߊߏ߬߸ ߖߡߊ߬ߣߊ ߡߍ߲ ߠߎ߬ ߡߐ߰ ߦߋ߫ ߦߊ߲߬ ߕߋ߲߬߸ ߏ߬ ߟߎ߬ ߛߌ߫ ߕߍ߫ ߛߐ߲߬ ߟߏ߲ߟߊ߲߫ ߜߘߍ ߟߊ߫ ߘߊ߬ߡߊ߲߬ ߓߊ߫ߙߊ ߡߵߊ߬ߟߎ߬ ߓߘߊ، ߏ߬ ߘߐ߫߸ ߖߌ߬ߣߍ߬ ߝߣߊ߫ ߦߋ߫ ߛߌߟߊ߫ ߞߋߟߋ߲ ߏ߬ ߟߋ ߞߊ߲߬.
ߛߊ߬ߙߌ߬ߦߊ߬ߓߊ߰ߙߊ߬ߟߊ߫ ߛߎߡߊ߬ ߞߊ߬ ߢߌ߬ߣߌ߲߬ߞߊ߬ߟߌ ߞߍ߫ ߊ߬ ߟߊ߫ ߛߙߊ߬ߣߎ߲ ߘߐ߫߸ ߞߊ߬ ߓߍ߲߬ ߟߏ߲ߟߊ߲ ߠߎ߬ ߟߊ߫ ߣߊ߬ߟߌ߫ ߘߊ߲߬ߠߊߕߊ߬ߡߌ߲߬ߣߍ߲ ߣߌ߲߬ ߡߊ߬ ߛߊߣߌ߲߫ ߢߌߣߌ߲߫ ߦߌߟߊ ߡߊ߲߬ߖߊ߲߬ߠߊ߬ ߞߣߐ߫.
<<ߖߐ߲߫ ߣߊ߬ ߘߴߊ߬ߟߎ߬ ߘߌ߫؟ ߖߐ߲߫ ߦߴߊ߬ߟߎ߬ ߟߊߛߌ߰ ߟߊ߫؟ ߖߐ߲߫ ߞߊ߬ ߖߊ߬ߡߊߙߌ ߘߴߊ߬ߟߎ߫ ߡߊ߬ ߞߏ߫ ߊ߬ߟߎ߬ ߦߋ߫ ߓߊ߯ߙߊ߫؟ ߊ߬ߟߎ߬ ߟߊ߫ ߓߊ߯ߙߊ ߏ߬ ߕߐ߬ߣߐ ߦߋ߫ ߛߋ߫ ߟߊ߫ ߖߐ߲߫ ߡߊ߬؟ ߒ߬ߓߊ߬߸ ߢߌ߬ߣߌ߲߬ߞߊ߬ߟߌ ߏ߬ ߟߎ߫ ߟߋ߬ ߖߋ߬ߓߌ ߢߊߢߌߣߌ߲ ߦߴߌߘߐ߫ ߘߐ߬ߛߏ߰ߙߋ߬ߟߌ ߣߌ߲߬ ߛߋ߲߭ߝߍ߬.>>
ߌ ߦߋ߫ ߓߐ߫ ߟߊ߫ ߦߊ߲߬ ߠߋ߬߸ ߌ ߕߍ߫ ߓߐ߫ ߟߊ߫ ߦߊ߲߬߸ ߏ߬ ߞߎߡߊ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫ ߝߋߎ߫، ߊߓߘߎߟߊߦߌ߬ ߛߎߡߊ߬ ߞߵߊ߬ ߖߊ߬ ߦߙߐ߫ ߜߘߍ߫ ߞߊ߲߬߸ ߏ߬ ߟߋ ߓߐ߰ߝߍ ߘߐߕߌߢߍ ߘߌ߫ ߓߊ߯ߙߊ ߞߍߢߊ߫ ߖߎ߮ ߣߌ߲߬ ߓߟߏ߫، ߞߊ߬ߕߎ߲߯߸ ߊ߬ߟߎ߬ ߦ߫ߋ ߓߊ߯ߙߊ߫ ߟߊ߫ ߟߋ߬߸ ߣߘߐ߬ߓߍ߲߬ ߞߏ߫ ߕߴߊ߬ ߘߐ߫߸ ߞߵߊ߬ ߛߐ߬ߘߐ߲߬ ߞߏߟߊߕߍ߮ ߟߎ߬ ߝߣߊ߫ ߢߊ ߓߍ߲߬ߣߍ߲߫ ߊ߬ ߡߊ߬ ߖߐ߫.
ߏ߬ ߟߋ ߘߐ߫߸ ߞߕߌߞߊ߲ߘߊ ߞߊ߲߫ ߞߏ߫ ߓߌ߲߬ߓߊߥߏ ߦߴߊ߬ ߞߏ ߘߊ ߝߍ߬߸ ߛߌߞߊ߫ ߣߌ߫ ߕߡߊ߬ߖߌ߬ ߕߴߏ߬ ߘߐ߫:
<<ߣߴߊ߬ ߞߏ ߟߎ߬ ߢߊ ߢߌߢߌߣߌ߲߫ ߘߊ߫ ߞߵߊ߬ ߦߋ߫ ߕߎ߬ߢߊ ߘߌ߫߸ ߓߌ߲߬ߓߊߥߏ ߘߌ߫ ߟߴߊ߬ ߞߍߓߊ߮ ߟߎ߫ ߞߊ߲߬، ߊ߬ߟߎ߬ ߘߌ߫ ߟߊߘߏ߲߬ ߥߛߎ ߟߊ߫ ߝߣߊ߫ ߞߵߊ߬ ߟߊ߫ ߏ߬ ߞߊ߲߬߸ ߏ߬ ߘߏ߲߬ ߘߌ߫ ߥߊ߫ ߤߊ߲߯ ߛߊ߲߭ ߝߌ߬ߟߊ߬ ߞߵߊ߬ ߛߌ߰ ߛߊ߲߬ ߣߊ߯ߣߌ߲߫ ߥߛߎ ߟߊ߫.>>
ߊ߬ ߞߵߊ߬ ߦߌ߬ߘߊ߬ ߞߏ߫ ߛߊ߬ߙߌ߬ߦߊ߬ ߦߴߊ߬ ߟߊ߫ ߓߊ߯ߙߊ ߡߍ߲ ߞߊ߲߬ ߣߌ߲߬߸ ߊ߬ߟߎ߬ ߣߌ߫ ߡߐ߰ ߕߴߊ߬ ߡߊ߬ ߘߋ߬، ߞߵߊ߬ ߝߐ߫ ߛߌߛߍ߲߬ ߞߏ߫ ߛߌ߲߬ߝߏ߲߬ߘߊ ߘߏ߫ ߥߟߊ߫ ߘߍ߬ߞߙߎ ߘߏ߫ ߦߋ߫ ߦߊ߲߬߸ ߏ߬ ߟߎ߬ ߟߊ߫ ߛߍ߬ߘߏ߲ ߞߐߝߟߌ ߟߋ߬ ߦߴߊ߬ ߘߌ߫߸ ߏ߬ ߕߍ߫ ߝߋߎ߫، ߓߊߏ߬߸ ߛߊ߬ߙߌ߬ߦߊ ߟߋ߬߸ ߊ߬ ߟߊߕߊ߯ߡߕߊ ߟߋ߬ ߝߣߊ߫ ߦߋ߫، ߊ߬ߟߋ ߟߊ߫ ߝߐߟߌ߫ ߘߐ߫߸ ߞߕߌߓߋߟߋ߲ ߠߊ߫ ߓߊ߯ߙߊ ߢߊ ߦߋ߫ ߜߍ ߟߋ߬ ߘߐ߫: ߞߊ߬ ߞߎ߲߬ߞߏ߬ ߘߐߕߍ߰ߣߍ߲ ߡߊߝߟߍ߫߸ ߞߊ߬ ߣߐ߬ߝߍ߬ߜߍ߲߬ߠߌ߲߫ ߛߌ߰ ߛߋ߲߬ߠߊ߫߸ ߡߊ߬ߞߏ߬ ߕߍ߫ ߦߙߐ߫ ߜߘߍ߫ ߣߍ߫ ߡߐ߰ ߜߘߍ߫ ߟߊ߫߸ ߞߏ߫ ߝߏ߫ ߏ߬ ߟߎ߬ ߦߋ߫ ߢߊߝߐߟߌ߫ ߞߍ߫ ߡߎߣߎ߲߬.
ߞߎߡߊ ߟߊߓߊ߲ ߘߐ߫߸ ߞߕߌߞߊ߲ߘߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߞߏߢߊߢߌߣߌ߲ ߠߎ߬ ߞߊ߲߬߸ ߖߐ߲߰ߛߊ߫ ߡߍ߲ ߠߎ߬ ߛߋ߲߬ ߦߋ߫ ߣߌ߲߬ ߞߏ ߘߐ߫߸ ߊ߬ߟߎ߬ ߘߴߏ߬ ߟߎ߫ ߡߌ߬ߣߊ߬ ߢߊ ߡߍ߲ ߡߊ߬.
<<ߡߍ߲ ߺ ߍ ߺ ߡߍ߲߫ ߛߋ߲߬ ߦߋ߫ ߘߊ߫ ߣߌ߲߬ ߞߏ ߘߐ߫߸ ߊ߬ ߞߍߓߊ߮ ߟߎ߫ ߓߊ߬߸ ߡߍ߲ ߠߎ߬ ߟߊ߫ ߕߐ߬ߣߐ ߦߴߊ߬ ߘߐ߫ ߓߊ߬߸ ߊ߬ ߓߍ߯ ߘߌ߫ ߡߊߞߟߌ߫ ߛߊ߬ߙߌ߬ߦߊ߬ ߢߊߞߘߐ߫، ߢߣߊߕߐߡߐ߲ߠߌ߲߫ ߕߴߊ߬ ߘߐ߫.>>
ߣߌ߲߬ ߞߏ߬ߣߌ߲ ߦߴߊ߬ ߦߌ߬ߘߊ߬ ߟߊ߫ ߟߋ߬ ߡߊ߲߬ߖߊ߲߬ߠߊ߫ ߞߕߌߘߊ ߓߘߊ߫ ߓߌ߫ ߛߊߣߌ߲ ߢߌߣߌ߲߫ ߢߊ߫ ߖߎ߮ ߢߌ߲߬ ߠߎ߫ ߞߍ߬ߟߍ ߡߊ߬ ߡߙߊ߬ߓߊ߰ߘߊ ߞߣߐ߫ ߡߎ߬ߕߎ߲߬߸ ߖߐ߲߰ߛߊ߫ ߘߊ߲߬ ߘߌ߫ ߛߌ߰ ߟߊ߬ߡߌߣߌ߲ ߘߐߖߊߛߌ ߟߊ߫ ߢߊ ߡߍ߲ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
