ߛߌ߰ߞߊ߲߬ ߞߊ߲ߘߟߌ ߢߣߊߕߊߟߌ ߡߍ߲ ߛߌ߲߬ߝߏ߲߬ߧߊ߬ ߘߊ߫ ߖߌ߬ߣߍ߬ ߞߣߐ߫ ߞߊ߯ߙߌ߫ ߕߊ߬ߡߌ߲߬ߣߍ߲ ߡߊ߬߸ <<ߤߊ߯ߟߌ>> ߟߋ߬ ߞߊ߬ ߢߍߓߊ߯ߦߊ ߘߊ߬ߘߌ߫ %߈߉ ߢߐ߲߰ ߠߊ߫߸ ߏ߬ ߡߍ߲ ߞߐߝߟߌ ߓߍߣߊ߬ ߖߌ߬ߣߍ߫ ߓߘߍ߬ߓߘߍ߬ߟߌ ߢߡߊߦߟߍ߬ߡߊ߲߬ ߥߊ߯ߕߌ߫ ߣߊ߬ߕߐ ߟߎ߬ ߘߐ߫ ߞߊ߬ߣߌ߲߬، ߓߊ߬ߙߌ߬߸ ߛߌߞߊ ߦߋ߫ ߡߐ߱ ߟߎ߬ ߘߐ߫ ߞߵߊ߬ ߓߍ߲߬ ߞߏ ߟߎ߬ ߟߊߜߍߦߊ ߡߊ߬߸ ߊ߬ ߣߌ߫ ߝߊ߲߬ߞߊ ߡߊߣߡߊߙߊߞߏ ߖߐ߬ߘߐ.
ߞߎߣߎ߲ߟߏ߲ ߛߎ ߂߀߂߅ ߕߎߟߊߝߌ߲ ߕߋ߬ߟߋ߫ ߂߄ ߡߊ߬߸ߟ ߕߊ߲ߓߊ߲ߓߐߟߌ ߣߌ߫ ߘߎ߰ߞߣߍ ߡߊ߬ߡߙߊ߬ߟߌ ߞߏߕߌ߮߸ ߌߓߙߊߤߌߡߊ߫ ߞߊߟߌߟ ߞߐ߲ߘߍ߫ ߞߊ߬ ߝߌߘߊ ߓߐ߫ ߛߌ߰ߞߊ߲ ߞߊ߲ߘߟߌ ߞߐߝߟߌ߫ ߘߍ߲߬ߞߍ߬ߕߎ߲߬ߣߍ߲ ߢߍߡߊ߬߸ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌߟߊ߫ %߈߉،߃߉ ߞߊ߬ <<ߤߊ߯ߟߌ>> ߟߋ߬ ߛߎߥߊ߲ߘߌ߫߸ ߡߍ߲ ߕߘߍ߬ߒ߬ߘߐ߬ߦߊ߬ߟߌ ߗߡߍ߬ߘߐ߬ߦߊ ߦߟߍ߬ ߘߊ߫ ߝߏ߯ %߈߆،߄߂ ߘߐ߫. ߝߊ߰ߡߊ ߟߎ߫ ߞߵߏ߬ ߡߍ߲ ߝߊ߬ߛߊߙߌ߫ ߞߏ߫ ߕߐ߰ߡߊ߬ߛߙߋ߫ ߟߵߏ߬ ߘߌ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߖߡߊ߬ߣߊ߬ߘߋ߲ ߠߎ߬ ߥߙߍߓߊߓߊ ߟߋ߬ ߦߋ߫ ߛߌ߰ߞߊ߲߬ ߞߎߘߊ ߣߌ߲߬ ߝߍ߬ ߞߊ߬ߘߌߦߊߢߍ ߘߝߊߣߍ߲ ߠߊ߫.
ߢߣߊߕߊߟߌ ߡߍ߲ ߦߋ߫ ߣߌ߲߬߸ ߖߡߊ߬ߣߊ߬ߘߋ߲ ߠߎ߬ ߣߌ߫ ߞߐߞߊ߲߫ ߡߐ߮ ߟߎ߬ ߓߍ߯ ߛߌ߰ߣߍ߲߫ ߕߍ߬ߘߍ߫ ߟߋ߬ ߞߵߊ߬ ߡߊߞߐ߬ߣߐ߲߬ ߞߏߛߓߍ߫߸ ߣߴߊ߬ ߡߊ߫ ߢߊ߬ ߞߏ߫ ߖߡߊ߬ߣߊ ߟߊ߫ ߛߌߣߌ߲߫ ߣߊ߬ߕߐ ߓߘߍ߬ߓߘߍ߬ߟߌ ߘߎ߲ߣߍ߲߫ ߊ߬ߟߋ ߟߋ߬ ߟߊ߫߸ ߖߡߊ߬ߣߊ ߏ߬ ߡߍ߲ ߕߎ߲߬ ߓߘߊ߫ ߟߏ߲߬ߓߏ߲߬ߟߊ߲ߓߊ߲߫ ߞߊ߬ߝߏ߬ ߖߊߛߏ߲ ߓߟߏ߫ ߕߎ߬ߡߊ߫ ߕߊ߬ߡߌ߲߬ߣߍ߲ ߠߎ߬ ߘߐ߫، ߛߌ߬ߞߊ߲߬ ߞߎߘߊ ߡߍ߲ ߦߋ߫ ߣߌ߲߬߸ ߊ߬ߟߋ ߓߍߣߊ߬ ߘߊ߲߭ߛߌ߰ ߘߐ߬ߕߊߡߌ߲ ߠߊ߫߸ ߏ߬ ߡߍ߲ ߘߊߡߌ߬ߣߊ߬ ߘߊ߫ ߣߊ߲߬ߕߌ߮ ߟߎ߬ ߓߟߏ߫ ߞߊ߬ߦߌ߯ ߂߀߂߁ ߠߊ߫߸ ߣߌ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߞߊ߬ߙߊ߲߬ߝߊ ߊߟߌߝߊ߫ ߞߐ߲ߘߍ߫ ߟߊߥߟߏ߫، ߓߊ߬ߙߌ߬ ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫ ߝߣߊ߫߸ ߛߌ߰ߞߊ߲ ߣߌ߲߬ ߦߋ߫ ߛߌߟߊ ߟߊߞߊ߬ ߟߊ߫ ߟߋ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߝߊ߲ߞߎߟߊ߲߫߸ ߊ߬ ߘߌ߫ ߛߋ߫ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ ߘߐ߫߸ ߞߊ߬ ߛߌ߰ ߖߡߊ߬ߣߊ ߞߎ߲߬ߠߊ߫، ߊ߬ ߝߐ ߡߍ߲ ߞߍ߫ ߘߊ߫ ߘߐ߬ߕߊߡߌ߲ ߓߊߛߌ߰ߞߊ߲ ߞߣߐ߫߸ ߞߏ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߡߐ߰ ߛߌ߫ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫ ߞߊ߲ߕߌ߯ ߢߣߊߕߊߟߌ ߘߐ߫߸ ߛߌ߰ߞߊ߲ ߢߌ߲߬ ߕߊ߭ ߟߋ߬ ߞߍߕߐ߫ ߞߎߡߊ ߏ߬ ߟߊߥߟߌ߬ ߟߊ߫ ߘߏߦߌ߲߫߸ ߞߊ߬ ߛߌߟߊ ߘߌ߫ ߓߍ߯ ߡߊ߬.
ߖߌ߬ߣߍ߬ߞߊ߫ ߞߋ߲߬ߥߟߎ߬ ߆ ߇߆߈ ߄߅߈ ߠߋ߬ ߞߵߊ߬ ߕߐ߮ ߛߓߍ߫ ߢߣߊߕߊߟߌ߫ ߞߊ߲ߡߊ߬߸ ߖߡߊ߬ߣߊ߬ߘߋ߲߫ ߞߋ߲߬ߥߟߎ߬ ߁߄،߅ ߣߌ߫ ߞߐ ߘߐ߫ ߞߊ߬ߣߌ߲߬، ߢߣߊߕߊߟߌ ߣߌ߲߬ ߘߊߡߌ߬ߣߊ߬ ߘߊ߫ ߢߊ ߡߍ߲ ߡߊ߬߸ ߞߎ߲߬ߠߊ߬ߛߌ߮ ߞߊ߲߫ ߞߏ߫ ߊ߬ ߞߍ߫ ߘߊ߫ <<ߟߊ߬ߞߊ߲߬ߘߊ߬ߟߌ ߘߝߊߣߍ߲>> ߠߋ߬ ߞߣߐ߫، ߓߊ߬ߙߌ߬ ߞߣߍ ߞߊ߲߬߸ ߊ߬ ߞߏ ߞߟߊߦߊ߫ ߘߊ߫ ߣߍ߲ߞߍ߫، ߓߊߏ߬߸ ߓߘߍ߬ߓߘߍ߬ߟߌ߬ ߞߙߎߞߊ ߘߏ߫ ߟߎ߫ ߡߊ߫ ߛߋ߫ ߓߙߊߡߊߖߊ߲ߓߊ߲ ߞߍ߫ ߟߊ߫߸ ߊ߬ ߝߊ߲߬ߓߊ ߓߍ߯ ߟߊ߫ ߞߎ߲߬ߕߌ߮ ߟߎ߬ ߡߊߕߊ߯ߣߍ߲߫ ߠߋ߬ ߞߏ ߟߎ߬ ߟߊ߫߸ ߘߏ߫ ߟߎ߫ ߦߋ߫ ߥߛߎ ߟߊ߫߸ ߘߏ߫ ߟߎ߫ ߟߊߕߎߣߎ߲ߣߍ߲߫߸ ߘߏ߫ ߟߎ߫ ߦߋ߫ ߢߊߣߌ߲ߡߊߓߏߙߌ ߘߐ߫ ߖߡߊ߬ߣߊ ߞߐߞߊ߲߬.
ߛߌ߰ߞߊ߲ ߡߊߞߊ߲ߞߊ߲߫ ߞߟߊߘߊ߫ ߝߊ߬ߛߏ߬ߟߊ߬ߞߊ߸ ߞߊ߲ߓߍ߲ ߝߊ߲߬ߞߊ ߞߋ߬ߟߋ߲߬ߧߊ߸ ߖߌ߬ߣߍ߫ ߡߌ߬ߙߌ߲߬ߘߌ߬ ߟߊ߬ߘߍ߸ ߖߌ߬ߣߍ߬ ߓߍ߯ߦߊ ߝߊ߲߬ߞߊ ߘߍ߭߸ ߏ߬ ߟߎ߫ ߞߵߊ߬ ߝߐ߫ ߟߋ߬ ߞߏ߫ ߓߍ߯ ߦߋ߫ ߢߣߊߕߊߟߌ ߣߌ߲߬ ߓߐ߬ߘߍ߬ߓߐ߫߸ ߊ߬ ߣߌ߫ ߝߊ߲߬ߞߊߛߌ߬ߣߊ ߘߏ߫ ߟߎ߫، ߓߊ߬ߙߌ߬ ߢߣߊߕߊߟߌ ߞߍ߫ ߘߊ߫߸ ߞߎ߲߬ߠߊ߬ߛߌ߮ ߘߏ߲߬ ߞߵߊ߬ ߦߌ߬ߘߊ߬ ߞߏ߫ ߖߊ߬ߡߊ ߓߐ߫ ߘߊ߫، ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߛߌߞߊ ߦߋ߫ ߡߐ߰ ߛߌߦߊߡߊ߲߫ ߘߐ߫ ߞߵߊ߬ ߦߌ߬ߘߊ߬ ߞߏ߫ ߖߡߊ߬ߣߊ߬ߘߋ߲ ߓߍ߯ ߛߊ߬ߥߏ߬ ߕߍ߫ ߖߋ߬ߓߌ߬ ߟߊߓߐߣߍ߲ ߘߌ߫.
ߣߴߌ ߘߏ߲߬ ߘߊ߫ ߕߌ߲߬ߞߎߘߎ߲ ߠߎ߬ ߞߣߐ߫߸ ߌ ߘߴߊ߬ ߦߋ߫߸ <<ߤߊ߯ߟߌ>> ߡߊ߫ ߞߢߊ߫ ߦߙߐ ߓߍ߯ ߘߐ߫: ߞߊ߲ߞߊ߲߫ ߣߌ߫ ߝߙߊߣߊ߫߸ ߦߋ߲߬ ߠߎ߬ ߡߍ߲ ߦߋ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߢߊ߲߱ ߘߌ߫߸ ߤߊ߯ߟߌ ߞߊ߬ %߉߆ ߟߋ߬ ߟߊߓߐ߫ ߦߋ߲߬ ߠߎ߬ ߘߐ߫، ߞߐߣߊߞߙߌ߫ ߤߊ߯ߟߌ ߞߊ߬ %߇߄ ߠߋ߬ ߟߊߓߐ߫߸ ߦߋ߲߬ ߡߍ߲ ߢߣߊߕߊߟߌߟߊ ߖߊ߬ߕߋ ߖߌ߰ ߘߊ߫ ߞߊ߬ߣߌ߲߬، ߟߊߓߋ߬ ߞߣߐ߫߸ ߝߊ߲߬ߞߊߛߌ߬ߣߊ ߟߎ߫ ߢߊ߲߱ ߦߋ߫ ߦߋ߲߬ ߡߍ߲ ߘߌ߫߸ ߤߊ߯ߟߌ ߞߊ߬ %߈߆ ߟߊߓߐ߫ ߟߋ߬ ߦߋ߲߬ ߝߛߊߦߌ߫߸ ߊ߬ ߕߘߍ߬ߒ߬ߘߐ߬ߟߌ ߗߡߍ߬ߘߐ߬ߦߊ ߕߎ߲߬ ߦߋ߫ %߈߇ ߟߋ߬ ߘߐ߫.
ߖߌ߬ߣߍ߫ ߝߊ߲߬ߞߊߛߌ߬ߣߊ ߟߎ߬ ߘߐ߫ ߕߐ߯ߟߡߊߓߊ߸ ߡߊߡߊߘߎ߫ ߛߋߟߎ߫ ߘߊߟߍ߲߬ ߖߊߟߏ߫߸ ߏ߬ ߡߊ߫ ߕߏ߫ ߡߊ߬ߞߎ߲߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߝߊ߬ߥߏ߬ߡߊ߬ߛߘߌ߬ ߢߣߊߕߊߟߌ>> ߟߋ߬ ߘߐߙߐ߲߫ ߞߍߣߍ߲߫߸ ߊ߬ ߣߌ߫ ߞߏ߫: <<ߞߊ߬ߝߏ߬ ߖߊߛߏ߲ ߡߊߗߋ߲߰ߧߊ߬ߣߍ߲>> ߠߋ߬ ߞߍߣߍ߲߫ ߢߣߊߕߊߟߌ ߣߌ߲߬ ߘߌ߫، ߞߏߕߌ߯ ߝߟߐ߫ ߓߊ ߎ߯ߙߌ߬ ߝߣߊ߫ ߞߎߡߊ߫ ߘߊ߫ ߛߐ߱ ߢߌ߲߬ ߡߊ߬ ߞߊ߬ ߞߎ߲߬ߠߊ߬ߛߌ߮ ߡߙߌߦߊ ߦߌ߬ߘߊ߬ ߢߣߊߕߊߟߌ ߞߊ߲߬߸ ߞߵߊ߬ ߓߍ߲߬ ߡߊ߬ߝߌ߲߬ߞߊ߲߬ߠߊ ߘߏ߫ ߟߎ߫ ߡߊ߬.
ߞߊ߲ߘߟߌ ߣߌ߲߬ ߛߌ߲߬ߝߏ߲߬ߧߊ߬ߟߌ ߞߐߝߍ߬߸ ߞߎ߲߬ߠߊ߬ߛߌ߮ ߦߴߊ߬ ߢߌߣߌ߲ ߠߋ߬ ߞߊ߲߬ ߢߊ ߓߍ߯ ߡߊ߬ ߕߋ߲߬߸ ߛߴߊ߬ߟߎ߬ ߘߌ߫ ߝߢߐ߫ ߢߌߡߊ߫ ߘߴߊ߬ ߡߊ߬߸ ߞߊ߬ ߛߋ߫ ߞߐߞߊ߲߫ ߛߌ߲ߝߏ߲ߘߊ ߟߎ߬ ߡߙߌߦߊ߫ ߢߌߡߊ ߛߐ߬ߘߐ߲߬ ߠߴߊ߬ ߞߏ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߛߋ߫ ߞߊ߲ߕߌ߯ ߢߣߊߕߊߟߌ ߣߌ߫ ߥߛߊ߬ߘߋ߲߬ ߢߣߊߕߊߟߌ ߟߎ߬ ߞߍ߫ ߟߊ߫ ߞߊ߬ ߞߐ߲߰ ߛߊ߲߬ ߠߊ߬ߓߊ߲ ߢߍ߫، ߏ߬ ߟߎ߬ ߡߍ߲ ߠߎ߬ ߕߎ߬ߡߘߊ߬ ߖߐ߲ߖߐ߲߫ ߡߊ߫ ߟߊߕߍ߰ ߡߎߣߎ߲߬ ߞߊ߬ߣߌ߲߬.
ߒ߬ߓߊ߬߸ ߞߐߝߟߌ߫ ߘߍ߲߬ߞߍ߬ߕߎ߬ߣߍ߲ ߢߌ߲߬ ߠߎ߬ ߟߊߓߐߣߍ߲ ߞߐߝߍ߬߸ ߞߕߌߖߌ߲ ߛߊ߲ߘߐߕߊ ߟߋ߬ ߡߊߞߐ߬ߣߐ߲ ߦߴߌߘߐ߫ ߡߎ߬ߕߎ߲߬߸ ߞߵߊ߬ ߞߏ ߟߊߕߍ߰ ߛߍߣߍ߲߬ ߝߛߊߦߌ߫، ߓߊ߬ߙߌ߬ ߡߐ߰ ߛߌߦߊߡߊ߲߫ ߝߍ߬߸ ߞߣߐ߬ߘߐ߬ߝߟߌ ߦߴߊ߬ ߞߏ ߘߐ߫ ߡߎߣߎ߲߬߸ ߓߊߏ߬߸ ߡߍ߲ ߠߎ߬ ߞߊ߫ ߞߊ߲߫ ߞߊ߬ ߘߐ߬ߕߊߡߌ߲ ߣߌ߲߬ ߞߎ߲߭ߘߏ߲߬߸ ߏ߬ ߟߎ߬ ߡߙߌߦߊ߫ ߟߐ߲ߣߍ߲߫ ߕߍ߫ ߡߎߣߎ߲߬߸ ߣߴߊ߬ߟߎ߬ ߘߌ߫ ߕߏ߫ ߦߋ߲߬ ߥߟߴߊ߬ߟߎ߬ ߘߌ߫ ߥߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
