ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߰ߓߊ ߘߟߊߞߊ߬ ߞߎߣߎ߲߬ ߞߐ߬ߟߏ߲ ߡߊ߬߸ ߂߀߂߅ ߣߍߣߍߓߊ ߕߟߋ߬ ߁߁ ߡߏߙߌߓߦߊ߫ ߘߊ߲ߞߊ߲ ߠߊ߫߸ ߖߊ߬ߕߋ߬ߘߐ߬ߛߌ߮ ߣߌ߲߬ ߡߍ߲ ߦߋ߫ ߖߌ߬ߣߍ߫ ߖߡߊ߬ߣߊ ߞߎ߲߬ߠߊ߬ߦߋ߬ߙߋ߲߬ ߖߊߕߋߘߐߛߌ߮ ߟߎ߬ ߘߏ߫ ߘߌ߫߸ ߡߍ߲ ߦߴߊ߬ ߣߌ߫ ߘߎߢߊ߫ ߓߌ߬ߟߊ߬ ߟߊ߫ ߢߐ߲߮ ߡߊ߬.
ߞߎߣߎ߲߬ ߞߐ߬ߟߏ߲ ߂߀߂߅ ߣߍߣߍߓߊ ߕߟߋ߬ ߁߁ ߞߍ߫ ߘߊ߫ ߖߊ߲߬ߖߏ߲߬ߓߊ߫ ߟߋ߬ ߘߌ߫ ߡߏߙߌߓߦߊ߫߸ ߡߍ߲ ߞߍ߫ ߘߊ߫ ߥߎ߬ߘߊ߲ ߘߌ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߛߐ߬ߘߐ߲߬ ߘߊ߫ ߡߍ߲ ߘߐ߫߸ ߣߴߊ߬ ߞߊ߬ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߘߟߊߞߊ߬߸ ߞߵߊ߬ ߛߐ߬ߘߐ߲߬ ߝߘߊ߬ߝߌ߲߬ߠߊ߫ ߞߊ߬ߝߏ߬ ߞߎ߲ߕߌ߮ ߣߌ߫ ߓߊ߯ߙߊߢߐ߲߮ ߛߌߦߊߡߊ߲߫ ߦߋ߫ ߞߣߍ ߞߊ߲߬، ߞߟߌߣߍ߲߫ ߞߙߍߞߙߍߣߍ߲ ߠߎ߬ ߘߐ߫߸ ߙߎߥߊ߲ߘߊ߫ ߞߊ߲ߕߌ߮ ߔߏߟ ߞߜ߭ߊߡߋ߫ ߕߘߍ߬ ߞߣߍ ߞߊ߲߬߸ ߜ߭ߊߓߐ߲߫ ߞߊ߲ߕߌ߮ ߓߑߙߌߛ ߞߑߟߏߕߍߙ ߏߟߖߌ߫ ߒߖߋߡߊ߫߸ ߛߌ߯ߣߌ߲߬ ߞߏߕߌ߯ ߝߟߐ߫ ߛߙߍߞߍ߫ ߝߟߐ ߟߌߦߐ߮ ߜ߭ߎߐߖ߭ߐ߲߫߸ ߜߋ߲ߞߐ߰ߖߌ߬ߘߊ ߞߏߕߌ߯ ߝߟߐߙߏߓߍߙ ߓߋ߳ߜ߭ߙߋ ߡߊ߲ߓߋ߫߸ ߊ߬ ߣߌ߫ ߛߙߊ߬ߟߏ߲߫ ߞߏߕߌ߯ ߝߟߐ ߘߋ߬ߝ߭ߌߘ ߡߐߦߣߌߣߊ ߛߍ߲ߖߋ߫.
ߖߊ߲߬ߖߏ߲ ߣߌ߲߬ ߦߋ߫ ߦߟߍ߬ߘߐ߬ߞߍ߫ ߝߌ߬ߟߊ߫ ߘߐ߬ߖߊ߬ ߞߍߣߍ߲ ߠߎ߬ ߞߐߝߟߌ ߟߋ߬ ߘߌ߫߸ ߞߊ߬ ߖߌ߬ߣߍ߬ ߟߊߘߏ߲߬ ߘߎߢߊ߫ ߣߍ߰ ߘߊߡߊ߲ ߟߊߝߏߦߟߌߟߓߊ ߟߎ߬ ߛߙߍߘߍ ߘߐ߫، ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߛߌߣߌ߲ߦߋ ߕߐ߰ߡߊ߬ߛߙߋ ߘߏ߫ ߟߋ߬ ߣߌ߲߬ ߘߌ߫߸ ߖߌ߬ߣߍ߬ ߟߊ߫ ߖߘߍ߬ߛߐߘߐ߲ ߣߴߊ߬ ߟߊ߫ ߥߙߎߞߌ ߛߌߟߊ ߕߊ߯ߡߊ ߘߐ߫، ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߣߌ߲߬ ߘߏ߲߬ ߠߊߞߘߎ߬ߣߍ߲߫ ߞߏ߫ ߛߌߦߊߡߊ߲߫ ߠߋ߬ ߡߊ߬߸ ߘߊ߬ߡߊ߲߬ ߞߏ ߦߴߊ߬ ߘߐ߫߸ ߣߍ߰ߛߌ߬ߟߊ߬ ߞߏ߸ ߊ߬ ߣߌ߫ ߘߊ߲ߞߊ߲߫ ߞߏ߸ ߡߍ߲ ߖߐ߰ߣߍ ߥߊߣߍ߲߫ ߝߏ߯ ߊߡߙߌߞߌ߬ ߘߟߊ߫ ߥߊߘߌ ߥߟߎ߬ߡߊ߫ ߂߀ ߢߐ߲߰.
ߖߌ߬ߣߍ߬ ߣߌ߫ ߞߐߞߊ߲߫ ߛߌ߲ߝߏ߲ߘߊ ߘߏ߫ ߟߎ߫ ߟߊ߫ ߓߊ߯ߙߊߢߐ߲߯ߦߊ߫ ߕߋߟߋ߲ߣߍ߲ ߞߐߝߟߌ ߟߋ߬ ߦߴߊ߬ ߘߌ߫߸ ߦߏ߫ ߓߊ߯ߎ߫ ߛߑߕߌߟ߸ ߛ߭ߊߦߌߣߊߟߑߞߏ߸ ߙߌ߬ߦߏ ߕߌ߲߬ߕߏ߸ ߥߌ߯ߣߌ߲ ߍ߲ߕߍߙߑߣߊߛߌߦߐ߲ߣߊߟ߸ ߏ߬ ߟߎ߫ ߟߋ߬ ߣߌ߫ ߖߌ߬ߣߍ߬ ߓߟߏ ߦߋ߫ ߢߐ߲߯ ߓߟߏ߫ ߣߌ߲߬ ߞߏ ߘߐ߫، ߊ߬ߟߋ߬ ߖߊ߬ߕߋ߬ߘߐ߬ߛߌ߮ ߛߌ߰ߣߍ߲߫ ߢߐ߲߯ ߓߏ߲ߧߊ ߟߋ߬ ߞߊ߲߬߸ ߊߘߡߊߦߊ ߞߏߢߊ ߟߎ߬ ߡߊߓߏ߲߬ߧߊ߬ߕߐ߫ ߟߋ߬߸ ߞߊ߬ ߓߐ߰ߝߍ ߟߊߕߊ߲߬ߞߊ߲߬߸ ߊ߬ ߣߌ߫ ߛߋߒߞߏߟߦߊ߫ ߞߏ ߛߌߦߊߡߊ߲߫.
ߊ߬ ߓߊ߯ߙߊ ߝߊ߲߬ߞߊ ߦߋ߫ ߖߌ߬ߣߍ߫ ߣߍ߰ߛߌ߬ߟߊ߬ ߞߙߎߡߘߊ ߟߋ߬ ߓߟߏ߫߸ ߏ߬ ߡߍ߲ ߛߌ߲ߘߌ߫ ߘߊ߫ ߂߀߂߂ ߟߊ߫߸ ߣߴߊ߬ ߟߊߘߍ߬ߣߍ߲߫ ߝߊ߬ߛߏ ߞߟߊ߬ߡߊ߬ߓߊ߰ ߛߌߦߊߡߊ߲߫ ߡߊ߬߸ ߊ߬ ߣߌ߫ ߞߐߞߊ߲ߕߊ ߟߎ߬߸ ߗߋ߬ߥߎ߬ߣߍ߲߬ߗߋߥߎ ߟߎ߬ ߦߴߊ߬ ߘߐ߫߸ ߊ߬ ߣߌ߫ ߖߐ߯ߙߊ߲߫ ߞߏ ߟߎ߬ ߡߊ߬ߡߙߊ߬ߟߌ ߣߌ߫ ߘߊ߬ߡߊ߲ ߥߙߎߞߟߌ ߞߟߊ߬ߡߊ߬ߓߊ߮ ߟߎ߬، ߛߌߡߊ߲ߘߎ߯ ߞߏߢߊ ߣߌ߲߬ ߘߐ߫߸ ߖߌ߬ߣߍ߫ ߣߌ߭ ߦߋ߫ %߁߅ ߟߋ߬ ߘߌ߫ ߖߊ߬ߕߋ߬ߘߐ߬ߛߌ߮ ߘߐ߫߸ ߊ߬ ߓߊ߯ߙߊ߫ ߞߟߊ߬ߟߊ߬ߡߊ ߓߍ߯ ߝߣߊ߫ ߦߋ߫ ߜߋ߬ߟߎ߲߬ ߠߊ߫ ߖߌ߬ߣߍ߫ ߟߋ߬ ߓߟߏ߫.
ߕߑߙߊ߲ߛߑߖߌߣߋߍ߲ ߡߍ߲ ߦߋ߫ ߣߌ߲߬߸ ߛߌߟߊ ߝߊ߲߬ߝߌ߬ߟߊ߬ߡߊ ߞߎߘߍ߫ ߆߅߀ ߟߋ߬߸ ߡߍ߲ ߦߋ߫ ߛߌߡߊ߲ߘߎ߯ ߘߊ߬ߡߊ߲ ߣߌ߫ ߡߏߙߌߓߦߊ߫ ߘߊ߲ߞߊ߲ ߓߌ߬ߟߊ߬ ߟߊ߫ ߢߐ߲߮ ߡߊ߬. ߊ߬ ߞߍߕߐ߫ ߣߊ߲߬ߝߟߏ߬ ߟߊ߬ߘߏ߲߬ ߦߙߐ߬ߓߊ߫ ߟߋ߬ ߘߌ߫߸ ߞߊ߬ ߦߙߐ߫ ߟߊߞߋ߲߬ߛߎ߬ߣߍ߲ ߠߎ߬ ߓߌ߬ߟߊ߬ ߢߐ߲߮ ߡߊ߬߸ ߞߊ߬ ߛߋ߫ ߞߙߊ߬ߖߊߥߏ ߟߎ߬ ߡߊߘߏ߬ߣߌ߲ ߣߐ߰ߦߊ߬ ߟߊ߫߸ ߊ߬ ߣߌ߫ ߕߊ߯ߡߟߊ ߟߎ߬ ߣߌ߫ ߛߣߍ߬ߝߋ߲ ߠߎ߬ ߓߍ߯ ߡߊߘߏ߬ߣߌ߲ ߘߌ߫ ߣߐ߰ߦߊ߬ ߞߐߘߍ߫.
ߟߐ߬ߟߌ ߡߍ߲ ߠߎ߬ ߞߍߕߐ߫ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߣߌ߲߬ ߘߐ߫߸ ߏ߬ ߟߎ߬ ߓߍߣߊ߬ ߞߍ߫ ߛߊߓߎ߫ ߘߌ߫ ߞߊ߬ ߝߘߊ߬ߝߌ߲߬ߠߊ߫ ߖߡߊ߬ߣߊ ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߞߊ߬ ߓߊ߯ߙߊ߫ ߢߐ߲߮ ߝߍ߬߸ ߡߍ߲ ߥߙߎߞߌ ߕߐ߬ߣߐ ߘߌ߫ ߛߋ߫ ߓߍ߯ ߡߊ߬.
ߊߟߎ߫ ߦߴߊ߬ ߟߐ߲߫߸ ߛߌߡߊ߲ߘߎ߯ ߘߊ߬ߡߊ߲߬ߘߊ %߆߅ ߓߍ߯ ߦߋ߫ ߣߍ߱ ߟߋ߬ ߘߌ߫߸ ߡߍ߲ ߞߍߕߐ߫ ߖߌ߬ߣߍ߬ ߞߍ߫ ߟߊ߫ ߘߎߢߊ߫ ߟߊ߫ ߦߟߍ߬ߡߊ߲ ߞߍߓߊ߯ ߓߟߋߓߟߋ ߘߌ߫ ߛߐ߬ߘߐ߲ ߛߌߟߊ߫ ߜߍߣߍ߲ ߝߍ߬߸ ߊ߬ ߣߌ߫ ߞߊ߬ ߓߐ߰ߝߍ ߟߊߕߊ߲߬ߞߊ߬ ߜߘߋߜߘߋ߫.
ߊߟߎ߫ ߦߴߊ߬ ߟߐ߲߫߸ ߛߌߡߊ߲ߘߎ߯ ߖߊ߬ߕߋ߬ߘߐ߬ߛߌ߮ ߘߟߊߞߊ߭ ߦߋ߫ ߥߙߎߞߌ߫ ߓߟߏߕߍ߰ߓߊߟߌ ߞߏߓߊ߫ ߟߋ߬ ߘߌ߫߸ ߡߍ߲ ߦߋ߫ ߛߌߡߊ߲ߘߎ߯ ߂߀߄߀ ߢߍߥߟߊ ߘߌ߫߸ ߞߊ߬ ߖߌ߬ߣߍߍ߫ ߦߟߍ߬ߡߊ߲߫ ߞߵߊ߬ ߞߍ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߢߎߡߍ߫ ߞߏ ߣߴߊ߬ ߘߍ߲߰ߘߊ߬ ߓߟߋߓߟߋ ߘߌ߫.
ߖߌ߯ߓߊ߫ ߖߊ߬ߞߌ߬ߕߋ߫ ߞߵߊ߬ ߦߌ߬ߘߊ߬ ߞߣߍ ߣߌ߲߬ ߞߊ߲߬ ߞߏ߫: <<ߛߌߡߊ߲ߘߎ߯ ߕߍ߫ ߘߊ߬ߡߊ߲߬ ߞߏ ߖߊ߬ߕߋ߬ߘߐ߬ߛߌ߮ ߘߐߙߐ߲߫ ߘߌ߫ ߘߋ߬: ߊ߬ ߦߋ߫ ߦߟߍ߬ߡߊ߲ ߣߌߘߐ ߟߋ߬ ߘߌ߫ ߖߡߊ߬ߣߊ ߞߣߐ߫، ߛߎߘߊ߲ ߏ߬ ߘߏ߲߬ ߦߋ߫ ߞߊ߲ߕߌ߮ ߟߊ߫ ߥߊ߬ߞߊߟߌ ߟߋ߬ ߘߌ߫ ߡߌ߬ߙߌ߲߬ߘߌ ߟߊ߫ ߞߏ ߘߐ߫߸ ߞߊ߬ ߛߌߣߌ߲߫ ߣߊ߬ߕߐ ߥߙߎߞߌ߫ ߞߏ ߟߎ߬ ߢߍߛߌ߰.>> ߖߌ߯ߓߊ߫ ߖߊ߬ߕߌ߬ߞߋ߫ ߟߋ߬ ߞߵߏ߬ ߝߐ߫߸ ߊ߬ߟߋ ߡߍ߲ ߦߋ߫ ߞߊ߲ߓߍ߲ ߞߊ߲ߕߌ߮ ߟߊ߫ ߘߊ߯ߘߐ ߗߋߕߌ߮ ߘߌ߫߸ ߊ߬ ߣߌ߫ ߛߌߡߊ߲ߘߎ߯ ߂߀߄߀ ߡߊ߬ߡߙߊ߬ߟߌ ߘߍ߬ߘߊ ߞߊ߲ߕߌ߮.
ߘߟߊߞߊߟߌ ߡߍ߲ ߞߍߣߍ߲߫ ߣߌ߲߬߸ ߖߌ߬ߣߍ߬ ߓߘߊ߫ ߥߙߎߞߌ ߛߌߟߊ߫ ߜߘߍ߫ ߟߋ߬ ߕߊ߬ ߣߌ߲߬߸ ߖߌ߬ߣߍ߬ ߓߘߊ߫ ߟߊ߫ ߝߘߊ߬ߝߌ߲߬ߠߊ߫ ߖߡߊ߬ߣߊ߬ߓߊ ߟߎ߫ ߞߊ߲߬ ߘߍ߲߰ߦߊ߬ߟߌ ߞߊߡߊ߲ ߞߣߐ߫߸ ߣߌ߫ ߘߍߒߜߘߍߟߊ߫ ߕߍ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
