ߞߘߐߝߐߟߊ߲ ߡߍ߲ ߢߐ߲߰ ߞߘߐߝߐߟߊ߲߫ ߕߍ߫ ߝߘߊ߬ߝߌ߲߬ ߞߊ߲ ߡߎ߰ߡߍ ߘߐ߫ ߘߎߢߊ߫ ߣߌ߲߬ ߞߣߐ߫ ߡߎߣߎ߲߬߸ ߏ߬ ߟߋ ߞߎ߲߬ߠߊ߬ߓߐ߬ߟߌ ߞߍߕߐ߫ ߣߍߣߍߓߊ ߕߋ߬ߟߋ߫ ߂߃ ߣߊ߬ߕߐ ߡߊ߬߸ ߞߊ߬ ߝߘߊ߫ ߒߞߏ ߘߎ߲ߓߎ ߛߌ߲߬ߝߏ߲߬ߧߊ߬ߟߌ ߟߊ߫، ߒߞߏ ߘߎ߲ߓߎ ߛߌ߲߬ߝߏ߲߬ߧߊ߬ߟߌ ߦߋ߫ ߘߎ߲ߓߎ߫ ߟߋ߬ ߘߌ߫߸ ߡߍ߲ ߠߊߘߊ߲ߣߍ߲߫ ߞߵߊ߬ ߟߊߛߌ߰ ߡߊ߲߰ߘߋ߲ ߠߎ߬ ߟߊ߫ ߛߓߍߟߌ ߞߎ߬ߙߎ߲߬ߘߎ ߟߎ߬ ߢߊߓߐ߫ ߞߊ߲ߡߊ߬߬، ߒ߬ߓߊ߬߸ ߏ߬ ߟߎ߫ ߣߐ߬ ߞߘߐߝߐߟߊ߲߫ ߠߋ߬ ߛߓߍ߫ ߟߊ߫߸ ߡߍ߲ ߦߋ߫ ߞߘߐߝߐߟߊ߲߫ ߛߓߊ߬ߕߌ߬ߣߍ߲߬ߓߊ߫ ߘߌ߫:
ߞߎߡߊߘߋ߲߫ ߁߀߅ ߇߂߉
ߞߋ߬ߟߋ߲߬ߠߊ߬ ߕߐ߯ ߂ ߂߂߀
ߛߊ߲߬ߘߊ߬ ߁߄߅߀
ߞߏߓߊ߫ ߞߍߟߊ߫ ߁߄߀
ߏ߬ ߟߎ߫ ߟߋ߬ ߓߍ߯ ߦߋ߫ ߞߘߐߝߐߟߊ߲ ߣߌ߲߬ ߞߣߐ߫، ߒ߬ߓߊ߬߸ ߞߘߐߝߐߟߊ߲߫ ߛߏ߰ߟߏ߲߬ߞߐ߲ߘߍ߫ ߏ߬ ߟߋ ߞߎ߲߬ߠߊ߬ߓߐ߬ߟߌ ߓߍߣߊ߬ ߞߍ߫߸ ߞߵߊ߬ ߦߌ߬ߘߊ߬ ߘߎߢߊ ߟߊ߫ ߝߏߘߋ߫ ߛߟߏ߬ߡߣߊ߫ ߞߎ߲߬ߠߊ߬ߦߋߙߋ߲ ߘߌ߫߸ ߊ߬ ߣߌ߫ ߝߘߊ߬ߝߌ߲߬ ߞߊ߲ ߠߎ߬ ߡߐ߬ߟߐ߲߬ߡߊ߬ߦߊ ߘߌ߫، ߏ߬ ߓߍߣߊ߬ ߞߍ߫ ߟߏ߲߫ ߞߋߟߋ߲߫ ߔߋ߫ ߟߋ߬߸ ߂߀߂߅ ߣߍߣߍߓߊ ߕߋ߬ߟߋ߫ ߂߃ ߡߊ߬.
ߊߟߎ߫ ߓߍ߯ ߟߊߘߍ߬ߣߍ߲ ߞߵߊ߬ ߟߐ߲߫ ߞߏ߫ ߣߍߣߍߓߊ ߕߋ߬ߟߋ߫ ߂߃ ߟߋ߬ ߡߊ߬߸ ߁߉߈߇ ߟߊ߫߸ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߞߊ߬ ߡߊ߲߬ߛߊ߬ߓߊ ߟߊ߫ ߞߟߌߟߌ ߟߊߡߌ߬ߣߊ߬ ߊ߬ߟߋ ߡߍ߲ ߞߍ߫ ߘߊ߫ ߝߘߊ߬ߝߌ߲ ߠߎ߬ ߞߎ߲߬ߠߊ߬ߦߋ߬ߙߋ߲߬ ߘߋ߲ ߘߏ߫ ߘߌ߫߸ ߡߍ߲ ߞߊ߬ ߛߓߍߛߎ߲߫ ߞߙߍߞߙߍ߫ ߞߵߊ߬ ߘߌ߫ ߘߎߢߊ߫ ߓߍ߯ ߡߊ߬ ߞߊ߲߫ ߞߊ߲ߡߊߛߙߋߡߊ ߟߎ߬ ߛߓߍߟߊ߲ ߘߌ߫، ߒ߬ߓߊ߬߸ ߊ߬ ߟߊ߫ ߛߊ߬ߦߊ ߛߊ߲߬ߞߎ߲߬ߢߐ߲߮ ߓߊ߯ ߛߋ߫ ߞߏߕߊ߲߫߸ ߊ߬ ߟߊ߫ ߞߊ߬ߙߊ߲߬ߘߋ߲ ߠߎ߬ ߣߌ߫ ߒߞߏ ߟߊߘߌߦߊߢߍߓߊ߮ ߟߎ߬ ߞߍ߫ ߘߊ߫ ߘߎߢߊ߫ ߝߊ߲߬ ߛߌ߫߸ ߊ߬ߟߎ߬ ߘߴߊ߬ߟߎ߬ ߟߊߘߍ߬ ߞߊ߬ ߛߌ߲߬ߓߏ߲߬ߛߌ ߞߍ߫ ߊ߬ ߦߋ߫߸ ߞߵߊ߬ߟߎ߬ ߤߟߊߞߟߌ߫ ߟߊߖߌ߰ ߡߐ߰ߓߊ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߘߐ߫.
ߓߊߏ߬߸ ߊ߬ ߞߊ߬ ߛߊ߲߬ ߆߅ ߟߋ߬ ߞߍ߫ ߓߊߟߏ߫ ߘߐ߫ ߢߣߊߡߦߊ ߣߌ߲߬ ߞߣߐ߫߸ ߞߊ߬ ߛߊ߲߬ ߃߈ ߖߌߖߊ߬ߣߍ߲ ߞߍ߫ ߝߘߊ߬ߝߌ߲߬ ߞߊ߲ ߠߎ߬ ߟߓߊߟߏ ߟߊ߫ ߛߓߍߛߎ߲߫ ߛߊ߬ߓߊߟߌ߫ ߕߎߣߎ߲ߓߊߟߌ ߘߐ߫߸ ߣߊߟߌ߬ߡߎ߲߬ ߒߞߏ ߘߌ߫߸ ߊ߬ ߞߵߏ߬ ߡߍ߲ ߛߌ߲ߘߌ߫ ߁߉߄߉ ߟߊ߫߸ ߓߍ߲ߖ߭ߍߘߎ߯، ߒ߬ߓߊ߬߸ ߢߌ߬ߣߊ߲߬ ߂߀߂߅ ߣߍߣߍߓߊ ߕߋ߬ߟߋ߫ ߂߃ ߟߋ߬ ߓߍ߲߬ߕߐ߫ ߊ߬ ߟߊ߫ ߛߊ߬ߦߊ ߛߊ߲߬ ߃߈ ߡߊ߬߸ ߏ߬ ߡߍ߲ ߛߌ߲߬ߝߏ߲߬ߧߊ߬ߟߌ ߓߍߣߊ߬ ߞߍ߫ ߒߞߏ ߕߐ߲߫ ߛߌߦߊߡߊ߲߫ ߓߟߏ߫ ߘߎߢߊ߫ ߢߊߝߍ߬.
ߏ߬ ߟߋ ߘߐ߫߸ ߒߞߏ ߘߎ߲ߓߎ ߛߌ߲߬ߝߏ߲߬ߧߊ߬ߟߌ߸ ߏ߬ ߡߍ߲ ߞߊ߲ߕߌ߯ߦߊ ߦߋ߫ ߘߝߖ ߤߦߊ߫ ߡߊ߯ߘߌ߫ ߛߌ߬ߟߊ߬ ߓߟߏ߫߸ ߏ߬ ߟߎ߬ ߦߴߊ߬ ߝߍ߬ ߞߊ߬ ߛߌ߲߬ߓߏ߲߬ߛߌ ߏ߬ ߟߋ ߞߍ߫ ߢߌ߬ߣߊ߲߬߸ ߡߊ߬ߓߏ߲߬ߧߊ߬ߕߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߓߏ߲߬ߧߊ ߞߣߐߡߊ߬، ߏ߬ ߡߍ߲ ߣߴߊ߬ ߟߊ߫ ߞߎ߲߬ߠߊ߬ߛߌ߮ ߓߘߊ߫ ߝߊ߬ߛߏ߬ ߞߊ߲ ߠߎ߬ ߘߊ߲ߞߎ߲߫ ߛߌ߰ߞߊ߲ ߞߣߐ߫߸ ߞߵߊ߬ߟߎ߬ ߞߍ߫ ߞߎ߲߬ߠߊ߬ߛߌ߰ ߞߊ߲ ߘߌ߫، ߝߊ߬ߛߏ߬ ߞߊ߲ ߠߎ߬ ߘߏ߲߬ ߣߌ߫ ߝߊ߬ߛߏ߬ ߛߓߍߟߌ ߟߎ߫ ߟߋ߬ ߘߍ߲ߣߍ߲߫ ߢߐ߲߯ ߠߊ߫.
ߖߊ߲߬ߖߏ߲ ߣߌ߲߬ ߞߍߕߐ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߋ߬ ߟߊ߫߸ ߕߎߟߊߝߌ߲ ߂߈ ߝߏ߯ߓߊ ߞߣߐ߫، ߡߐ߰ߓߊ߬ ߞߟߊߒߞߋ ߛߌߦߊߡߊ߲߫ ߠߋ߬ ߡߊߞߟߌߣߍ߲߫ ߣߌ߲߬ ߞߏ ߢߣߊߓߊ߯ߦߊ߫ ߞߊ߲ߡߊ߬߸ ߘߎߢߊ߫ ߞߊߓߋ ߟߊ߫߸ ߊ߬ ߣߌ߫ ߖߌ߬ߣߍ߫ ߖߡߊ߬ߣߊ ߖߍ߬ߘߍ ߞߣߐ߫، ߞߊ߬ߕߎ߲߯߸ ߖߌ߬ߣߍ߫ ߡߐ߰ߓߊ߬ ߓߏߟߏ߲ ߞߣߐ߫ ߡߐ߮ ߟߎ߬ ߣߌ߫ ߝߊ߬ߛߏ߬ ߞߊ߲ ߞߐߡߊߓߌ߲ߓߌ߲ߠߊ ߟߎ߬ ߣߌ߫ ߟߊ߬ߛߌ߰ߘߋ߲ ߠߎ߬ ߣߌ߫ ߝߘߊ߬ߝߌ߲߬ߧߊ ߟߊߘߌߦߊߢߍߓߊ߮ ߟߎ߬ ߡߊߞߟߌߣߍ߲߫ ߠߋ߬، ߞߵߊ߬ ߟߴߊ߬ ߞߊ߲߬߸ ߞߊ߬ߙߊ߲߬ߕߊ ߟߎ߬ ߣߌ߫ ߞߊ߬ߙߊ߲߬ߘߊ ߟߎ߬ ߣߌ߫ ߞߊ߬ߙߊ߲߬ߘߊ߬ߓߊ ߟߎ߬ ߣߌ߫ ߖߊ߯ߓߘߊ ߟߎ߬ ߡߊߞߟߌߣߍ߲߫ ߠߋ߬، ߞߎߡߊߕߍ߫ ߘߋ߬ߙߌ߬ߘߊ ߟߎ߬ ߣߌ߫ ߘߌ߯ߣߊ ߣߌ߫ ߟߊ߲߬ߘߊ ߡߐ߰ߓߊ ߟߎ߫ ߡߊ߬.
ߊ߬ ߝߊ߬ߦߊ ߦߋ߫ ߖߌ߬ߣߍ߬ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ ߟߋ߬ ߓߟߏ߫߸ ߊ߬ ߣߌ߫ ߡߊ߬ߓߏ߲߬ߧߊ߬ߕߊ߫ ߓߌ߬ߟߊ߬ߢߐ߲߰ߡߊ ߞߏߕߌ߮ ߝߊߣߊ߬ ߛߎߡߊ߬. ߊ߬ ߣߊ߬ߦߊ ߦߋ߫ ߓߐ߬ߟߐ߲߬ߞߊ߬ ߡߙߊߡߊ߫ ߛߙߋ߫ ߞߙߏ߬ߡߊ߫ ߟߋ߬ ߓߟߏ߫، ߖߊ߲߬ߖߏ߲ ߞߎ߲߬ߠߊ߬ߛߌ߰ߦߊ ߘߌߣߍ߲߫ ߛߟߊߕߌ߯ ߖߌ߯ߓߊ߫ ߖߊ߬ߞߌ߬ߕߋ߫ ߟߋ߬ ߡߊ߬߸ ߞߊ߲ߓߍ߲ ߞߊ߲ߕߌ߯ߘߊ ߞߎߓߋߘߐ ߗߋߕߌ߮ ߟߵߏ߬ ߘߌ߫، ߊ߬ ߣߌ߫ ߒ߬ ߣߊߡߛߏ ߞߏ߲߬ߓߏ߫ ߖߊ߰ߞߊ߫ ߛߘߌ߬ߓߋ߫߸ ߏ߬ ߡߍ߲ ߦߋ߫ ߘߍ߲߰ߦߊ߬ߟߌ ߣߌ߫ ߥߊߟߌߘߓߊ ߟߎ߬ ߣߌ߫ ߡߊ߲ߞߊ߲ ߠߎ߬ ߞߏߕߌ߮ ߘߌ߫.
ߞߟߌߣߍ߲߫ ߞߙߍߞߙߍߣߍ߲ ߠߎ߬ ߘߐ߫߸ ߡߊ߬ߓߏ߲߬ߧߊ߬ߕߊ߫ ߘߊ߲߬ߛߊ߫ ߞߙߎ߬ߡߊ߬ ߦߴߏ߬ ߘߐ߫߸ ߘߐ߬ߕߊߡߌ߲ ߞߏߟߊߕߍ߯ߘߊ߫ ߝߊ߬ߛߏ߬ߟߊ߬ߞߊ ߞߊ߲ߕߌ߮، ߊ߬ ߣߌ߫ ߞߎ߲߬ߠߊ߬߬ߛߌ߮ ߛߌ߲߬ߝߏ߲ ߠߎ߬: ߡߊ߬ߓߏ߲߬ߧߊ߬ߕߊ߫ ߊߟߌߝߊ߫ ߓߞߊߙ ߓߊߙߌ߫߸ ߟߞߊ߬ߙߊ߲߬ߠߌ߲ ߛߊ߲ߘߐߕߊ ߣߌ߫ ߟߐ߲ߞߏ߫ ߕߌߙߌ߲ߠߌ߲ ߣߌ߫ ߢߊߞߎߘߦߊߟߌ ߞߏߕߌ߮ ߟߵߏ߬ ߘߌ߫، ߡߊ߬ߓߏ߲߬ߧߊ߬ߕߊ߫ ߡߏߙߌ߫ ߞߐ߲ߘߍ߫߸ ߛߏߟߐ ߞߏߕߌ߮، ߡߊ߬ߓߏ߲߬ߧߊ߬ߕߊ߫ ߞߟߍ߬ߕߌ߯ ߊߡߙߊ߫ ߞߡߊ߬ߙߊ߬߸ ߞߊ߲ߕߌ߯ߘߊ ߝߘߏ߬ߓߊ߬ ߞߟߊ߬ߕߌ߮، ߡߊ߬ߓߏ߲߬ߧߊ߬ߕߊ߫ ߞߏ߲߬ߓߏ ߌߓߙߊߤߌߡߊ߫ ߞߊߟߌߟ ߞߊ߬ߓߊ߸ ߡߊ߬ߓߏ߲߬ߧߊ߬ߕߊ߫ ߞߏ߲߬ߓߏ߫ ߟߊ߲߱ߛߌ߬ߣߍ߬ ߞߐ߲ߘߍ߫ (ߛߏߣߊߔ ߗߋߕߌ߮)، ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫߸ ߡߍ߲ ߠߎ߬ ߓߕߐ߫ ߝߘߊ߬ߝߌ߲߬ߠߊ߬ ߣߌ߫ ߘߎߢߊ߫ ߢߊߝߍ߬߸ ߞߵߊ߬ߟߎ߫ ߞߎ߲߬ߛߌ߫ ߜߙߊ߬ߓߊ ߢߌ߲߬ ߠߊ߫ (ߞߊ߬ ߓߐ߫ ߓߋߣߍ߲߫߸ ߓߙߎߞߌߣߊ߫ ߝߊ߬ߛߏ߬߸ ߜߋ߲ߞߐ߰ߖߌ߬ߘߊ߸ ߞߏ߲߬ߞߏ߫…).
ߏ߬ ߘߐ߫߸ ߖߊ߲߬ߖߏ߲߬ߓߊ ߣߌ߲߬ ߞߟߌߟߌ߫ ߛߓߍ ߘߌߣߍ߲߫ ߠߋ߬ ߖߌ߬ߣߍ߬ ߒߞߏ ߕߐ߲ ߓߍ߯ ߡߊ߬߸ ߓߊߏ߬ ߒߞߏ ߡߐ߬ߟߐ߲ ߞߘߐߕߊ߬ ߞߏߓߊ߫ ߟߋ߬ ߡߍ߲ ߡߊ߲߫ ߞߊ߲߫ ߞߊ߬ ߝߐ߫ ߡߐ߰ ߞߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
