ߛߎߡߊ߲ߞߏ߬ߦߌ߬ / ߞߟߐ߬ߣߍ߲߬ ߊߡߙߊ߫ ߞߊ߲ߕߍ߫ ߣߌ߫ ߓߊߟߊ߲ߘߎ߯ ߖߊ߰ߞߊ ߞߋߕߊ߬ ߘߋ߲ߞߍ߫ ߛߟߏ߬ߡߣߊ߬ ߞߊ߲ߕߍ߫ ߛߐ߬ߘߐ߲߬ ߘߊ߫ ߁߉߂߂ ߟߋ߬ ߟߊ߫ ߞߟߐ߬ߣߍ߲߫ ߡߍ߲ ߣߌ߫ ߛߎߡߊ߲ߞߏ߬ߦߌ߬ ߕߍ ߦߋ߫ ߞߎߘߍ߫ ߝߌ߬ߟߊ߬ ߘߌ߫.
ߊ߬ ߘߏ߲߬ߓߊߟߌ ߞߊ߬ߙߊ߲߬ߕߊ ߟߊ߫ ߸ ߊ߬ ߟߐ߲ߞߏߕߌ߯ߦߊ ߦߋߟߋ߲ ߞߊ߬ ߞߐߘߐ߲ ߓߏ߲ ߘߊߡߌ߬ߣߊ߬ ߸ ߕߎ߬ߡߊ߬ ߡߍ߲ ߊ߬ ߕߘߍ߬ ߦߋ߫ ߟߝߊߙߌ߫ ߖߊ߲ߓߊ ߘߏ߫ ߞߊ߬ߙߊ߲߬ ߠߊ߫ ߞߊ߬ ߓߐ߫ ߛߌ߬ߛߌ ߝߐߘߊ ߘߐ߫ (ߞߎ߬ߞߊ߯ߣ) ߡߍ߲ ߞߵߊ߬ ߝߊ߬ ߟߊ߫ ߞߊ߬ߙߊ߲߬ߘߋ߲ ߠߎ߫ ߞߣߐ߬ߘߐߝߟߌ߬ ߸ ߊ߬ ߣߌ߫ ߞߵߊ߬ ߝߊ߬ ߖߍ߬ߘߍ ߟߤߊߕߍߦߊ߫ ߞߴߊ߬ߟߋ߬ ߘߋ߲ ߠߋ߬ ߣߌ߲߬.
ߊ߬ ߘߏ߲߭ ߞߊ߬ߙߊ߲߬ߕߊ ߟߴߊ߬ ߛߊ߲߬ ߇ ߸ ߣߊߟߌ߬ߡߎ߲߫ ߊ߬ ߝߊ߬ ߊߡߙߊ߫ ߞߊ߲ߕߍ߫ ߟߊ߫ ߘߎ߰ߡߊ߬ ߞߊߙߊ߲ߕߊ ߘߌ߫ ߞߟߐ߬ߣߍ߲߫ ߸ ߊ߬ ߤߊߞߟߌ ߘߌߦߊ ߡߊ߬ ߸ ߊ߬ ߕߘߍ߬ ߦߴߊ߬ ߞߊ߬ߙߊ߲߬ߘߋ߲߬ߢߐ߲߰ ߛߌߦߊߡߊ߲߫ ߟߊߓߌ߬ߟߊ߬ ߟߊ߫ ߘߓߌ߬ ߘߐ߫.
ߊ߬ ߞߵߊ߬ ߣߊ߫ ߞߐ ߟߊߓߊ߬ߕߏ ߘߊߡߌ߬ߣߊ߬ ߕߎ߬ߡߊ߬ ߖߏߣߊ ߏ߬ ߟߊ߫ ߸ ߞߊ߬ ߕߏ߫ ߥߊ߫ ߟߊ߫ ߟߐ߯ߞߎ߲߫ ߠߊߓߊ߲ ߞߍ߫ ߟߴߊ߬ ߓߊߙߌ߲ߞߍ߫ ߖߌ߬ߓߙߌ߬ߟߊ߬ ߖߊߟߏ߫ ߝߍ߬ ߓߊ߬ߘߏ ߟߊ߫ ߓߊ߲ߟߊ߲ߘߎ߯.
ߊ߬ ߟߊ߫ ߓߊߟߊ߲ߘߎ߯ ߥߊߟߌ ߘߏ߫ ߛߋ߲߭ߝߍ߬ ߸ ߊ߬ ߞߊ߬ ߥߊߛߏߟߏ߲߫ ߘߐ߬ߝߐ ߛߓߍߣߍ߲ ߦߴߊ߬ ߓߊߙߌ߲ߞߍ߫ ߓߟߏ߫ ߡߊ߬ߣߌ߲߬ߞߊ߬ߞߊ߲ ߊߙߊߓߎ߫ ߞߟߏߘߋ߲ ߘߐ߫ ߸ ߊ߬ ߞߵߊ߬ ߦߋ߫ ߏ߬ ߞߊ߬ߙߊ߲ ߣߐ߰ߡߊ߲߫ ߕߍ߫ ߡߐ߰ ߜߘߍ߫ ߡߊ߬ ߝߏ߫ ߊ߬ ߛߓߍߓߊ߮ ߞߋߟߋ߲، ߊ߬ߟߋ ߡߍ߲ ߠߴߊߙߊߓߎ߫ ߟߐ߲ ߦߴߊ߬ ߓߊߙߌ߲ߞߍ߫ ߢߍ߫ ߸ ߏ߬ ߞߊߟߌߡߊ߲߫ ߞߊ߬ߝߊ ߏ߬ ߞߊ߬ߙߊ߲߬ ߠߴߊ߬ߟߋ ߘߌ߫، ߏ߬ ߞߍ ߊ߬ ߞߊ߬ ߖߌ߰ߟߌ ߟߐ߬ ߡߊ߲߬ߘߋ߲߫ ߝߘߏ߬ߓߊ߬ߞߊ߲ ߡߊ߬ ߦߏ߫ ߡߐ߰ ߛߌߦߊߡߊ߲߫ ߕߍ߬ߘߵߊ߬ ߖߌ߰ ߟߊ߫ ߢߊ ߡߍ߲ ߞߏ߫ ߊ߬ ߟߊ߫ ߞߌ߬ߛߍ߬ߡߊ߬ߦߊ ߡߊ߫ ߛߋ߫ ߛߓߍߟߌ ߡߊ߬.
ߏ߬ ߣߴߊ߬ ߕߊ߫ ߸ ߊ߬ ߡߊ߫ ߓߊ߲߫ ߘߍ߲߬ߞߣߍ߬ߦߊ߬ ߟߴߊ߬ ߡߊ߬ ߝߋߎ߫ ߞߏ߫ ߞߊ߲ ߘߏ߫ ߞߊ߫ ߝߌ߬ߛߊ߬ ߘߏ߫ ߘߌ߫.
߁߉߄߀ ߠߊ߫ ߸ ߊ߬ ߞߊ߬ ߝߏߘߋߦߊ ߡߐ߬ߟߐ߲ ߛߐ߬ߘߐ߲߬ ߞߎ߬ߙߊ߬ߣߊ ߓߊߓߋ߭ ߘߐ߫. ߏ߬ ߡߍ߲ ߦߋ߫ ߘߍ߬ߡߍ߲߬ߘߌ߬ ߟߊ߫ ߡߐ߰ ߟߊ߫ ߡߍ߲ ߞߊ߬ ߞߎߙߊ߬ߣߊ ߡߎ߰ߡߍ ߖߌ߰ ߊ߬ ߣߌ߫ ߞߵߊ߬ ߓߍ߯ ߝߊ߬ߛߊߙߌ߫ ߊ߬ ߝߊ߬ ߞߍ߲ߘߍ ߢߣߊ߫، ߓߊ߬ߙߌ߬ ߣߊߥߎ߲ ߡߌߣߌ߲߫ ߘߴߊ߬ ߝߊ߬ ߟߊ߫ ߛߊ߬ߦߊ ߞߐ߫ ߟߋ߬.
߁߉߄߁ ߠߊ߫ ߸ ߊߟߊ߫ ߞߵߊ߬ ߝߊ߬ ߊߡߙߊ߫ ߞߊ߲ߕߍ߫ ߟߊ߫ ߞߊ߬ߙߌ߬ߝߊ ߡߌ߬ߘߵߊ߬ ߟߊ߫ ߸ ߞߵߊ߬ ߕߘߍ߬ ߝߊ߲߬ߞߊ߲߬ ߛߓߍ߬ ߞߏ ߦߋ߫ ߝߌߙߌ߲ߝߌߙߌ߲ ߞߊ߲߬ ߛߟߏ߬ߡߣߊ߬ ߞߊ߲ߕߍ߫ ߛߣߐ߬ߡߍ ߘߐ߫.
߁߉߄߂ ߟߊ߫ ߸ ߊߟߊ߫ ߞߵߊ߬ ߦߟߌߘߏ߲߬ ߛߋ߲߬ߠߊ߬ߓߐߟߌ ߞߍ߫ ߟߊ߫ ߸ ߞߊ߬ ߛߐ߰ ߞߘߏ߬ߛߊ߫ ߡߊ߬ ߸ ߏ߬ ߞߐ߫ ߞߊ߬ ߕߊ߯ߡߊ ߓߟߏߟߊߕߎ߲߰ ߁߉߄߃ ߟߊ߫ ߞߊ߬ ߕߊ߬ߡߌ߲߬ ߞߐ߭ߖߎ߬ߟߊ߬ ߣߌ߫ ߓߎ߲߬ߖߊ߬ߟߌ߬ ߸ ߤߊ߲߯ ߜߋ߲ߞߐ߰ߖߌ߬ߘߊ ߟߊ߫.
߁߉߄߄ ߠߊ߫ ߸ ߟߌߓߊ߲ߞߊߞߍ ߘߏ߫ ߟߊ߫ ߝߐ߰ߓߍ ߟߊߛߐ߬ߘߐ߲߬ ߘߴߊ߬ ߓߟߏ߫ ߊߙߊߓߎ߲ ߞߊ߲ ߘߐ߫ ߸ ߊ߬ ߥߊ߫ ߘߴߊ߬
ߦߴߏ߬ ߞߣߐ߫ ߝߐ߰ߓߍ߬ߦߊ߬ߟߊ߫ ߜ߭ߊ߬ߡߊߟ ߡߊߙߎߥߊ߫ ߓߟߏ߫ ߞߏ߫: ߝߘߊ߬ߝߌ߲߬ߞߊ߲ ߠߎ߬ ߞߊ߫ ߛߌߦߊ߫ ߸ ߊ߬ߟߎ߬ ߕߍ߫ ߛߋ߫ ߟߊ߫ ߛߓߍ߫ ߟߊ߫، ߞߏ߫ ߛߋߒߞߏߟߊ ߓߍ߯ ߓߘߊ߫ ߞߢߊ߬ ߊ߬ߟߎ߬ ߛߓߍ ߟߊ߫ ߞߟߍߞߕߍ߫ ߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊߞߏߟߏ߲ߧߊ ߘߌ߫ ߞߊ߲ߜߍ ߟߊ߫.
ߔߊߞߌ߰ ߹ ߖߊ߰ ߗߍ߭ ߡߍ߲ ߦߋ߫ ߛߌ߬ߣߐ߰ ߟߊ߫ ߘߐ߬ߕߐ߰ߛߟߌ߬ ߞߊ߲ ߘߊߝߍ߬ ߸ ߏ߬ ߡߊ߫ ߞߍ߫ ߛߟߏ߬ߡߣߊ߬ ߞߊ߲ߕߍ߫ ߘߌ߫ ߸ ߖߊ߰ ߜߟߏ߬ߝߌ߲߫ ߞߊߙߊ߲߬ߣߍ߲ ߡߍ߲ ߦߋ߫ ߦߙߍߦߙߍ߫ ߟߊ߫ ߜߟߏ߬ߜߍ ߢߍߡߌߙߌ߲ ߡߊ߬ ߸ ߏ߬ ߕߍ߫ ߓߊߟߊ߲ߘߎ߯ ߖߊ߰ߞߊ ߘߋ߲ߞߍ߫ ߘߌ߫ ߸ ߖߊ߱ߖߊ߱ ߝߘߊ߬ߝߌ߲߬ߘߋ߲ ߡߍ߲ ߞߛߌ߬ߞߛߊ߬ ߟߊ߫ ߕߎ߬ߓߊ߬ߓߎ߬ߘߋ߲ ߕߙߐߝߍ߬ ߸ ߏ߬ ߡߊ߫ ߞߍ߫ ߛߎߡߊ߲ߞߏߦߌ߬ ߊߡߙߊ߫ ߘߋ߲ߞߍ߫ ߘߌ߫
ߞߎߡߊ ߏ߬ ߟߋ ߞߊ߬ ߞߋ߬ߟߋ߲߬ߠߊ߬ ߡߙߌ ߓߌ߬ߟߊ߬ ߞߊ߬ߙߊ߲߬ߡߐ߯ ߝߏߘߋ߫ ߛߟߏ߬ߡߣߊ߬ ߟߊ߫ ߸ ߞߊ߬ ߖߋ߬ߟߌ ߟߊ߫ ߥߎ߲߬ߝߊ߲߬ߠߌ߲ ߥߙߵߊ߬ ߛߐ߲߬ߕߟߏ ߣߊ߬ߝߏ߬ߟߏ߲߬ߓߊ ߡߊ߬ ߸ ߝߏ߫ ߊ߬ ߞߵߊ߬ ߡߙߌ ߟߊߕߊ߯ ߊ߬ ߟߊ߫ ߖߋ߬ߟߌ߬ߞߐ߬ߕߊ߲߬ ߓߊߛߌ ߡߊ߬.
ߡߙߌ ߥߙߊ߬ ߞߏ߬ߖߎ߯ߦߊ ߞߵߊ߬ ߞߎ߬ߡߊ߲߬ߘߌ߫ ߛߎ ߡߌ߲߬ߛߍ߲߬ ߞߋߟߋ߲߫ ߔߋ߫ ߛߎ߬ߣߐ߮ ߡߊ߬ ߸ ߞߵߊ߬ ߕߐ߭ ߕߏ߫ ߞߋ߬ߟߋ߲߬ߠߊ߬ ߞߎߡߊ߫ ߣߌ߫ ߖߘߍ߬ߢߌߣߌ߲ߞߊ ߣߌ߫ ߖߘߍ߬ߖߋߓߌ ߡߊ߬.
ߖߟߎ߬ߛߙߊ߬ߘߋ߲ ߞߵߏ߬ ߟߊߓߊ߲߫ ߞߊ߬ߟߊ ߕߊ߭ ߡߊ߬ ߸ ߊ߬ ߢߊߦߋ ߞߐ ߊ߬ ߓߟߏ߫ ߞߏ߫ ߊߟߊ ߓߊ߲ ߞߐ ߞߎ߲߭ ߣߌ߫ ߤߊߞߟߌ ߘߐ߬ߞߕߌ߬ߟߌ ߛߋߞߏߦߊ ߘߌ߫ ߟߊ߫ ߝߘߊ߬ߝߌ߲ ߣߌ߫ ߝߘߊ߬ߜߍ ߣߌ߫ ߝߘߊ߬ߛߊߦߌ ߓߍ߯ ߡߊ߬ ߸ ߞߏ߫ ߡߐ߰ ߕߍ߰ߡߊ߬ߛߌ߰ ߞߎ߲߫ ߕߍ߫ ߡߊ߰ߙߌ߬ߓߊ ߡߊ߬.
߁߉߄߄ ߏ߬ ߟߊ߫ ߸ ߊ߬ ߞߵߊߙߊߓߎ ߛߓߍߛߎ߲ ߟߢߊ߬ߟߌ ߝߊ߲߬ߝߘߊ ߕߊ߬ ߛߴߊ߬ ߘߌ߫ ߓߍ߲߬ߒ߬ߛߋ߲߬ߡߊ߫ ߛߐ߬ߘߐ߲߬ ߏ߬ ߘߐ߫ ߒ߬ ߠߊ߫ ߞߊ߲ ߠߎ߬ ߛߓߍ߫ ߞߏ ߘߐ߫، ߊ߬ ߕߊ߫ ߡߙߌ߫ ߘߐ߫ ߕߘߍ߬ ߞߏ߫ ߊ߬ ߓߊߙߌ߲ߞߍ߫ ߘߛߍߣߍ߲߫ ߣߊ߬ߞߍ߫ ߛߌ߰ߙߊ ߘߏ߫ ߟߎ߫ ߟߋ߬ ߘߝߊ߫ ߟߊ߫، ߊ߬ ߞߊ߬ ߔߌ߲ ߣߌ߫ ߔߊ߲ ߞߍ߫ ߸ ߊ߬ߙߊ߬ߓߎ ߡߊ߫ ߛߋ߫ ߒ߬ ߠߊ߫ ߞߊ߲ ߛߓߍ߫ ߟߊ߫، ߒ߬ߞߵߏ߬ ߡߴߊ߬ ߕߐ߬ߘߐߝߊ߰ ߝߘߊ߬ߝߌ߲߬ߠߊ߬ ߞߊ߲ߞߘߐߓߐ ߖߋ߬ߓߟߌ߬ ߢߌߣߌ߲ ߘߐ߫.
߁߉߄߇ ߟߊ߫ ߸ ߞߵߊ߬ ߕߘߍ߬ ߊ߬ߟߋ ߖߍ߬ߘߍ ߓߘߊ߫ ߖߘߍ߬ߟߊ߬ߞߐ߰ ߛߌߦߊߡߊ߲߫ ߞߍ߫ ߝߊ߬ߙߊ߲߬ߛߌ߬ߞߊ߲ ߠߊ߫ ߜߋ߲ߞߐ߰ߖߌ߬ߘߊ ߛߎ߫ ߘߐ߫ ߞߊߙߊ߲ߕߊ ߟߎ߬ ߟߊ߫ ߸ ߊ߬ ߞߵߊ߬ ߡߙߌ߫ ߒ߬ ߠߊ߫ ߛߓߍߛߎ߲߫ ߞߏ ߢߊߢߌߣߌ߲ ߡߊ߬ ߟߊ߬ߕߍ߲ ߘߐ߫، ߓߊߏ߬ ߊ߬ ߟߊ߫ ߛߣߐ߬ߡߍ߬ߘߐ߬ߦߊ ߘߐ߫ ߞߏ߫ ߡߊ߰ߙߌ ߕߍ߫ ߛߋ߫ ߡߌ߬ߙߌ߲߬ߘߌ ߘߏ߫ ߘߊ߲߫ ߠߊ߫ ߞߴߏ߬ ߦߋ߫ ߣߊ߬ ߕߐ߭ ߟߎ߬ ߡߊߟߐ߬ ߞߊ߲ߡߊ߬ ߘߎߢߊߘߐߕߍ߮ ߟߊ߫.
ߊ߬ ߣߌ߫ ߞߊ߲ߡߊߛߙߋ ߕߏ߫ ߘߊ߫ ߢߐ߲߮ ߞߣߐߘߐߝߌ߬ߟߌ ߟߊ߫ ߛߓߍߟߌ߫ ߞߊ߲ߡߊߛߙߋߒߕߊ߲ ߞߊ߬ߙߊ߲߬ ߕߎߡߊ ߣߊߟߌ߬ߡߎ߲߫ ߟߊ߬ߕߍ߲߬ ߛߓߍߟߌ ߘߌ߫ ߸ ߊ߬ ߓߊ߯ ߞߎߡߦߊ߫ ߡߎߣߎ߲ߣߍ߲ߓߊ ߟߎ߬ ߛߓߍ߫ ߸ ߏ߬ ߟߎ߬ ߕߍ߫ ߛߋ߫ ߟߊ߫ ߓߐ߫ ߟߊ߫ ߢߐ߲߮ ߘߐ߫ ߦߏ߫ ߕߊ߲߬:
߂) ߌ ߣߴߌ ߡߏ߬ߛߏ ߖߎ߮ ߟߋ߫ ߣߌ߲߬ # ߌ ߣߴߌ ߡߛߏ߬ ߖߎ߮ ߟߋ߫ ߣߌ߲߬
߃) ߘߋ߲ߣߍ߲ ߦߋ߫ ߝߊ߬ߟߌ ߜߊ߬ߛߌ߬ ߟߴߊ߬ ߡߊߘߌߡߌ߲߫ ߞߊ߲ ߠߋ߫ ߡߊ߬ # ߘߋ߲ߣߍ߲ ߦߋ߫ ߝߊ߬ߟߌ߬ ߜߊ߬ߛߌ߬ ߟߴߊ߬ ߡߊߘߌߡߌ߲߫ ߞߊ߲ ߠߋ߫ ߡߊ߬
ߏ߬ ߟߎ߬ ߛߎ߯ ߛߌߦߊߡߊ߲ ߘߐߞߕߌ ߞߐߝߍ߬ ߸ ߊ߬ ߣߌ߫ ߖߊ߬ߕߋ߬ߡߌ߬ߘߊ߬ ߤߏߞߌ߫ ߟߐ߲ߕߌ߯ߟߞߊ ߞߣߐߡߊ߬ ߸ ߊ߬ ߞߵߊ߬ ߢߊߦߋ߫ ߞߏ߫ ߝߍ߭ ߕߴߊ߬ߟߋ ߟߊ߫ ߸ ߝߍ߭ ߦߋ߫ ߟߊ߬ߕߍ߲ ߠߋ߬ ߟߊ߫. ߏ߬ ߞߍ ߊ߬ ߦߙߌ߬ߘߌ߬ ߘߊ߫ ߖߘߍ߬ߞߊ߬ߣߌ߲߬ ߛߓߍ߬ߛߎ߲߬ ߞߏ ߞߊ߲߬، ߁߉߄߉ ߞߏ߲ߞߏߘߌ߬ߓߌ ߕߟߋ߬ ߁߄ ߸ ߊ߬ ߞߊ߬ ߒߞߏ ߛߓߍߛߎ߲߫ ߞߊ߲ߡߊߛߙߋߡߊ ߛߌ߲ߘߌ߫. ߞߊ߬ ߓߊ߲߫ ߞߊ߬ ߞߊ߬ߝߊ߫ ߁߈߃ ߕߏ߫ ߝߘߊ߬ߝߌ߲߬ߘߋ߲ ߠߎ߬ ߓߟߏ߫ ߛߌ߲ߞߐ߲ߡߌߘߊ ߝߊ߬ߛߏ߬ ߗߍ ߘߌ߫.
ߊ߯ ߹ ߟߐ߲ߞߏߕߌ߮: ߌ ߟߊ߫ ߜߋ߲߬ߞߝߊ߫ ߉ ߟߊߡߙߊ߬ߣߴߊ߲ ߓߟߏ߫ ߜߋ߲߫.
ߌ ߟߊ߫ ߞߊ߬ߙߊ߲߬ߜߍ߬ ߞߝߊ߬ ߁߆ ߓߘߊ߫ ߞߊ߬ߙߊ߲߬ ߞߵߊ߬ ߜߍ߫
ߌ ߞߊ߬ ߓߊߕߐߡߐ߲߫ ߂߄ ߛߊߓߎ߫ ߟߊ߫ ߸ ߊ߲ ߞߊ߬ ߘߎߢߊ߫ ߢߣߊߡߦߊ ߞߏ߫ ߞߌߛߍ ߟߎ߫ ߟߋ߬ ߘߐߕߐ߬ߡߐ߲߲߬
ߌ ߞߊ߬ ߞߊ߲߬ߝߐ߫ ߃ ߡߍ߲ ߕߏ߫ ߸ ߏ߬ ߞߊ߬ߙߊ߲߬ߓߊ߰ ߛߌ߫ ߕߍ߫ ߛߋ߫ ߞߊ߬ ߒߞߏ ߛߓߍߟߌ ߞߐߡߊߓߌ߲ߓߌ߲ߓߊߟߌ ߕߏ߫
ߞߝߊ߬ ߄߈ ߏ߬ ߓߍ߯ ߦߋ߫ ߘߝߐ߬ ߸ ߏ߬ ߡߊ߫ ߕߊ߬ߡߌ߲߬ߣߍ߲߬ ߞߘߐ ߛߌ߫ ߕߏ߫ ߣߴߊ߬ ߡߴߊ߬ ߘߝߐ߫.
ߌ ߣߊ߬ ߟߐ߲ߞߏ߫ ߞߝߊ߫ ߂߅ ߡߍ߲ ߛߓߍ߫ ߟߊ߫ ߸ ߏ߬ ߓߘߊ߫ ߕߌߙߌ߲ߠߌ߲ ߞߍߢߊ ߦߌ߬ߘߊ߬ ߓߐ߲ߛߐ߲ ߠߎ߬ ߟߊ߫
ߌ ߣߊ߬ ߝߘߏ߬ߓߊ߬ ߟߐ߲ߣߌ߲ߦߊ ߞߝߊ߬ ߁߀ ߡߍ߲ ߕߏ߫ ߟߊ߫ ߸ ߏ߬ ߓߘߊ߫ ߒ߬ ߠߊ߫ ߡߌ߬ߙߌ߲߬ߘߌ ߛߐ߫ ߟߐ߲ߠߌ߲ ߠߊ߫
ߌ ߣߊ߬ ߥߘߋ߬ߥߘߋ߬ߟߌ߬ ߞߝߊ߬ ߄ ߡߍ߲ ߕߏ߫ ߟߊ߫ ߸ ߏ߬ ߓߘߊ߫ ߒ߬ ߛߐ߫ ߘߎߢߊ߫ ߛߌ߰ߢߊ ߥߘߋ߬ߥߘߋ߬ߦߊ߬ߟߊ ߟߊ߫
ߌ ߞߊ߬ ߘߌ߯ߣߊ ߞߝߊ߬ ߃߈ ߡߍ߲ ߕߏ߫ ߸ ߏ߬ ߡߊ߫ ߘߌ߯ߣߊ ߞߏߢߊ߫ ߡߌߛߍ߲ ߛߌ߫ ߘߐߞߣߍߓߊߟߌ ߕߏ߫.
ߌ ߟߊ߫ ߡߊ߬ߘߎ߰ ߜߘߍ ߟߎ߫ ߞߝߊ߬ ߆ ߓߘߊ߫ ߞߏ ߡߍ߲ ߢߊ߬ ߸ ߝߏߦߌ߬ ߕߎ߲߬ ߕߍ߫ ߛߋ߫ ߞߵߏ߬ ߟߎ߫ ߢߊ߬.
-ߦߋߢߐ߲߯ߠߊ ߘߊ߲ߘߊߟߌ ߝߍߘߍ߲ߝߋ߲߫ ߄߀߀ ߓߊߛߌ߫ ߞߝߊ ߓߘߊ߫ ߖߊ߲߬ߞߊ߬ߙߏ߬ ߖߎ߮ ߟߎ߬ ߓߊ߲߫
ߘߐ߬ߛߊ߬ߙߌ߬ ߞߟߊߒߞߋ ߒߞߏߡߊ ߣߌ߫ ߞߋߟߊ ߟߊ߫ ߛߙߊ߬ߣߎ߬ ߄߀߀߀ ߓߘߊ߫ ߛߐ߬ߛߐ߬ߟߌ ߣߌ߫ ߦߙߌ߬ߞߌ߬ ߞߊ߲߬ ߘߐ߬ߝߙߊ߬ ߓߊ߲߫
-ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߣߐ ߝߊ߰ߡߊ߬ߟߊ ߣߴߊ߬ ߡߊ߲߬ߛߊ߬ߟߊ ߟߎ߫ ߘߐ߬ߝߐ ߓߘߊ߫ ߞߎ߲ߝߊ߲ ߓߊ߲߫
-ߟߐ߲ߞߏ ߓߏߟߏ߲߫ ߁߂ ߣߴߊ߬ ߞߎ߲߬ߕߐ߯ ߂߅ ߓߘߊ߫ ߟߐ߲ߞߏ ߕߟߏߝߘߋߦߊ ߓߊ߲߫
-ߞߘߐߝߐߟߊ߲߫ ߞߊ߲ߞߋߟߋ߲ߡߊ ߣߌ߫ ߞߊ߲ߝߌߟߡߊ ߓߘߊ߫ ߘߟߊߡߌߘߊߟߌ߫ ߡߊߝߟߏ ߓߊ߲߫.
ߓߌ߬ ߒߞߏ ߣߌ߫ ߝߊ߬ߙߊ߲߬ߛߌ߬ߞߊ߲ ߓߍ߯ ߓߘߊ߫ ߞߢߊ߫ ߟߐ߲ߞߏ ߝߊߙߊ߲ߝߊ߯ߛߌ ߘߐ߫ ߸ ߦߏ߫ ߘߎ߰ߡߊ߬ߛߓߍ (ߖ߭ߋߏߜ߭ߙߊߝߌ) ߘߡߊ߬ߟߐ߲ (ߡߊߕߋߡߊߕߌߞ) ߘߎ߰ߛߎߡߊ߲ (ߖ߭ߋߥߏߡߋߕߙߌ) ߣߐ߲߬ߞߐ߲߬ߛߓߊ߬ߘߐ߬ߦߊ (ߕߙߌߜ߭ߣߏߡߋߕߙߌ) ߜߊ߲߬ߞߎ߲߬ߘߐ (ߊߟߑߖ߭ߍߓߙ) ߞߛߊ߬ߓߌ߬ߦߊ (ߊߙߕߌߡߋߕߌߞ) ߞߍ߲ߘߍߘߐߦߊ (ߓߌߦߟߏߖ߭ߌ) ߣߌߡߊߘߐߦߊ (ߖ߭ߏ߯ߟߏߖ߭ߌ) ߸ ߝߍߘߍ߲ߝߋ߲ߘߐߦߊ (ߓߏߕߊߣߌߞ) ߖߏ߯ߦߊߟߌ (ߡߏߙߊߟ) ߘߎ߰ߘߋ߲ ߟߐ߲ߕߊ (ߍ߲ߛߑߕߙߎ߳ߞߑߛߌߦߐ߲ ߛߝ߭ߌߞ) ߸ ߡߟߋߞߎߦߊ (ߟߌߕߋߙߊߕߎ߳ߙ) ߞߊ߲ߜߍ (ߜ߭ߙߊߡߍߙ) ߡߐ߲ߕߐ߲ߞߊߙߊ߲ (ߡߕߋߙߟߏߖ߭ߌ) ߛߊ߲ߞߟߏߞߊߙߊ߲ (ߊߛߑߙߣߏߡߌ߲) ߘߐ߬ߞߏ (ߝߖ߭ߌߞ) ߖߎ߲߯ߛߊ (ߛ߭ߡߌ)
ߖߎ߲߯ߛߊ ߡߍ߲ ߞߏߝߐߣߍ߲߫ ߏ߬ ߘߌ߫ ߸ ߤߊߟߌ߬ ߡߐ߰ ߘߊ߲߬ ߡߍ߲ߘߋߟߌߍߝ߭ ߟߊ߫ ߝߛߌ߬ߥߟߊ߫ ߞߎ߲߬ߕߊ߰ߟߊ߬ߞߊ ߘߐߙߐ߲߫ ߡߊ߬ ߸ ߏ߬ ߘߌ߫ ߞߍ߫ ߓߐߤߘߊ߫ ߘߌ߫ ߝߘߊ߬ߝߌ߲ ߝߣߊ߫ ߦߋ߫ ߛߌ߲ߘߟߌ ߞߍ߫ ߸ ߊ߬ ߓߊ߲ ߞߐ ߝߌ߬ߛߌ ߟߎ߬ ߞߘߐ ߟߐ߲߫ ߠߊ߫ ߦߏ߫ : ߖߌߛߎ߲ ߸ ߖߊߝߎߥߊ ߸ ߞߓߊߘߐ ߸ ߢߊߘߌ ߸ ߞߋ߬ߡߎ߲߬ߣߎ߲ ߸ߞߋ߬ߡߎ߲ ߸ ߛߍ߯ߛߎ߲ ߸ ߛߏ߲ߛߎ߲ ߸ ߛߊߦߌߛߊߦߌ ߸ ߞߎߙߊ ߸ ߛߍ߯ߣߍ߮ ߸ ߥߊߘߌߡߎߣߎ߲ ߸ ߦߋߟߋ߲ߘߐ ߸ ߕߌ߬ߓߙߌߞߌ߭ ߸ ߝߙߌߛߊߦߌ ߸ ߛߍ߯ߘߐ ߸ ߓߐߙߐ߲ߣߍ߮ ߸ ߞߐ߰ߘߎ߰ߣߍ߮ ߸ ߘߌ߯ߣߌ߲ ߸ ߛߊߣߌ߲ߜߍ ߸ ߝߎߛߍ ߸ ߝߎߛߋߣߍ߮ ߸ ߣߍ߰ߝߌ߲ ߸ ߛߋ߬ߘߎ ߸ ߞߊ߬ߛߌߦߊ ߸ ߘߊ߬ߢߊ߲ ߸ ߞߊ߲߬ߞߛߌ ߸ ߝߎߥߊ߲ߖߐ߲ ߸ ߖߋߙߌߡߊ߲ߣߍ߮ ߸ ߜߌߙߌ߲ߘߐ ߸ ߞߊߙߏߞߊ߲ ߸ ߔߙߏ ߸ ߗߙߎ.
ߌ ߡߊ߫ ߘߊ߲߬ ߏ߬ ߡߊ߬ ߸ ߞߊ߬ ߝߌ߬ߛߌ ߛߎ߯ߦߊ ߓߍ߯ ߞߏߝߐ߫ : ߓߊ߬ߙߏ߬ߛߎ߲ ߠߎ߬ (ߤߊߟߏߖߍ߭ߣ) ߸ ߛߍ߯ߟߞߊ ߟߎ߬ (ߊߟߑߞߊߟߍ߲) ߸ ߘߎ߰ߛߍ߰ߟߊ߬ߞߊ ߟߎ߬ (ߊߟߌߞߊߟߌߣߋ߳ ߕߋߙߋ߳) ߸ ߘߐ߬ߕߊ߬ߡߌ߲߬ߣߍ߮ ߟߎ߬ (ߡߋߕߏ ߘߋ߬ ߕߙߊ߲ߖ߭ߌߛߌߦߐ߲) ߸ ߣߍ߰ߡߎߣߎ߲ ߠߎ߬ (ߡߋߕߊߟߏߦߌߘ) ߸ ߣߍ߰ߛߏߘߊ ߟߎ߬ (ߡߋߕߏ ߔߏߝ߭ߙ) ߸ ߘߏ߲߰ߘߏ߬ߟߊ߬ߞߊ ߟߎ߬ (ߟߊ߲ߕߊߣߌߘ) ߸ ߥߎߦߊ߲ߘߐߟߞߊ ߟߎ߬ (ߊߞߑߕߣߌߘ) ߸ ߜߘߍߟߞߊ ߟߎ߬ (ߏߕߙ ߡߋߕߏ) ߸ ߥߊߦߌ߲߫ ߕߜߋ ߟߎ߬ (ߟߍ߬ ߜ߭ߊߖ߭ ߙߊߙ)
ߏ߬ ߓߘߊ߫ ߓߎ߲ߓߎ߲ ߗߏ߯ߦߊ߫ ߦߟߍߡߊ߲ ߢߊߦߋ߫ ߘߌߦߊ߫ ߊ߲ ߘߋ߲ ߠߎ߬ ߓߟߏ߫ ߓߌ߬ ߞߏߛߍ߫
ߦߏ߫ ߜߘߊߦߊߟߌ (ߛߏߟߘߝߌߞߊߛߌߦߐ߲) ߸ ߞߕߊߦߊߟߌ (ߞߙߌߛߑߕߊߟߌߖ߭ߊߛߌߦߐ߲) ߸ ߥߋ߲߬ߛߋ߲߬ߧߊ߬ߟߌ߲ (ߟߌߞߋߝߊߞߑߛߌߦߐ߲) ߸ ߘߐ߬ߛߊ߲߬ߘߌ߬ߟߌ (ߛߎ߳ߓߑߟߌߡߊߛߌߦߐ߲) ߸ ߥߎߦߋ߲ߦߊߟߌ (ߝ߭ߊߔߏߙߌߖ߭ߊߛߌߦߐ߲) ߸ ߛߌ߲߬ߓߌ߬ߟߌ (ߞߐ߲ߘߊ߲ߛߊߛߌߦߐ߲)
ߞߏ߬ߣߌ߲߬ ߥߊߦߌߞߊ߫߹ ߁߉߈߇ ߣߍߣߍߓߊ ߂߃ ߸ ߛߊ߲߬ߞߊ߬ ߓߟߋߓߟߋ ߟߊߕߋ߬ ߘߊ߫ ߘߎߢߊ߫ ߒߞߏ ߘߌ߲߬ߞߏ ߟߎ߬ ߟߊ߫، ߞߏ߫ ߛߟߏ߬ߡߣߊ߬ ߞߊ߲ߕߍ߫ ߣߌߟߊߞߟߌ ߓߘߊ߫ ߟߐ߬ ߸ ߊ߬ ߟߊ߫ ߞߊ߬ߟߊ ߓߘߊ߫ ߟߊߟߐ߬ ߸ ߓߟߏ ߡߍ߲ ߕߘߍ߬ ߞߎߡߦߊ߫ ߥߊ߯ ߞߋߟߋ߲߫ ߛߓߍ߫ ߟߊ߫ ߕߟߋ߬ ߞߋߟߋ߲߫ ߸ ߏ߬ ߓߘߊ߫ ߟߊߟߐ߬ ߡߌ߲߬ߛߍ߲߬ ߞߋߟߋ߲߫.
ߊ߬ ߟߊ߫ ߞߎߡߦߊ߫ ߞߋߟߋ߲߫ ߦߋ߲߬ ߸ ߏ߬ ߟߋ ߞߊ߬ ߒߞߏߡߐ߮ ߓߍ߯ ߟߐ߬ ߊ߬ ߛߓߊߙߌ߫ ߟߊ߫ ߸ ߏ߬ ߟߋ ߞߍߣߍ߲߫ ߊ߬ ߝߐ ߘߴߊ߬ ߖߍ߬ߘߍ ߓߟߏ߫ ߞߏ߫ ߒߞߏ ߟߊ߫ ߥߙߎߞߌ ߦߋ߫ ߊ߬ߟߋ߬ ߟߊ߫ ߛߊ߬ߦߊ ߟߋ߬ ߘߐߙߐ߲߫ ߡߊߞߐ߬ߣߐ߲ ߠߊ߫.
ߒߢߦߘ ߞߵߊ߬ ߟߊ߫ ߛߌ߲߬ߝߏ߲߬ߧߊ߬ߟߌ ߓߟߏߟߊߕߎ߲߰ ߟߐ߲ߞߏߕߌ߮ ߟߊ߫ ߛߊ߬ߦߊ ߞߐ ߘߐ߫ ߸ ߤߊ߲߯ ߞߊ߬ ߣߊ߬ ߖߡߊ߬ߣߊ ߛߏߓߊ ߣߴߊ߬ ߛߏ߫ ߡߌߛߍ߲ ߓߍ߯ ߡߌ߬ߘߊ߬ ߒߞߏ߫ ߞߊߙߊ߲ߕߊ ߟߊ߫ ߞߘߍߜߍ߫.
ߊ߯ ߹ ߟߐ߲ߞߏߕߌ߮ ߸ ߌ ߡߝߊ߫ ߌ ߝߎ߬ߙߎ߲߬ߞߎ߬ߡߍ߬ ߦߋߟߋ߲ߡߊ ߘߐ߫ ߸ ߌߟߋ ߡߍ߲ ߡߊ߫ ߛߐ߲߬ ߌ ߣߌ߫ ߡߐߣߍ ߦߋ߫ ߟߊ߫ ߘߎ߱ ߘߐ߫ ߸ ߝߏ߫ ߌ ߣߵߌ ߕߊ߫ ߕߎ߭ ߓߐ߫ ߟߊ ߜ߭ߊ߬ߡߊߟ ߡߊߙߎߥߊ߫ ߘߐ߫.
ߝߏ߫ ߝߘߊ߬ߝߌ߲ ߛߋ߲߬ߠߊߕߘߍ߬ߣߍ߲ ߡߊ߬ߘߊ߲߬ߠߌ߲ ߘߐ߫ ߸ ߞߊ߬ ߓߐ߫ ߟߐ߲ߞߏ ߣߌ߫ ߛߋߒߞߏߟߦߊ ߛߋߒߞߏߟߊߘߐߦߊ ߘߓߌ߬ ߞߎߘߎ߲ ߘߐ߫.
ߞߊ߬ߙߊ߲߬ߡߐ߯ ߝߏߘߋ߫ ߛߟߏ߬ߡߣߊ߬ ߞߊ߲ߕߍ߫ ߹ ߞߵߊߟߊ߫ ߟߊ߫ ߤߌߣߊ ߣߴߊ߬ ߟߊ߫ ߓߊ߲ߓߊ߲ ߖߘߌߖߘߌ߫ ߌ ߛߟߐߡߌ߲ ߡߊ߬ ߸ ߒ ߞߏ߫ ߌ ߓߍߟߍ߲߫ ߖߌ߰ߡߊ߬ߝߊ ߣߌ߫ ߘߊ߰ߡߎ߲ ߕߍߡߊ߬ ߸ ߌ ߟߊ߫ ߛߏ߬ߝߊ߬ߘߋ߲߬ ߥߣߊ߫ ߞߊ߬ߙߊ߲߬ߡߐ߯ ߓߊ߬ߓߊ߫ ߡߊ߬ߡߊߘߌ߫ ߡߊ߫ ߛߐ߲߬ ߖߏ߲߬ߖߏ߲ ߦߋ߫ ߓߋ߬ ߘߎ߱ ߡߊ߬.
ߊ߬ ߓߘߊ߫ ߒߞߏ ߟߊߘߏ߲߬ ߕߟߋ߬ߓߊ߮ ߞߣߐ߫ ߁߉߉߂ ߟߊ߫ ߋߖ߭ߌߔߕ ߸ ߞߊ߬ ߡߊ߲߬ߘߋ߲߫ ߞߏ߬ߡߊ߬ ߞߎߘߊ ߟߊߘߊ߲߫ ߁߉߉߆ ߟߊ߫ ߸ ߞߊ߬ ߒߞߏ ߞߍߦߙߐ ߛߌ߲ߘߌ߫ ߁߉߉߈ ߠߊ߫ ߸ ߞߵߊ߬ ߟߊߘߏ߲߬ ߥߌ߲ߘߏߖ߭ ߝߢߐߘߊ ߝߍ߬ ߂߀߀߁ ߠߊ߫ ߸ ߞߵߊ߬ ߟߊߘߏ߲߬ ߘߏߝߙߍߕߍߘߊ ߟߊ߫ ߂߀߀߅ ߟߊ߫ ߸ ߞߵߊ߬ ߟߊߘߏ߲߬ ߝߢߐߘߊ ߇߲ ߠߊ߫ ߂߀߀߉ ߟߊ߫ ߸ ߞߵߊ߬ ߟߊߘߏ߲߬ ߜߋߟߋ߲ߦߟߌߟߊ߲ߘߌ ߟߎ߬ ߞߣߐ߫ ߂߀߁߁ ߠߊ߫ ߸ ߞߵߊ߬ ߟߊߘߏ߲߬ ߝߢߐߘߊ ߈߲ ߞߣߐ߫ ߂߀߁߂ ߟߊ߫ ߸ ߞߵߊ߬ ߟߊߘߏ߲߬ ߡߏߖ߭ߟߌߦߊ ߝߦߊߝߐߞߛ ߞߣߐ߫ ߂߀߁߃ ߟߊ߫.
ߌ ߡߝߊ߫ ߌ ߝߎ߬ߙߎ߲߬ߞߎߡߍ ߘߐ߫ ߞߟߋ߫ ߸ ߒߞߏ ߌ ߟߊ߫ ߛߓߍߟߌ ߓߘߊ߫ ߘߏ߲߬ ߝߟߐߘߊߞߊ߲ߞߋ ߓߍ߯ ߞߣߐ߫ ߂߀߁߄ ߠߊ߫ ߸ ߞߵߊ߬ ߞߍߦߙߐ߫ ߟߊ߬ߢߊ߬ߣߍ߲ ߠߎ߬ ߛߌ߲ߘߌ߫ ߂߀߁߅ ߟߊ߫ ߸ ߞߊ߬ ߜߋߟߋ߲ߜߋ߲ ߠߎ߬ ߞߣߐߘߐ ߞߍ߫ ߒߞߏ ߘߌ߫ %߁߀߀ ߟߊ߫ ߟߐ߯ߝߍ ߓߍ߯ ߞߣߐ߫ ߂߀߁߆ߟߊ߫ ߸
ߟߐ߲ߞߏߕߌ߯ ߛߟߏ߬ߡߣߊ߬ ߸ ߌ ߟߊ߫ ߓߊ߯ߙߊ ߓߘߊ߫ ߟߊ߲ߣߍߡߊ߫ ߸ ߊ߬ ߓߘߊ߫ ߘߏ߲߬ ߥߟߊ߬ߝߘߍ߬ߟߋ߲ ߠߎ߬ ߞߣߐ߫ ߁߀߁߇ ߟߊ߫ ߸ ߞߊ߬ ߘߏ߲߬ ߘߟߊߡߌߘߊߟߊ߲߫ ߞߍߒߖߘߍߦߋ ߞߣߐ߫ ߂߀߂߄ ߠߊ߫ ߸ ߞߵߊ߬ ߣߌ߫ ߘߎߢߊ߫ ߞߊ߲߫ ߂߄߃ ߝߊ߬ߟߋ߲߬ ߢߐ߲߮ ߘߐ߫ (ߒߞߏ ߕߐ߲ߖߊ߯ߓߡߊ) ߸ ߓߌ߬ ߂߀߂߅ ߸ ߒߞߏ ߓߘߴߊ߬ ߞߎ߲߬ߛߌ߲߫ ߦߟߌߟߊ߲ߘߌߦߊ߫ ߘߍ߲߰ߧߊ߬ߣߍ߲ ߓߊ߯ߙߊ ߡߊ߬
ߞߊ߬ߙߊ߲߬ߡߐ߯ ߝߏߘߋ߫ ߛߟߏ߬ߡߣߊ߬ ߞߊ߲ߕߍ߫ ߸ ߡߊ߲߬ߘߋ߲߫ ߝߘߏ߬ߓߊ߬ߞߊ߲ ߞߘߐߝߐߟߊ߲ ߓߘߊ߫ ߛߋ߫ ߞߎߡߊߘߋ߲߫ ߥߊ߯ ߗߡߍ߬ ߣߌ߫ ߝߊ߲ߘߊ߫ ߘߐ߫ ߓߌ߬ ߸ ߞߊ߬ߙߊ߲߬ߡߐ߯ ߓߊ߬ߓߊ߬ ߝߟߐ߫ ߟߊ߫ ߞߊ߲߬ߟߊ ߣߌ߫ ߒߞߏ ߘߎ߲ߓߎ ߟߊ߫ ߘߐ߬ߖߘߌ߬ߟߌ ߞߣߐߡߊ߬، ߏ߬ ߞߎ߲߬ߠߊ߬ߓߐ߬ߟߌ ߦߴߊ߲ ߓߟߏ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫ ߛߌߣߌ߲߫ ߂߀߂߅ ߣߍߣߍߓߊ ߂߃ ߉ߙߋ߲ ߖߋߞߎ ߟߊ߫ ߸ ߖߌ߬ߣߍ߬ ߞߏߕߌ߯ ߝߟߐ ߖߍ߬ߘߍ ߟߊ߫ ߞߎ߲߬ߠߊ߬ߛߌ߰ߟߌ ߞߣߐߡߊ߬.
ߝߏߘߋ߫ ߛߟߏ߬ߡߣߊ߬ ߞߊ߲ߕߍ߫ ߸ ߞߊ߬ߙߊ߲߬ߝߊ߬ ߡߏߙߌ ߞߡߊ߬ߙߊ߬ ߞߋߟߋ߲߫ ߓߘߊ߫ ߞߊ߬ߝߊ߫ ߂߀߀ ߛߓߍ߫ ߌ ߞߐ߫ ߦߊ߲߬ ߏ߯.
ߟߐ߲ߞߏߕߌ߮ ߟߎ߬ ߘߐ߫ ߟߐ߲ߞߏߕߌ߮ ߸ ߌ ߓߍߟߍ߲߫ ߡߊ߬ߝߊ ߘߐ߫ ߕߐߟߍ߯ ߸ ߌ ߟߊ߫ ߛߓߍߟߌ ߓߘߊ߫ ߘߏ߲߬ ߖߊ߯ߓߘߊ ߢߌ߲߬ ߠߎ߬ ߟߊ߫ : ߋߖ߭ߌߔߕ ߸ ߝߌߟߊߘߍߟߑߝߌ߫ ߸ ߡߊߘߙߌߘ ߸ ߸ ߛߍ߲ ߔߋߕߍ߲ߓߎߙߛ ߸
ߌߣߊߟߑߞߏ (ߔߊ߬ߙߌ߫) ߸ ߤߊߙߑߝ߭ߊߙ ߸ ߞߊ߲ߞߊ߲߫ ߖߊ߯ߓߘߊ ߟߊ߫ ߖߌ߬ߣߍ߬ ߞߣߐ߫ ߸ ߞߏ߬ߝߌ ߊߣߊ߯ߣ ߖߊ߯ߓߘߊ ߸ ߓߎ߬ߥߊ߬ߞߍ߫ ߖߊ߯ߓߘߊ ߸ ߊߟߑߊ߬ߖ߭ߊߙ ߖߊ߯ߓߘߊ ߟߊ߫ ߞߵߊ߬ ߞߍ߫ ߓߏߟߏ߲ߝߘߊ ߘߌ߫ (ߋߖ߭ߌߔߕ)
ߟߐ߲ߞߏߕߌ߯ ߛߌ߲߬ߓߏ߲߬ߛߌ߬ߕߊ ߸ ߌ ߞߵߊ߬ ߟߊߥߟߌ߬ ߝߘߊ߬ߝߌ߲߬ߠߊ߫ ߞߎ߲߬ߠߊ߬ߦߋߙߋ߲ ߡߍ߲ ߡߊ߬ ߸ ߣߌ߫ ߡߐ߱ ߟߎ߫ ߕߎ߲߬ ߡߊ߫ ߓߊ߲߫ ߘߋ߬ߦߌ߬ ߟߊ߫ ߌ ߡߙߌߦߊ ߡߊ߬ ߸ ߒ߬ߓߊ߬ ߓߌ߬ ߊ߬ ߓߘߊ߫ ߟߊߓߊ߲߫ ߌ ߕߊ ߏ߬ ߡߊ߬.
ߝߘߊ߬ߝߌ߲߬ߘߋ߲ ߓߘߴߊ߬ ߞߎ߲߬ߡߊߖߌ߰ ߕߟߋ߬ߓߊ߮ ߞߎ߲߬ߠߊ߫ ߸ ߊ߬ ߣߌ߫ ߕߟߋ߬ߓߊ߮ ߦߋ߫ ߝߘߊ߬ߝߌ߲߬ߞߊ߲ ߘߊߘߐߖߊߥߏ ߟߊ߫، ߓߌ߬ ߜߟߏ߬ߝߌ߲ ߦߴߊ߬ ߟߊ߫ ߜߋߟߋ߲ߜߋߟߋ߲ ߜߊ߲߬ߞߎ߲߬ ߠߊ߫ ߸ ߞߊ߬ ߛߙߋߦߊ߫ ߘߎߢߊ߫ ߞߏߓߊ ߟߎ߫ ߡߊ߬ ߓߟߐߟߐ ߟߊ߫.
ߝߘߊ߬ߝߌ߲߬ ߖߡߊߣߊ ߟߎ߬ ߓߘߊ߫ ߝߟߐ߫ ߌ ߝߊ߰ߡߎ߲߬ ߠߊ߫ ߸ ߞߵߊ߬ߟߎ߬ ߟߊ߫ ߢߍߥߟߊ ߢߊߛߌ߲߫ ߖߘߍ߬ߞߊ߲ ߠߊߥߙߎߞߌ ߟߊ߫.
ߌ ߗߍ ߓߘߊ߫ ߡߐ߬ߟߐ߲߬ߡߊ߬ߦߊ߫ ߞߵߊ߬ ߜߊ߲ߜߊ߲߫ ߡߐ߰ߦߊ ߟߊߥߙߎߞߌ ߝߘߏ߬ߓߊ߬ ߗߍߓߊ ߟߎ߬ ߛߙߍߘߍ ߘߐ߫.
ߞߊ߬ߙߊ߲߬ߘߊ ߘߏ߫ ߓߘߊ߫ ߕߐ߯ߟߊ߫ ߌ ߟߊ߫ ߸ ߌ ߛߟߐߡߌ߲ ߡߌ߬ߘߊ߬ ߘߊ߫ ߞߌ߲߬ߘߊ ߡߍ߲ ߠߊ߫ ߁߉߈߇ ߣߍߣߍߓߊ ߂߃
ߥߊߟߢߌߡߊߟߐ߲ ߝߏ߬ߟߌ ߦߋ߫ ߛߋ߫ ߟߊ߫ ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߣߴߊ߬ ߟߊ߫ ߞߏߕߌ߯ ߝߟߐ߫ ߊߡߊߘߎ߫ ߎߙߌ߬ ߓߊ ߣߴߊ߬ ߟߊ߫ ߞߎ߲߬ߠߊ߬ߛߌ߮ ߡߊ߬ ߸ ߊ߬ߟߎ߬ ߞߍ ߘߐ߫ ߞߵߊ߬ߟߎ߬ ߡߙߌ ߟߊߛߋ߫ ߛߟߏ߬ߡߣߊ߬ ߞߊ߲ߕߍ߫ ߡߊ߬ ߸ ߏ߬ ߞߐ߫ ߝߊ߬ߛߏ߬ߞߊ߲ ߠߎ߫ ߡߊ߬ ߸ ߞߊ߬ ߡߐ߬ߟߐ߲߬ ߛߎ߯ ߞߋߟߋ߲߫ ߘߌ߫ ߏ߬ ߟߎ߬ ߣߌ߫ ߝߊ߬ߙߊ߲߬ߛߌ߬ߞߊ߲ ߡߊ߬.
ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߸ ߝߊ߬ߛߏ߬ߞߊ߲ ߠߎ߫ ߟߐ߬ߘߎ߮ ߘߌ ߊ߬ߟߎ߫ ߡߊ߬ ߝߊ߬ߛߏ߬ ߤߙߐߦߊߣߍ߲ ߞߣߐ߫ ߸ ߏ߬ ߓߘߴߊ߬ ߦߌ߬ߘߊ߬ ߞߏ߫ ߒߞߏߡߐ߮ ߟߎ߫ ߕߘߍ߬ ߢߌߣߌ߲߫ ߠߊ߫ ߡߊ߲߬ߛߊ߬ ߛߎ߮ ߡߍ߲ ߡߊ߬ ߸ ߏ߬ ߓߘߴߊ߬ ߞߎ߲߬ߓߐ߫.
ߞߏ߬ߞߏ߫ ߕߐ߲ߛߋ߲ ߟߏ߯ߟߎߣߊ߲ ߠߊ߬ ߡߐߣߍ ߟߋ߬ ߓߐ߫ ߟߊ߫ ߒ߬ ߓߋ߲ߓߊ߫ ߝߎߙߋ ߟߎ߬ ߛߟߐߡߌ߲ ߘߐ߫ ߸ ߞߏ߬ߞߏ߫ ߊ߬ߟߋ ߟߋ߬ ߖߌߘߊ߲ ߞߊ߫ ߓߏ߲߬ ߕߐ߲ߛߋ߲ ߕߐ߭ ߟߎ߬ ߖߌߘߊ߲ ߠߊߞߊ߬ߝߏ߬ߣߍ߲ ߘߌ߫ ߞߊ߬ߝߏ߫ ߖߘߍ߬ߛߊ߬ߙߌ߬ߦߊ߬ߕߌ߮ ߓߟߏ߫ ߞߍ߬،
ߏ߬ ߘߐ߫ ߸ ߒߞߏ ߘߌ߲߬ߞߏ ߟߎ߬ ߦߴߌ ߟߊ߫ ߢߍߥߟߊ ߞߐߡߊߓߌ߲ߓߌ߲߫ ߠߊ߫ %߁߀߀ ߟߊ߫ ߸ ߞߵߊ߬ ߞߎ߲߭ ߞߍ߫ ߖߘߍ߬ߟߐ߲ ߣߌ߫ ߖߘߍ߬ߛߎ߰ ߟߊ߬ߘߌߦߊߢߍ ߥߟߊ߬ߘߊ ߛߌߦߊߡߊ߲ ߞߙߐ߬ߛߌ ߘߴߌ ߞߍߞߏ ߟߎ߬ ߘߐ߫. ߊ߲ ߦߟߌ߫ ߦߋ߫ ߝߊ߬ߛߏ߬ߞߊ߲ ߠߎ߬ ߟߊߘߏ߲߭ ߡߊ߬ ߞߊ߬ߙߊ߲ ߢߍߥߟߊ ߘߐ߫ ߦߴߊ߬ߟߎ߬ ߣߌ߫ ߝߊ߬ߙߊ߲߬ߛߌ߬ߞߊ߲ ߘߐߞߢߊߣߍ߲߫ ߛߌ߰ߞߊ߲ ߓߟߏ߫ ߢߊ ߡߍ߲.
ߝߘߊ߬ߝߌ߲߬ߠߊ߬ ߓߊߟߏ߫
ߡߊ߲߬ߘߋ߲߬ ߓߊߟߏ߫
ߖߌ߬ߣߍ߬ ߓߊߟߏ߫
ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߓߊߟߏ߫
ߊߟߊ߫ ߦߋ߫ ߤߌߣߊ߫ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߛߟߐߡߌ߲ ߠߊ߫ ߸ ߞߊߕߘߍ߬ߕߍ߫ ߒߠߋ ߖߍ߬ߘߍ ߞߊ߬ߙߊ߲߬ߡߐ߯ ߤߊߙߎߣߊ߫ ߞߊ߲ߕߍ߫ ߛߟߐߡߌ߲ ߡߊ߬ ߸ߛߟߏ߬ߡߣߊ߬ ߞߊ߲ߕߍ߫ ߣߊߘߋ߲ߡߊ߫ ߘߐ߯ߣߍ߲ ߞߊ߬ߣߌ߲߬ ߸ ߊ߬ ߣߴߊ߬ߟߎ߬ ߓߊߘߋ߲ ߠߎ߬ ߣߴߊ߬ ߘߋ߲ߞߍ߫ ߓߎߙߡߊ߫ ߞߊ߲ߕߍ߫ ߣߴߊ߬ ߘߋ߲߫ ߝߊߕߏߣߍ߲ ߕߐ߭ ߟߎ߬ ߓߍ߯ ߛߟߐߡߌ߲ ߠߊ߫.
ߊߟߴߊ߬ ߞߍ߫ ߕߋ߲߬.
ߞߐߣߊߞߙߌ߫ ߸ ߂߀߂߅ ߣߍߣߍߓߊ ߕߋ߬ߟߋ߫ ߂߁
ߒߞߏ ߝߘߏ߬ߓߊ߬ ߞߙߏߝߏ ߞߊ߲ߕߌ߮
ߡߎߛߊ߫ ߓߊߟߊ߲ߘߎ߯ ߖߊߟߏ߫
