ߡߊ߬ߙߐߞߎ߬: ߕߐ߬ߞߘߐ ߘߏ߫ ߓߘߊ߫ ߦߋ߫ ߝߘߊ߬ߝߌ߲ ߠߎ߬ ߟߊ߫ ߡߐ߰ߦߊ ߓߐߛߎ߲߫ ߞߏ ߔߘߋߔߘߋߟߊߕߍ߱ ߘߌ߫߸ ߡߍ߲ ߠߊ߫ ߞߘߐ߬ߦߊ ߘߌ߫ ߛߊ߲߭ ߇߇߃ ߀߀߀ ߢߐ߲߰ ߓߐ߫

ߟߐ߲ߞߏ ߝߐ߰ߓߍ ߡߍ߲ ߕߐ߯ ߞߏ߫ ߛߎ߲ߞߎ߲ (Nature)߸ ߏ߬ ߣߐ߬ ߕߌߙߌ߲ߠߌ߲ ߘߏ߫ ߟߋ߬ ߞߐߝߟߌ ߟߊ߲ߞߣߍߡߊ߫ ߟߊ߫߸ ߞߊ߬ ߡߐ߱ ߕߐ߬ߞߘߐ ߘߏ߫ ߦߋ߫ ߞߏ ߝߐ߫ ߡߊ߬ߙߐߞߎ߬߸ ߡߍ߲ ߕߎ߬ߡߊ߬ߘߊ ߟߐ߲ߣߍ߲߫߸ ߣߴߊ߬ ߓߘߊ߫ ߕߊ߬ߡߌ߲߫ ߡߐ߱ ߟߊ߫ ߞߘߐ߬ߓߊ߬ߦߊ ߘߐ߬ߝߐ ߟߊ߲ߞߣߍߡߊ߫ ߟߊ߫ ߝߘߊ߬ߝߌ߲߬ߠߊ߫ ߞߣߐ߫ ߞߏߞߎߘߊ߫.

ߡߐ߰ߦߊ ߓߐߛߎ߲߫ ߞߏ ߞߎߡߊ ߦߋ߫ ߕߊ߬ߡߌ߲߬ ߠߊ߫ ߥߙߊ߬ ߟߊ߫ ߟߋ߬ ߟߐ߲ߞߏ ߦߋߟߋ߲ ߠߊ߫ ߕߎ߲߫، ߊ߬ ߓߘߊ߫ ߕߎ߬ߡߊ߬ ߖߊ߲߫ ߓߐ߫߸ ߡߐ߱ ߕߐ߬ߞߘߐ ߘߏ߫ ߦߋ߫ ߘߊ߫߸ ߡߍ߲ ߞߊ߬ ߛߌߞߊ ߓߌ߬ߟߴߊ߬ ߘߐ߫߸ ߞߏ߫ ߡߐ߰ߦߊ ߓߐߛߎ߲ ߕߍ߫ ߝߘߊ߬ߝߌ߲߬ߠߊ߬ ߘߌ߫، ߒ߬ߓߊ߬߸ ߊ߬ ߓߘߊ߫ ߛߊ߬ߦߌ߲߫ ߝߘߊ߬ߝߌ߲߬ߠߊ߬ ߞߏߞߎߘߊ߫ ߘߋ߬، ߞߊ߬ߕߎ߲߯߸ ߕߐ߬ߞߘߐ ߘߏ߫ ߟߋ߬ ߦߋߣߍ߲߫ ߡߊ߬ߙߐߞߎ߬ ߕߋ߲߬߸ ߡߍ߲ ߓߘߊ߫ ߕߊ߬ߡߌ߲߬ ߞߎߡߊ ߣߌ߲߬ ߠߊߛߌ߲߫ ߠߊ߫ ߞߵߊ߬ ߦߌ߬ߘߊ߬ ߞߏ߫ ߝߘߊ߬ߝߌ߲߬ߠߊ߫ ߟߋ߬ ߡߐ߰ߦߊ ߓߐߛߎ߲ ߘߌ߫.

ߕߐ߬ߞߘߐ ߢߌ߲߬ ߠߎ߬ ߦߋ߫ ߘߊ߫ ߤߏߡߌߣߌ߲ߘߋ߫ ߞߙߎ߬ߝߊߟߊ߲ ߠߋ߬ ߟߊ߫߸ ߡߍ߲ ߦߋ߫ ߡߊ߬ߙߐߞߎ߬ ߟߌ߲ߓߊ߲ߡߊ߲ߞߊ߲ ߝߊ߲߬ߝߍ߬ߟߊ ߘߐ߫߸ ߞߛߊߓߑߟߊ߲ߞߊ߫ ߘߊߝߍ߬، ߞߊ߬ߦߌ߯ ߦߟߍ߬ߘߐ߬ߞߍ߬ ߦߙߌߞߊ߫߸ ߡߊ߬ߙߐߞߎ߬ ߣߌ߫ ߝߊ߬ߙߊ߲߬ߛߌ߬ ߟߊ߫ ߞߙߎ ߘߏ߫ ߟߎ߫ ߕߘߍ߬ ߘߐ߬ߥߟߏ߬ߡߊ߬ߟߌ ߞߊ߲߬ ߦߋ߲߬߸ ߏ߬ ߟߎ߬ ߟߊ߫ ߕߌߙߌ߲ߠߌ߲ ߏ߬ ߞߐߝߟߌ ߟߋ߬ ߓߐߣߍ߲߫ ߜߍߟߊ߫ ߣߌ߲߬، ߓߊߏ߬߸ ߊ߬ߟߎ߫ ߞߊ߬ ߕߐ߬ߞߘߐ ߘߏ߫ ߟߎ߫ ߦߋ߫ ߦߋ߲߬߸ ߦߏ߫ ߢߌ߲ ߠߎ߬ ߣߌ߫߸ ߘߊ߯ߜߊߛߊߞߟߏ ߟߎ߬ ߣߌ߫ ߞߐߣߍ߯ߙߋ߲ ߠߎ߬، ߊ߬ߟߎ߬ ߟߊ߫ ߕߌߙߌ߲ߠߌ߲ ߣߌ߲߬ ߘߐ߫߸ ߊ߬ߟߎ߫ ߞߊ߬ ߘߊߜߊ߯ߛߊ ߘߏ߫ ߦߋ߫߸ ߡߍ߲ ߞߎ߲߬ߠߊߞߊ߬ ߘߊ߫ ߂߀߀߈ ߠߊ߫߸ ߏ߬ ߘߐ߯ߦߊ߫ ߢߊ ߞߵߊ߬ߟߎ߫ ߓߊ߬ߟߌ߬ ߞߏߛߓߍ߫.

ߕߎ߬ߡߘߊ߬ߦߊ߬ߟߌ ߞߍߞߌߦߊ ߡߍ߲ ߠߊߘߊ߲ߣߍ߲߫߸ ߟߐ߲ߞߏߕߌ߮ ߟߎ߬ ߓߘߴߊ߬ ߢߊߢߌߣߌ߲߫ ߏ߬ ߟߊ߫ ߞߵߊ߬ ߦߋ߫߸ ߞߏ߫ ߕߘߐ߬ߞߘߐ ߡߍ߲ ߠߎ߬ ߦߋߣߍ߲߫ ߕߋ߲߬߸ ߊ߬ߟߎ߬ ߘߌ߫ ߛߊ߲߭ ߇߇߃ ߀߀߀ ߓߐ߫، ߊ߬ ߘߏ߲߬߸ ߊ߬ߟߎ߬ ߟߊ߫ ߖߊ߬ߕߋ߬ߓߐ ߞߍߢߊ ߣߌ߲߬ ߦߋ߫ ߖߊ߯ߓߊߟߞߊ ߟߋ߬ ߘߌ߫߸ ߡߍ߲ ߦߋ߫ ߘߎߢߊ߫ ߖߊ߬ߕߋ߬ ߞߘߐ ߏ߬ ߟߎ߬ ߔߘߋߔߘߋߟߊߕߍ߰ ߟߊ߫߸ ߓߍ߲߬ ߘߏ߲߬ ߞߍߣߴߊ߬ ߡߊ߬، ߡߐ߰ߕߐ߬ߞߘߐ߬ߟߐ߲߬ߘߐ߬ߦߊ߬ߟߊ߫ ߗ߭ߊ߲߭ ߖ߭ߊߞ ߤߎߓߑߟߍ߲߫߸ ߊ߬ߟߋ ߡߍ߲ ߦߋ߫ ߕߐ߬ߞߘߐ ߕߌߙߌ߲ߠߌ߲ ߓߊ߯ߙߟߊߓߊ ߘߏ߫ ߘߌ߫߸ ߏ߬ ߞߊ߲߫ ߞߏ߫ ߕߎ߬ߡߘߊ߬ߦߊ߬ߟߌ <<ߣߌ߲߬ ߓߘߊ߫ ߣߊ߬ ߝߘߊ߬ߝߌ߲߬ߠߊ߫ ߕߐ߬ߞߘߐ ߟߎ߬ ߘߐ߬ߛߙߋ߬ߦߊ߬ߟߌ ߥߏ߬ߓߊ ߘߏ߫ ߟߊߝߊ߰.>>

ߝߟߐ߫ ߡߐ߮ ߡߍ߲ ߠߎ߬ ߛߌ߰ߣߍ߲߫ ߕߍ߬ߘߍ߫ ߘߌ߲߬ߞߌߙߊ ߏ߬ ߟߎ߬ ߘߐ߫߸ ߏ߬ ߟߎ߬ ߓߟߏߝߋ߲߫ ߞߘߐ ߘߏ߫ ߟߎ߫ ߟߋ߬ ߦߋ߫ ߟߊ߫ ߞߣߍ ߏ߬ ߟߎ߫ ߞߊ߲߬ ߛߐ߲߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߫ ߕߘߍ߬ ߓߊ߯ߙߊ߫ ߟߊ߫ ߞߓߊ ߟߎ߫ ߟߋ߬ ߟߊ߫، ߒ߬ߓߊ߬߸ ߞߟߏ ߡߍ߲ ߠߎ߬ ߦߋ߫ ߦߋ߫ ߟߊ߫߸ ߓߌߦߊ߲ ߘߏ߫ ߟߎ߫ ߘߊߥߎ߲ߠߌ߲߫ ߣߐ ߦߋ߫ ߦߋ߫ ߟߴߏ߬ ߟߎ߫ ߡߊ߬ ߛߐ߲߬߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߓߌߦߊ߲ ߏ߬ ߟߎ߬ ߝߣߊ߫ ߞߊ߬ ߡߐ߱ ߞߘߐ ߏ߬ ߟߎ߫ ߛߎ߭ ߟߎ߬ ߘߊߥߎ߲߫ ߠߋ߬، ߣߴߌ ߞߵߊ߬ ߡߊߝߟߍ߫߸ ߊ߬ߟߎ߫ ߞߊ߬ ߕߐ߬ߞߘߐ ߡߍ߲ ߦߋ߫ ߊߛߌߔߊ߲߫߸ ߞߏ߫ ߊߕߊߔߋߙߑߞߊ߫߸ ߏ߬ ߣߌ߫ ߡߊ߬ߙߐ߬ߞߎ߬ߞߊ ߟߎ߬ ߕߊ ߣߌ߲߬ ߕߍ߫ ߞߋߟߋ߲߫ ߘߌ߫، ߓߊߏ߬߸ ߞߘߐ߬ߦߊ ߦߋ߫ ߡߊ߬ߙߐߞߎ߬ ߕߊ ߢߌ߲߬ ߠߋ߬ ߓߟߏ߫.

ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.