ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߛߐ߬ߘߐ߲߬ ߛߏ ߟߊ߫߸ ߝߊ߬ ߞߊ߲ߕߍ߫ ߦߋ߫ ߝߊ߬ߕߐ߬ߘߊ߲߬ߘߟߊ߬ߓߊ߫ ߟߋ߬ ߘߌ߫ ߦߋ߲߬߸ ߣߌ߫ ߢߌ߬ߣߊ߬ ߞߍߣߴߊ߬ ߞߐ߫ ߝߊߦߌߘߊ߫، ߊ߬ ߛߊ߲߭ ߂߄ ߠߋ߬ ߓߊ߯ߙߊ ߣߌ߲߬ ߞߊ߲߬ ߝߌߛߙߌ߫ ߓߟߏ ߡߊ߬ ߕߋ߲߬߸ ߊ߬ ߕߍ߫ ߘߙߐߡߍ߫ ߡߌ߬ߣߊ߬ ߟߊ߫ ߡߐ߰ ߟߊ߫ ߝߊ߬ߕߐ߬ ߟߊ߬ߞߍ߲߬ߘߍ߬ߦߊ߬ ߛߙߊ߫ ߘߌ߫߸ ߓߊ߬ߙߵߊ߬ ߦߴߊ߬ ߞߏ ߓߍ߯ ߞߍ߫ ߟߴߊ߬ ߖߍ߬ߘߍ ߞߐߞߟߏ ߟߋ߬ ߟߊ߫.
ߞߊ߲ߞߊ߲߫ ߞߎߘߍ߫ ߕߊ߲ ߣߌ߫ ߣߊ߯ߣߌ߲ ߘߎ߰ߣߍ߲ ߘߏ߫ ߓߐ߫߸ ߞߊ߬ߙߌ߬ߝߊ߬ߡߘߎ߬ߦߊ߫ ߡߙߊ߬ߘߊ߬ߙߋ߲ ߘߐ߫߸ ߞߏ߫ ߞߐ߬ߟߐ߲߬ߣߍ߲߬߸ ߦߋ߲߬ ߕߍ߫ ߛߏ߫ ߜߊ߲ߛߊ߫ ߘߌ߫ ߤߊ߲߫، ߓߊߏ߬߸ ߗߍ߬ ߞߋߟߋ߲߫ ߦߴߊ߬ߟߎ߬ ߓߟߏ߫ ߦߋ߲߬߸ ߡߍ߲ ߦߴߊ߬ ߢߊ߬ ߟߊ߫ ߊߘߡߦߊ ߡߊ߬ ߟߏ߲ ߓߍ߯: ߞߊ߬ ߢߣߊߡߦߊ ߢߌ߬ߣߊ߬ߒ߬ߞߐ߬ߓߊ߰ߕߐ ߟߎ߬ ߣߴߊ߬ ߖߌ߰ߕߍ߰ߓߊ߰ߕߐ ߘߏ߫ ߟߎ߫ ߟߊ߫ ߘߎߢߊ߫ ߟߊߛߊ߬ߦߌ߲߫ ߊ߬ߟߎ߫ ߡߊ߬߸ ߡߍ߲ ߠߎ߬ ߤߊ߲ߞߟߌ ߕߎ߲߬ ߓߘߊ߫ ߥߊ߫߸ ߞߵߊ߬ߟߎ߬ ߞߍ߫ ߢߊ߬ߡߊ ߘߌ߫߸ ߞߵߏ߬ ߟߎ߬ ߞߍ߫ ߡߐ߰ ߕߣߐ߬ߡߊ ߟߎ߬ ߘߌ߫ ߘߎߢߊ߫ ߣߌ߲߬ ߘߐ߫.
ߝߊ߬ ߞߊ߲ߕߍ߫ ߦߋ߫ ߊߡߙߊߘߎ߯ߞߊ ߟߋ߬ ߘߌ߫߸ ߛߟߏ߬ߡߣߊ߬ ߞߊ߲ߕߍ߫ ߟߎ߫ ߟߊ߫ ߓߏ߲ߞߣߐ ߞߊ߬ߣߌ߲߬߸ ߏ߬ ߡߍ߲ ߦߋ߫ ߒߞߏ ߛߌ߲ߘߌߓߊ߮ ߘߌ߫، ߊ߬ߟߋ ߛߊ߲߭ ߡߎ߬ߥߊ߲߬ ߣߌ߫ ߞߐ ߟߋ߬ ߕߋ߲߬߸ ߊ߬ ߦߋ߫ ߖߊ߬ߡߊ ߡߊ߬ߞߏߢߊ߬ ߟߊ߫ ߢߌ߬ߣߊ߬ߒ߬ߞߐ߬ ߓߟߏ ߡߊ߬، ߊ߬ ߟߊ߫ ߝߊ߬ߕߐ߬ߓߊ߬ߛߌ߬ ߦߙߐ ߣߌ߲߬ ߘߐ߫߸ ߡߐ߰ ߇߃ ߟߋ߬ ߦߴߊ߬ ߓߟߏ߫ ߝߊ߬ߕߐ߬ߓߏ߲ ߞߣߐ߫ ߦߋ߲߬ ߊ߬ߟߎ߬ ߘߊ߲ߘߊ߫ ߞߊ߲ߡߊ߬߸ ߞߵߊ߬ ߛߐ߬ߘߐ߲߬ ߞߎ߲߬ߠߊ߬ߛߌ߮ ߟߊ߫ ߘߙߐߡߍ ߕߴߊ߬ ߘߐ߫߸ ߘߍ߬ߞߙߎ߬ ߜߘߍ߫ ߝߣߊ߫ ߟߊ߫ ߘߍ߬ߡߍ߲߬ ߡߊ߫ ߛߴߊ߬ ߡߊ߬.
<<ߡߐ߱ ߟߎ߬ ߦߋ߫ ߣߊ߬ ߟߊ߫ ߦߊ߲߬ ߊ߬ߟߎ߬ ߣߴߊ߬ߟߎ߬ ߟߊ߫ ߖߊ߲߬ߞߊߙߏ، ߘߏ߫ ߟߎ߫ ߖߊߡߊ߲ߣߍ߲߫߸ ߘߏ߫ ߟߎ߫ ߡߊߛߎߡߊߣߍ߲߫، ߊ߲ ߧߴߊ߬ߟߎ߬ ߘߊ߲ߘߊ߫ ߟߊ߫ ߝߘߊ߬ߝߌ߲߬ ߓߊߛߌ ߟߋ߬ ߟߊ߫، ߊ߲ ߧߴߊ߬ߟߎ߫ ߞߏ߬ ߟߊ߫߸ ߞߵߊ߬ߟߎ߬ ߓߊߟߏ߫߸ ߞߵߊ߲ ߖߊ߲߬ߕߏ߫ ߊ߬ߟߎ߬ ߘߐ߫، ߣߌ߫ ߡߍ߲ ߠߎ߬ ߡߊߝߌ߬ߛߦߊ߬ ߘߊ߫ (ߞߵߊ߬ߟߎ߬ ߞߍ߲ߘߍߦߊ߫)߸ ߊ߲ ߘߴߏ߬ ߟߎ߬ ߟߊߓߌ߬ߟߊ߬.>> ߊ߬ ߟߊ߫ ߛߙߊ߬ߣߎ߲ ߠߵߏ߬ ߘߌ߫. ߟߏ߲ ߓߍ߯߸ ߊ߬ ߦߴߊ߬ ߛߋߞߏ ߞߍ߫ ߟߴߊ߬ߟߎ߬ ߘߊ߲ߘߊ ߘߐ߫߸ ߊ߬ߟߎ߫ ߞߏ߭ ߘߐ߫ ߓߊߛߌ ߟߊ߫߸ ߊ߬ߟߎ߬ ߥߛߎ ߘߐ߫߸ ߖߊ߲߬ߕߏ ߘߐ߫ ߊ߬ߟߎ߬ ߘߐ߫߸ ߊ߬ ߣߴߊ߬ߟߎ߬ ߟߊ߫ ߞߏߟߊߕߊ߯ߡߊ߫ ߢߊ ߟߎ߫ ߞߙߐ߬ߛߌ ߘߐ߫.
ߊ߬ߟߎ߬ ߟߊ߫ ߓߏ߲߫ ߞߏ ߟߋ߬ ߛߍ߱ ߦߴߊ߬ ߞߊ߲߬ ߦߋ߲߬ ߞߏߛߓߍ߫، ߓߊߏ߬߸ ߊ߬ ߛߋ߫ ߘߊ߫ ߓߏ߲ߞߣߐ߫ ߟߏ߯ߟߎ߫ ߟߐ߬ ߟߊ߫ ߓߐ߱ ߘߐ߫ ߊ߬ ߞߐߞߟߏ ߟߊ߫߸ ߓߊ߬ߙߌ߬ ߏ߬ ߘߐ߯ߡߊ߲߫ ߊ߬ߟߎ߬ ߘߐ߫ ߦߋ߲߬ ߞߏߛߓߍ߫، ߝߊ߬ߕߐ ߟߎ߬ ߟߊ߫ ߖߊߡߊ߲ ߞߏߛߐ߲߬߸ ߘߏ߫ ߟߎ߫ ߦߋ߫ ߓߏ߲ ߥߍ߲߯ߓߍ߫ ߟߊ߫ ߛߐ߲߬ ߞߵߊ߬ ߝߍ߬ߛߋ߲߬߸ ߝߏ߫ ߊ߬ ߦߙߐ ߘߏ߫ ߟߎ߫ ߓߘߊ߫ ߕߌߢߍ߫߸ ߓߏ߲߫ ߕߍ߫߸ ߛߎ߬ߡߊ߲߬ ߕߍ߫߸ ߖߌ߫ ߕߍ߫߸ ߛߍ߱ ߦߋ߫ ߗߍ߭ ߢߌ߲߬ ߣߴߊ߬ ߟߊ߫ ߡߐ߱ ߟߎ߫ ߞߊ߲߬ ߞߏߛߓߍ߫، ߊ߬ߟߋ ߟߋ߬ ߟߐ߬ߣߍ߲߫ ߓߊߛߌ߫ ߞߏ ߟߊ߫߸ ߓߊߟߞߏ ߟߊ߫߸ ߝߊ߰ߣߌ߲߬ ߞߏ ߟߊ߫، ߊ߬ ߓߍ߯ ߘߏ߲߬ ߦߋ߫ ߞߍ߫ ߟߴߊ߬ ߓߟߏ߫ ߝߌߛߙߌ ߟߋ߬ ߟߊ߫.
ߞߵߊ߬ ߛߐ߬ߘߐ߲߬ ߜߎ߸ ߞߏ ߡߍ߲ ߦߋ߫ ߞߍ߫ ߟߊ߫ ߞߐ߬ߟߐ߲߬ߣߍ߲߫ ߕߋ߲߬߸ ߞߏ߫ ߟߋ߬ ߓߍ߯ ߞߊ߫ ߞߊ߲߫ ߞߊ߬ ߡߍ߲ ߘߍ߬ߡߍ߲߬߸ ߞߵߊ߬ߟߎ߬ ߛߋߞߏ ߞߍ߫، ߊ߬ ߞߏ߬ߣߌ߲ ߞߍ߫ ߘߊ߫ ߢߊ ߺ ߊ ߺ ߢߊ߫߸ ߞߐ߬ߟߐ߲߬ߣߍ߲߬ߞߊ ߟߎ߫ ߖߍ߬ߘߍ ߞߊ߬ ߝߋ߲߫ ߦߴߊ߬ ߞߏ ߘߐ߫، ߌ߬ߓߙߊ߬ߤߌߡ ߓߊ߬ߛߘߌ߫ ߞߊ߲ߕߍ߫ ߦߴߏ߬ ߛߙߋ߫ ߘߌ߫ <<ߡߐ߱ ߟߎ߬ ߝߊ߬ߕߐ߬ߟߊ߬ߡߊ ߟߋ߬ ߣߊ߬ ߟߊ߫ ߦߊ߲߬߸ ߊ߬ߟߎ߬ ߘߌ߫ ߘߊ߲ߘߊ߫߸ ߊ߬ߟߎ߬ ߞߍ߲ߘߍ߫ ߜߋߙߋ߲ߜߋߙߋ߲ ߘߴߊ߬߬ߟߎ߬ ߞߐߛߊ߬ߦߌ߲߬߸ ߒ ߓߘߴߏ߬ ߛߌߦߊߡߊ߲߫ ߦߋ߫، ߤߊߟߵߊ߬ ߘߏ߫ ߓߐ߫ ߛߊ߲ ߠߋ߬ ߞߎߟߎ߲ߖߋߟߌ ߟߊ߫ ߦߊ߲߬ ߕߋ߲߬.>> ߖߣߍ߬ ߡߊ߯ߘߊ߫ ߞߊ߲ߕߍ߫ ߝߣߊ߫ ߞߵߏ߬ ߢߐ߲߰ ߝߐ߫ <<ߊ߬ ߛߊ߲߭ ߡߎ߬ߥߊ߲ ߠߋ߬ ߕߋ߲߬߸ ߊ߬ ߦߋ߫ ߓߊ߯ߙߊ ߣߌ߲߬ ߞߊ߲߬߸ ߊ߬ ߡߊ߬ߞߏ߬ ߕߍ߫ ߞߏ߫ ߝߏ߫ ߞߎ߲߬ߠߊ߬ߛߌ߮ ߓߊ߯ ߣߊ߬ ߟߋ߬ ߣߴߊ߬ ߘߌ߫ ߘߏ߫ ߞߐ߫، ߊ߲ߠߎ߬ ߖߍ߬ߘߍ ߦߴߊ߬ ߡߊߘߍ߬ߡߍ߲߬ ߠߊ߫ ߕߎ߬ߡߊ߬ ߛߌߦߊߡߊ߲߫.>>
ߞߊ߲ߞߊ߲߫ ߕߌ߲߬ߞߎߘߎ߲ ߡߎ߰ߡߍ ߞߣߐ߫߸ ߝߊ߬ߕߐ߬ߘߊ߲߬ߘߊ߬ ߦߙߐ߫ ߕߴߦߋ߲߬، ߒ߬ߓߊ߬߸ ߝߊ߬ ߞߊ߲ߕߍ߫ ߟߊ߫ ߓߊ߯ߙߊ ߟߵߏ߬ ߣߘߐ߬ߓߌߟߊ ߘߌ߫ ߦߋ߲߬، ߊ߬ ߦߋ߫ ߞߏ߫ ߟߋ߬ ߞߊ߲߬ ߕߋ߲߬߸ ߡߍ߲ ߕߐ߬ߣߐ ߦߋ߫ ߖߊ߬ߡߊ ߓߍ߯ ߞߊ߲߬߸ ߊ߬ ߓߘߊ߫ ߡߍ߲߫ ߊ߬ ߞߏ ߘߐ߫߸ ߊ߬ ߦߴߊ߬߬ ߞߊ߬ߟߊߡߊ߬ ߝߣߊ߫، ߓߊ߬ߙߌ߬߸ ߊ߬ ߕߍ߫ ߓߟߏ߫ ߟߋ߬ ߞߘߐ߫߸ ߡߍ߲ ߘߴߊ߬ ߟߊ߫ ߓߊ߯ߙߊ ߘߌߦߊߘߏ߲߬ ߊ߬ ߘߐ߫.
ߕߋ߲߭ߕߋ߲߭ ߣߌ߲߬ ߘߐ߫߸ ߝߊ߬ ߞߊ߲ߕߍ߫ ߞߊ߲߫ ߞߏ߫ ߊ߬ߟߎ߫ ߡߊ߬ߞߏ ߦߋ߫ ߡߍ߲ ߠߊ߫: ߏ߬ ߟߋ ߓߏ߲߫ ߞߏ ߘߌ߫߸ ߊ߬ ߣߌ߫ ߖߌ߫ ߞߏ߸ ߞߵߏ߬ ߟߊ߫ ߡߊ߬ߘߍ߬ߡߍ߲߬ߠߌ߲߬ ߓߊ߲ߓߊߟߌ ߟߎ߫ ߞߊ߲߬ ߓߊ߯ߙߊ߫ ߓߘߍ ߣߌ߲߬ ߘߊߓߊ߲ ߘߐ߫، <<ߊ߲ ߧߴߊ߬ ߞߍ߫ ߟߊ߫ ߖߡߊ߬ߣߊ ߟߋ߬ ߦߋ߫، ߊߟߊ߫ ߟߋ߬ ߦߴߊ߲ ߛߙߊ߬ ߟߊ߫، ߓߊ߬ߙߌ߬ ߞߎ߲߬ߠߊ߬ߛߌ߮ ߝߣߊ߫ ߞߊ߫ ߞߊ߲߫ ߞߵߊ߬ ߛߋߞߏ ߞߍ߫߸ ߞߵߊ߬ ߞߏ ߟߊߛߓߊ߬ߕߌ߬.>>
ߞߐ߬ߟߐ߲߬ߣߍ߲߬ ߞߣߐ߫߸ ߛߟߏ߬ߡߣߊ߬ ߞߊ߲ߕߍ߫ ߟߊ߫ ߞߏ ߟߎ߬ ߦߋ߫ ߟߊߞߙߐ߬ߛߌ߬ ߟߊ߫ ߦߋ߲߬ ߖߐ߫، ߓߊߏ߬߸ ߊ߬ߟߋ ߞߊ߬ ߛߓߍߛߎ߲ ߛߌ߲ߘߌ߫ ߡߌ߬ߙߌ߲߬ߘߌ ߦߋ߫߸ ߊ߬ ߓߊߘߋ߲ ߠߎ߬ ߝߣߊ߫ ߓߘߊ߫ ߝߊ߬ߕߐ߬ߘߊ߲ߘߊ ߘߊߡߌ߬ߣߊ߫ ߖߊ߬ߡߊ ߦߋ߫߸ ߓߊ߲߬ ߞߍߣߍ߲߫ ߡߐ߱ ߡߍ߲ ߠߎ߬ ߘߐ߫ ߖߐ߫߸ ߏ߬ ߟߎ߫ ߖߌ߰ߡߝߊ߬ ߦߙߐ ߟߋ߬ ߦߋ߲߬ ߘߌ߫ ߓߌ߬ ߢߐ߲߰ ߟߏ߲߫.
ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎ߬ߓߊ߬ ߣߌ߫ ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫
