ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߞߎ߲߬ߞߏ߬ߓߊ߬ߕߐ߬ߦߊ߬ ߞߕߌ ߡߍ߲ ߠߊߦߟߍ߬ߡߊ߲߬ߣߍ߲߫ ߞߕߌ߫ ߡߛߊߦߌ߲ߘߊ ߟߊ߫߸ ߏ߬ ߘߊߡߌ߬ߣߊ߬ ߘߊ߫ ߞߐ߬ߟߏ߲ ߣߌ߲߬ ߡߊ߬، ߞߕߌ ߣߌ߲߬ ߘߐ߫߸ ߞߏߢߊ߫ ߛߋߦߌ߲߫ ߠߋ߬ ߞߕߌ ߦߋ߫ ߛߋ߲߬ߠߊ߫߸ ߡߐ߰ ߝߊ߰߰ ߞߏ ߟߎ߬ ߦߴߊ߬ ߘߐ߫߸ ߊ߬ ߣߌ߫ ߓߋ߬ߒ߬ߞߊ߲߬ߠߌ߲ ߘߋ߲ߣߍ߲ ߠߎ߬ ߞߊ߲߬߸ ߞߵߏ߬ ߟߊ߫ ߡߙߊ߬ߒ߬ߡߊ߬ߝߋ߲ ߠߊ߫ ߕߋ߰ߙߋ߬ߦߊ ߞߊ߲߬߸ ߏ߬ ߟߎ߫ ߟߋ߬ ߓߍ߯ ߞߕߌ ߦߋ߫ ߣߌ߲߬ ߞߏ ߘߐ߫ ߞߵߊ߬ ߓߍ߲߬ ߞߊ߲ߞߊ߲߫ ߕߌ߲߬ߞߎߘߎ߲ ߟߊ߬ߞߊ߲߬ߘߊ߬ߟߌ ߓߊ߲ߓߊ߲ ߡߊ߬.
ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߞߕߌ ߟߋ߬ ߘߊߡߌ߬ߣߊ߬ ߘߊ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߓߟߏ߫ ߓߌ߬߸ ߏ߬ ߡߍ߲ ߠߊߦߟߍ߬ߡߊ߲߬ߣߍ߲߫ ߞߕߌߘߊ ߦߌߟߡߊ߫ ߝߟߐ ߟߊ߫ ߞߊ߬ߣߌ߲߬، ߘߊߦߟߍߟߌ ߣߌ߲߬ ߘߐ߫߸ ߡߊ߬ߡߙߊ߬ߟߌ ߝߊ߰ߡߊ ߟߎ߬ ߣߌ߫ ߞߕߌߦߊ ߞߏߟߊߕߍ߮ ߟߎ߬߸ ߞߵߏ߬ ߟߊ߫ ߣߊ߲߬ߒ߬ߕߊ߲߬ ߘߍ ߣߌ߫ ߘߎ߰ߘߋ߲߬ ߛߌߦߊߡߊ߲߫ ߞߊ߲߬߸ ߏ߬ ߟߎ߫ ߕߘߍ߬ ߞߣߍ ߞߊ߲߬، ߞߕߌ ߣߌ߲߬ ߘߐ߫߸ ߘߐ߬ߛߙߋ߬ ߛߌߦߊߡߊ߲߫ ߠߋ߬ ߦߴߊ߬ߟߎ߬ ߕߍ߯ ߞߘߐ߫ ߞߵߊ߬ ߓߍ߲߬ ߞߎ߲߬ߞߏ߬ ߓߟߋߓߟߋ ߟߎ߬ ߡߊ߬߸ ߡߍ߲ ߠߎ߬ ߟߊ߫ ߓߋ߬ߒ߬ߞߊ߲߬ߠߌ߲߬ ߖߎ߮ ߟߎ߬ ߡߊ߫ ߘߏ߲߰ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫ ߦߊ߲߬ ߝߋߎ߫.
ߟߌ߬ߤߟߊ ߡߍ߲ ߠߎ߬ ߟߊߛߋ߫ ߘߊ߫ ߞߕߌ ߣߌ߲߬ ߘߊߦߟߍߟߌ ߝߍ߬߸ ߘߐ߬ߛߙߋ߫ ߡߎ߬ߥߊ߲߬ ߣߌ߫ ߞߐ߫ ߟߋ߬ ߦߴߊ߬ߟߎ߬ ߘߌ߫߸ ߡߍ߲ ߠߎ߬ ߛߙߊߛߌ߰ߣߍ߲߫ ߞߏߢߊ߫ ߛߋߦߌ߲߫ ߘߐ߫߸ ߢߊ ߡߊߖߌ߰ߕߐ߫ ߛߋߦߌ߲ ߏ߬ ߟߎ߫ ߟߋ߬ ߝߍ߬، ߣߴߌ ߞߵߏ߬ ߡߊߝߟߍ߫߸ ߓߌ߬ߟߊ߬ ߞߍߣߍ߲߫ ߡߊ߬ߝߌ߲߬ߓߊ߰ߕߐ ߡߍ߲ ߠߎ߬ ߞߐ߫߸ ߊ߬ߟߎ߫ ߣߐ߬ߝߍ߬ߜߍ߲ߣߍ߲߫ ߞߎ߲߬ߞߏ߬ ߓߟߋߓߟߋ ߟߎ߫ ߟߋ߬ ߘߐ߫߸ ߦߏ߫ ߡߐ߰ ߝߊ߮߸ ߏ߬ ߡߍ߲ ߘߐ߬ߛߙߋ߬ ߞߋߟߋ߲߫ ߦߴߊ߬ ߘߐ߫߸ ߕߋ߰ߙߋ߬ߦߊ ߞߍ ߡߊ߬ߙߌ߬ߝߊ ߟߊ߫߸ ߏ߬ ߘߐ߬ߛߙߋ߬ ߞߋߟߋ߲߫ ߦߋ߫ ߣߌ߲߬ ߞߏ ߘߐ߫، ߡߐ߰ ߞߏ߬ߙߏ߲߬ ߘߍ ߣߌ߫ ߛߏ߲߬ߧߊ߬ߟߌ ߞߍ ߡߊ߬ߙߌ߬ߝߊ ߟߊ߫߸ ߏ߬ ߘߐ߬ߛߙߋ߬ ߞߋߟߋ߲߫ ߦߴߊ߬ ߘߐ߫، ߓߋ߬ ߞߍ ߘߋ߲ߣߍ߲ ߠߎ߬ ߞߊ߲߬߸ ߏ߬ ߘߐ߬ߛߙߋ߬ ߟߏ߯ߟߎ߫ ߟߋ߬ ߦߴߊ߬ ߘߐ߫، ߓߊߘߋ߲ ߠߎ߬߸ ߞߎ߲߬ߞߏ߬ ߛߌߦߊߡߊ߲߫ ߠߋ߬ ߘߐߢߌߡߌ߲ߕߐ߫ ߞߕߌ ߣߌ߲߬ ߛߋ߲߭ߝߍ߬، ߡߊ߬ߝߌ߲߬ߓߊ߰ߕߐ߫ ߡߐ߰ ߡߎ߬ߥߊ߲߬ ߣߌ߫ ߞߐ߫߸ ߘߏ߫ ߟߎ߫ ߓߘߊ߫ ߞߘߐ߬، ߞߕߌ ߣߌ߲߬ ߞߏ߬ߣߌ߲ ߘߊߡߌ߬ߣߊ߬ ߘߊ߫ ߓߌ߬ ߡߎ߰ߡߍ ߟߋ߬ ߘߐ߫.
ߟߊ߬ߥߟߍ߬ߟߌ߬ ߝߏ߮ ߞߣߐ ߝߊ߫ ߘߊ߫ ߟߋ߬ ߓߌ߬ ߖߏߣߊ߫، ߞߏߕߐ ߟߎ߬߸ ߞߏߕߐ ߟߎ߬ ߟߊ߫ ߞߐߙߍ ߟߎ߬߸ ߘߌ߲߬ߞߌߙߊ ߝߊ߰ߡߊ ߟߎ߬߸ ߊ߬ ߣߌ߫ ߘߎ߰ߘߋ߲ ߠߎ߬߸ ߏ߬ ߟߎ߫ ߛߐ߬ߘߐ߲߬ ߘߊ߫ ߟߋ߬ ߓߊ߯ߙߊ ߣߌ߲߬ ߘߊߡߌߣߊ ߘߐ߫߸ ߓߍ߯ ߣߴߊ߬ ߞߎ߲߬ߞߏ߬.
ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߝߏߘߋ߫ ߓߌ߲ߕߎ߬ ߞߋߕߊ߬ ߞߊ߬ ߦߟߌߓߌߟߊߟߌ ߞߍ߫߸ ߞߏ߫ ߢߊ ߡߊߖߌ߰ߕߐ߫ ߟߋ߬ ߞߏ ߟߎ߬ ߝߍ߬ ߊ߬ ߢߊ ߡߊ߬߸ ߞߵߊ߬ߟߎ߬ ߟߊߕߊ߯ߡߊ߫ ߢߊߟߐ߲ ߣߌ߫ ߞߎ߬ߛߊ߲߬ߧߊ ߟߊ߫.
<<ߢߊ ߡߊߖߌ߰ߕߐ߫ ߞߏ ߡߍ߲ ߠߎ߬ ߝߍ߬ ߣߌ߲߬ ߞߕߌ ߘߐ߫߸ ߊ߬ ߓߍ߯ ߦߋ߫ ߞߏߖߎ߮ ߟߎ߫ ߟߋ߬ ߘߌ߫: ߝߊ߰ߟߌ߬ ߞߏ߫߸ ߡߙߎ߬ ߟߊ߬ ߕߍ߯ߟߌ ߟߎ߬߸ ߓߋ߬ߒ߬ߞߊ߲߬ߠߌ߲ ߘߋ߲ߣߍ߲ ߠߎ߬ ߞߊ߲߬߸ ߡߐ߰ ߞߏ߬ߙߏ߲߬ ߘߍ߸ ߝߊ߰ߟߌ ߞߐ߲߬ߞߐ߲߬ߒ߬ߡߊ߬ߟߌ߸ ߊ߬ ߣߌ߫ ߞߏ߫ ߟߊߕߐ߲ߣߍ߲߫ ߛߌߦߊߡߊ߲߫، ߡߍ߲ ߠߎ߬ ߞߊ߬ ߞߊ߲ߞߊ߲ߞߊ ߟߎ߬ ߟߊ߫ ߡߊ߬ߝߊ ߘߐߓߎ߬ߘߎ߲߬߸ ߞߊ߬ ߡߐ߱ ߟߎ߫ ߖߎ߬ߛߎ ߕߙߐ߫.>> ߊ߬ ߞߵߏ߬ ߟߋ ߝߐ߫.
ߞߵߊ߬ ߓߍ߲߬ ߞߏߟߊߕߐ߲ߓߊߟߌߦߊ ߞߍ߬ߟߍ ߡߊ߬߸ ߞߕߌߞߊ߲ߘߊ ߡߴߏ߬ ߡߊߟߍ߬ߟߍ߬߸ ߊ߬ ߞߵߊ߬ ߦߌ߬ߘߊ߬ ߞߏ߫:
<<ߞߕߌߓߋߟߋ߲ ߕߍߣߊ߬ ߛߊ߬ߙߌ߬ߦߊ߬ ߛߐ߬ߛߐ߬ ߞߏ߫ ߛߌ߫ ߘߐߞߏߦߊߕߏ߫ ߟߊ߫، ߡߍ߲ ߠߎ߬ ߞߊ߬ ߖߊ߬ߡߊ ߟߊ߫ ߡߊ߬ߝߊ ߘߐߓߎ߬ߘߎ߲߬߸ ߏ߬ ߟߎ߬ ߣߌ߫ ߥߊߟߌ ߞߊ߫ ߞߊ߲߫ ߦߙߐ ߡߍ߲߸ ߏ߬ ߟߎ߬ ߘߌ߫ ߥߊ߫ ߦߋ߲߬ ߝߋߎ߫، ߊ߲ ߘߌ߫ ߞߊߘߊ߲ ߓߍ߯ ߞߍ߫߸ ߛߊ߬ߙߌ߬ߦߊ߬ ߞߊ߲߫ ߢߊ ߡߍ߲߸ ߞߵߊ߬ ߞߍ߫ ߕߋ߲߬߸ ߓߊߏ߬ ߞߏߟߊߕߐ߲ߓߊߟߌߦߊ ߦߋ߫ ߛߐ߲߬ߡߊ߬ߛߊߦߌ߲ ߥߙߊ߬ ߟߊ߫ ߟߋ߬.>> ߊ߬ ߞߵߏ߬ ߟߋ ߖߊ߬ߛߙߋ߬ߡߊ߬ߟߊ ߞߍ߫.
ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߕߌߖߌ߲ ߞߊ߲ߕߌ߮߸ ߡߊ߬ߡߘߎ߫ ߛߊߟߌߥߎ߬ ߖߊ߬ߞߌ߬ߕߋ߫ ߞߊ߬ ߞߕߌ ߘߊߡߌ߬ߣߊ߬ ߞߏ ߕߡߊ߬ߖߌ ߓߊ߲߫: <<ߞߎ߲߬ߞߏ߬ߓߊ߬ߕߐ߬ߦߊ ߣߌ߫ ߕߋ߰ߙߋ߬ߦߊ ߞߍߢߊ ߓߍ߯ ߓߊߛߌ߫ ߢߊ ߦߋ߫ ߛߊ߬ߙߌ߬ߦߊ߬ ߞߣߐ߫، ߏ߬ ߟߋ ߘߐ߫߸ ߞߕߌ ߣߌ߲߬ ߞߎ߲߬ߕߊ߮ ߞߣߐ߫߸ ߛߊ߬ߙߌ߬ߦߊ ߞߊ߲߫ ߢߊ ߡߍ߲߸ ߏ߬ ߘߌ߫ ߝߐ߫߸ ߝߏߦߌ߬ ߕߍ߫ ߝߐ߫ ߣߌ߫ ߛߊ߬ߙߌ߬ߦߊ ߕߍ߫، ߛߐ߲߬ߒ߬ߕߊ߲ ߝߋ߲߫ ߕߍ߫ ߖߊ߲߬ߞߌ߫߸ ߛߐ߲߬ߡߊ߫ ߘߏ߲߬ ߝߣߊ߫ ߕߍ߫ ߟߊߓߌ߬ߟߊ߬.>> ߊ߬ ߞߵߏ߬ ߕߡߊ߬ߖߌ ߓߐ߫ ߖߊ߬ߡߊ ߘߐ߫߸ ߞߊ߬ ߓߊ߲߫ ߞߵߊ߬ ߞߊ߲ߠߊߘߌ߫ ߖߡߊ߬ߣߊ߬ߘߋ߲ ߠߎ߬ ߡߊ߬߸ ߞߏ߫ ߓߍ߯ ߦߴߊ߬ ߟߊ߫ ߟߊ߫ ߟߊߒߠߦߊ ߟߊ߫ ߛߊ߬ߙߌ߬ߦߊ߬ ߘߐ߫.
ߞߏ ߡߍ߲ ߠߎ߬ ߞߎߡߊ ߞߍߕߐ߫ ߞߕߌ ߣߌ߲߬ ߘߐ߫߸ ߡߊ߲߬ߞߊ߲ ߡߍ߲ ߕߊ߬ߡߌ߲߬ ߘߊ߫ ߛߊߣߊ߲ߠߊ߫ ߂߀߂߄ ߕߎߟߊߝߌ߲ ߠߊ߫߸ ߜߙߋߘߎ߯ ߓߙߊߣߊ߬ߡߊ߫ ߡߙߊ߬ߘߊ߬ߙߋ߲ ߞߣߐ߫߸ ߏ߬ ߦߋ߫ ߞߎߡߊ ߦߴߊ߬ ߘߐ߫، ߝߐߢߐ߲߯ߞߐ ߏ߬ ߡߍ߲ ߝߍ߬߸ ߡߎߛߊ߫ ߦߎ߭ ߞߐ߲ߘߍ߫ ߓߣߐ߬ ߘߴߊ߬ ߘߋ߲ ߘߏ߫ ߘߐ߫߸ ߘߏ߫ ߓߟߏ ߕߍ߰ ߘߴߊ߬ ߟߊ߫، ߏ߬ ߝߣߊ߫ ߕߘߍ߬ ߞߕߌ߫ ߟߊߝߟߐ߫ ߘߊߞߎ߲ ߣߌ߲߬ ߘߐ߫߸ ߊ߬ ߞߵߊ߬ ߟߊ߫ ߛߍߥߊ ߦߌ߬ߘߊ߫߸ ߊ߬ ߟߊ߫ ߛߎ߬ߣߎ߲ ߘߊ߲ߘߊ ߖߎ߬ߛߌ߮ ߘߐ߫߸ ߊ߬ ߖߎ߬ߛߎ ߕߙߐ ߣߴߊ߬ ߕߊ߫. <<ߒ ߧߴߊߟߊ߫ ߕߊ߲߬ߘߏ߬ ߟߊ߫ ߟߋ߬ ߓߌ߬، ߓߊߏ߬߸ ߒ ߕߎ߲߬ ߓߘߊ߫ ߛߎ߬ߣߎ߲߬، ߞߊ߬ߛߐ߬ߘߐ߲߬߸ ߕߌߢߍߟߌ ߡߍ߲ ߞߊ߬ ߛߐ߬ߘߐ߲߬߸ ߣߊߟߌ߬ߡߎ߲߫ ߒ ߘߋ߲ ߝߊ߱ ߘߌ߫߸ ߒ ߘߋ߲ ߓߟߏߕߍ߱ ߘߌ߫ ߊ߬ ߟߊ߫߸ ߊ߬ ߞߏߢߊ ߕߎ߲߬ ߓߘߊ߫ ߒ ߛߍ߰، ߒ ߣߌ ߓߘߊ߫ ߓߌ߬ߟߊ߬ ߒ ߘߐ߫ ߓߌ߬߸ ߓߊߏ߬ ߞߕߌ ߞߊ߫ ߞߊ߲߫ ߞߊ߬ ߘߊߡߌ߬ߣߊ߬.>> ߊ߬ ߣߡߌߛߊߣߍ߲ ߞߏ߬ߣߌ߲ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߫ ߕߌߢߍߟߌߟߊ ߓߍ߯ ߦߋ߫ ߖߊ߬ߡߊ ߘߐ߫.
ߖߡߊ߬ߣߊ߬ߘߋ߲߬ ߛߌߦߊߡߊ߲߫ ߠߋ߬ ߓߍ߫߸ ߡߍ߲ ߠߎ߬ ߞߊ߲߫ ߞߏ߫ ߊ߬ߟߎ߬ ߛߍߥߊߣߍ߲߫ ߣߌ߲߬ ߞߏ ߟߊ߫߸ ߊ߬ ߘߊߡߌ߬ߣߊ߬ ߢߊ ߓߘߴߊ߬ ߦߌ߬ߘߴߊ߬ߟߎ߬ ߟߊ߫ ߞߏ߫ ߞߕߌ ߢߌ߲߬ ߠߎ߬ ߘߌ߫ ߕߍ߰ ߊ߬ ߢߌ߬ߡߊ ߟߊ߫.
