ߡߊ߬ߟߌ ߞߣߐ߫߸ ߟߊ߬ߓߏ߬ߙߌ߬ߟߊ ߟߎ߬ ߟߊ߫ ߟߊ߬ߝߛߊ߬ߟߌ߫ ߞߙߎ ߛߦߌߣߊߞߐߙ ߓߘߊ߫ ߓߊ߯ߙߊ߫ ߟߊߘߎ߲ ߞߍ߫ ߓߡߊ߬ߞߐ߬ ߣߌ߫ ߛߣߍ߬ߜ߭ߊ߬ߟߌ߫ ߓߐߕߏ߲ ߛߌߟߊ ߟߎ߫ ߞߊ߲߬߸ ߊ߬ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߡߍ߲ ߘߌ߫߸ ߞߏ߫ ߊ߬ߟߎ߬ ߓߊ߯ߙߊߢߐ߲߮ ߡߍ߲ ߠߎ߬ ߝߊ߰ ߘߊ߫ ߓߋ߬ߒ߬ߞߊ߲߬ߠߌ߲ ߛߋ߲߭ߝߍ߬ ߘߌߓߏߟߌ߫ ߣߌ߫ ߞߊ߬ߦߋ߬ ߕߍߟߊ ߘߐ߫߸ ߓߌ߲ߠߊߥߎߟߋ߲ ߕߊ߬ߡߌ߲߬ߣߍ߲ ߕߋ߬ߟߋ߫ ߂߉ ߡߊ߬߸ ߏ߬ ߟߎ߫ ߛߎ߭ ߦߋ߫ ߛߋ߫ ߟߊ߬ߛߋ߬ߦߌ߲߬ ߠߊ߫߸ ߓߋ߬ߒ߬ߞߊ߲߬ߠߌ߲ ߣߌ߲߬ ߞߍ߫ ߘߊ߫ ߞߵߊ߬ ߛߐ߬ߘߐ߲߬ ߊ߬ߟߎ߬ ߦߋ߫ ߝߊ߯ߞߊ߲ߓߋ߲ ߠߎ߬ ߓߌ߬ߟߊ߬ߛߌ߬ߟߊ߬ߟߌ ߟߋ߬ ߟߊ߫߸ ߟߊ߬ߛߋ߬ߟߌ߬ ߛߓߍ ߘߏ߫ ߞߣߐ߫߸ ߡߍ߲ ߞߟߊ߬ߣߐ߰ߦߊ߬ ߘߊ߫ ߛߦߌߣߊߞߐߙ ߓߋߟߋ߲ߕߌ߮ ߓߟߏ߫߸ ߞߏ߫ ߊ߬ߟߎ߬ ߟߊ߫ ߟߊ߬ߘߎ߲߬ߠߌ߲ ߣߌ߲߬ ߞߍ߫ ߘߊ߫ ߞߊ߬ߦߋ߫ ߣߌ߫ ߘߌߓߏߟߌ߫ ߡߊߛߎ߬ߘߎ߲߬ߧߊ ߟߋ߬ ߘߐ߫߸ ߊ߬ ߞߎ߲߭ ߦߋ߫ ߊ߬ߟߎ߬ ߟߊ߫ ߡߊ߲߬ߕߙߐ ߟߎ߬ ߦߌ߬ߘߊ߫ ߟߋ߬ ߘߌ߫ ߞߏ ߟߎ߬ ߕߊ߯ߓߟߏ ߞߊ߲߬.
ߊ߬ ߣߌ߫ ߊ߬ߟߎ߬ ߓߊ߯ߙߊߢߐ߲߮ ߡߍ߲ ߠߎ߬ ߣߌ ߕߏ߫ ߘߊ߫ ߓߌ߲ߠߊߥߎߟߋ߲߫ ߕߊ߬ߡߌ߲߬ߣߍ߲ ߕߋ߬ߟߋ߫ ߂߉ ߓߋ߬ߒ߬ߞߊ߲߬ߠߌ߲ ߘߐ߫߸ ߡߍ߲ ߟߐ߬ߣߍ߲߫ ߕߘߍ߬ ߦߋ߫ ߝߊ߯ߞߊ߲ߓߋ߲ ߠߎ߫ ߡߊ߬߸ ߝߊ߰ߓߊ߰ߕߐ ߟߎ߬ ߛߎ߭ ߦߋ߫ ߟߊߛߋ߬ߦߌ߲߫ ߊ߬ߟߎ߬ ߟߊ߫ ߡߐ߱ ߟߎ߫ ߡߊ߬߸ ߓߊߏ߬߸ ߟߊ߬ߛߋ߬ߟߌ߬ ߛߓߍ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߟߋ߬߸ ߞߏ߫ ߛߎ߭ ߟߎ߬ ߕߏ߫ ߘߊ߫ ߟߋ߬ ߓߋ߬ߒ߬ߞߊ߲߬ߠߌ߲ ߣߌ߲߬ ߘߊߞߎ߲ ߘߐ߫ ߦߋ߲߬߸ ߛߦߌߣߊߞߐߙ ߞߏ߬ߣߌ߲ ߓߘߴߊ߬ ߟߊߕߍ߰߸ ߞߏ߫ ߊ߬߫ߟߎ߬ ߟߊ߫ ߓߊ߯ߙߊ ߟߎ߬ ߟߊߘߎ߲ߣߍ߲߫ ߠߋ߬ ߝߟߐ߫߸ ߝߏ߫ ߊ߬ߟߎ߬ ߟߊ߫ ߟߊ߬ߢߌߣߌ߲ ߦߋ߫ ߓߐ߫ ߜߍ߫ ߟߊ߫ ߕߎ߬ߡߊ߬ߣߊ ߡߍ߲ ߠߊ߫߸ ߛߙߋ ߘߏ߫ ߟߎ߫ ߦߴߊ߬ ߦߌ߬ߘߊ߬ ߟߊ߫߸ ߞߏ߫ ߟߊ߬ߓߏ߬ߙߌ߬ߟߊ߫ ߁߅ ߢߐ߲߰ ߠߋ߬ ߝߊ߰ ߘߊ߫ ߓߋ߬ߒ߬ߞߊ߲߬ߠߌ߲ ߕߊ߬ߡߌ߲߬ߣߍ߲ ߣߌ߲߬ ߛߋ߲߭ߝߍ߬߸ ߘߌߓߏߟߌ߫ ߣߌ߫ ߞߊ߬ߦߋ߬ ߕߍߟߊ ߘߐ߫߸ ߊ߬ ߣߌ߫ ߞߊ߬ ߝߊ߯ߞߊ߲ߓߋ߲߫ ߛߌߦߊߡߊ߲߫ ߖߋ߬ߣߌ߲߫.
ߛߙߋ ߘߏ߫ ߖߍ߬ߘߍ ߟߊ߫ ߝߐߟߌ߫ ߘߐ߫߸ ߓߋ߬ߒ߬ߞߊ߲߬ߠߌ߲߬ߠߊ ߟߎ߬ ߞߊ߬ ߟߊ߬ߓߏ߬ߙߌߟߊ ߘߏ߫ ߟߎ߫ ߡߌ߬ߣߊ߫ ߟߋ߬ ߝߟߐ߫߸ ߏ߬ ߞߐ߫ ߞߵߊ߬ߟߎ߫ ߓߐ߬ߣߐ߫ ߊ߬ߟߎ߬ ߣߌ ߘߐ߫߸ ߊ߬ ߘߏ߲߬ ߛߋ߲߬ߧߊ߬ ߝߟߐ ߟߋ߬ ߦߋ߫ ߕߋ߲߬߸ ߝߊ߯ߞߊ߲ߓߋ߲߫ ߓߏߙߌߟߊ ߘߏ߫ ߟߎ߫ ߦߋ߫ ߓߐ߬ߣߐ߫ ߊ߬ߟߎ߬ ߣߌ ߘߐ߫ ߢߊ߫ ߛߎ߯ ߣߌ߲߬ ߡߊ߬ ߡߊ߬ߟߌ ߞߣߐ߫߸ ߤߊߟߌ߬ ߣߴߊ߬ ߦߴߊ߬ ߛߐ߬ߘߐ߲߬ ߞߏ߫ ߘߏ߫ ߟߎ߫ ߕߘߍ߬ ߓߘߊ߫ ߝߊ߰ ߞߘߐ߬ߡߊ߲߫߸ ߞߵߊ߬ ߕߎ߬ߙߎ ߞߍ߫ ߓߋ߬ߒ߬ߞߊ߲߬ߠߌ߲ߠߊ ߟߎ߬ ߓߋ߬ߒ߬ߞߊ߲߬ߠߌ߲ ߘߌ߫߸ ߞߵߊ߬ ߢߍߛߌ߲߫ ߝߊ߯ߞߊ߲ߓߋ߲ ߠߎ߫ ߡߊ߬.
ߛߎ߯ߟߊ߲ߘߌ߫ ߛߊ߬ߞߐ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
