ߕߟߋ߬ ߘߊ߲ߘߐ߫ ߟߋ߬ ߕߏߣߍ߲߫ ߛߎ߲ߞߊߙߏ ߟߊ߫ ߡߎ߬ߕߎ߲߬߸ ߛߓߏ߬ ߞߏ߬ߖߊ ߓߘߊ߫ ߘߏ߲߬ ߛߌ߯ߙߌ߲߫ ߞߣߐ߫، ߥߊ߬ߦߌ߬ߛߏ߬ ߛߌߦߊߡߊ߲߫ ߓߘߊ߫ ߝߋ߬ߙߋ ߟߊߟߐ߬߸ ߞߏ߫ ߝߏ߫ ߘߏ߫ ߟߋ߬ ߓߊ߯ ߟߊ߫ ߛߏ߬ߓߏ ߞߌߘߊ ߛߐ߲߬ߞߐ ߞߊ߲߬߸ ߞߵߊ߬ ߟߊߦߟߍ߬ ߖߕ ߅߀ ߀߀߀ ߛߊ߲ߘߐ߫، ߒ߬ߓߊ߬߸ ߘߌ߲߬ߞߌߙߊ ߝߊ߰ߡߊ ߟߎ߬ ߝߣߊ߫ ߓߊ߲߬ߣߍ߲߫ ߏ߬ ߟߋ ߡߊ߬ ߛߊ߬ ߛߍߣߍ߲߬ ߝߊߦߌ߲߫߸ ߞߏ߫ ߘߏ߫ ߟߊ߫ ߞߏ߫ ߞߎߡߊ ߛߏ߬ߓߏ ߛߐ߲߬ߞߐ ߞߊ߲߬߸ ߏ߬ ߞߎߡߊ߫ ߕߴߦߋ߲߬.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫߸ ߥߊ߬ߦߌ ߘߏ߫ ߟߎ߫ ߓߘߊ߫ ߛߏ߬ߓߏ ߞߌߘߊ ߛߐ߲߬ߞߐ߬ ߞߎߘߊ߫ ߟߊ ߘߊߡߌ߬ߣߴߊ߬ߟߎ߫ ߖߘߍ߬ ߦߋ߫߸ ߞߵߊ߬ߟߎ߫ ߘߊ߬߬ߟߎ ߞߍ߫߸ ߞߏ߫ ߛߍߝߊ ߝߊ߬ߟߋ߲ ߓߘߊ߫ ߦߟߍ߬߸ ߣߌ߬ߛߌ ߛߐ߲߬ߞߐ ߓߘߊ߫ ߦߍ߬ߟߍ߫ ߡߊ߬ߟߌ ߟߊ߫، <<ߞߋ߬ߟߋ߲߬ߠߊ߬>> ߡߙߌߦߊ ߏ߬ ߡߊ߫ ߓߍ߲߬ ߛߌ߯ߙߌ߲߫ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߲ߕߌ߮ ߡߊ߬߸ ߛߎ߬ߟߋ߬ߡߊߣ ߞߏ߬ߦߌ߬ߕߊ.
ߊ߬ ߞߵߊ߬ ߟߊߛߋ߫ ߏ߬ ߟߋ ߘߐ߫߸ ߞߏ߫ <<ߣߌ߫ ߘߏ߫ ߞߊ߫ ߞߊ߲߫ ߞߊ߬ ߟߊ߫ ߛߏ߬ߓߏ ߞߌߘߊ ߞߊ߲߬߸ ߥߟߊ߫ ߞߊ߬ ߘߏ߫ ߓߐ߫ ߊ߬ ߟߊ߫߸ ߏ߬ ߞߊ߫ ߞߊ߲߫ ߞߊ߬ ߞߍ߫ ߖߊ߬ߡߊ ߟߊ߫ ߓߍ߲߬ߡߊ ߟߋ߬ ߟߊ߫߸ ߡߙߊ߬ߓߊ߰ߘߊ ߝߊ߰ߡߊ ߟߎ߫ ߓߊ߬߸ ߞߊ߬ߙߏ߬ߝߙߋ߲ ߕߊ ߟߎ߬߸ ߥߊ߬ߦߌ ߟߎ߫ ߕߊ߬ߣߍ߲ ߞߵߊ߬ ߟߊ߫ ߖߎ߬ߟߊ߬ߦߊ ߓߏ߲ߘߋ߲ ߞߊ߲߬߸ ߓߍ߯ ߟߋ߬ ߞߊ߫ ߞߊ߲߫ ߞߊ߬ ߓߍ߲߬ ߏ߬ ߡߊ߬، ߞߏ߬ߣߌ߲߬߸ ߊ߲ ߕߴߛߋ߫ ߛߐ߲߬ ߠߊ߫ ߞߋ߬ߟߋ߲߬ߠߊ߬ ߡߙߌߦߊ ߡߊ߬ ߦߋ߲߬ ߕߋ߲߬ ߘߋ߬߸ ߞߊ߬ ߡߐ߱ ߟߎ߬ ߟߊ߫ ߘߎߢߊ߫ ߟߊߜߟߍ߬ߦߴߊ߬ߟߎ߫ ߡߊ߬ ߝߎ߯ߝߊߕߌ߫߸ ߞߎߡߊߕߍ߫ ߖߍ߬ߘߍ߸ ߛߎ߲ߞߊߙߏ ߛߎ߬ߘߎ߲߬ߧߊ߬ߣߍ߲߬ߓߊ ߣߌ߲߬ ߘߐ߫ ߕߋ߲߬.>> ߞߊ߬ߝߏ߬ߙߋ߲߬ߕߌ߮ ߞߵߏ߬ ߟߋ ߝߐ߫ ߟߊ߬ߛߋ߬ߟߌ߬ ߛߓߍ ߘߏ߫ ߞߣߐ߫.
ߟߊ߬ߘߍ ߘߏ߫ ߛߌ߰ ߘߊ߫ ߛߋ߲߬ߠߊ߫ ߥߊ߬ߦߌ ߟߎ߬ ߟߊ߫ ߞߐߦߌߘߊߓߊ߮ ߣߌ߫ ߖߎ߬ߟߊ߬ߦߊ ߓߏ߲ߘߋ߲ ߛߋߒߞߏߟߊ ߟߎ߬ ߕߍ߫، ߊ߬ߟߎ߬ ߟߊ߫ ߟߊ߬ߘߍ ߏ߬ ߞߣߐ߫ ߞߎߡߊ ߟߎ߬ ߘߐ߫߸ ߖߎ߬ߟߊ߬ߦߊ ߓߏ߲ߘߋ߲ ߞߵߊ߬ ߦߌ߬ߘߊ߬ ߞߏ߫ ߘߏ߫ ߟߊ߫ ߥߊ߯ߕߌ߫ ߕߍ߫ ߛߏ߬ߓߏ ߞߌߘߊ ߛߐ߲߬ߞߐ ߞߊ߲߬ ߕߋ߲߬، ߊ߬ ߖߍ߬ߘߍ߸ ߞߏ߫ ߊ߬ߟߎ߬ ߓߍߣߵߊ߬ ߞߏ ߟߊߦߟߍ߬ ߊ߬ߟߎ߬ ߛߊ߲ߘߐ߫ ߡߐ߮ ߟߎ߫ ߡߊ߬ ߞߐߣߊߞߙߌ߫.
ߞߊ߬ ߞߐ߲߰ ߞߎߡߊ߫ ߞߋߟߋ߲߫ ߛߐ߬ߘߐ߲ ߢߍ߫ ߝߊ߰ߡߊ ߟߎ߬ ߟߊ߫߸ ߛߌ߯ߙߌ߲߫ ߞߊ߬ߝߏ߬ߙߋ߲ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߞߊ߲ߕߌ߮ ߞߵߊ߬ ߦߌ߬ߘߊ߬ ߞߏ߫ ߛߏ߬ߓߏ ߞߌߘߊ ߦߋ߫ ߅߀ ߀߀߀ ߡߍ߲ ߘߐ߫߸ ߊ߰ ߕߏ߫ ߦߋ߲߬، ߊ߬ ߞߊ߬ ߞߊ߲߬ߞߊߙߌ ߟߊ߫ ߞߏ߫ <<ߡߐ߰ ߛߌ߫ ߞߊ߬ ߘߏ߫ ߟߊ߫ ߏ߬ ߞߊ߲߬߸ ߏ߬ ߘߌ߫ ߛߊ߬ߙߌ߬ߦߊ߫ ߛߐ߬ߘߐ߲߫ ߊ߬ ߢߍߝߍ߬.>>
ߥߊ߬ߦߌ ߟߎ߬ ߛߊ߫߸ ߏ߬ ߟߎ߫ ߖߊ߬ߣߴߊ߬ߟߎ߫ ߣߐ߭ ߘߐ߫، ߊ߬ߟߎ߬ ߞߊ߲߫ ߞߏ߫ ߖߌ߬ߣߍ߬ ߕߊߡߊ߲ ߝߊ߲߬ߞߊ ߟߋ߬ ߓߘߊ߫ ߖߌ߰ ߛߍߝߊ ߣߊ߰ߟߊ߫߸ ߊ߬ߟߎ ߘߏ߲߬ ߦߋ߫ ߛߊ߲߬ߠߌ߲ ߞߍ߫ ߟߊ߫ ߛߍߝߊ ߟߋ߬ ߘߐ߫ ߡߊ߬ߟߌ ߟߊ߫߸ ߏ߬ ߓߘߊ߫ ߞߍ߫ ߕߙߎ߬ ߘߌ߫ ߞߵߊ߬ߟߎ߬ ߟߊ߫ ߥߊߘߌ߫ ߘߊߥߎ߲ߕߊ ߦߟߍ߬ ߔߏ߲߫، ߞߏ߫ ߣߌ߫ ߝߋ߲߫ ߡߊ߫ ߟߊ߫ ߅߀ ߀߀߀ ߞߊ߲߬߸ ߊ߬ߟߎ ߕߍߣߊ߬ ߕߣߐ߬ ߛߌ߫ ߛߐ߬ߘߐ߲߬ ߠߊ߫ ߛߓߏ߬ ߝߙߋ ߘߐ߫ ߏ߬ ߘߐ߫.
ߒ߬ߓߊ߬߸ ߛߊ߬ߡߊ߲߬ߢߐ߲߰ߕߍ ߏ߬ ߓߘߊ߫ ߛߓߏ߬ ߘߊ߬ߥߎ߲߬ߠߊ ߟߎ߬ ߝߣߊ߫ ߓߌ߬ߟߊ߫ ߖߊ߭ ߘߐ߫ ߡߎߣߎ߲߬، ߛߌ߯ߙߌ߲߫ ߞߣߐ߫ ߕߋ߲߬߸ ߛߓߏ߬ ߞߏ ߦߋ߫ ߝߊ߲߭ ߝߌ߬ߟߊ ߏ߬ ߟߋ ߕߍ߫ ߕߋ߲߬، ߞߊ߬ߝߏ߬ߙߋ߲߬ߕߌ߮ ߞߊ߲߫ ߞߏ߫ ߣߌ߫ ߡߍ߲ ߡߊ߫ ߛߋ߫ ߛߏ߬ߓߏ ߝߙߋ߬ ߟߊ߫ ߅߀ ߀߀߀ ߟߊ߫߸ ߏ߬ ߦߴߊ߬ ߕߏ߫ ߦߋ߲߬، ߤߊ߲߯ ߖߎ߬ߟߊ߬ߦߊ ߓߏ߲ߘߋ߲ ߦߋ߫ ߖߋ߬ߓߌ߬ ߞߋߟߋ߲߫ ߝߐ߫ ߕߎ߬ߡߊ ߡߍ߲ ߠߊ߫߸ ߣߌ߫ ߘߏ߫ ߘߌ߫ ߟߴߊ߬ ߞߊ߲߬߸ ߥߟߊ߫ ߘߏ߫ ߘߌ߫ ߓߐ߫ ߊ߬ ߟߊ߫.
