ߘߊ߲߬ߞߊ߬ߞߙߐ߬ߞߊ ߟߎ߫ ߕߌ߲߬ ߦߋ߫ ߢߊ߰ߢߊ߰ߓߊ ߣߌ߫ ߥߎ߬ߘߊ߲ ߠߋ߬ ߞߊ߲߬ ߓߌ߬ ߞߊ߯ߙߌ ߣߌ߲߬ ߡߊ߬ ߂߀߂߆ ߞߏ߲ߞߏߜߍ ߕߟߋ߬ ߁߅߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊ߫ ߛߏߕߌ߯ߗߍߡߐ߯ ߞߎߘߊ ߟߊߛߌ߱ ߘߌ߫، ߣߵߊ߬ ߦߋ߫ ߝߊ߬ߓߏߙߌ߫ ߡߊ߰ߛߎߓߊ߫ ߘߌ߫߸ ߊ߬ߟߋ ߡߍ߲ ߦߋ߫ ߓߊߟߊ߲ߘߎ߯ ߞߊ߲ߕߍ ߟߎ߬ ߓߊߙߌߣߍ߲ ߘߌ߫، ߊ߬ߟߋ ߟߋ߬ ߞߍߣߍ߲߫ ߛߏߕߌ߯ߗߍߡߐ߯ ߝߌߟߊߣߊ߲߫ ߘߌ߫ ߘߊ߲߬ߞߊ߬ߞߙߐ߫ ߞߣߐ߫߸ ߡߍ߲ ߣߊ߫ ߓߐߣߍ߲߫ ߓߊߟߊ߲ߘߎ߯، ߝߊ߬ߓߏߙߌ߫ ߛߏߕߌ߯ߗߍߡߐ߯ ߞߎߘߊ ߣߌ߲߬ ߠߋ߬ ߦߋ߫ ߘߊ߲߬ߞߊ߬ߞߙߐ߫ ߛߏߕߌ߯ߗߍߡߐ߮ ߞߐ߬ߣߐ߲߬ߘߐ߬ߣߊ߲ ߠߋ߬ ߘߌ߫.
ߊ߬ ߣߊ߬ߣߍ߲߫ ߛߏߕߌ߯ߗߍߡߐ߮ ߡߍ߲ ߣߐ߭ ߘߐ߫߸ ߏ߬ ߟߋ ߦߋ߫ ߞߊ߬ߢߌ߲߬ߓߊ߫ ߡߊ߰ߛߎߓߊ߫ ߘߌ߫߸ ߏ߬ ߡߍ߲ ߝߊߕߏ ߓߘߊ߫ ߞߊߙߏ߫ ߞߋߟߋ߲߫ ߕߟߋ߬ ߕߊ߲߫ ߣߌ߬ ߟߏ߯ߟߎ߫ (߁߅) ߓߐ߫ ߕߋ߲߬، ߛߏߕߌ߯ߗߍߡߐ߯ ߟߊߛߌ߮ ߣߌ߲߬ ߖߊ߲߬ߖߏ߲ ߢߣߊߓߊ߯ߦߊ߫ ߘߊ߫ ߡߐ߰ߘߐ߬ߜߍ߬ ߛߌߦߊߡߊ߲߫ ߠߋ߬ ߓߟߏ߫߸ ߞߊ߬ ߝߘߊ߫ ߛߌ߯ߙߌ߲߫ ߛߏ߫ ߞߣߐߟߊ ߟߊ߫߸ ߊ߬ ߞߌ߲߬ߘߊ߬ ߁߆ ߗߋߘߋ߲ ߣߴߊ߬ ߣߐ߬ߘߎ߯ ߂߆ ߗߋߘߋ߲ ߠߎ߬߸ ߞߵߏ߬ ߟߎ߬ ߟߊ߫ ߛߌ߯ߙߌ߲߫ ߡߊ߬ߞߟߐ ߟߎ߫ ߞߊ߲߬߸ ߡߙߊ߬ߓߊ߮ ߟߊ߫ ߞߐߦߌߘߊ߸ ߞߊ߬ߝߏ߬ߙߋ߲߬߬ߕߌ߮ ߟߊ߫ ߞߐߦߌߘߊ߸ ߞߵߏ߬ ߟߊ߫ ߣߊ߲߬ߕߌ߰ ߝߊ߲ߞߊ ߡߊߡߙߊ߬ߓߊ߮ ߞߊ߲߬߸ ߛߌ߯ߙߌ߲߫ ߕߐ߲ߓߟߏߡߊ߫ ߞߎ߲ߕߌ߮ ߝߣߊ߫ ߞߊ߬ ߖߊ߲߬ߖߏ߲ ߣߌ߲߬ ߢߣߊߓߊ߯ߦߊ߫، ߗߋߘߋ߲ ߠߎ߬ ߓߐ߫ ߘߊ߫ ߡߊ߬ߟߌ ߟߊ߫.
ߞߊ߲ߕߍߘߎ߰ߓߊߟߊ߲ߘߎ߯ ߗߋߘߋ߲ ߞߊ߬ ߞߎߡߊ ߕߊ߬߸ ߊ߬ߟߋ ߡߍ߲ ߕߐ߯ ߞߏ߫ ߣߊ߲ߕߍߣߍ߲߫ ߞߊߙߌߝߊ ߞߊ߲ߕߍ߫߸ ߞߵߊ߬ ߦߌ߬ߘߊ߬ ߞߏ߫ ߒ ߛߍߥߊߣߍ߲ ߠߋ߬ ߞߎߡߊ߫ ߟߊ߫ ߞߵߏ߬ ߛߊߓߎ߫ ߞߍ߫ ߝߊ߬ߓߏߙߌ߫ ߡߍ߲ ߠߊߛߌ߱ ߦߴߌߘߐ߫ ߕߋ߲߬߸ ߏ߬ ߣߴߊ߲ߠߎ߬ ߟߋ߬ ߞߊ߬ ߘߋ߲ߣߍ߲ߦߊ ߞߍ߫ ߞߊ߬ ߘߏ߲߬ߛߏ߬ߦߊ ߞߍ߫ ߞߊ߲ߕߍߘߎ߰ߓߊߟߊ߲ߘߎ߯، ߝߊ߬ߓߏߙߌ߫ ߦߋ߫ ߡߐ߰ ߟߋ߬ ߘߌ߫ ߡߍ߲ ߓߊߙߌ߲ߠߊ ߞߊ߫ ߘߴߊ߬ ߦߋ߫ ߞߊ߬ߦߌ߯ ߞߘߐ߬ߞߘߐ߬ߡߊ߲߫߸ ߏ߬ ߡߊ߫ ߘߊߡߌ߬ߣߊ߬ ߓߌ߬، ߊ߬ ߕߎ߲߬ ߕߍ߫ ߞߊߙߏ ߞߍ߫ ߟߊ߫ ߣߴߊ߬ ߡߊ߫ ߛߋ߫ ߓߊߟߊ߲ߘߎ߯، ߒ߬ߞߊ߬ ߡߊ߬ߣߌ߲߬ߞߊ ߟߎ߬ ߞߊ߲߫ ߞߏ߫ ߞߏ߫ ߟߋ߬ ߛߋ߫ ߟߊ߫ ߡߐ߱ ߡߊ߬߸ ߡߐ߱ ߕߍ߫ ߛߋ߫ ߟߊ߫ ߞߏ߫ ߡߊ߬، ߏ߬ ߟߋ ߓߘߴߊ߬ ߕߎߣߎ߲߫ ߓߊߟߊ߲ߘߎ߯ ߡߊ߬، ߞߏ߬ߣߌ߲߬ ߤߊߟߌ߬ ߊ߬ ߟߊߛߌ߱ ߣߌ߲߬ ߘߐ߫߸ ߊ߬ ߟߊ߫ ߞߋߟߊ ߟߋ߬ ߛߋ߫ ߘߊ߫ ߓߊߟߊ߲ߘߎ߯ ߞߏ߫ ߊ߬ ߞߊߣߊ߬ ߞߍ߫ ߊ߬ߟߎ߬ ߞߐ߫ ߘߋ߬߸ ߏ߬ ߓߍ߯ ߞߎ߲߭ ߠߋ߬ ߓߊ߫ ߓߐߛߟߎ ߓߏ߲߬ߧߊ ߘߌ߫߸ ߓߊߙߌߞߊ ߦߋ߫ ߝߊ߬ߓߏߙߌ߫ ߘߐ߫ ߤߊ߲߫، ߊ߬ ߞߵߏ߬ ߟߋ ߝߐ߫. ߊ߬ ߞߵߊ߬ ߟߴߊ߬ ߞߊ߲߬ ߝߣߊ߫ ߞߏ߫ ߓߊߟߊ߲ߘߎ߯ߞߊ ߟߎ߬ ߡߊ߫ ߕߏ߫ ߛߌ߰ ߘߐ߫߸ ߞߏ߫ ߊ߬ߟߎ߬ ߛߌߦߊߡߊ߲߫ ߠߋ߬ ߣߊ߬ߣߍ߲߫. ߣߊ߲ߕߍߣߍ߲߫ ߞߊߙߌߝߊ ߞߊ߲ߕߍ߫ ߟߋ߬ ߞߊ߲߫ ߦߋ߫ ߕߋ߲߬.
ߛߌ߯ߙߌ߲߫ ߛߏߕߌ߯ߗߍߡߐ߮ ߟߊ߰ߖߌ߬ ߘߙߊ߬ߡߊߣߌ߬ ߡߊ߰ߛߎߓߊ߫ ߝߣߊ߫ ߞߎߡߊ߫ ߘߊ߫، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߡߍ߲ ߝߐ߫ ߟߊ߫ ߝߊ߬ߓߏߙߌ߫ ߦߋ߫ ߊ߬ ߦߴߊ߬ ߘߐߖߊ߬ ߛߏ ߦߋ߫ ߓߍ߲߬߸ ߊ߬ ߦߴߊ߬ ߘߐߖߊ߬ ߛߌ߯ߙߌ߲߫ ߦߋ߫ ߓߍ߲߬߸ ߊ߬ ߞߊߣߊ߬ ߊ߬ ߕߟߏߡߊߟߐ߬ ߘߏ߲߬ߒ߬ߞߘߐ߬ߓߐߒߞߘߐ ߟߎ߬ ߟߊ߫ ߛߏ߫ ߕߋ߫ ߞߊ߲ ߠߊ߫، ߓߌ߬߸ ߘߏ߬ߣߌ߲߬ߓߊ߫ ߓߘߊ߫ ߛߌ߰ ߊ߬ ߞߎ߲߬ ߘߍ߫߸ ߏ߬ ߘߐ߫ ߒ ߘߌ߫ ߡߍ߲ ߦߌ߬ߘߊ߬ ߝߊ߬ߓߏߙߌ߫ ߟߊ߫߸ ߊ߬ ߦߴߊ߬ ߡߎ߬ߢߎ߲߫ ߊ߬ ߦߋ߫ ߛߏ ߟߊߘߊ߲߫ ߊ߬ ߦߋ߫ ߘߊ߲߬ߞߊ߫ ߟߊߘߊ߲߫، ߛߌ߯ߙߌ߲߫ ߛߏߕߌ߯ߗߍߡߐ߮ ߟߋ߬ ߞߊ߲߫ ߕߋ߲߬، ߊ߬ ߞߊ߬ ߛߏߕߌ߯ߗߍߡߐ߯ ߞߎߘߊ߫ ߝߊ߬ߓߏߙߌ߫ ߥߟߋ߫ ߓߍ߲߭ ߡߊ߬ ߞߍߞߋߟߋ߲ߘߌߦߊ ߡߊ߬، ߊ߬ ߞߵߊ߬ ߝߐ߫ ߏ߬ ߘߐ߫ ߞߏ߫ ߊ߬ߟߎ߬ ߦߋ߫ ߘߍ߬ ߞߵߊ߬ߟߎ߫ ߛߋ߲߭ ߘߏ߲߬ ߥߏ߬ߘߊ߬ ߞߋߟߋ߲߫ ߠߊ߫، ߊ߫߬ߟߎ߬ ߦߴߊ߬ߟߎ߬ ߡߙߌ߫ ߊ߬ߟߎ߬ ߝߊ߬ ߕߐ߮ ߡߊ߬ ߓߋ߲ߓߊ߫ ߕߐ߮ ߡߊ߬، ߊ߬ ߕߌ߲ߞߌ߫ ߘߊ߫ ߝߊ߬ߓߏߙߌ߫ ߦߋ߫ ߞߏ߫ ߊߟߊߡߊ߬ ߊ߬ ߦߋ߫ ߛߋ߫ ߊ߬ ߟߊ߫ ߘߏ߬ߣߌ߲ ߞߘߐ߫.
ߝߊߘߌߡߊ߫ ߡߎߛߊ ߡߊ߰ߛߎߓߊ ߞߎߡߊ߫ ߘߊ߫߸ ߊ߬ߟߋ ߡߍ߲ ߦߋ߫ ߞߟߌ߫ ߟߊ߫ ߓߍ߯ ߓߟߏ߫ ߞߏ߫ ߘߊ߲߬ߞߊ߬ ߡߎߛߊ߫، ߊ߬ߟߋ ߡߍ߲ ߞߍ߫ ߘߊ߫ ߖߊ߲߬ߖߏ߲ ߝߊ߬ߓߘߍ ߘߌ߫، ߊ߬ ߞߊ߲߫ ߞߏ߫ ߒߠߋ ߛߍߥߊߣߍ߲߫ ߠߋ߬߸ ߓߊߏ߬ ߒ ߓߊߙߌ߲߫ ߠߋ߬ ߟߊߛߌ߰ߣߍ߲߫، ߊ߬ ߟߊߛߌ߱ ߖߊ߲߬ߖߏ߲ ߣߌ߲߬߬ ߢߐ߲߰ ߘߏ߲߬ ߕߌ߲߬ ߡߊ߫ ߞߍ߫ ߦߊ߲߬ ߡߎߣߎ߲߬ ߓߊ߲߫߸ ߏ߬ ߘߐ߫ ߣߴߊ߲ ߞߊ߬ ߓߏ߲߬ߧߊ ߣߌ߲߬ ߦߋ߫߸ ߊ߬ ߥߙߊ߬ߣߍ߲߫ ߠߋ߬ ߊ߲ ߤߊ߲ߞߟߌ ߡߊ߬߸ ߊ߲ ߛߍߥߊߣߍ߲߫ ߠߋ߬، ߓߊߏ߬߸ ߊ߲ ߛߌ߰ߢߐ߲߮ ߣߴߊ߲ ߓߊߘߋ߲ ߠߎ߬ ߞߵߊ߲ ߡߊߜߍ߲߫߸ ߡߊ߬ߜߍ߲ ߏ߬ ߟߎ߬ ߞߍߣߍ߲߫ ߣߛߌ߬ ߕߊ߲߫ ߞߵߏ߬ ߟߊ߫ ߛߊ߰ ߥߐ߯ߙߐ߫ ߞߊ߲߬߸ ߣߊ߲߬ߝߟߏ ߘߊ߲߬ ߕߴߏ߬ ߟߊ߫، ߘߊ߲߬ߞߊ߬ ߡߎߛߊ߫ ߟߋ߬ ߞߊ߲߫ ߕߋ߲߬، ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߊ߲ ߡߊ߫ ߛߊߣߌ߲߫ ߘߴߏ߬ ߟߎ߫ ߡߊ߬߸ ߊ߲ ߡߊ߫ ߣߊ߲߬ߝߟߏ߬ ߘߴߏ߬ ߟߎ߫ ߡߊ߬߸ ߏ߬ ߟߎ߬ ߞߵߏ߬ ߞߍ߫ ߡߐ߰ߦߊ ߣߌ߫ ߟߊ߲߬ߓߋ ߟߋ߬ ߞߏߛߐ߲߬، ߊ߲ ߘߴߊ߬ ߦߌ߬ߘߊ߬ ߊ߬ߟߎ߬ ߟߊ߫߸ ߞߏ߫ ߊ߲ ߓߘߴߊ߬ ߞߊ߬ߙߌ߬ߝߊ߬ ߓߍ߯ ߟߊ߫߸ ߛߌ߰ߢߐ߲߮ ߟߎ߬ ߣߌ߫ ߓߊߘߋ߲ ߠߎ߬ ߞߊ߬ߣߌ߲߫، ߊ߬ߟߎ߬ ߓߊ߯ ߝߍ߭ ߡߍ߲ ߦߴߊ߲ ߠߊ߫߸ ߊ߬ߟߎ߬ ߦߴߊ߲ ߘߍ߬ߡߍ߲߫ ߏ߬ ߘߊ߲ߘߊ߫ ߟߊ߫ ߖߊ߰ߣߌ߲߬، ߞߊ߬ߡߊߛߐ߬ߘߐ߲߬ ߌ ߓߊ߯ ߓߊ߲߫ ߛߌ߰ ߟߊ߫ ߖߊ߬ߡߊ ߞߎ߲߬ߠߊ߫߸ ߌ ߓߘߊ߫ ߞߍ߫ ߖߊ߬ߡߊ ߟߊ߫ ߖߐ߲߭ ߘߌ߫߸ ߌߟߋ ߕߊ߫ ߕߴߌ ߖߘߍ߬ ߘߌ߫ ߏ߬ ߞߐ߫ ߌ ߛߊ߬ߥߏ߬ ߕߴߌ ߖߘߍ߬ ߘߐ߫ ߏ߬ ߞߐ߫߸ ߏ߬ ߘߐ߫ ߊ߲ ߠߊ߫ ߟߊ߬ߢߌߣߌ߲ ߦߋ߫ ߡߍ߲ ߘߌ߫ ߓߌ߬߸ ߞߵߊ߬ ߦߌ߬ߘߊ߫ ߣߊ߬ߓߊ߮ ߣߌ߫ ߛߌ߰ߓߊ߮ ߟߊ߫ ߏ߬ ߟߋ ߣߌ߲߬ ߘߌ߫، ߊ߲ ߓߊߘߋ߲ ߝߋ߲ ߺ ߋ ߺ ߝߋ߲߫ ߣߊ߬ߣߍ߲߫߸ ߊ߲ ߠߊ߫ ߝߏ߬ߟߌ ߦߋ߫ ߛߋ߫ ߟߴߊ߬ ߓߍ߯ ߡߊ߬، ߘߊ߲߬ߞߊ߬ ߡߎߛߊ߫ ߟߋ߬ ߞߊ߲߫ ߕߋ߲߬.
ߛߏߕߌ߯ߗߍߡߐ߯ ߞߎߘߊ߸ ߊ߬ߟߋ ߡߍ߲ ߕߐ߯ ߞߏ߫ ߝߊ߬ߓߏߙߌ߫߸ ߊ߬ ߞߵߊ߬ ߞߙߊ ߟߊߡߊ߰ ߟߊ߬ߘߍ ߣߌ߲߬ ߞߣߍ ߞߊ߲߬߸ ߞߵߊߟߊ߫ ߕߊ߲߬ߘߏ߬ ߞߊ߬ ߕߊ߲߬ߘߏ߬ߟߌ ߟߊߛߋ߫ ߘߊ߲߬ߞߊ߫ ߡߐ߰ߓߊ߬ߞߎ߲߬ ߟߏ߯ߟߎ ߡߊ߬߸ ߛߌ߯ߙߌ߲߫ ߡߐ߰߰ߓߊ߬ߞߎ߲߬ ߟߏ߯ߟߎ ߡߊ߬߸ ߊ߬ ߣߌ߫ ߣߊ߬ߓߊ߮ ߟߎ߫ ߡߊ߬، ߊ߬߬ ߓߊ߲߫ ߓߘߊ߫ ߞߵߊ߬ ߦߌ߬ߘߊ߬ ߛߌ߯ߙߌ߲߫ ߛߏߕߌ߯ߗߍߡߐ߮ ߟߊ߫ ߞߏ߫ ߊ߬ ߦߴߊ߬ ߖߊ߲߬ߕߏ߬ ߊ߬ ߘߐ߫߸ ߓߊߏ߬߸ ߊ߬ ߦߴߊ߬ ߢߍ߫ ߛߏߕߌ߯ߗߍߡߐ߯ߦߊ߫ ߞߏ ߘߐ߫، ߊ߬ ߞߊ߬ ߖߊ߬ߡߊ ߟߐ߬ ߡߎ߬ߢߎ߲ ߠߊ߫ ߕߋߟߋ߲ ߠߊ߫، ߞߏ߫ ߊ߬ߟߎ߬ ߦߋ߫ ߘߏ߲߬ ߞߋߟߋ߲ߘߌ߫ ߞߊ߬ ߓߐ߫ ߞߋߟߋ߲ߘߌ߫߸ ߞߏ߫ ߊ߬ߟߋ ߦߴߏ߬ ߟߋ ߝߍ߬، ߊ߬ ߞߵߊ߬ ߞߊ߲ߠߊߘߌ߫ ߝߘߎߢߐ߲߮ ߠߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߫ ߖߊ߲߬ߕߏ߬ ߊ߬ ߘߐ߫߸ ߞߏ߫ ߊ߬ ߓߏߙߌ߲ߠߞߊ ߟߎ߬ ߟߊ߫ ߞߎߡߊ ߓߊ߲ߣߍ߲߫ ߠߋ߬، ߊ߬ ߞߊ߬ ߟߐ߬ߟߌ ߞߍ߫ ߝߊ߭ ߟߎ߬ ߞߐߛߌߟߊ ߟߊߥߙߎߞߌ ߟߊ߫߸ ߊ߬ ߣߌ߫ ߛߐ߲߭ ߘߐ߫ ߝߊ߭ ߟߎ߫ ߝߏ߲߬ߝߏ߲ ߡߊ߬߸ ߞߊߕߙߍ߬ߕߍ߫ ߓߟߏߘߌߢߐ߲߰ߡߊ ߡߊ߬، ߊ߬ ߞߊ߬ ߝߏ߬ߟߌ ߟߊߛߋ߫ ߛߣߍߓߊ߮ ߓߍ߯ ߡߊ߬.
ߓߙߊߓߐ ߞߍ߫ ߘߊ߫ ߛߏߕߌ߯ߗߍߡߐ߯ ߟߊߛߌ߮ ߣߌ߲߬ ߘߐ߫، ߏ߬ ߡߍ߲ ߓߙߊߐߓߐߟߊ߫ ߝߟߐ ߞߍ߫ ߘߊ߲߬ߞߊ߬ ߒߞߏ ߞߊߙߊ߲ߠߊ ߟߎ߬ ߘߌ߫߸ ߏ߬ ߟߎ߫ ߞߊ߬ ߛߎߡߊߏߙߏ߫ ߣߌ߫ ߛߏ߲߬ߖߘߊ߬ ߟߊ߫ ߛߌ߯ߝߟߌ ߟߊߘߍ߲߰ ߢߣߊߓߊ߮ ߟߎ߬ ߢߣߊ߫ ߘߊߘߐߥߛߊ ߣߌ߫ ߝߊߘߌ߲ߧߊ߫ ߞߊ߲߫ ߝߐ ߘߐ߫، ߕߊ߬ߡߊ߲߬ߕߌ߮ ߣߌ߫ ߖߋ߲߬ߓߋ߬ߝߐ߬ߟߊ ߟߎ߬ ߕߌ߲߬ ߦߋ߫ ߞߣߍ ߞߊ߲߬، ߡߊ߲߬ߘߋ߲߫ ߖߋ߬ߟߌ ߟߎ߬ ߝߣߊ߫ ߕߌ߲߬ ߦߋ߫ ߞߏߘߐߜߍ߫ ߞߍߟߊ ߘߐߓߏ߲߫ ߠߊ߫ ߘߐ߲߬ߞߟߌ߬ ߘߌߡߊ߲ ߣߌ߫ ߡߊ߬ߕߐ߰ߟߌ߬ ߞߊ߲ ߠߎ߬ ߟߊ߫، ߘߏ߲߬ߛߏ߬ ߞߐ߯ߣߍ߲ ߠߎ߬ ߣߌ߫ ߛߏߡߊ ߟߎ߬ ߝߣߊ߫ ߕߎ߲߬ ߦߋ߫ ߘߐ߲߭ ߘߐ߫.
ߌߓߌߙߊߤߌߡ ߝߙߊ߬ߓߊ ߞߡߊ߬ߙߊ ߣߌ߫ ߊ߬ߟߌ ߞߙߊ߬ߞߐ߬ߞߊ ߞߊ߬ߟߐ ߟߊ߫ ߞߊ߲߬ߞߎߡߊ ߟߋ߬ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫
