ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬ ߂߀߂߆ ߞߏ߲ߞߏߜߍ ߕߟߋ߬ ߁߆ ߣߌ߲߬ ߡߊ߬߸ ߡߊ߲߬ߞߊ߲ ߠߋ߬ ߕߎ߲߬ ߦߴߌߘߐ߫ ߞߊ߲ߞߊ߲߫ ߞߣߐ߫߸ ߡߌߛߌ߬ߙߊ߲߬ ߛߌߟߓߊ߫ ߥߎߟߋ߲ ߞߊ߲߬، ߞߊ߬ߕߎ߲߯߸ ߛߐ߰ߡߘߊ߬ ߖߏߣߊ ߟߋ߬ ߟߊ߫߸ ߡߌߛߌ߬ߙߊ߲߬ ߓߕߎߙߎ߲߫ ߣߌ߫ ߡߌߛߌ߬ߙߊ߲߬ ߛߌߕߊߞߙߎ߫߸ ߝߊߦߌߘߊ߫߸ ߡߌߛߌ߬ߙߊ߲߫ ߞߌ߲߬ߘߊ ߡߍ߲ ߠߎ߬ ߦߋ߫ ߛߌߟߓߊ߫ ߥߎߟߋ߲ ߝߍ߬߸ ߏ߬ ߟߎ߬ ߡߐߣߡߍߣߍ߲ߕߐ ߟߋ߬ ߥߟߌ߬ ߘߊ߫ ߞߊ߬ ߦߙߌ߫ ߞߎߘߎ߲ ߠߎ߬ ߟߊ߫ ߛߌߟߊ ߘߐ߫߸ ߞߏ߫ ߓߊ߯ߙߊ ߓߘߊ߫ ߡߍ߲߫ ߛߋ߲߬ߠߊ߫߸ ߢߊ߫ ߕߍ߫ ߦߋ߫ ߟߊ߫ ߞߏ߫ ߡߊ߬، ߔߊߞߌߛߦߊߟߊ ߟߎ߬ ߟߊ߫ ߝߐߟߌ߫ ߘߐ߫߸ ߛߌߟߊ߫ ߓߊ߯ߙߊ ߣߌ߲߬ ߛߊ߲߭ ߛߊ߬ߓߊ ߟߋ߬ ߛߋ߲߬ߠߊ߫ ߕߋ߲߬߸ ߊ߬ ߞߢߊ߬ߣߍ߲߬ ߟߊߓߊ߲߫ ߠߊ߫، ߊ߬ ߓߊ߯ߙߊ ߦߋ߫ ߖߌߕߍߙ ߞߏߟߊߘߍ ߟߋ߬ ߓߟߏ߫، ߊ߬ߟߎ߬ ߞߊ߲߫ ߞߏ߫ ߛߌߟߊ ߡߊ߲߬ߕߙߐ ߟߋ߬ ߛߋ߫ ߟߴߊ߬ߟߎ߫ ߡߊ߬ ߓߌ߬߸ ߞߊ߬ ߕߊ߬ߡߌ߲߫ ߡߊ߲߬ߤߙߍ ߞߊ߲߬.
ߦߊ߬ߞߎߓߊ߬ ߖߊߟߏ߫߸ ߏ߬ ߞߵߊ߬ ߡߙߌߦߊ ߘߌ߫ ߣߌ߲߬ ߞߏ ߞߊ߲߬:
<<ߊ߲ ߡߊ߫ ߓߐ߫ ߊ߬ ߘߌߦߊߡߊ߬ ߞߊ߲߬ ߘߋ߬، ߊ߬ ߛߊ߲߭ ߛߊ߬ߓߊ ߟߋ߬ ߕߋ߲߬߸ ߓߊ߯ߙߊ߫ ߞߋߟߋ߲ ߣߌ߲߬ ߦߋ߫ ߛߋ߲߬ߠߊ߫߸ ߊ߬ ߕߍ߫ ߟߌ߬ߤߟߊ߬ ߢߌߡߊ߫ ߘߐ߫، ߟߏ߲ ߓߍ߯߸ ߥߎ߬ߙߊ ߓߊ߯ ߛߋ߫ ߦߊ߲߬߸ ߝߊ߬ߣߴߌ ߞߵߌ ߟߊ߫ ߛߎߡߐ߬ߡߐ ߟߊߡߍߣߍ߲߫߸ ߣߴߏ߬ ߕߍ߫ ߊߟߎ߫ ߕߍ߫ ߢߐ߲߮ ߦߋ߫ ߜߊ߲߬ߜߊ߲ ߓߟߏ߫، ߤߊߟߌ߬ ߕߋ߬ߟߋ ߥߊ߯ߕߌ ߘߏ߫ ߟߎ߫ ߦߋ߫ ߞߍ߫ ߟߊ߫ ߦߊ߲߬߸ ߝߏ߫ ߣߴߌ ߞߊ߬ ߛߎߡߐ߬ߡߐ ߟߋ߬ ߟߊߡߍߣߍ߲߫، ߊ߲ ߘߋ߲ ߠߎ߬ ߦߋ߫ ߓߋ߬ ߟߊ߫ ߘߋ߲߬ߞߊ߬ߞߎߘߎ߲߫ ߛߋ߲߬ߣߍ߲ ߠߎ߬ ߞߣߐ߫߸ ߏ߬ ߟߎ߫ ߓߌ߬ߟߊ߬ߣߍ߲߫ ߦߋ߲߬ ߕߋ߲߬ ߢߊ߫ ߕߴߊ߬ߟߎ߬ ߘߐ߫، ߊ߲ ߓߘߊ߫ ߟߊ߬ߛߏ߬ߓߌ߬ߟߌ ߞߍ߫ ߛߋ߲߬ߢߊ߬ ߦߙߌߞߊ߫߸ ߓߊ߬ߙߌ߬ ߦߟߍ߬ߡߊ߲߬ ߛߌ߫ ߕߍ߫ ߘߏ߲߬ ߠߊ߫ ߞߏ ߟߎ߬ ߘߐ߫، ߓߌ߬ ߡߍ߲ ߓߌ߬ ߘߌ߫߸ ߊ߲ ߡߍ߲ ߢߌߣߌ߲߫ ߠߊ߫߸ ߏ߬ ߟߋ ߓߊ߯ߙߊ ߕߊ߭ ߘߌ߫ ߛߓߍ߬ ߟߊ߫߸ ߛߊ߫ ߘߏ߫ ߘߌ߫ ߓߐ߫ ߊ߲ ߠߊ߫ ߕߙߐߦߊ ߢߌ߲߬ ߠߊ߫ ߛߍߣߍ߲߬.>>
ߦߋ߲߬ ߛߌ߰ߓߊ߰ ߜߘߍ߫ ߝߣߊ߫ ߓߍ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߌߟߊ߫ ߞߏ ߣߌ߲߬ ߓߘߊ߫ ߞߍ߫ ߛߍ߱ ߘߌ߫ ߡߛߌߙߊ߲ߞߊ ߟߎ߫ ߞߊ߲߬، ߊ߬ ߛߐ߰ ߘߊ߫ ߞߟߌߟߌ ߟߊߛߋ ߟߋ߬ ߡߊ߬ ߞߊ߲ߕߌ߮ ߞߊ߲ߞߊ߲߫ ߝߊ߰ߡߊ ߟߎ߫ ߡߊ߬ ߡߎߣߎ߲߬߸ ߞߵߊ߬ ߟߐ߲߫ ߞߏ߫ ߊ߬ߟߎ߫ ߛߍ߰ߣߍ߲߬ ߞߏߛߓߍ߫.
<<ߊ߲ ߧߴߊ߲ ߘߡߊߞߊ߬ߛߌ߬ ߟߊ߫ ߞߎ߲߬ߠߊ߬ߛߌ߮ ߦߋ߫߸ ߞߵߊ߲ ߘߡߊߞߊ߬ߛߌ߬ ߊ߲ ߠߊ߫ ߞߊ߬ߝߏ߬ߙߋ߲߬ߕߌ߮ ߦߋ߫߸ ߊ߬ߟߎ߬ ߦߴߊ߬ ߟߐ߲߫ ߞߊ߬ ߝߐ߬ ߞߏ߫ ߡߛߌߙߊ߲ߞߊ ߟߎ߬ ߕߙߐߣߍ߲߫߸ ߜߊ߲߬ߜߊ߲ ߓߘߴߊ߲ ߓߐ߫، ߊ߲ ߘߋ߲ ߠߎ߬ ߖߊ߲߬ߞߊ߬ߙߏ߬ߣߍ߲߬߸ ߡߐ߱ ߟߎ߬ ߦߋ߫ ߓߋ߬ ߟߊ߫ ߘߋ߲߬ߞߊ ߞߣߐ߫߸ ߔߏߔߏߕߌ߮ ߟߎ߬ ߦߋ߫ ߓߋ߬ ߟߴߊ߬ ߞߣߐ߫، ߊ߬ߟߎ߬ ߓߘߊ߫ ߣߊ߬ ߘߋ߲߬ߞߊ߬ߞߎߘߎ߲߫ ߘߟߊߞߏߟߏ߲ ߓߌ߬ߟߊ߫ ߦߊ߲߬ ߕߋ߲߬߸ ߘߊߕߎ߲߯ ߕߴߊ߬ ߟߊ߫، ߕߙߐߦߊ ߦߴߊ߲ ߞߊ߲߬ ߞߏߛߓߍ߫، ߊ߲ ߓߐߣߍ߲߫ ߏ߬ ߟߋ ߘߐ߫߸ ߞߵߊ߲ ߘߡߊߞߊ߬ߛߌ߬߸ ߞߎ߲߬ߠߊ߬ߛߌ߮ ߦߴߊ߬ ߟߐ߲߫ ߞߏ߫ ߊ߲ ߓߘߊ߫ ߛߍ߰.>>
ߛߌߟߊ߫ ߓߊ߫ߙߊ ߟߊߣߐ߮ ߖߌߕߍߙ ߓߟߏ߫ ߣߌ߲߬ ߢߊ߸ ߖߡߊ߬ߣߊ߬ߘߋ߲ ߘߏ߫ ߟߎ߫ ߓߘߴߊ߬ ߦߌ߬ߘߊ߬ ߞߏ߫ ߊ߬ ߓߘߊ߫ ߓߐ߬ߣߐ ߟߊߘߏ߲߬ ߊ߬ߟߎ߫ ߞߎ߲߬ ߞߏߛߓߍ߫.
<<ߌ ߓߴߌ ߟߊ߫ ߝߎ߲ߞߎ߲ ߘߊ ߟߊߞߊ߬߸ ߊ߬ ߞߣߐߟߊ ߘߌ߫ ߟߝߊ߫ ߜߊ߲߬ߜߊ߲ ߠߊ߫، ߛߊ߲߬ߠߌ߲߬ߠߊ ߟߎ߬ ߦߴߊ߬ߟߎ߬ ߡߊߞߊ߬ߛߌ ߞߊ߲߬߸ ߝߏ߫ ߘߏ߫ ߟߎ߫ ߖߍ߬ߘߍ ߘߴߊ߬ߟߎ߫ ߓߊ߲߬ ߛߊ߲߬ߠߌ߲߬ ߞߏ ߡߊ߬ ߜߊ߲߬ߜߊ߲ ߞߏߛߐ߲߬، ߊ߲ ߓߣߐ߬ ߟߴߊ߲ ߠߊ߫ ߛߊ߲߬ߠߌ߲߬ߠߊ ߟߎ߬ ߟߊ߫ ߟߋ߬ ߛߐ߲߬، ߤߊߟߌ߬ ߛߌߟߊ ߣߌ߲߬ ߡߊߛߐ߫ ߖߌ ߟߊ߫ ߜߊ߲ߛߊ߲߫߸ ߖߌߕߍߙ ߕߴߛߋ߫ ߟߴߏ߬ ߞߍ߫ ߟߴߊ߬ ߢߊ ߡߊ߬، ߣߌ߫ ߖߌߕߍߙ ߞߏ߬ߣߌ߲ ߞߵߊ߬ ߟߐ߲߫ ߞߏ߫ ߊ߬ ߕߴߛߋ߫ ߓߊ߫ߙߊ ߢߌ߲߬ ߠߞߊߟߌߦߊ߫ ߟߊ߫߸ ߊ߬ ߦߴߊ߬ ߓߌ߬ߟߊ߫ ߞߊ߬ ߓߊ߯ߙߊ ߘߌ߫ ߡߐ߰ ߜߘߍ߫ ߡߊ߬.>>
ߖߡߊ߬ߓߊ߫ ߟߋ߬ ߓߐ߫ ߘߊ߫ ߔߊߞߌߛߦߊ ߣߌ߲߬ ߘߐ߫߸ ߏ߬ ߟߋ ߞߏߛߐ߲߬߸ ߞߊ߲ߞߊ߲߫ ߡߙߊ߬ߓߊ߮ ߣߌ߫ ߞߊ߬ߝߏ߬ߙߋ߲߬ߕߌ߮ ߡߊ߫ ߛߋ߫ ߕߏ߫ ߟߊ߫ ߛߌ߰ ߘߐ߫، ߡߙߊ߬ߓߊ߮ ߞߊ߬ ߟߊ߬ߤߘߌ ߕߊ߬ ߞߏ߫ ߞߊ߬ߝߏ߬ߙߋ߲߬ߕߌ߮ ߣߌ߫ ߖߌߕߍߙ ߘߌ߫ ߞߎߡߊ߫߸ ߛߌߟߊ ߘߌ߫ ߡߊߛߐ߫ ߖߌ ߟߊ߫ ߕߋ߬ߟߋ ߞߘߐ߫ ߛߋ߲߬ߢߊ߫ ߛߓߊ߬:
<<ߊߟߎ߫ ߦߋ߫ ߥߟߌ߫ ߟߊ߫ ߕߎ߬ߡߊ ߡߍ߲ ߠߊ߫߸ ߏ߬ ߦߴߊ߬ ߛߐ߬ߘߐ߲߬ ߖߌ ߓߘߊ߫ ߞߍ߫، ߖߋ߲ߖߋ߲ ߥߟߊ߫ ߕߊ߲ߣߌߣߊ߯ߣߌ߲ߙߋ߲߸ ߖߌ ߦߋ߫ ߞߍ߫߸ ߥߎ߬ߙߊ ߝߍ߬ ߝߣߊ߫ ߞߵߊ߬ ߡߊߛߐ߫.>> ߏ߬ ߘߌߦߊ߫ ߘߊ߫ ߖߊ߬ߡߊ ߦߋ߫ ߞߏߛߓߍ߫߸ ߝߏ߫ ߞߊ߬ ߓߍ߯ ߟߐ߬ ߕߍ߯ߝߐ ߟߊ߫.
ߞߊ߬ ߞߐ߲߰ ߊ߬ߟߋ ߟߊ߫ ߞߎߡߊ ߏ߬ ߢߍ߫߸ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮߸ ߊ߬ߙߊ߬ߝߊ߲߬ ߡߎߛߊ߫ ߞߎ߬ߟߌߓߊ߬ߟߌ߫ ߞߊ߬ ߖߊ߬ߡߊ ߡߛߊߓߊߙߌ߫.
<<ߊߟߎ߫ ߟߊ߫ ߞߌ߲߬ߕߌ߮ ߣߊ߬ ߘߊ߫ ߒ ߦߋ߫ ߓߌߟߏ߲߫ ߕߊ߬ߡߌ߲߬ߣߍ߲߸ ߞߵߊ߬ ߓߍ߲߬ ߛߌߟߊ߫ ߞߏ ߣߌ߲߬ ߡߊ߬، ߒ ߝߣߊ߫ ߞߊ߬ ߖߌߕߍߙ ߓߊ߯ߙߊߞߍߟߊ ߟߎ߬ ߟߊ߫ ߞߎ߲߬ߕߌ߮ ߞߟߌ߫߸ ߞߏ߫ ߊ߬ ߦߋ߫ ߦߙߐ߫ ߡߊߛߐ ߘߊߡߌ߬ߣߊ߬߸ ߊ߬ ߘߏ߲߬ ߞߵߏ߬ ߟߊ߬ߤߘߌ ߕߊ߬ ߒ ߧߋ߫ ߞߏ߫ ߊ߬ ߘߌ߫ ߞߍ߫، ߡߍ߲ ߓߐ߫ ߘߊ߫ ߒ ߞߐߝߍ߬ ߏ߬ ߞߏ ߘߐ߫߸ ߞߎ߲߬ߠߊ߬ߛߌ߰ߟߊ ߟߋ߬ ߞߊ߬ ߒ ߞߟߌ߫ ߛߐ߱ ߢߌ߲߬ ߡߊ߬߸ ߞߵߊ߬ ߝߐ߫ ߒ ߧߋ߫ ߞߏ߫ ߛߌߟߊ ߓߘߊ߫ ߕߍ߰ ߦߊ߲߬، ߒ ߣߊ߭ ߡߍ߲ ߞߍ߫ ߘߊ߫ ߦߊ߲߬߸ ߒ ߞߵߊ߬ ߞߟߌ߫ ߞߏߞߎߘߊ߫، ߊ߬ ߞߊ߲߫ ߞߏ߫ ߊ߬ ߦߋ߫ ߛߌߟߊ߲߫ ߠߊ߫ ߟߋ߬߸ ߖߊ߬ߡߊ ߞߊߣߊ߬ ߡߐߣߍ߫ ߊ߬ ߡߊ߬ ߞߊ߬ ߝߛߏ߬ߝߛߊ ߟߊߘߏ߲߬، ߏ߬ ߘߐ߫߸ ߒ ߧߴߊߟߎ߫ ߡߊߘߌߦߊ߫ ߟߊ߫߸ ߛߴߊ߬ ߘߌ߫ ߦߙߐ߫ ߡߊߛߐ ߏ߬ ߘߊߡߌ߬ߣߊ߬ ߢߊ ߡߍ߲ ߡߊ߬߸ ߛߐ߱ߡߊ߬ ߣߌ߫ ߥߎ߬ߙߊ، ߓߊ߯ߙߊ ߘߏ߲߬ ߘߌ߫ ߟߊߓߊ߲߫ ߝߣߊ߫، ߝߊ߰ߡߊ ߟߎ߬ ߓߘߴߊ߬ ߝߐ߫ ߞߊ߬ ߓߊ߲߫߸ ߞߏ߫ ߥߊߟߌߘߊ ߓߍ߯ ߦߴߊ߬ ߞߊߘߊ߲߫ ߞߵߊ߬ ߟߊ߫ ߓߊ߯ߙߊ߫ ߟߊߓߊ߲߫، ߊ߲ ߘߴߊߟߎ߫ ߘߍ߬ߡߍ߲߬߸ ߞߵߊߟߎ߫ ߓߐ߫ ߕߙߐߦߊ ߣߌ߲߬ ߘߐ߫ ߦߊ߲߬߸ ߞߊ߬ ߞߎߡߊ ߟߊߛߋ߫ ߡߐ߰ ߟߎ߫ ߡߊ߬߸ ߡߍ߲ ߠߎ߬ ߣߴߊ߬ ߞߊ߫ ߞߊ߲߫.
ߝߊߦߌߘߊ߫߸ ߏ߬ ߟߋ ߞߍ߫ ߘߊ߫ ߛߌߟߊ ߟߊߞߊ߬ߣߍ߲ ߘߌ߫߸ ߞߊ߬ ߦߙߐ ߘߐߛߎߡߊ߫، ߊ߬ߟߎ߫ ߞߏ߬ߣߌ߲ ߞߵߊ߬ ߦߌ߬ߘߊ߬߸ ߞߏ߫ ߦߙߐ߫ ߡߊߛߐ ߏ߬ ߢߊ߬ߞߏ߬ ߕߴߊ߬ߟߎ߬ ߕߊ ߣߌ߲߬ ߘߐ߫߸ ߊ߬ߟߎ߫ ߡߊ߬ߞߏ ߦߋ߫ ߓߊ߯ߙߊ ߟߊߓߊ߲ ߠߋ߬ ߟߊ߫߸ ߞߊ߬ ߘߋ߲߬ߞߊ߫ ߛߋ߲߬ߣߍ߲ ߠߎ߬ ߘߟߊߝߊ߰، ߓߊߏ߬߸ ߖߌߕߍߙ ߕߴߛߋ߫ ߟߊ߫ ߤߊߟߌ߬ ߞߊ߬ ߛߌߟߊ߫ ߝߘߊ߫ ߖߐ߲ߖߐ߲ ߠߋ߬ ߘߴߊ߬ߟߎ߫ ߡߊ߬ ߡߎߣߎ߲߬߸ ߛߊ߲߭ ߛߊ߬ߓߊ ߣߌ߲߬ ߞߣߐ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
