ߖߌ߬ߣߍ߬ ߛߎ߲ߞߊߙߏ ߕߟߋ߬ ߝߟߐ ߟߋ߬ ߓߍ߲߬ߕߐ߫ ߂߀߂߆ ߞߏ߲ߞߏߜߍ ߕߟߋ߬ ߁߈ ߣߌ߲߬ ߡߊ߬߸ ߏ߬ ߡߍ߲ ߓߍ߲߬ߣߍ߲߫ ߞߎߣߎ߲ߟߏ߲ ߡߊ߬ ߞߊ߬ߣߌ߲߬، ߟߊ߬ߛߋ߬ߟߌ ߣߌ߲߬ ߞߍ߫ ߘߊ߫ ߛߎ ߢߌ߲߬ ߠߋ߬ ߘߐ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ߬ߓߊ ߟߊ߫߸ ߡߍ߲ ߠߊߛߋ߫ ߘߊ߫ ߘߌ߯ߣߊ ߞߏߢߊ ߟߎ߬ ߝߘߏ߬ߓߊ߬ ߞߟߊ߬ߕߌ߮ ߖߘߍ߬ߓߊ߬ߞߎ߲ ߓߟߏ߫߸ ߞߊ߬ߙߊ߲߬ߡߐ߮ ߖߊߥߙߊ߫߸ ߞߵߊ߬ ߦߌ߬ߘߊ߬ ߞߏ߫ ߞߊߙߏ߫ ߢߌߣߌ߲ ߥߛߊ߬ߓߊ߰ߦߊ ߡߍ߲ ߠߊߘߊ߲߫ ߘߊ߫ ߞߵߊ߬ߟߎ߬ ߟߊߛߌ߰ ߖߡߊ߬ߣߊ ߝߊ߲߬ ߛߌߦߊߡߊ߲߫ ߘߐ߫߸ ߏ߬ ߟߎ߬ ߟߊ߫ ߢߌߣߌ߲ߠߌ߲ ߞߐߝߟߌ ߓߘߊ߫ ߞߊߙߏ ߦߋ߫.
ߝߘߏ߬ߓߊ߬ ߞߟߊ߬ߕߌ߰ߘߊ ߟߊ߫ ߝߐߟߌ߫ ߘߐ߫߸ ߞߊߙߏ߫ ߞߎߘߊ ߣߌ߲߬ ߦߋ ߟߋ߬ ߛߎ߲ߞߊߙߏ߫ ߓߛߍ ߘߊߡߌߣߊ ߘߌ߫߸ ߞߊ߬ ߛߌߞߊ ߓߐ߫ ߊ߬ ߘߐ߫߸ ߞߊ߬ ߘߏ߲߬ ߞߍ߫ ߛߎ߲ߞߊߙߏ ߘߐ߫ ߛߍߣߍ߲߬ ߝߋߎ߫߸ ߖߡߊ߬ߣߊ ߘߎ߰ߞߣߍ ߡߎ߰ߡߍ ߞߊ߲߬.
<<ߞߊߙߏ ߦߋ߫ ߘߊ߫ ߖߡߊ߬ߣߊ ߦߙߐ ߘߏ߫ ߟߎ߫ ߘߐ߫، ߏ߬ ߟߋ ߘߐ߫߸ ߛߎ߲ߞߊߙߏ ߛߎ߲ ߓߍߣߊ߬ ߘߊߡߌ߬ߣߊ߫ ߞߎߣߎ߲ߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߜߍ ߕߟߋ߬ ߁߈߸ ߖߌ߬ߣߍ߬ ߞߣߐ߫.>> ߝߘߏ߬ߓߊ߬ ߞߟߊ߬ߕߌ߮ ߞߵߏ߬ ߟߋ ߝߐ߫ ߊ߬ ߟߊ߫ ߛߙߊ߬ߣߎ߲ ߘߐ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ߬ߓߊ ߟߊ߫.
ߖߌ߬ߣߍ߬ ߣߌ߫ ߖߡߊ߬ߣߊ߬ ߛߌߦߊߡߊ߲߫ ߠߋ߬ ߓߘߊ߫ ߘߏ߲߬ ߞߎߟߎ߲߫ ߞߋߟߋ߲߫ ߞߣߐ߫ ߏ߬ ߘߌ߫ ߕߋ߲߬߸ ߡߍ߲ ߠߎ߬ ߝߣߊ߫ ߞߊ߬ ߛߎ߲ߞߊߙߏ ߦߋ߫߸ ߣߴߊ߬ߟߎ߬ ߓߘߊ߫ ߛߎ߲ ߘߏ߲߭ ߘߊߡߌ߬ߣߊ߬߸ ߏ߬ ߘߏ߫ ߟߋ߫ ߛߎ߰ߘߎ߬ߟߊ߫ ߘߌ߫، ߏ߬ ߟߎ߬ ߝߣߊ߫ ߟߊ߫ ߝߊ߰ߡߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߞߊߙߏ ߦߋ߫߸ ߊ߬ߟߎ߬ ߟߊ߫ ߛߎ߲ߞߊߙߏ ߣߌ߫ ߖߌ߬ߣߍ߬ ߓߍ߯ ߕߊ ߦߋ߫ ߕߎ߬ߡߘߊ߬ ߞߋߟߋ߲߫ ߠߋ߬ ߘߌ߫ ߞߊߙߏ ߦߋߣߍ߲ ߞߐߝߍ߬.
ߞߊߙߏ ߡߍ߲ ߦߋ߫ ߕߋ߲߬߸ ߊ߬ ߞߍߣߍ߲߫ ߓߍ߬ߒ߬ߛߋ߲߬ߡߊ߫ ߟߋ߬ ߘߌ߫߸ ߓߊߏ߬ ߖߌ߬ߣߍ߫ ߌߛߊ߫ ߣߊߡߎ߲ ߘߏ߲߬ߞߏ ߟߎ߬ ߝߣߊ߫ ߟߊ߫ ߛߎ߲ߞߊߙߏ ߘߊߡߌ߬ߣߊ߬ߕߐ߫ ߊ߬ߟߋ߬ ߞߎߣߎ߲ߟߏ߲߫ ߞߋߟߋ߲ ߠߋ߬ ߡߊ߬، ߞߊߙߏ ߣߌ߲߬ ߘߏ߲߬ ߦߋ߫ ߞߙߊߟߊߕߎ߲߮ ߠߋ߬ ߘߌ߫߸ ߊ߬ ߦߋ߫ ߞߊߙߏ߫ ߡߐ߬ߟߐ߲߬ߡߊ߬ߓߊ߫ ߟߋ߬ ߘߌ߫ ߘߌ߯ߣߊ ߞߣߐ߫.
ߊߟߊߡߊ߬ ߛߎ߲ߞߊߙߏ ߣߌ߲߬ ߘߐߕߍ߰ ߘߊ߫ ߤߙߊ ߣߌ߫ ߡߊ߬ߝߊ ߘߐ߫߸ ߞߵߊ߬ ߡߊ߲߬ߤߙߍ ߘߌ߫ ߓߍ߯ ߟߊߘߍ߬ߣߍ߲ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
