ߞߵߊ߬ ߓߍ߲߬ ߛߣߍ߬ߞߍ߬ߟߊ ߟߎ߬ ߣߌ߫ ߞߏߟߊߘߍ ߟߎ߬ ߕߍ߫ ߝߙߋߞߋ߫ ߛߌߦߊߡߊ߲ ߡߊ߬ ߖߌ߬ߣߍ߫ ߘߊ߬ߡߊ߲߬ߘߊ߬ ߓߏߟߏ߲ ߠߎ߬ ߟߊ߫߸ ߛߌߟߊߓߐߛߐ߯ߣߊ߫ ߡߊ߫ ߕߏ߫ ߛߌ߰ ߘߐ߫ ߏ߬ ߞߏ ߘߐ߫، ߊ߲ ߕߊ߯ ߘߊ߫ ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߊ߬ߘߏ߬ߢߐ߲߰ߦߊ߫߸ ߞߵߊ߬ ߓߍ߲߬ ߘߊ߬ߡߊ߲߬ ߞߏ ߛߊ߬ߙߌ߬ߦߊ߬ߛߎ߲ ߞߣߐߘߐ ߟߐ߲ߓߊߟߌߦߊ ߞߐߝߟߌ ߡߊ߬، ߊ߬ ߞߵߊ߬ ߡߙߌߦߊ ߘߌ߫ ߝߐߢߐ߲߯ߞߐ߫ ߓߊ߲ߓߊߟߌ ߣߌ߲߬ ߞߊ߲߬߸ ߖߌ߬ߣߍ߫ ߟߊ߬ߝߛߊ߬ߟߌ߬ߟߊ߬ߛߘߍ ߟߎ߬ ߟߊ߫ ߞߋ߬ߟߋ߲߬ߧߊ ߟߊ߬ߝߛߊ߬ߟߌ߬ߟߊ ߣߌ߲߬ ߞߎߡߊ߫ ߘߊ߫ ߛߊ߬ߙߌ߬ߦߊ ߝߐ߫ ߞߊ߲ ߠߎ߬ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߘߌ߬ߢߍ߬ߛߓߍ ߕߌ߰ߦߊ ߕߍ߫ ߡߊ߬ߘߎ߰ߕߌ߮ ߟߊ߫ ߕߌ߰ߦߊ ߓߐ߫ ߟߴߊ߬ ߓߟߏ߫.
<<ߘߊ߬ߡߊ߲ ߤߊߞߍ ߣߌ߫ ߕߦߊ ߤߊߞߍ ߕߍ߫ ߞߋߟߋ߲߫ ߘߌ߫.>> ߊ߬ ߞߵߏ߬ ߦߌ߬ߘߴߊ߬ ߟߊ߫ ߛߙߊ߬ߣߎ߲ ߘߐ߫، ߊ߬ߟߋ ߟߊ߫ ߝߐߟߌ߫ ߘߐ߫ ߝߣߊ߫߸ ߘߐ߬ߛߏ߬ߘߏ߲߬ߜߊ߬ߟߌ߬ ߘߌߢߍߛߓߍ ߕߍ߫ ߘߎ߱ ߞߍ߫ ߟߊ߫ ߞߏߟߊߘߍ ߕߊ߫ ߘߌ߫ ߘߋ߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߘߌ߬ߢߍ߬ߛߓߍ ߏ߬ ߦߋ߫ ߝߘߊ߫ ߟߊ߫ ߞߊ߲ߕߌ߮ ߟߊ߫ ߟߊ߬ߕߍ߰ߦߊ ߟߋ߬ ߟߊ߫߸ ߞߊ߬ ߦߙߐ߫ ߘߊ߬ߟߊߣߍ߲ ߘߏ߫ ߘߴߌ ߡߊ߬، ߓߊ߬ߙߌ߬߸ ߏ߬ ߕߍ߫ ߘߌ߲߬ߞߌߙߊ ߏ߬ ߞߍ߫ ߟߊ߫ ߞߏߟߊߘߍ ߕߊߓߍߛߎ߲ߓߍ ߘߌ߫ ߝߋߎ߫، ߞߊ߬ߕߎ߲߯߸ ߊ߬ߟߎ ߞߵߊ߬ ߛߐ߬ߘߐ߲߫ ߠߋ߬߸ ߕߌ߱ ߦߋ߫ ߘߎ߱ ߏ߬ ߟߊ߫ ߞߘߐ߬ߡߊ߲߬، ߏ߬ ߘߐ߫߸ ߞߏߟߊߘߍ ߘߴߊ߬ ߟߊ߫ ߓߊ߯ߙߊ ߞߍ߫߸ <<ߘߎ߱ ߦߋ߫ ߘߎ߰ߕߌ߮ ߕߊ ߟߋ߬ ߘߌ߫߸ ߊ߬ ߘߏ߲߬ ߘߴߊ߬ ߟߊ߫ ߕߦߊ ߤߊߞߍ ߟߎ߬ ߡߞߊߣߌ߲߫ ߥߟߊ߫ ߞߵߊ߬ ߛߐ߬ߘߐ߲߬ ߞߏߟߊߘߍ ߟߊ߫ ߓߊ߯ߙߊ ߞߎ߲߬ߕߊ߮ ߡߎ߰ߡߍ ߞߣߐ߫>> ߊ߬ ߟߊ߫ ߘߎ߰ߞߟߏ ߞߊ߲߬.
ߟߊ߬ߝߛߊ߬ߟߌ߬ߟߊ ߣߌ߲߬ ߞߵߊ߬ ߓߊ߲ߓߊ߲߫ ߕߐ߲ߛߋ߲ ߁߂߀߲ ߣߌ߫ ߁߂߃߲ ߣߌ߫ ߁߂߄߲ ߞߣߐ߫ ߞߎߡߊ ߟߎ߬ ߞߊ߲߬߸ ߞߊ߬ ߝߘߊ߫ ߖߌ߬ߣߍ߫ ߘߊ߲߬ߡߊ߲ ߛߊ߬ߙߌ߬ߦߊ߬ߛߎ߲ ߠߊ߫، ߛߟߊߕߌ߯ ߘߎ߲߬ߓߎߦߊ߬ ߞߵߊ߬ ߦߌ߬ߘߊ߬߸ ߞߏ߫ <<ߞߏߟߊߘߍ߫ ߝߏߦߌ߬߸ ߢߌߣߌ߲ߠߌ߲ ߘߌ߬ߢߍ߬ߛߓߍ߫ ߞߍ߫ ߘߴߌ ߓߟߏ߫ ߓߊ߬߸ ߥߟߊ߫ ߘߐ߬ߛߏ߬ߘߏ߲߬ߜߊ߬ߟߌ ߘߌ߬ߢߍ߬ߛߓߍ߸ ߌ ߕߴߛߋ߫ ߘߊ߬ߓߊ ߘߊ߫ ߢߊ߫ ߞߋߟߋ߲߫ ߛߎ߫ ߟߊ߫ ߘߎ߰ߞߟߏ ߘߐ߫߸ ߝߏ߫ ߊ߬ ߕߌ߱ ߟߋ߬ ߦߋ߫ ߘߌ߬ߢߍ߫ ߏ߬ ߡߊ߬.>> ߞߊ߬ߙߊ߲߬ߡߐ߰ߞߍ ߣߌ߲߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߏߟߊߘߍ ߞߍ ߞߊ߬ ߛߌߟߊ ߓߐ߫ ߓߊ߬߸ ߥߟߊ߫ ߞߊ߬ ߡߊ߬ߝߟߍ߬ߟߌ ߞߍ߫ ߘߎ߱ ߞߊ߲߬ ߓߊ߬߸ ߏ߬ ߓߍ߯ ߦߋ߫ ߓߐ߫ ߟߊ߫ ߘߎ߰ߕߌ߮ ߟߊ߫ ߘߌ߬ߢߍ ߟߋ߬ ߘߐ߫ ߡߎߣߎ߲߬߸ ߡߍ߲ ߕߍ߫ ߥߊ߫ ߟߊ߫ ߓߟߏߢߐ߲߯ߠߛߊߦߌ߲ ߞߐ߫.
ߞߵߊ߬ ߟߴߊ߬ ߞߊ߲߬߸ ߓߟߏߢߐ߲߯ߠߛߊߦߌ߲ ߡߍ߲ ߦߴߏ߬ ߘߌ߫߸ ߏ߬ ߕߍ߫ ߘߎ߱ ߞߍ߫ ߟߴߌ ߕߊ߫ ߘߌ߫ ߝߣߊ߫ ߘߋ߬، <<ߘߎ߰ ߕߌ߮ ߕߏߕߐ߫ ߊ߬ ߟߊ߫ ߘߎ߱ ߕߌ߰ߦߊ ߤߊߞߍ ߕߣߐ߬ߓߐ߬ ߟߊ߫ ߟߋ߬ ߘߐ߬ߛߏ߬ߘߏ߲߬ߜߊ߬ߟߌ ߞߎ߲߬ߕߊ߮ ߞߣߐ߫ ߝߛߊߦߌ߫߸ ߞߵߊ߬ ߟߊ߫ ߓߟߏߢߐ߲߯ߠߛߊߦߌ߲ ߠߎ߬ ߛߊ߬ߙߊ ߞߊ߲߬.>> ߊ߬ ߞߵߏ߬ ߝߐ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߘߏ߫ ߟߎ߫ ߦߋ߫ ߥߊ߫ ߟߊ߫ ߕߋ߲߬߸ ߞߵߊ߬ ߝߐ߫ ߞߏ߫ ߊ߬ߟߎ߬ ߦߋ߫ ߦߙߐ ߘߏ߫ ߞߐ߫߸ ߊ߬ߟߎ߬ ߣߌ߫ ߘߎ߰ߕߌ߮ ߘߌ߫ ߞߎߡߊ߫ ߦߋ߲߬ ߕߋ߲߬ ߌߞߘߐ߫߸ ߞߊ߬ ߥߊߘߌ ߘߏ߫ ߛߊ߬ߙߊ߫ ߕߋ߲߬߸ ߞߵߏ߬ ߞߍ߫ ߊ߬ ߞߏ ߓߊ߲ߣߍ߲ ߘߌ߫߸ ߞߏߟߊߘߍ ߘߴߊ߬ ߟߊ߫ ߘߐ߬ߛߏ߬ߘߏ߲߬ߜߊ߬ߟߌ ߓߍ߯ ߞߍ߫ ߏ߬ ߞߊ߲߬ ߡߎ߬ߕߎ߲߬ ߛߊ߫، ߞߵߊ߬ ߛߐ߬ߘߐ߲߬߸ ߊ߬ ߞߍߢߊ߫ ߕߴߏ߬ ߘߌ߫ ߡߎ߰ߡߍ߫.
ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߣߌ߫ ߕߌߢߍߟߌ ߛߋ߫ ߘߊ߫ ߡߐ߰ ߜߘߍ߫ ߡߊ߬߸ ߤߊߟߌ߬ ߡߍ߲ ߕߍ߫ ߦߙߐ߫ ߕߣߐ߬ߓߐ߬ߕߊ ߞߣߐ߫߸ ߏ߬ ߣߐ߭ ߘߐߓߍ߲߬ߕߊ ߟߋ߬، <<ߘߎ߰ ߕߌ߰ߦߊ ߤߊߡߍ߲ ߦߋ߫ ߦߙߐ߫ ߕߌ߮ ߟߎ߬ ߓߟߏ߫߸ ߘߏ߲߬ ߓߊ߯ ߞߍ߫ ߏ߬ ߡߍ߲ ߞߊ߬ߛߌ ߘߐ߫߸ ߏ߬ ߘߌ߫ ߛߴߊ߬ ߡߊߞߊ߬ߛߌ߬ ߟߊ߫ ߛߊ߬ߙߌ߬ߦߊ߬ ߓߏ߲߬ߘߊ߫ ߟߊ߫߸ ߊ߬ߟߎ߬ ߣߌ߫ ߡߍ߲ ߛߎ߬ߘߎ߲߬ߡߊ߲߬ ߢߐ߲߮ ߠߊ߫߸ ߞߵߊ߬ ߟߊ߫ ߕߐ߬ߢߍ߮ ߏ߬ ߢߐ߲߰ ߠߊߛߊ߬ߦߌ߲߫ ߊ߬ ߡߊ߬.>> ߊ߬ ߞߊ߬ ߦߙߐ ߣߌ߲߬ ߢߊߝߐ߫ ߞߏߛߓߍ߫.
ߞߊ߬ߙߊ߲߬ߡߐ߯ ߘߎ߲߬ߓߎߦߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߦߙߐ ߘߏ߫ ߟߎ߫ ߓߍ߫߸ ߡߊ߬ߛߌ߬ߟߊ߲߬ߠߌ߲ ߦߋ߫ ߛߋ߫ ߟߴߏ߬ ߟߎ߫ ߡߊ߬߸ ߞߊ߬ ߦߙߐ߫ ߕߌ߮ ߟߎ߬ ߘߐߜߍ߬ߘߍ߲߫ ߊ߬ߟߎ߬ ߟߊ߫ ߘߎ߱ ߝߍ߬߸ ߞߊ߬ ߝߊ߲߬ߞߊ ߟߊ߫ ߘߏ߫ ߟߎ߫ ߞߊ߲߬߸ ߞߵߊ߬ ߝߐ߫ ߛߐ߲߬ ߞߏ߫ <<ߘߎ߱ ߓߍ߯ ߦߋ߫ ߞߎ߲߬ߠߊ߬ߛߌ߮ ߕߊ ߟߋ߬ ߘߌ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߞߎߡߊ߫ ߞߘߐ ߟߋ߬ ߦߴߏ߬ ߘߌ߫ ߖߌ߬ߣߍ߫ ߛߊ߬ߙߌ߬ߦߊ ߞߣߐ߫߸ ߏ߬ ߕߴߦߋ߲߬ ߡߎ߬ߕߎ߲߬ ߝߋߝߋ߫، ߞߏ߫ ߕߌ߰ ߕߍ߫ ߦߙߐ ߡߍ߲ ߠߎ߬ ߟߊ߫߸ ߏ߬ ߟߎ߫ ߟߋ߬ ߞߎ߲߬ߠߊ߬ߛߌ߮ ߕߊ ߘߌ߫، ߓߊ߬ߙߌ߬߸ ߦߙߐ߫ ߕߌ߰ߡߊ ߓߍ߯ ߕߌ߰ߦߊ ߤߊߞߍ ߦߴߊ߬ ߕߌ߱ ߟߋ߬ ߓߟߏ߫.
<<ߞߊ߬ ߦߙߐ߫ ߕߌ߮ ߡߊߓߊ߰ߓߊ߰߸ ߞߵߊ߬ ߘߐߛߌߟߊ߲߫߸ ߥߟߊ߫ ߞߵߊ߬ ߞߘߊߡߊ߫߸ ߛߴߊ߬ ߘߴߊ߬ ߟߊ߫ ߘߎ߱ ߘߴߌ ߡߊ߬߸ ߏ߬ ߦߋ߫ ߓߋ߬ߒ߬ߞߊ߲߬ߠߌ߲ ߣߌ߫ ߛߊ߬ߙߌ߬ߦߊ߬ ߛߐߛߐ ߟߋ߬ ߘߌ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ <<ߞߎ߲߬ߠߊ߬ߛߌ߮ ߘߏ߫ ߟߎ߫ ߟߊ߫ ߖߘߍ߬ߡߊ߬ߘߌߦߊ>> ߟߋ߬ ߣߊ߬ ߟߊ߫ ߞߎߡߊ߫ ߛߎ߮ ߏ߬ ߘߌ߫.
ߓߟߏߢߐ߲߯ߠߛߊߦߌ߲߫ ߞߏ ߡߍ߲ ߦߋ߫ ߞߏߟߊߘߍ ߣߌ߫ ߦߙߐ߫ ߕߌ߮ ߕߍ߫߸ ߣߴߏ߬ ߓߟߏߢߐ߲߯ߠߛߊߦߌ߲ ߞߍߢߊ ߟߎ߬ ߡߊ߫ ߓߐ߫ ߊ߬ ߛߌߟߊ ߝߍ߬߸ ߦߙߐ߫ ߕߌ߮ ߘߌ߫ ߛߋ߫ ߕߊ߯ ߟߊ߫ ߞߕߌߖߌ߲ ߠߊ߫ ߞߵߊ߬ ߡߊߞߊ߬ߛߌ߬، ߏ߬ ߟߋ ߘߐ߫߸ ߊ߬ ߞߊ߬ ߦߟߌߓߌߟߊߟߌ ߘߏ߫ ߞߍ߫߸ ߞߏ߫ <<ߛߊ߬ߙߌ߬ߦߊ ߦߋ߫ ߦߊ߲߬߸ ߞߕߌߟߊ ߟߎ߬ ߦߋ߫ ߦߊ߲߬߸ ߏ߬ ߟߎ߫ ߟߋ߬ ߘߏ߲߬ ߘߐ߱ߘߏ߲߬ߣߍ߲߫ ߛߊ߬ߙߌ߬ߦߊ ߟߊߕߊ߯ߡߊ ߟߊ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߞߕߌ߫ ߛߎ߮ ߏ߬ ߛߌߦߊߡߊ߲߫ ߠߋ߬ ߓߘߊ߫ ߞߍ߫ ߦߊ߲߬߸ ߡߍ߲ ߞߊ߬ ߥߊߘߌߓߊ ߓߐ߫ ߞߏߟߊߘߍ ߘߏ߫ ߟߎ߫ ߞߎ߲߬ ߞߵߊ߬ ߛߊ߬߬ߙߊ߫ ߞߵߊ߬ ߘߌ߫ ߦߙߐ߫ ߕߌ߮ ߟߎ߫ ߡߊ߬ ߓߟߐߢߐ߲߯ߠߛߊߦߌ߲ ߘߌ߫.
ߊ߬ ߞߊ߬ ߖߊ߬ߛߙߋ߬ߡߊ߬ߟߊ߫ ߣߌ߫ ߟߊ߬ߟߌ߬ߟߌ߬ ߝߣߊ߫ ߘߌ߫ ߘߎ߰ߘߋ߲ ߠߎ߬ ߡߊ߬߸ ߞߏ߫ ߦߙߐ ߡߍ߲ ߓߊ߯ߙߊ߫ ߞߏ ߖߊ߬ߡߊߙߌ ߘߌߣߍ߲߫ ߞߏߟߊߘߍ ߡߊ߬߸ ߌ ߕߴߛߋ߫ ߓߊ߯ߙߊ߫ ߞߍ߫ ߟߊ߫ ߘߎ߱ ߏ߬ ߞߊ߲߬ ߡߎ߬ߕߎ߲߫ ߘߋ߬߸ ߝߏ߫ ߘߊ߬ߡߊ߲ ߞߏߕߌ߮ ߟߊ߫ ߖߊ߬ߡߊߙߌ ߟߊ߫ ߘߋ߬، ߣߌ߫ ߡߍ߲ ߘߏ߲߬ ߞߵߊ߬ ߕߋ߲ߜߋߘߋ߲ߧߊ߫ ߞߵߏ߬ ߞߍ߫߸ ߓߟߏߢߐ߲߯ߠߛߊߦߌ߲߫ ߕߴߏ߬ ߕߌ߱ ߦߋ߫߸ ߏ߬ ߝߐߣߍ߲߫ ߘߊ߬ߡߊ߲ ߛߊ߬ߙߌ߬ߦߊ߬ߛߎ߲ ߛߊ߬ߙߋ߬ߦߊ߬ߛߋ߲ ߁߂߇ ߣߌ߫ ߁߂߈ ߠߋ߬ ߞߣߐ߫.
ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߌ ߕߍ߫ ߛߴߊ߬ ߝߐ߫ ߟߊ߫ ߦߋ߲߬ ߕߋ߲߬߸ ߞߏ߫ ߌ ߟߊ߫ ߘߎ߱ ߕߍ߫ ߓߊ߯ߙߊ߫ ߟߊ߫߸ ߓߊ ߞߏ߫ ߊ߬ ߡߊ߲߫ ߘߴߌ ߦߋ߫، ߝߏ߫ ߘߊ߬ߟߎ߬ ߖߐ߲ߖߐ߲߫ ߠߋ߬ ߞߴߦߋ߲߬߸ ߛߊ߬ߙߌ߬ߦߊ߫ ߛߐ߲߬ߣߍ߲߬ ߡߍ߲ ߡߊ߬، ߦߏ߫ ߞߐ߭ ߟߎ߬ ߣߌ߫ ߓߊ ߟߎ߬ ߦߋ߫ ߢߊ ߡߍ߲ ߡߊ߬، ߓߊߏ߬߸ ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬߸ ߞߏ߫ ߞߐ߭ ߣߌ߫ ߓߊ ߣߌ߫ ߖߌ߫ ߥߦߏ߫ ߛߌߟߊ ߏ߬ ߟߎ߬ ߕߍ߫ ߡߐ߰ ߕߊ߫ ߘߌ߫߸ ߏ߬ ߟߎ߬ ߦߋ߫ ߝߘߏ߬ߓߊ߬ ߘߌ߲ߞߌߙߊ ߟߎ߫ ߟߋ߬ ߘߌ߫߸ ߡߍ߲ ߦߋ߫ ߞߎ߲߬ߠߊ߬ߛߌ߮ ߟߊ߫ ߖߊ߬ߡߊߙߌ ߞߣߐ߫، <<ߤߊߟߌ߬ ߣߴߊ߬ ߕߊ߬ߡߌ߲߬ ߘߴߌ ߟߊ߫ ߛߣߍ߬ߞߍ߬ ߘߎ߮ ߟߋ߬ ߘߐ߫߸ ߌ ߕߊ߫ ߕߍ߫.>>
ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߛߊ߲߭ ߛߊ߬ߓߊ ߣߌ߲߬ ߞߣߐ߫߸ ߖߌ ߓߘߊ߫ ߕߌߢߍߟߌ ߡߍ߲ ߞߍ߫ ߛߌ߯ߙߌ߲߫ ߝߊ߲߬ߝߍ߬ߟߊ ߟߎ߬ ߘߐ߫߸ ߊ߬ ߣߌ߫ ߦߙߐ߫ ߛߌߦߊߡߊ߲߫ ߜߘߍ߫ ߟߎ߫ ߘߐ߫، ߊ߬ ߞߎ߲߭ ߦߋ߫ ߘߊ߬ߡߊ߲ ߓߊ߯ߙߊ߫ ߢߊ߫ ߖߎ߮ ߟߋ߬ ߘߌ߫߸ ߡߍ߲ ߓߘߊ߫ ߛߌߟߊ ߕߍ߰ ߖߌ ߟߎ߬ ߢߍ߫߸ ߞߊ߬ ߓߐ߰ߝߍ ߘߐߞߛߐ߫، ߏ߬ ߘߏ߲߬ ߞߐߝߟߌ ߦߋ߫ ߡߊߜߙߏ߬ ߟߴߊ߲ ߖߍ߬ߘߍ ߟߋ߬ ߓߟߏ߫ ߡߎߣߎ߲߬߸ ߞߵߏ߬ ߟߴߊ߲ ߠߊ߫ ߓߌߦߊ߲ ߠߎ߬ ߣߴߊ߲ ߠߊ߫ ߦߙߌ ߟߎ߬ ߞߊ߲߬، ߊ߬ ߞߵߊ߬ ߦߌ߬ߘߊ߬߸ ߞߏ߫ ߖߌ ߓߘߊ߫ ߕߌߢߍߟߌ ߘߊߡߌ߬ߣߊ߬ ߦߙߐ ߘߏ߫ ߟߎ߫ ߘߐ߫ ߕߋ߲߬߸ ߖߌ ߕߎ߲߬ ߡߊ߫ ߘߋ߬ߙߌ߬ ߕߌߢߍߟߌ߫ ߞߍ߫ ߟߴߏ߬ ߟߎ߬ ߘߐ߫، ߏ߬ ߘߐ߫߸ ߊ߬ ߓߘߊ߫ ߛߋ߫ ߢߡߊߟߐ ߥߊ߯ߕߌ ߡߊ߬.
ߞߊ߬ߙߊ߲߬ߡߐ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߥߊ߯ߕߌ ߓߘߊ߫ ߛߋ߫߸ ߞߊ߬ ߘߊ߬ߡߊ߲ ߛߊ߬ߙߌ߬ߦߊ߬ߛߎ߲ ߢߊߝߐ߫ ߡߐ߱ ߟߎ߬ ߦߋ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬، <<ߣߌ߫ ߛߊ߬ߙߌ߬ߦߊ ߡߊ߫ ߟߊߓߊ߯ߙߊ߫ ߊ߬ ߟߊߓߊ߯ߙߊ߫ ߢߊ ߡߊ߬߸ ߘߌߦߊ ߦߋ߫ ߡߍ߲ ߠߎ߬ ߘߊ߫߸ ߏ߬ ߟߎ߬ ߝߣߊ߫ ߘߌ߫ ߕߊ߬ߡߌ߲߫ ߊ߬ߟߎ߫ ߘߐ߰ߓߐ߬ ߟߊ߫ ߛߊ߬ߙߌ߬ߦߊ߬ ߞߏ ߟߊ߫ ߘߋ߬.>> ߣߴߊ߬ ߡߊ߫ ߢߊߝߐ߫ ߊ߬ ߢߊ ߡߊ߬ ߝߣߊ߫߸ ߓߋ߬ ߘߌ߫ ߞߍ߫ ߦߙߐ߫ ߕߌ߮ ߟߎ߫ ߞߊ߲߬߸ ߞߵߊ߬ߟߎ߬ ߤߊߞߍ ߓߐ߫ ߊ߬ߟߎ߬ ߓߟߏ߫߸ ߞߵߊ߬ ߛߐ߬ߘߐ߲߬ ߊ߬ߟߎ߬ ߡߴߊ߬ ߟߐ߲߫.
ߟߊ߬ߝߛߊ߬ߟߌ߬ߟߊ ߞߵߊ߬ ߦߌ߬ߘߊ߬߸ ߞߏ߫ ߣߴߊ߲ ߧߴߊ߬ ߝߍ߬ ߓߌ߬ ߕߋ߲߬߸ ߘߏ߫ ߦߋ߫ ߓߐ߫ ߥߐ߬ߦߐ ߟߊ߫ ߘߊ߬ߡߊ߲߬ ߞߏ ߡߊ߬ߘߎ߮ ߘߐ߫߸ ߝߏ߫ ߞߊ߬ ߘߊ߬ߡߊ߲ ߛߊ߬ߙߌ߬ߦߊ߬ߛߎ߲ ߠߋ߬ ߢߊߝߐ߫ ߊ߬ ߢߊߝߐ߫ ߢߊ ߡߊ߬ ߡߐ߱ ߟߎ߬ ߦߋ߫߸ ߞߵߊ߬ ߞߣߐ߫ ߞߎߡߊ ߟߎ߬ ߝߣߊ߫ ߓߟߏߦߊ ߞߍ߫ ߛߋ߲ߛߋߘߋ߲ ߘߌ߫ ߞߏߟߊߘߍ ߟߎ߫ ߞߊ߲߬، ߛߊ߬ߙߌ߬ߦߊ߬ ߓߏ߲߬ߘߊ ߟߎ߬ ߝߣߊ߫ ߦߋ߫ ߛߋ߫ ߛߊ߬ߙߌ߬ߦߊ ߟߊߕߊ߯ߡߊ߫ ߟߴߊ߬ ߟߊߕߊ߯ߡߊ߫ ߢߊ ߡߊ߬.
ߘߟߊߛߎ߲ߓߎߟߌ ߣߌ߲߬ ߓߟߏߦߊ߫ ߘߊ߫ ߟߏ߲ߞߊߛߌߦߊ߫ ߞߡߊ߬ߙߊ߫ ߟߋ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
