ߞߎߣߎ߲߬ ߛߌ߬ߣߌ߲߬ߟߏ߲ ߛߎ ߘߐ߫߸ ߂߀߂߆ ߕߙߊߓߊ ߕߟߋ߬ ߁߃߸ ߖߌ߬ߣߍ߫ ߖߌ߬ߦߊ߬ߞߊ߲߬ߛߏ߬ߓߊ ߟߊ߫ ߂߀ߕߎߡߊ߃߀ ߝߐ߰ߓߍ ߓߊ߲ ߞߐ ߘߐ߫߸ ߛߌ߯ߙߌ߲߫ ߘߋ߲ߡߌߛߍ߲ ߛߌߦߊߡߊ߲߫ ߠߋ߬ ߖߌ߰ ߘߊ߫ ߝߏ߲߬ߘߏ ߞߊ߲߬߸ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߬، ߓߊߏ߬߸ ߊ߬ ߟߊߛߋ߫ ߘߊ߫ ߟߋ߬ ߝߐ߰ߓߍ ߘߐ߫߸ ߘߍ߬ߒ߬ߡߊ߬ ߟߊ߬ߛߋ߬ߟߌ ߘߏ߫ ߘߐ߫߸ ߞߊ߬ ߝߘߊ߫ ߞߎ߲߬ߠߊ߬ߛߌ߮ ߟߊ߫߸ ߞߏ߫ ߓߏ߬ߙߌ߬ߝߋ߲߬ ߜߌߟߌ߲ ߠߎ߬ ߟߊߓߊ߯ߙߊ ߓߘߊ߫ ߟߊߕߐ߲߫ ߘߊ߬ߡߊ߲߬ ߓߊ߯ߙߊ ߘߐ߫.
ߡߙߌߘߐ ߣߌ߲߬ ߝߘߊ߫ ߘߊ߫ ߞߏߕߌ߯ߘߊ߫ ߘߊ߲ߘߐ߫ ߟߋ߬ ߟߊ߫߸ ߕߊ߲ߓߊ߲ߓߐߟߌ ߣߌ߫ ߘߎ߰ߞߣߍ ߡߊ߬ߡߙߊ߬ߟߌ ߞߏߕߌ߯ߘߊ߸ ߓߐ߰ߝߍ ߣߌ߫ ߥߙߎߞߌ߫ ߓߟߏߕߍ߰ߓߊߟߌ ߞߏߕߌ߯ߘߊ߸ ߊ߬ ߣߌ߫ ߘߊ߬ߡߊ߲ ߞߏߕߌ߯ߘߊ، ߡߙߌߘߐ ߣߌ߲߬ ߞߣߐ߫߸ ߊ߬ ߝߐߣߴߊ߬ ߘߐ߫ ߟߋ߬ ߞߏ߫ ߛߋ߲߬ߟߊ߲߬ ߕߙߏ߬ߞߏ߬ߓߊ ߡߍ߲ ߠߎ߬ ߦߋ߫ ߘߊ߬ߡߊ߲߬ߘߊ ߟߎ߬ ߟߊ߫߸ ߞߵߏ߬ ߟߊ߫ ߞߏ߬ߙߏ߲߬ߘߏ߬ߓߊ ߟߎ߫ ߞߊ߲߬߸ ߊ߬ ߣߌ߫ ߞߏ߬ߙߏ߲߬ߞߏ߬ߙߏ߲߬ߠߊ߫ ߛߋ߲߬ߟߊ߲߬ߡߊ߸ ߏ߬ ߟߎ߬ ߟߊ߫ ߓߊ߯ߙߊ ߓߘߊ߫ ߟߊߕߐ߲߫ ߘߊ߬ߡߊ߲߬ߘߊ߬ ߓߏߟߏ߲ ߠߎ߬ ߟߊ߫ ߖߡߊ߬ߣߊ ߘߎ߰ߞߣߍ ߡߎ߰ߡߍ ߞߊ߲߬.
ߏ߬ ߝߐ ߢߊ ߡߍ߲ ߌߞߘߐ߫߸ ߛߌ߯ߙߌ߲߫ ߞߌ߲߬ߘߊ߬ ߛߌߦߊߡߊ߲߫ ߓߍ߫߸ ߘߋ߲ߡߌߛߍ߲ ߠߎ߬ ߓߐ߫ ߘߊ߫ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߬߸ ߘߐ߲߭ ߣߌ߫ ߘߐ߲߬ߞߟߌ ߘߐ߫߸ ߊ߬ ߣߌ߫ ߞߎ߲߬ߞߊ߲߬ ߝߐ ߟߎ߬ ߘߌ߫، ߞߊ߬ߕߎ߲߯߸ ߊ߬ߟߎ߫ ߞߊ߬ ߟߊ߬ߕߐ߲߬ߠߌ߲ ߣߌ߲߬ ߦߋ߫ ߞߏ߫ ߕߣߐ߬ߡߊ߬ߓߊ߫ ߟߋ߬ ߘߌ߫߸ ߡߍ߲ ߣߐ߬ ߊ߬ߟߎ߫ ߣߐ߬ߜߍ ߟߊߓߐ߫ ߟߴߊ߬ߟߎ߬ ߟߊ߫ ߛߍ߬ߘߏ߲ ߘߐ߫، ߓߊߏ߬߸ ߊ߬ߟߎ߬ ߥߊ߯ߕߌ߫ ߦߙߌߞߊ߫ ߖߊ߲ ߠߋ߬ ߕߋ߲߬߸ ߊ߬ߟߎ߬ ߟߊ߫ ߟߊ߬ߡߌߣߌ߲ ߘߐߖߊߛߌ߫ ߞߏ ߞߍ߬ߟߍ ߞߊ߲߬.
ߖߡߊ߬ ߟߊ߬ߘߍ ߣߌ߲߬ ߘߐ߫߸ ߊ߲ ߛߋ߫ ߘߴߊ߲ ߠߊ߫ ߞߎߡߊߓߘߎ ߟߐ߬ ߟߊ߫ ߡߊ߱ߘߎ߬ ߓߙߋߕߋ߫ ߘߊ ߟߊ߫߸ ߊ߬ߟߋ ߦߋ߫ ߛߌ߯ߙߌ߲߫ ߠߊ߫ ߢߝߍߕߊ߮ ߘߋ߲ߡߌߛߍ߲ ߠߎ߬ ߟߊ߫ ߘߍ߭ ߛߌ߲߬ߝߏ߲ ߘߏ߫ ߟߋ߬ ߘߌ߫߸ ߊ߬ ߞߊ߬ ߞߎ߲߬ߠߊ߬ߛߌ߮ ߟߊ߫ ߡߙߌߦߊ ߣߌ߲߬ ߕߊ߲߬ߘߏ߫߸ ߞߊ߬ ߓߊ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊߣߊ߬ ߘߊ߲߬ ߝߐߟߌ ߡߊ߬ ߘߋ߬߸ ߊ߬ ߦߋ߫ ߓߌ߬ߟߊ߬ ߞߍߟߌ ߡߎ߬ߙߊ߲ ߞߣߐ߫.
<<ߊ߲ ߓߐߣߍ߲߫ ߠߋ߬ ߛߎ ߣߌ߲߬ ߘߐ߫߸ ߞߵߊ߲ ߠߊ߫ ߛߍߥߊ ߦߌ߬ߘߊ߬ ߔߏߞߑߟߍ߲߫ ߞߏ ߟߊߕߐ߲ ߞߐ ߣߌ߲߬ ߘߐ߫ ߣߌ߲߬ ߒ߬ ߓߘߊ߫ ߘߊ߬ߡߊ߲ ߠߎ߬ ߞߣߐ߫، ߕߙߏ߬ߞߏ ߢߌ߲߬ ߠߎ߬ ߓߘߴߊ߲ ߠߊ߫ ߟߊ߬ߡߌߣߌ߲ ߞߙߎ ߘߐߕߌߢߍ߫، ߓߌ߬ߡߴߊ߲ ߓߌ߬ߟߊ߫ ߣߌ߲߬ ߞߏ ߛߍ߬ߘߏ߲ ߠߊ߫، ߣߌ߫ ߞߎ߲߬ߠߊ߬ߛߌ߮ ߓߘߴߊ߬ ߕߟߏߡߊߟߐ߬ ߊ߲ ߠߊ߫ ߏ߬ ߘߐ߫߸ ߊ߲ ߕߴߛߋ߫ ߕߏ߫ ߟߊ߫ ߛߌ߰ ߘߐ߫ ߣߴߊ߲ ߡߵߊ߬ߟߎ߬ ߥߊߟߢߌߡߊߟߐ߲߫ ߞߵߊ߬ߟߎ߫ ߝߏ߬، ߞߏ߬ߣߌ߲߬߸ ߊ߲ ߕߴߊ߬ ߡߙߌߦߊ ߣߌ߲߬ ߦߋ߫ ߞߍ߫ ߝߐߟߌ߫ ߜߊ߲ߛߊ߲߫ ߘߌ߫ ߘߋ߬߸ ߊ߬ ߞߍ߫ ߟߋ߬.>> ߊ߬ߟߋ ߞߵߏ߬ ߟߋ ߝߐ߫.
ߘߋߡߌ߬ߛߍ߲ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߴߊ߬ ߘߡߊߞߊ߬ߛߌ߬ ߟߊ߫߸ ߞߊ߬ ߓߍ߲߬ ߊ߬ߟߎ߬ ߟߊ߫ ߛߍ߬ߘߏ߲߬ߠߊ߫ ߡߌ߬ߣߊ߬ߣߍ߲ ߠߎ߬ ߓߌ߬ߟߊ߬ ߞߏ ߡߊ߬߸ ߏ߬ ߟߎ߬ ߡߍ߲ ߠߎ߬ ߡߌ߬ߣߊ߬ߣߍ߲߫ ߟߊ߬ߡߌߣߌ߲ ߘߐߖߊߛߌ ߞߍ߬ߟߍ ߘߊߞߎ߲ ߘߐ߫.
<<ߊ߲ ߧߋ߫ ߢߌߣߌ߲߫ ߠߊ߫ ߒ߬ ߘߍ߬ߢߐ߲߯ ߡߌ߬ߣߊ߬ߣߍ߲ ߠߎ߫ ߓߌ߬ߟߊ߬ ߞߏ ߡߊ߬ ߓߌ߬ ߢߐ߲߰ ߟߏ߲߬ ߞߏߛߓߍ߫߸ ߡߍ߲ ߠߎ߬ ߡߌ߬ߣߊ߬ ߘߊ߫ ߞߏߢߊ ߣߌ߲߬ ߛߍ߬ߘߏ߲ ߘߐ߫߸ ߦߏ߫ ߡߊ߬ߡߊ߬ߘߌ߫ ߛߌ߬ߟߊ߬߸ ߡߍ߲ ߞߊ߲߬ߕߐ߮ ߦߋ߫ ߕߐ߬ߔߑߛߌ߬ ߘߌ߫߸ ߊ߬ ߣߌ߫ ߡߎߛߊ߫ ߖߊߥߙߊ߫ ߣߌ߫ ߕߐ߭ ߟߎ߬، ߣߴߏ߬ ߟߎ߫ ߓߌ߬ߟߊ߬ ߘߊ߫ ߟߏ߲ ߡߍ߲߸ ߊ߲ ߘߌ߫ ߘߏ߲߬ ߖ߭ߋ.ߍߡ.ߘߋ߫ ߞߏ ߘߐ߫ ߏ߬ ߟߏ߲ %߁߀߀ ߟߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.
ߊ߬ߟߋ߬ ߛߍߥߊ߫ ߞߋߟߋ߲ ߘߊߞߎ߲ ߘߐ߫߸ ߛߟߊߕߌ߯ ߞߐ߲ߘߍ߫ ߡߍ߲ ߞߊ߲߬ߕߐ߮ ߦߋ߫ ߊ߬ߟߑߝߊ߬ߙߎߞ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߕߐ߬ߣߐ ߡߍ߲ ߠߊ߫ ߞߏ ߓߍ߯ ߘߌ߫߸ ߏ߬ ߟߋ ߞߎ߲߬ߠߊ߬ߛߌ߮ ߞߍ ߘߌ߫ ߞߵߊ߬ ߟߊ߫ ߡߙߌߘߐ߫ ߕߊ߬ߣߍ߲ ߣߌ߲߬ ߓߐ߫ ߊ߬ ߛߌߟߊ ߝߍ߬.
<<ߊ߲ ߓߘߊ߫ ߛߍߥߊ߫ ߟߊ߬ߕߐ߲߬ߠߌ߲߬ ߞߏ߬ ߞߎߡߊ ߢߌ߲߬ ߠߊ߫، ߓߊ߬ߙߵߊ߲ ߧߋ߫ ߡߍ߲ ߝߍ߬ ߓߘߍߞߍ߭߸ ߏ߬ ߟߋ ߊ߬ ߞߏ ߟߊߕߊ߯ߡߊ ߘߌ߫ ߊ߬ ߟߊߕߊ߯ߡߊ߫ ߢߊ ߡߊ߬، ߡߙߌߘߐ ߕߊ߬ߟߌ ߦߋ߲߬ ߕߋ߲߬߸ ߊ߬ߟߋ߬ ߕߴߏ߬ ߘߌ߫، ߝߏ߫ ߊ߬ ߦߋ߫ ߡߊߓߏ߲߬ߧߊ߫ ߟߋ߬.>> ߊ߬ ߞߵߏ߬ ߝߐ߫.
ߞߎߣߎ߲߬ ߛߎ ߘߐ߫߸ ߛߍߥߊߓߊ߯ߕߐ ߢߌ߲߬ ߠߎ߫ ߞߊ߬ ߛߏ ߘߐߦߊ߯ߟߊ߫ ߟߋ߬߸ ߞߵߊ߬ߟߎ߫ ߟߐ߬ ߟߎ߫ ߘߊ ߟߎ߬ ߛߐ߲߬߸ ߡߍ߲ ߠߎ߬ ߞߵߊ߬ߟߎ߬ ߡߊߘߍ߬ߡߍ߲߫ ߣߌ߲߬ ߞߏ ߛߍ߬ߘߏ߲ ߠߊ߫߸ ߡߍ߲ ߠߎ߬ ߞߊ߬ ߔߏߞߑߟߍ߲߫ ߞߏ ߞߍ߬ߟߍ ߞߍ߫ ߘߊ߬ߡߊ߲ ߞߣߐ߫.
ߘߐ߲߭ ߣߌ߫ ߘߐ߲߬ߞߟߌ߬ߟߊ߸ ߏ߬ ߟߋ ߕߎ߲߬ ߦߴߌߘߐ߫߸ ߘߋ߲ߡߌߛߍ߲ ߠߎ߬ ߕߘߍ߬ ߞߎߡߊ߫ ߟߊ߫ ߞߊ߬ ߞߟߌߟߌ ߞߍ߫ ߟߊ߬ߡߌߣߌ߲ ߠߊߞߊ߲ߘߊ ߡߊ߬߸ ߊ߬ ߣߴߊ߬ߟߎ߫ ߘߍ߬ߢߐ߲߰ ߡߌ߬ߣߊ߬ߣߍ߲ ߠߎ߬ ߓߌ߬ߟߊ߬ ߞߏ ߟߊ߫.
ߊ߬ߟߎ߫ ߞߊ߬ ߕߊ߲߬ߘߏ߬ߟߌ ߟߊߛߋ߫ ߡߐ߰ ߟߎ߫ ߡߊ߬߸ ߡߐ߰ߓߊ ߡߍ߲ ߠߎ߬ ߞߵߊ߬ߟߎ߫ ߘߍ߬ߡߍ߲߬߸ ߦߏ߫ ߡߊ߬ߓߏ߲߬ߧߊ߬ߕߊ ߛߋߞߎ߬ ߛߥߊ߬ߣߍ߫߸ ߞߍ߬ߣߍߡߊ߲߬ߘߋ߲߫ ߢߊ߰ߛߏ߬ߟߊ߫ ߡߐ߰ߓߊ߸ ߊ߬ ߣߌ߫ ߡߊ߲߬ߘߋ߲߬ ߓߏߟߏ߲ ߡߐ߰ߓߊ߸ ߟߊ߱ߖߌ߬ ߡߊ߬ߡߊ߬ߘߌ߫ ߛߘߌ߬ߓߋ߫߸ ߞߵߏ߬ ߟߊ߫ ߡߊ߬ߡߊ߬ߘߌ߫ ߛߌ߬ߟߊ߫ ߞߊ߲߬߸ ߕߐ߬ߔߑߛߌ߬߸ ߊ߬ߟߋ ߡߍ߲ ߦߋ߫ ߛߌ߯ߙߌ߲߫ ߠߊߥߙߎߞߌ ߘߋ߲ߡߌߛߍ߲ ߠߎ߬ ߟߊ߫ ߘߍ߭ ߓߋߟߋ߲ߕߌ߮ ߘߌ߫، ߊ߬ߟߎ߫ ߞߊ߬ ߝߏ߬ߟߌ߬ ߞߋߟߋ߲ ߏ߬ ߢߐ߲߰ ߠߊߛߋ߫ ߞߘߊߝߌ߫ ߡߊ߬߸ ߏ߬ ߡߍ߲ ߕߏߣߍ߲߫ ߞߐߞߊ߲߬ ߞߊ߬ ߔߏߞߑߟߍ߲߫ ߞߏ ߣߌ߲߬ ߞߍ߬ߟߍ ߞߍ߫߸ ߞߊ߬ ߘߋ߲ߡߌߛߍ߲ ߠߎ߬ ߘߍ߬ߡߍ߲߫ ߝߊ߬ ߓߘߊ ߘߐߕߌߢߍ ߛߍ߬ߘߏ߲ ߠߊ߫.
ߊ߬ߟߎ߬ ߘߊߘߐ߫ ߞߊ߲ ߠߎ߬ ߘߐ߫߸ ߊ߬ߟߎ߫ ߕߍ߬ߘߍ߫ ߊ߬ ߟߊߛߐ߲ߞߐ ߞߊ߲߬߸ ߞߏ߫ ߊ߬ߟߎ߬ ߕߍ߫ ߛߣߌߥߊ ߟߎ߫ ߝߍ߬߸ ߊ߬ߟߎ߬ ߕߍ߫ ߔߏߞߑߟߍ߲߫ ߞߏ ߝߍ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
