ߊߓߎߓߞߊߙ ߛߘߌߞߌ߬ ߖߊ߬ߞߌ߬ߕߋ߬ ߡߍ߲ ߡߊߟߐ߲ߣߍ߲߫ ߓߍ߯ ߓߟߏ߫ <<ߕߎ߲ߓߊ߫>> ߕߐ߮ ߡߊ߬߸ ߏ߬ ߟߊ߫ ߞߏ ߓߘߊ߫ ߞߍ߫ ߥߙߊ߬ߒ߬ߘߊ߬ߡߊ ߘߌ߫ ߊ߬ ߟߊ߫ ߥߛߎ ߣߴߊ߬ ߟߊ߫ ߖߊ߲߬ߞߌ߬ߟߌ ߕߐ߬ ߟߊ߬ߓߊ߲ ߣߌ߲߬ ߘߐ߫، ߘߊ߬ߘߌߛ ߞߡߊ߬ߙߊ߬ ߟߊ߫ ߗߡߍ߬ ߓߙߋߡߊ߫ ߞߘߐ߬ߡߊ߲ ߟߊߓߐ߫ ߘߊ߫ ߞߐߣߊߞߙߌ߫ ߥߛߎߖߌ߲ߓߊ߫ <<ߞߐ߬ߙߐ߲߬ߕߌ߬>> ߟߊ߫ ߞߊ߬ ߥߴߊ߬ ߘߌ߫ <<ߞߐ߰ߦߊ߬ ߥߛߎߖߌ߲ߓߊ>> ߡߍ߲ ߠߊ߫߸ ߊ߬ ߓߘߊ߫ ߕߐ߬ߡߐ߲߬ ߌߞߐ߫ ߞߵߊ߬ ߟߊߓߐ߫ ߦߋ߲߬، ߊ߬ ߘߏ߲߬ ߠߊ߫ ߟߊ߬ߝߛߊ߬ߟߌ߬ߟߊ ߟߎ߬ ߓߘߴߊ߬ߟߎ߬ ߘߊߣߐ ߕߏ߫ ߊ߬ ߟߊ߫ ߞߏ ߡߊ߬ ߕߟߋ߬ߝߌ߬ߟߊ߬ߣߍ߲߫ ߕߊ߬ߡߌ߲߬ߣߍ߲ ߣߌ߲߬ ߘߐ߫߸ ߞߏ߫ ߊ߬ ߟߊ߫ ߞߏ ߤߊߡߌ߲ ߞߊ߫ ߞߊ߲߫ ߞߊ߬ ߛߌ߰ ߡߐ߰ ߟߊ߫ ߞߊ߬ ߓߍ߲߬ ߊ߬ ߝߊ߬ߘߌ߬ ߞߘߐ߬ ߞߏ ߡߊ߬ ߞߍ߲ߘߍߦߊ ߛߌߟߊ ߝߍ߬.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߠߎ߬ ߘߐ߫ ߞߊ߬ ߝߘߊ߫ ߖߌ߬ߣߍ߫ ߝߐ߰ߓߍ߬ߘߊ߬ ߛߌߦߊߡߊ߲߫ ߠߊ߫߸ ߕߎ߲ߓߊ߬ ߟߊ߫ ߟߊ߬ߝߛߊ߬ߟߌ߬ߟߊ ߘߏ߫ ߞߵߊ߬ ߝߐ߫ ߞߏ߫ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߓߘߊ߫ ߟߊߓߐ߫ ߞߐ߰߰ߦߊ߬ ߥߛߎߖߌ߲ߓߊ ߟߊ߫ ߛߎ߫ ߕߊ߬ߡߌ߲߬ߣߍ߲ ߣߌ߲߬ ߘߐ߫߸ ߂߀߂߆ ߕߙߊߓߊ ߕߋ߬ߟߋ߫ ߂߂ ߛߎ ߞߵߊ߬ ߘߎ߰ߛߊ ߜߍ߫ ߂߃ ߢߌ߲߬ ߠߊ߫، ߊ߬ߟߎ߬ ߞߊ߲߫ ߞߏ߫ ߡߐ߰ ߟߎ߫ ߟߋ߬ ߥߊ߫ ߘߴߊ߬ ߟߊߓߐ߫߸ ߡߍ߲ ߠߎ߬ ߟߐ߲ߣߍ߲߫ ߕߍ߫، ߞߊ߬ߕߎ߲߯߸ ߞߊ߬ߙߊ߲߬ߡߐ߰ ߔߏߟ ߦߏ߲߬ߓߊ߫ ߞߙߎ߬ߡߊ߫ ߞߵߊ߬ ߦߌ߬ߘߊ߬ ߞߏ߫: <<ߊ߬ ߟߊߓߐ߫ ߘߊ߫ ߞߐ߰ߦߊ߬ ߥߛߎߖߌ߲ߓߊ ߟߊ߫ ߄ߕߎߡߊ ߟߋ߬ ߟߊ߫، ߞߵߊ߬ ߕߊ߬ ߏ߬ ߡߊ߬ ߤߊ߲߯ ߕߋ߲߬߸ ߊ߬ ߦߙߐ߫ ߟߐ߲ߣߍ߲߫ ߕߍ߫߸ ߊ߬ ߡߊ߫ ߟߐ߲߫ ߊ߲ ߓߟߏ߫ ߊ߬ ߟߊߕߊ߯ߣߍ߲߫ ߝߊ߲߬ ߞߋߟߋ߲߫ ߛߌ߫ ߘߐ߫.>> ߔߏߟ ߦߏ߲߬ߓߊ߫ ߟߋ߬ ߞߊ߬ ߣߌ߲߬ ߝߐ߫߸ ߊ߬ ߦߋ߫ ߢߊ ߕߎ߲߬ ߦߴߊ߬ ߦߌ߬ߘߊ߬ ߟߊ߫ ߞߎߡߊ ߣߌ߲߬ ߝߐ߫ ߕߎߡߊ߸ ߞߏ߫ ߊ߬ ߡߐߣߍߣߍ߲߫ ߞߏߛߓߍ߫.
ߤߊ߲߯ ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߞߕߌ ߝߊ߰ߡߊ ߟߎ߫ ߓߊ߬߸ ߥߛߎ ߞߏߟߊߕߍ߮ ߟߎ߫ ߓߊ߬߸ ߏ߬ ߟߎ߬ ߛߌ߫ ߡߊ߫ ߝߋ߲߫ ߝߐ߫ ߡߎߣߎ߲߬، ߞߎ߲߬ߠߊ߬ߛߌ߮ ߡߊ߫ ߟߊ߬ߛߋ߬ߟߌ߬ ߜߘߍ߫ ߛߌ߫ ߞߍ߫ ߡߎߣߎ߲߬ ߞߊ߬ ߛߌߞߊ ߣߌ߫ ߕߡߊ߬ߖߌ ߓߐ߫ ߡߐ߱ ߟߎ߬ ߘߐ߫، ߒ߬ߓߊ߬߸ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߣߌ߫ ߒ ߞߵߊ߬ ߡߍ߲߸ ߏ߬ ߟߋ ߓߊ߯ߙߊ߫ ߟߊ߫ ߖߡߊ߬ߣߊ ߞߣߐ߫ ߕߎ߲ߓߊ߬ ߟߊ߫ ߞߏ ߘߐ߫ ߕߋ߲߬߸ ߤߊ߲߯ ߞߎ߲߬ߊߠ߬ߛߌ߮ ߦߋ߫ ߞߊ߲߫ ߞߋߟߋ߲߫ ߝߐ߫ ߕߎ߬ߡߊ ߡߍ߲ ߠߊ߫، ߡߍ߲ ߖߎ߯ߡߊ߲߫ ߣߌ߲߬ ߞߏ ߘߐ߫ ߊ߬ ߕߐ߭ ߓߍ߯ ߘߌ߫߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߞߐߣߊߞߙߌ߫ ߞߐ߬ߙߐ߲߬ߕߌ߲߬ ߥߛߎߖߌ߲ߓߊ ߟߊ߫߸ ߊ߬ ߘߏ߲߬ ߕߍ߫ ߞߐ߰ߦߊ߬.
ߒ߬ߓߊ߬߸ ߕߎ߲ߓߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫߸ ߞߏ߫ ߊ߬ߟߎ߬ ߓߘߊ߫ ߕߊ߯ߡߊ ߘߊߡߌ߬ߣߊ߬ ߞߊ߬ߦߌ߯ ߞߋߟߋ߲߬߸ ߞߊ߬ ߛߋ߫ ߕߋߟߋ߲ߓߊ߯ߦߊ ߞߏߕߌ߮ ߝߍ߬߸ ߖߐ߲߰ߛߊ߫ ߞߊ߲߫ ߞߋߟߋ߲߫ ߘߌ߫ ߝߐ߫ ߊ߬ߟߎ߬ ߦߋ߫߸ ߞߊ߬ ߓߍ߲߬ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߥߊ߫ ߦߙߐ߫ ߞߏ ߡߊ߬߸ ߊ߬ ߣߌ߫ ߞߵߊ߬ ߟߐ߲߫ <<ߞߏ߫ ߞߋߟߋ߲ ߡߍ߲ ߕߊ߬ߡߌ߲߬ߣߍ߲߬ ߖߊ߯ߕߋ߫.>> ߓߊߏ߬߸ ߞߏ߫ ߊ߬ߟߎ߬ ߕߍ߫ ߛߴߊ߬ߟߎ߬ ߢߊ ߓߍ߲߬ ߠߊ߫߸ ߊ߬ߟߎ߬ ߟߊ߫ ߟߊ߬ߝߛߊ߬ߕߊ ߤߊߞߍ ߦߋ߫ ߓߐ߫ ߊ߬ ߓߟߏ߫ ߣߌ߲߬ ߢߊ߫ ߛߎ߮ ߡߊ߬ ߦߋ߲߬ ߕߋ߲߬.
ߟߎ߫ ߦߴߊ߬ ߟߐ߲߫߸ ߕߎ߲ߓߊ߬ ߖߊ߬ߞߌ߬ߕߋ߫ ߡߌ߬ߣߊ߬ ߘߊ߫ ߂߀߀߉ ߕߎߟߊߝߌ߲ ߂߈ ߖߊ߲߬ߖߏ߲ ߞߏߢߊ ߟߋ߬ ߘߐ߫߸ ߞߵߊ߬ ߞߕߌ߫ ߏ߬ ߘߐ߫ ߞߵߊ߬ ߦߋ߫ ߛߐ߲߬ߡߊ߬ ߘߌ߫߸ ߊ߬ߟߎ߫ ߞߊ߬ ߛߊ߲߬ ߕߊ߲߫ ߥߛߎ ߟߴߊ߬ ߞߎ߲߬، ߊ߬ ߞߵߏ߬ ߡߍ߲ ߝߊ߲߬ߓߊ ߘߊߡߌ߬ߣߊ߬ ߞߐߣߊߞߙߌ߫ ߥߛߎߖߌ߲ߓߊ ߟߊ߫، ߊ߬ ߟߊߓߐ߫ ߘߊ߫ ߦߋ߲߬ ߞߏ߲ߞߏߜߍ߫ ߞߊߙߏ߫ ߛߊ߬ߣߍ߲ ߕߟߋ߬ ߁߀ ߠߋ߬ ߡߊ߬߸ ߞߵߊ߬ ߟߊߕߊ߯ ߞߐ߰ߦߊ߬ ߥߛߎߖߌ߲ߓߊ ߟߊ߫߸ ߏ߬ ߘߏ߲߬ ߝߣߊ߫ ߞߎߡߊ ߛߌߦߊߦߊ߫ ߘߊ߫ ߓߊߟߋ߬ ߏ߬ ߕߎ߬ߡߊ ߟߊ߫. ߞߎ߲߬ߢߐ߲߯ ߕߊ߬ߡߌ߲߬ߣߍ߲ ߡߍ߲ ߝߣߊ߫ ߦߋ߫ ߕߋ߲߬߸ ߊ߬ ߟߊ߫ ߡߐ߱ ߟߎ߫ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߵߊ߬ ߟߊߞߐ߬ߛߊ߬ߦߌ߲߫ ߠߋ߬ ߞߐߣߊߞߙߌ߫ ߥߛߎߖߌ߲ߓߊ ߟߊ߫߸ ߛߴߊ߬ ߘߌ߫ ߛߴߊ߬ ߟߊ߫ ߘߊ߲ߘߊߟߌ ߞߍߍ߫ ߟߴߊ߬ ߝߙߍߡߊ߬ ߦߋ߲߬ ߢߊ ߡߍ߲ ߡߊ߬.
ߒ߬ߓߊ߬߸ ߏ߬ ߟߋ ߞߏߢߊ ߓߘߊ߫ ߦߟߍ߬ߡߊ߲߬ ߢߊ߫ ߜߘߍ߫ ߞߊ߲߬ ߣߌ߲߬ ߓߌ߬، ߊ߬ ߟߊߞߐߛߊ߬ߦߌ߲߬ ߞߏ߬ ߞߎߡߊ ߟߋ߬ ߕߎ߲߬ ߦߴߌߘߐ߫߸ ߊ߬ ߓߘߊ߫ ߟߊߕߎߣߎ߲߫ ߡߎߣߎ߲߬߸ ߦߊ߬ߣߌ߫ ߢߊߝߐߟߌ߫ ߞߍߕߐ߫ ߊ߬ ߥߊ߫ ߦߙߐ߫ ߞߏ ߞߊ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
