ߞߊ߲ߞߊ߲߫ ߞߣߐ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߞߙߎߞߊ ߞߐߡߊߓߌ߲ߓߌ߲ߓߊ߯ ߘߋ߲ߡߌߛߍ߲ ߘߏ߫ ߟߎ߫ ߟߋ߬ ߣߐ߬ ߟߊ߬ߞߐ߰ߟߌ߫ ߛߐ߬ߘߐ߲߬ ߠߊ߫߸ ߞߏ߫ ߟߊߥߊ߲ߞߊ߲ ߣߌ߫ ߘߐ߬ߖߌ߬ߓߊ߬ߙߏ߬ߟߌ ߞߏߛߐ߲߬߸ ߛߴߊ߬ߟߎ߬ ߘߌ߫ ߛߴߊ߬ߟߎ߬ ߟߊ߫ ߓߊ߯ߙߊ ߏ߬ ߞߍ߫ ߟߴߊ߬ ߢߌ߬ߡߊ ߟߊ߫ ߢߊ ߡߍ߲ ߡߊ߬. ߟߊ߬ߞߐ߰ߟߌ ߏ߬ ߟߋ ߘߟߊߞߊ߬ ߘߊ߫ ߞߍ߲ߘߍߟߏ߲ ߂߀߂߆ ߕߙߊߓߊ ߕߙߊߓߊ ߕߋ߬ߟߋ߫ ߂߁߸ ߞߵߊ߬ ߛߌ߰ ߞߊ߯ߙߌ ߟߊ߫ ߕߙߊߓߊ ߕߋ߬ߟߋ߫ ߂߂، ߊ߬ ߛߌ߰ ߘߊ߫ ߛߋ߲߬ߠߊ߫ ߞߊ߲ߞߊ߲߫ ߓߙߊߡߊߖߊ߲ߓߊ߲ ߗߋߕߌ߯ߘߊ ߟߋ߬ ߓߟߏ߫߸ ߞߵߊ߬ ߟߊߥߌ߬ߟߌ߫ ߊ߬ߟߎ߬ ߟߊ߫ ߞߎߡߊ߫ ߟߊߛߋߟߊ ߟߎ߬ ߛߋߞߏߦߊ ߡߊߞߊ߬ߝߏ ߡߊ߬߸ ߛߴߊ߬ߟߎ߬ ߘߌ߫ ߛߴߊ߬ߟߎ߬ ߟߊ߫ ߘߐ߬ߖߌ߬ߓߊ߬ߙߏ߬ߟߌ߬ ߓߊ߯ߙߊ ߟߎ߬ ߞߍ߫ ߟߊ߫ ߢߊߟߐ߲ ߣߌ߫ ߞߎ߬ߛߊ߲߬ߧߊ ߟߊ߫ ߢߊ ߡߍ߲ ߡߊ߬.
ߘߋ߲ߡߌߛߍ߲ ߠߎ߬ ߢߌ߲߬ ߠߎ߬ ߟߊߘߍ߬ ߘߊ߫ ߕߏ߰ߝߏ ߝߘߏ߬ߓߊ߬ ߞߌ߲ߘߊ ߟߋ߬ ߟߊ߫߸ ߡߙߌߦߊ߫ ߞߋߟߋ߲߫ ߔߋ߫ ߞߊ߲߬: ߞߊ߬ ߛߋ߫ ߓߌ߬ߟߊ߬ߢߐ߲߰ߡߊ ߞߊ߬ߙߊ߲߬ ߠߊ߫ ߞߵߊ߬ ߟߐ߲߫߸ ߞߵߊ߬ߟߎ߬ ߛߋߞߏߦߊ ߟߎ߬ ߡߊߞߊ߬ߝߏ߬، ߕߋ߬ߟߋ߫ ߝߌ߬ߟߊ ߣߌ߲߬ ߞߣߐ߫߸ ߊ߬ߟߎ߫ ߞߊ߬ߙߊ߲߬ ߘߊ߫ ߞߏ߫ ߛߌߦߊߡߊ߲߫ ߠߋ߬ ߟߊ߫߸ ߡߍ߲ ߘߴߊ߬ߟߎ߫ ߘߍ߬ߡߍ߲߬ ߊ߬ߟߎ߬ ߟߊ߫ ߓߊ߯ߙߊ ߘߐ߫.
ߊߟߎ߫ ߓߍ߯ ߟߊߘߍ߬ߣߍ߲ ߞߵߊ߬ ߟߐ߲߫ ߞߏ߫ ߘߍ߬ߞߙߏߝߏ ߞߊ߲߬ߠߊ ߟߎ߬ ߓߘߊ߫ ߞߍ߫ ߞߌ߬ߓߊ߬ߙߏ߬ ߟߛߊ߬ߙߌ߬ ߦߙߐ߫ ߟߋ߬ ߘߌ߫ ߓߌ߬߸ ߡߍ߲ ߢߊ߱ ߛߌߦߴߊ߬ ߖߌ ߘߌ߫، ߏ߬ ߟߋ ߘߐ߫߸ ߘߎ߲߬ߓߎߦߊ߬ ߟߊ߫ ߞߙߎߞߊ ߣߌ߲߬ ߞߏߟߊߕߍ߮ ߟߎ߬ ߞߊ߲߫ ߞߏ߫ ߊ߬ߟߎ߬ ߕߴߊ߬ ߝߍ߬ ߔߕߊ߬ߞߊ߬ߙߌ߬ߦߊ߬ ߞߏ߫ ߛߌ߫ ߟߋ߬ ߦߋ߫ ߦߋ߫ ߊ߬ߟߎ߬ ߟߊ߫ ߞߎߡߊ߫ ߟߊߛߋߟߊ ߢߌ߲߬ ߠߎ߫ ߣߐ߬ ߘߐ߫، ߏ߬ ߡߍ߲ ߦߴߊ߬ߟߎ߬ ߡߊߣߐ߯ ߞߏ ߘߌ߫.
ߏ߬ ߟߋ ߘߐ߫߸ ߛߊߟߌߡߎ߫ ߞߌߛߑߡߊ߬ ߝߏߝߣߊ߫ ߞߊ߬ ߢߊߝߐߟߌ߫ ߞߍ߫ ߞߊ߬ ߓߍ߲߬ ߟߊ߬ߞߐ߰ߟߌ ߣߌ߲߬ ߞߍ߫ ߞߎ߲ ߣߴߊ߬ ߕߐ߬ߣߐ ߡߊ߬: <<ߓߌ߬ߟߊ߬ߢߐ߲߰ߡߊ ߦߋ߫ ߞߟߍ߬ߡߎߙߊ߲ ߠߋ߬ ߘߌ߫ ߓߌ߬ ߢߐ߲߰ ߟߏ߲߫، ߓߊ߬ߙߌ߬߸ ߊ߲ ߓߍ߯ ߦߴߊ߬ ߞߊ߬ߟߊߡߊ߬ ߞߏ߫ ߕߌߢߍߟߌ߫ ߛߌߦߊߡߊ߲߫ ߠߋ߬ ߝߣߊ߫ ߦߋ߫ ߞߍ߫ ߟߴߊ߬ ߘߐ߫، ߣߴߊ߲ ߕߏ߫ ߘߊ߫ ߏ߬ ߘߐ߫߸ ߊ߲ ߡߊ߫ ߞߏ ߘߏ߫ ߞߍ߫߸ ߏ߬ ߘߌ߫ ߞߍ߫ ߕߙߎ߬ ߘߌ߫ ߞߵߊ߲ ߠߊ߫ ߕߏ߰ߝߏ ߡߊߣߐ߯، ߏ߬ ߟߋ ߘߐ߫߸ ߊ߲ ߞߵߊ߬ ߢߊߦߋ߫ ߞߏ߫ ߡߍ߲ ߞߊ߫ ߢߌ߲߬߸ ߏ߬ ߟߊ߬ߞߐ߰ߟߌ ߘߏ߫ ߛߌ߲߬ߝߏ߲߬ߧߊ ߘߌ߫߸ ߞߊ߬ ߛߴߊ߲ ߠߊ߫ ߘߐ߬ߖߌ߬ߓߊ߬ߙߏ߬ߟߌ߬ߟߊ ߟߎ߬ ߞߕߋ ߞߘߐߕߊ߬ ߟߊ߫ ߓߘߍߞߍ߭.>> ߛߊߟߌߡߎ߫ ߟߋ߬ ߞߊ߲߫ ߕߋ߲߬.
ߟߊ߬ߞߐ߰ߟߌ ߣߌ߲߬ ߓߏ߬ߙߌ߬ ߘߊ߫ ߘߊߞߎ߲߫ ߛߌߦߊߡߊ߲߫ ߠߋ߬ ߞߊ߲߬߸ ߦߏ߫ ߛߓߍߟߌ ߞߍߢߊ ߟߎ߬߸ ߘߍ߬ߞߙߏߝߏ ߟߎ߬ ߡߊߡߙߊ߬ ߢߊ߸ ߓߘߍ߬ߓߘߍ߬ߟߌ ߘߐ߬ߖߌ߬ߓߊ߬ߙߏ߬ߟߌ ߞߍߢߊ߸ ߞߵߏ߬ ߟߊ߫ ߘߟߊߛߎ߲ߓߎߟߌ ߞߍߢߊ ߣߌ߫ ߖߌ߬ߦߊ߬ߓߍ ߣߌ߫ ߖߌ߬ߦߊ߬ߖߟߎ ߟߎ߬ ߛߏ߯ߙߏ߫ ߢߊ ߞߊ߲߬.
ߟߊ߬ߞߐ߰ߟߌ߬ߟߊ ߞߍ߫ ߘߊ߫ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎ߬ߦߊ߫ ߟߋ߬ ߘߌ߫߸ ߊ߬ߟߋ ߞߵߊ߬ ߦߌ߬ߘߊ߬ ߞߏ߫ ߓߌ߬ߟߊ߬ߢߐ߲߰ߡߊ ߢߊߟߐ߲ ߦߋ߫ ߛߋ߲ߛߋߘߋ߲ ߠߋ߬ ߘߌ߫ ߓߘߍ߬ߓߘߍ߬ߟߌ ߛߌ߲߬ߝߏ߲߬ߘߊ ߓߍ߯ ߞߊ߲߬.
<<ߡߊߣߊ߲ߞߎ߲ ߡߍ߲ ߓߊ߯ ߞߍ߫ ߓߘߍ߬ߓߘߍ߬ߟߌ߬ ߞߙߎߞߊ ߟߊ߫߸ ߏ߬ ߟߋ ߓߌ߬ߟߊ߬ߢߐ߲߰ߡߊ ߘߌ߫، ߣߴߊ߬ ߡߊ߫ ߞߍ߫ ߊ߬ ߢߌ߬ߡߊ ߟߊ߫߸ ߊ߬ ߘߌ߫ ߛߴߊ߬ ߡߊߣߐ߯ ߟߊ߫، ߊ߲ ߧߋ߫ ߦߊ߲߬ ߏ߬ ߟߋ ߘߐ߫߸ ߞߵߊ߬ ߦߌ߬ߘߊ߬߸ ߡߐ߰ ߘߌ߫ ߡߎ߲߬ ߝߐ߫߸ ߡߐ߰ ߘߌ߫ ߡߎ߲߬ ߡߊߕߊ߲߬ߞߊ߬߸ ߣߴߌ ߦߴߊ߬ ߝߍ߬ ߞߊ߬ ߞߎߡߊ߫ ߖߊ߬ߡߊ ߝߍ߬߸ ߏ߬ ߞߎߡߊ ߦߋ߫ ߞߍ߫ ߟߊ߫ ߘߌ߬߸ ߊ߬ ߛߓߍߟߌ ߦߋ߫ ߞߍ߫ ߟߊ߫ ߘߌ߬.>> ߊ߬ ߞߵߏ߬ ߦߌ߬ߘߊ߬.
ߕߘߍ߬ߒ߬ߘߐ߬ߓߊ߮ ߟߎ߫ ߞߊ߬ߙߊ߲߬ ߘߊ߫ ߘߟߊߛߎ߲ߓߎߟߌ ߞߍߢߊ ߟߊ߫ ߟߊ߬ߞߐ߰ߟߌ ߣߌ߲߬ ߘߐ߫߸ ߞߵߊ߬ߟߎ߫ ߞߊ߬ߙߊ߲߫ ߡߐ߰ߓߊ ߟߎ߬ ߟߊ߫ ߞߐߜߍ ߡߊߡߙߊ߬ ߢߊ ߟߊ߫߸ ߛߴߊ߬ߟߎ߬ ߘߌ߫ ߝߊߘߌ߲ߢߊ߫ ߘߎߢߊ߫ ߢߎߡߍߙߋ߲߫ ߕߟߋ ߣߌ߲߬ ߘߐ߫.
<<ߛߌߦߊߡߊ߲߫ ߦߴߊ߬ߟߎ߬ ߘߐ߫߸ ߡߍ߲ ߠߎ߬ ߦߋ߫ ߘߟߊߛߎ߲ߓߎߟߌ ߟߎ߬ ߞߍ߫ ߟߊ߫߸ ߓߊ߬ߙߵߊ߬ߟߎ߬ ߡߊ߫ ߟߊߞߐ߯ ߊ߬ ߟߊ߫، ߊ߲ ߣߐ߬ ߊ߬ߟߎ߫ ߞߊ߬ߙߊ߲߬ ߠߊ߫ ߞߏ ߓߊߖߎ ߟߋ߬ ߟߊ߫: ߢߌ߬ߣߌ߲߬ߞߊ߬ߟߌ߬ ߓߘߍ ߦߋ߫ ߞߍ߫ ߟߊ߫ ߘߌ߬߸ ߡߐ߰ ߘߌ߫ ߡߎ߲߬ ߡߊߕߊ߲߬ߞߊ߲߬߸ ߊ߬ ߣߌ߫ ߡߐ߬ߟߐ߲ ߦߋ߫ ߛߋ߫ ߟߊ߫ ߘߌ߫ ߟߊ߫ ߟߌ߬ߤߟߊ ߡߊ߬ ߘߌ߬.>> ߟߊ߬ߞߐ߰ߟߌ߬ߟߊ ߞߵߏ߬ ߝߙߊ߬ ߞߎߡߊ ߞߊ߲߬.
ߟߊ߬ߞߐ߰ߓߊ߰ߕߐ ߟߎ߬ ߛߍߥߊ߫ ߘߊ߫ ߟߋ߬ ߟߊ߬ߞߐ߰ߟߌ ߢߌ߲߬ ߠߊ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߢߊ߯ߟߋ߲ߣߍ߲߫ ߠߋ߬، ߞߊ߬ߕߎ߲߯߸ ߞߏ߫ ߟߊ߬ߞߐ߰ߟߌ ߣߌ߲߬ ߞߍߣߍ߲߫ ߓߍ߲߬ߒ߬ߛߋ߲߬ߡߊ߫ ߟߋ߬ ߘߴߊ߬ߟߎ߬ ߦߋ߫߸ ߞߵߊ߬ߟߎ߬ ߟߝߊߘߌ߲ߧߊ߫ ߊ߬ߟߎ߬ ߟߊ߫ ߓߊ߯ߙߊ ߘߐ߫.
ߦߊߤߦߊ߬ ߞߋߕߊ߬ ߞߵߏ߬ ߟߊߒߡߊ ߘߏ߫ ߦߌ߬ߘߊ߬߸ ߊ߬ߟߋ ߡߍ߲ ߦߋ߫ ߟߊ߬ߞߐ߰ߟߌ ߣߌ߲߬ ߕߘߍ߬ߒ߬ߘߐ߬ߓߊ߮ ߘߏ߫ ߘߌ߫: <<ߊ߲ ߓߘߊ߫ ߞߏ߫ ߛߌߦߊߡߊ߲߫ ߟߐ߲߫ ߦߊ߲߬، ߝߟߐ߫ ߕߘߍ߬߸ ߞߏ߫ ߛߌߦߊߡߊ߲߫ ߠߋ߬ ߕߎ߲߬ ߞߵߊ߲ ߠߊ߫ ߞߎߡߊ ߞߍߢߊ ߟߎ߫ ߖߊ߲߬، ߓߊ߬ߙߌ߬ ߓߌ߬߸ ߊ߲ ߓߘߴߊ߬ ߟߐ߲߫ ߞߏ߫ ߖߊ߰ ߊ߬ ߞߍߢߊ߫ ߓߘߍ ߦߋ߫ ߦߋ߲߬، ߟߊ߬ߞߐ߰ߟߌ ߞߐ ߣߌ߲߬ ߘߐ߫߸ ߊ߲ ߘߴߊ߲ ߠߊ߫ ߘߐ߬ߖߌ߬ߓߊ߬ߙߏ߬ߟߌ ߞߍߢߊ ߟߎ߬ ߘߊߘߐߓߍ߲߬ ߞߏߛߓߍ߫.>> ߊ߬ ߞߵߏ߬ ߟߋ ߝߐ߫.
ߟߊ߬ߞߐ߰ߟߌ ߣߌ߲߬ ߕߍߣߊ߬ ߘߊ߲߬ ߠߊ߫ ߛߋ߲߬ߢߊ߬ ߞߋߟߋ߲ ߣߌ߲߬ ߘߐߙߐ߲߫ ߡߊ߬، ߟߊ߬ߞߐ߰ߟߌ߬ ߜߘߍ߫ ߟߎ߫ ߓߍߣߊ߬ ߞߍ߫ ߊ߬ߟߎ߬ ߓߟߏ߫ ߞߊ߲ߞߊ߲߫ ߡߙߊ߬ߓߊ߰ߘߊ ߞߣߐ߫߸ ߛߴߊ߬ߟߎ߬ ߟߊ߫ ߓߌ߬ߟߊ߬ߢߐ߲߰ߡߊ ߞߣߐ ߘߌ߫ ߘߐߘߎ߲߬ߧߊ߫ ߞߵߊ߬ ߓߊ߲ߓߊ߲߫.
<<ߓߌ߬߸ ߡߐ߰ ߄߀ ߠߋ߬ ߟߊߞߐ߯ߣߍ߲߫ ߦߊ߲߬، ߏ߬ ߘߏ߲߬ ߥߊߕߐ߫ ߊ߬ ߡߊ߬ ߟߋ߬߸ ߦߊ߲߬ ߓߊ߬߸ ߊ߬ ߣߌ߫ ߦߙߐ߫ ߜߘߍ߫ ߟߎ߫ ߘߐ߫، ߊ߲ ߓߘߊ߫ ߘߐ߬ߓߍ߲ ߠߎ߬ ߞߍ߫߸ ߛߊ߫ ߏ߬ ߞߏߢߊ ߘߌ߫ ߛߌߟߊ߫ ߛߐ߬ߘߐ߲߬ ߢߊ ߡߍ߲ ߡߊ߬.>> ߛߊߟߌߡߎ߫ ߞߵߏ߬ ߝߐ߫ ߞߵߊ߬ ߟߊߕߍ߰.
ߛߌߟߊ߫ ߞߋߟߋ߲ ߢߌ߲߬ ߠߋ߬ ߝߍ߬߸ ߖ߭ߋ.ߍߡ.ߘߋ ߦߴߊ߬ ߝߍ߬ ߞߵߊ߬ߟߎ߬ ߟߊ߫ ߘߋ߲ߡߌߛߍ߲߫ ߞߟߊߓߎ߫ ߞߍ߲ߘߍ ߟߎ߬ ߟߊߞߐ߯ ߜߊߟߌߜߊߟߌ߫߸ ߛߴߊ߬ߟߎ߬ ߘߌ߫ ߛߋ߫ ߞߎߡߊ ߞߍߢߊ ߟߎ߬ ߟߊ߫ ߓߟߐߟߐ߫ ߞߊ߲ߠߊ ߟߎ߬ ߘߐ߫ ߢߊ ߡߍ߲ ߡߊ߬، ߊ߬ ߞߏ߬ߣߌ߲߸ ߞߊ߲ߞߊ߲߫ ߘߋ߲ߡߌߛߍ߲ ߠߎ߬ ߓߘߊ߫ ߛߌߟߊ ߦߋ߫߸ ߊ߬ߟߎ߬ ߘߌ߫ ߛߴߊ߬ߟߎ߬ ߟߊ߫ ߞߙߎߞߊ ߟߊ߫ ߓߊ߯ߙߊ ߞߍ߫ ߟߊ߫ ߢߊߟߐ߲ ߣߌ߫ ߞߎ߬ߛߊ߲߬ߧߊ ߘߐ߫ ߡߎ߬ߕߎ߲߬ ߝߋߎ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
