ߞߊ߲ߞߊ߲߫: ߓߊߛߌߓߐߟߊ ߛߊ߲߬ ߇߀ ߡߊߛߎߘߎ߲ߧߊ ߘߏ߫ ߟߋ߬ ߟߊߣߍ߲ ߦߋߣߴߊ߬ ߟߊ߫ ߞߐ߲ߛߏ ߞߣߐ߫߸ ߕߐ߲ߓߟߏߡߊ ߟߎ߬ ߞߊ߲߫ ߞߏ߫ ߞߊ߬ ߘߊ߲ߘߊߟߌߟߊ ߟߎ߬ ߡߊߞߐ߬ߣߐ߲߬߸ ߛߙߋߦߊ ߘߏ߫ ߟߎ߫ ߦߴߊ߬ ߛߊ߬ ߞߏ ߟߋ߬ ߝߐ߫ ߟߊ߫

ߗߍ߭ ߘߏ߫ ߟߋ߬ ߟߊߣߍ߲ ߦߋߣߴߊ߬ ߟߊ߫ ߞߐ߲߬ߛߏ ߞߣߐ߫ ߒߓߊߟߌߦߊ߫ ߝߊ߬ߙߊ ߺ ߞߣߐ߫ ߓߌ߬ ߞߎߣߎ߲ߟߏ߲ ߡߊ߬߸ ߂߀߂߆ ߞߏ߲ߓߌߕߌ߮ ߂߈߸ ߦߍߛ ߟߊ߫ ߖߌߥߎߘߊ ߡߊ߬ߛߎߘߎ߲ߧߊ ߘߐ߫، ߊ߬ ߦߋ߫ ߢߊ ߘߐ߫߸ ߊ߬ ߟߊߣߍ߲߫ ߠߋ߬ ߕߍ߬ߘߍ߫ ߞߐ߲߬ߛߏ ߞߣߐ߫߸ ߊ߬ ߡߊ߫ ߟߐ߲߫ ߊ߬ ߦߋ߫ ߟߌ߬ߤߟߊ߬ ߞߋߟߋ߲ ߡߍ߲ ߘߐ߫، ߓߊߏ߬߸ ߕߐ߲ߓߟߏߡߊ ߟߎ߬ ߞߊ߲߫ ߞߏ߫ ߊ߬ߟߎ ߕߍ߫ ߛߴߊ߬ ߝߐ߫ ߟߊ߫ ߞߏ߫ ߊ߬ ߛߊ߬ߣߍ߲߫ ߠߋ߬ ߥߟߴߊ߬ ߛߊ߬ߣߍ߲߬ ߕߍ߫߸ ߞߏ߫ ߝߏ߫ ߞߊ߬ ߘߊ߲ߘߊߟߌߟߊ ߟߎ߬ ߟߊ߫ ߟߊ߬ߛߋ߬ߟߌ ߟߋ߬ ߡߊߞߐ߬ߣߐ߲߬، ߊ߬ ߞߏ߬ߣߌ߲߸ ߞߊ߲ߓߍ߲ ߞߕߌߞߊ߲ߘߊ ߟߊ߫ ߖߊ߬ߡߊߙߌ ߞߣߐߡߊ߬߸ ߊ߬ ߕߊ߬ ߘߊ߫ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߟߊ߫ ߞߏ ߢߊߢߌߣߌ߲߫ ߞߊ߲ߡߊ߬.

ߝߊ߰ߡߊ ߟߎ߬ ߞߍ߫ ߘߊ߫ ߣߌ߲߬ ߞߏ ߞߊ߬ߟߊߡߊ߬ ߞߵߊ߬ ߛߊߓߎ ߞߍ߫ ߞߌ߲߬ߕߌ߮ ߟߋ߬ ߘߌ߫، ߓߊߏ߬߸ ߊ߬ ߦߌ߬ߘߊ߬ߣߍ߲߫ ߞߏ߫ ߛߏߜߍ ߞߌ߲߬ߕߌ߰ ߛߙߍߞߍ ߟߋ߬ ߞߊ߬ ߡߌߛߌ߬ߙߊ߲߫ ߕߐ߲ߓߟߏߡߊߛߏ ߟߊߟߐ߲ߠߌ߲߫ ߣߌ߲߬ ߞߏ ߟߊ߫߸ ߏ߬ ߝߣߊ߫ ߞߵߊ߬ ߛߊ߲ߝߍ߫ ߡߐ߮ ߟߎ߬ ߟߊߟߐ߲ߠߌ߲߫، ߏ߬ ߞߎߡ ߢߊߝߐ߫ ߘߊ߫ ߞߊ߲ߞߊ߲߫ ߕߐ߲ߕߌ߯ߟߊ߫ ߕߐ߲ߕߌ߯ ߛߙߍߞߍ ߟߋ߬ ߓߟߏ߫߸ ߛߋߞߎ߫ ߡߊߙߌߦߊߡߊ߬ ߛߊ߬ߢߐ.

ߕߐ߲ߓߟߏߡߊ߫ ߞߎ߲ߕߌ߮ ߟߊ߫ ߝߐߟߌ߫ ߘߐ߫߸ ߞߏ߫ << ߓߌ߬ ߁߇ߙߋ߲ ߡߊ߬߸ ߡߌߛߌ߬ߙߊ߲߬ ߛߏߞߣߐߟߊ ߕߐ߲ߕߌ߯ߟߊ߫ ߞߵߊ߲ ߠߊ߫ ߕߐߕߌ߮ ߟߊߟߐ߲ߠߌ߲߫߸ ߏ߬ ߞߵߊ߲ߠߎ߬ ߝߣߊ߫ ߞߋߟߊ߫߸ ߞߏ߫ ߊ߲ ߧߋ߫ ߣߊ߬߸ ߞߊ߬ ߣߵߊ߬ ߡߊߝߟߍ߫، ߊ߲ ߣߊ߬ߣߍ߲߫ ߏ߬ ߟߋ ߘߐ߫ ߦߊ߲߬.>> ߕߐ߲ߕߌ߯ ߛߙߍߞߍ ߞߵߏ߬ ߝߐ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߛߋ ߦߋ߲߬߸ ߊ߬ߟߎ߫ ߞߵߊ߬ ߦߋ߫ ߞߐ߲߬ߛߏ ߘߏ߫ ߟߐ߬ߣߍ߲߬߸ ߕߦߏߕߊ߫ ߝ߭ߍߙߑߛߏ ߟߋ߬ ߏ߬ ߘߌ߫߸ ߡߍ߲ ߡߊߟߐ߲߫ ߝߙߍߕߍ ߦߋ߫: ߓߋ.ߓߋ.߈߈߀߄، ߊ߬ߟߋ ߞߍߢߊ ߟߵߏ߬ ߘߌ߫ ߞߊ߬ ߕߊߟߛߊߟߊ ߟߎ߬ ߣߌ߫ ߘߊ߲ߘߊߟߌߟߊ ߟߎ߬ ߣߌ߫ ߞߊ߲ߓߍ߲ ߞߕߌߞߊ߲ߘߊ ߟߊߟߐ߲ߠߌ߲߫.

ߕߐ߲ߕߌ߯ ߛߊ߬ߢߐ ߟߊ߫ ߝߐߟߌ߫ ߘߐ߫߸ ߗߍ߭ ߣߌ߲߬ ߘߌ߫ ߛߊ߲߬ ߇߀ ߢߐ߲߰ ߓߐ߫߸ ߡߛߏ߬ ߞߋߟߋ߲߫ ߦߴߊ߬ ߞߎ߲߬߸ ߊ߬ ߣߌ߫ ߘߋ߲߫ ߞߐ߬ߣߐ߲߬ߘߐ߬߸ ߡߛߏ߬ߡߊ߲߫ ߃ ߦߴߏ߬ ߘߐ߫.

ߟߊ߬ߞߙߐ߬ߛߌ߬ߟߌ ߓߍ߯ ߞߐߝߍ߬ ߦߋ߲߬߸ ߞߕߌߞߊ߲ߘߊ ߟߊ߫ ߖߊ߬ߡߙߌ ߞߣߐߡߊ߬߸ ߗߍ߭ ߕߊ߬ ߘߊ߫ ߢߊ ߏ߬ ߡߊ ߞߊ߬ ߥߴߊ߬ ߘߌ߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫߸ ߊ߬ ߟߊ߫ ߞߏ ߡߊߝߟߍ߫ ߞߊ߲ߡߊ߬.

ߣߌ߲߬ ߞߏ ߞߍߣߍ߲߫ ߦߙߐ ߡߍ߲ ߘߐ߫߸ ߦߋ߲߬ ߡߐ߮ ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߗߍ߭ ߖߍ߬ߘߍ ߟߋ߬ ߣߊ߬ ߘߴߊ߬ ߟߊ߫ ߞߐ߲߬ߛߏ ߞߣߐ߫، ߓߊߛߌߓߐߟߊ ߣߌ߲߬ ߖߌ߰ ߘߴߊ߬ ߖߘߍ߬ ߦߋ߫ ߟߋ߬߸ ߞߊ߬ ߓߊ߲߫ ߞߊ߬ ߦߍ߬ߟߍ߫ ߊ߬ ߞߣߐ߫ ߊ߬ ߖߘߍ߬ ߦߋ߫، ߊ߬ ߡߍ߲߫ ߘߴߊ߬ ߣߐ߭ ߘߐ߫ ߦߋ߲߬ ߠߋ߬ ߛߊ߫߸ ߊ߬ ߡߊ߫ ߛߋ߫ ߓߐ߫ ߟߊ߫ ߦߋ߲߬، ߝߏ߫ ߞߐ߲߬ߛߏ ߟߊ߫ ߞߏ ߞߎ߲ߝߊ߲ ߞߊ߬ ߛߌߟߊ߫ ߘߊߝߍ߫ ߡߐ߮ ߟߎ߫ ߛߐ߬ߘߐ߲߬ ߛߍߣߍ߲߬.

<<ߌߞߏߡߌ߲߬ ߡߐ߱ ߟߎ߬ ߓߘߴߊ߬ ߦߋ߫߸ ߞߐ߲߬ߛߏ ߓߘߊ߫ ߡߍ߲߫ ߊ߬ ߣߐ߭ ߘߐ߫ ߦߋ߲߬߸ ߊ߬ ߕߍ߫ ߥߊ߫ ߟߊ߫، ߏ߬ ߟߋ ߞߍߣߍ߲߫ ߡߐ߱ ߟߎ߬ ߡߊߘߏ߲߬ ߢߊ ߘߌ߫ ߞߐ߲߬ߛߏ ߟߊ߫، ߝߏ߫ ߊ߬ߟߎ߬ ߥߊ߫ ߘߴߊ߬ ߦߋ߫߸ ߊ߬ ߟߊߣߍ߲߫ ߞߐ߲߬ߛߏ ߞߣߐ߫ ߦߋ߲߬.>> ߕߐ߲ߕߌ߯ ߛߙߍߞߍ ߟߋ߬ ߞߊ߲߫ ߕߋ߲߬.

ߦߙߐ ߏ߬ ߘߐ߫ ߦߋ߲߬߸ ߡߐ߰ ߛߌߦߊߡߊ߲߫ ߞߵߊ߬ ߦߌ߬ߘߊ߬ ߞߏ߫ ߗߍ߭ ߛߊ߬ߣߍ߲߫ ߠߋ߬، ߊ߬ ߞߏ߬ߣߌ߲߸ ߊ߲ ߕߍ߫ ߛߴߊ߲ ߞߊ߲ߠߊߕߍ߰ ߟߵߏ߬ ߞߊ߲߬߸ ߞߵߏ߬ ߞߎ߲߭ ߞߍ߫ ߏ߬ ߞߏ ߟߊߕߍ߰ߓߊߟߌߦߊ ߘߌ߫ ߝߊ߰ߡߊ ߟߎ߬ ߓߟߏ߫.

ߓߊߏ߬߸ ߊ߲ ߣߐ߬ ߕߐ߲ߓߟߏߡߊߗߍ ߢߌ߬ߣߌ߲߬ߞߊ߬ ߟߊ ߗߍ߭ ߟߊ߫ ߞߏ ߟߌ߬ߤߟߊ ߡߊ߬߸ ߣߴߊ߬ ߛߊ߬ߣߍ߲߫ ߠߋ߬ ߥߟߊ߫ ߍ߲߬ߍ߲ߍ߲߬߸ ߊ߬ ߡߊ߫ ߛߐ߲߬ ߞߎߡߊ ߏ߬ ߖߋ߬ߓߌ߬ ߟߊ߫، ߊ߬ ߞߵߊ߬ ߘߍ߲߫ ߠߋ߬ ߞߏ߫: <<ߊ߲ ߧߋ߫ ߘߊ߲ߘߊߟߌߟߊ ߟߎ߬ ߟߊ߫ ߡߊ߬ߝߟߍ߬ߟߌ ߞߐߝߟߌ ߟߋ߬ ߡߊߞߐ߬ߣߐ߲߬ ߠߊ߫، ߏ߬ ߞߐߝߍ߬ ߛߊ߫߸ ߊ߲ ߘߌ߫ ߛߴߊ߬ ߝߐ߫ ߟߴߊߟߎ߫ ߦߋ߫ ߞߵߊ߬ ߟߊߕߍ߰ ߥߟߊ߫ ߞߵߊ߬ ߡߊߛߐ߬ߛߐ߬߸ ߣߴߊ߬ ߞߍ߲ߘߍ ߟߋ߬ ߥߟߊ߫ ߍ߲߬ߍ߲ߍ߲߬.>> ߊ߬ ߞߵߏ߬ ߟߊߛߋ߫.

ߘߊߙߑߛߊ߬ߟߊߡ ߛߌ߰ߓߊ߮ ߘߏ߫ ߞߏ߫ ߡߎߛߊ߫ ߞߐ߲ߘߍ߫߸ ߏ߬ ߝߣߊ߫ ߞߵߊ߬ ߡߙߌߦߊ ߘߌ߫ ߞߊ߬ ߓߍ߲߬ ߣߌ߲߬ ߞߏ ߕߊ߬ߡߌ߲߬ ߢߊ ߡߊ߬، ߊ߬ߟߋ ߞߵߊ߬ ߦߌ߬ߘߊ߬ ߞߏ߫ ߞߊ߬ߦߌ߯ ߁߄ߕߎߡߊ ߟߋ߬ ߟߊ߫߸ ߞߵߊ߬ ߛߐ߬ߘߐ߲߬ ߊ߬ߟߋ ߦߴߊ߬ ߟߊ߫ ߔߏߔߏ ߞߊ߲߬ ߞߏ߫ ߊ߬ ߥߊߕߐ߫ ߛߋ߫ ߟߴߊ߬ ߘߍ߬ߢߐ߮ ߘߏ߫ ߓߘߊ.

<<ߒߠߋ ߞߊ߬ ߔߏߔߏ ߕߊ߬ ߞߊ߬ ߓߐ߫ ߜ߭ߎ߬ߘߐߙߐ߲ ߞߊ߲߬߸ ߊ߬ ߞߊ߬ ߒߠߋ ߝߟߐ߫ ߡߊߖߊ߲߬، ߒߠߋ ߞߊ߲߫ ߞߏ߫ ߋ߫߹ ߊ߬ߝߐ߫ ߣߌ߲߬ ߞߎ߬ߛߊ߲߫ ߞߐ߲߬ߛߏ ߟߊ߫ ߓߊ߬.>>

ߏ߬ ߡߊ߫ ߡߍ߲߫߸ ߡߊ߲ߘߙߊߛߊߘߋ߲ ߘߏ߫ ߟߎ߫ ߕߍ߬ߘߍ߫ ߣߊ߭ ߟߊ߫ ߞߊ߬ ߓߐ߫ ߡߊ߲ߘߙߊߛߊ ߟߊ߫߸ ߞߵߏ߬ ߞߋߟߋ߲߫ ߜߊ߬ߛߌ߫ ߊ߬ ߟߊ߫ ߞߕߐߦߋߟߊ߲ ߠߊ߫߸ ߞߵߏ߬ ߞߊߘߌ߫.

ߡߎߛߊ߫ ߞߐ߲ߘߍ߫ ߟߊ߫ ߝߐߟߌ߫ ߘߐ߫߸ ߞߏ߫ ߗߍ߭ ߟߊ߫ ߞߕߐߦߋߟߊ߲ ߞߊߘߌ ߡߍ߲ ߞߍ߫ ߘߊ߫߸ ߊ߬ ߞߵߊ߬ ߟߐ߬، ߊ߬ ߟߊ߫ ߝߋ߲ ߡߍ߲ ߓߋ߬ ߘߊ߫߸ ߊ߬ ߣߊ߬ ߘߊ߫ ߏ߬ ߕߊ߬߸ ߞߊ߬ ߓߊ߲߫ ߞߊ߬ ߦߍ߬ߟߍ߫ ߞߐ߲߬ߛߏ ߞߣߐ߫، ߊ߬ߟߋ߫ ߞߵߊ߬ ߛߋ߲߬ߢߊ߫ ߝߌ߬ߟߊ߬ ߓߍ߯ ߞߍ߫ ߛߌߟߊ߫ ߞߋߟߋ߲ ߏ߬ ߞߊ߲߬߸ ߞߵߊ߬ ߛߐ߬ߘߐ߲߬ ߗߍ߬ߡߐ߰ߓߊ ߦߴߊ߬ ߣߐ߬ ߞߋߟߋ߲ ߏ߬ ߘߐ߫ ߦߋ߲߬.

ߞߵߊ߬ ߕߊ߬ ߕߟߋ߬ߞߎߣߊ߫ ߖߋ߲ߖߋ߲߭ ߏ߬ ߡߊ߬ ߤߊ߲߯ ߥߎ߬ߙߘߊ߬ߣߍ߲ ߝߍ߬߸ ߗߍ߭ ߕߘߍ߬ ߢߊ ߏ߬ ߡߊ߬ ߦߋ߲߬، ߝߏ߫ ߕߐ߲ߓߟߏߡߊ ߟߎ߬ ߟߊߟߐ߲ߠߌ߲߫ ߘߊ߫߸ ߏ߬ ߟߎ߫ ߣߊ߬ ߘߴߊ߬ ߕߊ߬.

ߒ߬ߓߊ߬߸ ߘߊ߲ߘߊߛߏ ߓߊ߯ ߖߋ߬ߓߌ ߡߍ߲ ߠߊߓߐ߫ ߊ߬ ߟߊ߫ ߞߏ ߢߊߢߌߣߌ߲ߣߍ߲ ߞߐ ߘߐ߫ ߛߊ߫߸ ߏ߬ ߟߋ ߞߍߕߐ߫ ߌߓߙߊߤߌߡߊ߫ ߓߊߓߊ ߛߊ߲ߞߊߙߋ߫ ߟߊ߫ ߞߏ ߟߊߜߍ߫ ߟߊ߫߸ ߞߵߊ߬ ߟߌ߬ߤߟߊ߬ ߖߐ߲ߖߐ߲ ߟߐ߲߫.