ߡߙߊ߬ߒ߬ߡߊ߬ߟߌ ߡߍ߲ ߞߍ߫ ߘߊ߫ ߡߊ߬ߟߌ ߟߊ߫ ߓߌ߬ ߞߐ߬ߟߏ߲ ߣߌ߲߬ ߡߊ߬ ߞߊ߬ߙߌ߬ߝߐ ߕߟߋ߬ ߁߭߸ ߝߡߞ ߣߐ߬ ߥߟߊ߬ߟߋ߲ ߡߍ߲ ߛߓߍ߫ ߟߴߏ߬ ߞߊ߲߬߸ ߏ߬ ߦߋ߫ ߕߐ߮ ߘߌ߫ ߟߊ߫ ߓߊ߰ߓߊ߰ߟߌ߬ߟߊ ߟߎ߫ ߟߋ߬ ߡߊ߬ ߡߙߊ߬ߒ߬ߡߊ߬ߟߌ ߣߌ߫ ߦߙߍߞߍߟߌ ߣߌ߲߬ ߘߐ߫߸ ߞߊ߬ ߡߊ߬ߟߌ ߣߊ߲߬ߕߌ߮ ߟߎ߬ ߕߡߊߢߐ߲߯ߓߐ ߥߓߊ߬ߞߏ߬ߞߍ ߏ߬ ߘߊ߲ߞߎ߲߫ ߡߊ߬ߓߌ߬ߟߊ߬ߕߊ߫ ߘߌ߫، ߏ߬ ߟߋ ߘߐ߫߸ ߓߋߟߋ߲ߘߊ ߣߌ߲߬ ߘߐߓߍ߲߬ߣߴߊ߲ ߓߟߏ߫ ߡߊ߬ߞߕߌ߬ߟߌ߬ ߞߊ߲ߡߵߊ߬ ߞߏ߫ ߛߎ߮ ߣߴߊ߬ ߢߐ߲߰ ߘߐ ߟߎ߬ ߘߊߞߘߐ߫.
ߓߋߟߋ߲ߘߊ ߣߌ߲߬ ߘߐߓߍ߲߬ߣߍ߲߫ ߛߌߟߊߓߐߛߐ߯ߣߊ߫ ߛߍߝߍ߲ߘߊ ߟߋ߬ ߓߟߏ߫߸ ߞߵߊ߬ ߟߊߥߟߌ߬ ߝߐ߰ߓߍ߬ߦߊ߬ߟߌ ߞߏߘߐߡߙߌ ߘߏ߫ ߟߎ߫ ߥߊ߭ ߟߊߞߊ߭ ߡߊ߬ ߞߎ߲߬ߕߋ߬ߟߋ߲߬ ߞߏ ߡߊ߬ߘߎ߮ ߘߐ߫.
߂߀߂߅ ߞߊ߬ߙߌ߬ߝߐ ߕߟߋ߬ ߁߭ ߣߌ߲߬ ߡߊ߬߸ ߝߊ߬ߙߊ߲߬ߛߌ߫ ߡߊ߲߬ߕߏ߲߬ߕߍ߬ ߞߎߡߊߛߏ (ߝߡߞ) ߞߊ߬ ߞߎߡߘߊ ߘߏ߫ ߟߊߖߍ߲ߛߍ߲߫߸ ߡߍ߲ ߞߎ߲߬ߕߐ߮ ߦߋ߫ ߞߏ߫: <<ߡߊ߬ߟߌ: ߛߛߞߞ ߓߊ߰ߓߊ߰ߟߌ߬ ߞߙߎ ߓߘߊ߫ ߡߙߊ߬ߒ߬ߡߊ߬ߟߌ ߞߍ߫ ߢߐ߲߮ ߞߐ߫ ߦߙߐ߫ ߥߐߙߐ߲ߝߌ߬ߟߊ߬ ߘߐ߫߸ ߊ߬ ߕߌ߯ߕߌ߯ ߞߊ߬ߦߋ߫߸ ߢߐ߯ߙߐ߫߸ ߢߣߐ߫.>> ߊ߬ߟߎ߬ ߟߊ߫ ߛߓߍߟߌ ߏ߬ ߟߋ ߞߣߐߞߍߣߍ߲߫ ߞߎߡߊ߫ ߟߎ߫ ߟߊ߫߸ ߡߐ߰ ߦߴߊ߬ ߖߘߍ߬ ߡߊߢߌ߬ߣߌ߲߬ߞߊ߬ ߟߊ߫ ߡߍ߲ ߦߙߐ ߘߏ ߟߎ߫ ߡߊ߬߸ ߞߵߊ߬ ߓߍ߲߬ ߞߎߡߊ ߟߎ߬ ߛߎߡߊ߲߫ ߢߊ ߡߵߊ߬ߟߎ߬ ߓߟߏ߫.
ߊ߬ ߞߎ߲߬ߕߐ߮ ߡߍ߲ ߖߍ߬ߘߍ ߝߟߐ߫ ߦߋ߫ ߣߌ߲߬ ߡߎߣߎ߲߬߸ ߏ߬ ߦߋ߫ ߡߐ߱ ߟߎ߬ ߖߎ߬ߛߎ ߟߊߓߐ߫ ߟߊ߫ ߟߋ߬: ߓߊߏ߬߸ ߓߊ߰ߓߊ߰ߟߌ߬ߟߊ ߟߎ߫ ߟߋ߬ ߓߌ߬ߟߊ߬ߣߴߊ߬ߟߎ߬ ߓߟߏ߫ ߢߍߝߍ߬߸ ߞߵߏ߬ ߟߎ߬ ߞߍ߫ ߛߊ߬ ߞߎ߲ ߘߌ߫߸ ߞߵߊ߬ߟߎ߬ ߦߌߘߊߞߊ߬ ߦߏ߫ ߡߐ߱ ߡߍ߲ ߠߎ߬ ߟߊߘߍ߬ߣߍ߲߬ ߞߏ߫ ߛߊߣߌ߲ߡߊ߲߫ ߞߊ߲߬߸ ߛߋ ߦߋ߫ ߡߍ߲ ߠߎ߬ ߦߋ߫߸ ߊ߬ߟߎ߫ ߝߊ߲߬ߞߊ ߓߏ߲߬ߓߊ߬، ߣߊ߲߬ߕߌ߮ ߟߎ߬ ߟߊ߫ ߕߊߛߙߊߟߌ ߡߍ߲ ߞߍ߫ ߘߊ߫߸ ߊ߬ߟߎ߬ ߘߊ߫ ߡߊ߫ ߛߴߏ߬ ߡߊ߬ ߖߍ߬ߘߍ߸ ߏ߬ ߡߍ߲ ߦߴߊ߬ ߦߌ߬ߘߊ߬ ߟߊ߫ ߌߞߘߐ߫ ߞߏ߫ ߊ߬ߟߎ߬ ߟߊ߫ ߞߎߡߊ ߓߎ߲ߓߎ߲ߣߍ߲߫ ߕߍ߫ ߞߍߣߍ߲߫ ߞߊ߲߬߸ ߝߏ߫ ߒߕߊߓߍ߲ߞߣߐߦߊ.
ߣߌ߫ ߕߎ߬ߢߊ ߦߋ߫ ߕߋߟߋ߲ ߘߐ߫߸ ߕߎ߬ߢߊ ߦߋ߫ ߕߎ߬ߢߊ ߘߐ߫߸ ߞߎ߲߬ߕߐ߮ ߞߊ߫ ߞߊ߲߫ ߞߊ߬ ߖߡߊ߬ߣߊ ߟߋ߬ ߟߊ߫ ߛߋߓߊ߯ߦߊ ߦߌ߬ߘߊ߬߸ ߊ߬ ߣߌ߫ ߡߙߊ߬ߒ߬ߡߊ߬ߟߌ߬ߟߊ ߟߎ߫ ߡߐ߰ ߦߙߌߞߊ ߡߍ߲ ߝߊ߰ߣߍ߲߬߸ ߊ߬ ߣߌ߫ ߣߊ߲߬ߕߌ߮ ߟߎ߫ ߞߵߊ߬ߟߎ߬ ߛߋߞߏߦߊ ߡߍ߲ ߞߍ߫ ߟߊ߬ߞߊ߲߬ߘߊ߬ߟߌ ߘߐ߫.
ߊ߬ߟߎ߬ ߟߊ߫ ߞߎߡߊ ߟߎ߬ ߦߋ߫ ߖߌߘߊ߲ ߘߌ߫ ߟߊ߫ ߛߎ߬ߟߊ߬ߡߊ ߟߎ߬ ߣߌ߫ ߛߌ߬ߟߡߊ߬ߦߊ߫ ߞߐߡߊߓߌ߲ߓߌ߲߫ ߞߙߎ ߟߋ߬ ߡߊ߬߸ ߏ߬ ߡߍ߲ ߦߋ߫ ߊߟߑߞߊߦߌߘߊ ߓߏߟߏ߲ ߘߏ߫ ߘߌ߫ ߞߊ߬ߣߌ߲߬. ߊ߫߹ ߡߐ߰ ߓߊ߯ ߓߊ߰ߓߊ߰ߟߌ߬ߟߊ ߕߐ߮ ߝߐ߫ ߦߋ߲߬ ߕߋ߲߬߸ ߌ ߡߴߊ߬ ߛߐ߲߬ ߝߐ߫߸ ߌ ߡߴߊ߬ ߡߊߞߕߌ߫߸ ߌ ߡߴߊ߬ ߓߌ߬ߟߴߊ߬ ߡߎ߬ߙߊ߲߬ ߞߣߐ߫߸ ߊ߬ ߣߌ߫ ߡߍ߲ ߦߊ߫ ߞߊ߲߫߸ ߏ߬ ߦߋ߫ ߡߎ߲߬ ߦߌ߬ߘߊ߬ ߟߊ߫؟ ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߍ߬ ߞߏ߫ ߞߎߡߊ ߓߎ߲ߓߎ߲ߣߍ߲߫ ߓߊ߰ߓߊ߰ߟߌ߬ߟߊ ߟߎ߬ ߛߊ߬ߥߏ߬ ߝߐ ߟߋ߬ ߡߊ߬߸ ߦߙߐ߫ ߝߣߊ߫ ߓߟߏ߫߸ ߘߎߢߊ߫ ߢߊ ߦߋ߫ ߡߍ߲ ߠߊ߫ ߞߏ ߟߎ߬ ߘߐ߫ ߞߊ߬ߣߌ߲߬.
ߛߓߍ߬ߣߊ߲߬ ߝߐ߰ߓߍ߬ߘߊ߬ ߝߏߦߌ߬ ߕߍ߫ ߛߐ߲߬ ߞߎߡߊ߫ ߟߊ߫ ߦߋ߲߬ ߕߋ߲߬߸ ߞߵߊ߬ ߛߐ߬ߘߐ߲߬ ߌ ߡߊ߫ ߞߎߡߊ ߛߎ߲ ߢߊߢߌߣߌ߲߫߸ ߞߵߊ߬ ߟߐ߲߫ ߊ߬ ߓߐߣߍ߲߫ ߡߌ߲߫߸ ߞߵߊ߬ ߡߊߝߟߍ߫ ߡߎߣߎ߲߬ ߞߵߊ߬ ߛߍ߯ߛߍ߯. ߊ߬ ߘߏ߲߬߸ ߡߊ߬ߟߌ ߣߊ߲߬ߕߌ߮ ߟߎ߬ ߓߘߊ߫ ߟߊ߬ߛߋ߬ߟߌ ߞߍ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߓߘߊ߫ ߓߊ߰ߓߊ߰ߟߌ߬ߟߊ߫ ߡߐ߰ ߈߀ ߝߊ߰߸ ߞߊ߬ ߘߎ߰ߞߎߟߎ߲ ߘߏ߫ ߟߎ߫ ߡߌ߬ߘߊ߬߸ ߞߵߊ߬ߟߎ߬ ߓߟߏߝߋ߲߫ ߛߌߦߊߡߊ߲߫ ߡߌ߬ߘߊ߬߸ ߞߊ߬ ߛߏ߫ ߛߌߦߊߡߊ߲߫ ߓߐ߫ ߊ߬ߟߎ߬ ߓߟߏ߫، ߡߎ߲߬ ߞߊ߬ ߞߎߡߊ ߏ߬ ߛߋ߫ ߊ߬ߟߎ ߟߊ߫ ߥߟߊ߬ߟߋ߲ ߞߎ߲߬ߝߊ߮ ߟߊ߫߸ ߊ߬ߟߎ߬ ߡߴߊ߬ ߟߊߣߊ߬ ߛߊ߲ߝߍ߬ ߘߋ߬߸ ߝߏ߫ ߘߎ߱ ߡߊ߬؟
ߊ߬ߟߎ߬ ߞߎߡߊ߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߓߊ߰ߓߊ߰ߟߌ߬ߟߊ ߟߎ߬ ߓߘߊ߫ ߦߙߐ ߘߏ߫ ߟߎ߫ ߡߌ߬ߘߊ߬߸ ߡߎ߲߬ ߠߊ߫ ߣߊ߲߬ߕߌ߮ ߟߎ߬ ߝߣߊ߫ ߞߊ߬ ߦߙߐ ߡߍ߲ ߠߎ߬ ߡߌ߬ߘߊ߬߸ ߊ߬ߟߎ߬ ߡߊ߫ ߝߋ߲߫ ߝߐ߫ ߏ߬ ߟߎ߫ ߞߊ߲߬؟ ߊ߬ߟߎ߬ ߡߊ߫ ߞߎߡߊ߫ ߣߊ߲߬ߒ߬ߕߊ߲ ߠߎ߬ ߟߊ߫ ߘߐ߬ߖߊ߬ ߞߍߣߍ߲ ߞߊ߲߬߸ ߊ߬ߟߎ߬ ߡߊ߫ ߞߎߡߊ߫ ߡߊ߬ߟߌ ߣߊ߲߬ߕߌ߮ ߟߎ߬ ߟߊ߫ ߘߐ߬ߖߊ ߞߊ߲߬߸ ߊ߬ߟߎ߬ ߡߊ߫ ߝߋ߲߫ ߝߐ߫ ߝߣߊ߫߸ ߕߙߐߦߊ ߛߋߣߍ߲߫ ߡߊ߬ߟߌ ߣߊ߬ߒ߬ߕߊ߲ ߡߍ߲ ߠߎ߬ ߡߊ߬߸ ߊ߬ߟߎ߬ ߡߊ߫ ߝߋ߲߫ ߝߐ߫ ߏ߬ ߟߎ߬ ߝߣߊ߫ ߞߊ߲߬߸ ߝߏ߫ ߣߊ߲߬ߕߌ߮ ߡߍ߲ ߠߎ߬ ߞߊ߬ ߕߙߐߦߊ ߛߐ߬ߘߐ߲߬ ߘߐߙߐ߲߫.
ߜߟߍ߬ߦߊ ߕߎ߬ߡߊ߬ ߛߎ߮ ߢߌ߲߬ ߠߊ߫߸ ߊ߬ߟߎ߬ ߟߊ߫ ߞߎߡߊ ߞߍߢߊ߫ ߛߎ߮ ߣߌ߲߬ ߦߋ߫ ߣߡߌߛߊ ߟߋ߬ ߘߌ߫ ߖߡߊ߬ߣߊ߬ߘߋ߲ ߠߎ߬ ߦߋ߫߸ ߊ߬ ߦߋ߫ ߡߐ߰ ߟߊߡߐߣߍ߫ ߟߊ߫ ߟߋ߬، ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߣߌ߫ ߡߍ߲ ߠߎ߬ ߕߴߊ߬ ߞߏ ߘߎ߰ߙߋ߲߬ߧߊ ߞߊ߬ߟߊߡߊ߬߸ ߊ߬ ߘߴߏ߬ ߟߎ߬ ߟߊߡߐߣߍ߫ ߡߊ߬ߟߌ ߝߊ߰ߡߊ ߟߎ߫ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߖߊ߰ ߊ߬ߟߎ߬ ߕߍ߫ ߞߏ߫ ߞߎ߲߬ߠߊ߬.
ߊ߬ߟߎ߬ ߟߊ߫ ߛߓߍߟߌ ߘߐ߫߸ ߊ߬ߟߎ߬ ߡߊ߫ ߛߙߋߦߊ߫ ߟߊ߫ ߞߎߡߊ߫ ߝߐ߫߸ ߊ߬ߟߎ߬ ߡߊ߫ ߡߐ߱ ߟߎ߬ ߟߊ߫ ߛߍߥߊ߫ ߣߴߊ߬ߟߎ߬ ߟߊ߫ ߡߐߣߍ߫ ߦߌ߬ߘߊ߬߸ ߡߐ߱ ߟߎ߬ ߞߊ߬ ߓߟߏ ߘߌ߫ ߢߐ߲߰ ߡߊ ߡߍ߲ ߞߍ߫߸ ߊ߬ߟߎ߬ ߡߴߏ߬ ߞߎߡߊ߫ ߝߐ߫.
ߍߙߍߝߌ ߡߍ߲ ߡߊߟߐ߲ߣߍ߲߫ ߊ߬ ߟߊ߫ ߛߓߍ߬ߣߊ߲߬ ߞߊ߲߬ ߝߐ ߡߊ߬߸ ߓߍ߯ ߟߊߣߍ߲߫ ߡߍ߲ ߠߊ߫ ߞߎߡߊ ߟߎ߬ ߟߊ߫ ߝߘߊ߬ߝߌ߲߬ߠߊ߫ ߦߊ߲߬߸ ߤߊߟߌ߬ ߘߎߢߊ߫ ߞߣߐ߫߸ ߣߴߏ߬ ߞߊ߬ ߞߎߡߊ ߛߎ߮ ߣߌ߲߬ ߛߓߍ߫߸ ߊ߬ߝߐ߫ ߡߐ߰ ߘߴߊ߬ ߝߐ߫ ߓߊ߬ ߞߏ߫ ߊ߬ߟߎ߬ ߡߴߊ߬ ߟߊߥߌ߬ߟߌ߫ ߊ߬ ߡߊ߬؟ ߞߊ߯ߙߌ߫߸ ߏ߬ ߕߴߛߋ߫ ߝߐ߫ ߟߊ߫، ߞߊ߬ ߝߊ߲߬ߞߊ߬ ߘߌ߫ ߓߊ߰ߓߊ߰ߟߌ߬ߟߊ ߟߎ߫ ߡߊ߬߸ ߞߊ߬ ߣߊ߲߬ߕߌ߮ ߟߎ߬ ߟߊ߫ ߕߊߢߐ߲߯ߓߐ ߛߍ߰ ߞߍߣߍ߲ ߠߎ߬ ߘߏ߲ ߓߐ߰ ߟߊ߫.
ߛߌߟߊߓߐߛߐ߯ߣߊ߫ ߛߍߝߍ߲ߘߊ
