ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ (ߞߞߢ) ߓߍߣߵߊ߬ߟߎ߬ ߟߊ߫ ߞߊ߬ߝߏ߬ ߞߎ߲ߕߌ߮ ߟߎ߬ ߟߊ߫ ߢߐ߲߯ߓߍ߲ ߝߌߟߊߣߊ߲ ߞߍ߫ ߓߡߊ߬ߞߐ߫ ߟߋ߬ ߢߌ߬ߣߊ߲߬ ߂߀߂߅ ߞߏߟߌ߲ߞߏߟߌ߲ ߠߊ߫، ߟߊ߬ߛߋ߬ߟߌ ߏ߬ ߞߍ߫ ߘߊ߫ ߣߊ߲߬ߕߌ߰ߘߊ ߞߟߍ߬ߕߌ߯ ߊߛߡߌ߫ ߜ߭ߏ߬ߦߌ߬ߕߊ߫ ߟߋ߬ ߓߟߏ߫߸ ߡߊ߬ߟߌ ߘߐ߬ߕߊߡߌ߲ ߞߊ߲ߕߌ߮ ߣߌ߫ ߞߙߎߝߊߢߐ߲߯ߦߊ ߞߊ߲ߕߌ߮.
ߟߊ߬ߛߋ߬ߟߌ ߣߌ߲߬ ߞߍ߫ ߘߊ߫ ߓߌ߬ ߂߀߂߅ ߞߊ߬ߙߌ߬ߝߐ ߕߟߋ߬ ߄ ߢߌ߲߬ ߠߋ߬ ߡߊ߬߸ ߡߍ߲ ߘߐߞߊ߬ߙߊ߲߬ ߘߊ߫ ߡߊ߬ߟߌ ߖߌ߬ߦߊ߬ߞߊ߲߬ߛߏ߬ߓߊ ߟߊ߫߸ ߡߍ߲ ߞߟߊ߬ߣߐ߬ߦߊ߬ߣߍ߲߫ ߊߛߡߌ߫ ߜ߭ߏ߬ߦߌ߬ߕߊ߬ ߓߟߏ߫، ߊ߬ߟߎ߫ ߞߵߊ߬ ߦߌ߬ߘߊ߫ ߛߓߍ ߣߌ߲߬ ߞߣߐ߫ ߞߏ߫: <<ߡߊ߬ߓߏ߲߬ߧߊ߬ߕߊ ߢߍߡߌߘߊ߫ ߌߓߙߊߤߌߡ߸ ߓߙߎߞߌߣߊ߫ ߝߊ߬ߛߏ߬ ߞߊ߲ߕߌ߮ ߣߌ߫ ߞߊ߬ߝߏ߬ ߞߎ߲ߕߌ߮߸ ߊ߬ ߣߌ߫ ߣߊ߲߬ߕߌ߰ߘߊ ߞߟߍ߬ߕߌ߮ ߊߓߘߎߙߊߤߑߡߊߣߌ߲߬ ߗߊ߬ߣߌ߬߸ ߖߋ߬ߟߌ߬ߓߊ߬ߘߎ߰ ߞߊ߲ߓߍ߲ ߞߊ߲ߕߌ߮ ߣߌ߫ ߞߊ߬ߝߏ߬ ߞߎ߲ߕߌ߮߸ ߏ߬ ߟߎ߬ ߓߍ߯ ߞߏߟߊߒߞߘߐߢߐ߲߯ߦߊ ߞߐߝߍ߬.>> ߟߊ߬ߘߍ ߣߌ߲߬ ߞߍ߫ ߞߏ ߡߙߌߘߐߕߊ߬ ߘߊ߫.
ߊ߬ߟߎ߬ ߦߴߊ߬ ߔߘߋߔߘߋߟߊߕߍ߰ ߟߊ߫ ߝߣߊ߫߸ ߞߏ߫ ߟߊ߬ߘߍ ߣߌ߲߬ ߞߍߕߐ߫ <<ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ (ߞߞߢ) ߞߊ߬ߝߏ߬ ߞߎ߲ߕߌ߮ ߟߎ߬ ߟߊ߫ ߢߐ߲߯ߓߍ߲ ߠߋ߬ ߘߌ߫.>> ߡߍ߲ ߞߍߣߍ߲߫ ߖߡߊ߬ߣߊ߫ ߛߊ߬ߓߊ ߓߍ߯ ߟߊ߫ ߓߍ߲߬ߡߊ ߟߊ߫߸ ߣߊߟߌ߬ߡߎ߲߫ ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߘߌ߫߸ ߞߵߊ߬ ߟߊߥߌ߬ߟߌ߫ ߊ߬ߟߎ߬ ߟߊ߫ ߓߊ߯ߙߊߢߐ߲߯ߦߊ ߞߏߕߊ ߟߎ߫ ߝߊ߲߬ߞߊߘߏ߲߭ ߡߊ߬.
ߞߌ߬ߢߍ߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ ߞߙߎߝߊߢߐ߲߯ߦߊ ߣߌ߲߬ ߡߍ߲ ߠߊߘߊ߲߫ ߘߊ߫ ߂߀߂߃ ߟߊ߫߸ ߊ߬ ߦߋ߫ ߓߘߍ߬ߓߘߍ߬ߟߌ ߖߘߍ߬ߕߌ߰ߦߊ ߡߙߌߦߊ ߟߋ߬ ߘߌ߫߸ ߊ߬ ߣߌ߫ ߓߍ߯ ߟߊ߫ ߟߊ߬ߞߊ߲߬ߘߊ߬ߟߌ ߞߘߎ߬ߛߌ߰ߒ߬ߞߊ߲ߠߊ߫ ߝߘߏ߬ߓߊ߬ߡߊ߸ ߞߵߏ߬ ߟߊ߫ ߖߡߊ߬ߣߊ߫ ߛߊ߬ߓߊ ߢߌ߲߬ ߠߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߖߘߍ߬ߕߌ߰ߦߊ ߞߊ߲߬ ߞߌ߬ߢߍ߬ߞߏ߲ߞߏ߫ ߞߊ߲߬، ߊ߬ߟߎ߬ ߟߊ߫ ߢߐ߲߯ߓߍ߫ ߝߌߟߊߣߊ߲ ߣߌ߲߬ ߡߊߞߐ߬ߣߐ߲߬ߣߍ߲߬ ߓߊߟߋ߬߸ ߞߵߏ߬ ߞߎ߲߭ ߞߍ߫߸ ߊ߬ߟߎ߬ ߓߍߣߴߊ߬ߟߎ߬ ߢߊ ߡߊߖߌ߰ ߞߏ߫ ߛߌߦߊߡߊ߲߫ ߠߋ߬ ߞߘߐ߫ ߊ߬ߟߎ߬ ߟߊ߫ ߞߙߎߝߊ ߟߊ߫ ߖߊ߬ߕߋ߬ߘߐ߬ߛߌ߮ ߟߎ߬ ߘߐ߫.
ߊ߬ߟߋ߬ ߘߐ߬ߛߙߋ ߞߟߊ߬ߣߐ߬ߦߊ߬ ߘߊ߫ ߞߟߍ߬ߕߌ߰ ߊߛߡߌ߫ ߜ߭ߏ߬ߦߌ߬ߕߊ߫ ߟߋ߬ ߓߟߏ߫߸ ߊ߬ߟߋ ߡߍ߲ ߦߋ߫ <<ߡߊ߬ߟߌ ߞߊ߲ߓߍ߲ ߞߊ߬ߝߏ߬ ߞߎ߲ߕߌ߮ ߣߌ߫ ߘߐ߬ߕߊߡߌ߲ ߞߊ߲ߕߌ߮ ߘߌ߫߸ ߊ߬ ߣߌ߫ ߞߌ߬ߢߍ߲߬ߞߏ߲߬ߞߏ߬ ߞߊߝߏ ߟߎ߬ ߟߊ߫ ߢߌ߲߬ߘߍ (ߞߞߢ) ߞߙߎߝߊߢߐ߲߯ߦߊ ߞߊ߲ߕߌ߮.>> ߊ߬ ߟߊ߫ ߞߟߊ߬ߣߐ ߣߴߊ߬ ߟߊ߫ ߓߊ߬ߘߌ߬ߟߊ߲ ߠߋ߬ ߝߣߊ߫ ߕߍ߬ߘߍ߫ ߊ߬ ߞߊ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
